רקע
שלמה אבן גבירול
[רְבִיבֵי דִמְעֲךָ הָיוּ רְסִיסִים]
mנחלת הכלל [?]
tשירה

ולה איצ֗א פי וצף אלמה [ולו גם כן בתיאור כאבו]


רְבִיבֵי דִמְעֲךָ הָיוּ רְסִיסִים / וְהָיוּ הַבְּקָעוֹת כָּֽרְכָסִים

וְאֵיכָה לֹא־תְזַמֵּר הַזְּמוֹרָה / וְלָמָּה לֹא־תְהַלֵּל הָעֲסִיסִים

אֲשֶׁר רָדְפוּ יְגוֹנֶיךָ וְנָסוּ / מְנֻסַת בֶּן־נְבָט אֶל־תַּחְפְּנֵסִים

עֲנִיתִיו הַלְּבָבוֹת שָֽׁכְחוּ רִישׁ / וְשָׂמְחוּ בָם כְּשִׂמְחָה בַנְּכָסִים

וְגַם־שָׁטוּ וְעָטוּ בַתְּלָאוֹת / וְהָיוּ עַל־כְּנַף־רוּחַ עֲמֻסִים

בְּנֵיהֶם עָֽזְבוּ בַבַּר כְּעֹרֵב / וְיַלְדֵיהֶם הֱנִסוּם כַּפְּרָסִים

וְלֹא־הָיָה גְבִיעֵנוּ כְּיַם־סוּף / עֲדֵי הָיוּ יְגוֹנֵינוּ חֲנֵסִים

וְאוּלָם הֶעֱלָה קָצִיר סְפִיחִים / וְגַם עָשׂוּ סְפִיחֵיהֶם שְׁחִיסִים

וְהִנֵּה הֶחֳלִי בִלָּה בְשָׂרִי / וְשָׂם בִּשְׁאָר שְׁאֵרִי אֵשׁ הֲמָסִים

עֲדֵי הָיוּ נְזָמֵינוּ עֲטָרוֹת / וְהָיוּ טַבְּעֹתֵינוּ עֲכָסִים

וּבִעֵר הַקְּרָבִים עַל־יְקוֹד־אֵשׁ / וְדִמִּינוּ עֲצָמֵינוּ נְמַסִּים

קְרָבִים שָֽׁלְחוּ בָהֶם חֳלָיִים / וּמִצְוַת הַזְּמַן שֹׁמְרִים וְעֹשִׂים

וְאֵיךְ לֹא‏־יִֽהְיוּ אֶפֶס וְתֹהוּ / עֲצָמוֹת בַּתְּלָאוֹת הֵם אֲבוּסִים

חֲמָסִי עַל־חֳלִי כִּלָּה שְׁאֵרִי / וְשָׂם אַלּוֹן בְּעֵינַי עֵין הֲדַסִּים

וְעַל־הַלַּֽיְלָה אָשִׁית חֲמָסִי / אֲשֶׁר שָׁת אָהֳלֵי־חֹשֶׁךְ פְּרֻשִׂים

וְאֶהְגֶּה־בָּם כְּיוֹנִים וַאֲצַפְצֵף / בְּשִׂיחִי כַּעֲגוּרִים אוֹ כְסִיסִים

וְלוּ תִרְאֶה שְׁחָקִים יִשְׁלְחוּ שַׁי / וְיוֹבִילוּן לְעַפְעַפַּי שְׁבִיסִים

וְעַפְעַפַּי בְּהַבִּיטִי אֲלֵיהֶם / כְּלֻלָאוֹת וְהֵמָּה הַכְּבָשִׂים

חֲשַׁבְתִּימוֹ אֲחֵי בָרָק וְהִנֵּה / בְּאָחוֹר שִׁבְּחוּ רוּחָם כְּסוּסִים

וְדִמִּיתִים מְיֻדָּעֵי עֲשָׂהאֵל / וְהִנֵּה הֵם אֲחֵי פִסְחֵי יְבוּסִים

בָּאָמְרִי מַה־לְּבוּשׁ קָדִים יְשִׁיבוּן / תְּכֵלֶת וַעֲלוֹת שַׁחַר מְכַסִּים

וְעֵת כִּי־הֶעֱלָה שַׁחַר דְּגָלָיו / וְהֵרִים כּֽוֹכְבֵי־בֹקֶר כְּנִסִּים

קְרָבַי שָֽׁקְטוּ כִּי‏־נִמְלְאוּ טָל / וְעָלַי נִגְּרוּ נִטְפֵי רְסִיסִים.

המלצות קוראים
תגיות