מִתּוֹךְ הַשִּׁיר “מַחֲזֵה שַׁדַּי”    🔗

– – – –   – – – –   – – –

אֶל־שַׂרְעַפַּי נָתַתִּי צִיץ, וָאֵדֶא

עַל־כַּנְפֵיהֶם חָשׁוֹת מִנֶּשֶׁר קַלּוּ,

דֶּרֶךְ מֶרְחָב הָרֵק שִׂיאִי אַגְבִּיהַּ

וָאֶתְנוֹסֵס עַד־אֶל־רָמוֹתֵי שַׁחַק.

רוּחַ מִבִּינָתִי בֶּטַח יַנְחֵנִי

רוּחַ כִּי מִשַּׁדַּי בָּאִישׁ הָטְבָּעָה

לִבְרַק נָגְהוֹ וּלְאוֹר חִצָּיו לָלָכֶת,

עַמּוּד עָנָן יוֹמָם עַמּוּד אֵשׁ לָיְלָה

בִּנְתִיבוֹת תּוּשִׁיָּה וּשְׁבִילֵי־חָלֶד

וּבְגִבְעָה וּבְבִקְעָה וּבְעִמְקֵי־פַחַת

בַּל־יֵתַע בַּל־יִגֹּף בַּל־יִשְׁתַּקֵּעַ

פֶּן־יַעְפִּיל פֶּן־יַהְרֹס פֶּן־יָהִין דָּעַת

כָּמוּס מֵעֵין בָּשָׂר עָמוּם מִשֵּׂכֶל

לוּ יִכָּוֶה אוֹ עַפְעַפָּיו תֶּחְשַׁכְנָה

מִנִּיצוֹצֵי בָזָק וּשְׁבִיבֵי־נֹגַהּ

כִּי בִגְדוֹלוֹת וּבְנִפְלָאוֹת לָהָטוּ.

וָאֶתְאַבֵּךְ לָתוּר בִּשְׁפָאֵי־גֹבַהּ

מִבַּעַד הָאֶשְׁנָב חֶרֶס מִקֵּדְמָה

כָּל־מַעְבָּדֵי אֵלִים, גִּבּוֹרֵי־כֹחַ

מִצּוּר שַׁדַּי עַל־מִשְׁמַרְתָּם פֻּקָּדוּ.

אִישׁ אִישׁ עַל־מַשָּׂאוֹ שֵׁרֵת בַּקֹּדֶשׁ

וּלְמִשְׁמַרְתּוֹ יָסוּרוּ בַּל־יַחְטִיאוּ

מִדֵּי גֶשֶׁם שִׁפְעָם אַרְצָה יָנִיפוּ

לָתֵת מִחְיָה וּלְהָרִיק טוֹב מִמָּעַל.

שִׁפְעַת אֶרְאֶלָּם אָנֹכִי חָזִיתִי

אַלְפֵי שִׁנְאָן רִכְבֵי אֵל רִבּוֹתָיִם

וּלְהִתְבּוֹנֵן בִּפְעֻלּוֹתָם עָמָדְתִּי.

כִּדְמוּת אִישׁ מִשְׁתָּאֶה נִדְהָם נִפְעָמְתִּי

וָאֶדֹּם וָאַבִּיטָה וָאַשְׂכִּילָה

כָּל־הֶהָמוֹן הָרַב הַזֶּה אָשׁוּרָה

וּבְקַוֵּי זִקִּים בָּם יָדָם אוֹחָזֶת

נִגְלָה אוֹרָם מִמַּחְצִיתָם וּלְמָעְלָה

וַיִּסָּתֵר מִמַּחְצִיתָם וּלְמָטָּה.

יָנִידוּ קַוֵּיהֶם אָנֶה וָאָנֶה

לִגְבוּל מַבָּטָם לַנְחוֹתָם בַּדָּרֶךְ.

רֶגַע יַפְרִידוּם אוֹ יַעַנְדּוּם רֶגַע

עַל־שָׁלשׁ עַל־אַרְבַּע עַל־שֵׁשׁ עַל־שֶׁבַע

אוֹ רֶגַע יַחְבִּירוּם יַחַד כֻּלָּמוֹ

וַיִּהְיוּ בִידֵיהֶם עָבוֹת וָחָבֶל.

אָמְנָם אֶחָד קָדוֹשׁ נִצָּב בַּתָּוֶךְ

הַשּׁוֹכֵן בֵּינוֹתָם כַּשָּׂר בַּחָיִל

יוֹפִיעַ בִּסְבִיבָיו נוֹרָא עָלֵימוֹ

בּוֹ מַעְיָנָם כָּל־מַעְיָנָיו בָּהֵמָּה.

אֵין טֹרַח אֵין עָמָל אֵין לוֹ רַק נֹחַ

עַל־כֵּס נָאוֹר כַּצַּח עַל־אוֹר יַגִּיהַּ

כִּי כוֹכָבִים כַּסַפִּירִים כּוֹנָנוּ

צוֹפֶה בּוֹחֵן סוֹפֵר שׁוֹקֵל בַּפֶּלֶס

פֹּעַל אָדָם עִנְיָנוֹ שִׂיג יָדֵהוּ

תַּחְבֻּלּוֹתָיו עֶשְׁתֹּנוֹתָיו בָּאָרֶץ.

(1808)