הקיצתי תנומת רעיוני / ר' משה אבן-עזרא

הֱקִיצֹתִי תְּנוּמַת רַעֲיוֹנַי/ לְיַשֵּׁן תַּאֲוַת נַפְשִׁי וְעֵינָי

וְחֹלְפוֹת הַזְּמָן תַּרְִתִּי בְלִבִּי/ לְהַשְׁמִיעַ עֲתִדֹתָיו לְאָזְנָי

וּפִי דֵעִי יְחַוֵּנִי גְדֹלוֹת/ וְיַצִּיב מִפְלְאוֹת צוּרִי לְפָנָי

וְיַגֶּד־לִי צְפוּנֵי תַעֲלֻמוֹת/ עֲדֵי אֶחְשֹׁב בְּנֵי עֶלְיוֹן שְׁכֵנָי

וְאַחַז מַחֲזֵה שַׁדַּי בְּשִׂכְלִי/ וְאָבִין כִּי בְקִרְבִּי יֵשׁ אֲדֹנָי

אֲשֶׁר נִסְתָּר יְקָר עַצְמוֹ וְנִגְלָה/ בְמִפְעָלָיו לְעֵינֵי רַעֲיוֹנָי

בְּפִגְרִי הֶעֱלָה נֵר מִכְּבוֹדוֹ/ יְשִׂיחֵנִי שְׁבִילֵי תַחְכְּמֹנָי

וְהוּא הָאוֹר אֲשֶׁר יֵלֵךְ וְיֵאוֹר/ יְמֵי־נֹעַר וְיוֹסִיף עֵת־זְקֻנָי

וְאִלּוּ לֹא־יְהִי מִסּוֹד מְאוֹרוֹ/ אֲזַי יָסוּף סְפוֹת כֹּחִי וְשָׁנָי

אֲחַפֶּשׂ־בּוֹ חֲדַר חָכְמָה וְאַעַל/ בְּלִי סֻלָּם אֱלֵי גִנַּת עֲדָנָי

הֲכִי חֶלְדִּי כְּאַיִן שָׂם וְאֵלֵךְ/ בְּדֶרֶךְ כֹּל אְשֶׁר הָלְכוּ לְפָנָי

וְאֶסַּע בַּאֲשֶׁר נָסְעוּ אֲבוֹתַי/ וְאַחַן בַּאֲשֶׁר חָנוּ זְקֵנָי

וְעַל־כֹּל אֵל יְבִיאֵנִי בְמִשְׁפָּט/ וּמַעְשַׂי יִֽהְיוּ עֵדָי וְדָנָי

לְזֹאת אֶמְאַס שְׁכֹן תֵּבֵל לְבִלְתִּי/ תְסִיתֵנִי וְתַשִּׁיא בִי זְדוֹנָי

נְטַשְׁתִּיהָ בְּטֶרֶם תִּטְּשֵׁנִי/ וְתַחְלֹץ נַעֲלִי לָרֹק בְּפָנָי

וְלוּ שֶׁמֶשׁ תְּשַׁו נֵזֶר לְרֹאשִׁי/ וְסַהַר יִֽהְיֶה מִשַּׂהֲרֹנָי

וְאֶצְעָדָה תְהִי עָשׁ עַל־זְרֹעִי/ וּבָנֶיהָ רְבִידֵי צַוְּרֹנָי

אֲזַי לֹא־אֶחֱמֹד עֻזָּהּ וְאִלּוּ/ תְשַׁוֶּה מַעֲלוֹת גַּלְגַּל מְעוֹנָי

אֲבָל חֶפְצִי נְתֹן סִפִּי לְסִפֵּי/ מְתֵי מוּסָר וּבֵינֵימוֹ מְלוֹנָי

וְכַמָּה אֶשְׁאֲפָה לָסוּר אֲלֵיהֶם/ וְרַגְלַי יִמְשְׁכוּ חַבְלֵי עֲוֹנָי

בְּתוֹךְ עַם לֹא־יְדָעוּנִי וְכֵן לֹא/ אֲנִי מֵהֶם וְהֵם לֹא מֵהֲמוֹנָי

בְּעֵת אֹמַר נְשַׁקְתִּימוֹ לְשָׁלוֹם/ יְשִׂיחוּן כִּי־נְשַׁכְתִּימוֹ בְשִׁנָּי

תְּעוּדַת חֹֽלְפִים שַׂמְתִּי מְנָתִי/ וְסִפְרֵיהֶם צְרִי צִירֵי יְגוֹנָי

וְעִמָּהֶם אֲנִי מַמְתִּיק לְסוֹדִי/ בְּיַעַן הֵם סְגֻלַּת נֶאֱמָנָי

וְאִם אֶשְׂחֶה בְּיָם שִׂכְלָם אֲלַקֵּט/ לְהַעְדוֹת גַּרְגְּרֹת יָמִים פְּנִינָי

וּבָם יִשְׁתַּעְשְׁעוּ עֵינַי וְלִבִּי/ וְלָהֶם יַעֲנוּ שִׂפְתֵי רְנָנָי

מְאוֹר עֵינַי וְשִׁיר אָזְנַי וְצוּף פִּי/ וְאֶל־אַפִּי כְּרֵיחַ קְנְּמוֹנָי

וּבָם אֵתְעַל וְאֶתְהַלַּל וְאֶהְגֶּה/ יְמֵי חַיַּי וּבָם כֹּל מַעֲיָנָי.