אֲשֶׁר אֵין בּוֹ רַק מַהֲלַל שְׂפָתָיו / יַעְטֶה בָּשְׁתּוֹ וְיִלְבַּשׁ כְּלִמּוֹתָיו

הַשֻּׁעָל קָרָא לֶחָתוּל / תַּחַת עֵץ עַל מַיִם שָׁתוּל / לֵאמֹר: שְׁמָעֵנִי, מֵעַתָּה / נִכְרְתָה בְרִית אֲנִי וְאַתָּה / כִּי רַגְלַי קַלּוֹת כָּאַיָּלוֹת / וּכְנֶגְדָּם נִסִּיתָ לַעֲלוֹת / בִּמְקוֹם אֲשֶׁר לֹא יַעֲלֶה שֻׁעָל / הִנֵּה רָאִיתִי מִמַּעַל / בְּשַׂר כֶּבֶשׂ לַח וְשָׁמֵן / וְאִם דְּבָרִי לֹא יֵאָמֵן / בֹּא וְאַרְאֶךָ הַמָּקוֹם הַהוּא / וְתַחַת זֶה הָעֵץ נֹאכְלֵהוּ / וְהֶחָתוּל הֵשִׁיב מַעֲנֶה / עַל פִּיךָ אֶסַּע וְאַחֲנֶה / וַיִּכְרְתוּ בְרִית בֵּינֵיהֶם / וַיֵּלְכוּ יַחְדָּו שְׁנֵיהֶם / וַיֹּאמֶר לוֹ הַשֻּׁעָל: פְּקַח עֵינֶיךָ / וּרְאֵה הַמָּקוֹם אֲשֶׁר לְפָנֶיךָ / וְאִם תּוּכַל הַבָּשָׂר לְהָבִיא / עָלִיתָ לַמָּרוֹם שָׁבִיתָ שֶּׁבִי / וַאֲנִי אוֹחִיל לְךָ הֲלוֹם / עַד שׁוּבְךָ אֵלַי בְּשָׁלוֹם / וְהֶחָתוּל בְּמַעֲלוֹת עָלָה / אֶל הַבָּשָׂר אֲשֶׁר נִתְלָה / בַּאֲשֶׁר לֶאֱכֹל אֹתוֹ חֹבֵב / עָלָה לַכֶּבֶשׂ וּפָנָה לַסּוֹבֵב / וְהַבָּשָׂר בֵּין שִׁנָּיו נֹשְׂאוֹ / שֻׁעָל הַמְצַפֶּה עֵת בֹּאוֹ / שָׂמַח וַיֵּצֵא לִקְרָאתוֹ / בַּאֲשֶׁר שָׁמַר אֶת מִצְוָתוֹ / וּבְאָזְנֵי הֶחָתוּל יוֹעֵץ / נֵלְכָה נָא תַּחַת הָעֵץ / וּבְגוֹרָל יֵחָלֵק שַׁמָּה / בְּלֹא עָרְמָה וּבְלֹא מִרְמָה / וּבְלֶכְתָּם יַחַד בַּמְסִלּוֹת / שֻׁעָל חֹשֵׁב בְּתַחְבֻּלוֹת / וְלִגְזֹל הַבָּשָׂר אֹרֵב / וְאֶל הֶחָתוּל הֹלֵךְ וְקָרֵב / וְהֶחָתוּל לַעֲלוֹת עַל עֵץ מִהַר / בְּטֶרֶם הַשֻּׁעָל נִזְהָר / כַּאֲשֶׁר רָעֵב וְחָשׁ לֶאֱכֹל / שֻׁעָל לַעֲלוֹת שָׁם לֹא יָכֹל / וַיִּקְרָא לוֹ: חָתוּל בּוֹגֵד / הֲתֹאכַל וְאֶעֱמֹד מִנֶּגֶד / וְלֹא תִשְׁמֹר אֶת בְּרִיתֶךָ / וְאֶת מוֹצָא שְׂפָתֶיךָ / לְהָשִׁיב אֶת נַפְשִׁי הָרְעֵבָה / תֶּן לִי וְלֹא אוֹסִיף לְדַאֲבָה / וַיַּעַן לוֹ: בְּאַוַּת נַפְשִׁי אֹכַל בָּשָׂר / וּבֶטֶן רְשָׁעִים תֶּחְסָר / אֲנִי אֹכַל וְאַתָּה תִרְעָב / וְהַמַּלְעִיב יִהְיֶה לְנִלְעָב / לִי הַבָּשָׂר, בְּרִיאָה וּשְׁמֵנָה / וְשִׁנֵּי רְשָׁעִים תִּקְהֶינָה / וַיֹּאמֶר הַשֻּׁעָל: הֲזֶה מֵאִתְּךָ גְּמוּלִי / וְאִם כָּכָה אַתְּ עֹשֶׂה לִי / תַּחַת אָוֶן עָמָל תִּקְצֹר / הִנְנִי עָלֶיךָ בְּמָצוֹר / לְשַׁלֵּם לְךָ מִדָּה בְמִדָּה / וּמַה תַּעֲשֶׂה לְיוֹם פְּקֻדָּה / כִּי מִשְׁפָּטְךָ חָרוּץ וְנֶחְצָב / וְצַרְתִּי עָלֶיךָ מֻצָּב / לֹא אָמוּשׁ מִזֶּה עַד רִדְתֶּךָ / אֵיפֹה תִמְצָא דֶּרֶךְ לֶכְתֶּךָ / תַּחַת הַבָּשָׂר אֶקַּח נַפְשֶׁךָ / וְאָסִיר מֵעָלֶיךָ רֹאשֶׁךָ / חָתוּל עָנָה: זֹאת לֹא תִהְיֶה / לֹא אָמוּת כִּי אֶחְיֶה / בַּאֲשֶׁר מִן הָהָר יֹרְדִים / פָּרָשִׁים רֹכְבֵי צְמָדִים / לִפְנֵיהֶם כְּלָבִים יִתְגָּאוּ / דֶּרֶךְ עָלֶיךָ יָבֹאוּ / בְּרַח וְתִמְצָא לְךָ נֹפֶשׁ / כִּי לָמָּה יַכּוּךָ נָפֶשׁ / שִׂים לַדֶּרֶךְ פְּעָמֶיךָ / טֶרֶם בְּיָדָם תִּנָּתֵן / צַפֵּה דֶרֶךְ חַזֵּק מֹתֶן / שֻׁעָל עָנָה: לֹא יָגֹרְתִּי / וְלֹא מִן הַכְּלָבִים נִִבְעַתִּי / כִּי מִי יוּכַל אֵלַי לְהָרַע / לִבִּי מֵעָרְמוֹת לֹא יִגְרַע / מִמֵּאָה תַחְבֻּלוֹת וְסִבּוֹת / וְכָהֵנָּה עִמִּי רַבּוֹת / אֲשֶׁר מֵהֶם אֲמַלֵּט נַפְשִׁי / לָצֵאת מִיָּדָם חָפְשִׁי / אַךְ לֹא אֵלֵךְ עַד סְכוֹתִי / אֲשֶׁר תִּתָּפֵשׂ בִּמְצוּדָתִי / וּבֵין שִׁנַּי תִּהְיֶה נִשְׁבָּר / לֹא תִרְדֹּף עוֹד אַחֲרֵי עַכְבָּר / וַיְהִי כְדַבֵּר לוֹ כָּכָה / כְּלָבִים בָּאוּ בַּמַּעֲרָכָה / וְהַפָּרָשִׁים הֱסִיתוּם בּוֹ / זֶה נֹשֵׁךְ אֹתוֹ עַל גַּבּוֹ / זֶה בִּזְנָבוֹ וְזֶה בְּאָזְנָיו / זֶה בְּצַוָּארוֹ נֹתֵן שִׁנָּיו / וְיֵשׁ אֲשֶׁר אֹתוֹ נֹשֵׁךְ / בְּגִיד פַּחֲדָיו וּבָאָשֶׁךְ / וְכַאֲשֶׁר קְרָאַתְהוּ הַתְּלָאָה / חָתוּל קָרָא: אֶחָד מִמֵּאָה / תַּחְבֻּלוֹת עֲשֵׂה נָא וְהִמָּלֵט / אָז תִּהְיֶה בְּגוּפְךָ שֹׁלֵט / וּמַה יּוֹעִילוּ עָרְמוֹתֶיךָ / אִם לֹא יוֹשִׁיעוּךָ בְּעֵת רָעָתֶךָ.

וְהַמָּשָׁל כִּי זֶה מִנְהַג הַמִּתְגָּאִים / תַּרְבּוּת אֲנָשִׁים חַטָּאִים / הָאֹמְרִים: יָדֵנוּ רָמָה / מֵהָחֵל חֶרְמֵשׁ בַּקָּמָה / מְאֹד מִתְהַלֲלִים בְּעָרְמָתָם / וּמִתְפָּאֲרִים בְּאֻמְנוּתָם / אֲנִי שֹׁקֵל אֲנִי סֹפֵר /אֲנִי חָרָשׁ אֲנִי תֹפֵר / אֲנִי צֹרֵף אֲנִי סֹחֵר / אֲנִי חָכָם וּמִי כָמוֹנִי אַחֵר / אֲשֶׁר לִי יִדְמֶה וְיִשְׁוֶה / אֲנִי רֹפֵא לְכָל מַדְוֶה / וְלֹא יַצִּיל נַפְשׁוֹ מִצָּרָתוֹ / וְלֹא יְכַלְכֵּל בְּנֵי בֵּיתוֹ / בַּאֲשֶׁר לֹא נִמְצָא חָכְמָה בּוֹ / וְכָל רוּחַ אֵין בְּקִרְבּוֹ / וְיַעְטֶה בָּשְׁתּוֹ וְיִלְבַּשׁ כְּלִמּוֹתָיו / אִישׁ אֲשֶׁר אֵין בּוֹ רַק מַהֲלַל שְׂפָתָיו.