רקע
שלמה אבן גבירול
[נִחַר בְּקָרְאִי גְּרוֹנִי]
mנחלת הכלל [?]
tשירה

ומן מטולאת קצאידה ובדיע שערה קצידה קאלהא חין כ͘רוג͘ה מן סרקוסטה [ומשירותיו וממופלאי שיריו שירה שהוא אמר בעת צאתו מסאראגוסה]


נִחַר בְּקָרְאִי גְּרוֹנִי / דָּבַק לְחִכִּי לְשׁוֹנִי

הָיָה לְבָבִי סְחַרְחַר / מֵרֹב כְּאֵבִי וְאוֹנִי

גָּדַל יְגוֹנִי וְחָדַל / מִתֵּת תְּנוּמָה לְעֵינִי

כַּמָּה אֲיַחֵל וְכַמָּה / יִבְעַר כְּמוֹ־אֵשׁ חֲרוֹנִי

עַל־מִי אֲדַבֵּר וְאָעִיד / וּלְמִי אֲסַפֵּר יְגוֹנִי

לוּ יֵשׁ מְנַחֵם מְרַחֵם / עָלַי וְיֹאחֵז יְמִינִי

אֶשְׁפֹּךְ לְפָנָיו לְבָבִי / אַגִּיד קְצֵה עִצְּבוֹנִי

אוּלַי בְּזָכְרִי יְגוֹנִי / אֶשְׁקוֹט מְעַט מִשְּׁאוֹנִי

שֹׁאֵל שְׁלוֹמִי קְרַב־נָא / וּשְׁמַע כְּמוֹ־יָם הֲמוֹנִי

אִם־יֵשׁ לְבָבְךָ כְּשָׁמִיר / יֵרַךְ לְרֹב דִּֽרְאוֹנִי

אֵיךְ תַּחֲשֹׁב כִּי־אֲנִי חַי / עַל־דַּעְתְּךָ דַאֲבוֹנִי

הַמְעַט הֱיוֹתִי בְּתוֹךְ עָם / יַחְשֹׁב שְׂמֹאלוֹ יְמִינִי

נִקְבָּר אֲבָל לֹא־בְמִדְבָּר / כִּי אִם־בְּבֵיתִי אֲרוֹנִי

נִכְאָב בְּלִי־אֵם וְלֹא־אָב / צָעִיר וְיָחִיד וְעָנִי

נִפְרָד בְּלִי־אָח וְאֵין לִי / רֵעַ לְבַד רַעֲיוֹנִי

אֶמְסֹךְ בְּדָמִי דְמָעַי / אֶמְסֹךְ דְּמָעַי בְּיֵינִי

אֶצְמָא לְרֵעַ וְאֶכְלֶה / טֶרֶם כְּלוֹת צִמְּאוֹנִי

כְּאִלּוּ שְׁחָקִים וְחֵילָם / בֵּין תַּאֲוָתִי וּבֵינִי

נֶחְשָׁב כְּמוֹ גֵר וְתוֹשָׁב / יוֹשֵׁב כְּשֶׁבֶת יְעֵנִי

בֵּין כָּל־פְּתַלְתֹּל וְסָכָל / לִבּוֹ כְּלֵב תַּחְכְּמֹנִי

זֶה יַשְׁקְךָ רֹאשׁ פְּתָנִים / זֶה יַחֲלִיק רֹאשׁ וְיָנִי

יָשִׂים אָרְבּוֹ בְקִרְבּוֹ / וְיֹאמַר לְךָ בִּי אֲדֹנִי

עָם נִמְאֲסוּ־לִי אֲבֹתָם / מִהְיוֹת כְּלָבִים לְצֹאנִי

לֹא יַאֲדִימוּ פְנֵיהֶם / כִּי אִם־צְבָעוּם בְּשָׁנִי

הֵם כַּעֲנָקִים בְּעֵינָם / הֵם כַּחֲגָבִים בְּעֵינִי

בִּשְׂאֵת מְשָׁלַי יְרִיבוּן / עִמִּי כְּמוֹ עִם־יְוָנִי

דַּבֵּר שְׂפַת־עָם וְנִשְׁמַע / כִּי־זֶה לְשׁוֹן אֶשְׁקְלוֹנִי

עַתָּה אֲדִקֵּם כְּמוֹ־טִיט / כִּי קִלְּשׁוֹנִי לְשׁוֹנִי

אִם־אָזְנְכֶם הִיא עֲרֵלָה / מַה־יַּעֲשֶׂה פַעֲמֹנִי

לֹא יֽוּכְלוּ צַוְּארֵיכֶם / לָשֵׂאת זְהַב שַׂהֲרֹנִי

לוּ פָעֲרוּ הַפְּתָאיִם / פִּיהֶם לְמַלְקוֹשׁ עֲנָנִי

נָטַף בְּשָׂמִי עֲלֵיהֶם / בָּשַׂם עֲנַן קִנְּמוֹנִי

אוֹי לַתְּבוּנָה וְאוֹי לִי / כִּי־גוֹי כְּמוֹ־זֶה שְׁכֵנִי

דַּעַת אֱלֹהִים יְשִׂימוּן / כָּאוֹב וְכַיִּדְּעוֹנִי

עַל־זֹאת אֲיֵלִיל וְאֶסְפֹּד / אָשִׁית בְּמוֹ־שַׂק מְלוֹנִי

אָכֹף כְּאַגְמֹן וְאָצוּם / שֵׁנִי חֲמִישִׁי וְשֵׁנִי

מַה־זֶּה אֲיַחֵל אֲנִי עוֹד / אוֹ מַה־יְּהִי בִטְּחוֹנִי

עֵינִי בְּתֵבֵל תְּשׁוֹטֵט / לֹא־תֶחֱזֶה־בָּהּ רְצוֹנִי

תִּיקַר תְּמוּתָה בְעֵינִי / תֵּקַל אֲדָמָה בְאָזְנִי

אִם־יֵשְׂטְ לִבִּי לְדַרְכָּה / לִטְמוֹן בְּחֻבִּי עֲוֹנִי

יָשֹׁב עֲמָלִי בְרֹאשִׁי / יֵרֵד בְּחֵיקִי זְדֹנִי

נַפְשִׁי כְּבוֹדָהּ תְּמָאֵן / כִּי עִם־כְּבוֹדָה קְלוֹנִי

לֹא־אֶעֱלָז־בָּהּ לְעוֹלָם / לֹא־יַעֲלָז־בָּהּ גְּאוֹנִי

לוּ קָֽרְאוּ־לִי בְּנֵי־עָשׁ / סוּרָה שְׁבָה־פֹּה פְּלֹנִי

כִּי־הָֽיְתָה הָאֲדָמָה / כָּעֹל עֲלֵי צַוְּרֹנִי

מַה־לִּי אֲנִי עוֹד בְּתֵבֵל / לוּלֵי שְׂאֵת עִוְּרוֹנִי

נַפְשִׁי בְּמוֹתִי תְרַנֵּן / לוּ מָֽצְאָה צוּר מְעוֹנִי

אָקֻץ בְּחַיַּי וְאֶמְאַס / לִהְיוֹת בְּשָׂרִי מְכוֹנִי

כִּי יוֹם שְׂשׂוֹנִי אֲסוֹנִי / וּבְיוֹם אֲסוֹנִי שְׂשׂוֹנִי

אִיגַע לְהָבִין וְאֵדַע / כִּכְלוֹת בְּשָׂרִי וְאוֹנִי

כִּי סוֹף אֲנָחָה הֲנָחָה / וְעֵקֶב רְזוֹנִי מְזוֹנִי

אֶדְרֹשׁ בְּעוֹדִי אֲחַפֵּשׂ / כְּמִצְוַת שְׁלֹמֹה זְקֵנִי

אוּלַי מְגַלֶּה עֲמֻקוֹת / יְגַלֶּה תְבוּנָה לְעֵינִי

כִּי הִיא מְנָתִי לְבַדָּהּ / מִכָּל־עֲמָלִי וְהוֹנִי.

המלצות קוראים
תגיות