וַיְהִי לִתְקוּפַת הַשָנָה אַחֲרֵי מוֹת יוֹסֵף וַיִבְרַח צְפוֹ בֶּן אֱלִיפַז בֶּן עֵשָׂו מִמִצְרַיִם, הוּא וַאֲנָשָיו, וַיֵלְכוּ וַיָבֹאוּ אֶל אוֹגִיאַש מֶלֶךְ קַרְתַּגָה וַיְקַבְּלֵם אוֹגִיאַש בְּכָבוֹד גָדוֹל וַיָשֶׂם אֶת צְפוֹ לְשַׂר צְבָאוֹ, כִּי מָצָא חֵן בְּעֵינָיו. וַיָסֶת צְפוֹ אֶת אוֹגִיאַש לִקְבֹּץ אֶת כָּל חֵילוֹ וּלְהִלָחֵם בַּמִצְרִים וּבִבְנֵי יִשְׂרָאֵל, וְלִנְקוֹם מֵהֶם אֶת נִקְמַת אֶחָיו בְּנֵי אֱדוֹם. וְלֹא אָבָה אוֹגִיאַש לִשְמֹעַ לִצְפוֹ בַּדָבָר הַזֶה.

וַיְהִי בַּיָמִים הָהֵם וַיְחִי אִיש בְּעִיר פּוֹצִימְנָא¹ אֲשֶר בְּאֶרֶץ כִּתִּים² וּשְמוֹ אוֹצוֹ³ וַיְהִי לִבְנֵי כִתִּים לֵאלֹהַ-תַּעְתּוּעִים. וַיָמָת הָאִיש וּבֵן אֵין לוֹ כִּי אִם בַּת וּשְמָהּ יוֹנִיָה⁴. וְהַנַעֲרָה יָפָה וַחֲכָמָה עַד מְאֹד, לֹא נִרְאָה כְיָפְיָהּ וְחָכְמָתָהּ בְּכָל הָאָרֶץ.

וַיִרְאוּהָ אַנְשֵי אוֹגִיאַש וַיָבֹאוּ וַיְהַלְלוּ אוֹתהָ לִפְנֵי מַלְכָּם. וַיִשְלַח אוֹגִיאַש אֶל בְּנֵי כִתִּים וַיְבַקְשֵם, כִּי יִתְּנוּ אֶת יוֹנִיָה לוֹ לְאִשָה, וַיֵאוֹתוּ לוֹ אַנְשֵי כִתִּים. וַיְהִי כְּצֵאת מַלְאֲכֵי אוֹגִיאַש מֵאֶרֶץ כִּתִּים לָלֶכֶת לְדַרְכָּם, וְהִנֵה מַלְאֲכֵי תִירַנוּס מֶלֶךְ בְּבֵינְטוֹ⁵ בָּא כִתִּימָה וַיִשְאֲלוּ גַם הֵם אֶה יוֹנִיָה לְאִשָה לְמַלְכָּם. וַיַעֲנוּ אוֹתָם בְּנֵי כִתִּים לֵאמֹר: כְּבָר נִתְּנָה לְאוֹגִיאַש מֶלֶךְ אֶפֵּרִיָה וְלֹא יוּכְלוּ לְקַחְתָּהּ מִמֶנוּ, פֶּן יֵצֵא לַמִלְחָמָה עֲלֵיהֶם. וַיָבֹאוּ מַלְאֲכֵי תִירַנוּס וַיַגִידוּ לוֹ אֶת דִבְרֵי בְּנֵי כִתִּים. וּבְנֵי כִתִּים שָלְחוּ סֵפֶר לְאוֹגִיאַש לֵאמֹר: הִנֵה תִירַנוּס מֶלֶךְ בְּבֵינְטוֹ שָלַח אֵלֵינוּ לָקַחַת אֶת יוֹנִיָה לוֹ לְאִשָה וְכָזֹאת וְכָזֹאת עֲנִינוּם. וְעַתָּה שָמַעְנוּ כִּי קָבַץ אֶת כָּל חֵילוֹ לָצֵאת לַמִלְחָמָה עַל אָחִיךָ לוּקַש מֶלֶךְ סַרְדוֹנִיָה⁶ בִגְלַל הַדָבָר הַזֶה, וְאַחַר יָבוֹא לְהִלָחֵם גַם אִתָּךְ. וַיִשְמַע אוֹגִיאַש אֶת דִבְרֵי בְּנֵי כִתִּים וַיֶאֱסֹף אֶת כָּל חֵילוֹ וַיָבֹא בְאִיֵי הַיָם דֶרֶךְ סַרְדוֹנִיָה אֶל לוּקַש אָחִיו לְעָזְרֵהוּ בְּאִם יִתְנַפֵּל עָלָיו תִּירַנוּס. וַיָקוּמוּ אוֹגִיאַש וְלוּקַש אָחִיו, וְחַיִל רַב עִמָהֶם, וַיֵצְאוּ בָאֳנִיוֹת לַמִלְחָמָה לִקְרַאת תִּירַנוּס, וַיַגִיעוּ עַד מְחוֹז אַשְתּוּרַש⁷ וְהִנֵה תִּירַנוּס בָּא לִקְרָאתָם גַם הוּא עִם מַחֲנֶה רַב בָּאֳנִיוֹתָיו. וַיִתְרָאוּ פָנִים שְנֵי הַמַחֲנוֹת בְּבִקְעַת כַּנְפַּנִיָא⁸, וַתִּפְרֹץ מִלְחָמָה בֵּין חֵיל אוֹגִיאַש וְלוּקַש אָחִיו וּבֵין חֵיל תִּירַנוּס. וַתִּכְבַד הַמִלְחָמָה עַל לוּקַש מֶלֶךְ סַרְדוֹנִיָה וַיִפְּלוּ כָל אַנְשֵי חֵילוֹ חֲלָלִים, וְגַם בְּנוֹ נִיקוֹלַש, הוּא שַׂר צְבָאוֹ, נָפַל מֵת בַּמִלְחָמָה הַהִיא. וַיִצַו אוֹגִיאַש אֶת עֲבָדָיו וַיַעֲשׂוּ לִגְוִיַת נִיקוֹלַש גֹלֶם זָהָב וַיִתְּנוּהָ בְּתוֹכוֹ. וַיוֹסֶף אוֹגִיאַש לַעֲרֹךְ מִלְחָמָה נֶגֶד תִּירַנוּס ַוַיְך אוֹתוֹ וְאֶת עַמוֹ לְפִי חָרֶב. וַיְהִי בְּמוֹת תִּירַנוּס בַּמִלְחָמָה וַתִּרְפֶּינָה יְדֵי אֲנָשָיו וַיָנוּסוּ עַל נַפְשָם. וַיִרְדְפוּ אַחֲרֵיהֶם אוֹגִיאַש וְלוּקַש עַד אֵם-הַדֶרֶךְ אֲשֶר בֵּין אַלְפַּנוֹ⁹ וּבֵין רוֹמָא וַיַכו אֶת פְּלִיטֵי תִּירַנוּס לְפִי חַרְבָּם. וְלוּקַש מֶלֶךְ סַרְדוֹנִיָה צִוָה אֶת עֲבָדָיו וַיַעֲשׂוּ אֲרוֹן נְחֹשֶת וַיָשִׂימוּ בְּתוֹכוֹ אֶת גְוִיַת נִיקוֹלַש בְּנוֹ וַיִקְבְרוּהוּ בַּיוֹם הַהוּא, וַיִבְנוּ עָלָיו מִגְדָל גָבֹהַ עַל שְמוֹ. וְגַם אֶת גְוִיַת תִּירַנוּס מֶלֶךְ בְּבֵינְטוֹ קָבְרוּ בַּמָקוֹם הַהוּא, וְהִנֵהוּ עַל אֵם הַדֶרֶךְ בֵּין אַלְפַּנוֹ וּבֵין רוֹמָא: קֶבֶר נִיקוֹלַש מֵעֵבֶר מִזֶה וְקֶבֶר תִּירַנוּס מֵעֵבֶר מִזֶה, וְרִצְפָה בֵינֵיהֶם עַד הַיוֹם הַזֶה. – וְאוֹגִיאַש מֶלֶךְ קַרְתַּגָה עָלָה עִם חֵילוֹ עַל עִיר בְּבֵינְטוֹ, בִּירַת תִּירַנוּס. וַיִשְמְעוּ יוֹשְבֵי בְּבֵינְטוֹ אֶת שֵמַע אוֹגִיאַש וַיִירְאוּ מִפָּנָיו מְאֹד., וַיֵצְאוּ לִקְרָאתוֹ בִּבְכִי וּבְתַחֲנוּנִים לְבִלְתִּי הֲמִיתָם וּלְבִלְתִּי הַשְחִית אֶת עִירָם. וַיַעַשׂ כֵּן אוֹגִיאַש כִּי לְעָרֵי כִתִּים תֵּחָשֵב גַם בְּבֵנְטוֹ, עַל כֵּן לֹא הִשְחִית אֶת הָעִיר. אַךְ מֵהַיוֹם הַהוּא הָיוּ לוֹ יוֹשְבֵי בְּבֵנְטוֹ לְמַס עוֹבֵד. וַיְהִי אַחֲרֵי כֵן וַיָשָב אוֹגִיאַש לְאַרְצוֹ עִירָה פוֹצִימְנָא וַיִקַח שָם אֶת יוֹנִיָה הַיָפָה בַּת אוֹצוֹ לוֹ לְאִשָה.