א           לְבַר לֵבָב, אֲשֶׁר

רְדָפוּהוּ זֵדִים וְלֹא יָכְלוּ לוֹ:

ב           אֲרוֹמֵמְךָ יְיָ כִּי הִצַּלְתָּנִי

וְרֹדְפֵי חִנָּם לֹא שִׂמַחְתָּ לִי:

ג           מִיְּדֵי זֵדִים מִּלַּטְתָּנִי

מִפַּח טָמוּן לְרַגְלִי:

ד           אֹיְבֵי נַפְשִׁי חָרְקוּ שֵׁן

הָאֹמְרִים לְפִידִי הֶאָח הֶאָח:

ה           אֲשֶׁר אָמְרוּ לְכוּ וְנַכְחִידוֹ מֵאָדָם

וְלֹא יִזָּכֵר שְׁמוֹ עוֹד:

ו           וַיִתְנַכְּלוּ עָלַי לְאַבְּדֵנִי

וַיִתְעוֹלְלוּ עֲלִילוֹת בָּרָשַׁע:

ז           כִּתְּרוּנִי סְבָבוּנִי אָמַרְתִּי נִגְזָרְתִּי:

ח           לְתִתִּי בְּמַאֲסָר זָמָמוּ

וַאֲנִי מֵעָוֹן נִקֵּיתִי:

ט           פָּג לִבִּי בְּקִרְבִּי יָרֵאתִי לְנַפְשִׁי:

י           וָאֵשֵׁב בָּדָד וָאֵבְךְּ וּסְבִיבוֹתַי עֲרָפֶל:

יא           יְיָ אַל יַעַלְצוּ אֹיְבַי לִי

אַל יֹאמְרוּ בִּלַּעֲנוּהוּ:

יב           שְׁבֹר זְרוֹעַ רָשָׁע

שְׁלוּחָה אַל נָקִי וָתָם:

יג           וְשַׂמְתָּ שַׂכִּין בְּלֹעוֹ

כְּבַלַּע צַדִּיק מִמֶּנּוּ:

יד           עָלַי דָּרְכוּ חִצָּם לְשׁוֹן רְמִיָה:

טו           כּוֹנְנוּ עַל יֶתֶר אֵיבָה וּמַשְׂטֵמָה:

טז           נַתֵּק יִתְרָם אֱלֹהִים

וּבְנֵי אַשְׁפָּתָם עֲלֵיהֶם הָשֵׁב:

יז           שָׁמַעְתָּ אֱלֹהִים קוֹלִי

וַתִּפְקְדֵנִי בִּדְבַר יְשׁוּעָה:

יח           צִוִּיתָ לְאֵידִי הֶרֶף

וַיָשָׁב שְׁאוֹל תַּחְתִּיָה:

יט           וְאֹיְבַי אָמְצוּ מִמֶּנִּי

כָּרְעוּ קָרְסוּ וְאֵינָם:

כ           יָשׁוּבוּ עַל עֵקֶב בָּשְׁתָּם

וּבְקֶרֶב לִבָּם יֵחַתּוּ – סֶלָה:

כא           וַאֲנִי עָנִי וּנְכֵה רוּחַ

בַּמָה אֵפוֹא אִכַּף לָךְ:

כב           הֲלֹא יָדַעְתָּ לִבִּי צְרַפְתָּנִּי

וּמוֹרָשָׁיו מִמְּךָ לֹא נִכְחָדוּ:

כג           הַיֹּצֵר לֵב הֲלֹא יִבְחָן?

הַכּוֹנֵן מַחֲשָׁבוֹת הֲלֹא יֵדַע?

אֲשֶׁר שָׂם לֶאֱנוֹשׁ בִּינָה:

כד           לְךָ נִגְלוּ תַעֲלוּמוֹת,

וּצְפוּנוֹת אַתָּה יָדַעְתָּ:

כה           אִם נִפְתָּה לִבִּי אַחֲרֵי זֵדִים

וּבְדֶרֶךְ חֲטָאִים הָלֹךְ הָלַכְתִּי:

כו           אִם כִּחַדְתִּי אֱלוֹהַּ מִמַּעַל

וּכְהָתֵל בֶּאֱנוֹשׁ בּוֹ הֵתַלְתִּי:

כז           הֲלֹא אַתָּה אֱלֹהִים תַּחֲקֹר זֹאת

וְתִשְׁפֹּךְ עָלַי חֲרוֹנֶךָ:

כח           יִבְלְעוּ אֹיְבַי כִּשְׁאוֹל תַּחְתִּית

וְלֹא יִהְיֶה מִפִּיהֶם מַצִּיל:

כט           אוּלָם יָדַעְתָּ כִּי חַף אָנִי

מְעַוֵּל וְרָשָׁע אֵינֶנִי:

ל           עַל כֵּן מִלַּטְתָּנִי

וְאֹיְבַי הִנְחַלְתָּ בֹּשֶׁת:

לא           לְעֵינֵיהֶם אָרִים רֹאשׁ

חָפְשִׁי בַּחוּצוֹת אֶתְהַלֵכָה:

לב           יַד עַל פֶּה יָשִׂימוּ

וְלֹא יְזִידוּן לִשְׂחוֹק עוֹד!

לג           מָה-רַבּוּ חֲסָדֶיךָ יְיָ

אֲשֶׁר עָשִׂיתָ עִמָּדִי עַבְדֶךָ:

לד           לֹא אֶשְׁכַּח חַסְדְךָ לָנֶצַח

לְדוֹר וָדוֹר אֲהַלֶלְךָ – סֶלָה:

לה           כָּל יְמֵי חַיַּי שְׂפָתַי יְשַׁבְּחוּנֶךָ

וָאֲבָרֶכְךָ מֵעַתָּה וְעַד עוֹלָם

הַלְלוּ-יָהּ: