לברכו
אַחֲלַי יִכּוֹנוּ דְרָכַי / לִשְׁמֹר חֻקֶּיךָ,
כִּי מְנוּחָה לֹא מָצָאתִי / כִּי אִם בְּחִשְׁקֶךָ,
עַבְדְּךָ אֲנִי – הַדְרִיכֵנִי / בְּדֶרֶךְ צִדְקֶךָ.
הֵן שֶׁאֱלָתִי אַחַת הִיא – / לְהָפִיק רְצוֹנֶךָ,
לֹא אֲבַקֵּשׁ מִלְּפָנֶיךָ / כִּי אִם פָּנֶיךָ.
בֶּאֱמֶת אֵין עֲרֹךְ אֵלֶיךָ – / וְאֵיךְ אַמְשִׁילֶךָ?אוֹ לְמִי אֲדַמֶּה פְעָלֶיךָ? / וְהַכֹּל פְּעָלֶיךָ!
אַתְּ בְּרָאתַנִי – וּמָה אוֹסִיף / לְדַבֵּר אֵלֶיךָ?
מַחְשְׁבוֹת רוּחִי וְקִנְיָנַי / הֵם קִנְיָנֶיךָ,
לֹא לְמַעְנִי אַתָּה עוֹשֶׂה / כִּי אִם לְמַעֲנֶךָ.
רֹאשׁ וְסוֹף אֵין לַחֲסָדֶיךָ – / וּמִי לֹא יוֹדֶךָ?וֶאֱמֶת אֵין בִּלְעָדֵיךָ / וּמַעֲשֵׂה יָדֶיךָ,
וַאֲשֶׁר בְּשִׁמְךָ כִחֵשׁוּ – / הֵם הֵם עֵדֶיךָ!
יַחֲשֹׁב לִבִּי כֹה וָכֹה – / הִנֵּה הִנֶּךָ!
אֶפְגְּעָה בָךְ, כִּי אֵין מַבְדִּיל / בֵּינִי וּבֵינֶךָ.
מִלְּפָנֵיךָ אֲנִי יוֹצֵא / וְרוּצִי אַחֲרֶיךָ –מַחֲזֶה בַּל חָזוּ עֵינַי – / לְבַד מֵהֲדָרֶךָ,
מַאֲמָר לֹא שָׁמְעוּ אָזְנַי – / רַק מַאֲמָרֶיךָ,
אוֹת חֲתָמוֹ לִבִּי – הִנְּךָ / רוֹאֶה בְעֵינֶיךָ,
וַאֲשֶׁר סִפֵּר פִּי – הִנֵּה / עוֹלֶה בְאָזְנֶיךָ!
עַל אֲסִיר יֵצֶר רַע – צַוֵּה / יְשׁוּעוֹת פָּנֶיךָ,זִכְרָךְ בְּפִי שִׂים, וּבְלִבּוֹ / בְּנֵה בֵּית מְכוֹנֶךָ.
רַחֲמֵהוּ בִּשְׂאֵתוֹ עֵינָיו / לְכִסֵּא מְעוֹנֶךָ,
הַט זְרוֹעֲךָ וּתְהִי יָדְךָ / עַל אִישׁ יְמִינֶךָ
וּבְמַחֲשַׁכִּים עָלֵינוּ / נְסָה אוֹר פָּנֶיךָ.