[מרוֹמָא, נולד קודם לשנת 1290, מת אחרי שנת 1330]

קִינָה    🔗

אֶשָּׂא נְהִי יְלֵל וְקִינָה

אֶזְעַק אוֹיָה בְּזָכְרִי

יוֹם אַל־יִחַדּ בִּימֵי שָׁנָה

כִּי בוֹ גָדֵל כַּיָּם שִׁבְרִי.

בְּזֶה חֹדֶשׁ הַחֲמִישִׁי

נִתְּכוּ כַמַּיִם שַׁאֲגֹתָי

וַתִּבְחַר מַחֲנַק נַפְשִׁי

מָוֶת מֵעַצְמוֹתָי.

בַּחוּרִים וְגַם־בְּתוּלוֹת

זְקֵנִים עִם־נְעָרִים

הֵילִילוּ הָהּ קוֹלֵי קוֹלוֹת

בִּתְרוּעָה עִם שְׁבָרִים.

כִּי שֻׁדְּדָה עִיר עַלִּיזָה

יְפֵה נוֹף מְשׂוֹשׂ הָאָרֶץ

עַד־הַיְסוֹד עֵרָה אַרְזָה

עָלֶיהָ עָלָה הַפֹּרֵץ.

נְבוּכַדְנֶצַּר מֶלֶךְ בָּבֶל

נַפְשֵׁנוּ לֶעָפָר שָׁחָה

אֵלָיו קָרָא רַב הַחֹבֵל

לְיוֹם צָרָה וְתוֹכֵחָה.

לְהַשְׁמִיד עָם וּלְאַבֵּד

תֵּת קֹדֶשׁ וְצָבָא מִרְמָס

בְּמַטְאֲטֵא הַשְׁמֵד

אֲשֶׁר אִם־עָבַר וְרָמַס.

יְצוּדֶנּוּ לְמַדְחֵפוֹת

קַלּוּ מִנְּשָׁרִים סוּסָיו

טָסוּ כְּצִפֳּרִים עָפוֹת

מִהֲרוּ חָשׁוּ עָלוּ שׁוֹסָיו.

דָּרֹס דָּרַס וְהִנֵּה שׂרָף

חִלֵּל לָאָרֶץ נִזְרִי

כָּלָּה זַעַם וַחֲרוֹן אַף

מֵאִישׁ חֶרְמִי וְעָרִי.

מַבְלִיגִיתִי עֲלֵי יָגוֹן

הֻפְשַׁט מֵעָלֵי כְּבוֹדִי

לְבָב דַּוָּי וְרֹאשׁ דַּאֲגוֹן

נִשְׁפַּךְ לָאָרֶץ כְּבֵדִי.

מְעוּף צוּקָה וַאֲפֵלָה

בָּהְשַׁמָּה כָּל־עֲדָתִי

שֶׁבֶר עַמִּי עַל־נְקַלָּה

עַרְשִׂי אַמְסֶה בְדִמְעָתִי.

נָתַתִּי גֵוִי לְמַכִּים

הָהְפַּךְ עָלֵי בַּלָּהוֹת

יָשַׁבְתִּי בְמַחֲשַׁכִּים

שֹׁמּוּ שָׁמַיִם עַל־זֹאת.

יְרוּשָׁלַיִם לְעִיִּים

חָצִיר לִבְנוֹת יַעֲנָה

פָּגְשׁוּ צִיִּים אֶת־אִיִּים

קִפּוֹז שָׁמָּה קִנְּנָה.

חֲזֵה צִיּוֹן קִרְיָתֶךָ

וְהִנָּחֵם עַל־הָרָעָה

נָשְׂאוּ רֹאשׁ עַל־עַמֶּךָ

עֲשֵׂה־נָא לָהֶם תּוֹעָה.

עַמִּי לְאוֹיֵב יְקוֹמֵם

לְמָתַי קֵץ הַפְּלָאוֹת

עַל הַר־צִיּוֹן שֶׁשָּׁמֵם

עֲשֵׂה עִמִּי לְטוֹבָה אוֹת.

זְרוֹעַ עֻזְּךָ גַּלֵּה

עַל־יַד חֹטֶר גֶּזַע יִשָׁי

הַתֵּר אָסִיר מִבֵּית כֶּלֶא

בָּעֵת הַהִיא יוּבֵל־שַׁי.

פְּעָמֵינוּ בַנְּעָלִים

שָׁלשׁ פְּעָמִים בַּשָּׁנָה

דֶּרֶךְ יֵלְכוּ גְאוּלִים

וּבָאוּ צִיּוֹן בְּרִנָּה.

קוֹל מְבַשֵׂר תַּשְׁמִיעַ

קוּמִי לָךְ רַעְיָתִי

אֱלֹהֵי צִדְקִי מוֹשִׁיעַ

גְּאַל אֶת־גְּאֻלָּתִי.

קַח מִגִּבּוֹר מַלְקוֹחַ

שְׁבִי יְהוּדָה וְיִשְׂרָאֵל

אֲסִירְךָ פְּקַח־קוֹחַ

וּבָא לְצִיּוֹן גּוֹאֵל.