וַיְהִי בַּיָמִים הָרַבִּים הָהֵם וַיָמוּתוּ כָּל בְּנֵי יָעֲקֹב, אֲחֵי יוֹסֵף וַיָחֵלוּ הַמִצְרִים לְעַנוֹת אֶת בְּנֵי יִשְׂרָאֵל וּלְמַרֵר אֶת חַיֵיהֶם: וַיִקְחוּ מִידֵיהֶם אֶת כָּל הַכְּרָמִים וְהַשָׂדוֹת אֲשֶר נָתַן לָהֶם יוֹסֵף וְאֶת כָּל הַבָּתִּים הַטוֹבִים אֲשֶר בָּנוּ. וַתֵּלֵךְ יַד מִצְרַיִם הָלוֹךְ וְקָשָה עַל בְּנֵי יִשְׂרָאֵל. וּבַיָמִים הָהֵם מֵת פַּרְעֹה מֶלֶךְ מִצְרַיִם, אֲשֶר אָהֵב אֶת יוֹסֵף, וַיִמְלֹךְ מַלוּל בְּנוֹ תַחְתָּיו; וַיִקְרְאוּ הַמִצְרִים גַם אֶת שְמוֹ פַרְעֹה. וְגַם כָּל שָׂרֵי מִצְרַיִם וְגִבּוֹרֶיהָ אֲשֶר יָדְעוּ אֶת יוֹסֵף מֵתוּ, וַיָקָם דוֹר חָדָש אֲשֶר לֹא זָכַר אֶת כָּל הַטוֹב אֲשֶר עָשָׂה יוֹסֵף לְאֶרֶץ מִצְרָיִם.

וּבָעֵת הַהִיא הוֹסִיפוּ גְדוּדֵי אוֹגִיאַש לִפְשׂט בְּאֶרֶץ כִּתִּים. וַיֵצֵא צְפוֹ לִקְרָאתָם וַיַכֵּם לְפִי חֶרֶב וְלֹא הִשְאִיר בָּהֶם שָׂרִיד וּפָלִיט. וַיִשְמַע אוֹגִיאַש אֶת הַדָבָר הַזֶה וַיֶאֱסֹף אֶת כָּל צִבְאוֹתָיו, וַיִשְלַח מַלְאָכִים אֶל לוּקַש אָחִיו לֵאמוֹר: בֹּא אֵלַי וְעָזְרֵנִי, וְנַכֶּה אֶת צְפוֹ וְאֶת בְּנֵי כִתִּים אֲשֶר הִשְמִידוּ אֶת אֲנָשַי לְפִי חָרֶב. וַיָבֹא לוּקַש עִם כָּל חֵילוֹ לַעֲזֹר לְאוֹגִיאַש אָחִיו בְּמִלְחַמְתוֹ אֶת צְפוֹ מֶלֶך בְּנֵי כִתִּים. וַיִשְמַע צְפוֹ אֶת???? וּבְנֵי כִתִּים אֶת הַדָבָר הַזֶה וַיִפּוֹל פַּחַד עַלֵיהֶם. וַיִשְלַח צְפוֹ גַם הוּא סֵפֶר אֶל הֲדַד בֶּן בְּדַד מֶלֶךְ אֱדוֹם וְאֶל כָּל בְּנֵי עֵשָׂו לֵאמֹר: שָמַעְתִּי כִּי אוֹגִיאַש מֶלֶךְ קַרְתַּגָה וְאָחִיו לוּקַש בָּאִים עָלַי לְהִלָחֵם בִּי וּבִבְנֵי עַמִי, וְעַתָּה עֲלוּ אֵלֵינוּ וְהוֹשַעְתֻּנוּ מִיָדָם, כִּי נָפַל פַּחְדָם עָלֵינוּ. וַיַעֲנוּ בְנֵי עֵשָׂו אֶת מַלְאֲכֵי צְפוֹ לֵאמֹר: לֹא נוּכַל לְהִלָחֵם בְּאוֹגִיאַש וּבְעַמוֹ, כִּי בְרִית שָלוֹם בֵּינֵינוּ זֶה יָמִים רַבִּים מִימֵי בֶלַע בֶּן בְּעוֹר מַלְכֵּנוּ. וְאוֹגִיאַש וְלוּקַש אָחִיו אָסְפוּ אֶת כָּל צִבְאוֹתֵיהֶם הָעֲצוּמִים, כִּשְמוֹנֶה מֵאוֹת אֶלֶף אִיש, וַיֵלְכוּ וַיַעַבְרוּ כִתִּימָה לְהִלָחֵם אֶת צְפוֹ וְאֶת בְּנֵי כִתִּים. וּצְפוֹ יָצָא לִקְרָאתָם בְּפַחַד וּבִרְעָדָה רַק עִם שְלֹשֶת אֲלָפִים אִיש. וַיֹאמְרוּ אֵלָיו אַנְשֵי כִתִּים: הִתְחַנֵן נָא לַה' אֱלֹהֵי אֲבוֹתֶיךָ, אֱלֹהֵי אַבְרָהָם וְיִצְחָק, אוּלַי יַצִילֵנוּ מִכַּף אוֹגִיאַש וְחֵילוֹ הָרָב. וַיִשְמַע צְפוֹ בְּקוֹלָם וַיִתְפַּלֵל אֶל ה' וַיֹאמַר: ה' אֱלֹהֵי אַבְרָהָם וְיִצְחָק אֲבוֹתָי! הַיוֹם יִוָדַע כִּי רַק אַתָּה אֱלֹהִים אֱמֶת: זְכָר נָא אֶת הַבְּרִית אֲשֶר כָּרַתָּ עִם אַבְרָהָם אָבִי וַעֲשֵׂה חֶסֶד עִמִי הַיוֹם בַּעֲבוּרוֹ וְהוֹשַעְתָּ אוֹתִי וְאֶת בְּנֵי כִתִּים מִיַד הַקָמִים עָלֵינוּ לְהַשְמִידֵנוּ. – וַיֵעָתֵר ה' לִצְפוֹ וַיִתֵּן אֶת כָּל אַנְשֵי אוֹגִיאַש וְלוּקַש בְּיָדוֹ וּבְיַד בְּנֵי כִתִּים, וַיַכּוּ בָּהֶם כְּאַרְבַּע מֵאוֹת אֶלֶף אִיש. וַיַרְא אוֹגִיאַש כִּי נָפְלוּ חֲלָלִים כָּל גִבּוֹרָיו וַיִכְתֹב סֵפֶר אֶל כָּל בְּנֵי קַרְתַּגָה כִּי יָחִישוּ לְעֶזְרָתוֹ כָּל יוֹשְבֵי הָאָרֶץ מִבְּנֵי עֶשֶׂר וָמָעְלָה; וַאֲשֶר לֹא יָבֹא לַעֲזֹר לוֹ בְּמִלְחַמְתּוֹ מוֹת יוּמָת וְכָל אֲשֶר לוֹ יָחֳרַם לְאוֹצַר הַמֶלֶךְ. וַיִירְאוּ בְּנֵי קַרְתַּגָה לַמְרוֹת אֶת פִּי מַלְכָּם וַיֵצְאוּ מֵהָעִיר כִּשְלֹש מֵאוֹת אֶלֶף אִיש וָנַעַר מִבֶּן עֶשֶׂר וָמָעְלָה, וַיָבֹאוּ לְעֶזְרַת אוֹגִיאַש מַלְכָּם. וַיְהִי מִקֵץ עֲשָׂרָה יָמִים וַיוֹסֶף אוֹגִיאַש לַעֲרֹךְ מִלְחָמָה אֶת צְפוֹ וְאֶת בְּנֵי כִתִּים וַתְּהִי הַמִלְחָמָה חֲזָקָה מְאֹד, וַיַךְ צְפוֹ בְּמַחֲנֶה אוֹגִיאַש וְלוּקַש בַּיוֹם הַהוּא כְּאַלְפַּיִם אִיש וְגַם סִיסִיפָטֵר¹ שַׂר צְבָא אוֹגִיאַש נָפַל חָלָל בַּמִלְחָמָה הַהִיא. וַיְהִי כַּאֲשֶר רָאוּ בְּנֵי אֶפֵּרִיָה כִּי מֵת שַׂר צְבָאָם וַיִפְנוּ עֹרֵף וַיָנוּסוּ, וְגַם אוֹגִיאַש וְלוּקַש אָחִיו נִמְלְטוּ עַל נַפְשָם. וּבִלְעָם בֶּן בְּעוֹר הָיָה אָז בְּמַחֲנֵה אוֹגִיאַש, וַיְהִי כִּרְאוֹתוֹ כִּי גָבַר צְפוֹ עַל אוֹגִיאַש, וַיִבְרַח מִשָם וַיָבֹא כִתִּימָה, וַיְקַבְּלֵהוּ צְפוֹ וּבְנֵי כִתִּים בְּכָבוֹד גָדוֹל, כִּי יָדְעוּ אֶת חָכְמַת בִּלְעָם בַּקְסָמִים. וַיִמְלֹךְ צְפוֹ עַל כָּל בְּנֵי כִתִּים לָבֶטַח וַתִּגְדַל מַלְכוּתוֹ מְאֹד.