אֲשֶׁר מִצְוַת אָבִיו עֹשֶׂה / אֲפִלּוּ הַלִּוְיָתָן לוֹ עֲווֹנוֹ נֹשֵׂא

זָקֵן חָסִיד וְעָנָיו / מִזֹּקֶן כָּבְדוּ עֵינָיו / עַל צוּר קוֹנוֹ הִשְׁלִיךְ מַחְסֶה / כַּד קְצִיר רְמוּ בְעַרְסֵיהּ / אֶל בְּנוֹ הַגָּדוֹל חִוָּה / וּמֵחֲמַת מוֹתוֹ אֵלָיו צִוָּה / עַל מַיִם שַׁלַּח לַחְמֶךָ / תִּמְצָאֶנּוּ בְרֹב יָמֶיךָ / וַיְהִי אַחֲרֵי מוֹת הַזָּקֵן / הִנֵּה יָשַׁב הַבֵּן עַל כֵּן / אָבִיו, עָשָׂה כַּאֲשֶׁר צִוָּהוּ / הָלַךְ בַּדֶּרֶךְ אֲשֶׁר הוֹרוֹ נָחָהוּ / בַּיָּם יָרָה לַחְמוֹ בְּלִי לַחֲדוֹל / וַיְמַן יְיָ לוֹ דָג גָּדוֹל / לֶאֱכֹל הַלֶּחֶם עַד שָׂבְעוֹ / אִם גָּדוֹל מֵחֲבֵרוֹ בּוֹלְעוֹ / קוֹרֵא מִסָּבִיב לַדָּגִים / יוֹם טָבֹחַ, וַיֵּלְכוּ נוּגִים / אֶל רַב הַחֹבֵל לִוְיָתָן / עַל הַדָּג קַשְׁתּוֹ בְאֵיתָן / דָּרַךְ, הָרַס בָּם לֹא חָמַל / בִּדְגֵי הַיָּם קָצִיר יִמָּל / וַיְצַו לִוְיָתָן לִקְרֹא לוֹ / אַל נָא יַעֲמֹד אִם רַב חֵילוֹ / פֶּן יֵצֵא הוֹד נַחְרוֹ אֵימָה / אַהַרְגֶנּוּ בַמִּלְחָמָה / וַיָּבֹא הַדָּג הֹמֶה וְגֹעֶה / מֵרֹב גָּדְלוֹ בְכֹחוֹ סֹעֶה / חָרַד הַדַָּג חֲרָדָה גְדוֹלָה / כִּי הִרְתִּיחַ כַּסִּיר מְצוּלָה / וְהַלִּוְיָתָן בּוֹ אַפּוֹ יִחָר / עֵינָיו כְּעַפְעַפֵּי שָׁחַר / וַיֹּאמַר: אֵיךְ הִסְכַּנְתָּ הַסְכֵּן / וְאֵיךְ מְלָאֲךָ לִבְּךָ לַעֲשׂוֹת כֵּן / מִי שַׂמְךָ שַׂר וְשֹׁפֵט עָלֵינוּ / וְאִם אַתָּה הָאִישׁ אֲשֶׁר כִּלָּנוּ / וַיִּגַּשׁ אֵלָיו הַדָּג וְהוֹדָה / אַל יִחַר לְךָ אִם אַגִּידָה / אֱמֶת כִּי בַעֲווֹנִי רָצַחְתִּי / וְכָזֹאת וְכָזֹאת עָשִׂיתִי / וַיַּעַן אֵלָיו לִוְיָתָן / מִיַּד מִי לְךָ אֲרוּחָה נִתָּן / וּמִי אֲשֶׁר הִגִּיד לְךָ עַד כֹּה / וַיֹּאמַר: אִישׁ אֶחָד דַּרְכּוֹ / בְּפַת־בַּג אֹתִי הֶחֱזִיק / וּבֶאֱמֶת כִּי שׁוֹרוֹ הִזִּיק / עָנָה לִוְיָתָן: אִם תְּכַפֵּר / עֲווֹנְךָ מִצְוָתִי אַל תָּפֵר / צֵא נָא אֶל הַמָּקוֹם אֲשֶׁר רָבַצְתָּ / כִּי מִשְׁפַּט הָאִישׁ חָרַצְתָּ / לִזְרֹק לַחְמוֹ אֵלֶיךָ כְּדָרְשׁוֹ / תִּבְלָעֶנּוּ וּשְׁמֹר נַפְשׁוֹ / וּבָזֶה נַפְשְׁךָ הִצַּלְתָּ / מֵאֲשֶׁר הָרַגְתָּ וְלֹא חָמַלְתָּ / עָנוּ כֻלָּם: זֶה יִתָּכֵן / וַיִּיטַב הַדָּבָר וַיַּעַשׂ כֵּן / וַיִּבְלַע הָאִישׁ תּוֹךְ גְּרוֹנוֹ / וַיְקִיאוֹ לִפְנֵי אֲדֹנוֹ / וַיִּשְׁאַל אֶל הָאִישׁ בְּחֵמָה / מַה זֶּה וְעַל מַה זֶּה וְלָמָּה / נָתַתָּ לַדָּג מַאֲכָלֶךָ / וַהֲלֹא אֵין מְזוֹנוֹתָיו עָלֶיךָ / וְאִם כֵּן הוּא וְעָלֶיךָ שְׁמִירָתוֹ / וְאַתָּה תִּסָּפֶה בְחַטָּאתוֹ / וַיִּשְׁתַּחוּ הָאִישׁ לְאַפָּיו / וַיֹּאמֶר כִּי בְנִקְיוֹן כַּפָּיו / וּבְמִצְוַת אָבִיו זֹאת עָשָׂה / וְהַלִּוְיָתָן יָדָיו נָשָׂא / בְּחַיֵּי נַפְשׁוֹ / אִם יִפֹּל מִשַּׂעֲרַת רֹאשׁוֹ / לֹא תִדּוֹן בִּגְזֵרָה שָׁוָה / יַעַן שָׁמְרְךָ מִצְוָה / וְלֹא מַעֲשֶׂה זָר מַעֲשֵׂהוּ / הַרְחֵב פִּיךָ וַאֲמַלְאֵהוּ / רוּחַ חָכְמָה, תַּשְׂכִּיל בַּכֹּל / תִּתְחַכֵּם מִדַּרְדַּע וְכַלְכֹּל / וְאֶת מַאֲמַר לִוְיָתָן קֻיָּם / וַיּוּצָא מִן הַיָּם / וַיְהִי חִישׁ מַהֵר כְּצֵאתוֹ / וְלֹא נִמְצָא אִישׁ חָכָם כְּמוֹתוֹ / וְתוֹלְדוֹתָיו כַּאֲשֶׁר נִרְשָׁמִים / בְּיֹשֶׁר בְּדִבְרֵי הַיָּמִים.