ממגלת אלכסנדר
א 🔗
א בְּעֶשְׂרִים וְחָמֵשׁ שָׁנָה לְאַלֶּכְּסַנְדֶּר מֶלֶךְ רוּסִיָּה הוּא אַלֶּכְּסַנְדֶּר בֶּן נִקּוֹלַי הַמֹּלֵךְ מִפְּרוּסְיָה עַד תֹּגַרְמָה וּפָרָס וּמֵאוֹסְטְרִיָּה וְרוֹמִינְיָה עַד כִּתִּים וְיַפָּנְיָה: ב וְיַרְדְּ מִיָּם הַשָּׁחוֹר עַד יָם הַלָּבָן הוּא יַם הַקֶּרַח וּמִלְּשׁוֹן יָם בַּלְטִי עַל כֶּתֶף אֵירֹפָּה עַד הַיָּם הַקַּדְמוֹנִי קַדְמַת אַזְיָה בֹּאֲכָה אֲמֶּרִיקָה: ג כִּתְשַׁע אֶלֶף רִבּוֹא אָדָם סָרִים לְמִשְׁמַעְתּוֹ וְלִשְׁמוֹנִים מִשְׁפְּחוֹת עַמִּים יִפָּרֵדוּ לִלְשֹׁנוֹתָם בְּגוֹיֵיהֶם וּכְאַלְפַּיִם וּמָאתַיִם וְעֶשְׂרִים וְאֶחָד רִבּוֹא פַּרְסָה אֶרֶץ מֶמְשֶׁלֶת יָדוֹ בַּמִּדָּה לְאָרְכָּה וּלְרָחְבָּהּ בְּפַרְסָה רֹחַב: ד מִן הַמַּעֲלָה הַשְּׁלֹשִׁים וּשְׁמֹנֶה וְעֶשְׂרִים חֲלָקֶיהָ עַד שִׁבְעִים וּשְׁמֹנֶה מֵעֲלוֹת וְעֶשְׂרִים וְשִׁשָּׁה חֶלְקֵי הַמַּעֲלָה רֹחַב צָפוֹנָה וּמִשְּׁלֹשִׁים וְחָמֵשׁ מַעֲלוֹת וַעֲשֶׂרֶת חֶלְקֵי הַמַּעֲלָה עַד מָאתַיִם וְשֶׁבַע מַעֲלוֹת וַחֲמִשִּׁים וַחֲמִשָּׁה חֲלָקִים לְאֹרֶךְ כַּדּוּר הָאָרֶץ: ה וְכָמֹהָ לֹא הָיְתָה מַמְלָכָה רַחֲבַת יָדַיִם וְרַבָּתִי עָם לְמִיּוֹם הֵחֵלוּ בְּנֵי אָדָם לֶאֱסֹף גּוֹיִם וּלְקָבְצָה מַמְלָכוֹת עַל פְּנֵי כָל הָאָרֶץ: ו וּבִמְלֹאת עֶשְׂרִים וְחָמֵשׁ שָׁנָה לְשֶׁבֶת הַמֶּלֶךְ אַלֶּכְּסַנְדֶּר עַל כִּסֵּא מַלְכוּתוֹ אֲנִי פַּלְמוֹנִי הַמְחַבֵּר נָתַתִּי אֶת לִבִּי לְסַפֵּר לַדֹּר אֶת הַגְּדֹלוֹת וְהַנְּצוּרוֹת אֲשֶׁר בְעֵינֵינוּ רָאִינוּ נַעֲשִׂים בְּיָמָיו בְּקֶרֶב אַרְצֵנוּ: ז וְכָל מַעֲשֶׂה תָּקְפוֹ וּגְבוּרָתוֹ בְּמִלְחֲמֹתָיו אֲשֶׁר נִלְחַם וִיקַר תִּפְאֶרֶת גְּדוּלָתוֹ בְּעֵינֵי הַמְּלָכִים וְהָעַמִּים הַקְּרוֹבִים וְהָרְחֹקִים: ח