רקע
שלמה אבן גבירול
כְּבָר נוֹאַשׁ לְבָבִי

כְּבָר נוֹאַשׁ לְבָבִי מִמְּצֹא אִי / בְּאַנְשֵׁי הַזְּמַן וּבְיוֹשְׁבֵי אִי

וְאֵיךְ לִי תֹאמְרוּ: הִנֵּה וְהִנֵּה! / יְעִירֵנִי לְבָבִי, אִי לְךָ, אִי!

אֲשֶׁר אֶכְסֹף לְאִישׁ שֶׂכֶל וּבִינָה / וְאֵין בַּמָּה אֲרַוֶּה אֶת צְמָאִי

וְלֹא אֶפְחַד בְּבוֹאִי אֶל אֲדָמָה / לְמַעַן כִּי יְדַעְתִּיהָ בְּבוֹאִי

וְאֵדַע מִזְּמַנִּי אַחֲרִיתוֹ / כְּאִלּוּ בֶן בְּעוֹר הָיָה נְבִיאִי

וְהָיִיתִי תְמוֹל מֵרֹאשׁ יְרֵאָיו – / וְהִשְׁכִּים הַזְּמַן הַיּוֹם יְרֵאִי

וְגָבַרְתִּי בְּנוֹת יָמִים, כְּאִלּוּ / אֲצִילֵי כוֹכְבֵי מָרוֹם צְבָאִי

וְאַל יֹאמַר חֲכָם לֵב כִּי אֲנִי שָׁר / סְפָרַד עַד יְהוֹדֵנִי מְשַׂנְאִי

וְכֵן אַל יִשְׁמְעוּ אוֹתִי יְרִיבַי / עֲדֵי כִי אֶתְּנָה אוֹתִי וּפִלְאִי

הֲכִי לֹא שֶׁאֱלַת נַפְשִׁי אֲמַלֵּא / עֲדֵי לֹא תִֽהְיֶה תֵבֵל מְלוֹאִי

וְלֹא אֶשְׁקֹט כְּמוֹ לֹא אֶשְׁקְטָה עַד / רְאוֹת אַפֵּי יְקוּתִיאֵל נְשִׂיאִי

אֲשֶׁר עֵת אֶקְרְאָה אֵלָיו ־ יְמָאֵן / וְלֹא יִיגַע, וְיָגַעְתִּי בְקָרְאִי

מְצָאתִיהוּ אֲחִי דֵעָה וְהַשְׂכֵּל / וְשָׂמַחְתִּי עֲלֵי שִׂכְלִי בְּמָצְאִי

וְדִמִּיתִי הֱיוֹת יִשְׁעִי וְסַלְעִי / וְגִיל עִלְזִי וְצוּר עֻזִּי וְדָבְאִי

נְתַתִּיהוּ לְמוּל חַיַּי וְשַׂמְתִּיו / כְּאֵל נֹכַח יְמֵי מִדַּת צְבָאִי

וְלָמָּה אַחֲרַי תִּהְיֶה וְתִסֹּג / וְתַשְׁחֶה נֵס תְּהִלָּתָךְ בְּנָשְׂאִי ־

וְשֶׁמֶשׁ מִמְּךָ תִזְרַח בְּתֵבֵל / וְתֹאמַר: עִמְּךָ הָיָה מְבוֹאִי.

וְאָמְנָם אֵינְךָ שָׂעִיר כְּאָמְרָם / אֲבָל שָׂעִיר עֲלֵי עֶשְׂבִּי וְדִשְׁאִי

יְהִי לָעַד שְׁמָךְ הַטּוֹב מְרוֹמָם / וְלָעַד יַעֲלֶה שִׂיאָךְ, נְשִׂיאִי!

המלצות קוראים
תגיות