לֹא יְשַׁקֵּר אִישׁ בֶּאֱמוּנָתוֹ / וְלֹא יחַלֵּל אֶת בְּרִיתוֹ

זְאֵב מִן הַכֶּלֶב יֵחַת / בְּפִיו חַלַּת לֶחֶם אַחַת / נָשָׂא וַיָּבֹא אֶל הָעֵדֶר / שֶׁשָּׁם הַצֹּאן תּוֹךְ הַגָּדֵר / הַכֶּלֶב הֵקִיץ מִשְּׁנָתוֹ / וְהַזְּאֵב לוֹ בְּעָרְמָתוֹ / אָמַר: דַּע כִּי שֶׁלִּי שֶׁלְּךָ / קַח בִּרְכָתִי אֲשֶׁר הוּבָאת לְךָ / כִּי לֹא עַל הַלֶּחֶם לְבַדּוֹ / אֶעֱשֶׂה לוֹ עֵזֶר כְּנֶגְדּוֹ / לְךָ כָּל מַחֲמַדַּי תִּקָּחֵם / אַךְ עַתָּה תֹאכַל לֶחֶם / וַיַּעַן הַכֶּלֶב: לָרִיק הוֹגַעְתָּ פְעָמֶיךָ / אִם תַּעְצְרֵנִי לֹא אֹכַל בְּלַחְמֶךָ / בַּאֲשֶׁר הוּא לֶחֶם כְּזָבִים / וּבְעֵינַי דְּבָרֶיךָ לֹא טוֹבִים / לֹא לְטוֹבָתִי תָּבִיא לִי לֶחֶם מֵאָהֳלֶיךָ / אַךְ לִסְתֹּם פִּי פֶּן אַשְׁמִיעַ קוֹלִי עָלֶיךָ / כַּאֲשֶׁר תִּטְרֹף בַּצֹּאן / חָשַׁבְתָּ לִמְצֹא עֵת רָצוֹן / וְחָלִילָה לִי לְכַבּוֹת נֵר הוֹדִי / כִּי אֲדֹנִי נָטַשׁ הַצֹּאן עַל יָדִי / וְאֵיכָה אֲשַׁקֵּר בֶּאֱמוּנָתִי / אָהַבְתִּי אֶת אֲדֹנִי וְאֶת בֵּיתִי / אֲשֶׁר מִנְעוּרַי גְּדֵלַנִי כְאָב / וְאַתָּה בְּפִתּוּי דְּבָרֶיךָ תִכְאָב / וַיֶּחֱרַץ עָלָיו הַכֶּלֶב לְשׁוֹנוֹ / וְהָרֹעֶה קָם וַיָּרָץ בַּחֲרוֹנוֹ / לִרְדֹּף הַזְּאֵב עִם הַכֶּלֶב / אֲשֶׁר הָיָה שֹׂנְאוֹ בַלֵּב.

וְהַמָּשָׁל כָּל אִישׁ יִהְיֶה נִשְׁמָר בְּרוּחוֹ / פֶּן יִבְגֹּד וִיסַלֵּף אָרְחוֹ / וּבְפִיו וּבְלִבּוֹ מִשְׁפָּט אֶחָד / לֹא בִמְחִיר וְלֹא בְשֹׁחַד / אַל יְשַׁקֵּר בֶּאֱמוּנָתוֹ / וְאַל יוֹנֶה אֶת עֲמִיתוֹ / לְהַגְדִּיל עָלָיו עָקֵב / לֹא מִן הַגֹּרֶן וְלֹא מִן הַיָּקֶב / כִּי מִן הַכֶּלֶב יִמְשֹׁל מָשָׁל / כִּי בַשֹּׁחַד לֹא נִכְשָׁל / וְאָמַר הֶחָכָם: הִדָּבֵק בֶּאֱמוּנָה וּשְׁמֹר מִצְוָה / כִּי אֵין עֹשֶׁר גָּדוֹל כַּעֲזִיבַת הַתַּאֲוָה.