חָנֵּנִי־נָּא שִׁירִי בַּל תַּעַזְבֵנִי

בַּל תָּשׁוּב אָחוֹר יְהִי חַסְדְּךָ לְנַחֲמֵנִי

  כִּי יָבֹאוּ יְמֵי סְתָיו יָמִים אֵין חֵפֶץ

שֵׁב נָא לִימִינִי וְעֹז וְתַעַצֻמוֹת תֶּרֶב

עֵת יַאֲרִיךְ הַלַּיְלָה וּמִדַּד עֶרֶב

  הַסְתִּירֵנִי מֵחֲמַת זֶרֶם וָנֶפֶץ:

עֵת כִּי בַחוּץ סְעָרוֹת חֲזָקוֹת יַצְרִיחוּ

וְחֹשֶׁךְ וַחֲלַקְלַקּוֹת אֹרַח יַדִּיחוּ

  בַּאֲפֵלָה מִנֻדָּח בְּיוֹם קָרָה וְזָעַם

הָעַר־נָא כִנּוֹרִי חַזֵּק מֵיתְרֵיהוּ

לְזַמֵר מִסְּתָיו גַּם כִּי חָשַׁךְ תָּאֳרֵהוּ

  הוֹרֵנִי נְעִימוֹת לַמְּדֵנִי טוּב טָעַם:

* * *

כָּלָה דֶשֶׁא יָבָשׁ חָצִיר וָאָיִן

אֻמְלַל פֶּרַח סָפוּ מַחֲמַדֵּי עָיִן

  אֵין תְּאֵנָה בַתְּאֵנָה אֵין יְבול בַּגֶּפֶן

סָפוּ כָל־יְמֵי חָג פַּסּוּ כָל־יְמֵי טֹהַר

שֶׁמֶשׁ אָסְפָה נָגְהָהּ וְתָאִיר בְּלִי זֹהַר

  כִּמְעַט הֵחֵלָּה לִזְרֹחַ בֹּא תֵפֶן:

נָבוֹכוּ עֶדְרֵי צֹאן עֲמָקִים יְלַקֵּשׁוּ

עֲלֵי שָׂדוֹת נֶחֱרָשׁוֹת אֹכֶל יְבַקֵּשׁוּ

  אַחֲרֵי שָׁרְשֵׁי עֵשֶׂב יַחְקְרוּ וְיָגִיעוּ

מִהָרֵי גַבְנוּנִים וְאֵלוֹנִֵי יַעַר

נִשְׁמַע קוֹל מְבַשְּׂרֵי סוּפָה מַלְאֲכֵי סַעַר

  יֶהֱמוּ גַלֵּי יָם וַאֲנָקָה יַשְׁמִיעוּ:

בְּטֶרֶם תֵּצֵא סְעָרָה בְּחֵמָה וּבְקֶצֶף

יֵרְדוּ מֵעָבֵי שְׁחָקִים גִּשְׁמֵי שֶׁצֶף

  וְנִבְלֵי שָׁמַיִם הֲמוֹן מַיִם יִשְׁפָּכוּ

וְזֶרֶם מַיִם שֹׁטְפִים עַל־הַר וָעֹפֶל

יֶחְשַׁךְ הַשֶּׁמֶשׁ וְאֶרֶץ כִּסָה אֹפֶל

  מִשֶׁטֶף יְעָרִים לִיאוֹרִים נֶהְפָּכוּ:

אָז הַצְִּפָּרִים יְבַקְּשׁוּ סֵתֶר לָמוֹ

מִמַּרְעִיתָם עֶדְרֵי בָקָר כֻּלָמוֹ

  הֹלְכִים הָלֹךְ וְגָעֹה לְבַקֵּשׁ הָרֶפֶת

הַשֶּׂכְוִי וְרַבּוֹת נָשָׁיו לְבֵיתָם שָׁבוּ

יִפְעוּ וְיִצְעָקוּ מִגֶּשֶׁם יִרְטָבוּ

  וְהַיּוֹנָה אֶל־אֲרֻבֹּתֶיהָ מְעֹפֶפֶת:

הַנָּהָר יִפְרֹץ גְּדוֹתָיו בְּחֵמָה נִצַחַת

וְשָׁטַף וְעָבַר וְיִרְתַּח כַּדּוּר וְקַלַּחַת

  מִנַּחֲלֵי אֵיתָן אֲשֶׁר בּוֹ יִזְּלוּ יָחַד

יִפְשֹׁט בָּעֵמֶק מְקוֹם רַחֲבַת יָדָיִם

וְשָׁמָּה בֵּין שְׁנֵי סְלָעִים יְנַהֲרוּ הַמָיִם

  אָז יַרְעֵם בְּכֹחַ וְיִתֵּן קוֹלוֹ קוֹל פָּחַד:

עַתָּה מֵחֶדְרָהּ תָּגִיחַ סוּפָתָה

הוֹד נַחֲרָהּ אֵימָה וּבְחֵמָה עַזָּתָה

  תִּרְעַשׁ בְּגַאֲוָתָהּ בְּתַעֲצֻמוֹת וָכֹחַ

כָּל־נִבְכֵי יָם מִמְּצוּלָה יִתְגָּעָשׁוּ

וְעֵינוֹת תְּהוֹם יִשְׂאוּ הֲמוֹן מַיִם וְיִרְעָשׁוּ

  וְהַיָּם נִגְרַשׁ בְּאֵין הַשְׁקֵט וּמָנוֹחַ:

חֹמֶר חֹמֶר מַיִם עַד עָב יַגִּיעַ

וְהַיָּם יִסְעַר וְיִגְעַר וְיִרְתַּח וְיַבִּיעַ

  כְּמוֹ מַיִם תִּבְעֶה אֵשׁ בִּקְרָב בְּמִלְחֶמֶת

אוֹי לָךְ אֳנִיָה חֲזָקָה בֵּין גַלֵּי זַעַם

הַמַּחֲצֶבֶת רַהַב אָבַדְתְּ הַפַּעַם

  מִי יָקוּם לָךְ עִם סְעָרָה כְּכְפִיר נֹחֶמֶת:

מִי יְחַזֵּק כֵּן־תָּרְנֵךְ נִגְדַּע לָאָרֶץ

מִי יִפְרֹשׂ נִסֵךְ מִי יַעֲמֹד בַּפָּרֶץ

  אַיֵּה מַלָּחַיִךְ אַיֵּה חֹבְלָיִךְ

מַה־לָּךְ כֹּחַ יְדֵיהֶם בְּיוֹם אֵיד וְלַחַץ

מַה־לָּךְ אֹמֶץ לִבְבֵיהֶם כִּבְנֵי שַׁחַץ

  נָשְׁתָה גְבוּרָתָם כִּי נִטְּשׁוּ חֲבָלָיִךְ:

הוֹי כִּי תֵרֵד לַתְּהוֹם כְּקֶבֶר פָּתוּחַ

עַתָּה תַעֲלֶה לָרוֹם תִּדְאֶה בָרוּחַ

  הָשְׁלְכָה מֵעָל לָעֹמֶק כְּאֶבֶן קָלַע

עַד תֻטַּל טַלְטֵלָה בְּשִׁבְבֵי תֹרֶן

הָלְאָה אֶל־אִיִּים רְחֹקִים כְּמוֹץ מִגֹּרֶן

  אוֹ תֻכֶּה מִצּוּר תִּתְפֹּצֵץ מִסָלַע:

וְכַסּוּפָה בַיָּם כֵּן עַל־הַיַּבֶּשֶׁת

יִרְגְּזוּן שָׁמַיִם וְהָאָרֶץ רֹעֶשֶׁת

  הַר נֹפֵל וְתַחְתָּיו שָׁחֲחוּ שְׁתִילֵי רַהַב

מִבְחַר בְּרוֹשִׁים וְאַרְזֵי לְבָנוֹן יִרְעָדוּ

וְצוֹר יֶעְתַּק מִמְּקוֹמוֹ סְלָעִים יִמְעָדוּ

  אָז יֶחְרְדוּ הַיְּעֵלִים וְאַיֶּלֶת אַהַב:

וְקוֹל יְשֹׁרֵר בְּחַלּוֹן וְתוֹךְ צִירֵי הַדֶּלֶת

וְעָנוּ תַנִּים בַּת הַיַּעֲנָה מְיַלֶּלֶת

  עַל־זֹאת יָחִיל אֱנוֹשׁ וּפָחַד לְבָבֵהוּ

עַד יָקוּם מֶלֶךְ עֶלְיוֹן יְצַו מַרְגּוֹעַ

וַתִּשְׁקַט אֶרֶץ וַתֶּחְדַּל מִנּוֹעַ

  וַיִּגְעַר בַּיָּם וַיִּשְׁתְּקוּ גַלֵּיהוּ:

* * *

הֵן עַתָּה מִצָּפוֹן יִשּׁוֹב הָרוּחַ

וּמִמְּזָרִים קָרָה תָּבֹא וְתָפוּחַ

  וְתוֹךְ הַנְּשִׂיאִים אֶגְלֵי גֶשֶׁם קָפָאוּ:

וְדַק מְחֻסְפָּס יֵרֵד הַשֶּׁלֶג מִשָּׁמָיִם

כְּמוֹץ בְּרוּחַ פִּתָּיו נִרְאוּ לָעֵינָיִם

  עַד יִתְלַכְּדוּ יַחַד יִגְדְּלוּ וְיִשְׂגָּאוּ:

וְאוֹצְרוֹת שֶׁלֶג לָחֳמָרִים תְּעוּפֶינָה

בְּאֵין מַעְצָר וְאֶת־כָּל־הָאָרֶץ תְּמַלֶּאנָה

  כֻּלָּהּ נֶהֶפְכָה לָבָן בּוּץ לָבָשָׁה

וַיְכֻסּוּ הֶהָרִים עֲמָקִים הִלְבִּינוּ

וְהַיְּעָרוֹת כָּל־אַלּוֹנֵיהֶם הִזְקִינוּ

  וְעַל־כָּל־שָׁדוֹת וְגַנּוֹת שֵׂיבָה נָטָשָׁה:

אָז שֹׁכְנֵי עֲרָבוֹת מֵרָעָב כֻּלָּמוֹ

יָקוּמוּ לְבַקֵּשׁ טֶרֶף וְאֹכֶל לָמוֹ

  וּבְתוֹךְ רִבְצֵי צֹאן יִפְרֹץ זְאֵב עַז מֵצַח

וַיְחַנֵּק כְּבָשִׂים רַעֲבוֹנוֹ לְהַשְׂבִּיעַ

יִלְעַג לְזַעַק נְקִיִּים כִּי אֵין מוֹשִׁיעַ

  וְרָמַס וְטָרַף בְּאַפּוֹ בְּעַצְמוֹתָיו רֶצַח:

מַה־לְּךָ נִרְדָּם רֹעֶה אֱלִיל פְקַח עֵינָיִם

הַעֵת לִישַׁן אוֹ לִשְׁכַּב בַּעֲצַלְתָּיִם

  הֲלֹא שָׁמַעְתָּ יִלְלַת כֶּלֶב נֹבֵחַ

קוּם נָא מַהֵר וְכָל־הַנְּעָרִים אִתֶּךָ

יִקְחוּ מַקְּלוֹתָם וְאַתָּה מִשְׁעַנְתֶּךָ

  וּמִתּוֹךְ רַבְצְךָ תְּגָרֵשׁ הַמְרַצֵּחַ:

הִנֵּה מַעֲלָה מַעֲלָה יִתְעַלֵם שֶׁלֶג

לֹא נִכְּרוּ בַחוּצוֹת נָהָר וּפֶלֶג.

  מֵאֵין יֹצֵא וּבָא מְסִילוֹת נָשַׁמּוּ

עַל־אֵם הַדֶּרֶךְ נִצָב עֹבֵר אֹרַח

יִרְעֲדוּ עַצְמוֹתָיו מִקָּרָה וָקֹרַח

  נַפְשׁוֹ עָיְפָה לוֹ כָּל־כֹּחוֹתָיו תַּמּוּ:

אָנָה יֵלֵךְ אֵי רַגְלָיו יוֹבִילוּהוּ

אֵימִים בַּלָּהוֹת סָבִיב יַבְהִילוּהוּ

  יִכָּשֵׁל בַּהֲלִיכָתוֹ וְיִפֹּל שֶׁבַע

וְעוֹד יָקוּם עוֹד יָגוּר כָּל־עַצְמוֹתֵיהוּ

עַד יֶחֱלַשׁ וְיַעַזְבוּהוּ כֹּחוֹתֵיהוּ

  וְיִפֹּל וְלֹא יוֹסֶף קוּם תַּחַת הַגְֶּבַע:

וַיִּישָׁן וּשְׁנָתוֹ לוֹ מְאֹד מָתְקָה

וְדָמוֹ יִקְפָּא וּמְרוּצָתוֹ שָׁתָקָה

  גְוִיָּתוֹ קִפָּאוֹן בְּאֵין נִשְׁמַת רוּחַ

הַבְצֵאתְךָ מִבַּיִת יָדַעְתָּ גֶבֶר

כִּי פֹּה תַּחַת שֶׁלֶג חֻצָּב לְךָ קֶבֶר

  פֹּה תַּחַת הַגִּבְעָה תָּמוּת וְתָנוּחַ:

מַדּוּעַ אֵחַר לָבֹא מְאֹד יְיֵלִילוּ

אִשְׁתּוֹ וְגָרֵי בֵיתוֹ עָלָיו יוֹחִילוּ

  מָתַי יָבֹא הָאָב בָּנָיו יִבְכָּיוּ

לַשָּׁוְא נַאֲקַתְכֶם גַּם כִּי תַרְבּוּ בֶכִי

לֹא יָשׁוּב עוֹד אִם יָמוּת גֶּבֶר הֲיֶחִי

  הֵאָנְקוּ דּוֹם אַךְ בַּל תִּבְעָיוּן בְּעָיו:

לוּ יִזְכֹּר אִישׁ אֹהֵב שִׂמְחָה וָיָיִן

עֵת יֹאכַל מַנְעַמִּים וְיִתֵּן בְּכוֹס עָיִן

  עֵת יָחוֹג בְּמָחוֹל בִּפְרָעוֹת פֹּרֵעַ

עֵת כִּי יְפַזֵר אוֹן וְחוֹן בְּנֶפֶשׁ כֹּסֶפֶת

בְּעַד אֵשֶׁת הוֹמִיָּה פְתַיות וְנֹאֶפֶת

  עֵת עַל־מִטּוֹת שֵׁן יִסְרַח וְיִשְׂתָּרֵעַ:

לוּ יִזְכֹּר הָרָעָה הַפִּיד וְהַפֶּגַע

הַיָּגוֹן וְהָאֲנָחָה מַחֲלָה וְנֶגַע

  אֲשֶׁר יִקְרוּ אֶת־בְּנֵי־חֲלוֹף בְּעִתוֹת הָאֵלֶּה

זֶה בָאֵשׁ זֶה בַמַּיִם וְזֶה בַחֶרֶב

יָמוּת וְזֶה יִטָּרֵף מִזְּאֵבֵי עֶרֶב

  וְזֶה יֵאָנַח בְּשִׁבְרוֹן לֵב מִבֵּית כֶּלֶא.

אֵלֶּה בְחֹסֶר־כֹּל יִשְׁתּוּ כּוֹס הַיְּגוֹנִי

בְּמָצוֹר וּבְמָצוֹק יֹאכְלוּ לֶחֶם עוֹנִי

  בְּלִי לְבוּשׁ בַּקָרָה בַּחוּץ יִתְעַלָפוּ

מֵאֵלֶּה אֶת־כָּל־מַחֲמַדֵּי עֵינֵימוֹ

חָטַף הַמָּוֶת פִּתְאֹם מִקִּרְבֵּימוֹ

  וְאֵלֶּה מֵרָעָה אֶל רָעָה נִדָּפוּ:

לוּ יַשְׂכִּילוּ זֹאת אֵלֶּה אַנְשֵׁי מֶרִי

הַהֹלְכִים עִם־אֱלֹהֵיהֶם בַּחֲמַת קֶרִי

  מֵרָעָה חָדֵלוּ וּבַל יָחֹלּוּ

עַל־אֲחֵיהֶם הָאֻמְלָלִים בְּדַאֲבוֹן נֶפֶשׁ

הַשָּׁחִים לָעָפָר נִטְבְּעוּ בָרֶפֶשׁ

  בְּאַהֲבָה וּבְחֶסֶד וּבְרַחֲמִים יַחֲמֹלוּ:

* * *

הֵן אִם בְּיוֹם קָצָר תִּקְצַר רוּחַ גֶּבֶר

אָז הַלַּיְלָה חִשְׁקוֹ תִּקְוָה וָשֵׂכֶר

  לָכֵן לֵילֵי סְתָיו מִיָּמָיו נִבְחָרוּ

אַנְשֵׁי הַכְּפָרִים בָּם יֵשְׁבוּ בַחֹבֶרֶת

יַמְתִּיקוּ סוֹד וְאָח לִפְנֵיהֶם בֹּעֶרֶת

  יְסַפְּרוּ חֲלֹמוֹתֵיהֶם יַחַד נִדְבָּרוּ:

מֵעֲזָאזֵל וְשָׂעִיר אוֹ מִבַּעֲלַת כֶּשֶׁף

הַמְרַקְּדָה עַל הָרִים הַמְּשׁוֹטְטָה בַנֶּשֶׁף

  מִן קְרָב מִן שָׁלוֹם כִּי־יִהְיֶה בָאָרֶץ,

מִכּוֹכַב נֹגַהּ הַנִּרְאֶה פַעֲמָיִם

אַחֲרָיו יָאִיר נְתִיב זְנָבוֹ בַשָּׁמָיִם

  אוֹת ומוֹפֵת הוּא כִּי־יָבֹא הַקָּרֶץ:

וּנְשֵׁיהֶם בְּכִישׁוֹר וָפֶלֶךְ תִּשַׁבְנָה

בִּמְחוּגָה וּלְקוֹל דִּבְרֵיהֶם תִּקְשַׁבְנָה

  מַאֲמִינוֹת אֲשֶׁר יְסֻפַּר בְּרֶתֶת וָרַעַד

וְעַל־עֲלִיַּת הַמָּחוֹל יַחְדָּו נֶאֱסָפוּ

הָרוֹעִים עַם רַעֲיָתָם וְלֹא יִיעָפוּ

  לְקוֹל עוּגָב בְּשִׂמְחָה לְרַקֵּד לְהֵטִיב צַעַד:

לֹא כָזֶה עֲלִיצַת קִרְיָה עִיר נִדַּחַת

לֹא זוּ שִׂמְחַת אֱנוֹשׁ שָׁם בְּהַשְׁקֵט וָנַחַת

  כִּי־אִם כִּמְשֹׁוֹשׂ פְּרָאִים הִיא בְּאֵין מָנוֹחַ

שָׁמָה זֹלְלֵי בָשָׂר גַּם סֹבְאֵי יָיִן

יִטְבְּעוּ בִיוֵן מְצוּלָה בְּהֶבֶל וָאָיִן

  וְתַחַת עֵץ הַחַיִּים יַחֲזִיקוּ בְחוֹחַ:

שָׁמָּה בְבֵית מִשְׂחָק נַעֲלָמִים יֵשֵׁבוּ

בְּתַרְמִית לִבָּם אִישׁ אֶל־אָחִיו יְכַזְּבוּ

  אֵין שָׁלוֹם בִּמְגוּרָם יְאַבְּדוּ הוֹן וָעשֶׁר

שָׁמָּה חִסְרֵי לֵב בְּבֵית אִשָּׁה מְנָאֶפֶת

יְכַלּוּ שְׁאֵרָם בְּשָׂרָם בְּנֶפֶשׁ נִכְסֶפֶת

  לָרֶדֶת שְׁאוֹל יַעַזְבוּ דֶרֶךְ ישֶׁר:

שָׁם מִן הֵיכָל עֹנֶג חוּצוֹת יָאִירוּ

מְנוֹרוֹת אֲלָפִים כַּלַפִּידִים יַזְהִירוּ

  לְפָנָיו עֶגְלוֹת־צָב וְרֶכֶב יִתְהֹלָלוּ

וְשָׂרִים וְשָׂרוֹת בְּמַחֲלָצוֹת וְרִקְמָתָיִם

בְּבִגְדִי מֶשִׁי חֲטוּבוֹת אֵטוּן מִצְרָיִם

  בְּכָבוֹד וְתִפְאֶרֶת לַשִׂמְחָה יוּבָלוּ:

וַעֲלִיּוֹת מִרֻוָחִים מֵרִצְפַת בַּהַט

יְנֹצְצוּ כְעֵץ נְחֹשֶׁת מֵהֶם תֵּצֵא לַהַט

  וְאַבְנֵי נֵזֶר מִתְנֹסְסוֹת כְּכוֹכְבֵי מַעַל

וְהֶמְיַת נְבָלִים וְכִנּוֹרִים וְכָל־כְּלֵי זֶמֶר

וְרֵיחַ שְׁמָנִים וּבִשְׂמֵי יֵין חֶמֶר

  יִתְּעוּ כָל־רוּחַ לְשִׁגָּעוֹן יְשַׁכְּרוּ כְרַעַל:

עַתָּה תַעֲנוּגוֹת בְּנֵי־אָדָם תְּחִלֶּינָה

בָּנוֹת הַיָּפוֹת בִּמְחוֹלוֹת תְּגִילֶינָה

  לְקוֹל זִמְרָה בְּנֵי מָחוֹל יְדַלּוּ שׁוֹקָיִם

פַּעַם כַּדּוּר הַמְחוּגָה מִתְהַפֶּכֶת

אוֹ נִצְבָה מַעֲרָכָה לִקְרַאת מַעֲרֶכֶת

  וַתֵּצֶאנָה אִשָּׁה נֶגְדָּהּ בְּמַחֲנָיִם:

פַּה מָקוֹר מָשְׁחָת מִכָּל־אֵיד וָשֶׁבֶר

לֹא יָדְעָה בשֶׁת נְקֵבָה תְּסֹבֵב גֶּבֶר

  וּכְסִיל אָדָם יִשֹּׁק וְיִסְגֹּד לַצֶּלֶם

כָּכָה לֵילוֹת הַסְּתָיו יְכַלּוּ בַהֶבֶל

בְּמַעֲשֵׂה תַעְתּוּעִים בַּזִּמָה בַּתֶּבֶל

  לְמֵאִישׁ עַד אִשָּׁה מִזָּקֵן עַד עֶלֶם:

לֹא כָאֵלֶּה חֵלֶק מֵבִין אִישׁ דַּעַת

הַחָכְמָה אֲחוֹתוֹ וּבִינָה מוֹדַעַת

  הֵנָּה קְרוּאָיו בַּלַיְלָה בְּנוֹת שַׁעֲשׁוּעַ

בַּעֲלִיַּת קִיר קְטַנָּה נַפְשׁוֹ בֹדֶדֶת

וּבְחֵקֶר תַּעֲלוּמוֹת חָכְמָה יֹרֶדֶת

  תִּתְחַקֶּה עַל־כָּל־חָי דּוּמָם וְזֵרוּעַ:

וְאַנְשֵׁי סוֹדוֹ בְּהִדָּרְשׁוֹ מֵעַל סֵפֶר

רוּחוֹת וְלֹא בָשָׂר לֹא עָפָר וָאֵפֶר

  קְדשִׁים אֲשֶׁר מִלְּפָנִים בָּאָרֶץ הָיוּ

אֲשֶׁר מִתֵּבֵל אֱלֹהֵי נֵכָר הֵסִירוּ

וְהָעָם הַהֹלְכִים בַּחוֹשֶׁךְ הֵאִירוּ

  וְהוֹרֵם דֶּרֶךְ יְשָׁרָה בָּם יֵלְכוּ וְחָיוּ:

עֲבוּר דַּעַת נַפְשָׁם מִנֶּגֶד הִשְׁלִיכוּ

עַל־דְּבַר אֱמֶת מֵתוּ וְאֶת־יְיָ הַמְלִיכוּ

  אָכֵן יִנּוֹן שְׁמָם עַד בִּלְתִּי יָרֵחַ

אֵלֶּה קְדֹשִֵי עֶלְיוֹן חֶבְרַת אִישׁ דֵּעַ

יִתְוַדְּעוּ בְמַרְאֶה לְאִישׁ מֵבִין יֹדֵעַ

  בְּדָרְשׁוֹ אֶת־סִפְרֵיהֶם וְלֶקַח לֹקֵחַ:

* * *

עַתָּה יִטְהַר רָקִיעַ וְקָרָה תֶרֶב

עָצְמָּהּ וְהָרוּחַ חַדָּה כְּמַדְקְרוֹת חֶרֶב

  וְתַשְׁמִיד אֵדִים רָעִים מָוֶת יָפִיקוּ

הִיא חַיֵּי בְשָׂרִים מַרְפָּא בִכְנָפֶיהָ

תָּעִיר אֶת־הַנֶּפֶשׁ תְּחַדֵּשׁ נְעוּרֶיהָ

  תְּלַהֵט כָּל־פָּנִים וְגִיד וְעוֹרְקִים יַחֲזִיקוּ:

רִגְבֵי אֲדָמָה יִינְקוּ כֹחַ לְהַצְמִיחַ

לְהוֹלִיד לַשָּׁנָה הַבָּאָה כָּל־שִׂיחַ

  מִשֶׂלֶג מִקָּרָה הָאָרֶץ תַּהַר

מִנִּשְׁמַת אֵל יִתְלַכְּדוּ פְנֵי הַמָּיִם

כְּעֵין הַבְּדוֹלָח הֵמָּה לְמַרְאֵה עֵינָיִם

  וְכִרְאִי מוּצָק יַעַמְדוּ נַחַל וְנַהַר:

יִקְפְּאוּ כָל־נֹזְלִים וְכָל־מַשְׁקֶה בַּבָּיִת

יִבָּקְעוּ נִבְלֵי יַיִן וְשֶׁמֶן זָיִת

  וְעַל־רְאִי חַלּוֹנִים אֵלוֹנִים יֻצָּרוּ

הַשֶׁלֶג יִקְרַם פָּנָיו כְּעֻגַּת רֶצֶף

מִמִּרְמַס רֶגֶל יִצְעַק כִּקְצֹף קֶצֶף

  וְהַכּוֹכָבִים כְּנִיצוֹצֵי אֵשׁ יִזְהָרוּ:

עַל־מִשְׁמַרְתּוֹ בַלַּיְלָה מַר נֹבֶחַ

הַכֶּלֶב וַיְגָרֵשׁ גַּנָּב וְרֹצֵחַ

  וְעַל־בְּלִילָה תִּגְעֶה הַפָּרָה סֹרֵרָה

וְסוּס דֹּהֵר מֵרָחוֹק נִשְׁמַע קוֹל נַחַר

וְעוֹד בֹּשֵׁשׁ בֹּקֶר בֹּא לֹא אָץ הַשַּׁחַר

  וְהַשֶּׁמֶשׁ מִצֵּאת מֵחֶדְרָהּ אִחֵרָה:

הַבֹּקֶר אוֹר וּפְעֻלּוֹת קוֹר יֵרָאוּ

כָּל־גַּג מְלֻטְּשָׁה צִנּוֹרֶיהָ קָפָאוּ

  עַל־כָּל־גֶּבֶא מֻדְבַּק מֵחֲשׂף כָּל־כֶּלִי

וְעָשָׁן יֹצֵא מִכָּל־פֶּה וּנְחִירַיִם

נֶהְפַּךְ לִכְפוֹר עַל־שָׁפָם וְעַפְעַפַּיִם

  וְכִמְטִילֵי זְכוּכִית כָּל־מַר מִדֶּלִי:

וְעַל־הַשָּׂדֶה בְמַצַע לָבָן נוֹדָעוּ

עִקְבוֹת אַרְנֶבֶת וּשְׁפַנִּים אֲשֶׁר נָעוּ

  שָׁם כָּל־הַלַּיְלָה לְבַקֵּשׁ אֹכֶל לָמוֹ

בָּם יִדְרַךְ הַצַיִד בְּתֶלְיוֹ וּבְחֶרֶב

וְכַלְבּוֹ לְפָנָיו רָץ דַּרְכֵי שְׁתִי וָעֵרֶב

  לִדְרֹשׁ אַחֲרֵיהֶם לְחַפֵּשׂ מְגוּרוֹתָמוֹ:

* * *

בְּכָל־עִתּוֹתֵי שָׁנָה לֵב אֱנוֹשׁ יֹדֵעַ

לִמְצֹא תַעֲנוּגִים וּשְׂמָחוֹת שֹׁבֵעַ

  גַּם בִּימֵי סְתָיו יִמְצָא חֵפֶץ לִשְׂמֹחַ

וְעַל פְּנֵי הַנַּחַל בַּחֲלַקְלַקּוֹת אֹרַח

יְכוֹנֵן אַשּׁוּרָיו בִּיגִיעָה וָטֹרַח

  בְּקַל הַמֵּרוּץ לָרוּץ וְלַעֲצֹר כֹּחַ:

שָׁם עַם רַב רָצִים עֲלֵי חֶלְקַת הַנַּחַל

מְמוֹרָט מְלֻטָּשׁ לֹא עָדָה עָלָיו שַׁחַל

  בַּרְזֶל בִּנְעָלֵיהֶם יַעַבְרוּ בְרֶגֶל

כִּבְרָקִים יְרֹצֵצוּ לְרֹחַב וָאוֹרֶךְ

הַנַּעַר לֹא יִירָא אֵין בְּלִבּוֹ מוֹרֶךְ

  אִם יִפֹּל לֹא יוּטַל יְרַקֵּד כְּמוֹ עֵגֶל:

וְעַל־כִּסְאוֹת חֲלָקוֹת מִתַּחַת רַגְלֵימוֹ

בָּנוֹת בֹּטְחוֹת הֵנָּה ישְׁבוֹת עָלֵימוֹ

  וְהָרָצִים יֶהְדָּפֵם וְכַחֵץ יָעוּפוּ

הִשָּׁמְרוּ לָכֶם אֵינְכֶם בְּגַנֵּי פֶרַח

הֲלֹא תְהוֹם תַּחְתֵּיכֶם פֶּן יִמַּךְ הַקֶּרַח

  בְּרֶגַע תִּטְבְּעוּ וּשְׁנוֹתֵיכֶם יָסוּפוּ:

יְהוּדָה בֶן־יַקִּיר יֶלֶד יְפֵה עֵינָיִם

וְהוּא בֶן־תֵּשַׁע שָׁנִים כְּאֶרֶז עֲלֵי מָיִם

  גָּדַל הַנַּעַר וְהוֹסִיף בִּין וָדָעַת

רַךְ וְיָחִיד לְאִמּוֹ אֲהֵבַתְהוּ וּתְחַבְּקֶנּוּ

בֶּן־זְקוּנִים לְאָבִיו אֵין לוֹ בֵן מִמֶנוּ

  וּלְכָל־מוּסָר הִטָּה אֹזֶן שׁוֹמָעַת:

הוּא הָיָה שִׂמְחַת אֲבוֹתָיו וְתוֹחַלְתָּמוֹ

עָלָיו קִוּוּ בְּעֵת צַר הוא נֶחָמָתָמוֹ

  כִּי יִגְדַּל הַנַּעַר וְלַגְּבֶר יֶהִי

בְּכִשְׁרוֹן פָּעֳלוֹ עוֹד בְּשֵׂיבָה יָנוּבוּ

וּבְזִקְנָתָם לִימֵי עֲלוּמִים יָשׁוּבוּ

  הוּא לְשָׂשׂוֹן יַהֲפֹךְ לָהֶם כָּל־בְּכִי וָנֶהִי:

וַיְהִי הַיּוֹם כְּצֵאת יְהוּדָה מִבֵּית הַסֵּפֶר

בְּתֶלְיוֹ בְּקַסְתּוֹ בְּחֵן שְׂפָתָיו בְּאִמְרֵי שֶׁפֶר

  שָׂחַק עִם הַיְּלָדִים אִתּוֹ גָדָלוּ

וַיֹּאמְרוּ אֵלָיו מֵרֵעֵיהוּ שְׁנָיִם

יְהוּדָה בֹּא־נָא אִתָּנוּ אֶל־הַמָּיִם

  מִקֶּרַח הַגָּדֹל נֹזְלִים אָזָלוּ:

רֹחַב מַיִם בְּמוּצָק עָלָיו נָרוּצָה

בַּל תִּירָא בַּל תֵּחַת נִשְׂמְחָה וְנָדוּצָה

  עוֹד הַיּוֹם גָּדֹל לֹא עֵת בַּיְתָה לָכֶת

וַיְפַתּוּהוּ בִלְשׁוֹנָם שָׁחֲקוּ לְפַחַד

וַיִּשְׁמַע לְקוֹלָם וְהָלְכוּ שְׁלָשְׁתָּם יַחַד

  וְעַל־פְּנֵי הַנָּהָר כַּף־רַגְלָם דֹּרָכֶת:

פִּתְאֹם וַתִּבָּקַע הַקֶּרַח תַּחַת

רַגְלֵי יְהוּדָה וּפִיהָ פָּעֲרָה הַשַּׁחַת

  וַיִּטְבַּע בַּמַּיִם הַזֵּדוֹנִים בְּמֵי רָפֶשׁ

וַיִצְעַק צְעָקָה גְדֹלָה הוֹי חָנּוּנִי

חָנּוּנִי־נָא רֵעִים הוֹי הַצִילוּנִי

  אוֹיָה לִי כִּי בָאוּ מַיִם עַד נָפֶשׁ:

וְעוֹד שֵׁנִית מִמַּיִם פָּשַׁט יָדֵיהוּ

וַיּוֹרֶה בְאֶצְבְּעוֹתָיו אַחֲרֵי רֵעֵיהוּ

  וְהֵמָּה נָסִים פֶּן הָרָעָה תִדְבָּקֵמוֹ

פָּחֲדוּ וְנָסוּ לְהוֹצִיא רַגְלָם מֵרֶשֶׁת

עַד נִדְרְכָה כַף רַגְלָם אֶל־הַיַּבֶּשֶׁת

  אָז בִּבְכִי וְזַעַק הֵרִימוּ קוֹלוֹתֵימוֹ:

אַיֶּכָּה יְהוּדָה אַיֶּכָּה אֲחִינוּ

אֲשֵׁמִים אֲנַחְנוּ צָרַת נַפְשׁוֹ רָאִינוּ

  בְּהִתְחַנְּנוֹ אֵלֵינוּ הוֹי הוֹי אֵינֶנּוּ

וְאֶל־אָבִיו וְאִמּוֹ הַשְּׁמוּעָה נִשְׁמַעַת

וּמָרְטָה הָאֵם שְׂעַר רֹאשָׁהּ בְּאֵין דַּעת

  וְהוּא נָפַל אָרְצָה סָר כֹּחוֹ מִמֶּנוּ:

אָמְנָם כַּאֲשֶׁר שָׁבָה אֵלָיו הָרוּחַ

הִתְחַזֵּק בֵּאלֹהָיו וְלִבּוֹ בָטוּחַ

  כִּי מֵיְיָ יָצָא הוּא גָזַר אֹמֶר

וַיֹּאמֶר הֲלֹא גַם אַבְרָהָם שָׂמֵח

לְהַקְרִיב בְּנוֹ יְחִידוֹ עַל־גַּב הַמִּזְבֵּחַ

  וּמֶה חָדַל אֲנִי אֱנוֹשׁ קָרוּץ מֵחֹמֶר:

כָּהֵנָּה וְכָהֵנָּה מִשְּׂמְחַת גֶבֶר

מִמֶּנָּה תֵצֵא רָעָה פִּיד וָשֶׁבֶר

  וּכְמוֹ כֵן תּוּגָתוֹ תִהְיֶה לָהֶפֶךְ

בְּרִנָּה יִכְלוּ וְאֵינָם יְמֵי אֵיד וָנֵגַע

וִימֵי שְׂמָחוֹת יִסְפּוּ בִּבְכִי כָּרֶגַע

  וּכְמוֹ מַיִם הַנִּגָּרִים בַּשֶּׁפֶךְ:

* * *

עַתָּה רוּחַ תֵּימָן תִּפַּח בַּלַּיִל

וְיִגַּח בַּחֲדוּדֵי קַרְנָיו כְּקַרְנֵי אַיִל

  עַל־כָּל־קִפָּאוֹן עַל־קֶרַח וָשֶׁלֶג

נִתְמֹגְגוּ הַגְּבָעוֹת וְהָרִים יִזֹלוּ

כָּל־גָּג יִדְלֹף עַגֻלֵּי שֶׁלֶג יִפֹּלוּ

  יְזֹרְבוּ הַנְּחָלִים גַּם נִצְמַת כָּל־פֶּלֶג:

וּפִתֵּי קֶרַח בַּחֹזֶק יִתְפָּרָצוּ

עַל־פְּנֵי הַמַּיִם לִשְׁטֹף יִתְאַמָּצוּ

  וְכָל־מַעֲבְּרוֹת עֲלֵי נַהֲרֵי אֵיתָן יְשַׁבֵּרוּ

הַשָּׁתוֹת נֶהֶרְסוּ נָפְלוּ אָשִׁיוֹתֶיהָ

נִגְדְּעוּ אֵילֶיהָ וְכָל־מַדְרֵגוֹתֶיהָ

  וְכָל־עֲמוּדֶיהָ לַשֶׁטֶף יְמַגֵּרוּ:

הַסְּתָיו בְּכַלוֹתוֹ יָפִיץ חִצֵי פַחַד

עַל־תֵּבֵל וְיֹשְׁבֵיהָ עַל־אָדָם יַחַד

  בַּלָּהוֹת מִסָּבִיב וְחַתְחַתִּים בְּדָרֶךְ

צֶאֱצָאֵי אֲדָמָה כַּמֵּתִים כֻּלָּמוֹ

יִשַּׁחוּ בְנוֹת הַשִּׁיר לֹא נִשְׁמַע קוֹלָמוֹ

  כְּמֶלֶךְ עַז יִמְשֹׁל הַסְּתָיו יִרְדֶּה בְפָרֶךְ:

רְאֵה בֶן־אָדָם רְאֵה דְמוּת חַיֵּי הֶבְלֶךָ

זוּ נַחֲלָתְךָ עֲלֵי אֶרֶץ זֶה חֶבְלֶךָ

  רֶגַע יַלְדוּתְךָ וְנִצָּנִים יִבֹּלוּ

פִּתְאֹם וְכֹחַ עֲלוּמֶיךָ וְקֵיצְךָ אָיִן

וִימֵי קְצִירְךָ יִכְלוּ הֲתָעִיף בָּם עָיִן

  וְהַסְּתָיו יְמֵי זִקְנָתְךָ מְהֵרָה יִמֹּלוּ:

אַיֵּה תִקְוָתְךָ עַל־שׁוֹעֲךָ עַל־בֶּצֶר

אֵי עָשְׁרְךְ כִּי בָטַח עָלָיו הַיֵצֶר

  אַיֵּה תוֹחַלְתְּךָ עַל־כָּבוֹד וְתִפְאָרֶת

אַיֵּה יְמֵי צַר וְלֵילוֹת עָמָל אַיָּמוֹ

אַיֵּה יְמֵי חָג אַיֵּה הֵמְיַת הֲמוֹנָמוֹ

  אַיֵּה אַרְמְנוֹת רִצְפַּת שֵׁשׁ דַּל וְסֹחָרֶת:

אַיֵּה מְזִימוֹתֶיךָ וְרֹחַב לְבָבֶךָ

אַיֵּה רֵעֶיךָ וַעֲצֶרֶת אֹהֲבֶיךָ

  אִתָּם בְּעַצְלוֹת יְמֵי חַיֶּיךָ כִלִּיתָ

סָפוּ תַּמוּ כֻלָּם מִן בַּלְהוֹת קֶצֶב

תָּקוּץ בָּם בְּקֵץ הַיָּמִים כְּנִבְזֶה עֶצֶב

  אָז תָּבִין כִּי הֶבֶל וְשֶׁקֶר אִוִּיתָ:

אָכֵן אֱנוֹשׁ הַצְּדָקָה לֹא תַעַזְבֶךָ

הִיא רַעְיָתְךָ נֶצַח לָעַד תִּצְּרֶךָ

  וְתִפְתַּח לְפָנֶיךָ אֶת־שַׁעֲרֵי שָׁמָיִם

וְהִנֵּה יָבֹא יוֹם הַגָּדוֹל בְּאֵין עֶרֶב

בֹּקֶר לֹא עָבוֹת וְזֹהַר וְנֹגַהּ יֶרֶב

  וְהָעִוְרִים יַבִּיטוּ וְנִפְקְחוּ עֵינָיִם:

וְתָבִין וְתַשְׂכִּיל וְתַעֲלוּמוֹת תּוֹצִיא אוֹרָה

וְסִתְרֵי פִּלְאוֹת חָכְמָה נַפְשְׁךָ תַּחֲקֹרָה

  וְתֵדַע מִן מוֹצָא דָבָר וְתַכְלִיתֵהוּ

מַדּוּעַ תּוֹם אֲשֶׁר צְדָקוֹת אָהֵב וְיַעַשׂ

הָיָה בְעוֹנִי וְהִבִּיט עָמָל וָכַעַשׂ

  שְׂבַע רֹגֶן וּבוּז חֵלֶף צִדְקוֹתֵיהוּ:

מַדּוּעַ הָאַלְמָנָה כָּל־יָמֶיהָ

בְּחֹסֶר בְּכָפָן וְאֵין חֹנֵן לִיתוֹמֶיהָ

  הִיא גַלְמוּד יָשְׁבָה וּבָכְתָה בַסֵּתֶר

וּרְשָׁעִים הָיוּ עָתְקוּ גָּבְרוּ חָיִל

בְּבֵית מִשְׁתֶּה יִתְגֹּרְרוּ יוֹמָם וָלָיִל

  וּלְזַעַק נְקִיִּים יִלְעֲגוּ בִשְׂפַת יֶתֶר:

מַדּוּעַ אֱמֶת כְּשִׁפְחָה מֻכָּה בַשָּׁבֶט

מִשֶּׁקֶר גְבִרְתָּהּ בַּמַּטֶּה תֵחָבֶט

  וְהֻסָּג אָחוֹר מִשְׁפָּט וְעָמַד מִנֶּגֶד

מַדּוּעַ נְכֹחָה לֹא בָאָה בַשַּׁעַר

אֲבָל עַל־כִּסֵא כָבוֹד יָשַׁב הַבַּעַר

  וְאִישׁ דַּעַת חָיָה בְּאֵין לֶחֶם וּבֶגֶד:

כַּתְּרוּ־נָא זְעֵר נְקִיִּים וְזַכֵּי כַפָּיִם

אֲשֶׁר בְּחֹזֶק לִבְּכֶם נְשָׂאתֶם עוֹל כִּפְלָיִם

  כַּתְּרוּ־נָא זְעֵר מְהֵרָה תְּשׁוּעָה תַצְמִיחַ

עוֹד מְעַט וְהַסְּתָיו בִּסְעָרוֹתָיו אֵינֶנּוּ

עֵת הַזָּמִיר אֶל מְקוֹם חֹשֶׁךְ יְהֱדָפֶנּוּ

  וְלֹא יִבֹּל נִצָּנָיו לְעוֹלָם יַפְרִיחַ: