לוגו
עלילות גלגמש
פרק:
מיקום ביצירה:
0%
X
F
U

 

השמות1    🔗

אֵאַבָּנִי – עיין אֶנְגִּידוּ.

אֵאָה – אלוהי־הים, ידיד האדם.

אֵאַנָּה – “בית־השמים” או “בית אלוהי־השמים” – הוא ההיכל הגָדול באוּרוּךְּ, זבול לאַנוּ ועִשְׁתָּר.

אֵגַלְמָה – “הארמון הנישא” – היכל באוּרוּךְּ, שם היתה אֵם גִּלְגָּמֶשׁ כוֹהנת.

אֲדַד אוֹ רַמָּן – אלוהי־הסער.

אוּבָּרָה־תּוּתוּ – אבי אוּת־נַפִּשְׁתִּים,

אוּרוּךְּ – כעת וַרְקָה על־נהר־פרת, אחת הערים היותר קדומות בעולם, אֶרֶךְ (בראשית י, י).

אוּר־שַׁנַבִּי – עבד האל שַׁנַבִּי.

אוּת־נַפִּשְׁתִּים – בן אוּבָּרָה־תּוּתוּ, הוא שניצל מן המבול – “הוא שמצא את החיים (הנפש)” – או “אֻתָּה־חַיָּי”.

אִיגֶגֶה – אלוהות־הכוכבים.

אִירְגַל – הוּא אִירְקָלָה הוּא נֶרְגַּל.

אִירְנִינִי – עִשְׁתָּר.

אִירְקָלָה – הוא נֶרְגַּל.

אִישׁוּלָנוּ – הַגַּנָן בגנו של אַנוּ.

אֶנְגִּידוּ – “אֶנְגִּי הוא היוצר” – רֵעַ גלגמש.

אַנוּ – אבי האלים, והוא בן אַנְשָׁר (העולם העליון) וקִישָׁר (העולם התחתון). הוא אלוהי־השמש ואלוהי העיר אוּרוּךְּ. הכוכבים הם צבא אַנוּ.

אֱנוּגִי – אלוהי־השאול, “אדון הבּוֹרוֹת והתעלות” וגם “כּרוֹזוֹ של אֶנְלִיל”.

אֲנוּנָקִים – הָאֵלִים של הכוכבים.

אֶנְלִיל או אִילִיל – אלוהי נִיפּוּר, “אלוהי־המדינות”.

אַנְתּוּ – אשת אַנוּ.

אֶקוּר – “בית ההר”, היכל אֶנְלִיל בנִיפּוּר.

אָרוּרוּ – היוצרת בין האלים, והיא יצרה את האדם עפר מן האדמה.

אֶרֶשְׁכִּיגַל – “מושלת הארץ הגדולה”, אשת נֶרְגַּל.

אֶתָּנָה – גיבור, שעלה השמיימה על נשר ונפל לארץ.

בִּיבּוּ – כוכב־לכת, ביחוד מרקוּליס.

בֶּלִית־סֶרִי – גבֶרת השדה, סופרת הארץ (העולם התחתון).

גִּלְגָּמֶשׁ – גיבור האֶפּוֹס.

חֻמְבַּבָּה – שונאו של גלגמש.

לוּגַל – אלוהות ממדרגה שנייה, כרוזם של האֵלים.

מוּיָתִי – אלוהות ממדרגה שנייה.

מָמֶתוּם – האֵלה הממונה על הגורל, אשתו של נֶרְגַּל.

מַשׁוּ – הרים בקצווי תבל.

נִינִיב – בנו של אֶנְליל, אלוהי המלחמה והרפאוּת.

נִינְלִיל – עיין רִישָׁת־נִינְלִיל.

נִינְסוּן – אשת לוּגַלְבַּנְדָּה אלוהי מלכי־אוּרוּךְּ.

נִין־עַצוּ – אלוהי הרפואה.

נִיסִיר – הר.

נִיפּוּר – עתה נוּפָר – לפנים עיר גדולה במלכות בבל.

נַמְתָּר – אלוהי הדֶּבֶר.

נֶרְגַּל – אלוהי־השאול.

סַבִּיתוּ – אלוהות הים, והיא גם סידוּרִי.

סוּמוּקַן או סוּמוּגַן – אלוהי הרים, בן לשַׁמַשׁ.

סִידוּרִי – עיין סַבִּיתוּ.

סִילִילִי – אלוהות לא־נודעה, אֵם חַסִיס.

סִין – אלוהי־הירח.

עִשְׁתָּר – עַשְׁתֹּרֶת.

פּוּזוּר־אָמוּרִי – חובלו של אוּת־נַפִּשְׁתִּים בימי המבול.

רִישָׁת־נִינְלִיל – אֵם גלגמש.

שׁוּרִיפַּק – כעת פֵארָה, מצפון לאוּרוּךְּ.

שַׁמַשׁ – אלוהי־השמש.

תַּמּוּז – דּוּמוּזִי, אהוּבהּ של עִשְׁתָּר.


 

לוּחַ רִאשׁוֹן    🔗

אֲדוֹן הָאָרֶץ, הָרוֹאֶה אֶת־כָּל־הַנַּעֲשֶׂה,

לָמַד לָדַעַת וְהֵבִין כָּל־דָּבָר;

חָדַר חִקְקֵי־אֱנוֹשׁ, אִישׁ וּפָעֳלוֹ,

תַּעֲלוּמוֹת הַחָכְמָה וַהֲמוֹן נִסְתָּרוֹת;

אִזֵּן כָּל־רָז וְחִקֵּר כָּל־נֶעְלָם,

הִגִּיד דְּבָרִים שֶׁמִּלִּפְנֵי הַמַּבּוּל;

דֶּרֶךְ רְחוֹקָה נָדַד, עָמַל וְסָבַל,

בְּלוּחַ־אֶבֶן חָקַק עָנְיוֹ וּמְרוּדָיו,

בְּחֶרֶט־אֱנוֹשׁ בְּחֹמֶר אֶת־כָּל־עֲלִילוֹתָיו.

גִּלְגָּמֶשׁ בָּנָה אֶת חוֹמַת־אוּרוּךְּ הַבְּצוּרָה,

אֶת אֵאַנָּה – “בֵּית־הַשָּׁמַיִם”, הוּא הֵיכַל־הַטָּהֳרָה,

מַסָּד לוֹ עָשָׂה מוּצָק כִּנְחשֶׁת.

וּבְצֵל הַבַּיִת הַנִּשָּׂא, מְעוֹנָה אֱלֹהֵי־הַשָּׁמַיִם,

נִמְתְּחוּ מַמְּגוּרוֹת הַקִּרְיָה הַגְּדוֹלוֹת,

אַסְמֵי אוּרוּךְּ הַבְּנוּיִים כְּמוֹ־רָמִים;

בֵּית־הַמֶּלֶךְ מִתְנוֹסֵס בִּנְגוֹהוֹת־צַחַר,

כָּל הַיּוֹם עוֹמְדִים שׁוֹמְרֵי־הַחוֹמוֹת,

לַיְלָה לֹא יָנוּמוּ אַנְשֵׁי־הַמִּצְפֶּה.


גִּלְגָּמֶשׁ שְׁלִישִׁיתוֹ נוֹלַד אָדָם

וּשְׁתֵּי שְׁלִישִׁיּוֹת בּוֹ אֱלֹהִים,

לְצֶלֶם־קוֹמָתוֹ תָמְהוּ אַנְשֵׁי־הָעִיר,

חַתּוּ מִפָּנָיו, כִּי הִתְבּוֹנָנוּ.

לֹא הָיָה כָמוֹהוּ לְיֹפִי וּגְבוּרָה,

הָיָה מַחֲרִיד אֶת הָאֲרִי מִמְּאוּרָתוֹ,

בִּזְקָנוֹ יַחֲזִיק, יִתְפְּשֶׂנּוּ וִישַׁפְּדֶנּוּ,

בֶּן־אַשְׁפָּתוֹ הַמָּהִיר יָעִיר עַל רְאֵם־פֶּרֶא.

מְשָלוֹ חֹק לְאוּרוּךְּ, אִמְרֵי־פִיו עֵדוּת לָעִיר.

בֵּן יְכַבֵּד רְצוֹן־מַלְכּוֹ מֵחֵפֶץ אָבִיהוּ;

אַךְ גָּדַל הַבֵּן וַיְהִי לְגֶבֶר

וְהָיָה לְעֶבֶד לַגִּבּוֹר־הָרוֹעֶה:

זֶה אִישׁ־מִלְחָמָה, זֶה יוֹדֵעַ צַיִד,

זֶה רוֹעֶה עֲדָרִים וְזֶה עַל הַבִּנְיָה,

זֶה סוֹפֵר וְזֶה נַעַר בְּהֵיכַל־הַקֹּדֶשׁ.


גִּלְגָּמֶשׁ לֹא יִיעַף וְלֹא יִיגַע,

הָאַבִּיר, הָעִזּוּז, וְיוֹדֵעַ כָּל־חָכְמָה.

עוֹבְדִים בִּשְבִילוֹ נַעַר וְזָקֵן,

יוֹמָם וָלַיְלָה לֹא יִשְׁבֹּת מִן הַמְּלָאכָה,

וְהוּא עוֹצֵר בַּבֵּן וְלֹא יֵלֵךְ אֶל אָבִיו,

גִּלְגָּמֶשׁ רוֹעֶה אוּרוּךְּ הַבְּצוּרָה,

הוּא רוֹעֶה לְעַמּוֹ וּמָגֵן לָאֻמָּה

וְיִנָּשֵׂא גְאוֹן־אוּרוּךְּ עַל כָּל עָרֵי־הַמְּדִינוֹת.


גִּלְגָּמֶשׁ לֹא יִתֵּן לְפִילֶגֶשׁ לָלֶכֶת אֶל מְאַהֲבָהּ,

יַעְצֹר לְבַת־אַדִּיר לָלֶכֶת אֶל הַגִּבּוֹר.

וַתַּעַל שַׁוְעָתָם אֶל הָאֱלֹהִים הַגְּדוֹלִים,

אֶל אֱלֹהֵי־הַשָּׁמַיִם, אֲדוֹנֵי אוּרוּךְּ עִיר־הַקֹּדֶשׁ:


"אַתֶּם יְצַרְתֶּם אֶת הָרְאֵם הָאַדִּיר,

בְּרָאתֶם אֶת הָאֲרִי, אֲשֶׁר זָקָן לוֹ –

גִּלְגָּמֶשׁ עָצַם מֵהֶם, אֵין־מִי יִדְמֶה לוֹ.

יוֹמָם וָלַיְלָה לֹא יִשְׁבֹּת מִן הַמְּלָאכָה.


"וְהוּא עוֹצֵר לַבֵּן וְלֹא יֵלֵךְ אֶל אָבִיו,

גִּלְגָּמֶשׁ רוֹעֶה אוּרוּךְּ, אֲשֶׁר חוֹמָה סָבִיב לָהּ;

הוּא רוֹעֶה לְעַמּוֹ וּמָגֵן לָאֻמָּה,

גִּלְגָּמֶשׁ לֹא יִתֵּן לְפִילֶגֶשׁ לָלֶכֶת אֶל מְאַהֲבָהּ,

יַעְצֹר לְבַת־אַדִּיר לָלֶכֶת אֶל הַגִּבּוֹר."


שָׁמַע אֱלֹהֵי־הַשָּׁמַיִם אֶת קוֹל־תַּחֲנוּנֵיהֶם,

קָרָא לְאָרוּרוּ, הַיּוֹצֶרֶת הַגְּדוֹלָה:


"אַתְּ אָרוּרוּ, בָּרָאת אֶת גִּלְגָּמֶשׁ,

צוּרִי כַיּוֹם בְּצַלְמוֹ דְמוּת־תַּבְנִיתוֹ

יְצִיר אֲשֶׁר כֹּחוֹ כְּכֹחוֹ שֶׁל גִּלְגָּמֶשׁ.


"בְּעִתּוֹ יָבֹא הָאַדִּיר אוּרוּכָּה

וְשָׂרָה עִם גִּלְגָּמֶשׁ וְשָׁקְטָה אוּרוּךְּ."


וַיְהִי כִּשְׁמֹעַ אָרוּרוּ אֶת דְּבָרָיו,

יָצְרָה בְלִבָּהּ בְּצֶלֶם אַנוּ וּדְמוּתוֹ.

אָרוּרוּ רָחֲצָה יָדֶיהָ וַתִּקְרֹץ מִן הָאֲדָמָה,

הִרְטִיבָה אוֹתוֹ בְרִיר הָאֱלֹהִים,

יָצְרָה אֶת אֶנְגִּידוּ, גִּבּוֹר בָּרָאָה,

נֵצֶר נִינִיב, אֱלֹהֵי־הַמִּלְחָמָה.


וַיְהִי לְבָדָד וַיֵּשֶׁב בָּעֲרָבָה.

שֵׂעָר מְכַסֶּה לְכָל־בְּשָׂרוֹ לָרֹב,

קְוֻצּוֹת־רֹאשׁוֹ יוֹרְדוֹת כִּקְוֻצּוֹת אִשָּׁה,

מַחְלְפוֹתָיו נִטְּשׁוּ כַּחִטָּה בַקָּמָה,

דָּבָר אֵין לוֹ עִם אֶרֶץ וְאָדָם,

עוֹטֶה עוֹרוֹת כָּאֵל סוּמוּקַן,

כֵּאלֹהֵי הַשָּׂדֶה, אֵל־הָעֲדָרִים;

עִם אַיָּלוֹת יֹאכַל מֵעֵשֶׂב הַשָּׂדֶה,

עִם הַבְּהֵמָה יִשְׁתֶּה מַיִם מִמַּשְׁאַבֶּיהָ,

עִם רֶמֶשׂ־הַמַּיִם יְשַׂחֵק כְּטוֹב־לִבּוֹ בַפֶּלֶג.


פָּרַשׂ הַצַּיָּד מִכְמַרְתּוֹ עַל הַמַּשְׁאָב,

עָלָה כְנֶגְדּוֹ אֶנְגִּידוּ, כִּי בָא לַשְׁקוֹת אֶת בְּעִירוֹ.

עָמַד אֶנְגִּידוּ יוֹם וְעָמַד יוֹם שֵׁנִי,

עָמַד יוֹם שְׁלִישִׁי, גָּדַר דַּרְכּוֹ אֶל הַשֹּׁקֶת.

רָאָהוּ הַצַּיָּד וַיָּפוּגוּ פָנָיו,

רוֹעֵה־הָעֵדֶר – וַיֵּשְׂטְ עִם בְּעִירוֹ בָיְתָה.

עָלָה עָשָׁן בְּאַפּוֹ, רוּחוֹ נֶעְכָּרָה,

לִבּוֹ פָחַד וּפָנָיו קָדָרוּ,

כִּי גָדַל הַכְּאֵב, נָהַם לִבּוֹ.

כִּי מַרְאֵה שַׁחַץ־הֶהָרִים מַרְאֵה הַלָּז.


פָּתַח הַצַּיָּד פִּיהוּ וַיֹּאמֶר לְאָבִיו:

"אָבִי, אִישׁ בָּא, מִן הֶהָרִים אָתָא;

גֶּבֶר, אֲיֻמָּה גְבוּרָתוֹ בָאָרֶץ;

כְּאַחַד צְבָא־אַנוּ כֹּחוֹ בְמָתְנָיו.

עַל הֶהָרִים יְשׁוֹטֵט, יִדֹּד כָּל־הַיָּמִים,

עִם הַחַיָּה יַחְדָּו יִתְהַלֵּךְ בָּעֲרָבָה,

בְּכָל־עֵת רַגְלָיו עוֹמְדוֹת עַל הַשּׁקֶת.

יָרֵאתִי מְאֹד מִגֶּשֶׁת אֵלָיו,

הִנֵּה סָתַם אֶת הַבּוֹרוֹת אֲשֶר כָּרִיתִי,

מוֹקְשִׁים אֲשֶׁר טָמְנוּ יָדַי בָּלָק,

הֵנִיס מִיָּדַי כָּל חַיַּת־הַשָּׂדֶה הָרוֹמֶשֶׂת."


פָּתַח אָבִיהוּ אֶת פִּיו וַיַּעַן לַצַּיָּד:

לֶךְ־לְךָ עִירָה אוּרוּךְּ, בֹּא אֶל גִּלְגָּמֶשׁ,

הַגֶּד־לוֹ מֶה עָצַם זֶה פֶרֶא־הָאָדָם.

יִתֶּן־לְךָ אִשָּׁה יְפַת־תֹּאַר קְדֵשָׁה,

אֲשֶׁר נִזְּרָה לְעִשְׁתָּר אֵלַת־הָאַהֲבָה,

וְלָקַחְתָּ אוֹתָהּ וְנָהַגְתָּ אוֹתָהּ.

וְהָיָה כְּצֵאת הַמִּקְנֶה אֶל הַשֹּׁקֶת –

תַּשְׁלִיךְ מֵעָלֶיהָ אֶת שִׂמְלוֹתֶיהָ

וְיִקַּח הָאִישׁ וְיֵהָנֶה מִיָּפְיָהּ.

וְהָיָה כִּי־יֶחֱזֶה בָהּ וְיִקְרַב אֵלֶיהָ,

וְתֵקַע נַפְשׁוֹ מִן הַבְּהֵמָה,

אֲשֶׁר גָּדַל אִתָּה עַל־פְּנֵי הַשָּדֶה."


וַיִּשְׁמַע הָאִישׁ לַעֲצַת אָבִיהוּ,

וַיַּעַשׂ הַצַּיָּד כַּאֲשֶׁר אָמָר.

נָשָׂא אֶת רַגְלָיו וַיֵּלֶךְ אוּרוּכָּה,

וַיָּבֹא בְשַׁעַר־הָעִיר וַיִּכָּנֵס בְּשַעַר־הַמֶּלֶךְ.

נָפַל לִפְנֵי הַמֶּלֶךְ אַּפַּיִם אָרְצָה,

הֵרִים אֶת יָדוֹ וַיֹּאמֶר לְגִלְגָּמֶש:


"הִנֵּה, אִישׁ בָּא, מִן הֶהָרִים אָתָא,

גֶּבֶר, אֲיֻמָּה גְבוּרָתוֹ בָאָרֶץ,

כְּאַחַד צְבָא־אַנוּ כֹּחוֹ בְמָתְנָיו.

עַל הֶהָרִים יְשׁוֹטֵט, יִדֹּד כָּל־הַיָּמִים,

עִם הַחַיָּה יַחְדָּו יְשׁוֹטֵט בָּעֲרָבָה,

בְּכָל־עֵת רַגְלָיו עוֹמְדוֹת עַל הַשֹּׁקֶת.

יָרֵאתִי מְאֹד מִגֶּשֶׁת אֵלָיו.

הִנֵּה סָתַם אֶת הַבּוֹרוֹת, אֲשֶר כָּרִיתִי,

מוֹקְשִׁים אֲשֶׁר טָמְנוּ יָדַי, בָּלָק,

הֵנִיס מִיָּדַי כָּל חַיַּת־הַשָּׂדֶה הָרוֹמָשֶׂת."


עָנָה לוֹ גִּלְגָּמֶשׁ וַיֹּאמֶר לַצַּיָּד:

"לֶךְ־לְךָ, יוֹדֵעַ־צַיִד, קַח־לְךָ נַעֲרָה

קְדֵשָׁה מֵהֵיכַל־קָדְשָׁהּ אֲשֶׁר לְעִשְׁתָּר.

וְהָיָה כְּבֹאוֹ עִם בְּעִירוֹ אֶת הַשֹּׁקֶת –

תַּשְׁלִיךְ מֵעָלֶיהָ את שִׂמְלוֹתֶיהָ,

לְמַעַן יֵהָנֶה הָאִישׁ מִיָּפְיָהּ.

וְהָיָה כִּי־יַחַז־בָּה וְקָרַב אֵלֶיהָ,

וְתֵקַע נַפְשׁוֹ מִן הַבְּהֵמָה,

אֲשֶׁר גָּדַל אִתָּהּ עַל־פְּנֵי הַשָּׂדֶה."


שָׁמַע הַצַּיָּד אֶת דְּבָרָיו וַיֵּלֶךְ.

וַיִּקַּח אִשָּׁה יְפַת־תֹּאַר קְדֵשָׁה,

וַיֵּלְכוּ מִשָּם וַיַּיְשִׁירוּ נִכְחָם.


וַיְהִי בַּיּוֹם הַשְּׁלִישִׁי וַיַּגִּיעוּ

וַיַּעַמְדוּ בַשָּׂדֶה הַהוּא אֲשֶׁר נוֹעָד,

הַצַּיָּד וְהָאִשָּׁה, וַיֵּשְׁבוּ עַל הַשֹּׁקֶת.

וַיַּעֲשׂוּ בַמָּקוֹם הַהוּא יוֹם אֶחָד וְיוֹם שֵׁנִי.

וְהִנֵּה הַבְּהֵמָה בָאָה וַתֵּשְׁתְּ עַל הַשֹּׁקֶת,

וְרֶמֶשׂ־הַמַּיִם יְשַׂחֵק כְּטוֹב־לִבּוֹ בַנָּהָר.

וְגַם אֶנְגִּידוּ, נִין אֱלֹהֵי־הַשָּׁמַיִם הָאַדִּיר.

עִם אַיְלוֹת־הַשָּׂדֶה יֹאכַל עֵשֶׂב,

עִם הַבְּהֵמָה יִסְבָּא מַיִם בַּמַּשְׁאָב,

בְּשָׂשׂוֹן יְשַׂחֵק עִם רֶמֶשׂ־הַנָּהָר.


וַתִּרְאֵהוּ הַקְּדֵשָׁה, אֶת הָאִישׁ שַׂגִּיא־הַכֹּח,

אוֹתוֹ פֶרֶא־אָדָם, אִישׁ הַרְרֵי־הָאֵל,

וְהִנֵּה הוּא צוֹעֶה בְקֶרֶב הַשָּדֶה,

מִתְבּוֹנֵן אֶל סְבִיבָיו, הוֹלֵךְ וְקָרֵב.


"הִנֵּה הִנּוֹ, הַנַּעֲרָה! חִשְׂפִי חֹצֶן,

גַּלִּי עֶרְוָתֵךְ וְיֵהָנֶה מִיָּפְיֵךְ.

אַל תִּתְמַהְמְהִי וּדְעִי אֶת תַּאֲוָתוֹ.

וְהָיָה כִּי־יִרְאֵךְ וְקָרַב אֵלָיִךְ,

פִּתְחִי לָרְוָחָה שִׂמְלוֹתַיִךְ וְכָרַע עָלָיִךְ.

עוֹרְרִי אֶת חִשְׁקוֹ בִמְצוּדוֹת הָאִשָּׁה

וְתֵקַע נַפְשׁוֹ מִן הַבְּעִיר, שֶׁגָּדַל עַל שָׂדֵהוּ,

יִגְּעוּ שָׁדָיו בְּשָׁדַיִךְ שֶׁלָּךְ."


חָשְׂפָה הַנַּעֲרָה חָצְנָהּ וַתְּגַל עֶרְוָתָהּ

וְיֵהָנֶה מִיָּפְיָהּ.

לֹא הִתְמַהְמְהָה וַתִּקַּח תְּשׁוּקָתוֹ,

פָּתְחָה לָרְוָחָה שִׂמְלוֹתֶיהָ, וַיִּכְרַע עָלֶיהָ.

עוֹרְרָה אֶת תַּאֲוָתוֹ בִמְצוּדוֹת אִשָּׁה,

שָׁדָיו נָגְעוּ בְשָׁדֶיהָ שֶׁלָּהּ.


שִׁשָּׁה יָמִים וְשִׁבְעָה לֵילוֹת יְדָעָהּ אֶנְגִּידוּ

וַיִּרְוֶה דּוֹדִים עִם הַנַּעֲרָה הַקְּדֵשָׁה.


וַיְהִי כַּאֲשֶׁר שָׂבַע אֶנְגִּידוּ אֶת חֲמוּדוֹתֶיהָ

וַיָּשֶׂם אֶת פָּנָיו וַיַּשְׁקֵף עַל־פְּנֵי הָעֲרָבָה,

הִתְבּוֹנֵן לִרְאוֹת אֶת הַחַיָּה.


רָאוּהוּ הַחַיּוֹת וַיָּנוּסוּ מִפָּנָיו,

חַיַּת־הַשָּׂדֶה חַתָּה, נִרְתְּעָה לְאָחוֹר.


וַיִּתְמַהּ אֶנְגִּידוּ, עָמַד עַל־עָמְדוֹ כְּנֶעֱקָד,

וַיָּפוּגוּ בִרְכָּיו, כִּי נָס מִקְנֵהוּ,

תַּשׁ כֹּחַ אֶנְגִּידוּ וַיְחַסֵּר סַעֲרוֹ.

עָמַד וְהֶאֱזִין, הִטָּה אָזְנוֹ,

פָּנָה וַיֵּשֶׁב לְיַד הַקְּדֵשָׁה, לְמַרְגְּלוֹתֶיהָ,

הִבִּיט בְּפָנֶיהָ, הִקְשִׁיב לִדְבָרֶיהָ.


עָנְתָה הַקְּדֵשָׁה וַתֹּאמֶר לְאֶנְגִּידוּ:

"גָּבַרְתָּ מְאֹד, אֶנְגִּידוּ, דָּמִיתָ לֵאלֹהַּ!

לָמָּה תִרְעֶה חַיַּת־הַשָּׂדֶה בָעֲרָבָה?

לְכָה אִתִּי, עִירָה אוּרוּךְּ אֲבִיאֶךָ,

אֶל הָעִיר אֲשֶׁר סָבִיב חוֹמוֹת לָהּ,

בֹּא אֶל הֵיכַל־הַקֹּדֶשׁ, מְעוֹנָה אַנוּ וְעִשְׁתָּר,

בֹּא אֶל בֵּית־הַחֶמְדָּה, מְעוֹנָה אַנוּ וְעִשְׁתָּר,

אֲשֶׁר שָׁם גִּלְגָּמֶשׁ אִישׁ גִּבּוֹר־הַחַיִל,

כֹּחַ רְאֵם־פֶּרֶא כֹּחוֹ, בּוֹ יֵרְדְּ בָּעָם."


וַתְּדַבֵּר אֵלָיו, וַיִּשְׂמַח עַל דְּבָרֶיהָ.

וַיִּשְׁמַע לְקוֹל לִבּוֹ וַיְבַקֵּשׁ יָדִיד לוֹ.


וַיַּעַן לָהּ אֶנְגִּידוּ וַיֹּאמֶר לַקְּדֵשָׁה:

"הָבָה, הַנַּעֲרָה, קוּמִי הֲבִיאִינִי

אֶל בֵּית־הַקֹּדֶשׁ, אֶל הֵיכַל־הַטָּהֳרָה,

אֶל מְעוֹן־קָדְשָׁם שֶׁל אַנוּ וְעִשְׁתָּר,

אֲשֶר שָׁם גִּלְגָּמֶשׁ אִישׁ גִּבּוֹר־הַחַיִל,

שֶׁכֹּחַ־רְאֵם כֹּחוֹ, בּוֹ יַעְצֹר בָּעָם.

אֲנִי אֲנִי אֶתְבָּעֶנּוּ, אֶקְרָא לְגִלְגָּמֶשׁ,

לִשְׂרוֹת עִמִּי אֶקְרָאֶנּוּ, אָרִיעַ בְּקֶרֶב אוּרוּךְּ:

אָכֵן גָּבָרְתִּי!

אֲנִי אֲנִי אָבוֹאָה, אֲשַׁנֶּה גוֹרָלִי,

אֲנִי יְלִיד־עֲרָבוֹת אַדִּיר בִּגְבוּרָתִי,

הוֹ גִלְגָּמֶשׁ, נִכְסַפְתִּי לִרְאוֹת אֶת פָּנֶיךָ!

יָדַעְתִּי גַם־יָדַעְתִּי אֵיךְ יִפֹּל דָּבָר."


וַיֵּלְכוּ אֶנְגִּידוּ וְהָאִשָּׁה אוּרוּכָּה,

הָעִיר אֲשֶׁר חוֹמוֹת לָהּ, וַיָּבֹאוּ בַשָּׁעַר.


מַרְבַדֵּי־צִבְעוֹנִים שְׁטוּחִים בַּחוּצוֹת,

הֲמוֹנִים לְבוּשִׁים לְבָנִים וּצְנִיפִים יִתְהַלָּכוּ,

יוֹמָם וָלַיְלָה לֹא שָׁבַת הַמִּשְׁתֶּה,

כִּנוֹר עִם חָלִיל בַּמֶּרְחָק יֶהֱמָיוּ;

נְעָרוֹת יְפוֹת־תֹּאַר תֵּצֶאנֶה בִמְחוֹלוֹת,

כָּל אֶבְרֵיהֶן מְלֵאִים עֹצֶר חַיִּים וְשָׂשׂוֹן,

בִּרְנָנִים תְּעִירֶינָה גִבּוֹרִים מֵחַדְרָם.


הָלְכָה הַקְּדֵשָׁה לְפָנָיו,

רַגְלֶיהָ תִּישַׁרְנָה אֶל הֵיכַל עִשְׁתָּר,

מִלִּשְׁכַּת־הַקֹּדֶשׁ לָקְחָה שִׂמְלוֹת־חָג,

עָטְתָה אֶת אֶנְגִּידוּ בִגְדֵי־תִפְאֶרֶת,

הִגִּישָׁה לְפָנָיו מִן הַלֶחֶם וְהַיָּיִן,

אֲשֶׁר יַעֲלוּ עַל מִזְבַּח הָאֵלָה.


וַתִּגַּשׁ כֹּהֶנֶת קְדֵשָׁה וַתֹּאמַר:


"אֶנְגִּידוּ, וְיִתְּנוּ לְךָ הָאֵלִים הַגְּדוֹלִים

חַיִּים אֲרֻכִּים!

אֶת גִּלְגָּמֶשׁ, אֶת יְדִיד־הַיְגוֹנִים, אַרְאֶךָּ,

שָׂא עֵינֶיךָ וְרָאִיתָ אֶת פָּנָיו.

יָפֶה הוּא בְאוֹן־גֶּבֶר, כֹּחַ לוֹ בְמָתְנָיו,

שְׁרִירֵי־נְחשֶׁת שְׁרִירָיו לְגֹבַהּ קוֹמָתוֹ,

עֹצֶר גְּבוּרָה הוּצַק בִּבְשָׂרוֹ,

כֹּחוֹ עוֹלֶה עַל כֹּחֲךָ אָתָּה.

לֹא יִיעַף בַּיּוֹם אַף לֹא יִיגַע בַּלָּיְלָה,

מְהַלֵּךְ אֵימִים כַּאֲדַד אֱלֹהֵי־הַחֲזִיזִים.


"שַׁמַשׁ, אֱלֹהֵי הַשֶּׁמֶשׁ, אוֹהֵב אֶת גִּלְגָּמֶשׁ.

אַנוּ, אֶנְלִיל וְאֵאָה מִלְאוּ אֶת לִבּוֹ חָכְמָה.

עַד שֶבָּאתָ מֵאֵצֶל הֶהָרִים,

בְּטֶרֶם תֶּאֱתֶה מִן הָעֲרָבָה,

הָיָה רוֹאֶה אוֹתְךָ גִּלְגָּמֶשׁ.

בַּחֲלוֹם חֶזְיוֹן־לַיְלָה בָּעִיר בְּאוּרוּךְּ

נֵעוֹר מִשְּנָתוֹ וַיְסַפֵּר אֶת הַחֲלוֹמוֹת

וַיֹּאמֶר לְאִמּוֹ:

"אִמִּי, חֲלוֹם חָלַמְתִּי הַלָּיְלָה:

וְהִנֵּה הַכּוֹכָבִים עוֹמְדִים בַּשָּׁמָיִם,

וַיִּפְּלוּ עָלַי הַכּוֹכָבִים כִּצְבָא אֱלֹהֵי־הַשָּׁמָיִם.

אָמַרְתִּי אֲנִיפֶנּוּ – וַיִּכְבַּד מִמֶּנִּי,

דִּמִּיתִי לְנַעֲרוֹ – וְלֹא יָכֹלְתִּי לוֹ.

גּוֹיֵי אוּרוּךְּ שִׁית שָׁתוּ עָלָיו,

לוֹ עַמִּים הִשְׁתַּחֲווּ, נָשְׁקוּ אֶת רַגְלָיו.

וַאֲחַבְּקֵהוּ כְּחַבֵּק אֶת הָאִשָּׁה,

הֲפַכְתִּיו עַד שֶׁעָלִיתִי עָלָיו,

הִשְׁלַכְתִּיו לְמַרְגְּלוֹתָיךְ.

וְאַתְּ אִמַּצְתְּ אוֹתוֹ לְבֵן, הִצַּבְתִּיו עַל־יָדִי."


רִישָׁת־נִינְלִיל הַמְּלֵאָה אֶת הַחָכְמָה וְאֶת הַדַּעַת

אָמְרָה לַאדוֹנָהּ,

רִישָׁת־נִינְלִיל הַמְּלֵאָה אֶת הַחָכְמָה וְאֶת הַדַּעַת

אָמְרָה לְגִּלְגָּמֶשׁ:

"גִּלְגָּמֶשׁ, אֲשֶׁר עָמְדוּ כוֹכָבִים בַּשָּׁמָיִם,

אֲשֶׁר אָמַרְתָּ לְהֲרִימוֹ – וַיִּכְבַּד מִמֶּךָּ,

אֲשֶׁר דִּמִּיתָ לְנַעֲרוֹ – וְלֹא יָכֹלְתָּ לוֹ,

וַתְּחַבְּקֶנּוּ כְּחַבֵּק אֶת הָאִשָּׁה

וַתַּשְׁלִיכֵהוּ לְמַרְגְּלוֹתַי וְהִצַּבְתִּיהוּ עַל־יָדֶךָ –

הִנֵּה הַחֲלוֹם וְזֶה פִתְרוֹנוֹ.


בֹּא יָבֹא אִיש חָזָק, אַדִּיר יֶאֱתֶה,

וְכֹחַ לוֹ וְאוֹן לוֹ כְּכֹחַ צְבָא־אַנוּ וְאוֹנוֹ,

וְהוּא יִקְרָא לְךָ לִשְׂרוֹת עִמּוֹ,

יִתְבָּעֲךָ לְהֵאָבֵק אִתּוֹ.

יָדְךָ תָּעֹז עָלָיו וְיִשְׁכַּב לְמַרְגְּלוֹתָי,

וְאִמַּצְתִּיהוּ כְבֵן לִי, וְהָיָה לְךָ לְאָח,

יְהִי מֵרֵעֲךָ בַּמִּלְחָמָה וְגֶבֶר־עֲמִיתֶךָ.

אֶנְגִּידוּ, זֶה הַחֲלוֹם וְכָכָה פָתְרָה הַגְּבִירָה."


אֵלֶּה דִבְרֵי הַקְּדֵשָׁה הַנְּבִיאָה.

וַיֵּצֵא אֶנְגִּידוּ אֶת בֵּית־עִשְׁתָּר הַנִּשָּׂא.


 

לוּחַ שֵׁנִי    🔗

פָּסַח אֶנְגִּידוּ עַל מִפְתַּן הַהֵיכָל

וַיֵּצֵא אֶל הָרְחוֹב. וְכָל הָעָם מִשְׁתָּאֶה

לְמַרְאֵה אִישׁ־הָעֲרָבָה.

וְהוּא גָבֹהַּ מִכָּל הָאָדָם אֲשֶׁר בָּעִיר,

קְוֻצּוֹת־רֹאשׁוֹ אֲרֻכּוֹת וּזְקָנוֹ מְגֻדָּל:

“גִּבּוֹר־חַיִל בָּא הָעִירָה מֵהַרְרֵי־אַנוּ!”


גָּדַר דֶּרֶךְ בֵּית־הַמִּקְדָשׁ לַגִּבּוֹרִים בָּעִיר;

יָצְאוּ לִקְרָאתוֹ הָאֲנָשִׁים, כֻּלָּם נִקְבְּצוּ וּבָאוּ.

מִפְּנֵי עֵינָיו הַמְזָרוֹת אֵימָה חַתּוּ, נָסוֹגוּ.

אֶל מַחֲזֵה־הַפְּלָאִים תָּמָהוּ,

לְרַגְלָיו נָפָלוּ, נָמוֹגוּ כַיָּלֶד.


יָצוּעַ לוֹ לְגִלְגָּמֶשׁ בְּהֵיכַל־הָאֱלֹהִים,

רְפִידָתוֹ מַרְבַדִּים כַּמִּשְׁכָּב לָאֵלִים,

עָלָיו יִרְוֶה הַמֶּלֶךְ דּוֹדִים

עִם עִשְׁתָּר הָאֲיֻמָּה בָאֵלוֹת.


יָצָא גִלְגָּמֶשׁ אֶת הֵיכַל־אַפַּדְנוֹ שֶׁלוֹ,

הִנֵּה הוֹלֵךְ הַמֶּלֶךְ וְקָרֵב.

אֶנְגִּידוּ בְשַׁעַר הַהֵיכָל הַנִּשָּׂא

גָּדַר בְּעַד גִּלְגָּמֶשׁ וְלֹא יָבֹא בוֹ.


כִּשְׁנַיִם נֶאֱבָקִים הֶחֱזִיקוּ זֶה בָזֶה

בְּשַׁעַר בֵּית־הַמִּקְדָּשׁ,

בִּרְחוֹבוֹת הָעִיר נֶאֱבָקוּ.

הֵצִיק אֶנְגִּידוּ לְרוֹעֵה־הָאָרֶץ.

אָז תְּפָשׂוֹ הַלָּז כִּתְפֹשׂ אֶת הָאִשָּׁה,

הִתְגַּבֵּר עָלָיו וַיָּעַל.

הֱנִיפָהוּ וְהִשְׁלִיכָהוּ לְמַרְגְּלוֹת אִמּוֹ.

יִשֹּׁם הָעָם, לַמֶּלֶךְ יִתַּמֶּה.


צָעַק אֶנְגִּידוּ, נוֹאֲשָׁה עֶבְרָתוֹ.

שַׂעַר רֹאשׁוֹ הָאַדִּיר פָּרַע;

בָּא מִן הָעֲרָבָה, מוֹרָה לֹא עָלָה עַל רֹאשׁוֹ.

הִזְדַּקֵּף אֶנְגִּידוּ, הִתְבּוֹנֵן בְּאִישׁ־רִיבוֹ,

פָּנָיו זוֹעֲפִים וְקוֹדְרִים,

צָנְחוּ יָדָיו עַל בִּרְכָּיו הַיְגֵעוֹת,

עֵינָיו נִמְלְאוּ דֶמַע.


תָּפְשָׂה רִישָׁת הַגְּבִירָה, הֶחֱזִיקָה בְיָדָיו:

"אַתָּה בְּנִי, אֲנִי הַיּוֹם יְלִדְתִּיךָ,

אֲנִי אִמְּךָ וְהִנֵּה זֶה אָחִיךָ."


וַיִּפְתַּח אֶנְגִּידוּ אֶת פִּיו וַיַּעַן אֶת רִישָׁת:

"אִמִּי, בַּקְרָב אָח לִי מָצָאתִי;

עָנָה גִּלְגָּמֶשׁ – וַיֹּאמֶר לוֹ:

רֵעִי אַתָּה וְנִלְחַמְתָּ עַל־יָדִי."


שׁוֹמֵר הִפְקִיד אֶנְלִיל לִשְׁמֹר אֶת הָאֲרָזִים.

אֲשֶׁר בְּיַעַר הָאֵלִים בְּאַפְסֵי מֶרְחַקִּים.

נָשָׂא אֶת חֻמְבַּבָּה לַחֲתַת לִבְנֵי־אָדָם.


הָיָה קוֹל חֻמְבַּבָּה כְקוֹל יְלֵל־סָעַר,

רוּחַ־אַפּוֹ מְחוֹלֵל עֲצֵי־יָעַר,

נַחֲרוֹת אַפָּיו – אֵימָה.

כָּל הָעוֹלֶה בְהַרְרֵי הָאֲרָזִים

יִלְבַּשׁ חֲרָדוֹת מִפְּנֵי שׁוֹמֵר הַיָּעַר.

לְשׁוֹמֵר הָאֲרָזִים שָׂמָהוּ אֶנְלִיל,

לִהְיוֹת חֲתַת לִבְנֵי־אֱנוֹש הִפְקִידוֹ.

כָּל הַקָּרֵב אֶל חֹרְשַׁת־הַקֹּדֶשׁ

תִּפֹּל עָלָיו אֵימָתָה וָפַחַד.


וַיְדַבֵּר גִּלְגָּמֶשׁ וַיֹּאמֶר לְאֶנְגִּידוּ:

"חֻמְבַּבָּה הַשּׁוֹמֵר אֶת יַעַר־הָאֲרָזִים

חָטָא לִפְנֵי שַׁמַשׁ, שׁוֹפֵט הָרוּחוֹת וְהָאָדָם.

וַיַּעֲבֹר חֹק וַיֵּצֵא אֶת הַיַּעַר

וַיְהַלֵּךְ אֵימִים עַל בְּנֵי־הָאָדָם.

כַּהֲמוֹת סַעַר יְחוֹלֵל אִילָנוֹת,

הוֹרֵג אֶת כָּל הַקָּרֵב אֶל הַיָּעַר,

גַּם אֶת הָאַדִּיר יְמַגֵּר לָאָרֶץ.

תַּאֲוַת־לִבִּי לִמְצֹא אוֹתוֹ בֶן־שַׁחַץ וּלְעַנּוֹתוֹ.

אַל, רֵעִי, נוֹסִיפָה לְהַרְגִּיעַ בְּאוּרוּךְּ,

לְהוֹלִיד בָּנִים בְּהֵיכַל עִשְׁתָּר,

נֵצֵא לִקְרַאת פְּלָאִים וַעֲלִילוֹת־גִּבּוֹרִים;

אִתְּךָ אֲנִי יוֹצֵא אֶל הָעֲרָבָה."


וַיַּעַן אֶנְגִּידוּ אֶת רֵעוֹ גִּלְגָּמֶשׁ:

"אָיֹם חֻמְבַּבָּה וְנוֹרָא מְאֹד,

שַׂגִּיא־כֹחַ הוּא, הֲלֹא אָמַרְתָּ,

אֵיכָה־זֶה נֵצֵא וְנִלָּחֲמָה אִתּוֹ?"


וַיַּעַן גִּלְגָּמֶשׁ אֶת אֶנְגִּידוּ וַיֹּאמֶר לוֹ:

"רֵעִי, יַחְדָּו נָבֹא אֶל אַרְזֵי־הַקֹּדֶשׁ,

יַחְדָּו נִתְגָּרֶה מִלְחָמָה בְּחֻמְבַּבָּה,

וְנַכְרִית אֶת אוֹיֵב הָאֵלִים וְהָאָדָם."


 

לוּחַ שְׁלִישִׁי    🔗

אֶל אוּלַם־הַמֶּלֶךְ הַמַּבְרִיק בָּא אֶנְגִּידוּ,

לִבּוֹ יָנוּד, יְפַרְפֵּר כְצִפּוֹר־שָׁמָים,

אֶל הָעֲרָבָה יִתְגַּעְגַּע, אֶל חַיַּת־הַשָּׂדֶה.

בְּקוֹל רָם יָשִׂיחַ עָנְיוֹ וְלֹא יֶחְדָּל.

אֶל מִחוּץ לָעִיר יָחוּשׁ הַמִּדְבָּרָה.

גִּלְגָּמֶשׁ נֶעֱצַב אֶל לִבּוֹ, כִּי הָלַךְ רֵעוֹ וְאֵינֶנּוּ.

וַיָּקָם גִּלְגָּמֶשׁ וַיֶּאֱסֹף אֶת רָאשֵׁי הָעָם,

הֵרִים אֶת יָדוֹ וַיְדַבֵּר לַנְּדִיבִים:


"שִׁמְעוּ אֵלַי רוֹזְנִים! הַאֲזִינוּ, הַזְּקֵנִים!

לִבִּי לִבִּי לְאֶנְגִּידוּ, לְאֶנְגִּידוּ אֲנִי בוֹכֶה,

כְּאִשָּׁה מְקוֹנֶנֶת אֶשָּׂא קוֹלִי, אֶתְאַבָּל.

לָמָּה לִי גַרְזֶן־מִלְחַמְתִּי אֲשֶׁר לְצִדִּי?

קַלְעִי אֲשֶׁר בְּיָדִי, חַרְבִּי עַל חֲגוֹרָתִי?

שִׂמְחוֹת־עֵינַי, מַחְלְצוֹת־חַגַּי,

הָעוֹטוֹת לְעֹצֶר כֹּחִי – לָמָּה לִי אֵלֶּה?

הָלַךְ רֵעִי אֶנְגִּידוּ – וְאֵינֶנּוּ.

רָחַק מִמֶּנִּי, עִם חַיַּת־שָׂדֶה יִתְרוֹעֵעַ,

מְקַלֵּל אֶת הַקְּדֵשָׁה אֲשֶׁר הִדִּיחַתּוּ,

לִפְנֵי שַׁמַשׁ יִשְׁפֹּךְ שִׂיחוֹ.

וַאֲנִי אָמַרְתִּי, עַל מַרְבַדִּים יַצִּיעַ,

בְּאָהֳלֵי־אַפַּדְנִי יִשׁכֹּן לִשְׂמֹאלִי.

חוֹרֵי־אֶרֶץ יִשְּׁקוּ לְרַגְלָיו,

כָּל הָאָדָם יְשָׁרְתוּהוּ.

אָבֹל יֶאֱבַל לוֹ כָל הָעָם,

אֶלְבְּשָׁה בְגָדִים צוֹאִים, מְאֻבָּקִים, אֲרֻכִּים.

אֶלְבְּשָׁה עוֹר־אֲרָיוֹת, אָנוּדָה, אֵתַע בַשָּׂדֶה,

אֵצֵא הָעֲרָבָה, שָׁם אֶמְצָאֶנּוּ."


וְאֶנְגִּידוּ נִצָּב לְבַדּוֹ בָעֲרָבָה,

מֵרִים אֶת יָדוֹ.

וַיְקַלֵּל אֶת הַצַּיָּד וַיֶּעְתַּר לְשַׁמַשׁ וַיֹּאמַר:

"שְׁפָט־נָא, שַׁמַשׁ, אֶת הַצַּיָּד כְּדֵי־רִשְׁעָתוֹ.

הַשְׁמֵד כָּל־טוּבוֹ, קַח מִמֶּנּוּ כֹּחַ־גְּבוּרָתוֹ,

יְעַנּוּהוּ כָל־הָרוּחוֹת הָרָעוֹת,

יְקַדְּמוּ נְחָשִׁים פַּעֲמֵי רַגְלָיו הָרַכּוֹת."


כָּכָה אֵרַר אֶת הַצַּיָּד,

מִלִּים נָבְעוּ מֵעֹצֶר לִבּוֹ.

וַיִּתְאַו לָאֹר אֶת הָאִשָּׁה הַמַּדִּיחָה:


"הִנְנִי וְאָעִיד לָךְ, הָאִשָּׁה, אֶת גּוֹרָלֵךְ!

אַל יָקִיץ הַקֵּץ לוֹ וְלֹא יָסוּף לַעֲדֵי־עַד.

תָּחוֹלְנָה עַל רֹאשֵׁךְ קִלְלוֹתָי.

רָאשֵׁי דְרָכִים וּמְסִלּוֹת יִהְיוּ מְעוֹנֵךְ,

בַּצֵּל בְּפִנַּת הַחוֹמָה תִּשְׁכֹּנִי.

חֶלְאַת־אָדָם וְנִקְלִים יִסְרְטוּ עַל לְחָיָיִךְ.

רָעֵב אֲנִי וְצָמָא יְצִיקֵנִי,

כִּי אַתְּ הַעִירֹת בִּי אֶת הַתְּשׁוּקָה.

שָׁאַפְתִּי לָדַעַת וָאֶתְנַכֵּר לַחַיָּה.

אֲרוּרָה אַתְּ, אֲרוּרָה תִהְיִי,

כִּי מִשְּׂדוֹתַי נְהַגְתִּנִי הָעִירָה!"


שָׁמַע שַׁמַשׁ אִמְרֵי־פִיהוּ בְדַבְּרוֹ,

מִשָּׁמַיִם הִשְׁמִיעַ קוֹלוֹ וַיֹּאמַר:

"אֶנְגִּידוּ, נְמַר־הָעֲרָבוֹת,

מַדּוּעַ תְּקַלֵּל אֶת הַקְּדֵשָׁה הַנַּעֲרָה?

לֶחֶם לְךָ נָתְנָה, הָעוֹלֶה עַל שֻׁלְחַן־אֵלִים,

יַיִן לְךָ הִגִּישָׁה, הָעוֹלֶה עַל שֻׁלְחַן־מְלָכִים,

שִׂמְלַת־חַג וַחֲגוֹר לְךָ נָתָנָה.

אֶת גִּלְגָּמֶשׁ הָאַדִּיר – וַיְהִי רֵעֶךָ,

גִּלְגָּמֶשׁ הַגָּדוֹל, גֶּבֶר־עֲמִיתֶךָ,

הַמַּשְׁכִּיבְךָ עַל מִטָּה כְבוּדָה,

עַל יְצוּעַ־מַרְבַדִּים יַשְׁכִּיבֶךָ,

הַמּוֹשִׁיבְךָ בְּמִשְׁכְּנוֹת־מְנוּחוֹת,

בְּמִשְׁכְּנוֹת־מְנוּחוֹת לִשְׂמֹאלוֹ.

רוֹזְנֵי־אֶרֶץ יִשְּׁקוּ כַפּוֹת־רַגְלֶיךָ,

כָּל־הַגְּבָרִים יְשָׁרְתוּךָ.

צִוָּה לְעַמֵּי אוּרוּךְּ וְיִתְאַבְּלוּ לְךָ,

בְּגָדִים קְרוּעִים וּמְאֻבָּקִים יִלְבַּשׁ לִבְשָׂרוֹ,

גִּלְגָּמֶשׁ עָטָה עוֹר־הָאַרְיֵה,

יָחוּשׁ אֶל הַשָּׂדֶה, אֶל הָעֲרָבָה, לְבַקְשֶׁךָ."


שָׁמַע אֶנְגִּידוּ דִבְרֵי שַׁמַשׁ הַשַּׂגִּיא,

לִפְנֵי אֱלֹהָיו שָׁקַט לְבָבוֹ.


עֲנַן־אָבָק עוֹלֶה בַמֶּרְחַקִּים,

שַׁמַשׁ נָסַך עָלָיו אוֹר־צַחַר;


גִּלְגָּמֶשׁ בָּא, עוֹר־אֲרָיוֹת עָלָיו

מַבְרִיק כַּזָּהָב.

וְאֶנְגִּידוּ שָׁב עִם רֵעוֹ הָעִירָה.


צָרָה וְיָגוֹן בִּלְבַב אֶנְגִּידוּ,

סִפֵּר לְרֵעוֹ אֶת מְצוּקוֹת נַפְשׁוֹ:

"חֲלוֹמוֹת רָעִים חָלַמְתִּי, יְדִידִי;

לִקְרַאת שַׂגִּיא־כֹחַ יָצָאתִי אֲנִי לְבַדִּי,

פָּנָיו חָשְׁכוּ כִּפְנֵי לָיְלָה,

מַרְאֵהוּ כְּמַרְאֵה כֶלֶב־מִדְבָּר אָיֹם,

כַּנְפֵי נֶשֶׁר אַדִּיר וְצִפָּרְנָיו לוֹ.

בְּחֹזֶק־יָד תְּפָשַׂנִי וְהִשְׁלִיכַנִי הַצּוּלָה,

הִטְבִּיעַנִי בְמַעֲמַקֵּי אֵימוֹת.

כְּכֹבֶד־הָרִים הִכְבִּיד עָלָי,

כְּסֶלַע־מִדּוֹת הָיָה לִי מַשָּא בְשָׂרִי,

שִׁנָּה, הָפַךְ פָּנַי וְהָיוּ זְרוֹעוֹתַי כַּנְפֵי־צִפּוֹר:


"הַעֲמֵק, הַעֲמֵק וְרֵד עַד לְמִשְׁכְּנוֹת צַלְמָוֶת,

אֶל מִשְׁכְּנוֹת אִירְקָלָה.

רֵד מְעוֹנָה, כָּל־בָּאֶיהָ לֹא יְשׁוּבוּן,

לֵךְ בַּדֶּרֶךְ, אֲשֶׁר לֹא תִסֹּב.

בֹּאָה בַבַּיִת, אֲשֶׁר אֵין אוֹר לַיּוֹשְׁבִים בּוֹ,

עָפָר מִן הָאֲדָמָה מַאֲכָלָם וְחֹמֶר טַרְפָּם,

כַּצִּפּוֹר יִלְבְּשׁוּ נוֹצוֹת, יַעֲטוּ כְנָפָיִם.


"בָּאתִי לְמִשְׁכְּנוֹת תַּחְתִּית־אֲדָמָה,

שָׁם הוּסְרוּ עַטְרוֹת הַמְּלָכִים מֵרָאשֵׁיהֶם,

שָׁם הַיּוֹשְׁבִים עַל כֵּס־מַלְכוּת, מוֹשְׁלֵי־אֶרֶץ מִקֶּדֶם.

מְעוֹן־הָעֵיפָה, אֲשֶׁר בּוֹ נִכְנַסְתִּי,

אִוּוּ לְמוֹשָׁב לָמוֹ כֹהֲנִים וְעַבְדֵי־כֹהֵן,

אִוּוּ לְמוֹשָׁב לָמוֹ חַרְטֻמִּים וּנְזִירִים,

אִוּוּ לְמוֹשָׁב לָמוֹ כֹל אֲשֶׁר הָאֵלִים הַגְּדוֹלִים יֶאֱהָבוּם.

שָׁם זְבוּל אֶתָּנָה וְשָׁם מִשְׁכַּן סוּמוּקַן,

שָׁם אִשְׁקִיגַל, מַלְכַּת שְׁאוֹל־תַּחְתִּית וָאָרֶץ,

בֶּלִית־סֶרִי, סוֹפֶרֶת הָאֲדָמָה,

לְפָנֶיהָ תִכְרַע, תִּכְתֹּב בַּחֹמֶר,

אַף תִּקְרָא לְפָנֶיהָ מִסֵּפֶר־הַשֵּׁמוֹת,

הֵרִימָה רֹאשָׁהּ וְרָאֲתָה אוֹתִי:

כִּתְבִי גַם־אוֹתוֹ לְפָנָי! הִנֵּה הַחֲלוֹם."


וַיַּעַן גִּלְגָּמֶשׁ לְאֶנְגִּידוּ וַיֹּאמַר:

"תְּנָה לִי אֶת חַרְבְּךָ וְקַדְּשֶׁנָּה

לָרוּחַ הָרָעָה אֲשֶׁר עַל הַמָּוֶת.

מַרְאֶה מַבְרִיק לְךָ אֶתֵּן,

וְהוּא נַשֵּׁל יְנַשְּׁלֶנָּה.

מָחָר נִזְבַּח לַשּוֹפֵט הַמַּשְׁחִית, לְבִּיבּוּ,

וִיגָרֵשׁ מִפָּנֶיךָ אֶת שִׁבְעַת הָרָעִים."


וַיְהִי אַךְ הֵאִיר הַשַּׁחַר בַּבֹּקֶר,

וַיִּפְתַּח גִּלְגָּמֶשׁ אֶת שַׁעַר הַהֵיכָל הַנִּשָּׂא,

הוֹצִיא שֻׁלְחָן עָשׂוּי עֲצֵי אֲלוּמַקוּ,

סֵפֶל אֶבֶן אֲדֻמָּה מִלֵּא דְבַשׁ,

סֵפֶל אֶבֶן־סַפִּיר מִלֵּא חֶמְאָה,

עָרַךְ הַשֻּׁלְחָן וְיָלֹק אֱלֹהֵי הַשָּׁמֶשׁ.


 

לוּחַ רְבִיעִי    🔗

וַיְדַבֵּר שַׁמַשׁ לְגִּלְגָּמֶשׁ וַיֹּאמַר:

"עֲלֵה אַתָּה וְרֵעֲךָ וְנִלְחַמְתֶּם עִם חֻמְבַּבָּה,

הֲלֹא הוּא נוֹטֵר אֶת יַעַר־הָאֲרָזִים,

דֶּרֶךְ יַעַר־הָאֲרָזִים יַעַל בְּהַר־הָאֱלֹהִים.

חָטָא לְפָנַי חֻמְבַּבָּה, עַל־כֵּן עֲלוּ וְהַכּוּהוּ נָפֶשׁ!"


וַיִּשְׁמַע גִּלְגָּמֶשׁ אֶת דִּבְרֵי הָאָדוֹן,

וַיִּקְרָא לְכָל נְדִיבֵי הָעָם.

וַיָּבֹא הוּא וְאֶנְגִּידוּ אֶל הָאוּלָם.


וַיִּפְתַּח גִּלְגָּמֶש אֶת פִּיהוּ וַיֹּאמַר:

"שַׁמַשׁ צִוָּנוּ לָצֵאת לְמִלְחָמָה עַל חֻמְבַּבָּה.

שָׁלוֹם לָכֶם וְשָׁלוֹם לְכָל הָעָם!"


וַיָּקָם הַזָּקֵן אֲשֶׁר בִּנְדִיבֵי הָעָם

וַיִּשָּׂא מְשָׁלוֹ וַיָּעַן:

"יִהְיֶה שַׁמַשׁ מָגֵן לִידִידוֹ,

לְגִלְגָּמֶשׁ הָאַדִּיר כָּל הַיָּמִים,

זְרוֹעַ־יִשְעוֹ לֹא תָסוּר מִמֶּךָּ!

אָיֹם נוֹטֵר יַעַר־הָאֲרָזִים.

שַׁמַשׁ, אֲשֶׁר הוֹדִיעַ לְךָ רֹאשׁ הַקְרָב,

הוּא הֵשִׁיב לְךָ אֶת גֶּבֶר־עֲמִיתְךָ,

יִשָּׂא שָׁלוֹם לַחֲבֵרְךָ,

יַעֲמֹד לִימִינְךָ לִישׁוּעָתְךָ,

יִנְצֹר אֶת חַיֵּי הַמֶּלֶךְ.

וְאַתָּה רוֹעֵנוּ, הַמְפַלְּטֵנוּ מִכַּף צָר."


וַיַּעַזְבוּ אֶת הָעֲצֶרֶת, וַיֹּאמֶר גִּלְגָּמֶשׁ לְאֶנְגִּידוּ:

"רֵעִי, נֵלְכָה אֶל הַמִּקְדָּשׁ אֶגַלְמָה,

אֶל הַנְּבִיאָה הַקְּדוֹשָׁה.

נֵלְכָה אֶל רִישָׁת־נִינְלִיל הַגְּבִירָה,

לְפָנֶיהָ נָגֹלּוּ עֲתִידוֹת מֵרֹאשׁ;

וְהִיא תְבָרֵךְ פַּעֲמֵי רַגְלֵינוּ,

בְּיַד אֱלֹהֵי־הַשֶּׁמֶשׁ הַחֲזָקָה תַּפְקִיד גוֹרָלֵנוּ."


וַיֵּלְכוּ אֶל הַהֵיכָל אֶגַלְמָה,

וַיִּפְגְּעוּ בַכֹּהֶנֶת הַקְּדוֹשָׁה, בְּאֵם הַמֶּלֶךְ.

שָׁמְעָה אֶת דִּבְרֵי בְנָהּ וַתֹּאמַר:

“הַשַּׁמַשׁ יְחֻנֶּךָּ, בְּנִי!”


אֶל מֶלְתַּחַת־הַחַג יָרְדָה נִינְסוּן,

בַּעֲדִי־הַקֹּדֶשׁ שָׁבָה עֲדוּיָה לְבָנִים,

מָגִנֵּי־הַזָּהָב שָׁתָה עַל חָזֶהָ,

עִטְּרָה עֲטָרָה לְרֹאשָׁהּ, בְּכַפָּהּ סֵפֶל־הַמָּיִם.

הִזְּתָה עַל הָאָרֶץ וַתַּעַל עַל הַגָּג.

עָלְתָה בַמַּעֲלוֹת לִפְנֵי שַׁמַשׁ, הִקְטִירָה לְבוֹנָה,

מִנְחָה הִקְרִיבָה, וַתִּפְרֹשׂ כַּפַּיִם לְשַׁמַשׁ:


"לָמָּה מִנִּיתָ לִבְנִי לְגִלְגָּמֶשׁ כַּעַשׂ לֹא־יֶחְדָּל?

נָתַתָּ לוֹ לֵב, אֲשֶׁר לֹא יָנַח מִסָּעַר,

וְהִנֵּה גַם־עַתָּה נָגַעְתָּ עַד־לִבּוֹ.

וְהִנֵּה הוּא שָׂם לְדֶרֶךְ פְּעָמָיו,

לְדֶרֶךְ רְחוֹקָה, לְמִשְׁכְּנוֹת חֻמְבַּבָּה.

קְרָב אֲשֶׁר־לֹא־נִסָּה בוֹ עָרוּךְ לְפָנָיו,

דֶּרֶךְ אֲשֶׁר־לֹא־יְדָעָהּ נְכוֹנָה לְפָנָיו.

לְמִן הַיּוֹם הָלַךְ בּוֹ עַד־הַיּוֹם יָשׁוּב בּוֹ,

עַד שֶׁיַּגִּיעַ לְיַעַר־הָאֲרָזִים,

עַד שֶׁיְּמַגֵּר אַרְצָה אֶת חֻמְבַּבָּה הָאַדִּיר,

עַד שֶׁיְּבַעֵר מִן הָאָרֶץ כָּל־תּוֹעֲבַת נַפְשֶׁךָ,

תֵּקַע מִמְּךָ נֶפֶשׁ אֵאָה אָהַבְתָּ

כָּל הַיָּמִים אֲשֶׁר תְּשׁוּקָתְךָ אֵלֶיהָ.

וְהָיְתָה לְךָ אִשְׁתְּךָ אַזְכָּרָה לְגִלְגָּמֶשׁ,

עַד שֶׁתִּמְנַע מִמְּךָ מִשְׁכַּב־דּוֹדֶיהָ,

יִהְיֶה לִבְּךָ עֵר וְלֹא יִשְׁכַּח אֶת גִּלְגָּמֶשׁ

וְיָשׁוּב בְּשָׁלוֹם לְאוּרוּךְּ, אֲשֶׁר חוֹמוֹת סָבִיב לָהּ."


כָּכָה הִתְחַנְּנָה לִפְנֵי שֵׁגַל הָאֵל

לִהְיוֹת לָהּ לְעֶזְרָה.

וַיְהִי עֲנַן־הַתְּכֵלֶת אֲשֶׁר לַלְּבוֹנָה

עוֹלֶה הַשָּׁמָיְמָה.

וַתֵּרֶד וַתֹּאמֶר לְאֶנְגִּידוּ:


"אֶנְגִּידוּ הָאַדִּיר, אַתָּה שְׂשׂוֹנִי וְנֶחָמָתִי.

וַהֲגִנֹּתָ עַל בְּנִי עַל גִּלְגָּמֶשׁ.

הַעֲלֵה עוֹלָה לְשַׁמַשׁ הַנִּשָּׂא."


וַיִּשְׂאוּ רַגְלֵיהֶם וַיֵּלְכוּ צָפוֹנָה.

וַיִּשׂאוּ עֵינֵיהֶם וַיִּרְאוּ מֵרָחוֹק

אֶת הַר־הָעוֹלָם, מְעוֹנָה לָאֱלֹהִים.

וְהַדֶּרֶך עוֹלָה לִפְנֵיהֶם בְּיַעַר־הָאֲרָזִים.

רָאוּ אֶת מַחֲשַׁכֵּי הַיַּעַר וַיַּעַזְבוּ אֶת הָאֹהָלִים מֵאַחֲרֵיהֶם,

לְבַדָּם קָרְבוּ אֶל יַעַר־הָאֵלִים.


מֵרָחוֹק צָפָה עֶבֶד־חֻמְבַּבָּה,

הִשְׁקִיף עַל הַגִּבּוֹרִים וְהֵם קְרֵבִים,

רָאָה אוֹתָם וְיָצָא לִקְרָאתָם,

עוֹטֶה שֶׁבַע שִׂמְלוֹת־כְּשָׁפִים.

הֵסִיר שֵׁשׁ שְׂמָלוֹת וְהֶחֱלִיף אוֹתָן,

תַּחְתּוֹנִים לְמַעְלָה וְעֶלְיוֹנִים לְמָטָּה.

כְּשׁוֹר־פָּר נוֹשֵׁם בְּעֶבְרָתוֹ זִנֵּק אֲלֵיהֶם,

שָׁאֹג יִשְׁאַג, יִתֵּן קוֹל אָיֹם:

“גְּשׁוּ וְאֶתֶּנְכֶם טֶרֶף לַדַּיּוֹת!”


אַךְ שַׁמַשׁ, אֱלֹהֵי־הַשֶּׁמֶשׁ, סָכַךְ עַל הַגִּבּוֹרִים,

שָׁת לְאַל אֶת כִּשְׁפֵי אַדְּרוֹת־הַנָּעַר.

נִינִיב אֱלֹהֵי־הַמִּלְחָמָה חִזֵּק אֶת יְדֵיהֶם

וַיַּכּוּ נָפֶשׁ אֶת הָעֲנָק,

אֶת נוֹטֵר יַעַר־חֻמְבַּבָּה.


וַיִּפְתַּח אֶנְגִּידוּ אֶת פִּיו וַיֹּאמֶר לְגִלְגָּמֶשׁ:

"אָחִי, אַל־נָא נִקְרַב אֶל הַיַּעַר

וְלֹא נַחְדֹּר אֶל מַחֲשַׁכֵּי הַחֹרְשָׁה,

כָּל־אֲבָרַי כְּאִלּוּ יָבְשׁוּ, כְּאִלּוּ יָבְשָׁה אֶזְרוֹעִי."


וַיַּעַן גִּלְגָּמֶשׁ וַיֹּאמֶר לְאֶנְגִּידוּ:

"אַל יֵרַךְ לְבָבְךָ וְאַל יִפֹּל,

אַל תַּעֲרֹץ, יְדִידִי, וְאַל תִּפְחָד.

לֹא, כִּי מִמֶּנּוּ וָהָלְאָה דַרְכֵּנוּ.

נָשִׂים פָּנֵינוּ אֶל פְּנֵי חֻמְבַּבָּה.

אִם לֹא גָבְרָה יָדֵנוּ עַל נוֹטֵר־יַעֲרוֹ?

הֲכִי לֹא נְבוֹנֵי־מִלְחָמָה אֲנָחְנוּ?

הָבָה נַעֲלֶה בְהַר־הָאֱלֹהִים.

בְּטַח בְּשַׁמַשׁ, וּלְבָבְךָ לֹא יִפְחָד,

וְשָׁבָה וְהָיְתָה זְרוֹעֲךָ כְּבַתְּחִלָּה,

וְשָׁב כֹּחֲךָ וְהָיָה כְּבָרִאשׁוֹנָה.

קוּמָה וְנַעֲלֶה, יַחְדָּו נֵאָבֵק.

אֵל־הַשֶּׁמֶשׁ יְדִידֵנוּ מְשׁוֹרְרֵנוּ לַקְרָב,

שְׁכַח אֶת הַמָּוֶת וְחָלְפָה בַלָּהָה.

וְנִשָּׁמֵר מְאֹד לְנַפְשׁוֹתֵינוּ בַיָּעַר,

נִתְבּוֹנֵן אֶל כָּל עֵבֶר וְעֵבֶר

וְלֹא יִפֹּל עָלֵינוּ הָאַדִּיר מִמַּאֲרָבוֹ.

וְהָאֵל, אֲשֶׁר סָכַךְ עָלֵינוּ בַקְרָב כַּיּוֹם

יִהְיֶה לְמִשְׂגָּב לִידִיד־נַפְשׁוֹ.

נִהְיֶה לְשֵׁם וּלִתְהִלָּה בְּכָל־הָאָרֶץ."


וַיִּשְׂאוּ רַגְלֵיהֶם וַיֵּלְכוּ,

וַיָּבֹאוּ עַד יַעַר־הָאֲרָזִים

וַיַּעַמְדוּ מִדַּבֵּר וַיַּעַמְדוּ תַחְתָּם.


 

לוּחַ חֲמִישִׁי    🔗

עָמְדוּ מַחֲרִישִׁים, מַשְׁקִיפִים עַל־פְּנֵי הַיָּעַר.

תָּמְהוּ לָאֲרָזִים, לְגֹבַה קוֹמָתָם,

תָּמְהוּ לַיַּעַר, לִמְעָרוֹתָיו הָרְחָבוֹת,

אֲשֶׁר בָּהֶן מִתְהַלֵּךְ חֻמְבַּבָּה,

צוֹעֵד בְּגָאוֹן, צוֹעֵד גַּסּוֹת.

וְשָׁם אֳרָחוֹת מַיְשִׁירוֹת וּנְתִיבוֹת נִטָּיוּ,

וְהַר־הָאֲרָזִים לִפְנֵיהֶם,

מְעוֹנָה אֱלֹהֵי־הַשָּׁמַיִם, מִקְדַּשׁ אִירְנִינִי.

וְהָאֲרָזִים יִשְׂגּוּ לִפְנֵי הַהֵיכָל בַּהֲדַר־גְּאוֹנָם.

וְצֵל הָעֵצִים נֶחְמָד, כֻּלּוֹ גִיל וְשָׂשׂוֹן,

בְּצִלָּם סְבָכִים יִתְלוֹנָנוּ,

יַעֲלוּ שִׂיחִים מוֹרִיקִים בָּאֵזוֹב,

צְמָחִים מִסְתַּבְּכִים וּפִרְחֵי־רֵיחַ

נֶחְבָּאִים אֶל מִתַּחַת לָאֲרָזִים.


וְהֵמָּה הוֹלְכִים שָׁעָה־מִשְׁנֶה,2

עוֹד שָׁעָה שְׁנִיָּה וְעוֹד שָׁעָה שְׁלִישִׁית;

וְכַאֲשֶׁר יֵלְכוּ כֵּן תִּקְשֶׁה הַדֶּרֶךְ,

וְהַר־הָאֱלֹהִים הוֹלֵךְ וְנַעֲשֶׂה תָלוּל.

אֵין לִרְאוֹת אֶת חֻמְבַּבָּה, אֵין קָשֶׁב.

וַיְהִי הַלַּיְלָה עַל־פְּנֵי הַיָּעַר.


רָאוּ אֶת הַכּוֹכָבִים וְנָטוּ לָלוּן.

וַיַּשְׁכֵּם אֶנְגִּידוּ בַבֹּקֶר וַיָּעַר אֶת רֵעוֹ:


"חֲלוֹם חָלַמְתִּי, רֵעִי, וְנוֹרָא הַחֲלוֹם אֲשֶׁר חָלָמְתִּי:

הִנֵּה אֲנַחְנוּ עוֹמְדִים לִפְנֵי רֹאשׁ הָר,

וַיִּפֹּל צוּק־סֶלַע נָטוּי,

בְּרַעַם־אַדִּירִים הִתְגַּלְגַּל,

וַיְרוֹצֵץ אִישׁ בְּתַחְתִּית הָהָר,

וַנֵּשְׂטְ מֵעָלָיו כִּשְׁנֵי זְבוּבֵי־שָׂדַי –

וַנְּהִי בַדֶּרֶךְ הָעוֹלָה אוּרוּכָּה."


וַיַּעַן הַמֶּלֶךְ לְגֶבֶר עֲמִיתוֹ:

"אֶנְגִּידוּ, טוֹב הַחֲלוֹם אֲשֶׁר חָלָמְתָּ.

נֶחְמָד הַמַּרְאֶה, טוֹבוֹת יְבַשֵּׂר!

רָאִיתָ אֶת הָהָר וְהִנֵּה נוֹפֵל,

וְהָאִישׁ הַשְּׁלִישִׁי שׁוֹכֵב רָצוּץ.

הִנֵּה הַחֲלוֹם וְזֶה פִּתְרוֹנוֹ:

אֶת חֻמְבַּבָּה נִלְכֹּד וְנַכֶּנּוּ נָפֶשׁ.

הַשָּׂדֶה נַשְלִיךְ אֶת נִבְלָתוֹ,

וְעִם דִּמְדּוּמֵי־שַׁחַר נָשׁוּב בָּיְתָה."


מִקֵּץ עֶשְׂרִים שָׁעָה סָעֲדוּ לִבָּם,

מִקֵּץ שְׁלֹשִׁים שָׁעָה עָמְדוּ לָנוּחַ.

וַיַּחְפְּרוּ בוֹר לִפְנֵי אֱלֹהֵי־הַשֶּׁמֶשׁ,

וַיִּפְרְשׂוּ כַפֵּיהֶם אֶל שַׁמַשׁ.

וַיַּעַל גִּלְגָּמֶשׁ וַיַּעֲמֹד עַל גַּל־הֶעָפָר

וַיִּשְׁפֹּךְ פְּרֻדּוֹת הַבּוֹרָה וַיֹּאמַר:


"אָנָּא, הָהָר, תְּנָה חֶזְיוֹן־לָיְלָה,

שַׁמַשׁ נִשָּׂא – חֲלוֹם לְאֶנְגִּידוּ."


וְהִנֵּה רוּחַ־קֹר עוֹבֶרֶת בְּרָאשֵׁי הָעֵצִים,

רוּחַ־סְעָרָה חוֹלֶפֶת עַל־פְּנֵיהֶם.

וַיַּשְׁכֵּב גִּלְגָּמֶשׁ אֶת רֵעוֹ עַל הָאָרֶץ,

וַיִּשְׁכַּב גַּם־הוּא עַל־יָדוֹ.

וַיֵּט לִפְנֵי הַסַּעַר כְּשִׁבֹּלֶת־הֶהָרִים.

כְּשִׁבֹּלֶת אֲשֶׁר רוּחַ תְּנִידֶנָּה.

קָרַס כָּרַע עַל בִּרְכָּיו,

סָמַךְ רֹאשׁוֹ הֶעָיֵף עַל רֵעוֹ.

וְתַרְדֵּמָה נָפְלָה עַל אֶנְגִּידוּ,

כַּאֲשֶׁר תִּתְקֹף שֵׁנָה אֱנוֹשׁ.

בַּחֲצִי הַלַּיְלָה נָדְדָה שְׁנָתוֹ,

קָם וַיִּזְדַּקֵּף וַיְדַבֵּר לְרֵעוֹ:

"גִּלְגָּמֶשׁ, הַאַתָּה קָרָאתָ לִי? –

כִּי לָמָּה־זֶה הִתְנַעָרְתִּי?

הַאִם נָגַעְתָּ בִּי, כִּי לָמָּה־זֶה הִתְחַלְחָלְתִּי?

הַאִם לֹא עָבַר אֵל עַל־פָּנֵינוּ,

כִּי לָמָּה יָבֵשׁ כֹּחִי?

רֵעִי, עוֹד פַּעַם חֲלוֹם חָלָמְתִּי –

וְנוֹרָא הַחֲלוֹם אֲשֶׁר חָלָמְתִּי.


"וְהִנֵּה הַשָּׁמַיִם נָתְנוּ קוֹל, וַתַּעַן הָאָרֶץ וַתִּשְׁאָג.

עַנְנֵי־סַעַר חָלְפוּ וַתְּהִי עֲלָטָה.

פִּתְאֹם בָּרַק הַבָּרָק, קָדְחָה אֵשׁ,

נִמְתְּחוּ עָבִים, הִרְקִיעוּ, הִמְטִירוּ מָוֶת.

וְשׁוּב הָיָה אוֹר, וַתָּשָׁב הָאֵשׁ וַתִּכְבֶּה.

וְהָאִישׁ, אֲשֶׁר פְּגָעָהוּ הַבָּרָק,

הָיָה לְעָפָר מִן הָאֲדָמָה.

הָבָה נוֹסִיף לָלֶכֶת

אֶל־בֵּין לָאֲרָזִים – שָׁם נִוָּעֵץ."


וַיִּפְתַּח גִּלְגָּמֶשׁ אֶת־פִּיהוּ וַיַּעַן:

"אֶנְגִּידוּ, טוֹב הַחֲלוֹם אֲשֶׁר חָלָמְתָּ,

שִׂמְחָה יְבַשֵּׂר!

קָשֶׁה יִהְיֶה הַקְרָב וְנַכֶּה אֶת חֻמְבַּבָּה."


בְּקשִׁי עָלוּ עַל רֹאשׁ הָהָר,

שָׁם הֲמוֹן־אֲרָזִים עוֹטֵר מְעוֹן אֵלִים

וְהֵיכַל־קָדְשָׁהּ שֶׁל אִירְנִינִי בִנְגֹהוֹת־צָחַר.


וְהִנֵּה קוֹל נַחֲרַת־אֵימָה, וַיִּרְעֲשׁוּ הָעֵצִים.

וַיִּשְׂאוּ עֵינֵיהֶם וַיִּרְאוּ אֶת חֻמְבַּבָּה:

כַּפּוֹת־רַגְלָיו כְּכַפּוֹת־רַגְלֵי הָאַרְיֵה,

קַשְׂקַשֵּׂי־נְחֹשֶׁת מְכַסִּים אֶת בְּשָׂרוֹ,

צִפָּרְנַיִם לוֹ כְּצִפָּרְנֵי הַדַּיָּה,

קַרְנֵי־רְאֵם – קַרְנָיו,

רֹאשׁ־נָחָשׁ עַל קְצֵה זְנָבוֹ וְאֶבְרוֹ:

"קוּמָה, אֶנְגִּידוּ שַׁמַשׁ, אֱלֹהֵי־הַשֶּׁמֶשׁ,

יְחָנֵּנוּ אֶת הַחַיִּים!"


וַיּוֹרוּ אֵלָיו אֶת חִצֵּיהֶם,

הֵטִילוּ בוֹ כֵילָף וְכִידוֹן,

וַיָּשׁוּבוּ רֵיקָם, שִׁלְּחוּם וְלֹא פָגְעוּ בוֹ.

הִתְיַצֵּב לִפְנֵיהֶם, וְתָפַשׂ אֶת אֶנְגִּידוּ

בְּצִפָּרְנֵי רַגְלָיו.

אָז יָכֹף הַמֶּלֶךְ גַּרְזִנּוֹ,

וַיִּפֹּל חֻמְבַּבָּה אָרְצָה.

וְגִלְגָּמֶשׁ הֵסִיר רֹאשׁוֹ מֵעֹרֶף־קַשְׂקַשְׂתּוֹ.

אֶת נִבְלָתוֹ הַגְּדוֹלָה לָקְחוּ וְהוֹצִיאוּהָ אֶל מִחוּץ לַיָּעַר,

לְמַאֲכָל לְעוֹף־הַשָּׁמַיִם הִשְׁלִיכוּהָ;

וְאֶת רֹאשׁוֹ, אֲשֶׁר קַרְנַיִם לוֹ,

נָשְׂאוּ עַל הַמּוֹט לִהְיוֹת אוֹת־נִצָּחוֹן –

וְהִנֵּה קוֹל מִן הָהָר, קוֹל אִירְנִינִי בְרֵעָהּ:


"שׁוּבוּ עַל עֲקֵבְכֶם, כִּי כִלִּיתֶם אֶת מְלַאכְתְּכֶם.

פְּנוּ וּלְכוּ עִירָה אוּרוּךְּ, כִּי מְחַכָּה הִיא לָכֶם.

לֹא יַעֲלֶה בֶן־תְּמוּתָה בְהַר־הַקֹּדֶשׁ,

אֲשֶׁר עָלָיו יִנְווּ הָאֵלִים

כָּל־הָרוֹאֶה פְנֵי הָאֵלִים וָמֵת."


וַיַּפְנוּ אֶת פְּנֵיהֶם וַיָּשׁוּבוּ.

וַיֵּלְכוּ בִנְקִיקִים וּבַעֲקַלְקַלֵּי דְרָכִים,

וַיֵּאָבְקוּ עִם אֲרָיוֹת וַיִּפְשְׁטוּ עוֹרָם מֵעֲלֵיהֶם.

וּבַכֶּסֶא שָׁבוּ אֶל הָעִיר

וְגִלְגָּמֶשׁ נוֹשֵׂא אֶת רֹאשׁ חֻמְבַּבָּה בַחֲנִיתוֹ.


 

לוּחַ שִׁשִּׁי    🔗

וַיִּרְחַץ אֶת כֵּלָיו וַיִּמְרֹט אֶת אֲזֵנוֹ,

סָרַק מַחְלְפוֹתָיו, הִרְכִּיבָן עַל עָרְפּוֹ,

הֵסִיר צוֹאִים וַיִּלְבַּשׁ נְקִיִּים,

עָטָה אַדֶּרֶת־צִיצִיּוֹת, אָזַר אֶת מָתְנָיו,

גִּלְגָּמֶשׁ עָטַר עֲטַרְתּוֹ, שָׂם עָלָיו חֲגוֹרָתוֹ.


וַתַּחְמֹד עִשְׁתָּר אֶת יְפִי גִּלְגָּמֶשׁ.

וַתִּשָּׂא עִשְׁתָּר עֵינֶיהָ אֶל גִּלְגָּמֶשׁ:

"בֹּא, גִּלְגָּמֶשׁ, הֱיֵה לִי לְאִישׁ!

תְּנָה לִי מִזַּרְעֲךָ, מִזַּרְעֲךָ תֶּן־לִי.

אַתָּה תִהְיֶה לְאִישׁ לִי וְאֶהְיֶה לְךָ לְאִשָּׁה.

אֲצַו וְאָסְרוּ לְךָ הַמִּרְכֶּבֶת,

רֶכֶב עָשׂוּי כֶּתֶם וְאֶבֶן־סַפִּיר,

גַּלְגִּלָּיו זָהָב חָרוּץ, קַרְנוֹתָיו אֶבֶן־חֵן.

יוֹם יוֹם יֶאֶסְרוּ לְךָ

אֶת הַיָּפִים בַּסּוּסִים וּמֵאַדִּירֵיהֶם.

בֹּאָה לְבֵיתִי בְּצֵל אַרְזֵי־הָרֵיחַ!

וְהָיָה כִּי־תָבֹא בְּצֵל קוֹרַת־בֵּיתֵנוּ

וְנָשְׁקוּ לְרַגְלֶיךָ כָּל־יוֹשְׁבִים עַל כִּסֵּא־מְלָכִים,

מַלְכֵי־אֶרֶץ וְשׁוֹעִים יִכְרְעוּ לְפָנֶיךָ,

יִשְׂאוּ לְךָ מַס הָרִים וּמִישׁוֹרִים,

כָּל־תַּאֲוַת־לִבְּךָ לְךָ יִתֵּנוּ.

שְׁגַר אֲלָפֶיךָ וְצֹאנְךָ תּוֹאֲמִים יִהְיוּ,

עֲמוּסֵי מִנְחָה יָבֹאוּ פְרָדֶיךָ,

יִסְעַר סוּס־רִכְבְּךָ, אַדִּיר מִסּוּסִים,

לֹא יִהְיֶה כְפִרְדְּךָ נֶהְדָּר בַּצֶּמֶד."


וַיִּפְתַּח גִּלְגָּמֶשׁ אֶת־פִּיהוּ וַיְדַבֵּר,

וַיַּעַן לְעִשְׁתָּר הָעֲצוּמָה וַיֹּאמַר:

"יִהְיוּ לָךְ מַחֲמַדַּיִךְ שֶׁלָּךְ!

לָמָּה־לִי־לַחְמֵךְ – וּבְטַרְפֵּךְ, לִי תִתְּנִי, לֹא חָפָצְתִּי.

נִבְזֶה בְעֵינַי לַחְמֵךְ, וְאִם מַאֲכַל־אֵלִים תָּבִיאִי,

נִמְאֲסָה כוֹסֵךְ, וְאִם שִׁקּוּי־אֵלִים תַּגִּישִׁי,

הִנְנִי וְאוֹכִיחֵךְ בְּפָנַיךְ עַל תְּכָכָיִךְ.


"בְּחֹם תְּתַנִּי עֲגָבַיִךְ, וְקָרָה בִלְבָבֵךְ.

דּוֹמֶה לִבֵּךְ לְפֶתַח־סְתָרִים,

סוּפָה חוֹדֶרֶת בּוֹ וְרוּחַ וָקֹר בִּכְנָפֶיהָ,

לָאַרְמוֹן הַנּוֹפֵל וּמְדַכֵּא אַדִּירִים תַּחְתָּיו,

לַשֶּׁנְהָב הַמַּשְׁלִיךְ מִרְדַּעְתּוֹ מֵעָלָיו,

לַכֹּפֶר הָאוֹכֵל בְּשַׂר נוֹשֵׂא־הַלַּפִּיד,

לְנֹאד אֲשֶׁר יִתְפּוֹצֵץ מִתַּחַת לַשּׂוֹחֶה,

לְאֶבֶן־שִׂיד אֲשֶׁר לֹא תְכוֹנֵן אֶת חוֹמַת הָעִיר

לַנַּעַל הַמְּצֵרָה לְרֶגֶל קוֹנֶהָ.


"אֶת־מִי מֵעוֹגְבַיִךְ אָהַבְתְּ כָּל־הַיָּמִים?

מִי הוּא רוֹעֵךְ, אֵלָיו דָּבַקְתְּ לְעוֹלָם?

הִנֵּה אַגִּידָה מְזִמּוֹתַיִךְ בְּאָזְנַיךְ,

רֹעַ מַעֲלָלַיִךְ אוֹצִיא בְמִסְפָּר אַחַד אֶחָד.

"בְּכִי־תַמְרוּרִים מִנִּית מִדֵּי שָׁנָה בְשָׁנָה

לִידִיד־נְעוּרַיִךְ, לַתַּמּוּז, אֱלֹהֵי־הָאָבִיב.


"בְּרוֹעֶה עוֹטֶה נוֹצוֹת־הָדָר חָשְׁקָה נַפְשֵׁךְ,

הִכִּית אוֹתוֹ, שִׁבַּרְתְּ אֶת אֶבְרוֹתָיו,

וְהוּא, נִצָּב בַּיַּעַר, יִקְרָא: ‘קַפִּי, קַפִּי’ – כְּנָפִי, כְּנָפִי!


"אָהַבְתְּ אֶת הָאֲרִי, אֶת שַׂגִּיא־הַכֹּחַ,

וְשֶׁבַע פְּעָמִים וְשֶׁבַע כָּרִית לוֹ שַׁחַת.


"עָגַבְתְּ עַל סוּס הַשָּׂשׂ לִקְרַאת קְרָבוֹת,

וַתּוֹעִידִיהוּ לַשּׁוֹט, לַדָּרְבָן וְלָרֶסֶן,

וַתּוֹעִידִיהוּ לָרוּץ דֶּרֶךְ שֶׁבַע שָׁעוֹת־מִשְׁנֶה.

וַתּוֹעִידִיהוּ לִרְפֹּשׂ מֵימָיו וְלִשְׁתּוֹת מֵהֶם.

הַעִידוֹת אֶת הַבְּכִי לְאִמּוֹ, לְסִילִילִי.


"לִבֵּךְ הָלַךְ אַחֲרֵי אַבִּיר־רוֹעֵי־עֲדָרִים,

בְּיַד־חָרוּצִים זָרָה פְרֻדּוֹת־קֹדֶשׁ לְפָנָיִךְ,

יוֹם יוֹם זָבַח לָךְ גְּדִי־עִזִּים.

בַּמַּטֶּה אֲשֶׁר בְּיָדֵךְ הִכִּית אוֹתוֹ,

הָפַכְתְּ אוֹתוֹ לִזְאֵב־עֲרָבוֹת:

יְגָרְשׁוּהוּ נְעָרָיו הָרוֹעִים מֵעַל פְּנֵיהֶם,

כְּלָבָיו שֶׁלּוֹ יִשְׁלְחוּ שֵׁן בִּבְשָׂרוֹ.


"וְגַם אֶת אִישׁוּלָנוּ חָמַד לִבֵּךְ,

אֶת נוֹטֵר גַּנֵּי אָבִיךְ שֶׁבַּשָּׁמָיִם.

כְּחֵפֶץ־לִבֵּךְ הֵבִיא לָךְ פְּרָחִים בְּכָל־עֵת,

יוֹם יוֹם עָלוּ פְרָחִים עַל שֻׁלְחָנֵךְ.

אֵלָיו נָשָׂאת עֵינַיִךְ לְפַתּוֹתוֹ:

"קוּמָה, אִישׁוּלָנוּ, וְנֵהָנֶה מִגְּבוּרָתְךָ!

שְׁלַח יָדְךָ וּטְעַם מִלֶּחֶם־הָאֵלִים."

וַיַּעַן אִישׁוּלָנוּ וַיֹּאמֶר לָךְ:

"מַה־שֶּׁאֱלָתֵךְ, עִשְׁתָּר, מַה־בַּקָּשָׁתֵךְ?

הֲכִי לֹא אָפְתָה אִמִּי וַאֲנִי לֹא אָכַלְתִּי,

אֲשֶׁר אֹכַל מִמַּטְעַמַּיִךְ לְאֵיד לִי וּלְהַוָּתִי

וְהָיָה לִי לְקוֹץ וּלְדַרְדָּר?"

שָׁמַעַתְּ אֶת אֲשֶׁר־אָמַר,

וַתַּכִּי אוֹתוֹ בַמַּטֶּה אֲשֶׁר בְּיָדֵךְ,

וַתַּהַפְכִיהוּ לַעֲטַלֵּף וַתּוֹשִׁיבִיהוּ בְמָחֳרָאוֹת,

וְלֹא יָסַף לַעֲלוֹת אֶל הַמִּקְדָּשׁ,

וְלֹא יָסַף לָרֶדֶת אֶל הַגָּן.


"וְהִנֵּה עַתָּה תִשְׁאֲפִי לְאַהֲבָתִי,

לַעֲשׂוֹת לִי כַּאֲשֶׁר עָשִׂית לָהֶם."


וַיְהִי כִּשְׁמֹעַ עִשְׁתָּר אֶת אֲשֶׁר־אָמַר,

וַתִּבְעַר חֲמָתָהּ מְאֹד, וַתַּעַל הַשָּׁמָיִם,

וַתֵּתַצַּב עִשְׁתָּר לִפְנֵי אַנוּ אָבִיהָ,

עָמְדָה לִפְנֵי אַנְתּוּ, אִמָּהּ שֶׁבַּשָּמָיִם:


"אָבִי שֶׁבַּשָּׁמָיִם! גִּלְגָּמֶשׁ קִלְלָנִי,

רֹעַ מַעֲלָלַי הוֹצִיא בְמִסְפָּר,

רֹע מַעֲלָלַי וְכָל־מְזִמּוֹתָי.

כְּלִמָּה הֶעֱטָה עָלַי וּבוּשָׁה."


פָּתַח אַנוּ אֶת־פִּיהוּ וַיְדַבֵּר,

וַיַּעַן אֶת עִשְׁתָּר הַגְּבִירָה וַיֹּאמַר:


"אֵין־זֶה כִּי־דָרַשְׁתְּ אֶת אַהֲבַת גִּלְגָּמֶשׁ,

כִּי עַל־כֵּן הוֹצִיא בְמִסְפָּר כָּל־רֹעַ מַעֲלָלָיִךְ."


פָּתְחָה עִשְׁתָּר אֶת־פִּיהָ וַתְּדַבֵּר,

וַתֹּאמֶר לְאָבִיהָ שֶׁבַּשָּׁמַיִם, לְאַנוּ:


"עֲשֵׂה שׁוֹר־שֶׁבַּשָּׁמַיִם וְיִרְעַץ אֶת גִּלְגָּמֶשׁ,

הַפֵּל אֵימָה וָפַחַד עַל גִּלְגָּמֶשׁ.

וְהָיָה אִם לֹא תִשְׁמַע בְּקוֹלִי

וְלֹא תָבִיא אֶת שׁוֹר־הַפְּלָאִים,

אֲשַׁבֵּר שַׁעֲרֵי תָפְתֶּה, אֲגַדֵּעַ אֶת־בְּרִיחָיו,

וְעָלוּ כָל־הַשֵּׁדִים אֲשֶׁר בִּשְׁאוֹל־תַּחְתִּית,

וְשָׁבוּ כָל יוֹרְדֵי־דוּמָה אֲשֶׁר מֵעוֹלָם

וְעָצְמוּ הַמֵּתִים מִן הַחַיִּים."


פָּתַח אַנוּ אֶת־פִּיהוּ וַיְדַבֵּר,

וַיֹּאמֶר לְעִשְׁתָּר, בִּתּוֹ הַגְּבִירָה:


"אִם אֶת־תַּאֲוַת־לִבֵּךְ אֲנִי עוֹשֶׂה

וְהָיוּ שֶׁבַע שְׁנוֹת שִׁבֹּלֶת־רֵיקָה בָאָרֶץ.

הֶאָסַפְתְּ דֵּי־דָגָן אֶל הַמַּמְּגוּרָה,

הַהִצְמַחַתְּ דֵּי־יֶרֶק־דֶּשֶׁא לְבֶהֱמַת־הַשָּׂדֶה?"


פָּתְחָה עִשְׁתָּר אֶת־פִּיהָ וַתְּדַבֵּר,

וַתַּעַן אֶת אַנוּ אָבִיהָ שֶׁבַּשָּׁמָיִם:


"דַּיּוֹ דָגָן לְאָדָם אֲשֶׁר אָסַפְתִּי,

דַּיּוֹ עֵשֶׂב וְחָצִיר לַבְּהֵמָה הִצְמַחְתִּי,

תָּבֹאנָה שֶׁבַע שְׁנוֹת הַשִּׁבֹּלֶת־הָרֵיקָה!

דֵּי־שֶׁבֶר לָאָדָם וְלַבְּהֵמָה כִּנַּסְתִּי,

כִּי עַל־כֵּן שַׁלְּחֶנוּ.

וְשָׂמַח לִבִּי כִּי־יִנְחַר שֹׁור־הַשָּׁמָיִם,

בְּנַחֲרוֹת־אֵימָה יָרִיעַ עַל גִּלְגָּמֶשׁ."


וַיִּשְׁמַע אֱלֹהֵי־הַשָּׁמַיִם בְּקוֹלָהּ,

וַיְמַלֵּא אַנוּ אֶת־שֶׁאֱלָתָהּ.

שָׁלַח שׁוֹר־פָּר אָיֹם מֵהַר־הָאֱלֹהִים,

עִירָה אוּרוּךְּ הֱבִיאָהוּ.

וַיָּטָשׂ שׁוֹר־הַפָּר בְּזַעַם דֶּרֶך שָׂדֶה וּמִזְרָע,

וַיַּשֶּׁם אֶת הָאָרֶץ לִפְנֵי חוֹמַת הָעִיר.


רוּחַ־אַפּוֹ אֵשׁ בָּה טִאטֵא מֵאָה אִישׁ.

וְהִנֵה בָא, זִנֵּק אֶנְגִּידוּ, נָטָה הַצִּדָּה,

וּבִקְצֵה זְנָבוֹ תְפָשָׂהוּ.

נָחַר שׁוֹר־הַפָּר וַיִּמָּלֵט מִיָּדָיו,

הִשְׂתָּעֵר עַל מָאתַיִם אִישׁ וַיַּכְרִיעֵם.


וּכְשֶׁזִּנֵּק בַּשְּׁלִישִׁית בְּנַחֲרוֹת־אֵימָה,

יָצָא אֶנְגִּידוּ לִקְרָאתוֹ וַיֵּט הַצִּדָּה,

תְּפָשׂוֹ בַעֲבִי־זְנָבוֹ בְּכֹחַ,

גִּלְגָּמֶשׁ הֵבִיא חַרְבוֹ בְּלִבּוֹ,

נָחַר שׁוֹר־הַפָּר וַיִּפֹּל שָׁדוּד.


פָּתַח אֶנְגִּידוּ אֶת־פִּיהוּ וַיְדַבֵּר,

וַיֹּאמֶר לְגִלְגָּמֶשׁ:

"אֲבָל שֵׁם לָנוּ וּתְהִלָּה בָאָרֶץ,

כִּי אֶת שׁוֹר־הַשָּׁמַיִם הִכִּינוּ!"


וְגִלְגָּמֶשׁ אִישׁ־שָׂדֶה יוֹדֵעַ צֵיד־רְאֵמִים,

הִפְרִיד אֶת רֹאשׁ הַחַיָּה הָאַדִּירָה,

בֵּין הַמַּפְרֶקֶת וּבֵין הַקַּרְנַיִם הֱסִירוֹ.

וַיְהִי כְּהַכּוֹתָם אֶת שׁוֹר־הַשָּׁמָיִם

וַיִּשְׁקֹט לִבָּם.

וַיִּקֹּדּוּ לִפְנֵי שַׁמַשׁ, אֱלֹהֵי־הַחֶרֶס,

וַיָּקוּמוּ וַיֵּלְכוּ.

וַיָּנוּחוּ אֶל־מוּל פְּנֵי חוֹמַת־הָעִיר

הָאַחִים הַשְּׁנָיִם.


וְעִשְׁתָּר עָלְתָה עַל הַחוֹמָה אֲשֶׁר לְאוּרוּךְּ,

אֶל פִּנַּת הַחוֹמָה זִנְּקָה וַתִּפְתַּח בִּקְלָלָה:


"אוֹי לְךָ, גִּלְגָּמֶשׁ, אוֹי עַל־אַחַת שֶׁבַע!

מָוֶת עָלֶיךָ וַאֲבַדּוֹן!

כִּי שַׁבְתָּ חָטָאתָ לְפָנַי וְגַם הִכִּיתָ אֶת שׁוֹר־הַשָּׁמָיִם!"

שָׁמַע אֶנְגִּידוּ אֶת דִּבְרֵי עִשְׁתָּר בְּדַבְּרָהּ,

וַיִּקְרַע מֵעַל שׁוֹר־הַשָּׁמַיִם כֶּרַע־יְמִינוֹ,

וַיַּשְׁלִיכֶנּוּ בְּפָנֶיהָ:

"לוּ הִגַּעְתִּיךְ וְעָשִׂיתִי לָךְ כַּאֲשֶׁר עָשִׂיתִי לוֹ,

וְתָלִיתִי עָלַיִךְ כָּל בְּנֵי־מֵעָיו!"


וַתַּזְעֵק עִשְׁתָּר אֶת הַנְּעָרוֹת אֲשֶׁר בַּהֵיכָל,

אֶת כָּל הַנָּשִׁים וְאֶת כָּל הַקְּדֵשׁוֹת,

וַתִּקְרָא לְמִסְפֵּד,

וַתִּתְאַבֵּלְנָה לְכֶרַע יְמִין שׁוֹר־הַשָּׁמַיִם שֶׁנִּקְרָעָה.


וַיִּקְרָא גִלְגָּמֶשׁ לָאֻמָּנִים וְלֶחָרָשִׁים.

תָּמְהוּ הֶחָרָשִׁים לַקַּרְנַים הַגְּדוֹלוֹת.

וַיְהִי מִשְׁקַל הַקֶּרֶן הָאַחַת שְׁלֹשִׁים סֶלַע,

שְׁלֹשִׁים סֶלַע בְּאֶבֶן־הַסַּפִּיר.

שְׁתֵּי אֶצְבָּעוֹת עֲבִי קֶרֶן וְקֶרֶן.

שִׁשָּׁה כֹרִים שֶׁמֶן־מִשְׁחָה, כְּמַתְכֹּנֶת הַקַּרְנַיִם,

נָדַב גִּלְגָּמֶשׁ לֵאלֹהָיו אוּגַלְבַּנְדָּה,

וַיִּתֵּן אֶת הַקַּרְנַיִם בְּהֵיכַל אֱלֹהָיו מָגִנּוֹ,

וַיְשִׂימֵן אֶל כִּסֵּא הַשַּׁלִּיט הָאַדִּיר.


וַיִּרְחֲצוּ אֶת יְדֵיהֶם בִּנְהַר־פְּרָת.

וַיָּשִׂימוּ לְדֶרֶךְ פַּעֲמֵיהֶם וַיֵּלְכוּ

וַיִּסְעוּ בַּדֶּרֶךְ הָעוֹלָה אוּרוּכָּה.


וְכָל אַנְשֵׁי אוּרוּךְּ נִקְבְּצוּ יַחַד,

אֲלֵיהֶם יִתְבּוֹנְנוּ, לָהֶם יִתְמָהוּ.

וַיֹּאמֶר גִּלְגָּמֶשׁ לַשִּׁדּוֹת, נְשֵׁי־הֵיכָלוֹ:


"מִי הַיָּפֶה בְכָל הַגְּבָרִים?

מִי הָאַדִּיר בַּגִּבּוֹרִים?"

"– גִּלְגָּמֶשׁ – הַיָּפֶה בַגְּבָרִים!

אֶנְגִּידוּ – הָאַדִּיר בַּגִּבּוֹרִים!"


וַיִּיטַב לֵב גִּלְגָּמֶשׁ וַיַּעַשׂ מִשְׁתֵּה־שְׂמָחוֹת,

קוֹל־חָלִיל וְקוֹל־זִמְרָה הֵרִיעוּ בָאוּלָם.


וְכָל הָאֲנָשִׁים נָחִים סְרוּחִים עַל יְצוּעֵיהֶם לָיְלָה.

נָח אֶנְגִּידוּ וַיַּחֲלֹם חֲלוֹמוֹת,

קָם אֶנְגִּידוּ וַיְסַפֵּר אֶת חֲלוֹמוֹ

וַיַּעַן לְגִלְגָּמֶשׁ:


 

לוּחַ שְׁבִיעִי    🔗

"לָמָּה נוֹעֲצוּ אֱלֹהִים אַדִּירִים?

לָמָּה חָרְשׁוּ עָלַי אֲבַדּוֹן, רֵעִי?

אָיֹם הַחֲלוֹם אֲשֶׁר חָלַמְתִּי.

נֶשֶׁר תְּפָשַׂנִי בְצִפָּרְנֵי־בַרְזִלּוֹ,

עָלָה אִתִּי, הִגְבִּיהַּ אַרְבַּע שָׁעוֹת.

אָמַר אֵלָי: "הַעֲמֵק הַבֵּט לָאָרֶץ,

מַה הִיא וּמַה־מַּרְאֶהָ?

רְאֵה אֶת הַיָּם, מַה־גָּדְלוֹ?"


"וַתְּהִי הָאָרֶץ כָּהָר, וְהַיָּם כְּאַמַּת־הַמָּיִם.

וַיּוֹסֶף וַיַּמְרֵא עוֹד אַרְבַּע שָׁעוֹת.

וַיֹּאמֶר אֵלָי: 'הַעֲמֵק הַבֵּט לָאָרֶץ,

מַה הִיא וּמַה־מַּרְאֶהָ? רְאֵה אֶת הַיָּם, מַה־גָּדְלוֹ?'


"וַתְּהִי הָאָרֶץ כְּגָן, וְהַיָּם כִּתְעָלָה לְגַנָּן.

וְעוֹד אַרְבַּע שָׁעוֹת הִתְרוֹמֵם וַיֹּאמַר:

'הַעֲמֵק הַבֵּט לָאָרֶץ, מַה־מַּרְאֶהָ?

רְאֵה אֶת הַיָּם, מַה־גָּדְלוֹ?'


"וַתְּהִי הָאָרֶץ כְּעוּגַת־קֶמַח, וְהַיָּם כַּעֲרֵבַת־הַמָּיִם.

עוֹד שְׁתֵּי שָׁעוֹת נְשָׂאַנִי עָל – וַיַּפִּילֵנִי.

וָאֶפֹּל וָאֶשְׁכַּב רָצוּץ עַל הָאָרֶץ.

הוּא הַחֲלוֹם. בְּפַחְדִּי חַם לִי וָאִיקָץ."


שָׁמַע גִּלְגָּמֶשׁ אֶת דִּבְרֵי אֵנְגִּידוּ

וַתִּקְדַּרְנָה עֵינָיו.

נָשָׂא קוֹלוֹ וַיֹּאמֶר לִידִידוֹ לְאֶנְגִּידוּ:


"רוּחַ רָעָה תְּפָשָׂתְךָ בְּצִפָּרְנֶיהָ:

אוֹיָה, כִּי רָעָה חָרְצוּ הָאֵלִים הַגְּדוֹלִים!

שְׁכַב עַל יְצוּעֲךָ, כִּי מִצְחֲךָ חָם."


וַיִּשְׁכַּב אֶנְגִּידוּ עַל יָצוּעַ וַיְבַעֲתֵהוּ שָׂטָן,

רוּחַ־קַדַּחַת רָעָה תָקְפָה אֶת רֹאשׁוֹ,

דִּבֵּר אֶל הַדֶּלֶת כְּדַבֵּר אֶל נֶפֶשׁ חַיָּה:


"דֶּלֶת הַחֹרְשָׁה, שַׁעַר הַר־הָאֲרָזִים!

לִבֵּךְ צָפוּן מִשֵּׂכֶל.

אַרְבָּעִים שָעָה רַצְתִּי לִקְרָאתֵךְ

עַד שֶׁבָּחַרְתִּי בְעֵצֵךְ, רָאִיתִי אֲרָזַיִךְ,

עֵץ טָהוֹר עֵצֵךְ.

שִׁשָּׁה גָרִים3 קוֹמָתֵךְ וּשְׁנַיִם גָּרִים רָחְבֵּךְ,

שָׁתוֹתַיִךְ, הַמַּשְׁקוֹף וְהָעֲלִיָּה.

נָסִיךְ מִנִּי־נִיפּוּר עָשָׂךְ וַיְכוֹנְנֵךְ,

הֵן לוּ יָדַעְתִּי, כִּי אַתְּ לְהַוָּתִי,

יָפְיֵךְ לְאָבְדָנִי,

כִּי־עַתָּה הֲנִיפוֹתִי עָלַיִךְ גַּרְזִנִּי

וְהָיִיתִי מְנַפֵּץ אוֹתָךְ לִרְסִיסִים,

סֻכַּת־נְצָרִים הָיִיתִי עוֹשֶׂה לִי."


וַיִּשָּׂא קוֹלוֹ גִלְגָּמֶשׁ וַיְקוֹנֵן:

"יְדִידִי, אֲשֶׁר הָלַךְ אִתִּי מִדְבָּרִיּוֹת וְהָרִים,

יְדִידִי, אֲשֶׁר חֵרֵף נַפְשׁוֹ אִתִּי,

יְדִידִי, הַחֲלוֹם מִתְקַיֵּם וְאֵין לְשַׁנּוֹת אֶת הַגְּזֵרָה.

בְּיוֹם חֲלֹם אֶנְגִידוּ אֶת הַחֲלוֹם גַּם־נִמְלָא."


וְאֶנְגִּידוּ שׁוֹכֵב חוֹלֶה יוֹם אֶחָד, יוֹם שֵׁנִי;

עַל יְצוּעַ־מַרְבַדִּים יִשְׁכַּב אֶנְגִּידוּ;

שִׁגְיוֹן קַדַּחַת רָעָה תְקָפָהוּ.

וַיִּשְׁכַּב יוֹם שְׁלִישִׁי, יוֹם רְבִיעִי, יוֹם חֲמִישִׁי, יוֹם שִׁשִּׁי,

יוֹם שְׁבִיעִי, יוֹם שְׁמִינִי, יוֹם תְּשִׁיעִי, יוֹם עֲשִׂירִי,

וּכְאֵבוֹ הוֹלֵךְ וְגָדֵל.

יוֹם אַחַד־עָשָׂר, יוֹם שְׁנֵים־עָשָׂר עַל מִשְׁכָּבוֹ נֶאֱנַק,

קָרָא לְגִלְגָּמֶשׁ וַיֹּאמַר:


"אֲדוֹנֵי מֵי־הַחַיִּים אָרוֹר אֵרְרָנִי,

כְּקַלֵּל אִישׁ אֶת שׂוֹטְנוֹ בַמִּלְחָמָה.

פָּחַד לִבִּי בַקְרָב, לָכֵן אָמוּת בְּאִי־כָבוֹד.

יְדִידִי, אַשְׁרֵי הַנּוֹפֵל חָלָל בַּקְרָב –

וַאֲנִי עַל עֶרֶשׂ אֶגְוָע."


 

לוּחַ שְׁמִינִי    🔗

וַיְהִי אַךְ הֵאִיר הַשַּׁחַר

וַיָּקָם גִּלְגָּמֶשׁ וַיִּגַּשׁ אֶל מִשְׁכַּב יְדִידוֹ.

וְאֶנְגִּידוּ שׁוֹכֵב, לֹא־יָנוּעַ.

לְאַט הִתְרוֹמֵם חָזֵהוּ, וְשָׁב וְשָׁקַט,

לְאִטּוֹ עָלָה רוּחַ מֵאַפָּיו,

וַיֵּבְךְּ גִּלְגָּמֶשׁ וַיֹּאמַר:


"אֶנְגִּידוּ, אָנָה בָא כֹּחֲךָ וְאֵי קוֹלֶךָ?

אַיֵּה אֶנְגִּידוּ יְדִיד־נַפְשִׁי?

עָצַמְתָּ כָּאֲרִי וְכָרְאֵם, קַלֹּתָ כָּאַיָּלָה.

אַהֲבַת־אָח אֲהַבְתִּיךָ.

וָאַגְדְּלָה אוֹתְךָ מִכָּל הַנְּסִיכִים, אוֹתְךָ אֶנְגִּידוּ.

כָּל הַיָּפוֹת אֲשֶׁר בְּאוּרוּךְּ אֲהֵבוּךָ, אוֹתְךָ אֶנְגִּידוּ.

אֶל יַעַר־הָאֲרָזִים הָלַכְתִּי אִתְּךָ,

יוֹמָם וָלַיְלָה הָיִיתָ אִתִּי,

אִתִּי יַחְדָּו הֵבֵאתָ אֶת רֹאשׁ חֻמְבַּבָּה

אֶל אוּרוּךְּ הָעִיר, אֲשֶׁר סָבִיב חוֹמוֹת לָהּ.

עַל־כֵּן יְבָרְכוּנוּ יוֹשְבֵי־הָהָר כָּל־הַיָּמִים,

אֲשֶׁר הֵצִיקָה לָמוֹ הַמִּפְלֶצֶת,

כִּי הִכִּינוּ אֶת שׁוֹר־הַשָּׁמַיִם הַזּוֹעֵם.

הֶהָיְתָה בְךָ לְרָעָה רוּחַ־אַפּוֹ בְנַחֲרָתוֹ,

רוּחַ־אַפּוֹ, אֲשֶׁר רַעַל בָּהּ?

אֵין־זֹאת כִּי לֹא רָצוּ הָאֵלִים הַגְּדוֹלִים אֲשֶׁר חָרָה אַפֵּנוּ בְעִשְׁתָּר

וַנַּךְ אֶת הַשּׁוֹר הַשַּׁלוּחַ מִן הַשָּׁמָיִם."


וַיֵּשֶׁב שָׁעָה עַל יְצוּעַ יְדִידוֹ

וַיְהִי מַשְׁקִיף נִכְחוֹ:

שׁוּב הִבִּיט גִּלְגָּמֶשׁ אֶל אֶנְגִּידוּ,

וְאֶנְגִּידוּ שׁוֹכֵב לֹא־יָנוּעַ וְיָשֵׁן.


"אֶנְגִּידוּ אֲהוּבִי וִידִיד־נְעוּרָי!

הִנֵּה יִשְׁכַּב נְמַר־הָעֲרָבוֹת,

אֲשֶׁר גָּבַר עַל הַכֹּל.

עָלִינוּ בְהַר־הָאֱלֹהִים, תָּפַשְׂנוּ אֶת שׁוֹר־הַשָּׁמַיִם וַנַּכֶּנּוּ

אֶת חֻמְבַּבָּה שׁוֹכְנִי־הָאֲרָזִים מִגַּרְנוּ.

מָה הַתַּרְדֵמָה הָעֲמֻקָּה אֲשֶׁר תְּקָפָתְךָ?

קָדַרְתָּ מְאֹד, אֵינְךָ מוֹסִיף לִשְׁמוֹעַ."


אוּלָם הַלָּז אֵינֶנּוּ פוֹתֵחַ אֶת עֵינָיו.

גִּלְגָּמֶשׁ נָגַע אֶל לִבּוֹ וְהוּא לֹא הָלַם.

וַיְכַס עַל רֵעוֹ כְּכַסּוֹת אֶת הַכַּלָּה.

וַיֶּאֱנַק מָרָה, כַּאֲשֶׁר יִנְהֹם הָאֲרִי,

שָׁאַג כַּלְּבִיאָה אֲשֶׁר פָּצְעָה אוֹתָהּ חֲנִית,

מָרַט שַׂעֲרוֹת־רֹאשׁוֹ וַיִּזְרֵן לְכָל רוּחַ,

קָרַע שִׂמְלוֹתָיו וַיִּלְבַּשׁ אֲבֵלִים מְאֻבָּקִים.


וַיְהִי אַךְ הֵאִיר הַשַּׁחַר לְמָחֳרַת־הַיּוֹם,

וַיָּעַר גִּלְגָּמֶשׁ קִינָה חֲדָשָׁה,

שִׁשָּׁה יָמִים וְשִׁשָּׁה לֵילוֹת בָּכָה לְאֶנְגִּידוּ לִידִידוֹ,

עַד שֶׁעָלָה הַשַּׁחַר בַּשְּבִיעִי לֹא קְבָרָהוּ.

וַיִּקְבֹּר גִּלְגָּמֶשׁ אֶת יְדִידוֹ בַּיּוֹם הַשְּׁבִיעִי,

וַיֵּצֵא אֶת הָעִיר אוּרוּךְּ וַיְמַהֵר אֶל הָעֲרָבָה.


פָּגָע בּוֹ צַיָּד כּוֹרֶה שׁוּחוֹת לָאֲרָיוֹת,

וַיְדַבֵּר הַצַּיָּד אֶל הַמֶּלֶךְ וַיֹּאמֶר אֶל גִּלְגָּמֶשׁ:


"שַׁלִּיט עֶלְיוֹן, אַתָּה הִכִּיתָ אֶת נוֹטֵר יַעַר־הָאֲרָזִים הַזּוֹעֵם

וְגַם אֶת חֻמְבַּבָּה הָרוֹדֶה בְהַר־הָאֲרָזִים מִגַּרְתָּ,

בִּזְרוֹעֲךָ הָרַגְתָּ אֶת הָאֲרָיוֹת בֶּהָרִים,

אֶת הַשּׁוֹר הָאַדִּיר אֲשֶׁר שְׁלָחוֹ אֶל־הַשָּׁמַיִם מוֹתַתְתָּ;

לָמָּה שֻׁפּוּ לְחָיֶיךָ, חָוְרוּ, לָמָּה נָפְלוּ פָנֶיךָ?

לָמָּה תֶאֱבַל נַפְשְׁךָ וְקוֹמָתְךָ כְּפוּפָה?

לָמָּה קִנְּנָה קִינָה בְלִבְּךָ, דָּמִיתָ לְעוֹבֵר דֶּרֶךְ רְחוֹקָה?

לָמָּה פָנֶיךָ שְׁזוּפִים מֵרוּחַ, מִשְּׂעִירִים וְשֶׁמֶשׁ־צָהֳרָיִם?

לָמָּה תָנוּעַ עַל־פְּנֵי הַשָּׂדֶה?"


וַיִּפְתַּח גִּלְגָּמֶשׁ אֶת־פִּיהוּ וַיְדַבֵּר וַיַּעַן לוֹ:

"יְדִידִי הַדָּבֵק בִּי כְּסוּס־מִלְחָמָה,

יְדִידִי אֶנְגִּידוּ, נְמַר־הָעֲרָבוֹת,

אֲשֶׁר גָּבַר עַל הַכֹּל

וְיַחְדָּו עָלִינוּ בְהַר־הָאֱלֹהִים,

תָּפַשְׂנוּ אֶת שׁוֹר־הַשָּׁמַיִם וַנַּכֶּנּוּ,

אֶת חֻמְבַּבָּה הִכִּינוּ בְהַר־הָאֲרָזִים,

בְּחַגְוֵי־הָרִים הִכִּינוּ אֲרָיוֹת,

יְדִידִי,אֲשֶׁר חֵרֵף אִתִּי יַחְדָּו אֶת־נַפְשׁוֹ,

פְּקֻדַּת כָּל־הָאָדָם עָלָיו בָּאָה.

שִׁשָּׁה יָמִים וְשִׁשָּׁה לֵילוֹת בָּכִיתִי לוֹ,

וּבַיּוֹם הַשְּׁבִיעִי קְבַרְתִּיו מִלְּפָנָי.

עַל־דְּבַר יְדִידִי חָרָה לִי מְאֹד,

לָכֵן אָחוּשָׁה בָעֲרָבָה, אַרְחִיקָה נְדוֹד.

אֵיכָה־זֶה אַחֲרִישׁ עַל יְגוֹנִי?

אֵיכָה־זֶה אָשִׂיחַ יְגוֹנִי?

יְדִידִי, אֲשֶׁר אָהַבְתִּי, הָיָה לְאֵפֶר,

אֶנְגִּידוּ עֲמִיתִי נִמְשַׁל לְעָפָר מִן־הָאֲדָמָה.

הַאֻמְנָם גַּם־אֲנִי אַרְגִּיעַ כָּמוֹהוּ

וְלֹא אוֹסִיף לָקוּם לְעוֹלְמֵי־עַד?"


 

לוּחַ תְּשִׁיעִי    🔗

לִידִידוֹ לְאֶנְגִּידוּ מַר יִבְכֶּה גִּלְגָּמֶשׁ,

עַל־פְּנֵי הָעֲרָבָה יָנוּעַ.

"הַכְמוֹת אֶנְגִּידוּ אָמוּת גַּם־אָנִי?

הָמוּ מֵעַי, הָמוּ,

מָוֶת אִירָא, עַל־כֵּן אֲמַהֵר בָּעֲרָבָה,

אֶל אוּת־נַפִּשְׁתִּים בֶּן אוּבָּרָה־תּוּתוּ

אָשִׂים פָּנַי, אָחִישָׁה פְעָמָי.

עַד שֶׁבָּאתִי אֶל נְקִיקֵי הֶהָרִים לַיְלָה

רָאִיתִי אֲרָיוֹת וַיָּפָג לְבָבִי,

אֶשָּׂא רֹאשִׁי אֶל־עָל, לְסִין אַעְתִּירָה,

אֶל עִשְׁתָּר, גְּבֶרֶת עִיר־הַחַיִּים, אֶתְחַנָּן,

אֶל הָאַדִּירָה בָּאֵלִים אֶשְׁפֹּך שִׂיחִי:

אָנָּא שִׁמְרִי־נָא לִי חַיַּי גַּם־הַפָּעַם!"


וְהוּא יָגֵעַ וַיִּשְׁכַּב וַיַּחֲלֹם חֲלוֹם

וְהִנֵּה גוּר־אַרְיֵה מִשְׁתַּעֲשֵׁעַ בְּגִילוֹ עַל חַיִּים,

וַיָּנֶף אֶת־גַּרְזִנּוֹ אֲשֶׁר לְצִדּוֹ,

שָׁלַף חַרְבּוֹ אֲשֶׁר עַל חֲגוֹרָתוֹ.

וְהִנֵּה שֶׁן־סֶלַע חַדָּה בֵינֵיהֶם, טָסָה כַּחֲנִית,

וַתִּבָּקַע הָאָרֶץ תַּחְתֶּנּוּ,

וַיִּפֹּל וַיִּבְלָעֵהוּ הַנָּקִיק הַפָּתוּחַ.

וַיִּבָּהֵל וַיָּקָם וַיֵּלֶךְ הָלְאָה.


וַיְהִי כַּעֲלוֹת הַשַּׁחַר בְּיוֹם־הַמָּחֳרָת

וַיִּשָּׂא אֶת־עֵינָיו וַיַּרְא הַר גָּבֹהַּ,

הֵמָּה הָרֵי מַשׁוּ,

וַיָּבֹא עַד הֶהָרִים וַעֲלֵיהֶם רְקִיעַ־הַשָּׁמָיִם;

שַׁעֲרֵי־הַחֶרֶס בֵּינֵיהֶם,

אֲשֶׁר שָׁם מִזְרַח הַשֶּׁמֶש וּמְבוֹאוֹ,

שְׁנֵי עֲנָקִים שׁוֹמְרִים אֶת פֶּתַח־הָהָר לַשָּׁמָיִם,

מֵחָזָם וָמַעְלָה עַל־אֲדָמוֹת וְגוּפָם נָגַע שְׁאוֹל־תַּחְתִּית.

עַקְרַבֵּי־אָדָם הַשּׁוֹמְרִים אֶת הַשְּׁעָרִים.

נוֹרָא מַרְאֵיהֶם וְאָיֹם וּמָוֶת בְּמַבַּט־עֵינֵיהֶם,

בְּרַק־זַעֲוָתָם יְטַלְטֵל הָרִים בִּקְעָתָה.

אֶת מִזְרַח הַשֶּׁמֶשׁ וּמְבוֹאוֹ יִנְצֹרוּ.


רָאָה אוֹתָם גִּלְגָּמֶשׁ וַיָּמָת לִבּוֹ,

פָּנָיו קָדְרוּ מֵאֵימָה וָפָחַד,

אִמֵּץ רוּחוֹ וַיַּרְכֵּן רֹאשׁוֹ לִפְנֵיהֶם.

אָז יִקְרָא עַקְרַב־הָאָדָם לָאִשָּׁה:


“הִנֵּה הָאָדָם, הַבָּא אֵלֵינוּ, בְּשַׂר־אֵלִים בְּשָׂרוֹ!”

עָנְתָה אֶת עַקְרַב־הָאָדָם שֵׁגָלוֹ:

“שְׁתֵּי שְׁלִישִׁיּוֹת בּוֹ אֵל, שְׁלִישִׁית אַחַת בּוֹ אָדָם!”

קָרָא עַקְרַב־הָאָדָם אֶל גִּלְגָּמֶשׁ,

אֶל יְדִיד־הָאֱלֹהִים, וַיְדַבֵּר:


"דֶּרֶךְ רְחוֹקָה עָשִׂיתָ, גּוֹלֶה יָקָר!

הִנֵּה בָאתָ, הִגַּעְתָּ עָדָי,

עָלִיתָ הָרִים אֲשֶׁר קָשֶׁה לַעֲבֹר בָּם,

הִנֵּה פֹה תַכְלִית נְדוּדֶיךָ;

מַטְּרַת נְסִיעָתְךָ לָדַעַת חָפָצְתִּי."


עָנָה גִלְגָּמֶשׁ אֶת עַקְרַב־הָאָדָם

וַיְדַבֵּר לַגֶּבֶר וַיֹּאמַר:

"לִבִּי לְאֶנְגִּידוּ יְדִידִי, לִנְמַר־הָעֲרָבוֹת!

פְּקֻדַּת כָּל־הָאָדָם בָּאָה עָלָיו.

אֶת־הַמָּוֶת אֲנִי יָרֵא וְהִנְנִי נוֹדֵד בָּעֲרָבָה.

לִדְבַר רֵעִי חָרָה לִי מְאֹד.

הָיָה לְאָבָק יְדִידִי אֲשֶׁר אָהַבְתִּי,

אֶנְגִּידוּ חֲבֵרִי הָיָה עָפָר מִן־הָאֲדָמָה.

כִּי עַל־כֵּן אָנוּדָה בָאֲרָצוֹת,

עָלִיתִי עַל הֶהָרִים וָאָבֹא עַד־הֲלוֹם.

אָמַרְתִּי אֶל אוּת־נַפִּשְׁתִּים אֲבִי־אֲבִי אָבֹאָה,

וְהוּא בָא בְסוֹד הָאֵלִים וּמָצָא חַיֵּי־עוֹלָם,

אֶדְרְשֵׁהוּ לַחַיִּים וְלַמָּוֶת."


וַיִּפְתַּח עַקְרַב־הָאָדָם אֶת־פִּיהוּ

וַיְדַבֵּר לְגִלְגָּמֶשׁ לֵאמֹר:

"גִּלְגָּמֶשׁ, מֵעוֹלָם לֹא דָרַךְ פֹּה אֱנוֹשׁ,

אִישׁ לֹא מָצָא נְתִיבָה בֶהָרִים הָאֵלֶּה.

דֶּרֶךְ שְׁתֵּים־עֶשְׂרֵה שָׁעָה־מִשְׁנֶה

לִנְקִיק־הֶהָרִים הָעוֹלֶה בֵינֵיהֶם.

גְּדוֹלָה הָעֲלָטָה וְאֵין קֶרֶן־שֶׁמֶשׁ,

אֲשֶׁר תַּחְדֹּר מִן הַדֶּרֶךְ הַתְּלוּלָה,

בָּהּ תַּעַל הַחַמָּה כִּי־תִּזְרַח עַל־פְּנֵי אֲרָצוֹת,

בָּהּ תֵּרֵד בְּבוֹאָהּ מִדֵּי שׁוּבָהּ

מִמַּסָּעָה בְּאוֹקְיָנוֹס־הַשָּׁמַיִם לָיְלָה.

וּמֵעֵבֶר הֶהָרִים שָׁם הַיָּם

הַחוֹבֵק כָּל־מְדִינוֹת הָאֲדָמָה.

לֹא תוּכַל לָלֶכֶת בְּדֶרֶךְ־הַשֶּׁמֶשׁ,

כִּי עוֹלָה הִיא אֶל הָאֵלִים הָאוֹרִים!

לֹא חָדַר מֵעוֹלָם בָּהּ אָדָם,

דֶּרֶךְ חֲגַו־הַצַּלְמָוֶת.


מֵעֵבֶר שַׁעֲרֵי־הַשֶּׁמֶשׁ יִנְוֶה אֲבִי־אָבִיךָ

הַרְחֵק עַל תּוֹצְאוֹת הַנְּהָרוֹת.

מִשְׁכַּן אוּת־נַפִּשְׁתִּים מֵעֵבֶר מֵימֵי־הַמָּוֶת,

אֵין סְפִינָה לַהֲבִיאֲךָ שָׁמָּה."


שָׁמַע גִּלְגָּמֶשׁ אֶת דִּבְרֵי הָעֲנָק וַיֹּאמַר:

"דֶּרֶךְ־יְגוֹנִים דַּרְכִּי אֲשֶר עָשִׂיתִי,

צַעַר וּמַכְאוֹבוֹת נוֹרָאִים מֻנּוּ לִי.

אִם קִינָה וְאֵבֶל מְנָת־חֶבְלִי,

תְּנָה לִי וְאָבֹא אֶל־בֵּין הֶהָרִים

וְאֶרְאֶה אֶת אוּת־נַפִּשְׁתִּים, אֶת אֲבִי־אָבִי,

וְאֶשְׁאֲלָה עַל הַחַיִּים אֲשֶׁר מָצָא.

אָנָּא אֶעְבְּרָה וְאֶמְצָא חַיִּים גַּם־אָנִי."


וַיִּפְתַּח עַקְרַב־הָאָדָם אֶת־פִּיהוּ

וַיַּעַן אֶת גִּלְגָּמֶשׁ וַיֹּאמַר:

"עָצַם לִבְּךָ, גִּלְגָּמֶשׁ, וְכֹחַ־אַדִּירִים כֹּחֶךָ!

לֶךְ־לְךָ, גִּלְגָּמֶשׁ, הַרְהֵב עֹז לִמְצֹא אֶת הַדֶּרֶךְ,

וְאִם הַרְרֵי־מַשׁוּ הֵם הַגְּבוֹהִים בְּהַרְרֵי־אֲדָמוֹת,

וְאִם הַסְּלָעִים אֲשֶׁר בְּקֶרֶב הֶהָרִים

חַגְוֵי־זְוָעוֹת הֵמָּה, בָּם יָלִין צַלְמָוֶת.

בֹּא בְשָׁלוֹם עַד קְצֵה גְבוּל הַמִּשְׁעוֹל הַתָּלוּל

וְנִפְתְּחוּ לְפָנֶיךָ שַׁעֲרֵי־הַשֶּׁמֶשׁ,

אֲשֶׁר אֲנַחְנוּ שׁוֹמְרִים אוֹתָם."


שָׁמַע גִּלְגָּמֶשׁ וַיָּשֶׂם לַדֶּרֶךְ פְּעָמָיו.

כַּאֲשֶׁר אָמַר הָעֲנָק כֵּן עָשָׂה.

בְּדֶרֶךְ־הַשֶּׁמֶשׁ הָלַךְ גִּלְגָּמֶשׁ.


מִקֵּץ שָׁעָה־מִשְׁנֶה הִגִּיעַ עַד הֶחָגָו,

וְהָעֲלָטָה גְדוֹלָה וְאֵין כָּל־קַו־אוֹר,

אֵין לִרְאוֹת כָּל־מְאוּמָה מִפָּנִים וּמֵאָחוֹר.


שְׁתֵּי שָׁעוֹת־מִשְׁנֶה עָשָׂה בְדַרְכּוֹ.

וְהָעֲלָטָה גְדוֹלָה, אֵין כָּל־קַו־אוֹר,

אֵין לִרְאוֹת כָּל־מְאוּמָה מִפָּנִים וּמֵאָחוֹר.


שָׁלֹשׁ שָׁעוֹת־מִשְׁנֶה עָשָׂה בְדַרְכּוֹ.

הָעֲלָטָה גְדוֹלָה, וְאֵין כָּל־קַו־אוֹר,

אֵין לִרְאוֹת כָּל־מְאוּמָה מִפָּנִים וּמֵאָחוֹר.


אַרְבַּע שָׁעוֹת־מִשְׁנֶה עָשָׂה בְדַרְכּוֹ.

הָעֲלָטָה גְדוֹלָה, אֵין כָּל־קַו־אוֹר,

אֵין לִרְאוֹת כָּל־מְאוּמָה מִפָּנִים וּמֵאָחוֹר.


חָמֵשׁ שָׁעוֹת־מִשְׁנֶה עָשָׂה בְדַרְכּוֹ.

הָעֲלָטָה גְדוֹלָה, אֵין כָּל־קַו־אוֹר,

אֵין לִרְאוֹת כָּל־מְאוּמָה מִפָּנִים וּמֵאָחוֹר.


שֵׁש שָׁעוֹת־מִשְׁנֶה עָשָׂה בְדַרְכּוֹ.

הָעֲלָטָה גְדוֹלָה, אֵין כָּל־קַו־אוֹר,

אֵין לִרְאוֹת כָּל־מְאוּמָה מִפָּנִים וּמֵאָחוֹר.


שֶׁבַע שָׁעוֹת־מִשְׁנֶה עָשָׂה בְדַרְכּוֹ.

הָעֲלָטָה גְדוֹלָה, אֵין כָּל־קַו־אוֹר,

אֵין לִרְאוֹת כָּל־מְאוּמָה מִפָּנִים וּמֵאָחוֹר.


שְׁמוֹנֶה שָׁעוֹת־מִשְׁנֶה עָשָׂה אֶת־דַּרְכּוֹ.

הָעֲלָטָה גְדוֹלָה, אֵין כָּל־קַו־אוֹר,

אֵין לִרְאוֹת כָּל־מְאוּמָה מִפָּנִים וּמֵאָחוֹר.


תֵּשַׁע שָׁעוֹת־מִשְׁנֶה עָשָׂה בְדַרְכּוֹ.

פִּתְאֹם הִרְגִּישׁ רוּחַ־צָפוֹן בְּנָשְׁבָהּ;

וְגֵווֹ כָפוּף וּפָנָיו קוֹדְרִים.

הָעֲלָטָה גְדוֹלָה וְאֵין כָּל־קַו־אוֹר.


עֶשֶׂר שָׁעוֹת־מִשְׁנֶה עָשָׂה בְדַרְכּוֹ,

הָעֲלָטָה רָפְתָה, קְצֵה־הֶחָגָו הוֹלֵךְ וְקָרֵב.


אַחַת־עֶשְׂרֵה שָׁעוֹת־מִשְׁנֶה עָשָׂה, וַיְהִי אוֹר.

וְגַן־הָאֱלֹהִים לְפָנָיו, וַיַּרְא וַיָּחָשׁ אֵלָיו.

זֶרַע פִּרְיוֹ אֹדֶם,

אַשְׁכֹּלוֹת גַּפְנוֹ תְּלוּיִים תַּאֲוָה לָעֵינָיִם,

עֵצִים אֲשֶׁר פִּרְיָם סַפִּירִים,

פִּרְיָם אֲשֶׁר יִתְּנוּ נֶחְמָד וְטוֹב לָעֵינָיִם.


וַיִּשָּׂא גִּלְגָּמֶשׁ אֶל שַׁמַשׁ אֶת־כַּפָּיו:

"קָשִׁים וַאֲרֻכִּים הָיוּ נְדוּדָי,

בְחַיּוֹת־הַמִּדְבָּר נִלְחַמְתִּי, כִּי נָטַל עָלָי,

הָיוּ עוֹרוֹתָן מִכְסֶה לִבְשָׂרִי,

בְּשַׂר־טְרֵפָתָן הָיָה מַאֲכָלִי,

שַׁעֲרֵי הֶהָרִים נִפְתְּחוּ לְפָנָי,

בְּחַגְוֵי־זְוָעוֹת עָשִׂיתִי דַרְכִּי;

וְהִנֵּה לְפָנַי גַּן־הָאֱלֹהִים

וְאַחֲרָיו זֶה הַיָּם רְחַב־הַיָּדָיִם.

הוֹדִיעֵנִי אֶת־הַדֶּרֶךְ אֶל אוּת־נַפִּשְׁתִּים,

אֶל אֲבִי־אָבִי, הַשּׁוֹכֵן־מֶרְחַקִּים,

הַרְאֵה לִי אֶת־הַחוֹבֵל

אֲשֶׁר יְבִיאֵנִי בְשָׁלוֹם בְּיַם־הָעוֹלָם,

בְּמֵימֵי הַמָּוֶת, וְאֶמְצָא אֶת חַיֵּי־הָעַד."


שָׁמַע שַׁמַשׁ אֶת־דְּבָרָיו וַיִּתְעַצֵּב אֶל־לִבּוֹ

וַיְדַבֵּר אֶל גִּלְגָּמֶשׁ לֵאמֹר:

"גִּלְגָּמֶשׁ, אָנָה יִשָּׂאֲךָ רוּחֶךָ?

לֹא תִמְצָא אֶת־הַחַיִּים, אֲשֶׁר אַתָּה מְבַקֵּשׁ!"


וַיַּעַן גִּלְגָּמֶשׁ אֶת שַׁמַשׁ הַגָּדוֹל:

"גַּלְמוּד בָּעֲרָבָה בְּעָנְיִי הִתְהַלָּכְתִּי!

כּוֹכָב אַחַר כּוֹכָב חָשָׁךְ.

כָּל־הַשָּׁנִים לַנְתִּי בִשְדֵה־יְלֵל־יְשִׁימוֹן,

לֹא הָיָה לִי שֶׁמֶשׁ, יָרֵחַ וְכָל־כּוֹכָב בְּמִשְׁעוֹל־הַצַּלְמָוֶת.

אָנָּא, תֶּחֱזֶינָה עֵינַי אֶת־פָּנֶיךָ, הַשֶּׁמֶשׁ,

תִּשְׂבַּע נַפְשִׁי אֶת אוֹרְךָ הַיָּפֶה!

פָּנְתָה הַמַּאְפֵּלְיָה, רָחֲקָה מֶנִּי,

לֹא הַמֵּתִים יִרְאוּ עֵין־שֶׁמֶשׁ,

וַאֲנִי דוֹרֵשׁ לַחַיִּים, לִמְצֹא חַיֵּי־עוֹלָם אֲנִי חָפֵץ."


וַיִּשְׁמַע שַׁמַשׁ אֶת־דְּבָרָיו וַיֹּאמֶר לְגִלְגָּמֶשׁ:

"לֵךְ אֶל סִידוּרִי־סַבִּיתוּ, הָאִשָּׁה הַחֲכָמָה אֲשֶׁר בְּהַר־הַשָּׁמָיִם,

הִנֵּה הִיא יוֹשֶׁבֶת עַל כִּסֵּא־מְלָכִים בְּגַן־הָאֱלֹהִים,

אֵצֶל הַיָּם, וְהִיא שׁוֹמֶרֶת אֶת עֵץ־הַחַיִּים.

שִׂים פְּעָמֶיךָ אֶל הַגַּן אֲשֶׁר לְפָנֶיךָ,

הִיא תוֹרְךָ אֶת הַדֶּרֶךְ אֶל אוּת־נַפִּשְׁתִּים

אֲבִי־אָבִיךָ, הַשּׁוֹכְנִי־מֶרְחַקִּים."


שָׁמַע גִּלְגָּמֶשׁ אֶת־דְּבָרָיו וַיָּשֶׂם לַדֶּרֶךְ פָּנָיו.

וְגַן־הָאֱלֹהִים הַנִּפְלָא לְפָנָיו,

יִשְׂגּוּ אֲרָזִים בַּהֲדַר־גְּאוֹנָם,

אַבְנֵי־חֵן מַבְרִיקוֹת עַל עֲצֵי־הַגָּן,

סְמָרַגְדִּים יְרֻקִּים מִשְׂתָּרְגִים כְּעֵשֶׂב־הַיָּם,

אֲבָנִים יְקָרוֹת מְצִיצוֹת כַּקּוֹץ וְכַדַּרְדַּר,

סַפִּירִים – זֶרַע כָּל־פֶּרִי.

וַיַּעְצֹר גִּלְגָּמֶשׁ בִּצְעָדָיו,

וַיִּשָּׂא אֶת־עֵינָיו אֶל גַּן־הָאֱלֹהִים.


 

לוּחַ עֲשִׂירִי    🔗

וְכִסֵּא סִידוּרִי־סַבִּיתוּ הָאֵלָה נִשָּׂא עַל שְׂפַת הַיָּם,

שָׁם הִיא יוֹשֶׁבֶת וְשׁוֹמֶרֶת אֶת מְבוֹא גַן־הָאֱלֹהִים,

אַבְנֵט עַל חֲלָצֶיהָ, חֲגוֹר עָשׂוּי לָהּ,

שִׂמְלָה אֲרֻכָּה עוֹטָה אֶת־בְּשָׂרָהּ.

וְגִלְגָּמֶשׁ רָץ הֵנָּה וָהֵנָּה, מְבַקֵּשׁ אֶת־הַפֶּתַח.

עוֹרוֹת חַיּוֹת־שָׂדֶה עוֹטִים אֶת־בְּשָׂרוֹ,

נוֹרָא מַרְאֵהוּ, תַּבְנִית־אֱלֹהִים תַּבְנִיתוֹ,

לִבּוֹ כוֹאֵב, דּוֹמֶה הוּא לְעוֹבֵר דְּרָכִים רְחוֹקוֹת.


סַבִּיתוּ מַשְׁקִיפָה לְמֵרָחוֹק

וַתֹּאמֶר אֶל לִבָּהּ וַתְּדַבֵּר דְּבָרֶיהָ,

עִם לִבָּה נוֹעֲצָה וַתֹּאמַר:


"הַאֻמְנָם אֶל גַּן־אֱלֹהִים יְבַקֵּשׁ הַלָּז דֶּרֶךְ?

לְאָן יֵלֵךְ, בְּצַעֲדוֹ יִסְעָר?"

וַיְהִי בִּרְאוֹתָהּ אוֹתוֹ סַבִּיתוּ וַתִּנְעַל הַשְּׁעָרִים,

סָגְרָה הַשְּׁעָרִים, הִבְרִיחָה הַבְּרִיחַ.

וַיַּחֲרֹץ גִּלְגָּמֶשׁ בְּלִבּוֹ לָבֹא בַשָּׁעַר.

הֵנִיף אֶת־זְרוֹעוֹ, גַּרְזִנּוֹ הִנִּיחַ עַל הַשָּׁעַר,

וַיֹּאמֶר גִּלְגָּמֶשׁ לָאֵלָה סַבִּיתוּ:


"סַבִּיתוּ, לָמָּה־זֶה נָעַלְתְּ אֶת־הַשְּׁעָרִים בְּפָנָי?

סָגַרְתְּ אֶת־הַשְּׁעָרִים וַתַּבְרִיחִי הַבְּרִיחַ.

הִנְנִי נוֹתֵץ אֶת־הַשַּׁעַר וַאֲגַדֵּעַ הַבְּרִיחַ!"


פָּתְחָה סַבִּיתוּ אֶת־הַשַּׁעַר וַתְּדַבֵּר בַּפֶּתַח:

"לָמָּה שֻׁפּוּ, חָוְרוּ לְחָיֶיךָ, לָמָּה נָפְלוּ פָנֶיךָ?

לָמָּה תֶאֱבַל נַפְשְׁךָ? קוֹמָתְךָ כְּפוּפָה?

לָמָּה קִנְּנָה קִינָה בְלִבְּךָ, דָּמִיתָ לְעוֹבֵר דֶּרֶךְ רְחוֹקָה?

לָמָּה פָנֶיךָ שְׁזוּפִים מֵרוּחַ, מִשְּׂעִירִים וְשֶׁמֶשׁ־צָהֳרָיִם?

לָמָּה תָנוּעַ עַל־פְּנֵי הַשָּׂדֶה?"


וַיִּפְתַּח גִּלְגָּמֶשׁ אֶת־פִּיהוּ וַיְדַבֵּר וַיַּעַן לָהּ:

"אֵיךְ לֹא תְשֻׁפֶּינָה, תֶּחֱוַרְנָה לְחָיַי, אֵיךְ לֹא יִפְּלוּ פָנָי?

אֵיךְ לֹא תֶאֱבַל נַפְשִׁי, לֹא תִכַּף קוֹמָתִי?

אֵיךְ לֹא תְקַנֵּן קִינָה בְלִבִּי, לֹא אֶדְמֶה לְעוֹבֵר דֶּרֶךְ רְחוֹקָה?

אֵיךְ לֹא יִהְיוּ פָנַי שְׁזוּפִים מֵרוּחַ, מִשְּׂעִירִים וְשֶׁמֶשׁ־צָהֳרָיִם?

אֵיכָה לֹא אָנוּעַ עַל־פְּנֵי הַשָּׂדֶה?

יְדִידִי אֶנְגִּידוּ, נְמַר־הָעֲרָבוֹת,

אֲשֶׁר גָּבַר עַל־הַכֹּל

וְיַחְדָּו עָלִינוּ בְהַר־הָאֱלֹהִים,

תָּפַשְׂנוּ אֶת שׁוֹר־הַשָּׁמַיִם וַנַּכֶּנּוּ,

אֶת־חֻמְבַּבָּה הִכִּינוּ בְהַר־הָאֲרָזִים,

בְּחַגְוֵי־הָרִים הִכִּינוּ אֲרָיוֹת,

יְדִידִי, אֲשֶׁר חֵרֵף אִתִּי יַחְדָּו אֶת־נַפְשׁוֹ,

פְּקֻדַּת כָּל־הָאָדָם עָלָיו בָּאָה.

שִׁשָּׁה יָמִים וְשִׁשָּׁה לֵילוֹת בָּכִיתִי לוֹ,

בַּיּוֹם הַשְּׁבִיעִי קְבַרְתִּיו מֵעַל־פָּנָי.

עַל־דְּבַר יְדִידִי חָרָה לִי מְאֹד,

לָכֵן אָחוּשָׁה בָעֲרָבָה, אַרְחִיקָה נְדוֹד.

אֵיכָה־זֶה אַחֲרִישׁ עַל יְגוֹנִי?

אֵיכָה אָשִׂיחַ יְגוֹנִי?

יְדִידִי, אֲשֶׁר אָהַבְתִּי, הָיָה לְאֵפֶר,

אֶנְגִּידוּ עֲמִיתִי נִמְשַׁל לְעָפָר מִן־הָאֲדָמָה.

הֲגַם אֲנִי אַרְגִּיעַ כָּמוֹהוּ

וְלֹא אוֹסִיף לָקוּם לְעוֹלְמֵי־עַד?"


וַתַּעַן סַבִּיתוּ וַתֹּאמֶר לְגִלְגָּמֶשׁ:

"גִּלְגָּמֶשׁ, אָנָה אַתָּה מְמַהֵר?

אֶת־הַחַיִּים אֲשֶׁר אַתָּה דוֹרֵשׁ לֹא תִמְצָא.

בִּבְרֹא אֱלֹהִים אָדָם מִנּוּ לוֹ אֶת־הַמָּוֶת,

וְאֶת־הַחַיִּים לָקְחוּ לָהֶם.

לָכֵן גִּלְגָּמֶשׁ, אֱכֹל וּשְׁתֵה,

מַלֵּא בִטְנְךָ וּשְׂמַח יוֹמָם וָלָיְלָה,

יוֹם יוֹם עֲשֵׂה לְךָ מִשְׁתֶּה,

שׂוֹשׂ תָּשִׂישׂ יוֹמָם וָלָיְלָה,

שָׂא זִמְרָה וּתְנָה כִנּוֹר, חָלִיל נָעִים עִם מָחוֹל.

בְּכָל־עֵת יִהְיוּ בְגָדֶיךָ לְבָנִים,

רְחַץ אֶת רֹאשְׁךָ וְשֶׁמֶן עָלָיו אַל יֶחְסָר,

וּטְבֹל אֶת־בְּשָׂרְךָ בְּמַיִם חַיִּים.

רְאֵה בְּשִׂמְחָה אֶת־בָּנֶיךָ, אֲשֶר יְמִישׁוּן כַּפֶּיךָ,

רְאֵה חַיִּים עִם הָאִשָּׁה.

לָכֵן שׁוּבָה לְאוּרוּךְּ, מֶלֶךְ מְהֻלָּל וְגִבּוֹר."


וַיַּעַן אוֹתָה גִּלְגָּמֶשׁ וַיֹּאמֶר לְסַבִּיתוּ:

"אָנָּא, סַבִּיתוּ, הַרְאִינִי אֶת־הַדֶּרֶךְ לְאוּת־נַפִּשְׁתִּים,

הוֹרִינִי, אֵיךְ אָבֹא אֵלָיו.

תְּנִי אוֹת,

אִם אֶפְשָׁר וְאֶעְבְּרָה אֶת־הַיָּם,

וְאִם אִי־אֶפְשָׁר – וְאֵלֵךְ בַּשָּׂדֶה."


וַתַּעַן סַבִּיתוּ וַתֹּאמֶר לְגִלְגָּמֶשׁ:

"לֹא הָיָה פֹה מַעֲבָר מֵעוֹלָם,

מִימוֹת־עוֹלָם לֹא עָבַר אֶת־הַיָּם כָּל־הַבָּא הֵנָּה,

רַק שַׁמַשׁ שַׂגִּיא־הַכֹּחַ, הוּא יַעַבְרֶנוּ,

זוּלָתִי אֱלֹהֵי־הַשֶּׁמֶשׁ, וּמִי מִבַּלְעָדָיו?

כִּי קָשֶׁה הַמַּעֲבָר עַל־פְּנֵי הָאוֹקְיָנוֹס,

קָשְׁתָה הַדֶּרֶךְ,

וַעֲמֻקִּים מֵי־הַמָּוֶת אֲשֶׁר לִפְנֵיהֶם.

וְאֵיכָה־זֶה תַעֲבֹר, גִּלְגָּמֶשׁ, אֶת־הַיָּם?

וְאִם גַּם עַד מֵי־הַמָּוֶת תָּבֹא, מַה־תַּעֲשֶׂה שָׁם?

רְאֵה, הִנֵּה בַמָּקוֹם אֲשֶׁר שָׁם אֲרוֹנוֹת־הָאֲבָנִים מֻנָּחִים,

שָׁם אוּר־שַׁנַבִּי, חוֹבְלוֹ שֶׁל אוּת־נַפִּשְׁתִּים.

הִנֵּה זֶה אַךְ פָּנָה אֶל הַיָּעַר

לִקְטֹף לוֹ עֵשֶב וְגַרְגְּרִים.

לֵךְ וּמְצָאֵהוּ.

אִם אֶפְשָׁר וְעָבַרְתָּ אִתּוֹ, וְאִם אִי־אֶפְשָׁר – שׁוּבָה."


וַיְהִי כִּשְׁמוֹעַ גִּלְגָּמֶשׁ אֶת־הַדְּבָרִים הָאֵלֶּה,

הֵנִיף אֶת גַּרְזִנּוֹ אֲשֶׁר עַל צִדּוֹ,

תָּלָה אֶת־חַרְבּוֹ עַל חֲגוֹרָתוֹ,

נָשָׂא רַגְלָיו וַיֵּלֶךְ עַד שְפַת הַיָּם.

כַּחֲנִית אֲשֶׁר הוּטָלָה נָפַל שַׁעַר גַּן־הָאֱלֹהִים

בֵּינוֹ וּבֵין הָאֵלָה.


גִלְגָּמֶשׁ מִתְבּוֹנֵן בַּמֶּרְחָק

וְהִנֵּה סְפִינָה עַל תּוֹצְאוֹת הַנְּהָרוֹת.

שָׁמָּה נָשָׂא פְעָמָיו אֶל אֳנִיּוֹת אוּת־נַפִּשְׁתִּים.

וְהוּא מְבַקֵּשׁ אֶת־הַחוֹבֵל, אֲשֶׁר יַעֲבִירֶנּוּ בְשָׁלוֹם

בַּיָּם רְחַב־הַיָּדַיִם וּבְמֵי־הַמָּוֶת.

עַד הַנַּחַל בָּא, וַיַּעֲמֹד מִלֶּכֶת.

וְהִנֵּה אֳנִיָּה, וַיֵּחָפֵז לְאֹרֶךְ הַחוֹף,

וְאֵין לִמְצֹא אֶת־הַחוֹבֵל.


וַיִּמְצָא אֲרוֹנוֹת וַאֲבָנִים בְּתוֹכָם

מֻנָּחִים עַל־פְּנֵי הָאָרֶץ.

וַיֵּלֶךְ בַּיַּעַר וַיִּקְרָא:

"הַגַּשָּׁר, אֲנִי מְבַקֵּשׁ אוֹתְךָ,

הַעֲבִירֵנִי־נָא בַיָּם וּבְמֵי־הַמָּוֶת!"


הוּא קוֹרֵא בְקוֹל רָם, וְאֵין מַעֲנֶה.

וַיָּשָׁב גִּלְגָּמֶשׁ אֶל הָאֲרוֹנוֹת וַיִּשְׁבְּרֵם בַּחֲמָתוֹ.

וַיָּקָם וַיָּשָׁב אֶל הַיָּעַר,

וְהִנֵּה עֵינָיו רוֹאוֹת אֶת אוּר־שַׁנַבִּי,

וַיִּגַּשׁ אֵלָיו.


עָנָה אוֹתוֹ אוּר־שַׁנַבִּי וַיֹּאמֶר לְגִלְגָּמֶשׁ:

"הַגֶּד־לִי אֶת־שִׁמְךָ, לִי תְכַנֶּנּוּ.

אֲנִי אוּר־שַׁנַבִּי, חוֹבְלוֹ שֶׁל אוּת־נַפִּשְׁתִּים שׁוֹכְנִי־הַמֶּרְחַקִּים."

וַיַּעַן גִּלְגָּמֶשׁ וַיֹּאמֶר לְאוּר־שַׁנַבִּי:


"גִּלְגָּמֶשׁ שְׁמִי, מֵהַרְרֵי אַנוּ בָאתִי,

דֶּרֶךְ רְחוֹקָה הָלַכְתִּי מִמִּזְרַח הַשֶּׁמֶשׁ עַד־הֵנָּה.

עַתָּה לָאַחֲרוֹנָה רְאִיתִיךָ, אוּר־שַׁנַבִּי,

תְּנָה לִי וְאֶרְאֶה אֶת־פְּנֵי אוּת־נַפִּשְׁתִּים שׁוֹכְנִי־הַמֶּרְחַקִּים."


וַיַּעַן אוּר־שַׁנַבִּי אֶת־גִּלְגָּמֶשׁ:

"לָמָּה שֻׁפּוּ לְחָיֶיךָ, חָוְרוּ, לָמָּה נָפְלוּ פָנֶיךָ?

לָמָּה תֶאֱבַל נַפְשְׁךָ וְקוֹמָתְךָ כְּפוּפָה?

לָמָּה קִנְּנָה קִינָה בְלִבֶּךָ, דָּמִיתָ לְעוֹבֵר דֶּרֶךְ רְחוֹקָה?

לָמָּה פָנֶיךָ שְׁזוּפִים מֵרוּחַ, מִשְּׂעִירִים וְשֶׁמֶשׁ־צָהֳרָיִם?

לָמָּה תָנוּעַ עַל־פְּנֵי הַשָּׂדֶה?"


וַיִּפְתַּח גִּלְגָּמֶשׁ אֶת־פִּיהוּ, וַיְדַבֵּר וַיַּעַן לוֹ:

"וְאֵיכָה לֹא תְשֻׁפֶּינָה, תֶּחֱוַרְנָה לְחָיַי, אֵיךְ לֹא יִפְּלוּ פָנָי?

אֵיךְ לֹא תֶאֱבַל נַפְשִׁי וְקוֹמָתִי לֹא תִכָּף?

אֵיכָה לֹא תְקַנֵּן קִינָה בְלִבִּי, לֹא אֶדְמֶה לְעוֹבֵר דֶּרֶךְ רְחוֹקָה?

לֹא יִהְיוּ פָנַי שְׁזוּפִים מֵרוּחַ, מִשְּׂעִירִים וְשֶׁמֶשׁ־צָהֳרָיִם?

אֵיכָה לֹא אָנוּעַ עַל־פְּנֵי הַשָּׂדֶה?

יְדִידִי אֶנְגִּידוּ, נְמַר־הָעֲרָבוֹת,

אֲשֶׁר גָּבַר עַל־הַכֹּל

וְיַחְדָּו עָלִינוּ בְהַר־הָאֱלֹהִים,

תָּפַשְׂנוּ אֶת־שׁוֹר־הַשָּׁמַיִם וַנַּכֶּנּוּ,

אֶת־חֻמְבַּבָּה הִכִּינוּ בְהַר־הָאֲרָזִים,

בְּחַגְוֵי־הָרִים הִכִּינוּ אֲרָיוֹת,

יְדִידִי, אֲשֶׁר חֵרֵף אִתִּי יַחְדָּו אֶת־נַפְשׁוֹ,

פְּקֻדַּת כָּל־הָאָדָם עָלָיו בָּאָה.

שִׁשָּׁה יָמִים וְשִׁשָּׁה לֵילוֹת בָּכִיתִי לוֹ,

בַּיּוֹם הַשְּׁבִיעִי קְבַרְתִּיו מֵעַל־פָּנָי.

עַל־דְּבַר יְדִידִי חָרָה לִי מְאֹד,

לָכֵן אָחוּשָׁה בָעֲרָבָה, אַרְחִיקָה נְדוֹד.

אֵיכָה־זֶה אַחֲרִישׁ עַל יְגוֹנִי?

אֵיכָה־זֶה יְגוֹנִי אָשִׂיחַ?

יְדִידִי, אֲשֶׁר אָהַבְתִּי, הָיָה לְאֵפֶר,

אֶנְגִּידוּ עֲמִיתִי נִמְשַׁל לְעָפָר מִן־הָאֲדָמָה.

הֲגַם אֲנִי אַרְגִּיעַ כָּמוֹהוּ

וְלֹא אוֹסִיף לָקוּם לְעוֹלְמֵי־עַד?"


וַיּוֹסֶף גִּלְגָּמֶשׁ וַיְדַבֵּר אֶל אוּר־שַׁנַבִּי:

"אוּר־שַׁנַבִּי, אֵיכָה אָבֹא אֶל אוּת־נַפִּשְׁתִּים?

הוֹדִיעֵנִי־נָא אֶת־הַדֶּרֶךְ אֵלֵךְ אֵלָיו,

הוֹרֵנִי אֶת הַמְסִלָּה הַנִּסְתָּרָה.

אִם אֶפְשָׁר וְאֶעְבְּרָה אֶת־הַיָּם,

וְאִם אִי־אֶפְשָר – אֵלְכָה בַשָּׂדֶה."


עָנָה אוֹתוֹ אוּר־שַׁנַבִּי, אֶת־גִּלְגָּמֶשׁ עָנָה:

"גִּלְגָּמֶשׁ, יָדֶיךָ אַתָּה הֶחֱרִיבוּ אֶת־הַמַּעֲבָר,

יָדֶיךָ אַתָּה בָלְקוּ אֶת־אֲרוֹנוֹת־הָאֲבָנִים,

אַתָּה אַתָּה נָתַצְתָּ אֶת־מַעְבְּרוֹת הַשִּׂרְטוֹנוֹת

בְּקֶרֶב מֵי־הַמָּוֶת הַשּׁוֹטְפִים.

הִנֵּה הָאֲרוֹנוֹת הַמְלֵאִים אֶבֶן נֻפָּצוּ

וְלֹא אוּכַל הֲבִיאֲךָ אֶל אִי־הַחַיִּים.

"קוּמָה גִּלְגָּמֶשׁ, הָנֵף אֶת־גַּרְזִנְּךָ אֲשֶׁר עַל צִדְּךָ,

רֵד אֶל הַיַּעַר וְּנָסר־לְךָ מֵאָה וְעֶשְׂרִים עֵצִים,

שִׁשִּׁים אַמָּה אֹרֶךְ הַכְּלוֹנָס הָאֶחָד,

קַצֵּץ בִּסְעִיפֵיהֶם, הַקְצִיעֵם וַהֲבִיאֵם הֵנָּה."


וַיִּשְׁמַע גִּלְגָּמֶשׁ בְּקוֹלוֹ.

וַיִּקַּח גַּרְזִנּוֹ אֲשֶר לְצִדּוֹ וַיֵּלֶךְ הַיַּעֲרָה.

גָּזַר מֵאָה וְעֶשְׂרִים עֵצִים,

קָצַץ בְּעַנְפֵיהֶם, הִקְצִיעָם וֶהֱבִיאָם.

שִׁשִּים אַמָּה אֹרֶךְ הַכְּלוֹנָס הָאֶחָד;

קִבְּצָם יַחַד, הֱבִיאָם לְאוּר־שַׁנַבִּי.


וַיֵּרְדוּ גִּלְגָּמֶשׁ וְאוּר־שַׁנַבִּי בָאֳנִיָּה,

הִסִּיעוּ אוֹתָה בַּיָּם וְהִפְלִיגוּ מִשָּׁם.

וְהַדֶּרֶךְ מַהֲלַךְ חֹדֶשׁ יָמִים וַחֲמִשָּׁה־עָשָׂר יוֹם,

וּבַיּוֹם הַשְּׁלִישִׁי בָא אוּר־שַׁנַבִּי עַד מֵי־הַמָּוֶת.


וַיְדַבֵּר אוּר־שַׁנַבִּי וַיֹּאמֶר לְגִלְגָּמֶשׁ:

"בַּגַּרְזֶן תְּקַע אֶת־הַכְּלוֹנְסָאוֹת אֶחָד אֶחָד בַּקַּרְקָע.

יָדְךָ אַל תִּגַּע בְּמֵי־הַמָּוֶת וְלֹא תָמוּת.

גִּלְגָּמֶשׁ, תְּקַע כְּלוֹנָס שֵׁנִי, שְלִישִׁי וּרְבִיעִי!

גִּלְגָּמֶשׁ, תְּקַע כְּלוֹנָס חֲמִישִׁי, שִׁשִּׁי וּשְׁבִיעִי!

גִּלְגָּמֶשׁ, תְּקַע כְּלוֹנָס שְׁמִינִי, תְּשִׁיעִי וַעֲשִׂירִי!

גִּלְגָּמֶשׁ, תְּקַע אֶת־הָאַחַד־עָשָׂר, אֶת הַשְּׁנֵים־עָשָׂר!"

מֵאָה וְעֶשְׂרִים כְּלוֹנְסָאוֹת תָּקַע גִלְגָּמֶשׁ,

אֶל הַקַּרְקַע תְּקָעָם אֶחָד אֶחָד.


וַיַּעֲבֵר גִּלְגָּמֶשׁ אֶת־בְּגָדָיו מֵעַל מָתְנָיו,

הִשְׁלִיךְ מֵעָלָיו אֶת־עוֹר־הָאֲרִי,

וַיַּעַשׂ בְּעֹצֶם יָדוֹ אֶת־הַתֹּרֶן הָרָם.


אוּת־נַפִּשְׁתִּים מַשְׁקִיף לְמֵרָחוֹק,

אֶל לִבּוֹ אָמַר וַיְדַבֵּר אֶת־דְּבָרָיו:

"מַדּוּעַ נֻפְּצוּ אֲרוֹנוֹת־הָאֲבָנִים שֶׁלַּסְּפִינָה?

מִי הוּא הַנָּכְרִי הַבָּא בָאֳנִיָּה?

הֲלֹא אָדָם אֵינֶנּוּ?

הִנְנִי מִתְבּוֹנֵן, הַאֻמְנָם אָדָם הוּא?

הִנְנִי מִתְבּוֹנֵן, הַאֻמְנָם גֶּבֶר הוּא?

הִנְנִי מִתְבּוֹנֵן, הַאֻמְנָם אֵל הוּא?

דּוֹמֶה הוּא לִי בַכֹּל.

בְּיָד חֲזָקָה יִתְקַע כְּלוֹנְסָאוֹת בְּמֵי־הַמָּוֶת הַשּׁוֹטְפִים

וְהָיוּ לוֹ תַחַת אֲרוֹנוֹת־הָאֲבָנִים,

שֶׁהָיָה אוּר־שַׁנַבִּי נוֹהֵג לְהַשְׁלִיךְ בַּמָּיִם,

בְּיָד חֲזָקָה הֵם מַעֲבִירִים אֶת־הַסְּפִינָה לְאֹרֶךְ הַכְּלוֹנְסָאוֹת.

עוֹד מְעַט וְיַגִּיעוּ אֶל שְׂפַת הָאִי.

וְהִנֵּה כָלוּ כָל־הַכְּלוֹנְסָאוֹת אִתָּם.

וְהִנֵּה מוֹצִיא הַנָּכְרִי אֶת־הַתֹּרֶן,

בְּגַרְזִנּוֹ בְקָעָהוּ לִשְׁנַיִם.

תָּקַע בַּמַּיִם אֶת־שְׁנֵי הַמּוֹטוֹת

וּבִדְחִיפָה אַדִּירָה הִגִּיעַ לַחוֹף."


וַיֵּרֶד אוּר־נַפִּשְׁתִּים מִבֵּיתוֹ,

נֶחְפַּז אֶל הַנָּכְרִי, וַיֹּאמֶר לְגִלְגָּמֶשׁ:

"קְרָא אֶת־שִׁמְךָ, הַגִּידָה אוֹתוֹ לִי.

אֲנִי אוּת־נַפִּשְׁתִּים, אֲשֶׁר מָצָא אֶת הַחַיִּים."


וַיַּעַן גִּלְגָּמֶשׁ וַיֹּאמֶר לְאוּת־נַפִּשְׁתִּים הַמְאֻשָּׁר:

"דֶּרֶךְ רְחוֹקָה הָלַכְתִּי מִמִּזְרַח הַשֶּׁמֶשׁ וְעַד־הֵנָּה,

וְהִנֵּה עֵינַי רוֹאוֹת אוֹתְךָ לָאַחֲרוֹנָה,

אֶת אוּת־נַפִּשְׁתִּים הַשּׁוֹכְנִי־מֶרְחַקִּים."


וַיַּעַן לוֹ אוּת־נַפִּשְׁתִּים וַיֹּאמַר:

"לָמָּה שֻׁפּוּ לְחָיֶיךָ, חָוְרוּ, לָמָּה נָפְלוּ פָנֶיךָ?

לָמָּה תֶאֱבַל נַפְשְׁךָ וְקוֹמָתְךָ כְּפוּפָה?

לָמָּה קִנְּנָה קִינָה בְלִבְּךָ, דָּמִיתָ לְעוֹבֵר דֶּרֶךְ רְחוֹקָה?

לָמָּה פָנֶיךָ שְׁזוּפִים מֵרוּחַ, מִשְּׂעִירִים וְשֶׁמֶשׁ־צָהֳרָיִם?

לָמָּה תָנוּעַ עַל־פְּנֵי הַשָּׂדֶה?


וַיִּפְתַּח גִּלְגָּמֶשׁ אֶת־פִּיהוּ וַיְדַבֵּר וַיַּעַן לוֹ:

"אֵיךְ לֹא תְשֻׁפֶּינָה, תֶּחֱוַרְנָה לְחָיַי וְלֹא יִפְּלוּ פָנָי?

אֵיךְ לֹא תֶאֱבַל נַפְשִׁי וְקוֹמָתִי לֹא תִכָּף?

אֵיךְ לֹא תְקַנֵּן קִינָה בְלִבִּי, לֹא אֶדְמֶה לְעוֹבֵר דֶּרֶךְ רְחוֹקָה?

לֹא יִהְיוּ פָנַי שְׁזוּפִים מֵרוּחַ, מִשְּׂעִירִים וְשֶׁמֶשׁ־צָהֳרָיִם?

יְדִידִי אֶנְגִּידוּ, נְמַר־הָעֲרָבוֹת,

אֲשֶׁר גָּבַר עַל־הַכֹּל

וְיַחְדָּו עָלִינוּ בְהַר־הָאֱלֹהִים,

תָּפַשְׂנוּ אֶת־שׁוֹר־הַשָּׁמַיִם וַנַּכֶּנּוּ,

אֶת־חֻמְבַּבָּה הִכִּינוּ בְהַר־הָאֲרָזִים,

בְּחַגְוֵי־הָרִים הִכִּינוּ אֲרָיוֹת.

יְדִידִי, אֲשֶׁר חֵרֵף אִתִּי יַחְדָּו אֶת־נַפְשׁוֹ,

פְּקֻדַּת כָּל־הָאָדָם עָלָיו בָּאָה.

שִׁשָּׁה יָמִים וְשִׁשָּׁה לֵילוֹת בָּכִיתִי לוֹ,

וּבַיּוֹם הַשְּׁבִיעִי קְבַרְתִּיו מֵעַל־פָּנָי.

עַל־דְּבַר יְדִידִי חָרָה לִי מְאֹד,

לָכֵן אָחוּשָׁה בָעֲרָבָה, אַרְחִיקָה נְדוֹד.

אֵיכָה־זֶה אַחֲרִישׁ עַל יְגוֹנִי?

אֵיכָה יְגוֹנִי אָשִׂיחַ?

יְדִידִי, אֲשֶׁר אָהַבְתִּי, הָיָה לְאֵפֶר,

אֶנְגִּידוּ עֲמִיתִי נִמְשַׁל לְעָפָר מִן־הָאֲדָמָה.

הֲגַם אֲנִי אַרְגִּיעַ כָּמוֹהוּ

וְלֹא אוֹסִיף לָקוּם לְעוֹלָם וָעֶד?"


וַיּוֹסֵף גִּלְגָּמֶשׁ וַיְדַבֵּר לְאוּת־נַפִּשְׁתִּים:

"אָמַרְתִּי, אֵלֵךְ וְאֶרְאֶה אֶת־פְּנֵי אוּת־נַפִּשְׁתִּים, אֲשֶׁר עָלָיו יְדֻבָּר.

אֶמְצָא אֶת שׁוֹכְנִי־הַמֶּרְחַקִּים,

אֶת־הַמְאֻשָּׁר בָּאָדָם, אֲשֶׁר מָצָא חַיֵּי־עוֹלָם.

וָאֵצֵא וָאֶתְהַלֵּךְ בָּאֲרָצוֹת

וָאַעַל עַל הֶהָרִים, אֲשֶׁר קָשֶׁה לַעֲלוֹת בָּם.

עָבַרְתִּי בְמַיִם וּבִנְהָרוֹת,

לֹא רָאוּ עֵינַי בַּטּוֹבָה.

שָׂבַעְתִּי מַמְּרוֹרִים, מַתְּלָאוֹת הָיו מְזוֹנִי,

עַד שֶׁבָּאתִי אֶל סַבִּיתוּ – בְּגָדַי עִדִּים.

צַדְתִּי צִפּוֹר־שָׂדַי, בְּשָׂרָהּ הָיָה מַאֲכָלִי,

טַרְפִּי הָאַיָּל, הַצְּבִי וְהָעֹפֶר,

בַחֲנִיתִי הִכִּיתִי אֲרִי, נָמֵר וָשַׁחַל,

וַיִּהְיוּ לִי עוֹרוֹתָם לְבֶגֶד לָבָשְׁתִּי.

יִסְגְּרוּ רוּחוֹת־הַמָּוֶת שַׁעֲרֵיהֶם עַל־מַסְגֵּר,

יִסְתְּמוּ אוֹתָם בְּכֹפֶר וַאֲבָנִים!

אֲנִי אֲבַעֵר אֶת־רוּחוֹת־הַמָּוֶת,

אוֹבִישָׁה שְׂשׂוֹנָם וְלֹא יוֹסִיפוּ לִשְׂמֹחַ.

הוֹדִיעֵנִי, אוּת־נַפִּשְׁתִּים, אֶת־תּוֹרַת־הַחַיִּים,

כִּי אַתָּה מָצָאתָ אֶת־הַחַיִּים."


וַיַּעַן אוּת־נַפִּשְׁתִּים וַיֹּאמֶר לְגִלְגָּמֶשׁ:

"הֶרֶף מֵאַף וַחֲדַל לְךָ מִקִּינָה!

שׁוֹנִים לְגוֹרְלוֹתֵיהֶם אֱלֹהִים וְאָדָם.

אָדָם יְצָרוּךָ אָבִיךָ וְאִמְּךָ,

וְאִם גַּם שְׁתֵּי שְׁלִישִׁיּוֹת בְּךָ אֱלֹהִים,

אַחַת שְׁלִישִׁית בְּךָ אָדָם וְגוֹרַל־אָדָם גּוֹרָלֶךָ.

לֹא נִתְּנוּ לָאָדָם חַיֵּי־עוֹלָם!

אַכְזָר הַמָּוֶת וְתַכְלִית לְכָל־חָי.

הַלְנֵצַח־נְצָחִים יִבָּנֶה בָיִת?

אִם לְעוֹלָמִים יֵחָתֵם בַּחוֹתָמֶת?

הֲלַעֲדֵי־עַד יְחַלְּקוּ אַחִים?

אִם לְעוֹלָם יָשִׂישׂ אֱנוֹש עַל אַהֲבָה?

הַבְכָל־עֵת יִגְאֶה נָהָר וִיכַס עֵין־הָאָרֶץ?

הַלְעוֹלָם תִּרְאֶינָה הַצִּפֳּרִים קוּלִילוּ וְקִירִיפּוּ אֶת־הַזָּמִיר,

אִם עֵינֵיהֶן לְעוֹלָם תֶּחֱזֶינָה פְנֵי שָׁמֶשׁ?

לֹא הָיָה מִן־הָעוֹלָם דָּבָר קַיָּם לָעַד בָּאָרֶץ.

דּוֹמֶה הַיִּלוֹד לַנִּפְטָר,

אִם לֹא חוֹתַם־הַמָּוֶת עַל שְׁנֵיהֶם טָבוּעַ?

בְּהוֹצִיא הַשּׁוֹטֵר וְהַשּׁוֹעֵר נֶפֶש חַי מִשְּׁאוֹל־תַּחְתִּית,

יִתְאַסְּפוּ יַחַד הָאֲנוּנָקִים, הָאֵלִים הָאַדִּירִים,

וְגַם מָמֶתוּם, הַיּוֹצֶרֶת הַגְּדוֹלָה;

אִתָּם יַחְדָּו תַּחֲרֹץ גּוֹרַל־אָדָם,

יוֹצִיאוּ בְמִסְפָּר יְמֵי־חַיֵּי־אָדָם,

רַק אֶת־יוֹם־הַמָּוֶת, אוֹתוֹ לֹא יוֹעִידוּ."


 

לוּחַ אַחַד־עָשָׂר    🔗

וַיַּעַן אוֹתוֹ גִלְגָּמֶשׁ וַיֹּאמֶר לְאוּת־נַפִּשְׁתִּים שׁוֹכְנִי־הַמֶּרְחַקִּים:

"עֵינַי הָרוֹאוֹת אוֹתְךָ, אוּת־נַפִּשְׁתִּים,

וְאַתָּה אֵינְךָ גָּדוֹל מִמֶּנִּי.

דָּמִיתָ לִי כִּדְמוֹת אָב לְיוֹצְאֵי־חֲלָצָיו,

נִבְרֵאתָ כַּאֲשֶׁר נִבְרֵאתִי אָנִי.

אָכֵן אָדָם גַּם־אַתָּה כָמוֹנִי.

זָר לְרוּחִי מַרְגּוֹעַ, לִקְרָבוֹת נוֹצַרְתִּי;

וְאַתָּה יוֹשֵׁב בָּטֵל מִתְפַּרְקֵד עַל־גַּבֶּךָ.

אֵיכָה בָאתָ בְּסוֹד הָאֵלִים,

בִּקַּשְׁתָּ וַתִּמְצָא חַיֵּי־עַד?"


עָנָה אוֹתוֹ אוּת־נַפִּשְׁתִּים וַיֹּאמֶר לְגִלְגָּמֶשׁ:

"גִּלְגָּמֶשׁ, סִפּוּר נֶעְלָם לְךָ אוֹדִיעַ,

אֶחָד סוֹד־אֱלֹהִים אֲגַלֶּה לָךְ.


הֲלֹא יָדַעְתָּ אֶת־שׁוּרִיפַּק, אֶת־הָעִיר הַבְּנוּיָה לְחוֹף־פְּרָת?

עַתִּיקָה הָעִיר, וְהָאֵלִים נָטוּ לָהּ חֶסֶד.

פִּתְאֹם חָרְצוּ הָאֵלִים הַגְּדוֹלִים

לְהָבִיא עָלֶיהָ סוֹעַת־מַבּוּל.


נִקְבְּצוּ בָאוּ: אֲבִיהֶם אַנוּ,

הַיּוֹעֵץ בָּהֶם הַגִּבּוֹר אֶנְלִיל,

כָּרוֹזָם שֶׁלָּהֶם נִינִיב,

הַגְּבִיר לָאֱלֹהִים – אֱנוּגִי.

בְּסוֹדָם גַּם אֵנָה, בְּהִיר־הָעֵינָיִם.

לְסֻכַּת־קָנֶה הוֹדִיעַ אֶת־עֲצַת הָאֵלִים:

"סֻכַּת־קָנֶה! סֻכַּת־קָנֶה! כֹּתֶל! כֹּתֶל!

שִׁמְעִי, סֻכַּת־קָנֶה, הַאֲזִינָה, כֹּתֶל!

אַתָּה, אִישׁ שׁוּרִיפַּק, בְּנוֹ אוּבָּרָה־תּוּתוּ,

בְּנֵה לְךָ בֵּית־עֵצִים,4 אֳנִיָּה תַעֲשֶׂנָּה,

נְטֹשׁ עֹשֶׁר! דְּרשׁ חַיִּים! בְּזֵה כְבֻדָּה, מַלְּטָה חַיִּים!

זֶרַע־חַיִּים לְמִינֵהוּ קַח אֶל הָאֳנִיָּה.

וְהָאֳנִיָּה אֲשֶׁר תִּבְנֶה

אָרְכָּה וְרָחְבָּה בְּמִדָּה יִשָּׂאוּ.

הֲבִיאֶנָּה אֶל הַיָּם וְסָפַנְתָּ אֶת־מִכְסֶהָ!"


הֲבִינוֹתִי וָאֹמַר לֵאלֹהַי, לְאֵאָה:

"כָּל אֲשֶׁר אָמַרְתָּ, אֲדוֹנִי, אֶעֱשֶׂה,

וּפְקֻדָּתְךָ תִּנְצֹר רוּחִי בְכָבוֹד.

וְלָעִיר מָה אֹמַר, לָעָם וְלַזְּקֵנִים?"


וַיִּפְתַּח אֵאָה אֶת־פִּיהוּ וַיֹּאמֶר לִי, לְעַבְדּוֹ:

"בֶּן־אָדָם, כֹּה תֹאמַר לָהֶם:

אֲבָל אֶנְלִיל נַפְשׁוֹ שָׂנְאָה אוֹתִי,

כִּי לָכֵן לֹא אֶחְפֹּץ לָשֶׁבֶת בְּתוֹכְכֶם,

וְלֹא אוֹסִיף לִרְאוֹת אֶת־אַדְמַת אֶנְלִיל.

אֵלְכָה־לִי אֶל יָם־הַקֹּדֶשׁ

וְאֵשֶׁב לִפְנֵי אֵאָה אֲדוֹנִי.

וְהוּא יְבָרֶכְכֶם בְּעֹשֶׁר וּבְכָל־טוּב,

בִּרְכוֹת מוֹקְשֵׁי־צִפֳּרֵיכֶם, בִּרְכוֹת מִכְמְרוֹת־דְּגַתְכֶם.

בִּרְכוֹת מַמְּגוּרָה וְקָצִיר,

עַד בּוֹא הָעֶרֶב וְיַמְטִירוּ עֲלֵיכֶם

הַשּׁוֹלְטִים בַּמַּחֲשַׁכִּים אֶת־הַמָּטָר הָאָיֹם."


וַיְהִי אַךְ הֵאִירָה אַיֶּלֶת־הַשַּׁחַר

וָאַעַשׂ כִּדְבַר אֵאָה וָאֶגַּשׁ אֶל הַמְּלָאכָה.

בָּאתִי אֶל יָם־הַקֹּדֶשׁ, הֵבֵאתִי אֶת־הָעֵצִים וְאֶת־הַכֹּפֶר,

חָשַׁבְתִּי אֶת־תַּבְנִית הָאֳנִיָּה,

הִתְוֵיתִיהָ, עֲשִׂיתִיהָ לְפָנָי.


וְכָל־בְּנֵי־בֵיתִי עוֹשִׂים בַּמְּלָאכָה.

הָיָה הַחַלָּשׁ נוֹשֵׂא חֹמֶר,

אֲשֶׁר כֹּחוֹ בְמָתְנָיו הֵבִיא כָל־הַנָּחוּץ.

בַּיּוֹם הַחֲמִישִׁי עָשִׂיתִי אֶת־תַּבְנִית הַתֵּבָה.

מֵאָה וְעֶשְׂרִים אַמָּה קוֹמַת כְּתָלֶיהָ,

מֵאָה וְעֶשְׂרִים אַמָּה עַד פְּאַת מִכְסֶהָ.

אֲנִי עָשִׂיתִי תַבְנִיתָהּ, הִתְוֵיתִי:

תַּחְתִּיִּים, שְׁנִיִּים, שְׁלִישִׁיִּים וּרְבִיעִיִּים,

חֲמִישִׁיִּים וְשִׁשִּׁיִּים לַתֵּבָה:

שְבִיעִיִּים לַתֵּבָה מִבַּחוּץ,

תְּשִׁיעִיִּים לַתֵּבָה מִבִּפְנִים.

כְּפִיסִים וְקוֹרוֹת תָּקַעְתִּי בְקִרְבָּה,

תַּרְתִּי לִי מוֹט וָאָשִׂים בָּה כָּל־כֵּלֶיהָ.

שִׁשָּׁה כוֹרִים חֹמֶר שָׁפַכְתִּי בַתַּנּוּרִים,

שִׁשָּׁה כוֹרִים כֹּפֶר שָׁפַכְתִּי בָם,

שְׁלֹשָׁה סָרִים5 שֶׁמֶן הֵבִיא הָעָם,

מִלְּבַד סָרֵי הַשֶּׁמֶן, שֶׁאָכְלָה הָעוֹלָה,

וּשְׁנֵי סָרֵי הַשֶּׁמֶן שֶהִצְפִּין תּוֹפֵשׂ־הַהֶגֶה.


יוֹם יוֹם זָבַחְתִּי בָקָר,

טָבַחְתִּי רְחֵלִים, צֵיד אֲנָשָׁי;

תִּירוֹשׁ וָשֶׁמֶן, מִיץ־פְּרִי וְדַם־עֵנָב

הִשְׁקֵיתִי אֶת־עַמִּי כְּמֵי־נָהָר לָרֹב.

עָשִׂיתִי מִשְׁתֶּה כִּבְיוֹם רֹאשׁ־הַשָּׁנָה.

פָּתַחְתִּי אֶת־אַרְגַּז הַמְּשָׁחוֹת,

כַּפִּי שָׁלַחְתִּי לַמִּשְׁחָה.


עַד נְטוֹת הַשֶּׁמֶש כִּלִּיתִי אֶת־הַתֵּבָה,

בְּחֹדֶשׁ הַשַּמַשׁ הַגָּדוֹל כִּלִּיתִי הַתֵּבָה,

כָּל אֲשֶׁר הָיָה לִי טָעַנְתִּי עָלֶיהָ,

אֶת־כָּל־הַזָּהָב אֲשֶׁר לִי טָעַנְתִּי עָלֶיהָ,

אֶת־כָּל־הַכֶּסֶף אֲשֶׁר לִי טָעַנְתִּי עָלֶיהָ,

זֶרַע כָּל־חַיִּים לְמִינֵהוּ טָעַנְתִּי עָלֶיהָ,

הוֹרַדְתִּי אֶת־כָּל־בְּנֵי־בֵיתִי וְאֶת־כָּל־אַחַי בָּאֳנִיָּה.

בֶּהֱמַת־שָׂדַי, חַיַּת־שָׂדֶה הֵבֵאתִי בָהּ,

עוֹשִׂים בְּכָל־מְלָאכָה הוֹרַדְתִּי בַסְּפִינָה.

שַׁמַשׁ, אֱלֹהֵי־הַשֶּׁמֶשׁ, נָתַן לִי אוֹת:

בָּעֶרֶב, בְּהַמְטִיר הַשּׁוֹלְטִים בַּמַּחֲשַׁכִּים מָטָר סוֹחֵף,

בֹּא אֶל הַתֵּבָה וְסָגַרְתָּ הַדֶּלֶת בַּעֲדֶךָ.

וְהִגִּיעָה הַשָּׁעָה,

בָּעֶרֶב הִמְטִירוּ הַשּׁוֹלְטִים בַּמַּחֲשַׁכִּים מָטָר נוֹרָא עַל הָאָרֶץ.

לִרְאוֹת אֶת־הַמֶּזֶג הִשְׁקַפְתִּי, הִתְבּוֹנַנְתִּי,

נִבַּטְתִּי לַמֶּזֶג וּרְעָדָה אֲחָזָתְנִי.

בָּאתִי אֶל הַתֵּבָה וָאֶסְגֹּר הַדֶּלֶת בַּעֲדִי,

בְּיַד תּוֹפֵשׂ־הַהֶגֶה, בְּיַד פּוּזוּר־אָמוּרִי,

מָסַרְתִּי אֶת־גְּאוֹן הַסְּפִינָה וְכָל־אֲשֶׁר־בָּהּ.

וַיְהִי אַךְ הֵאִירָה אַיֶּלֶת־הַשַּׁחַר

וְעָבִים כְּבֵדִים עָלוּ מִמַּעֲמַקֵּי שָׁמַיִם,

אֲדַד הִרְעִים בָּם רְעָמִים.

הָאֵלִים מוּיָתִי וְלוּגַל הוֹלְכִים לִפְנֵיהֶם,

עוֹלִים כְּכָרוֹזִים עַל הָרִים וּבְקָעוֹת.

אִירְגַל עִקְּרָה אֶת־אָשְׁיוֹת הַסְּפִינוֹת,

אָתָא נִינִיב וּבָלַק כָּל־מַעְצוֹר וָשֶׂכֶר,

הָאֲנוּנָקִים הֵרִימוּ אֶת־לַפִּידֵיהֶם,

הֵאִירָה הָאָרֶץ מִבְּרַק־הַזְּוָעָה.

עַד־שָׁמַיִם עָלָה חֲרוֹן־אַף אֲדַד,

הָפַךְ כָּל־קֹדֶשׁ לַעֲלָטָה,

בָּקַק הָאָרֶץ וּבְלָקָהּ.

כָּל־הַיּוֹם סָעֲרָה תֵימָן,

נִסְעֲרוּ מַיִם, הִגִּיעוּ הַמַּיִם עַד־רֹאשׁ־הָרִים,

נָפְלוּ הַמַּיִם עַל הָאָדָם כִּצְבָא־קְרָבוֹת,

לֹא הִכִּיר אִישׁ אֶת־פְּנֵי אָחִיו.


גַּם לֵב הָאֵלִים פָּחַד מִפְּנֵי הַסְּעָרָה,

נָסוּ, הֶרָה נִמְלָטוּ, אֶל הַרְרֵי שְׁמֵי־אַנוּ,

כְּפוּפִים כִּכְלָבִים אֶל הַקִּיר נִשְׁעָנוּ.

עִשְׁתָּר נָתְנָה קוֹל כַּיּוֹלֵדָה בַחֲבָלֶיהָ,

נָהֲמָה בִיפִי־קוֹלָהּ הַגְּבִירָה בָאֵלִים:

"הָיְתָה טִיט־יָוֵן הָאָרֶץ הַיָּפָה לְפָנִים,

כִּי אֲנִי רַע יָעַצְתִּי בְסוֹד־הָאֱלֹהִים.

אֵיכָה צִוִּיתִי רָע בְּקֶרֶב הָאֵלִים?

אֵיכָה אָמַרְתִּי לְשַׁחֵת אֶת־כָּל־הָאָדָם?

הֲלָזֹאת יָלַדְתִּי, טִפַּחְתִּי בְנֵי־אֱנוֹשׁ,

וִימַלְאוּ אֶת־הַיָּם כִּשְׁגַר־דָּגָה?"


הָאֲנוּנָקִים הָאֵלִים אִתָּהּ יַחְדָּו יִבְכָּיוּ,

כְּפוּפִים יָשְׁבוּ הָאֵלִים, הֵילִילוּ,

מִגֹּדֶל מַכְאֹבָם סֻגְּרוּ שִׂפְתֵיהֶם.

שִׁשָּׁה יָמִים וְשִׁבְעָה לֵילוֹת

הָיְתָה הַסּוֹעָה, סָעֲרָה סוּפַת־נֶגֶב.

וַיְהִי בַּיּוֹם הַשְּׁבִיעִי וַיָּשֹׁכּוּ הַמָּיִם.

וַתְּהִי הַמְּנוּחָה כִּלְאַחַר הַמִּלְחָמָה,

וַיָּנַח הַיָּם, שָׁבְתָה סוֹעַת־הָאֲבַדּוֹן.


נִשְׁקַפְתִּי וָאֵרֶא וְהִנֵּה מְנוּחָה,

כָּל־שִׁבְטֵי הָאָדָם הָיוּ טִיט־יָוֵן,

פְּנֵי הָאֲדָמָה מִדְבַּר־יְלֵל־מָוֶת.

פָּתַחְתִּי אֶת־הַצֹּהַר וַיִּגַּהּ אוֹר עַל פָּנָי.

צָנַחְתִּי עַל הַקַּרְקַע, יָשַׁבְתִּי, בָּכִיתִי,

הָיוּ דִמְעוֹתַי נִגָּרוֹת עַל פָּנָי.

הִשְׁקַפְתִּי עַל־פְּנֵי מֶרְחֲבֵי־הַיָּם,

נָהַמְתִּי בְקוֹל, כִּי נִמְחָה כָל־הָאָדָם.

וַיְהִי מִקֵּץ שְׁתֵּים־עֶשְׂרֵה שָׁעוֹת־מִשְׁנֶה

וְהִנֵּה אִי עוֹלֶה בַמֶּרְחַקִּים,

וְהַתֵּבָה הוֹלֶכֶת וּקְרֵבָה אֶל הַרְרֵי־נִיסִיר,

וַתְּגַשֵּׁשׁ הַתֵּבָה וַתָּנַח עַל הָרֵי־נִיסִיר.


יוֹם אֶחָד, יוֹם שֵׁנִי אָחַז הַר־נִיסִיר אֶת־הַתֵּבָה

וְלֹא נָתַן לָהּ לְהִתְנַדְנֵד;

יוֹם שְׁלִישִׁי, יוֹם רְבִיעִי אָחַז הַר־נִיסִיר אֶת־הַתֵּבָה

וְלֹא נָתַן לָהּ לְהִתְנַדְנֵד.

יוֹם חֲמִישִׁי, יוֹם שִׁשִּׁי אָחַז הַר־נִיסִיר אֶת־הַתֵּבָה

וְלֹא נָתַן לָהּ לְהִתְנַדְנֵד.

וַיְהִי בַּיוֹם הַשְּׁבִיעִי

וָאֶקַּח יוֹנָה וַאֲשַׁלְּחֶנָּה.

וַתֵּצֵא הַיּוֹנָה וַתָּשָׁב,

לֹא מָצְאָה הַיּוֹנָה מָנוֹחַ לְכַף־רַגְלָהּ וַתָּשָׁב.


וָאֲשַׁלַּח סְנוּנִית

וַתֵּצֵא הַסְּנוּנִית וַתָּשָׁב;

לֹא מָצְאָה מָנוֹחַ לְכַף־רַגְלָהּ וַתָּשָׁב.


וָאֲשַׁלַּח אֶת־הָעוֹרֵב.

וַיֵּצֵא הָעוֹרֵב וַיַּרְא כִּי קַלּוּ הַמָּיִם,

וַיֹּאכַל, וַיְחַטֵּט בָּאָרֶץ, וַיִּצְרַח וְלֹא יָסַף לָשׁוּב.


וַאֲשַׁלַּח אֶת־כָּל־הַחַי לְכָל־אַרְבַּע רוּחוֹת הַשָּׁמָיִם,

וָאַעַל שֶׂה קָרְבַּן־עוֹלָה,

קָרְבַּן־זֶרַע זָרִיתִי עַל רֹאשׁ הָהָר.

שִׁבְעָה וְשִׁבְעָה כֵלִים עָרַכְתִּי,

הֶעֱלֵיתִי תַחְתֵּיהֶם אֶרֶס, מוֹר וְקָנֶה.

וַיָּרִיחוּ הָאֵלִים אֶת־הָרֵיחַ,

וַיַּעַל רֵיחַ הַנִּיחוֹחַ בְּאַף הָאֵלִים,

כִּזְבוּבִים נֶאֶסְפוּ הָאֵלִים אֶל הָעוֹלָה.


וַיְהִי כְּבֹא גְבֶרֶת־הָאֵלִים

וַתָּנֶף אֶת־אַבְנֵי־הַחֵן הַגְּדוֹלוֹת,

אֲשֶׁר עָשָׂה לָהּ עֲנָק אַנוּ, אֱלֹהֵי־הַשָּׁמַיִם, כִּרְצוֹנָה:

"הָאֱלֹהִים הַגְּדוֹלִים! כְּשֵׁם שֶׁאֵינִי שׁוֹכַחַת

לְעוֹלָם אֶת־עֲנַק־צַוְּרוֹנָי,

כֵּן אֶזְכֹּר לְעוֹלָם אֶת־הַיּוֹם הַזֶּה

וְלֹא אֶשְׁכָּחֶנּוּ לַעֲדֵי־עַד!

יָבֹאוּ כָל־הָאֵלִים אֶל קָרְבַּן־הַזֶּרַע,

אֶנְלִיל רַק הוּא לֹא יָבֹא אֶל קָרְבַּן־הַזֶּרַע,

כִּי לֹא נוֹעַץ בְּלִבּוֹ וַיָּבֵא אֶת־הַמַּבּוּל

וַיִּמַח אֶת־כָּל־הָאָדָם מֵעַל הָאָרֶץ."


וַיְהִי כְבֹא אֶנְלִיל הַגָּדוֹל,

וַיַּרְא אֶנְלִיל אֶת־הַתֵּבָה וַיֶאֱנַף,

קָצַף בְּעֶבְרָתוֹ עַל כָּל־הָאֵלִים מִשֵּׁבֶט אִיגֶגֶה:


"מִי הוּא הַנִּשְׁאָר לִפְלֵיטָה מִכָּל־הַחַי?

לֹא יְחִי, כִּי־יָמוּת כָּל־הָאָדָם בָּרָעָה!"


וַיִּפְתַּח נִינִיב אֶת־פִּיהוּ וַיֹּאמַר:

"מִי כְאֵאָה בָאֵלִים לְעוֹלֵל בְּחָכְמָה?

אֵאָה יוֹדֵעַ הַכֹּל, רוֹאֶה אֶת־הַנּוֹלָד."


וַיִּפְתַּח אֵאָה, אֱלֹהֵי־הַמַּעֲמַקִּים, אֶת־פִּיהוּ

וַיְדַבֵּר אֶל אֶנְלִיל הַשַּׂגִּיא וַיֹּאמַר:


"אָנָּא, אֵל גִּבּוֹר, הֶחָכָם בָּאֵלִים!

אֵיכָה הַעִירֹתָ סַעַר בְּלִי־חָכְמָה?

חוֹטֵא אָדָם לוּ יִשָּׂא עֲוֹנוֹ,

יְשֻׁלַּם לָרָשָׁע כְּדֵי רִשְעָתוֹ.

יֶהֱמוּ־נָא רַחֲמֶיךָ וְלֹא יִשָּׁמֵדוּ,

הֱיֵה אֶרֶךְ־אַפַּיִם וְלֹא יִתַּמּוּ כֻלָּם.

תַּחַת לְעוֹרֵר מַבּוּל־הַסּוֹעָה,

יָקוּם הָאֲרִי וִיקַצֵּץ בָּאָדָם.

תַּחַת לְעוֹרֵר סוֹעַת־מַבּוּל,

שְׁלַח בָּהֶם אֶת־הַזְּאֵב וִיקַצֵּץ בָּאָדָם.

תַּחַת לְעוֹרֵר מַבּוּל־הַמַּיִם,

הֵן יָכֹלְתָּ לִשְׁלֹחַ רָעָב וָדֶבֶר

לְהַכְנִיעַ אֶרֶץ סוֹרָרֶת.

אֲנִי לֹא גִלִּיתִי אֶת־סוֹד הָאֵלִים הַגְּדוֹלִים,

מַרְאֶה בַחֲלוֹם שָׁלַחְתִּי לְרַב־הַחָכְמָה.

וַיֵּדַע אֶת־סוֹד הָאֵלִים, גִּלָּה מַצְפּוּנֵיהֶם.

עַתָּה רְאוּ מַה־יֵּעָשׂ לוֹ."


יָרַד אֵאָה בָאֳנִיָּה וְאָחַז בְּכַפִּי,

הוֹצִיא אוֹתִי וְאֶת־אִשְׁתִּי אֶל הֶחָרָבָה,

אֶל הֶחָרָבָה הוֹצִיאָנוּ וַיַּבְרֵךְ אוֹתִי וְאֶת־אִשְׁתִּי עַל־יָדִי,

נָגַע בְּמִצְחֵנוּ, עָמַד בֵּינֵינוּ וַיְבָרְכֵנוּ:

"עַד הַיּוֹם הָיָה אוּת־נַפִּשְׁתִּים בֶּן־תְּמוּתָה,

מֵעַתָּה יִהְיֶה אוּת־נַפִּשְׁתִּים דּוֹמֶה לָנוּ, לָאֵלִים,

וְיִחְיֶה אוּת־נַפִּשְׁתִּים בְּאַפְסֵי־מֶרְחַקִּים

עַל שְׂפַת הַיָּם, אֲשֶׁר שָׁם תּוֹצָאוֹת לַנְּהָרוֹת."

כָּכָה לְקָחוּנִי הָאֵלִים וַיּוֹשִׁיבוּנִי

בְּאַפְסֵי־מֶרְחַקִּים עַל תּוֹצְאוֹת הַנְּהָרוֹת.

וְאוּלָם אַתָּה, מִי בָאֵלִים יְצָרֶפְךָ אֵלָיו

וּמָצָאתָ אֶת־הַחַיִּים אֲשֶׁר אַתָּה מְבַקֵּשׁ?

נַס־נָא לֹא לִישֹׁן שִׁשָּׁה יָמִים וְשִׁבְעָה לֵילוֹת."


גִּלְגָּמֶשׁ אַךְ יָשַׁב תַּחְתָּיו וְהִנֵּה תַרְדֵּמָה

תְּעוּפֶנּוּ כַסָּעַר.


אָמַר אוּת־נַפִּשְׁתִּים לָהּ, לְאֵשֶׁת־חֵיקוֹ:

"רְאִי אֶת־הָאַדִּיר הֶחָפֵץ בַּחַיִּים

וְהִנֵּה שֵׁנָה תְעוּפֶנּוּ כַסָּעַר."


אָמְרָה לוֹ אִשְׁתּוֹ, לְאוּת־נַפִּשְׁתִּים שׁוֹכְנִי־הַמֶּרְחַקִּים:

"גַּע־בּוֹ, אוּלַי יִתְאוֹשֵׁשׁ הָאִישׁ!

יָבֹא בְשָׁלוֹם בַּדֶּרֶךְ אֲשֶׁר הָלַךְ בָּהּ,

יָשׁוּב לְאַרְצוֹ בַּשַּׁעַר אֲשֶׁר יָצָא בוֹ."


וַיֹּאמֶר לָהּ אוּת־נַפִּשְׁתִּים, לְאֵשֶׁת־חֵיקוֹ:

"אֲבָל רַחֲמֶיךָ הָמוּ לוֹ לָאָדָם.

אֱפִי לוֹ לֶחֶם וְשִׂימִי לִמְרַאשׁוֹתָיו."


עַל־יַד כֹּתֶל הַתֵּבָה נִשְׁעַן, שָׁכַב גִּלְגָּמֶשׁ.

וַיֹּאמֶר לוֹ אוּת־נַפִּשְׁתִּים:

"הַחַלָּה הָאַחַת בִּשְׁבִילְךָ לָשׁוּהָ,

הַשְּׁנִיָּה עֲשׂוּיָה, הַשְּׁלִישִׁית רֻטָּבָה,

הַחַלָּה הָרְבִיעִית הִלְבִּינָה בַקֶּמַח,

שְׁזוּפָה מֵחֹם, הַחַלָּה הַחֲמִישִׁית

הֶעֶלְתָה שֵׂיבָה, הַשִּׁשִּׁית אֲפוּיָה,

הַשְּׁבִיעִית…" פִּתְאֹם נָגַע בּוֹ וַיִּתְנַעֵר הָאִישׁ.


וַיֹּאמֶר לוֹ גִלְגָּמֶשׁ, לְאוּת־נַפִּשְׁתִּים שׁוֹכְנִי־הַמֶּרְחַקִּים:

"הִנֵּה יָגַעְתִּי וַתִּתְקְפֵנִי הַשֵּׁנָה,

פִּתְאֹם נָגַעְתָּ בִּי וָאֶתְאוֹשֵׁשׁ."


וַיֹּאמֶר לוֹ אוּת־נַפִּשְׁתִּים וַיַּעַן לְגִלְגָּמֶשׁ:

"גִּלְגָּמֶשׁ, הִנֵּה חַלּוֹתֶיךָ בְּמִסְפָּר:

הַחַלָּה הָאַחַת בִּשְׁבִילְךָ לָשׁוּהָ,

הַשְּׁנִיָּה עֲשׂוּיָה, הַשְּלִישִׁית רְטֻבָּה,

הַחַלָּה הָרְבִיעִית הִלְבִּינָה בַקֶּמַח,

שְׁזוּפָה מֵחֹם, הַחַלָּה הַחֲמִישִׁית

הֶעֶלְתָה שֵׂיבָה, הַשִּׁשִּׁית אֲפוּיָה,

הַשְּׁבִיעִית… פִּתְאֹם נָגַעְתִּי בְךָ וַתִּתְנַעָר."


וַיֹּאמֶר לוֹ גִלְגָּמֶשׁ, לְאוּת־נַפִּשְׁתִּים שׁוֹכְנִי־הַמֶּרְחַקִּים:

"אוּת־נַפִּשְׁתִּים, מָה אֶעֱשֶה וְאָנָה אָשִׂים אֶת־פָּנָי?

כִּנְפֹל שׁוֹדְדִים נָפְלָה עָלַי שְׁנָתִי,

בַּחֲדַר־מִטָּתִי יְקַנֵּן הַמָּוֶת,

בְּכָל־מָקוֹם אֲשֶׁר אֶעֱשֶׂה שָׁם יֶאֱרֹב לִי מָוֶת."


וַיֹּאמֶר לוֹ אוּת־נַפִּשְׁתִּים, לְאוּר־שַׁנַבִּי הַחוֹבֵל:

"אוּר־שַׁנַבִּי, לְעוֹלָם אַל יִרְאוּךָ גְּדוֹתַי,

לֹא יַכִּירְךָ מְקוֹמְךָ עַל הַמַּעְבָּרָה!

כָּל־הַבָּא אֶל שְׂפָתָהּ, שְׂפָתָהּ תִּקַּח מִמֶּנּוּ.

הָאָדָם אֲשֶׁר הִתְהַלַּכְתָּ לְפָנָיו,

בְּגָדָיו צוֹאִים מְכַסִּים לִבְשָׂרוֹ,

עוֹרוֹת־הַחַיּוֹת לָקְחוּ מִמֶּנּוּ יָפְיוֹ.

הֲבִיאֵהוּ, אוּר־שַׁנַבִּי, אֶל הָרַחְצָה,

וְרָחַץ לְמִשְׁעִי אֶת־בְּשָׂרוֹ בַמָּיִם,

יַעֲבִיר מֵעָלָיו אֶת־הָעוֹרוֹת וְיִשָּׂאֵם הַיָּם,

וְשָׁב וְיִיף בְּשָׂרוֹ כְבַתְּחִלָּה.

צָנִיף חָדָש יִצְנֹף לְרֹאשׁוֹ,

בִּגְדֵי־תִפְאֶרֶת יַעֲטֶה, מְעִיל לְמַעֲרֻמָּיו.

עַד שֶׁיָּבֹא עִירוֹ,

עַד שֶׁהוּא עוֹשֶׂה בְדַרְכּוֹ,

בְּגָדָיו לֹא יִבְלוּ, יִתְחַדְּשׁוּ עָלָיו לַבְּקָרִים."


וַיִּקָּחֵהוּ אוּר־שַׁנַבִּי וַיְבִיאֵהוּ אֶל הָרַחְצָה.

כִּבֵּס לְמִשְׁעִי אֶת־בְּגָדָיו הַצּוֹאִים,

הֶעֱבִיר מֵעָלָיו אֶת עוֹרוֹת־הַחַיָּה וַיִּשָּׂאֵם הַיָּם.

וַיִּיף בְּשָׂרוֹ כְבַתְּחִלָּה,

חֻדַּשׁ צְנִיפוֹ אֲשֶׁר עַל רֹאשׁוֹ,

מְעִיל־תִּפְאֶרֶת עָטָה, חֲגוֹר לְמַעֲרֻמָּיו.

עַד שֶׁבָּא לְעִירוֹ,

עַד שֶׁעָשָׂה אֶת־דַּרְכּוֹ,

לֹא בָלָה בִגְדוֹ, כִּי־אִם הִתְחַדָּשׁ.


גִּלְגָּמֶשׁ וְאוּר־שַׁנַבִּי יָרְדוּ בָאֳנִיָּה,

הוֹרִידוּ הַסְּפִינָה בַגַּלִּים וַיַּפְלִיגוּ.

אָמְרָה לוֹ אִשְׁתּוֹ, לְאוּת־נַפִּשְׁתִּים שׁוֹכְנִי־הַמֶּרְחַקִּים:

"גִּלְגָּמֶשׁ הִתְהַלֵּךְ, עִנָּה נַפְשׁוֹ בַדֶּרֶךְ,

מָה הָאֶשְׁכָּר אֲשֶׁר תִּתֶּן־לוֹ וְיָבֹא לְבֵיתוֹ?"


וַיָּרֶם גִּלְגָּמֶשׁ אֶת־הַמוֹט,

וַיַּקְרֵב אֶת־הָאֳנִיָּה אֶל הַחוֹף.

וַיֹּאמֶר לוֹ אוּת־נַפִּשְׁתִּים, אֶל גִּלְגָּמֶשׁ אָמָר:


"גִּלְגָּמֶשׁ, הִתְהַלַּכְתָּ, עִנִּיתָ בַּדֶּרֶךְ כֹּחֶךָ.

מָה אֶשְׁכָּר אֶתֵּן לְךָ וְתָבֹא לְבֵיתֶךָ?

גִּלְגָּמֶשׁ, סוֹד כָּמוּס לְךָ אֲגַלֶּה,

עֵשֶׂב־פְּלָאוֹת אוֹרֶךָּ.

דּוֹמֶה הָעֵשֶׂב לִסְנֵה־שָׂדֶה

וְקוֹצִים לוֹ כַקּוֹצִים אֲשֶׁר לַקִּפּוֹד.

עָמֹק בְּמַעֲמַקֵּי־יַמִּים יִצְמָח,

עַל קַרְקַע יָם רָחוֹק יִפְרָח.

כִּי־תִשְלַח אֵלָיו יָדְךָ וְאָכַלְתָּ מִמֶּנּוּ,

וּמָצָאתָ שַׁחֲרוּת־עוֹלָם וְחַיֵּי־עַד."


שָׁמַע גִּלְגָּמֶשׁ אֶת־דְּבָרָיו,

וַיִּסַּע מִשָּׁם, וַיַּרְחִיקוּ בַיָּם,

הִגִּיעוּ אֶל יָם מַיִם מְתוּקִים.

פִּתַּח אֶת־חֲגוֹרָתוֹ, הֵסִיר בְּגָדָיו מֵעָלָיו,

אֲבָנִים כְּבֵדוֹת קָשַׁר אֶל רַגְלָיו,

צָלַל עָמֹק אֶל יָם־הָעוֹלָם.


וַיַּרְא אֶת־הָעֵשֶׂב הַדּוֹמֶה לַסְּנֶה,

לָקַח אֶת־הָעֵשֶׂב, תְּפָשׂוֹ בְיָד חֲזָקָה,

כָּרַת אֶת־הָאֲבָנִים הַכְּבֵדוֹת מֵעַל רַגְלָיו.

וַיַּעַל מִן הַמַּיִם וַיֵּרֶד בָּאֳנִיָּה

וּפֶרַח־הַפְּלָאוֹת שֶׁבַּיָּם בְּיָדוֹ.


וַיֹּאמֶר גִּלְגָּמֶשׁ לְאוּר־שַׁנַבִּי הַחוֹבֵל:

"אוּר־שַׁנַבִּי, הִנֵּה עֵשֶׂב־הַחֶסֶד,

חַיֵּי־עוֹלָם נְטוּעִים בָּעֵשֶׂב.

הִנֵּה נִמְלָא רֹאשׁ תַּאֲווֹת־אָדָם,

וְהָיָה חֶלְקוֹ שַׁחֲרוּת־עוֹלָם בִּגְבוּרָתָהּ.

עִירָה אוּרוּךְּ הַבְּצוּרָה אֲבִיאֵהוּ,

יֹאכְלוּ מִמֶּנּוּ כָל־גִּבּוֹרֵי־הֶחָיִל,

אֲחַלְּקֶנוּ בֵין רַבִּים וְיֹאכְלוּ מִמֶּנּוּ.

שֵׁם הַצֶּמַח: ‘שְׂבַע־יָמִים יָשׁוּב לַעֲלוּמָיו’.

וְגַם־אֲנִי אֹכַל מִמֶּנּוּ

וְשָׁב כֹּח־עֲלוּמַי כְּקֶדֶם."


מִקֵּץ עֶשְׂרִים שָׁעוֹת־מִשְׁנֶה סָעֲדוּ אֶת־לִבָּם,

מִקֵּץ שְׁלֹשִׁים שָעוֹת־מִשְׁנֶה נָחוּ.

רָאָה גִלְגָּמֶשׁ אֲגַם מַיִם קָרִים,

וְהַמַּיִם מַיִם מְשִׁיבִים נֶפֶשׁ,

וַיֵּרֶד וַיִּטְבֹּל בַּמַּיִם הַקָּרִים.

וַיָּרַח הַנָּחָשׁ אֶת־רֵיחַ הָעֵשֶׂב,

וַיֵּט אֵלָיו וַיִּקַּח אֶת־הָעֵשֶׂב.

וַיָּשָׁב אֶל הַמָּקוֹם, וַיִּפְתַּח אֶת־פִּיהוּ בִקְלָלָה;

יָשַׁב גִּלְגָּמֶשׁ וַיֵּבְךְּ רַב־בֶּכִי,

הָיוּ דִמְעוֹתָיו נִגָּרוֹת עַל פָּנָיו,

הִבִּיט בִּפְנֵי אוּר־שַׁנַבִּי הַגַּשָּׁר:

"אוּר־שַׁנַבִּי, לְמִי עָמְלוּ זְרוֹעוֹתָי?

לְמִי יָזוּב דַּם־לִבִּי וְיַעֲרֹף?

יָגַעְתִּי וְלֹא רָאִיתִי טוֹבָה לְנַפְשִׁי,

לְתוֹלַעַת זוֹחֶלֶת עַל־פְּנֵי הָאֲדָמָה הֵיטַבְתִּי:

מִקֵּץ עֶשְׂרִים שָׁעוֹת־מִשְׁנֶה נָשָׂא עָרוּם אֶת־הָעֵשֶׂב.

מַכִּיר אֲנִי אֶת־הָאוֹתוֹת: לַשָּׁוְא כָּל־עֲמָלִי,

הָבָה אֶעֱזֹב אֶת־הָאֳנִיָּה פֹּה עַל הַחוֹף."


וַיּוֹסִיפוּ וַיֵּלְכוּ עֶשְׂרִים שָׁעוֹת־מִשְׁנֶה

וַיִּרְאוּ אֶת־רֹאשׁ מִגְדַּל־הַהֵיכָל.

מִקֵּץ עֶשְׂרִים שָׁעוֹת־מִשְׁנֶה סָעֲדוּ אֶת־לִבָּם,

מִקֵּץ שְׁלֹשִׁים שָׁעוֹת־מִשְׁנֶה יָשְׁבוּ לָנוּחַ.

וַיָּבֹאוּ אוּרוּכָּה אֲשֶׁר סָבִיב חוֹמָה לָהּ.


אָמַר לוֹ גִלְגָּמֶשׁ, לְאוּר־שַׁנַבִּי הַגַּשָּׁר:

"אוּר־שַׁנַבִּי, עֲלֵה בְחוֹמַת אוּרוּךְּ הַבְּצוּרָה,

פַּסְּגָה חוֹמוֹתֶיהָ הַבְּצוּרוֹת,

שׁוּר אֶת־מוֹסְדוֹתֶיהָ מֶה חָזְקוּ,

שִׁיתָה לֵב לְבִנְיְנֵי־תָקְפָּהּ,

בִּלְבֵנִים כּוֹנְנוּ אוֹתָם, בִּלְבֵנִים שְׂרוּפוֹת־אֵשׁ,

שִׁבְעָה חַכְמֵי־חָרָשִׁים יְסָדוּהָ,

הֵמָּה יוֹעֲצַי הִתְווּ תַבְנִיתָהּ.

תִּהְיֶה לְךָ אֲחֻזָּה בִגְבוּלוֹת הָעִיר,

כֶּרֶם־חֶמֶד וְלִשְׁכַּת־פִּלַגְשִׁים,

בַּיִת לְךָ תִּבְנֶה בְאוּרוּךְּ."


 

לוּחַ שְׁנֵים־עָשָׂר    🔗

גִּלְגָּמֶשׁ מוֹלֵךְ בְּאוּרוּךְּ אֲשֶׁר חוֹמָה גְבוֹהָה לָהּ,

אוּלָם לִבּוֹ לֹא יֵדַע מַרְגּוֹעַ,

לִדְבַר אֶנְגִּידוּ חָרָה לוֹ מְאֹד.

וַיֹּאמֶר בְּלִבּוֹ לַחְדֹּר לְסוֹד הַמָּוֶת,

לָרֶדֶת־שְׁאוֹל תַּחְתִּית אֶל הֵיכַל אִירְקָלָה,

לִרְאוֹת אֶת־אֶנְגִּידוּ, לְדָרְשׁוֹ אֶל גּוֹרַל הַמֵּתִים.


וַיִּקְרָא לָאוֹבוֹת וְלַיִּדְּעוֹנִים:

"הַעֲלוּ לִי אֶת־אֶנְגִּידוּ,

הַגִּידוּ לִי, אֵיכָה אֶרְאֶה אֶת־צֵל אֶנְגִּידוּ

וְאֶדְרְשֶׁנּוּ לְגוֹרַל יוֹרְדֵי־דוּמָה."


עָנָה לוֹ הַכֹּהֵן הַגָּדוֹל מֵאֶחָיו:

"גִּלְגָּמֶשׁ, אִם יֵשׁ אֶת־נַפְשְׁךָ לָרֶדֶת שְׁאוֹל־תַּחְתִּית,

אֶל מִשְׁכְּנוֹת אֱלֹהֵי־הַמֵּתִים הַגָּדוֹל,

בְּגָדִים צוֹאִים תִּלְבָּשׁ,

אַל תָּסוּךְ בְּשָׂרְךָ בַּשֶּׁמֶן הַטּוֹב

וְלֹא יָשִׁיתוּ עָלֶיךָ הַמֵּתִים,

כִּי יָבֹאוּ לְרֵיחַ־הַנִּיחוֹחַ;

אֶת־קַשְׁתְּךָ לֹא תוֹרִיד עַל הָאָרֶץ,

וְלֹא יְסֻבּוּךָ כָּל־הַנּוֹפְלִים בַּקֶּשֶׁת;

אֶת־שַׁרְבִיט־הַמֶּלֶךְ לֹא תַחֲזִיק בְּיָדֶךָ,

וְלֹא יִבָּעֲתוּ מִפָּנֶיךָ רוּחוֹת הַמֵּתִים.

נְעָלִים לֹא תִנְעַל לְרַגְלֶיךָ,

חֶרֶשׁ חֶרֶשׁ תִּצְעָד.

אֶשְתְּךָ אֲשֶׁר אָהַבְתָ לֹא תִשַּׁק לָהּ,

וְאִשְׁתְּךָ אֲשֶׁר שָׂנֵאתָ אַל תַּכֶּה;

יַלְדְּךָ אֲשֶׁר אָהַבְתָּ אַל תְּלַטֵּף,

וְיַלְדְּךָ אֲשֶׁר שָׂנֵאתָ אַל תַּכֶּה,

וְלֹא תִהְיֶה עָלֶיךָ אֵימַת דּוּמָה,

וְנִין־עַצוּ הָאֵם, אֲשֶׁר מִשְׁכָּנָהּ שָׁם,

אֲשֶׁר חֵיק־קָדְשָׁהּ לֹא יְכַסֶּה כָל־בֶּגֶד,

לֹא תַרְשֶׁה לְאֶנְגִּידוּ וְיַעֲלֶה."


וְלֹא עָשָׂה גִלְגָּמֶשׁ כַּעֲצַת הַחֲכָמִים:

בְּגָדִים נְקִיִּים לָבַשׁ לִבְשָׂרוֹ,

סָךְ אֶת־בְּשָׂרוֹ בְּשֶׁמֶן־רִקּוּחִים,

הוֹרִיד קַשְׁתּוֹ עַל הָאָרֶץ,

נָעַל נְעָלִים לְרַגְלָיו, צָעַד גַּסּוֹת,

נָשַׁק אֶת־אִשְׁתּוֹ אֲשֶׁר אָהֵב,

הִכָּה אֶת־אִשְׁתּוֹ אֲשֶׁר שָׂנֵא,

לִטֵּף אֶת־יַלְדּוֹ אֲשֶׁר אָהֵב,

הִכָּה אֶת־יַלְדּוֹ אֲשֶׁר שָׂנֵא –

וַתְּהִי עָלָיו אֵימַת שְׁאוֹל־תָּחַת,

וְנִין־עַצוּ הָאֵם, אֲשֶׁר מִשְׁכָּנָהּ שָׁם,

אֲשֶׁר חֵיק־קָדְשָׁהּ לֹא יְכַסֶּה כָל־בֶּגֶד,

לֹא נָתְנָה לְאֶנְגִּידוּ לַעֲלוֹת מִשְּׁאוֹל־תָּחַת.

נַמְתָּר לֹא לְקָחָהוּ, הֹוָה לֹא לְקָחַתּוּ,

שְׁאוֹל־תַּחַת תָּפְשָׂה אוֹתוֹ;

שׁוֹמְרוֹ הָאַכְזָר אֲשֶׁר לְנֶרְגַּל לֹא לְקָחָהוּ,

שְׁאוֹל־תַּחַת תָּפְשָׂה אוֹתוֹ;

עַל שְׂדֵה־קְרָב לָאִישִׁים לֹא נָפַל,

שְׁאוֹל־תַּחַת תָּפְשָׂה אוֹתוֹ;

נִינְסוּן לְאֶנְגִּידוּ תִבְכֶּה,

לְעַבְדָּהּ אֵאַבָּנִי תִתְאַבָּל.


וְגִלְגָּמֶשׁ שָׂם פָּנָיו אֶל הַמִּדְבָּר הַגָּדוֹל,

פָּנָה אֶל שַׁעֲרֵי שְׁאוֹל־תָּחַת.

בָּא אֶל מִשְׁכְּנוֹת אִירְקָלָה הַקּוֹדְרִים,

שָׂם אֶת־פָּנָיו מְעוֹנָה, כָּל־בָּאֶיהָ לֹא יְשוּבוּן.

הָלַךְ בְּדֶרֶךְ, אֵין תְּשׁוּבָה לָהּ,

נָוֶה, אֲשֶׁר אֵין אוֹר לַיּוֹשְׁבִים בּוֹ,

אָבָק מִן־הָאֲדָמָה מַאֲכָל לָמוֹ,

חֵמָה לָמוֹ לְטֶרֶף.

לֹא יִרְאוּ בְאוֹר־שֶׁמֶשׁ, בְּמַחֲשַׁכִּים יֵשֵׁבוּ,

יִלְבְּשׁוּ נוֹצוֹת וּכְנָפַיִם לָהֶם כְּלַצִּפּוֹר.


דָּפַק עַל הַשְּׁעָרִים וַיְדַבֵּר לַשּׁוֹעֵר:

"הֵיָה! פְּתַח לִי הַשְּׁעָרִים שְׁעָרֶיךָ וְאָבֹא בָם,

כִּי אִם לֹא תִפְתַּח אֶת־הַשְּׁעָרִים

וְנִפַּצְתִּי אֶת־הַדְּלָתוֹת וְגִדַּעְתִּי אֶת־הַבְּרִיחַ!"


פָּתַח לוֹ הַשּׁוֹעֵר שַׁעַר רִאשוֹן

וַיִּשָּׂא מִמֶּנּוּ אֶת־אַדַּרְתּוֹ.

דֶּרֶךְ שִׁבְעָה שְׁעָרִים הוֹבִיל אוֹתוֹ

וַיִּשָּׂא מִמֶּנּוּ אֶת־כָּל־בְּגָדָיו,

וַיָּבֹא עָרֹם בְּמַמְלֶכֶת הַמֵּתִים.


וַיִּגַּשׁ אֶל אֶרֶשְׁכִּיגַל, הָאֵלָה הַגְּדוֹלָה, וַיֹּאמַר:

"יַעַל־נָא אֵלַי אֶנְגִּידוּ יְדִידִי

וְאֶדְרְשֵׁהוּ אֶל גּוֹרַל הַמֵּתִים."


וְלֹא נְתָנָהוּ הַשּׁוֹעֵר וְהַשּׁוֹטֵר לָצֵאת,

עָצְרָה בַעֲדוֹ הָאֵלָה.

וַתֹּאמֶר אֶרֶשְׁכִּיגַל הַגְּדוֹלָה לְגִלְגָּמֶשׁ לֵאמֹר:

"שׁוּבָה עַל־עֲקֵבְךָ, אֶת־הַמֵּת לֹא תִרְאֶה.

אִישׁ לֹא קָרָא לְךָ הֲלוֹם!"


נֶעֱצָב אֶל־לִבּוֹ עָלָה מָעְלָה,

לָקַח אֶת־בְּגָדָיו וַיַּעֲבֹר אֶת־שִׁבְעַת הַשְּׁעָרִים.


וַיֵּלֶךְ גִּלְגָּמֶשׁ אֶל אֶקוּר, אֶל הֵיכַל אֶנְלִיל:

"אָבִי אֶנְלִיל! פִּתְאֹם נוֹקַשְׁתִּי בַפָּח!

שָׁחָה לֶעָפָר נַפְשִׁי בַמּוֹקֵשׁ.

נִין־עַצוּ לֹא נָתְנָה לְאֶנְגִּידוּ לַעֲלוֹת מִשְּׁאוֹל־תָּחַת.

לֹא נַמְתָּר לְקָחָהוּ, לֹא אָסוֹן לְקָחָהוּ,

שְׁאוֹל־תַּחַת תָּפְשָׂה אוֹתוֹ;

לֹא שׁוֹמֵר־הַמָּוֶת הָאַכְזָר שֶׁל נֶרְגַּל לְקָחָהוּ,

שְׁאוֹל־תַּחַת תָּפְשָׂה אוֹתוֹ;

לֹא עַל שְׂדֵה־קְרָב שֶׁל אִישִׁים נָפַל,

שְׁאוֹל־תַּחַת תָּפְשָׂה אוֹתוֹ."

וְלֹא עָנָה אוֹתוֹ אֶנְלִיל דָּבָר.


"אָבִי סִין! פִּתְאֹם נוֹקַשְׁתִּי בַפָּח,

שָׁחָה לֶעָפָר נַפְשִי בַמּוֹקֵשׁ.

נִין־עַצוּ לֹא נָתְנָה לְאֶנְגִּידוּ לַעֲלוֹת מִשְּׁאוֹל־תָּחַת.

לֹא נַמְתָּר לְקָחָהוּ, לֹא אָסוֹן לְקָחָהוּ,

שְׁאוֹל־תַּחַת תָּפְשָׂה אוֹתוֹ;

לֹא שׁוֹמְרוֹ הָאַכְזָר שֶׁל נֶרְגַּל לְקָחָהוּ,

שְׁאוֹל־תַּחַת תָּפְשָׂה אוֹתוֹ;

לֹא עַל שְׂדֵה־קְרָב שֶׁל אִישִׁים נָפַל,

שְׁאוֹל־תַּחַת תָּפְשָׂה אוֹתוֹ."

וְלֹא עָנָה אוֹתוֹ סִין דָּבָר.


"אָבִי אֵאָה! פִּתְאֹם נוֹקַשְׁתִּי בַפָּח,

שָׁחָה לֶעָפָר נַפְשִי בַמּוֹקֵשׁ.

נִין־עַצוּ לֹא נָתְנָה לְאֶנְגִּידוּ לַעֲלוֹת מִשְּׁאוֹל־תָּחַת.

לֹא נַמְתָּר לְקָחָהוּ, לֹא אָסוֹן לְקָחָהוּ,

שְׁאוֹל־תַּחַת תָּפְשָׂה אוֹתוֹ;

לֹא שׁוֹמְרוֹ הָאַכְזָר שֶׁל נֶרְגַּל לְקָחָהוּ,

שְׁאוֹל־תַּחַת תָּפְשָׂה אוֹתוֹ;

לֹא עַל שְׂדֵה־קְרָבוֹת לָאִישִׁים נָפַל,

שְׁאוֹל־תַּחַת תָּפְשָׂה אוֹתוֹ."


וַיִּשְׁמַע אֵאָה אֶת־דְּבָרָיו,

וַיְדַבֵּר לְנֶרְגַּל הָאַדִּיר, הַשּׁוֹלֵט בַּמֵּתִים:

"נֶרְגַּל הָאַדִּיר, עֲשֵׂה כְמִצְוָתִי.

פְּתַח סֶדֶק בְּחֵיק הָאָרֶץ,

וְהַעֲלֵיתָ אֶת־צֵל אֶנְגִּידוּ

וִידַבֵּר אֶל אָחִיו, אֶל גִּלְגָּמֶשׁ."


וַיְהִי כִּשְמֹעַ נֶרְגַּל אֶת־דְּבָרָיו,

מִהֵר וַיִּפְתַּח סֶדֶק בָּאֲדָמָה

וַיַּעַל אֶת־צֵל אֶנְגִּידוּ מָעְלָה.

הִכִּירוּ אִישׁ אֶת־אָחִיו וְעָמְדוּ מֵרָחוֹק,

נִדְבְּרוּ אִישׁ אֶת רֵעֵהוּ: גִּלְגָּמֶשׁ קוֹרֵא

וְהַצֵּל יַעֲנֶנּוּ.


וַיִּפְתַּח גִּלְגָּמֶשׁ אֶת־פִּיהוּ וַיֹּאמַר:

"הוֹדִיעֵנִי, יְדִידִי, הוֹדִיעֵנִי

אֶת־מִשְׁפַּט שְׁאוֹל־תַּחְתִּית אֲשֶׁר רָאִיתָ!"


"לֹא אוּכַל, יְדִידִי, לְהַגִּידוֹ לָךְ,

לֹא אוּכַל לְהוֹדִיעֶנּוּ,

כִּי אִם־אֲנִי מוֹדִיעַ לְךָ אֶת־מִשְׁפַּט שְׁאוֹל־תַּחְתִּית

אֲשֶׁר רָאִיתִי

וְיָשַׁבְתָּ לָאָרֶץ וְנָהַמְתָּ כָּל־הַיָּמִים."


“כִּי־אָז אֵשֵׁב לָאָרֶץ וְאֶהֱמֶה כָל־הַיָּמִים!”


"רְאֵה אֶת יְדִידְךָ, אֲשֶׁר חָבַקְתָּ וְשָׂמַח לִבְּךָ,

הִנֵּה הַתּוֹלָעִים אוֹכְלִים אוֹתוֹ כְבֶגֶד־עִדִּים.

אֶנְגִּידוּ יְדִידְךָ, אֲשֶר יָדְךָ מִשְׁשָה אוֹתוֹ,

הָיָה כֶעָפָר מִן הָאֲדָמָה, מְלֹא אֲבַק־אֶרֶץ,

נָפַל בָּאָבָק וַיְהִי לְאָבָק."


וַיּוֹסֶף גִּלְגָּמֶשׁ וַיִּשְׁאַל אֶת־יְדִידוֹ:

“הֲרָאִיתָ שָׁם אֶת־הַנּוֹפֵל בֶּחָרֶב?”

"כֵּן אֲנִי רְאִיתִיו;

עַל יָצוּעַ יִשְׁכַּב, יִשְׁתֶּה מַיִם חַיִּים."


“הֲרָאִיתָ שָׁם אֶת־הַנּוֹפֵל בַּמִּלְחָמָה?”

"כֵּן אֲנִי רְאִיתִיו.

אָבִיו וְאִמּוֹ תּוֹמְכִים אֶת־רֹאשׁוֹ,

אִשְׁתּוֹ תִכָּפֵף עָלָיו."


“הֲרָאִיתָ אֶת־הָאִישׁ, אֲשֶׁר פִּגְרוֹ מֻשְׁלָךְ בַּשָּׂדֶה?”

"כֵּן אֲנִי רְאִיתִיו.

צִלּוֹ לֹא יֵדַע מָנוֹחַ עַל־אֲדָמוֹת."

“הֲרָאִיתָ שָׁם אֶת־מִי שֶׁאֵין דּוֹאֲגִים לוֹ?”

"כֵּן אֲנִי רְאִיתִיו.

שְׁיָרִים הִשְׁלִיכוּ עַל־פְּנֵי־חוּץ לְמַאֲכָל לוֹ."


חָפֵץ גִּלְגָּמֶשׁ לְהוֹסִיף וְלִשְׁאֹל,

וְהִנֵּה נֶעְלַם פִּתְאֹם צֵל אֶנְגִּידוּ.


וַיָּשָׁב גִּלְגָּמֶשׁ אוּרוּכָּה הָעִיר, אֲשֶׁר סָבִיב חוֹמָה לָהּ;

וְהֵיכַל הַר־קָדְשָׁהּ מִתְנַשֵּׂא מָעְלָה.

וַיִּשְׁכַּב גִּלְגָּמֵשׁ לִישֹׁן, וַיִּתְקְפֵהוּ הַמָּוֶת.

בְּאוּלַם אַרְמוֹנוֹ הַמַּבְרִיק.



  1. במקור, שמות המשתתפים באֶפוֹס מופיעים בסיום העלילה – הערת פב"י.  ↩

  2. הבבלים היו מונים לשעות כפולות.  ↩

  3. גַר – י"ב אַמה.  ↩

  4. סברה אחרת: הֲרוֹס בית.  ↩

  5. מידה של נוזלים.  ↩