מי כמוך
אֶל מִי נַמְשִׁילֶךָ? / וְאֵין עֲרֹךְ אֵלֶיךָ!
שִׂמַּחְתָּ לְבָבוֹת בְּפָעֳלֶיךָ – / נַזְכִּירָה דֹדֶיךָ מִיָּיִן!
בָּקַעְתָּ אוֹר, וַתִּרֶץ / לְהַרְקִיעַ דֹּק בְּלִי פֶרֶץ,
וְאַחַר יְבֹשֶׁת הָאָרֶץ / הוֹצִיא לֶחֶם וְיָיִן.
רִבִּיתָ מְאוֹרִים בִּמְעוֹנֶךָ / וְעוֹף וְחַיָּה בִּמְכוֹנֶךָ –
וְהַמַּכְחִישִׁים עֹז קִנְיָנֶיךָ / שָׁכְרוּ וְלֹא מִיָּיִן.
הֲכִינוֹתָ אָדָם בִּדְמוּתֶךָ / וַתַּשְׁכִּינֵם גַּן חֶמְדָּתֶךָ –
הוּא הֵיכַל נְעִימוֹתֶיךָ, / בֵּית מִשְׁתֵּה הַיָּיִן.
מִשָּׁם הוֹצִיאָם שׁוֹבָב, / לְהַשִּׁיא הָאִשָּׁה סָבַב,
כִּי הָיְתָה רַכַּת לֵבָב / וּשְׁכוּרַת וְלֹא מִיָּיִן.
בּוֹגְדִים הָיוּ לְחֵרֶם / וְנֹחַ נִצַּל מִזֶּרֶם,
הֵחֵל וַיִּטַּע כֶּרֶם / וַיֵּשְׁתְּ מִן הַיָּיִן.
רָעִים בְּרָעָה הִתְמוֹגָגוּ / וּמִגְדָּל וָעִיר פָּסָגוּ;
נִשְׁקַפְתָּ עֲלֵיהֶם – וְנִפְלָגוּ, / וְהָמוּ כְּמוֹ יָיִן.
בָּחַרְתָּ בְּאָב וְהוֹדוֹ, / נִסִּיתוֹ בִּבְנוֹ יְחִידוֹ,
וַאֲהֵבְךָ בְּכָל מְאֹדוֹ – / כִּי טוֹבִים דֹּדֶיךָ מִיָּיִן.
יָלַד נֶעֱקָד תְּאוֹמִים / וּבִזְקוּנָיו בֵּרַךְ תָּמִים,
וַיָּשֶׂם לְפָנָיו מַטְעַמִּים / וַיָּבֵא לוֹ יָיִן.
מִצְרַימָה יָרְדוּ בַּהֲמוֹנַי / וּבַיְאוֹר הָשְׁלְכוּ בָנַי,
וַיִּיקַץ כְּיָשֵׁן אֲדֹנָי, / כְּגִבּוֹר מִתְרוֹנֵן מִיָּיִן.
אֱלֹהִים, הִכְבַּדְתָּ אָזְנֶיךָ / מִשְּׁמֹעַ אֶנְקַת בָּנֶיךָ,
וְצוֹרֲרֶיךָ עַל פָּנֶיךָ / אֹכְלִים וְשֹׁתִים יָיִן.
׳יָדַעְתִּי, בַּצָּרוֹת עַמִּי; / הִתְחַזֵּק, נֶאֱמָן, בִּשְׁמִי,
וְלֵךְ אֶל אִישׁ חֶרְמִי / וְקַח אֶת כּוֹס הַיָּיִן.
רַעַל מָלְאָה בַחֲמָתִי, / אוֹדִיעֵם עֹז קִנְאָתִי,
וְאִם לֹא יִשְׁלְחוּ עֲדָתִי – / וְהִשְׁקִיתָ אוֹתָם יָיִן.
בּוֹגֵד, שַׁלַּח בָּנַי / טֶרֶם יַשְׁכִּירוּךָ חֲרוֹנַי,
כִּי הִנֵּה בְיַד אֲדֹנָי / גְּבִיעִים מְלֵאִים יָיִן.
נוֹעַץ תַּנִּין בְּעַמָּיו / וַיַּאֲֵמֵן בִּדְבַר חֲכָמָיו,
וְהִקְשׁוּ לִבּוֹ חַרְטֻמָּיו / וַיֹּאמְרוּ: ׳לֹא נִשְׁתֶּה יָיִן!׳
׳עָנָיו, מִי שׁוֹלְחֶךָ? / אֱמָר נָא, בַּמֶּה כֹּחֶךָ?
הֵעַזְתָּ לְפָנַי מִצְחֶךָ, / אַל לַמְּלָכִים שְׁתוֹ יָיִן!׳
זָע תַּנִּין, בְּכֹחוֹ צוֹעֶה, / בִּרְאוֹתוֹ אוֹתוֹת רוֹעֶה,
וַיְהִי כְּשֶׂה תוֹעֶה / וּכְגֶבֶר עֲבָרוֹ יָיִן.
רַבָּה יִלְלַת לוּדִים, / כִּי הָיוּ בְכוֹרֵיהֶם נִכְחָדִים –
וּבְרִנָּה יָצְאוּ יְדִידִים, / תֹּף וְחָלִיל וָיָיִן.
הִשְׁלַכְתָּ בַּיָּם מִצְרַיִם, / אַחַר נִבְקְעוּ הַמַּיִם,
וְהָיָה כְגִבּוֹר אֶפְרַיִם / וְשָׂמַח לִבָּם כְּמוֹ יָיִן.