הַגֶּד נָא בֶן אָדָם לָמָה אַתָּה עָמֵל
מִבֹּקֶר עַד עֶרֶב מִיּוֹם הִגָּמֵל
לִצְבּוֹר כֶּסֶף עַד זִקְנָה וְשֵׂיבָה
וְלֹא תִשְׂבַּע נַפְשְׁךָ הַצְּמֵאָה וְהָרְעֵבָה
הֵן גַּם אִם תַּרְבֶּה הוֹן לֹא תַשְׂבִּיעֶנָּה
רְכוּשְׁךָ יִשְׂגֶּה מְאֹד לֹא תַשְׁקִיטֶנָּה
רִבְבוֹת חַיִל תַּעֲשֶׂה הַיּוֹם בְּזֵעַת אַפַּיִם
לְמָחָר תּוֹסִיף תִּתְאַוֶּה כִּפְלֵי כִפְלַיִם
וַעֲטֶרֶת כַּסְפְּךָ לֹא תוֹעִיל לָךְ בְּיוֹם צָרָה
בְּבוֹא הַמָּוֶת, מֵראשְׁךָ תּוּסַר הָעֲטָרָה
לְקִבְרְךָ כִּי תוּבַל לֹא תִקַּח אִתְּךָ מְאוּמָה
בִּלְתִּי גְוִיָּתְךָ וְנִבְלָתְךָ הָעֲרוּמָה
רְכוּשְׁךָ וְהוֹנְךָ יִשּׁאֲרוּ בְּבֵיתֶךָ
וְאַתָּה לְבַדְּךָ תָּשׁוּב אֶל אֲבוֹתֶיךָ
עָרוֹם וְיָחֵף כְּמוֹ מִבֶּטֶן יָצָאתָ
מִבְּלִי לְבוּשׁ וְשַׂלְמָה כַּאֲשֶׁר בָּאתָ
כַּסְפְּךָ וּזְהָבְךָ אֲחֵרִים יִקָּחוּ
אַתָּה בַּחשֶׁךְ תִּשְׁכַּב וְהֵם יִשְׂמָחוּ
וּמִכָּל יְגִיעֲךָ זֶה מְנָת חֶלְקֶךָ
מַאֲכָל לְרִמָּה לְתוֹלֵעָה בְּשָׂרֶךָ