וַיְהִי בִּשְנַת שְמוֹנִים וְאַרְבַּע לְרֶדֶת בְּנֵי יִשְׂרָאֵל מִצְרַיְמָה, הִיא הַשָנָה הַחֲמִישִית לְמַלְכוּת הֲדַד בֶּן בְּדַד מֶלֶךְ אֱדוֹם וַיִקְבֹּץ הֲדַד אֶת כָּל בְּנֵי עֵשָׂו כְּאַרְבַּע מֵאוֹת אֶלֶף אִיש וַיָשֶׂם פָּנָיו אַרְצָה מוֹאָב לְהִלָחֵם בָּה וּלְשִׂימָהּ לְמַס עוֹבֵד. וַיִשְמְעוּ בְּנֵי מוֹאָב אֶת הַדָבָר הַזֶה וַיִשְלְחוּ מַלְאָכִים אֶל בְּנֵי מִדְיָן לֵאמֹר: בּוֹאוּ וְעִזְרוּנוּ בְּמִלְחַמְתֵּנוּ עִם בְּנֵי אֱדוֹם הַקָמִים עָלֵינוּ. וַיָעַשׂוּ כֵן. וַיִלָחֵם הֲדַד אֶת בְּנֵי מוֹאָב וְאֶת בְּנֵי מִדְיָן וַיַךְ בָּהֶם כְּאַלְפַּיִם אִיש. וַתִּכְבַּד הַמִלְחָמָה עַל בְּנֵי מוֹאָב וַיִרְפּוּ יְדֵיהֶם וַיַעַזְבוּ אֶת בְּנֵי מִדְיָן לְבַדָם בַּמִלְחָמָה. וּבְנֵי מִדְיָן לֹא יָדְעוּ אֶת דְבַר מְנוּסַת הַמוֹאָבִים וַיִתְחַזְקוּ בְּמִלְחַמְתָּם וַיִלָחֲמוּ לְבַדָם אֶת צִבְאוֹת הֲדַד. אַךְ גַם הֵם נִגְפוּ בַמִלְחָמָה וַיִפְּלוּ מֵהֶם חֲלָלִים רַבִּים, וְהַשְׂרִידִים נִמְלְטוּ עַל נַפְשָם, וַתְּהִי מֵאָז אֶרֶץ מוֹאָב לְמַס עוֹבֵד לֶאֱדוֹם. וַיְהִי לִתְקוּפַת הַשָנָה וַיִוָדַע לִבְנֵי מִדְיָן כִּי בְּשֶל הַמוֹאָבִים, אֲשֶר עֲזָבוּם לְנַפְשָם בְּמִלְחַמְתָּם בָּאָה עֲלֵיהֶם כָּל הָרָעָה. וַיִתְיָעֲצוּ חֲמֵשֶת נְשִׂיאֵי מִדְיָן לְהִלָחֵם בְּבְנֵי מוֹאָב וְלִנְקֹם מֵהֶם אֶת נִקְמַת אֲחֵיהֶם. וַיִשְלְחוּ בְּנֵי מִדְיָן מַלְאָכִים אֶל בְּנֵי קֶדֶם אֲחֵיהֶם לֵאמֹר: בֹּאוּ וְנִלָחֵם עִם בְּנֵי מוֹאָב וְנִנָקְמָה מֵהֶם אֶת דַם אַחֵינוּ הַשָפוּךְ. וַיִתְקַבְּצוּ כָּל בְּנֵי קֶדֶם וַיָבוֹאוּ אֶל בְּנֵי מִדְיָן לְהִלָחֵם עִם בְּנֵי מוֹאָב. וַיִשְמְעוּ בְּנֵי מוֹאָב אֶת הַדָבָר הַזֶה, וַיִשְלְחוּ מַלְאָכִים אֶל הֲדַד בֶּן בְּדַד וַיִשְאֲלוּ מִמֶנוּ כִּי יָבוֹא עִם חֵילוֹ לְעֶזְרָתָם בְּמִלְחַמְתָּם אֶת בְּנֵי מִדְיָן.

וַיֵצֵא הֲדַד עִם כָּל חֵילוֹ וַיַעַל לַמִלְחָמָה אֶת בְּנֵי מִדְיָן וּבְנֵי קֶדֶם. וַיִלָחֲמוּ שְנֵי הַמַחֲנוֹת בִּשְׂדֵה מוֹאָב, וַתְּהִי הַמִלְחָמָה חֲזָקָה מְאֹד. וַיַךְ הֲדַד אֶת כָּל בְּנֵי קֶדֶם וּמִדְיָן לְפִי חֶרֶב וַיַצֵל אֶת מוֹאָב מִיָדָם. וּמֵהַיוֹם הַהוּא שָׂנְאוּ בְּנֵי מִדְיָן אֶת בְּנֵי מוֹאָב, וַתְּהִי שִׂנְאָה עֲצוּמָה בֵינֵיהֶם כָּל הַיָמִים. וַיְהִי בִּשְנַת תִּשְעִים וְאַחַת שָנָה לְרֶדֶת בְּנֵי יִשְׂרָאֵל מִצְרַיְמָה וַיָבוֹאוּ גְדוּדֵי קַרְתַּגָה אֶל אֶרֶץ כִּתִּים לִשְלוֹל בָּהּ שָלָל כְּפַעַם בְּפָעַם. וַיֵצֵא צְפוֹ בֶּן אֱלִיפַז לַמִלְחָמָה עֲלֵיהֶם וַיַכֵּם וַיְגָרְשֵם מֵאַרְצוֹ.