תִּשְׁמַע וְתַקְשֵׁב / הַמְקָרֶבְךָ קְרוֹבְךָ יֵחָשֵׁב

רָחֵל הָיְתָה תוֹךְ הָעֵדֶר / וְעֵז רָחוֹק מִן הַגָּדֵר / רֹעֶה לֵדַת רָחֵל מְיַחֵל / וַיְהִי כַאֲשֶׁר יָלְדָה רָחֵל / לָקַח הַשֶּׂה וַיְבִיאֵהוּ / אֶל הָעֵז וַתְּנִיקֵהוּ / עַד אֲשֶׁר גָּדַל וַיִּגָּמֵל / וְטִפְּחַתּוּ בְרֹב עָמָל / אָז אָמְרָה: רְאֵה אֹרְחוֹתֶיךָ / שׁוּב אֶל אֶרֶץ אֲבֹתֶיךָ / וּלְמוֹלַדְתְּךָ וַעֲשֵׂה חָיִל / אִמְּךָ רָחֵל אָבִיךָ אָיִל / אִם אֲנִי עַד כֹּה גִדַּלְתִּיךָ / רִבִּיתִיךָ טִפַּחְתִּיךָ / וּבְשׁוּבְךָ אֶל עַמֶּךָ / יִשְׂמַח אָבִיךָ וְאִמֶּךָ / הַשֶּׂה עָנָה: אַךְ אַתְּ אִמִּי / בַּאֲשֶׁר הֵיטַבְתְּ חַסְדֵּךְ עִמִּי / לֹא אֶקְרָא אִמִּי הָרְחֵלָה / כִּי רִחֲקָה אֹתִי מֵעַל גְּבוּלָהּ / וְלֹא יָסְפָה עוֹד לִרְאוֹתִי / וְאֵלֶיהָ לֹא תְשׁוּקָתִי.

וְהַמָּשָׁל שְׁמַע וְהַקְשֵׁב / הַמְקָרֶבְךָ קְרוֹבְךָ יֵחָשֵׁב / וּמַרְחִיקְךָ אַף אִם הוּא קָרוֹב / חֲשֹׁב אֹתוֹ בָּטֵל בְּרוֹב / מוּזָר לְאֶחָיו וְנָכְרִי / עֹכֵר שְׁאֵרוֹ אַכְזָרִי / אֹמֵר, כִּי אֵין אֹהֲבִי / אִם לֹא מֵאִמִּי וְאָבִי / הַמְכַבְּדִי עִם יֹשְׁבֵי חָלֶד / וְאָח לְצָרָה יִוָּלֵד.