אֱמֹר וְאָמַרְתָּ לְבַעֲלֵי אוֹנִים / לְהַזְהִיר גְּדוֹלִים עַל הַקְּטַנִּים

שַׁחַל אֲשֶׁר עַל כֹּל יִתְגַּבַּר / בְּצֵל סֶלַע יָשֵׁן בַּמִּדְבָּר / וּבִנְקִיק הַסֶּלַע נִצָּב / מֵאַחֲרֵי עָרְפּוֹ הַצָּב / וַיֹּאמֶר הַצָּב: מִי הוּא זֶה אֲשֶׁר לִפְנֵי חוֹרִי / כָּרַע שָׁכַב כָּאֲרִי / וַיִּתְמַרְמַר וַיָּרָץ עָדָיו בַּחֲמַת רוּחוֹ / וַיִּשְׁכֶנּוּ כְפֶתַע בְּמִצְחוֹ / וַיִּיקַץ מִשְּׁנָתוֹ הַשַּׁחַל / וּבְעֵינָיו אֲשֶׁר כַּנַּחַל / וְכַלַּפִּידִים יְשׁוֹטֵט אוּלַי יֶחֱזֶה / אֵיזֶה הוּא וּמִי הוּא זֶה / אֲשֶׁר לַעֲשׂוֹת כֵּן לִבּוֹ מְלָאוֹ / וְהַצָּב כְּבָר שָׁב דֶּרֶךְ בֹּאוֹ / וַיַּבֵּט אֶל הַשַּׁחַל וְהִנֵַּה סָר וְזָעֵף / כַּאֲשֶׁר בְּמַעֲרָצָה נֹשְׁכוֹ יְסָעֵף / וַיִּקְרָא לוֹ הַצָּב: הַתְּבַקֵּשׁ אֶת אֲשֶׁר הֵרַע לְךָ / אֲנִי הוּא הַצָּב הָעוֹמֵד לְמוּלְךָ / אֲשֶׁר בְּאַפִּי וְזַעְפִּי נְשַׁכְתִּיךָ / וּמְאֹד חָרָה לִי אֲשֶׁר לֹא הֲמִתִּיךָ / אַלְלַי לְךָ כִּי רָשַׁעְתָּ הֲלֹא תִמְצָא רִשְׁעֶךָ / פֶּתַע יָקוּמוּ נֹשְׁכֶיךָ וְיִקְצוּ מְזַעְזְעֶיךָ / הֲבִגְבוּרָתְךָ וּבִגְדֻלָּתְךָ תִּהְיֶה לִי לְשָׂטָן / לַאֲשֶׁר אֵחָשֵׁב בְּעֵינֶיךָ נִבְזֶה וְקָטָן / כִּי נִגַּשְׁתָּ אֶל הַסֶּלַע לִסְתֹּם מְבוֹא בֵיתִי / וַאֲנִי בַחֲרוֹנִי אֵלֶיךָ לְשָׂטָן יָצָאתִי.

וְהַמָּשָׁל לְהַזְהִיר הַגְּדוֹלִים עַל הַקְּטַנִּים / פֶּן בְּרֹב כֹּחַ וְעָצְמָה וְאוֹנִים / וּבְגַאֲוָה נֶגֶד קְטַנִּים מֵהֶם יְאְשְׁמוּ / כִּי הַנִּרְדָּפִים חַיִּים עָצְמוּ / וְאִם קְטַנִּים הֵם, גָּדְלָה גְבוּרַת לִבָּם / וּבְקִרְבָּם יָשִׂימוּ אָרְבָּם / לִנְקֹם בִּשְׁאַט נֶפֶשׁ, וְיִלָּבֵב הַנָּבוּב / כִּי יֵשׁ עֲנָק נֶחֱנָק בִּזְבוּב / וְיֵשׁ עֵת יִכָּשְׁלוּ הַנְּפִילִים בַּנְּפָלִים / וּמִן הָרְחֵלִים יָגוּרוּ הַשְּׁחָלִים.