הָעוֹבֵד לְחַטָּאִים וְרָעִים / דֵּי שְׂכָרוֹ מִמֶּנּוּ הִנָּצְלוֹ מִפְּגָעִים

זְאֵב חִלָּה פְּנֵי הָאֲרִי לְהַגִּיעַ עָדָיו הֲמוֹנוֹ / כִּי עֶצֶם גָּדוֹל נֶהְפַּךְ וְנִשְׁאַר בִּגְרוֹנוֹ / וְלֹא יָכֹל לָשֵׂאת רֹאשׁוֹ / וַתִּבְחַר מַחֲנַק נַפְשׁוֹ / כִּי הָעֶצֶם מְחָצוֹ / וּבְמָקוֹם צָר לְחָצוֹ / וַיַּזְעֵק בְּהֵמָה חַיָּה וְעוֹף כֻּלָּם / מִקְּטַנָּם וְעַד גְּדוֹלָם / וַיָּבֹאוּ עַד הַזְּאֵב / וַיִּמְצָאוּהוּ מַשְׁמִים וְכוֹאֵב / וַיִּשְׁאַל לָהֶם עֵצָה / לְהוֹצִיא הָעֶצֶם חוּצָה / וְלֹא יָכְלוּ לַעֲנוֹת אוֹתוֹ / כִּי אָמְרוּ: זֹאת עָרְמָתוֹ / וְתֹאֲנָה הוּא מְבַקֵּשׁ / לִהְיוֹת לָנוּ לְמוֹקֵשׁ / לְבָלְעֵנוּ כִשְׁאוֹל חַיִּים / וְעַתָּה נַעֲרִים סוֹד וְנִהְיֶה נְקִיִּים / וַיְהִי כְדַבְּרוֹ לָהֶם לֹא אַחַת וְלֹא שְׁתַּיִם / וַיִּמַּס לְבָבָם וַיְהִי לְמָיִם / וַיִּוָּעֲצוּ כֻלָּם יַחַד / וַיֹּאמְרוּ לוֹ פֶּה אֶחָד / יְהִי מַכִּירְךָ בָרוּךְ / הִנֵּה לֶעָגוּר צַוָָּּאר אָרוֹךְ / וּפֶה חָזָק וְחַד וָצָר / יוֹצִיא אֶת הָעֶצֶם מִן הַמֵּצָר / וְאִם לֹא אֵפוֹא מִי הוּא / קְרָא אוֹתוֹ אֵין כָּמֹהוּ / וַיִּקְרָא לֶעָגוּר וַיְדַבֵּר עַל לִבּוֹ / אַךְ מְרוֹרוֹת פְּתָנִים בְּקִרְבּוֹ / וַיְפַתֵּהוּ בִדְבָרִים / וַיִּדַּר לוֹ נְדָרִים / אִם יוֹצִיא אֶת הָעֶצֶם לְשַׁלֵּם לוֹ גְמוּלוֹ / וְלִהְיוֹת מוֹשֵׁל בְּכָל אֲשֶׁר לוֹ / וַיֹּאמֶר הֶעָגוּר: פְּתַח פִּיךָ וְאֶחֱזֶה / אִם אוּכַל לְהָסִיר מֵעָלֶיךָ הַמָּוֶת הַזֶּה / וַיִּפְעַר הַזְּאֵב פִּיו לִבְלִי חֹק / וַיַּעַמְדוּ כֻלָּם מֵרָחוֹק / וַיִּרֹמּוּ מֵעָלָיו / כִּי יָרְאוּ מִגֶּשֶׁת אֵלָיו / וְהֶעָגוּר אֶת הָעֶצֶם בֵּין שִׁנָּיו הִפְגִּיעַ / כִּי פִיו עַד צַוָּארוֹ הִגִּיעַ / וַיּוֹצִיאֵהוּ מִצַּוָּארוֹ / וַיִּשְׁאַל לוֹ שְׂכָרוֹ / וַיַּעַן לוֹ הַזְּאֵב עַזּוֹת / מִי שָׁמַע כָּאֵלֶּה וּמִי רָאָה כָזֹאת / הֲלֹא עַז אֲנִי מִן הַחַיָּה וּמִן הַבְּהֵמָה / וּסְבִיבוֹת שִׁנַּי אֵימָה / וּפִי לִטְרֹף וּלְהַשְׁחִית חֻקָּהּ / מִי בָא בְּפִי כָמוֹךָ וְנִקָּה / הָעֵת נִמְלַטְתָּ מִבֵּין שִׁנַּי וְלֹא חֲנַקְתִּיךָ / מִשְׁנֶה שְׂכַר־שָׂכִיר שִׁלַּמְתִּיךָ / לֵךְ מֵאִתִּי פֶּן אֲשִׂימְךָ חָלָל / וְהָיְתָה לְךָ נַפְשְׁךָ לְשָׁלָל.

וְהַמָּשָׁל בֶּעָשִׁיר אֲשֶׁר שְׁכֵנוֹ יְכַבְּדֶנּוּ / לְכָל אֲשֶׁר יַחְפֹּץ יַטֶּנּוּ / וְיַעֲבֹד אוֹתוֹ בְּמַאֲמַצֵּי כֹחוֹ / וְהָאָדוֹן יְאַמֵּץ לִבּוֹ וְיַקְשֶׁה רוּחוֹ / וְאִם יִשְׁאַל מִמֶּנּוּ אֶת שְׂכָרוֹ וַעֲמָלוֹ וּפָעֳלוֹ / לֹא יִתֵּן לוֹ / וּמִתְעוֹלֵל עֲלִילוֹת / לְחַבֵּט גֵּווֹ בְמַקְלוֹת / וְיֹאמַר: סוּר מִמֶּנִּי / כַּמָּה פְעָמִים הֶלְאֵיתָנִי / הַיּוֹם רַבּוּ עֲבָדִים הַמִּתְפָּרְצִים / כִּי נִרְפִּים הֵם וְאֵין לְחוּצִים / מַהֵר לֵךְ אַל תַּעֲמֹד / אִם אֶת חַיֶּיךָ תַחְמֹד / כָּכָה יַעֲשׂוּ הַנְּבָלִים / אִישׁ קָשֶׁה וְרַע מַעֲלָלִים / וְהֶעָנִי יָרֵא וְחָרֵד / דָּל מֵרֵעֵהוּ יִפָּרֵד.

וָאֶשָּׂא מְשָׁלִי וָאֹמַר:

וְנִשְׁעָן בְּעָשְׁרוֹ וְעָלוֹת יְנַהֵל / וְיַעְבֹד בְּרֵעוֹ כְּעֶבֶד בְּאֹהֶל

וְיַעְלִיל עֲלִילוֹת בְּרֶשַׁע בְּעֵת יִ/שְׁאַל זֶה: שְׂכָרִי אֱסֹף לִי וְהַקְהֵל

וְיַעַן: בְּרַח חִישׁ וְצֵא מִגְּבוּלִי / בְּטֶרֶם אֲנִי לָךְ לְהוֹצִיא אֲבַהֵל

שְׁאוֹלָה יְקַוֶּה יְצוּעוֹ וְלֹא יֶ/חֱזֶה יוֹם אֲשֶׁר יִזְרַח אוֹר וְיָהֵל.