לוגו
האדם והארי
פרק:
מיקום ביצירה:
0%
X
F
U

אִישׁ מִצְרִי הָיָה בְּתַחְפַּנְחֵס הַבִּירָה וְהָאִישׁ קָשֶׁה וְרַע מַעֲלָלִים: וְלוֹ עֶבֶד עִבְרִי וּשְׁמוֹ כָּלֵב אֲשֶׁר הָגְלָה מִירוּשָׁלַיִם עִם הַשְּׁבִי וַיִּמָּכֵר מִמְכֶּרֶת עָבֶד: וַיַּעֲבִידוּ אֹתוֹ בְּכָל עֲבוֹדָה קָשָׁה וַיָּקָם לַיְלָה וַיִּבְרַח מִבֵּית אֲדוֹנָיו הַמִּצְרִי וַיֵּשֶׁב בַּמִּדְבָּר בַּמְּעָרָה: וַיִּשָּׂא עֵינָיו וַיַּרְא וְהִנֵּה כְּפִיר אֲרָיוֹת שׁוֹאֵג לִקְרָאתוֹ שְׁאָגָה גְדוֹלָה וּמָרָה וְהוּא מֵרִים אֶת רַגְלוֹ הַיְמָנִית וְכֹה יֵלֵךְ הָלוֹךְ וְקָרֵב אֶל הַמְּעָרָה אֲשֶׁר הוּא יֹשֵׁב שָׁם בְּהֵחָבֵא: וַיֶּחֱרַד כָּלֵב חֲרָדָה גְדוֹלָה עַד מְאֹד כִּי יָרֵא פֶּן טָרוֹף יִטְרְפֶנּוּ הָאַרְיֵה: וַיְהִי כִּרְאוֹתוֹ כִּי אֵין הָאַרְיֵה נוֹגֵעַ אֶל עַצְמוֹ וְאֶל בְּשָׂרוֹ כִּי אִם צָעֹק יִצְעַק אֵלָיו בְּקוֹל וָהָרֵם יָרִים אֶת רַגְלוֹ הַיְמָנִית: וַיִּתְחַזֵּק כָּלֵב וַיָּסַר לִרְאוֹת מַדּוּעַ יִצְעַק הָאַרְיֵה וַיִּקְרַב אֵלָיו וַיַּרְא כִּי בָא קוֹץ בְּכַף רַגְלוֹ וּנְקָבָהּ: וַיּוֹצִיאֵהוּ כָּלֵב מִבְּשָׂרוֹ וַיֵּרָפֵא: וַיְהִי כַּאֲשֶׁר חָדַל כְּאֵב הָאַרְיֵה וַיּוֹאֵל לָגוּר אֶת הָאִישׁ בַּמְּעָרָה וַיֵשְׁבוּ שְׁנֵיהֶם יַחְדָּו: וּבְכָל יוֹם וָיוֹם יֹצֵא הָאַרְיֵה לָצוּד צַיִד לְהָבִיא וְהָיָה לוֹ וְלָאִישׁ לְאָכְלָה: וַיְהִי לִתְקוּפַת הַיָּמִים וַיְבַקְּשׁוּ הָרוֹדְפִים אֶת הָעֶבֶד וַיִּמְצְאוּ אֹתוֹ וַיָשִׂימוּ אֹתוֹ בְּמִשְׁמָר: וַיֹּאמְרוּ הַשּׁוֹפְטִים לְתִתּוֹ לְמַאֲכָל לְחַיָּה רָעָה כִּי כֵן דְּבַר הַדָּת בָּאָרֶץ הַהִיא עַל כָּל עֶבֶד הַבּוֹרֵחַ מֵאֲדוֹנָיו: בַּיּוֹם הַשְּׁלִישִׁי בִּהְיוֹת הַבֹּקֶר וַיּוֹצִיאוּ אֶת הָאִישׁ אֶת כָּלֵב הַשַּׁעְרָה לָתֵת אֶת בְּשָׂרוֹ מַאֲכָל לָאֲרִי אֲשֶׁר בְּתוֹךְ הַבּוֹר אֵצֶל שַׁעַר הָעִיר: וְכָל אַנְשֵׁי הָעִיר לְמִקְּטַנָּם וְעַד גְּדוֹלָם הוֹלְכִים אַחֲרָיו לִרְאוֹת אֶת הַמַּרְאָה הַנּוֹרָאָה הַזֹּאת כִּי טוֹבָה הִיא בְּעֵינֵיהֶם כְּמִשְׁפַּט עַמֵּי הָאֲרָצוֹת בַּיָּמִים הָהֵם: וַיָּבֹאוּ עַד לִפְנֵי שַׁעַר הָעִיר וַיַּעֲמוֹדוּ וַיִּפְתְּחוּ דַלְתוֹת הַבּוֹר וַיֵּצֵא הָאֲרִי וַיָּרָץ בַּחֲמָתוֹ לִקְרַאת הָעֶבֶד לְטָרְפוֹ: וַיְהִי כַּאֲשֶׁר הִקְרִיב לָבֹא אֵלָיו וְהִנֵּה סָר זַעְפּוֹ וַיִּפֹּל לְרַגְלֵי הָעֶבֶד אַרְצָה וְלֹא חָרַץ אֵלָיו לְשׁוֹנוֹ: וְכָל הָעָם רָאוּ מֵרָחוֹק וַיִּתְמְהוּ אִישׁ אֶל רֵעֵהוּ כִּי לֹא יָדְעוּ מַה הוּא: וַיַּכֵּר כָּלֵב אֶת הָאַרְיֵה כִּי הוּא זֶה אֲשֶׁר גָּר אִתּוֹ בְּיַרְכְּתֵי הַמְּעָרָה יָמִים מִסְפָּר: וַיְסַפֵּר הָעֶבֶד לָעָם אֶת כָּל אֲשֶׁר קָרָהוּ וַיִּשְׂמְחוּ מְאֹד עַל קוֹרוֹתָיו וְעַל דְּבָרָיו: וַיְמַהֲרוּ זִקְנֵי הָעֵדָה וַיָּבֹאוּ לִפְנֵי הַמֶּלֶךְ וַיַּגִּידוּ לוֹ לֵאמֹר כָּזֹה וְכָזֶה קָרָה לָאִישׁ אֲשֶׁר הוֹצִיאוּ אֹתוֹ כַּיּוֹם לַהֲמִיתוֹ: סְלַח נָא לַעֲוֹן הָאִישׁ הַזֶּה כְּגֹדֶל חַסְדֶּךָ וּתְחִי נַפְשׁוֹ: וַיֹּאמֶר הַמֶּלֶךְ סָלַחְתִּי כְּדִבְרֵיכֶם: וַיָּשׁוּבוּ הַזְּקֵנִים הַשַּׁעְרָה וַיֹּאמְרוּ לָעֶבֶד חָיוֹ תִּחְיֶה וְגַם הָאַרְיֵה הִנֵּה הוּא נָתוּן לְךָ לְשָׁרְתֶךָ כִּי כֵן צִוָּה לְךָ הַמֶּלֶךְ: וַיְהִי כַּאֲשֶׁר שָׁמַע הָעֶבֶד אֶת דִּבְרֵיהֶם וַיִּשְׁתַּחוּ אַרְצָה לַיְהֹוָה: וַיִּפֶן כָּלֵב וַיֵּלֶךְ אֶל אַרְצוֹ שָׂמֵחַ וְטוֹב לֵב וַיְהִי לוֹ הָאַרְיֵה לְעֶבֶד: כִּי הָיָה לִבּוֹ כְּלֵב אִישׁ לִשְׁמוֹעַ בְּקוֹל אֲדוֹנָיו וְלַעֲשׂוֹת עִמּוֹ כַּחֶסֶד אֲשֶׁר עָשָׂה לוֹ בְּיוֹם הוֹצִיאוֹ אֶת הַקּוֹץ מֵעוֹר בְּשָׂרוֹ וַיֶּחִי: וַיְהִי אַחֲרֵי הַדְּבָרִים הָאֵלֶּה וַיִּתְהַלֵּךְ כָּלֵב בָּאָרֶץ לְאָרְכָּהּ וּלְרָחְבָּהּ וְאֶת הָאַרְיֵה לָקַח עִמּוֹ: וּבְכָל מְדִינָה וּמְדִינָה וּבְכָל עִיר וָעִיר מְקוֹם אֲשֶׁר כָּלֵב וּמְשָׁרְתוֹ מַגִּיעִים וַיִּתְאַסְּפוּ אֵלָיו מִנַּעַר וְעַד זָקֵן מִקָּצָהּ לִרְאוֹת אֶת הַדָּבָר הֶחָדָשׁ הַזֶּה: כִּי לֹא נִשְׁמַע וְלֹא נִרְאֶה כָּמֹהוּ לִשְׁמוֹעַ אַרְיֵה בְּקוֹל אִישׁ לְכָל אֲשֶׁר יְצַוֶּנּוּ: וְכָל אִישׁ אוֹ אִשָּׁה אֲשֶׁר נָדַב לִבָּם אֹתָם הֵבִיאוּ שְׂלָמוֹת וּבְגָדִים כֶּסֶף וְזָהָב נְדָבָה לְכָלֵב: וַיֵּלֶךְ הָאִישׁ הָלוֹךְ וְגָדֵל וַיְהִי שָׁמְעוֹ בְּכָל הָאָרֶץ: אָז יִשְּׂאוּ הַמּוֹשְׁלִים אֶת הַמָּשָׁל הַזֶּה וַיֹּאמְרוּ לֵאמֹר:

שִׁמְעוּ בֹּגְּדִים וְהָבִינוּ

וְאַנְשֵׁי מִרְמָה שִׂימוּ לֵב:

תְּאַלֶּפְכֶם חַיַּת הָאָרֶץ

וּמִכְּפִיר טוֹרֵף תִּלְמְדוּ צֶדֶק:

אֲשֶׁר אֵין לוֹ חֵלֶק בַּבִּינָה

וּמַאֲכָלוֹ טְרֵפָה:

וַיִּזְכּוֹר חֶסֶד אָדָם

וְלֹא שִׁקֵּר בֶּאֱמוּנָתוֹ:

אַף כִּי אַתֶּם בְּנֵי תְבוּנָה

וְתוֹרַת חֶסֶד בִּלְבַבְכֶם:

וְלָמָּה תִּבְגְדוּ בָרֵעַ

וְתִשְׁכְּחוּ כָּל גְּמוּלָיו:

הֵן בֹּגְדִים מֵאֶרֶץ יִכָּרֵתוּ

וּמְתֵי מִרְמָה יִסְּחוּ מִמֶּנָּה:

וְאַנְשֵׁי אֱמוּנָה יִנְחֲלוּ טוֹב

וְיָפִיקוּ רָצוֹן מֵיהֹוָה: