אָחִינוּ הֻכָּה הֻכָּה אִישׁ־הַחַיִל

בֶּן־אִמֵּנוּ בְּמַאֲרַב חֲצֵרִים

בִּנְךָ בְּמִפְלְשֵׁי לַיִל

טֹרַף בִּנְךָ בְּמַעֲוֵה דָרֶךְ

לֻקַּח וְאֵין מֵשִׁיב

צְבִי תִפְאַרְתְּךָ אֲשֶׁר בּוֹ תִתְבָּרַךְ:

תִּדְרְכִי נַפְשִׁי נָקָם:

אִמֵּנוּ בוֹכִיָּה אֵין לָהּ מְנַחֵם

אַף עֵינָהּ יוֹרְדָה מַיִם

עַל בְּנָהּ אֲשֶׁר נִתַּשׁ

אֲשֶׁר שִׁקּוּ דָמָיו הָאָרֶץ

אֲשֶׁר הֻגְּרוּ דָמָיו חִנָּם:

כִּלְיוֹת אֶרֶץ יֵרֵד דָּם

וְשַׁוְעָתוֹ מִתְּהוֹם עָלָתָה

דָּמִים מִן־אֲדָמוֹת יִצְעָקוּ

מִן־אֲדָמָה כִּי תְכַסֵּם:

תִּדְרְכִי נְקָמוֹת נַפְשִׁי:

הֲלֹא נְשַׁנֵּס

הֲלֹא נַחְגּוֹרָה

הֲלֹא תַעֲלֶה בְאַפֵּנוּ חֲמָת

הֲלֹא נְכוֹנֵן חִצִּים עַל־יָתֶר:

לְהָשֵׁם מוֹשַׁב עַוָּל

וְשַׁכֵּל יוֹלַדְתּוֹ

לִהְיוֹת דֳּמִי לְדַם־אָח

לִהְיוֹת לְנִצְחוֹ דֳמִי

לְחַיָּתוֹ אֲשֶׁר נִזָּתָה:

נַפְשִׁי נָקָם תִּדְרוֹכִי:

הִנָּשְׂאוּ בְנֵי־אִמִּי

קוּם אָבִי לִגְאוֹל שָׁפוּךְ

אַב־נְקָמוֹת הוֹפִיעָה

אַב־הַבָּנִים הֵרוֹם

אַב־נְקָמוֹת הוֹשִׁיעָה

תִּלְהַט חֶרֶב אַב־שִׁלֵּם:

הִנֵּה זֶה אִישׁ אֲשֶׁר כָּלָה וְנוֹתָר:

אִם יוֹחִיל – וְנִסְכַּל

יַעַשׂ צִיץ – וְנָבַל

וְדַרְכּוֹ – חַתְחַתִּים וָדֶחִי

הוּא יֵלֵד – וְשָׁכַל

הוּא יִשְׂרֶה – וְנָפַל

אַךְ לִגְוֹעַ כִּי תַם – הוּא יֶחִי

הִנֵּה זֶה אִישׁ אֲשֶׁר אֻכַּל וְשָׁאַר:

אִם צֹרֵב – לֹא נִצְמַת

אִם נָבוֹס – לֹא הֻכַּת

אִם כֹּרַת – מַצַּבְתּוֹ בְאַדִּיר

הֵן מֶרְיוֹ לֹא יִשַׁת

לִמְנוּחוֹת לֹא יִפַּת

וְשַׂקּוֹ בְשָׁנִי לֹא הֵמִיר

הִנֵּה זֶה אִישׁ אֲשֶׁר עָרוּהוּ וָחָי:

כִּי אִם קֶטֶל יִכְבַּד

וְאָחִיו אִם בָּגַד

הוּא מֵאֹרַח לֹא יֵט וְלֹא סָר

נְתִיבוֹ לוֹ אֶחָד

וְעַד־קֵץ בּוֹ יִצְעַד

וְעַד־קֵץ בּוֹ יֵלֵךְ כִּי נָדַר

הִנֵּה־זֶה־אִישׁ אֲשֶׁר כָּלָה וְנוֹתָר:

הִנֵּה־זֶה־אִישׁ אֲשֶׁר אֻכַּל וְשָׁאַר:

הִנֵּה־זֶה־אִישׁ אֲשֶׁר עָרוּהוּ וָחָי:

אָחִי הַנָּד בָּעֲרָבָה

אַתָּה הַנָּד בָּעֲרָבָה

עַתִּיק מִנִּי־עָרֶשׂ

גָּמוּל מִצֵּל־קוֹרָה

חִידָה לְאַחִים

מְחִתַּת בְּנֵי־אֵם:

אַתָּה הַנָּד בָּעֲרָבָה

מֶשֶׁךְ־שְׁנֵי־אִישׁ וּמִבְחַר־יְמוֹת־אָדָם

עָרִיר וְגָבֹהַּ תַּחַת שְׁמֵי־אֵלִים

נָזִיר וְגִבּוֹר תַּחַת שְׁמֵי־כִּפָּת:

אָחִי הַנָּד בָּעֲרָבָה אָחִי הַנָּד בָּעֲרָבָה

שׁוֹתֵת וְכָלֶה עַל־פְּנֵי־אֶרֶץ־רַבָּה

שׁוֹאֵל וְאָבֵד בְּאַפְסֵי־אֶרֶץ־רַבָּה

אֲשֶׁר לֵיחוֹ יְדַשֵּׁן עָפָר

מִדָּמוֹ תְנוּבַת שָׂדַי

נִבְלָתוֹ מְכוֹן בַּיִת

אֲשֶׁר בִּסְפוֹתוֹ לְאֶחָיו שָׁלוֹם

תְּשׁוּעָה לִבְנֵי אִמּוֹ:

אַתָּה הַנָּד בָּעֲרָבָה

אָחִי הַנָּד בָּעֲרָבָה

מִי־יִתֵּן נוּדִי עִמָּךְ

מִי־יִתֵּן נוּדִי תַחְתֶּיךָ: