רקע
שלמה אבן גבירול
[כְּבָר נוֹאַשׁ]
mנחלת הכלל [?]
tשירה

ולה קצידה אלי אלמתואכל והי מן אשעארה אללבקא

[ולו שירה אל אלמתואכל והיא נמנית עם שיריו הצחים]


È — — — / È — — — / È — — / / È — — — /È — — — / È — —


כְּבָר נוֹאַשׁ לְבָבִי מִמְּצוֹא אִי / בְּאַנְשֵׁי הַזְּמָן וּבְיֽשְׁבֵי אִי

וְאֵיךְ לִי תֹֽאמְרוּ הִנֵּה וְהִנֵּה / יְעִירֵנִי לְבָבִי אִי לְךָ אִי

אֲשֶׁר אֶכְסֹף לְאִישׁ שֵׂכֶל וּבִינָה / וְאֵין בַּמָּה אֲרַוֶּה אֶת-צְמָאִי

וְלֹא אֶפְחַד בְּבֹאִי אֶל-אֲדָמָה / לְמַעַן כִּי יְדַעְתִּיהָ בְּבֹאִי

וְאֵדַע מִזְּמַנִּי אַחֲרִיתוֹ / כְּאִלּוּ בֶן-בְּעוֹר הָיָה נְבִיאִי

וְהָיִיתִי תְמוֹל מֵרֹאשׁ יְרֵאָיו / וְהִשְׁכִּים הַזְּמָן הַיּוֹם יְרֵאִי

וְגָבַרְתִּי בְּנוֹת יָמִים כְּאִלּוּ / אֲצִילֵי כֽוֹכְבֵי מָרוֹם צְבָאִי

וְאַל-יֹאמַר חֲכַם-לֵב כִּי אֲנִי שַׂר / סְפָרַד עַד יְהוֹדֵנִי מְשַׂנְאִי

וְכֵן אַל-יִשְׁמְעוּ אוֹתִי יְרִיבַי / עֲדֵי כִי-אֶתְּנָה אוֹתִי וּפִלְאִי

הֲכִי לֹא שֶׁאֱלַת נַפְשִׁי אֲמַלֵּא / עֲדֵי לֹא-תִֽהְיֶה תֵבֵל מְלֹאִי

וְלֹא אֶשְׁקֹט כְּמוֹ לֹא-אֶשְׁקֳטָה עַד / רְאוֹת אַפֵּי יְקוּתִיאֵל נְשִׂיאִי

אֲשֶׁר עֵת אֶקְרְאָה אֵלָיו יְמָאֵן / וְלֹא יִיגַע וְיָגַעְתִּי בְקָרְאִי

מְצָאתִיהוּ אֲחִי דַעַת וְהַשְׂכֵּל / וְשָׂמַחְתִּי עֲלֵי שִׂכְלִי בְּמָצְאִי

וְדִמִּיתִי הֱיוֹת יִשְׁעִי וְסַלְעִי / וְגִיל עִלְזִי וְצוּר עֻזִּי וְרַבְּאִי

נְתַתִּיהוּ לְמוּל חַיַּי וְשַׂמְתִּיו / כְּאֵל נֹכַח יְמֵי מִדַּת צְבָאִי

וְלָמָה אַחֲרַי תִּהְיֶה וְתִסֹּג / וְתַשְׁחֶה נֵס תְּהִלָּתְךָ בְּנָשְׂאִי

וְשֶׁמֶשׁ מִמְּךָ תִזְרַח בְּתֵבֵל / וְתֹאמַר עִמְּךָ הָיָה מְבוֹאִי

וְאָמְנָם אֵֽינְךָ שָׂעִיר כְּאָמְרָם / אֲבָל שָׂעִיר עֲלֵי עֶשְׂבִּי וְדִשְׁאִי

יְהִי לָעַד שְׁמָךְ הַטּוֹב מְרוֹמָם / וְלָעַד יַעֲלֶה שִׂיאוֹ נְשִׂיאִי.

המלצות קוראים
תגיות