[הֲרִיחוֹתִי הֲדַסֵּי הַשְּׁלוֹמִים] / ר' משה אבן-עזרא

הֲרִיחוֹתִי הֲדַסֵּי הַשְּׁלוֹמִים / בְּמִכְתָּב אוֹ עֲרוּגַת הַבְּשָׂמִים

וְאָרִיתִי בְּיַד רַעְיוֹן כְּפָריִם / וְרָאִיתִי בְּעֵין־לֵב יַהֲלֹמִים

בְּרֹמִים מַעֲשֵׂה סַפִּיר וְהֵמָּה / בְּנֹפֶךְ אוֹ בְרֹק הָעֵט רְקוּמִים

נְאֻם הֶעְרִים בְּחָכְמָתוֹ פְתָאיִם / וְנִיב פִּתָּה בְעָרְמָתוֹ עֲרוּמִים

וְשִׁיר נָפַל צְבָא־שַׁחַק לְחִנּוֹ / וְצוּפֵי מַעֲנָיו כּוֹשֵׁל מְקִימִים

קְרָאתִיהוּ וּמֵי עֵינַי יְזוּבוּן / וְהַמַּיִם אֱמֶת כַּדָּם אֲדֻמִּים

וּמָחִיתִי יְפִי טוּרָיו בְּדִמְעִי / וְשִׁחַתִּי דְּבָרָיו הַנְּעִימִים

כְּתָב דּוֹד נִתְּקוּ חַבְלֵי אֲהָבָיו / עֲדֵי חַבְלֵי יְצֻרָיו בַּחֲלֹמִים

מְצוֹדִים אֶפְרְשָׂה לָהֶם בְּעַרְשִׂי / וְאֶשְׁטַח עַל־יְדֵי נוּמִי חֲרָמִים

וְנַפְשִׁי מִבְּלִי שֵׁנָה אֲיַשֵּׁן / וְלִבִּי עֵר וְאִם־עֵינַי עֲצוּמִים

וּמָה־אוֹחִיל וּמַסְעֵיהֶם רְחוֹקִים / וּמוֹרָאִים שְׁבִלֵיהֶם וְאֵמִים

יְלֵל לַיִל יְלַהְלֵהַּ וְאַךְ יִמְ־ / צְאוּ עֵינַי בְּנוֹת־שַׁחַר שְׁתֻמִים

יְגוֹן פֵּרוּד יְקִיצֵנִי וְצִירוֹ / יְצִיקֵנִי רְעוֹת כּוֹכְבֵי מְרוֹמִים

וְהַשַּׁחַק כְּמוֹ־אֹהֶל תְּכֵלֶת / בְּפָנָיו פֻּזְּרוּ אַבְנֵי לְשָׁמִים

חֲרוּזִים הֵם בְּצַוָּארוֹ וְכִימָה / וְעַיִשׁ עַל־שְׁתֵּי אָזְנָיו נְזָמִים

וְלַיִל יַעֲטֶה שַׂקּוֹ וּבָרָק / יְקַצֵּץ בַּעֲדוֹ חוּטֵי כְתָמִים

אֲדַמֵּהוֹ לְכוּשִׁי רָץ בְּפֶצַע / וְשִׂמְלָתוֹ מְגוֹלָלָה בְדָמִים

רְעִיתִימוֹ עֲדֵי הָיוּ מְעִילֵי / אֲפֵלָתוֹ בְּיַד־שַׁחַר פְרֻמִים

פְּתִילֵי זָהֳרוֹ נִרְאוּ בְנִשְׁפּוֹ / כְּשֵׂיבָה זָֽרְקָה בִּשְׂעַר עֲלָמִים

לְמִי אֶבְכֶּה וְאֶתְנוֹדֵדֵ וְעַל־מִי / דְּמָעַי אֶתְּנָה נֶגְדִּי אֲגַמִּים

הֲלָאַחִים אֱמֹר אוֹ לַקְּרֹבִים / וְאָכֵן בַּעֲנַן מֶרְחָק עֲלֻמִים

וְלַבָּנִים אֲשֶׁר עָטוּ יְגוֹנִים / וְהָיוּ מִפְּאֵר הוֹרִים עֲרוּמִים

וְאִם עַל־אֹהֲבִים שָׁלוֹם בְּפִיהֶם / זְמָן אִתִּי בְנֵי יָמִים שְׁלֵמִים

אֲשֶׁר אֶשְׁאַף לְרוּחַ אַהֲבָתָם / וְאִם לֹא־חוֹלֲלָה מֵאָז גְּשָׁמִים

בְּצוּר חַרְבּוֹ דְּרָכַי שָׂךְ זְמַנִּי / וְנָתַן כָּל־פְּרֻצֵיהֶם סְתֻמִים

וְאֵין אִישׁ בַּעֲדָם נִדְרָשׁ לְבַד אוֹב / וְלֹא נִשְׁאָל לְבַד קֹסֵם קְסָמִים

