שִׂנְאָה לְדַל כְּתוּבָה / הֶעָשִׁיר יְשׁוּרֶנּוּ בְעֵין אֵיבָה

פַּרְעֹשׁ עַל הַגָּמָל עָלָה / וְהַגָּמָל הֹלֵךְ בַּמְסִלָּה / לָלֶכֶת עַל אֶרֶץ רַבָּה / וְהַפַּרְעֹשׁ בְּצֶמֶר צַוָּארוֹ נֶחְבָּא / וְהַגָּמָל נֹשְׂאוֹ עַל שִׁכְמוֹ / וְלֹא יָדַע בְּשִׁכְבוֹ וּבְקוּמוֹ / וּבְבֹאוֹ עַד קֵץ גְּבוּלוֹ / פַּרְעֹשׁ נָפַל לִפְנֵי רַגְלוֹ / וַיֵּבְךְּ וַיִּתְחַנֵּן לוֹ / פֶּן יֶחֱרֶה בוֹ עַל עֲמָלוֹ / כִּי הִגְבִּיר לוֹ טוּבוֹ וְחַסְדּוֹ / וּבְכָל מָקוֹם יִהְיֶה עַבְדּוֹ / גָּמָל עָנָה: אֵיךְ לְךָ הֲטִיבוֹתִי / וְאֵפוֹא אוֹתְךָ רָאִיתִי / אָמַר לוֹ: עַל שִׁכְמְךָ נְשָׂאתַנִי / וְאֶל מְחוֹז חֶפְצִי הִגַּעְתַּנִי / חֵן חֵן לְךָ כִּי לָשֵׂאת אֹתִי תִרֶץ / לֹא נִסְּתָה כַף רַגְלִי הַצֵּג עַל הָאָרֶץ / וּלְבַעֲבוּר כִּי הֲבִיאֹתַנִי עַד הֲלוֹם / עָלֶיךָ הַחַיִּים וְהַשָּׁלוֹם / וְהַגָּמָל אָמַר: אַלְלַי / כִּי הֶעֱמַסְתָּ אֶת עֻלְּךָ עָלַי / נִבְזֶה וְנִמְאָס הִנָּךְ / כִּי תַגְבִּיהַּ כַנֶּשֶׁר קִנָּךְ / אֵיךְ לֹא יָרֵאתָ עָלַי לִשְׁכֹּן / לִבְרֹחַ אֶת פְּעָמֶיךָ הִכֹּן / הֲיֵאוֹת לִי לְקָרֵב כְּצַלְמְךָ וּבִדְמוּת / בְּיוֹם רְאוֹתְךָ עוֹד פָּנַי תָּמוּת / הָהּ לַיּוֹם אֲשֶׁר הָיִיתִי מְאֹד עָמוּס וּמְסֻבָּל / מִמַּשָּׂאֲךָ אֶת גַּבִּי חִבַּל / וַיִּפָּטֵר פַּרְעֹשׁ מִן הַגָּמָל / אֲשֶׁר לָשֵׂאת אֹתוֹ לֹא עָמָל.

וְהַמָּשָׁל בְּדַל אֲשֶׁר שְׁלוֹם הֶעָשִׁיר וּכְבוֹדוֹ יַעֲנֶה / בְּדָבָר אֲשֶׁר הֶעָשִׁיר לֹא חָסֵר וְהַדַּל נֶהֱנֶה / וְחֵן חֵן לוֹ יַרְבֶּה בְמַאֲמָר / בְּלֵב הֶעָשִׁיר יָצוּק דָּבָר מָר / וְתַחַת אַהֲבָתוֹ יִשְׂטְמֶנּוּ / וּבְמַסְתֵּר פָּנִים מִמֶּנּוּ / יְשׁוּרֶנּוּ בְעֵין אֵיבָה / כִּי שִׂנְאָה לַדָּל בְּלֵב עָשִׁיר כְּתוּבָה.