ולה איצֹא

— — È — / — — È — / — — È — // — — È — / — — È — / — — —

אוּלַי דְּמָעוֹת בָּחֳרִי נִדָּחוּ / הִשְׁקוּ לְחָיַי עַד אֲשֶׁר-צָמָחוּ

יִתְמַהְמְהוּ כִּי-יָֽגְעוּ מֵרוּץ מְעַט / וּבְשׁוּר אֲנָחָה תִרְדְּפֵם יִבְרָחוּ

לֵיל נִגְּרוּ עֵינַי כְּאִלּוּ הַדֳּמִי / בִּשְׂכַר עֲמִידַת כּֽוֹכְבָיו לָקָחוּ

לוּ תֶחֱזֵמוֹ תֶּחֱזֵמוֹ אַחֲרֵי / מָסַךְ תְּכֵלֶת אַחֲרָיו יִזָּחוּ

תָּקַע לְבָבִי עֵת בְּכוֹתִי כָּף לְבַל / יִכְלוּ וְכִמְעַט קָט בְּגָדָיו קָחוּ

לוּלֵי אֲשֶׁר סָגַר יְגוֹנִי בַעֲדִי / שָׂחוּ שְׁכֵנַי כִּי בְדִמְעִי שָׂחוּ

תִּבְכֶּה אֲחִי מוּסָר יְמֵי רָעָה וְלֹא / תִבְכֶּה יְמֵי-נֹעַר אֲשֶׁר נִלְקָחוּ

יָמִים אֲדַמֶּה כִּי פְנֵיהֶם חֻצְּבוּ / מִדַּר וּמִלֶּשֶׁם שְׁבוֹ נֻתָּחוּ

מַה-קָּֽדְרוּ יָמִים עֲדֵי לֹא נִכְּרוּ / לֵילוֹת וְהַלֵּילוֹת לְפָנִים צָחוּ

אֶפְגּשׁ מְיֻדָּעַי בְּאַנְחוֹתַי אֲשֶׁר / לוּ פָֽגְשׁוּ הָרִים אֲזַי נִסָּחוּ

יוֹם רָֽצְחוּ דוֹדָם בְּמִזְרָק שָֽׁפְכוּ / בוֹ דַּם אֲחִי עָנֵר וְלֹא-רָצָחוּ

אָז נָֽפְחוּ רוּחַ אֱלֹהִים בִּי וְאֵשׁ / לִבִּי בְּרֵיחַ מָר-דְּרוֹר נָפָחוּ

מַה-מָּֽצְאוּ קִירוֹת לְבָבִי בֶּאֱמֹר / שָׁוְא חָֽשְׁקוּ חֵשֶׁק וְתָפֵל טָחוּ

כִּי חֹֽשְׁקִים בִּרְאוֹת אֲנָשִׁים יִשְׂחֲקוּ / וּבְאָהֳלָם יִבְכּוּ וּמַר יִצְרָחוּ

בִּשְׁתַּחֲוֹת שֶׁמֶשׁ לְחשֶׁךְ אֶזְכְּרָה / חשֶׁךְ לְשֶׁמֶשׁ הַלְּחִי יִשְׁתָּחוּ

וּמְשַׁחֲתִים כָּפְרָם אֲנִי כִּי-יָֽרְדוּ / לִנְגֹּף וּבִרְאוֹת דָּם אֲזַי פָּסָחוּ

אֵיךְ נֶהְפְּכוּ פָנִים כְּתַפּוּחִים וְאֵיךְ / הָיוּ אֲדֻמִּים אַחֲרֵי טֻפָּחוּ

נֶפֶשׁ עֲמִיתְךָ יָֽצְאָה עֵת יָֽצְאָה / נֶפֶשׁ בְּשָׂמֶיךָ אֲשֶׁר מֻלָּחוּ

פַּתַּח יְדִידִי מֽוֹסְרוֹת חָלָל אֲשֶׁר / עָלָיו תְּלָאוֹת חַרְבְּךָ פָתָחוּ

יִמְשַׁח בְּדָמוֹ פַּאֲתֵי-לַיִל עֲדֵי / כִּי-פַאֲתֵי קָדִים בְּדָם נִמְשָׁחוּ

שָׁלַח לְךָ לִבּוֹ מְקוֹם קִרְבּוֹ וְשָׂם / צִירָיו כְּמוֹ צִירָיו וְלֹא יִצְלָחוּ

צִירִים סְרוּחִים עַל-כְּבֵדוֹ שֹֽׁכְבִים / וַעְלֵי יְרִיעוֹת לַֽיְלָה יִסְרָחוּ

אָרַךְ עֲדֵי קַרְנָיו אֲשֶׁר אָרְכוּ כְּמוֹ / קַרְנֵי רְאֵם כִּימָה וְעָשׁ נָגָחוּ

לֵיל כָּֽתְבוּ עֵטָיו עֲלֵי-שַׁחַק הֲמוֹן / צוּרוֹת וְצוּרוֹת הָאֲדָמָה מָחוּ

צוּרוֹת תְּדַמֶּה עֵין אֱנוֹשׁ כִּי נִפְתְּחוּ / בָם שַׁעֲרֵי-שַׁחַק וְלֹא נִפְתָּחוּ

שַׁחַק כְּמוֹ פַרְדֵּס אֲדַמֶּה כּֽוֹכְבָיו / צִצִּים וְאוּלָם בַּסְּתָיו פָּרָחוּ

יִדְמוּ בְגַבֵּיהֶם לְבָרֶקֶת וּפָז / עַל רִצֲפַת בַּהַט וְדַר שֻׁטָּחוּ

כֻּלָּם כְּאֶחָד לַאֲלֻמִּים נִצְּבוּ / כָּאִלְּמִים לַחֵֽרְשִׁים סוֹד שָׂחוּ

יוֹדוּ וְיַגִּידוּ לְאָדָם נִפְלְאוֹת / אֵל מִמְּסִלּוֹתָם אֲשֶׁר אָרָחוּ

מֵעֵת הֱיוֹתָם עַד-כְּלוֹתָם יִשְׁמְרוּ / חֻקּוֹת אֱלֹהֵיהֶם וְלֹא יִזְנָחוּ

כִּי הָפְקְדוּ לִרְעוֹת יְצוּרִים עָֽמְדוּ / עַל מִשְׁמְרוֹתֵיהֶם וּבָם צָנָחוּ

וּבְשׂוּם לְבָבִי לַתְּבוּנָה אֶחֱזֶה / כִּי הַֽיְקוּם כַּצֹּאן וְתֵבֵל אָחוּ

מֵהֶם רְחַב-נֶפֶשׁ גְּדֹל לֵבָב וּבָם / חָפְצוּ מְעַט וּבְחֶלְקְהֶם יִשְׂמָחוּ

מָתַי תְּמַלֵּא הַזְּמַן לִי מִשְׁאֲלוֹת / לִבִּי אֲשֶׁר מִלִּבְּךָ נִשְׁכָּחוּ

אֵיךְ יֵֽדְעוּ כֹחִי מְצוּקֶיךָ אֲשֶׁר / יִשָּׁעֲנוּ עָלַי וּבִי יִבְטָחוּ

עַד-אָן אֲלַמֶּדְךָ וְלֹא-תָבִין וְאוֹר / אָפִיץ לְעֵינֶיךָ וְלֹא-נִפְקָחוּ

יִמְצָא תְנוּאוֹת כִּי יְשִׁיבֵנִי אֲבָל / תִּדֹּם עֲדֵי גִבְעֹות הֲדָרְךָ שָׁחוּ

אֵיךְ הַֽיְקָר תַּשְׁמֵט וְהַשִּׁיר תַּעֲזֹב / עַד כִּי-שְׁמֵי תִפְאַרְתְּךָ נִמְלָחוּ

אוֹ יִשְׁקְטוּ הַיּוֹם מְזִמּוֹת מִזְּמַן / נֹחַ אֳנִי-נֹחַ אֱמֶת לֹא-נָחוּ

אָכֵן אֲצִילֵי עַמְּךָ יַקְלוּ כְּבוֹד / הַשִּׁיר וּמֵימָיו חָֽשְׁבוּ מֵי שָׂחוּ

וּבְיוֹם קְרָב כַּנֶּחֱשָׁלִים נִסְחֲפוּ / וּכְנוֹסֲסִים דַּרְדַּר וְקוֹץ יִדְלָחוּ

אִם-אֵין לְךָ עָוֹן לְבַד שֶׂכֶל שְׂמַח / כִּי עָרְפְּהֶם יַקְשׁוּ וְלֹא-יִסְלָחוּ

עַד-אָן פְּתָאיִם תֶּאֱהָבוּן רִיק וְלֹא / תוֹדוּ וְאָנָה בֹּעֲרִים תִּבְרָחוּ

הַאֶשְׁמְרָה כָכֶם אֲנִי מַחְסוֹם לְפִי / בִּגְלַל כְּלָבִים אִלְּמִים נָבָחוּ

כִּבְחֹן אֱנוֹשׁ נוֹדָע וְלֹא-נוֹדַע דְּבַר / יוֹנָה וְעֹרֵב כִּי בְעֵת שֻׁלָּחוּ

מַה-בִּצְעֲךָ אִישׁ כִּי תְצַוֶּה חוּג לְבַל / יִסֹּב וְכוֹכָבָיו לְבַל-יִזָּחוּ

לֹא-אַחֲרִישׁ עַד-אֶחֱרשׁ שִׁירַי עֲלֵי / לוּחַ לְבַב תֵּבֵל לְבַל-יִמָּחוּ

שִׂים לִבְּךָ לָזֹאת וְהֶעָבִים רְאֵה / כִּי-יִסְּרָם רוּחַ וְלֹא יוּכָחוּ

וּזְכֹר יְקָר-שֶׁמֶשׁ וְתִפְאַרְתָּהּ וְשׁוּר / כִּי-זָהֳרֶיהָ לֶאֱנוֹשׁ יִשָּׁחוּ

בֵּינִי וּבֵינֶיהָ אֲשֶׁר בֵּין פִּֽנְחָס / לִקְהָת וְכִשְׁמוּאֵל לְבֶן-צוּף תֹּחוּ.