לְךָ שֹׁכֶן מְעוֹן שֵׂכֶל וְחֹפֵשׂ / בְּנֵר דֵּעוֹ חֲדָרָיו הַפְּנִימִים

וְהָאֹשֵׁר בְּדֶרֶךְ הָאֱמוּנָה / וְהַמֵּשִׂים לְיַד־חֶסֶד פְּעָמִים

לְךָ אֶצְעַק חֲמַס יָמִים אֲשֶׁר גָּ־ / בְרוּ מִנִּי וּבִי קָמוּ כְקָמִים

וְהִמְצוּנִי בְּיַד גֵּרוּת לְבַדִּי / וְאַךְ נַפְשִׁי וְהַיָּגוֹן תְּאוֹמִים

וְזֹקֶן שָֽׁקְדוּ עָלַי חֲיָלָיו / וְעֶדְנָה הָגְלְתָה הָגְלַת שְׁלוֹמִים

בְּשָׂרִי הַנְּדֹד בִּלָּה וְשִׁבַּר / כְּנֵבֶל יוֹֽצְרִים כָּתוֹת עֲצָמִים

וְלֹא הִתְוָה לְנוּדִי קֵץ וּמוֹעֵד / וְחֶזְיוֹנֵי יְמֵי חֶבְרָה חֲתוּמִים

קְוֻצּוֹת הַזְּמָן שָׂבוּ וְשָׁבוּ / זְקֻנֵי הַֽיְגוֹנִים לַעֲלוּמִים

לְחוּמִי מַאֲכָל חֵלֶף לְלַחְמִי / וְדַם דִּמְעִי מְקוֹם דִּמְעַת כְּרָמִים

וְהַמָּתוֹק בְּמַשְׁקִי רֹאשׁ פְּתָנִים / וְהַדָּשֵׁן לְפִי שֹׁרֶשׁ רְתָמִים

יְבַהְלֻנִי בְגֵרוּתִי שְׁמֻעוֹת / וּמִכְאֹבִים גְּדֹלִים וַעֲצֻמִים

הֲכִי קָרָא זְמָן לִשְׁבֹּר בְּחוּרֵי / בְנֵי־חֶסֶד וּמַחְמַדֵּי תְמִימִים

וְכִי חָתַם בְּעַד כּוֹכְבֵי תְהִלּוֹת / וְהִשְׁכִּין מִגְדְּלֵי־חֶסֶד תְּהֹמִים

אֲהָהּ לִי אוֹֽמְרָה עַל־מִפְקְדֵיהֶם / אֲהָהּ לִי וַאֲבוֹי אֶלֶף פְּעָמִים

אֲבָל מָוֶת חֳלִי יַשְׁוֶה יְקוּמִים / וּמִקְרֵה הַכְּסִיל יִקְרֶה חֲכָמִים

לְבֵנִים מֵאֱנוֹשׁ יַפִּיל כְּגָזִית / וְעַרְמֹנִים יְהִי שֹׁבֵר כְּשִׁקְמִים

וְהֵם רָצוּ לְפָנֵינוּ וְרִכְבֵי / הֲלִיכֵינוּ לְהַשִּׂיגָם רְתוּמִים

וְאָמְנָם מִשְׁפְּטֵי הַצּוּר יְשָׁרִים / וְלוֹ הַדִּין וְנַחְנוּ הָאֲשֵׁמִים

כְּתָבִי זֶה וּמַעְגָּלִי בְאֹרַח / וּמִדְבָּרוֹת מְגַמָּתִי וְיַמִּים

לְנַחֵת עַל־פְּנֵי־אֶרֶץ גְּדוּדִים / וְרַוֹּת מִדְּמֵי עֵינַי תְּלָמִים

עֲדֵי אֶגְוַע בְּאֶרֶץ יִמְעֲטוּ בָהּ / עֲלֵי קִבְרִי מְאֹד בֹּכִים וְהֹמִים

וּפִקְדוֹנִי בְּיַד הָאֵל עֲזַבְתִּיו / אֲשֶׁר נִקְרָא שְׁמוֹ אַב הַֽיְתוֹמִים

וְאֶבְטַח בַּאֲשֶׁר יַשְׁפִּיל גְּבֹהִים / וְיָדָיו יֹֽרְדֵי דוּמָה מְרִימִים

וְאוּלַי לִי הֲנָחָה בַּאֲנָחָה / וְכַמָּה תַחֲלֻאִים מַחֲלִימִים

וְהַיָּמִים וְהַלֵּילוֹת כְּהָרוֹת / וּמִי־בָן תּוֹֽלְדוֹת לֵילוֹת וְיָמִים

וְטַל יַשְׁקֶה אֲרָצוֹת בָּם לְבָבִי / כְּמֵי עֵינַי אֲבָל נַחַל קְדוּמִים

וְעַל־הַשֹּֽׁכְנִים שָׁם לַעֲדֵי־עַד / כְּחוֹל הַיָּם וְכִמְעֹתָיו שְׁלוֹמִים.