יֵשׁ בְּלֹא מִשְׁפָּט נִסְפֶּה / וּלְשׁוֹן חֲכָמִים מַרְפֵּא

לָבִיא הַמֹּלֵךְ בִּגְבוּרָתוֹ / זְאֵב וְשֻׁעָל קָרָא לְחֶבְרָתוֹ / וַיֹּאמֶר לָהֶם: שְׁמָעוּנִי עַמִּי / הַלְּבִיָּא אֲשֶׁר עִמִּי / זֶה חֹדֶשׁ יָמִים גּוּר לִי יָלְדָה / נֵלְכָה יַחַד לְהָבִיא צֵדָה / וַיֵּלְכוּ עִמּוֹ שְׁנֵיהֶם / וַיַעֲבֹר מַלְכָּם לִפְנֵיהֶם / וּמֵחֶבְרָתוֹ לְבָבָם מִגִּיל יִסְעָד / שְׁלֹשָׁה הֵמָּה מֵיטִיבֵי צָעַד / וּבִהְיוֹתָם בַּשָּׂדֶה כַּטֹּרְפִים הִשְׁקִיפוּ / וְשׁוֹר וּפָר וָעֵגֶל בַּיּוֹם הַהוּא יַעֲרֹפוּ / וַיֹּאמֶר הָאֲרִי לַשֻּׁעָל / הֻקַּמְתָּ עָל / הֲלִבְּךָ בְךָ הָעֳרַל / וְלֹא תֵדַע לְחַלֵּק שָׁלָל בְּלִי גוֹרָל / וַיַּעַן הַשֻּׁעָל וַיֹּאמַר: צָעִיר אֲנִי לְיָמִים / וְהַזְּאֵב נֶחְשָׁב בֵּין חֲכָמִים מְחֻכָּמִים / וְרֹב שָׁנִים יוֹדִיעוּ חָכְמָה / וְתִהְיֶה מַשְׂכֻּרְתּוֹ שְׁלֵמָה / וַיֹּאמֶר הָאֲרִי לַזְּאֵב / הֶחָכָם לָמָּה כוֹאֵב / לְבָרֵר הַחֲלָקִים / כִּי כָל הַיּוֹצֵא מִפִּיו יָקִים / וַיַּעַן הַזְּאֵב: הַשּׁוֹר לַאֲדֹנִי הַלָּבִיא / וְהַפָּר אֶל הַלְּבִיָּא רַעְיָתוֹ לְהָבִיא / וְהָעֵגֶל בֵּינִי וּבֵין הַשֻּׁעָל / וַיֹּאמֶר הָאֲרִי: בְּמֶרֶד וּבְמַעַל / וּבְרֶשַׁע וּבְזָדוֹן וּבְמֶרִי / לֹא הִזְכַּרְתָּ חֵלֶק לִבְנִי בְכוֹרִי / עַל כֵּן דָּמְךָ בְּרֹאשֶׁךָ / וְאַאֲדִיב אֶת נַפְשֶׁךָ / וַיֵּט יָדוֹ עָלָיו וַיַּכֵּהוּ / וּמֵעוֹר רֹאשׁוֹ וְרַגְלָיו יַפְשִׁיטֵהוּ / עַד אֲשֶׁר קָדְקָדוֹ וְעוֹרוֹ בְּדָם מְגֹלָל / וַיֹּאמֶר אֶל הַשֻּׁעָל: עַל פִּיךָ יֵחָלֵק שָׁלָל / וַיַּעַן: אֲחַלְּקָה בְצֶדֶק וּבְמִישׁוֹר / לַאֲדֹנִי הַמֶּלֶךְ הַשּׁוֹר / וְהַפָּר לַלְּבִיָּא וְלַגּוּר אֲשֶׁר בּוֹ תָגֵל / דַּנְתִּי כִּי לְחֶלְקוֹ הָעֵגֶל / וַיֹּאמֶר הָאֲרִי: אֵין נָבוֹן וְחָכָם כָּמוֹךָ בְּכָל מֶמְשַׁלְתִּי / מִן הַיּוֹם וָהָלְאָה אֲשִׂימְךָ אֶל מִשְׁמַעְתִּי / כִּי בְעֵינַי מְאֹד נֶחְמַדְתָּ / לְחַלֵּק שָׁלָל מִמִּי לָמַדְתָּ / וַיַּעַן הַשֻּׁעָל: כִּי רָאִיתִי הַמִּצְנֶפֶת / אֲשֶׁר עַל רֹאשׁ הַזְּאֵב בְּדָם מְעֻלֶּפֶת / כַּאֲשֶׁר נוֹקַשׁ בְּאִמְרֵי פִיהוּ / וְלֵב הוּתַל הִטָּהוּ / וַיֵּשְׁתְּ מִכּוֹס חֲמַת אֲדֹנִי / עַל כֵּן לֹא נָתַתִּי לַחֲטֹא לְשׁוֹנִי.

וְהַמָּשָׁל אַל יְמַהֵר אִישׁ לְדַבֵּר / לִפְנֵי אָדָם מִמֶּנּוּ יְגַבֵּר / אַךְ יָכִין מַעֲצָר לְרוּחוֹ / וְתַחְבֻּלּוֹת יִקְנֶה וְאַל יְסַלֵּף אָרְחוֹ / אִם יֵשׁ בְּלֹא מִשְׁפָּט נִסְפֶּה / וּלְשׁוֹן חֲכָמִים מַרְפֵּא / כִּי בִמְזִמּוֹת יַחְשֹׁב / וּדְבַר פִּיו יְאַחֵר / חָכָם יִוָּסֵר עַל יְדֵי אַחֵר / וְאָמַר הֶחָכָם בְּסֵפֶר הַמּוּסָרִים / לֵץ תַּכֶּה וּפֶתִי יַעֲרִים / וְהַיִּשְׁמְעֵאלִי אָמַר בְּחָכְמָתוֹ / חֵלֶק אָדָם מֵאָזְנוֹ לְנַפְשׁוֹ וְחֶלְקוֹ מִלְּשׁוֹנוֹ לְזוּלָתוֹ.