וְתַחְבֻּלוֹתָיו וַעֲמָלוֹ בְּכִשְׁרוֹן וָדַעַת לְהַשְׁכִּיל וּלְהֵיטִיב לְכָל הָעַמִּים אֲשֶׁר תַּחַת כְּנָפָיו וְכָל הַחֲסָדִים וְהָאֱמֶת אֲשֶׁר עָשָׂה לְיִשְׂרָאֵל מִכָּל הַמְּלָכִים אֲשֶׁר הָיוּ לְפָנָיו וְלִכְתּוֹב בַּסֵּפֶר: ט לְמַעַן דַּעַת כָּל עַם הַיְּהוּדִים וְדוֹר אַחֲרוֹן עַל עָפָר יָקוּם כִּי הִפְלָה אֲדֹנָי מֶלֶךְ חָסִיד לָהֶם לַהֲרִימָם מֵאַשְׁפּוֹת וּלְהוֹשִׁיבָם עִם שְׁאָר עַמָּיו לִרְצוֹת אֶת מִשְׁבַּתֵּיהֶם כָּל יְמֵי הָהְשַׁמָּם אֲשֶׁר בַּגּוֹיִם לֹא הִתְחַשָּׁבוּ: י כִּי יוֹתֵר שֶׁהָיָה אַלֶּכְּסַנְדֶּר מֹשֵׁל בָּאָדָם צַדִּיק יָרֵא אֶת אֱלֹהָיו מִנְּעֻרָיו וְעוֹבְדֵּהוּ בְּכָל לֵב עוֹד נָשָׂא פָּנִים לְכָל הָעַמִּים ישְׁבֵי בְּצִלּוֹ לָלֶכֶת אִישׁ בְּשֵׁם אֱלֹהָיו אֲשֶׁר הוֹרוּם אֲבֹתָם.
ב 🔗
א וַיְּהִי כְּשֶׁבֶת הַמֶּלֶךְ אַלֶּכְּסַנְדֶּר עַל כִּסֵּא מַלְכוּתוֹ בִּשְׁלֹשָׁה עָשָׂר לְחֹדֶשׁ אֲדָר בִּשְׁנַת חֲמֵשֶׁת אֲלָפִים שֵׁשׁ מֵאוֹת וַחֲמֵשׁ עֶשְׂרֶה שָׁנָה לְמִסְפַּר בְּנֵי יִשְׂרָאֵל: ב וְכָל מַמְלָכוֹת אֵירֹפָּה וְכָל הָעַמִּים מֶמְשֶׁלֶת יָדָם נִלְחָמִים בְּרוּסִיָּה וְצָרִים עַל סֵבַסְתָּפֹּל הָעִיר הַבְּצוּרָה עַל מְבֹאוֹת הַיָּם הַשָּׁחוֹר: ג כִּי שָׁנָה וְתִשְׁעָה חֳדָשִׁים עָשׂוּ מֶלֶךְ צָרְפַת וּמַלְכַּת בְּרִיטַנְיָה וּמֶלֶךְ סַרְדִּינְיָה וְשִׁלְטוֹן תֹּגַרְמָה מִלְחָמָה בִּקְרִים וַיָצֻרוּ עַל סֵבַסְתָּפֹּל עַד רִדְתָּהּ: ד וַּתְּהִי רֵאשִׁית מְלַאכְתּוֹ לְהַשְׁלִים עִם הַמְּלָכִים הַנִּלְחָמִים אִתּוֹ וּלְהַרְגִּיעַ לְיֹשְׁבֵי הָאָרֶץ: ה כִּי יָדַע כִּי לֹא בְעֻזּוֹ יִשְׂמַח מֶלֶךְ חָכָם לֹא בְּמִלְחָמוֹת תֹּהוּ וּבְשֶׁפֶךְ דָּמִים יִרֶב כָּבוֹד בֵּיתוֹ: ו כִּי הַמֶּלֶךְ עֹז לְעַמּוֹ יִתֵּן הַמֶּלֶךְ הַמְבָרֵךְ אֶת עַמּוֹ בַּשָּׁלוֹם: ז וְחֶרֶב כִּי תַעֲבֹר בָּאָרֶץ רוּחַ אֲדֹנָי תַּנִּיחֶנָּה וְנֵר אֱלֹהִים יִכְבֶּה בָּה וְיָמֵשׁ חֹשֶׁךְ לְיָמִים רַבִּים וְּלְעִתִּים רְחֹקוֹת: ח וַיְהִי כִּי הוּנַח לוֹ מֵאוֹיְבָיו מִסָּבִיב וַיִּתֵּן אַלֶּכְּסַנְדֶּר אֶת לִבּוֹ לְחַדֵּשׁ פְּנֵי אַרְצוֹ וּלְהַרְבּוֹת כְּבוֹד שְׁמוֹ בְּתֹקֶף כָּל מַלְכוּתוֹ מִבָּיִת: ט. לָתֵת לְעַמָּיו חֻקִּים טוֹבִים וּמִשְׁפָּטִים צַדִּיקִים וְיִחְיוּ בָהֶם חַיֵּי אֹשֶׁר וְכָבוֹד חַיֵּי בְשָׂרִים וְחַיֵּי רוּחַ: י וְיָשַׁב עַמּוֹ בִּנְוֵה שָׁלוֹם וְעָשָׂה חָיִל בְּכָל חָכְמַת-דָּעַת וְטוּב הָאָרֶץ יֹאכַל בְּשַׁלְוָה וּבְמִשְּמַנֵּי מְדִינָה: יַא וַיִּקַּח מִשָּׁרֵי הַמְּלוּכָה אֲנָשִׁים חֲכָמִים וִידוּעִים מַשְׂכִּילִים בְּכָל חָכְמָה וּמְבִינֵי מַדָּע: יב וַיּוֹשִׁיבֵם בְּמוֹשַׁב זְקֵנִים לְהַמְתִּיק סוֹד יַחְדָּו אִישׁ בַּאֲשֶׁר הֵאִיר אֱלֹהִים אֶת רוּחוֹ: יג לְאַזֵּן וּלְחַקֵּר אֶת כָּל הֲלִיכוֹת הַמַּמְלָכָה לִתְקֹן כָּל מְעֻוָּת לְהָסִיר כָּל מַכְשֵׁלָה וְלְחַזֵּק לְכָל אֲשֶׁר יִמְצְאוּ שָׁם בָּדֶק: יד וּלְחַדֵּשׁ אֶת הַבִּנְיָה וְקִירֹתֶיהָ מִמַּסַּד עַד הַטְּפָחוֹת: טו בִּשְׁנַת חָמֵשׁ לְמָלְכוֹ קָרָא דְּרוֹר בָּאָרֶץ לְהָאִכָּרִים עוֹבְדֵי הָאֲדָמָה עַבְדֵי-עוֹלָם תַּחַת יַד הָאַדִּירִים אֲדֹנֵי הָאֲדָמָה: טז כְּאַלְפַּיִם רִבּוֹא נֶפֶשׁ אָדָם אִישׁ וּבֵיתוֹ גֶּבֶר וְנַחֲלַת שָׂדֵהוּ יָצְאוּ מִתַּחַת יַד קוֹנֵיהֶם וַיִּהְיוּ לִבְנֵי-חוֹרִים עַד הַיּוֹם הַזֶּה: יז וַיְהִי הַדָּבָר לְנֵס עַמִּים כִּי לֹא נַעֲשָׂה כֵן בְּכָל גּוֹי וּבְכָל מַמְלָכָה: יח לְשַׁלַּחַ אֵילֵי הָאָרֶץ אִישׁ אֶת עַבְדּוֹ וְאִישׁ אֶת שִׁפְחָתוֹ מִקְנַת כַּסְפּוֹ חָפְשִׁים בִּנְדָבָה וּבְיִשְׁרַת לֵבָב עִמָּם: יֵט וְאַצִּילֵי בְנֵי רוּסִיָּה עָשׂוּ זֹּאת כְּאִישׁ אֶחָד חֲבֵרִים אֵין נִרְגָּן בְּאַהֲבָתָם אֶת מַלְכָּם וַאֲדֹנֵיהֶם וּבְתִתָּם כָּבוֹד לִדְבַר פִּיו:
מכאן ואילך הפרקים והפסוקים בלתי מסודרים עדיין; ורשום בספק תוכן הפרקים העתידים לבוא בזה: ג) בתי המשפט, ד) בתי הספר, ה) בקורת הספרים ועניני הדפוס, ו) חלוצי הצבא, ז) פרנסת הקהלות בערים ובכפרים, ח) מסלות הברזל והטיליגרפים, ט) האחז היהודים בערי קרב הממלכה, י) הסגר בתי הספר לרבנים, יא) עדת ישראל בעיר המלוכה, בית הכנסת הראשון שמה, יב) קשר בני פולין, יג) המלחמה בתוגרמה. ועוד רשימות רבות שונות בין הפרקים, ואח"כ אבוא לתקופת ימי הקיסר האחרונים לאמר:
א וּבְעוֹד אַלֶּכְּסַנְדֶּר מְפַתֵּחַ וּמְשַׂדֵּד אַדְמָתוֹ וְזוֹרֵעַ בָּהּ זֶרַע הַשָּׁלוֹם: ב וּכְבָר הַנִּצָּנִים נִרְאוּ בָּאָרֶץ מְבַשְׂרֵי פְּרִי צְדָקָה לְגָאוֹן וּלְתִפְאָרֶת וְגֶשֶׁם נְדָבוֹת יָנִיף אֱלֹהִים לְהַשְׁקוֹת עֲרֻגּוֹת מַטָּעָיו: ג יָצְאוּ אֲנָשִׁים בְּנֵי-בְּלִיַּעַל לְהַרְגִּיזוֹ לְהַפְרִיעוֹ מִמַּעֲשֶׂה הַצְּדָקָה שָׁלוֹם וְלַהֲפֹךְ פְּרִי צְדָקָה לְלַעֲנָה: ד הֵמָּה הָאֲנָשִׁים אֲשֶׁר תּוֹרַת עִוְעִים הִטַּתּוּם בְּשֶׁקֶר נִסְכָּהּ וַתַּתְעֵם בְּתֹהוּ יְלֵל יְשִׁימוֹן: ה אָבְדָה הָאֱמוּנָה וְנִכְרְתָה מִלִּבָּם וּצְדָקָה לָאָרֶץ הִנִּיחוּ בְּיָד: ו וַיֹּאמְרוּ לָאֵל אֵינֶנּוּ וַיִּפְרְעוּ חֻקָּיו וְתֹרוֹתָיו וְכָל מוֹסְרוֹת הַמּוּסָר נִתֵּקוּ: ז וַיֹּאמְרוּ לַהֲפֹךְ סִדְרֵי בְּרֵאשִׁית וּלְהַשְׁבִּית חֻקּוֹת שָׁמַיִם וָאָרֶץ: ח לְחַלֵּל כָּל קֹדֶשׁ וְלַעֲרֹץ כָּל נַעֲרָץ וְלִרְמוֹס בְּרֶגֶל זָדוֹן כָּל פִּנַּת יִקְרַת בְּנֵי הָאָדָם: ט לְמַגֵּר כִּסֵּא מַמְלָכוֹת לְנָאֵר בְּרִית מִשְׁפָּחוֹת לְהָפֵר הָאַחֲוָה בֵּין אַחִים וּלְהָשִׁיב לֵב בָּנִים מֵאֲבוֹתֵיהֶם: י לְהַרְבּוֹת עֹשֶׁק וּמְרוּצָה לִגְזוֹל יְגִיעַ כַפַּיִם מִיְדֵי הֶעָמֵל בְּכִשְׁרוֹן וָדָעַת: יַא וַיֹּאמְרוּ שָׁוְא עֲבוֹד אֱלֹהִים וּבֵן יְכַבֵּד אָב וְעֶבֶד אֲדֹנָיו חֲסַר-לֵב אָמְרוּ לוֹ: יב כִּי יִקַּח אִישׁ הוֹן זָר אֵין רָע וְאִשָּׁה כִּי תִּבְגֹּד בָּאִישָׁהּ אֵין רָע כִּיס אֶחָד לַכֹּל וּמִטָּה אַחַת לַכֹּל חֵלֶק כְּחֵלֶק יַחֲלֹקוּ: יג מִשְׁפָּחָה וּבֵית חָבֶר גְּזֵלַת הָרַבִּים הִיא וְכָל אֲשֶׁר לוֹ קִנְיָן גָּנוּב הוּא אִתּוֹ: יָד וְלֹא יִהְיוּ עוֹד בְּנֵי הָאָדָם מִשְׁפָּחוֹת מִשְׁפָּחוֹת לְבָד כִּי אִם בַּעֲדָרִים וּבַחֲשִׂיפִים כְּבֶהֱמַת הָאָרֶץ: טוּ סוּסָה לַסּוּס וְאָתוֹן לַחֲמוֹר וְאִשָּׁה לְכָל בְּנֵי הָאָדָם: טז יְשַׁלְּחוּ כַּצֹּאן עֲוִילֵיהֶם יִרְבּוּ בַּבָּר וְלֹא יֵדְעוּ אֶת אֲבוֹתֵיהֶם הַמּוֹלִידִים אוֹתָם: יז זֹאת תּוֹרַת הַצָּרַעַת בְּאַרְצוֹת אֵירֹפָּה פָּרָחָה וַתִּדְבַּק בְּדַּלַּת הָעָם וּבִבְנֵי הַנְּעוּרִים הַנְּעוּרִים וְהָרֵקִים: יח וּמִשָּׁם פָּשְׁתָה הַצָּרַעַת וַתִּפְרֹץ גַּם בְאַרְצֵנוּ וַתִּגְזֹר עַל יָמִין וְעַל שְׂמֹאל: יֵט וְתִדְבַּק בְּעָרִים רַבּוֹת וְיוֹשְׁבֵיהֶן וַתִּמָּלֵּא הָאָרֶץ מֻטָּה וַתֵּרֶב בַּהֲמוֹן בָּתֵּי אָבוֹת תַּאֲנִיָּה וַאֲנִיָּה: כ כִּי בְּנֵי פָרִיצֵי הָעָם יִנָּשְּׂאוּ לְהַעֲמִיד חֲזוֹן לִבָּם בְּיַד רָמָה וְנִכְשָׁלוּ: כָּא וַיִּקְשְׁרוּ קֶשֶׁר וְהַוַּת בֹּגְדִים אֵיתָן עַל אֲדֹנָי וְעַל הַמֶּלֶךְ מְשִׁיחוֹ: כַּבּ וַיּשְׁלְּחוּ בְּעַוְלָתָה יְדֵיהֶם וַיַּרְבּוּ חֲטָאִים גְּדוֹלִים וַיַעֲשׂוּ כָּל תּוֹעֵבָה: כְּג אֵין נְבָלָה אֲשֶׁר שָׂגְּבָה מֵהֶם לַעֲלוֹת דֶּרֶךְ בָּהּ בַּפְּרִצּוּת לְהַגִּיעַ לִמְחוֹז חֶפְצָם: ……………………..