לוגו
משל עח: קוֹף וָמֶלֶךְ
פרק:
מיקום ביצירה:
0%
X
F
U

אָרַח עִם שְׂפַת שֶׁקֶר לַחֲבוּרָה / נַפְשׁוֹ בְעֵינָיו לֹא יָקְרָה


קוֹף מֶלֶךְ גָּדוֹל גִּדְּלוֹ / יָמִים רַבִּים עָמַד אֶצְלוֹ / עַד אֲשֶׁר הִכִּיר כָּל מַעְבָּדָיו / מַאֲכַל שֻׁלְחָנוֹ וּמוֹשַׁב עֲבָדָיו / וַאֲשֶׁר מָלַךְ עֲלֵיהֶם וְגָבַר / לֹא נֶעְלַם מִמֶּנּוּ כָל דָּבָר / לָצֵאת מִשָּׁם הָיָה נָחוּץ / וְלִמְשֹׁל עַל אֶחָיו בַּחוּץ / וַיְהִי הַיּוֹם וַיָּכֶן אֶת מִבְרָחָיו / וַיֵּצֵא הַשָּדֶה אֶל אֶחָיו / בְּמִדְבָּרוֹת עַל הֶהָרִים / בִּסְעִיפֵי סֶלַע בַּיְעָרִים / וַיֹּאמֶר לִפְנֵי קוֹפֵי יָעַר / אִי לָךְ אֶרֶץ שֶׁמַּלְכֵךְ נָעַר / עַל כֵּן יָרְדוּ טוֹבִים מַטָּה / כָּל רֹאשׁ מֻקְרָח וְכָל כָּתֵף מְרוּטָה / וְאֵין אֶחָד מִכֶּם גֹּדֵר פָּרֶץ / מִי יִתְּנֵנִי שֹׁפֵט בָּאָרֶץ / לְהָשִׁיב לַצַּדִּיק כְּצִדְקָתוֹ / וְלֹא תוֹנוּ אִישׁ אֶת עֲמִיתוֹ / וְאֶעֱשֶׂה לַכֹּל כַּאֲשֶׁר זָמַם / אֲנִי לֹכֵד חֲכָמִים בְּעָרְמָם / יֵאוֹת לִי עַל רֵעַי לִהְיוֹת מֹשְׁלָם וְרֹדֵם / בֶּן חֲכָמִים אֲנִי בֶּן מַלְכֵי קֶדֶם / הַקּוֹפִים דְּבָרָיו הֶאֱזִינוּ / וַיֹּאמְרוּ: קָצִין תִּהְיֶה לָנוּ / וַיִּבְחַר מִכָּל הַקּוֹפִים / הַגִּבּוֹרִים הַיָּפִים / לִהְיוֹת נִצָּבִים עָלָיו / וְיֵשׁ לְהָכִין מַאֲכָלָיו / וְהַנִּבְזִים וּרְפֵי מָתְנַיִם / נְתָנָם חֹטְבֵי עֵצִים וְשֹׁאֲבֵי מַיִם / וְהַזְּקֵנִים הֵקִים שֹׁפְטִים / וַיְהִי בִימֵי קְצִיר חִטִּים / שְׁנֵי אֲנָשִׁים בַּמִּדְבָּר תָּעוּ / וַיָּבֹאוּ עַד הַמָּקוֹם אֲשֶׁר תָּקְעוּ / הַקּוֹפִים שָׁם אֶת אָהֳלֵיהֶם / וַיִּרְאוּ כִּי בְקֶרֶב מַחֲנֵיהֶם / מֶלֶךְ וְכָל אֶחָד הֹלֵךְ / לֵאמֹר: יְחִי אֲדֹנֵינוּ הַמֶּלֶךְ / וְקוֹף קָטָן עֹמֵד לְפָנָיו / וַיִּמְצָא חֵן וָחֶסֶד בְּעֵינָיו / עַל כֵּן חֲשָׁבוּהוּ הָאֲנָשִׁים לִבְנוֹ / נִצְּבָה שֵׁגָל לִימִינוֹ / אֵצֶל הַחֲרֻלִּים עַל שִׂיחִים / אֹכְלִים וְשֹׁתִים וּשְׂמֵחִים / זֶה שַׂר הָאֹפִים וְזֶה שַׂר הַמַּשְׁקִים / וְזֶה שֹׁמֵר כֵּלִים רֵיקִים / זֶה נִקְלֶה וְזֶה נִכְבָּד / כְּחֹק וּמִשְׁפָּט בֵּין אֲנָשִׁים / אֲשֶׁר רָשִׁים עֹבְדִים רָאשִׁים / וְהַקּוֹף בַּאֲנָשִׁים הִתְבּוֹנָן / וּבְכִלְיוֹתָיו יִשְׁתּוֹנָן / וַיְהִי כַאֲשֶׁר רָאָם / בְּשִׂפְתֵּי רָצוֹן לוֹ קְרָאָם / לַגָּדוֹל אָמַר: אֲנִי מַשְׁבִּיעֲךָ / לְהַגִּיד לִי מַה בְּמַדָּעֲךָ / אִם הוֹד הַמַּלְכוּת עָלַי / אִם גִּבּוֹרִים נֹשְׂאֵי כֵלָי / וְאִם בְּנִי לִמְאֹד יָפֶה / הֶחָזָק הוּא הֲרָפֶה / וְאִם יְפַת מַרְאֶה אִשְּׁתִּי / אֲשֶׁר נִצְמֶדֶת אִתִּי / וְאִם לִמְאֹד נָעֲמוּ מְשָׁרְתַי / וְשֹׁמְרֵי בֵיתִי וְאוֹצְרוֹתָי / הָאִישׁ הַנֶּאֱמָן אֲשֶׁר הִשְׁבִּיעַ / לְפִי רְאוּת עֵינָיו יַבִּיעַ / וַיֹּאמַר: מִכָּל אֲשֶׁר רָאִיתִי / לֹא אֲשַׁקֵּר בֶּאֱמוּנָתִי / כָּאָב כַּבֵּן כְּאִמָּהּ כְּבִתָּהּ / כָּעֶבֶד כַּאֲדֹנָיו כְּשִׁפְחָה כִגְבִרְתָּהּ / קוֹפִים אַתֶּם וְקוֹפִים אֲבוֹתֵיכֶם / בָּרוּךְ אֲשֶׁר מָאַס בָּכֶם / קוֹפִית אִשְׁתְּךָ וְקוֹף בִּנְךָ / נִצְּבָה שֵׁגָל לִימִינְךָ / תָּאֳרָהּ מָשְׁחָת וְהוּעָם / נִבְזִים וּשְׁפָלִים לְכָל הָעָם / אַתֶּם פְּרִיצֵי חַיּוֹת וְעִקְּשִׁים / וּמֵעֲדַת כָּל חַי נִגְרָשִׁים / תַּחַת כְּבוֹדְכֶם חֶרְפָּה / וְתַחַת חֲגוֹרָה נִקְפָּה / קוֹץ מַכְאִיב וְסִלּוֹן מַמְאִיר / אַחֲרֵיכֶם נָתִיב לֹא יָאִיר / אַךְ תַּבְאִישׁוּ כָּל מָלוֹן / יְרֻשַּׁתְכֶם בּוּז וְקָלוֹן / קוֹף הַמֶּלֶךְ הַדָּבָר שָׁמָר / לָאִישׁ הַשֵּׁנִי שָׁאַל וְאָמַר / מִי יִתֵּן וְאֶשְׁכְּנָה בְמִגְרָשֶׁיךָ / אַשְׁרֵי עֲבָדֶיךָ וְאַשְׁרֵי אֲנָשֶׁיךָ / הַשֹּׁמְעִים אֶת חָכְמָתֶךָ / וְרוֹאִים יְפִי חֲבוּרָתֶךָ / אֲשֶׁר לִמְאֹד גָּבְרָה יָדָם / יָפְיָפִיתָ מִבְּנֵי אָדָם / וְאִם כָּל יָפִים אֶצְלְךָ נִקְהָלוּ / אוֹר פָּנֶיךָ לֹא יַפִּילוּ / וְאִשְׁתְּךָ מְאֹד נָעֲמָה / כְּלִילַת יֹפִי וְחָכְמָה / לֵב כָּל מֶלֶךְ בִּרְאוֹתָהּ יִגְאֶה / יְפֵַת תֹּאַר וִיפַת מַרְאֶה / בִּנְךָ לֹא נֶחְקַר הוֹדוֹ / מִכַּף רַגְלוֹ וְעַד קָדְקָדוֹ / אֵין בּוֹ מוּם וְכָל דֹּפִי / לֹא דֹמֶה לוֹ כָּל חַי בְּיֹפִי / קוֹפִים קָרְאוּ אֶל הַמְשַׁקֵּר / וַיְכַבְּדוּהוּ עַד אֵין חֵקֶר / וְלַנֶּאֱמָן בְּגָדָיו קָרָעוּ / וְאַחֲרֵי כֵן הִכּוּהוּ וּפָצָעוּ / וְהַמֶּלֶךְ צִוָּה לַהֲשִׁיבוֹ אֶל מְסִלּוֹתָיו / לְהוֹדִיעַ לִבְנֵי אָדָם גְּבוּרוֹתָיו.


וְהַמָּשָׁל בְּאִישׁ אֲשֶׁר אֵין רְמִיָּה בְּעֶשְׁתֹּנוֹתָיו / וְעַוְלָה לֹא נִמְצָא בִשְׂפָתָיו / וְאָרַח עִם שְׂפַת שֶׁקֶר לַחֲבוּרָה / נַפְשׁוֹ בְעֵינָיו לֹא יָקְרָה / כִּי זֶה לְהַחֲנִיף הָאֱמֶת יְסַלֵּף / וְזֶה לֹא יָמִיר וְלֹא יְחַלֵּף / וְאִם בַּעֲבֹתוֹת הָאֱמֶת יִהְיוּ נִצְמָדִים / אַחֲרִיתָם לִהְיוֹת מְכֻבָּדִים / וְהָהּ לַיּוֹם אֲשֶׁר אִישׁ בְּפִיו נַפְשׁוֹ יְטַנֵּף / לִקְבֹּץ אָוֶן לַעֲשׂוֹת חֹנֶף / וּלְבַעֲבוּר כִּי חֲנֻפָּה רַבּוּ אֹהֲבֶיהָ / הָאָרֶץ חָנְפָה תַּחַת יֹשְׁבֶיהָ.