¹

צִיּוֹן הֲלֹא תִשְׁאֲלִי לִשְׁלוֹם אֲסִירָיִךְ²

דֹרְשֵׁי שְׁלוֹמֵךְ³ וְהֵם יֶתֶר עֲדָרָיִךְ⁴

מִיָּם וּמִזְרָח וּמִצָּפוֹן וְתֵימָן שְׁלוֹם

רָחוֹק וְקָרוֹב שְׂאִי מִכֹּל עֲבָרָיִךְ

וּשְׁלוֹם אֲסִיר תַּאֲוָה⁵ נוֹתֵן דְּמָעָיו כְּטַל־

חֶרְמוֹן וְנִכְסַף לְרִדְתָּם עַל־הֲרָרָיִךְ

לִבְכּוֹת עֱנוּתֵךְ⁶ אֲנִי תַנִּים וְעֵת אֶחֱלֹם

שִׁיבַת שְׁבוּתֵךְ אֲנִי כִנּוֹר לְשִׁירָיִךְ

לִבִּי לְבֵית אֵל וְלִפְנִיאֵל מְאֹד יֶהֱמֶה

וּלְמַחֲנַיִם⁷ וְכֹל פִּגְעֵי טְהוֹרָיִךְ⁸

שָׁם הַשְּׁכִינָה שְׁכֵנָה לָךְ⁹ וְהַיּוֹצְרֵךְ

פָּתַח לְמוּל שַׁעֲרֵי שַׁחַק שְׁעָרָיִךְ¹⁰

וּכְבוֹד אֲדֹנָי לְבַד הָיָה מְאוֹרֵךְ וְאֵין

שֶׁמֶשׁ וְסַהַר וְכוֹכָבִים מְאִירָיִךְ

אֶבְחַר לְנַפְשִׁי לְהִשְׁתַּפֵּךְ בְּמָקוֹם אֲשֶׁר

רוּחַ אֱלֹהִים שְׁפוּכָה¹¹ עַל־בְּחִירָיִךְ

אַתְּ בֵּית מְלוּכָה וְאַתְּ כִּסֵּא אֲדֹנָי וְאִם

יָשְׁבוּ עֲבָדִים עֲלֵי כִסְאוֹת גְּבִירָיִךְ¹²

מִי־יִתְּנֵנִי מְשׁוֹטֵט בַּמְּקוֹמוֹת אֲשֶׁר

נִגְלוּ אֱלֹהִים לְחֹזַיִךְ וְצִירָיִךְ

מִי יַעֲשֶׂה־לִי כְנָפַיִם וְאַרְחִיק נְדֹד

אָנִיד לְבִתְרֵי לְבָבִי בֵּין בְּתָרָיִךְ¹³

אֶפֹּל לְאַפַּי עֲלֵי אַרְצֵךְ וְאֶרְצֶה אֲבָ־

נַיִךְ מְאֹד וַאֲחוֹנֵן אֶת־עֲפָרָיִךְ

אַף כִּי בְעָמְדִי¹⁴ עֲלֵי קִבְרוֹת אֲבוֹתַי וְאֶשְׁ־

תּוֹמֵם בְּחֶבְרוֹן עֲלֵי מִבְחַר קְבָרָיִךְ

אֶעְבֹר בְּיַעְרֵךְ וְכַרְמִלֵּךְ¹⁵ וְאֶעְמֹד בְּגִלְ־

עָדֵךְ וְאֶשְׁתּוֹמְמָה אֶל הַר עֲבָרָיִךְ

הַר הָעֲבָרִים וְהֹר הָהָר אֲשֶׁר־שָׁם שְׁנֵי

אוֹרִים גְּדוֹלִים מְאִירַיִךְ וּמוֹרַיִךְ

חַיֵּי נְשָׁמוֹת¹⁶ אֲוֵיר אַרְצֵךְ וּמִמָּר־דְּרוֹר

אַבְקַת עֲפָרֵךְ וְנֹפֶת צוּף נְהָרָיִךְ

יִנְעַם לְנַפְשִׁי הֲלוֹךְ עָרֹם וְיָחֵף¹⁷ עֲלֵי

חָרְבוֹת שְׁמָמָה אֲשֶׁר הָיוּ דְבִירָיִךְ

בִּמְקוֹם אֲרוֹנֵךְ אֲשֶׁר נִגְנַז¹⁸ וּבִמְקוֹם כְּרוּ־

בַיִךְ אֲשֶׁר שָׁכְנוּ חַדְרֵי חֲדָרָיִךְ

אָגֹז וְאַשְׁלִיךְ פְּאֵר נִזְרִי¹⁹ וְאֶקֹּב²⁰ זְמָן

חִלֵּל בְּאֶרֶץ טְמֵאָה אֶת־נְזִירָיִךְ

אֵיךְ יֶעֱרַב לִי אֲכֹל וּשְׁתוֹת בְּעֵת אֶחֱזֶה

כִּי יִסְחֲבוּ הַכְּלָבִים אֶת־כְּפִירָיִךְ

אוֹ אֵיךְ מְאוֹר יוֹם יְהִי מָתוֹק לְעֵינַי בְּעוֹד

אֶרְאֶה בְּפִי עֹרְבִים פִּגְרֵי נְשָׁרָיִךְ

כּוֹס הַיְגוֹנִים²¹ לְאַט הַרְפִּי מְעַט כִּי כְבָר

מָלְאוּ כְסָלַי וְנַפְשִׁי מַמְּרוֹרָיִךְ

עֵת אֶזְכְּרָה אָהֳלָה²² אֶשְׁתֶּה חֲמָתֵךְ וְאֶזְ־

כֹּר אָהֳלִיבָה וְאֶמְצֶה אֶת־שְׁמָרָיִךְ²³

צִיּוֹן כְּלִילַת יֹפִי אַהְבָה וְחֵן תִּקְשְׁרִי

מֵאָז²⁴ וּבָךְ נִקְשְׁרוּ נַפְשׁוֹת חֲבֵרָיִךְ²⁵

הֵם הַשְּׂמֵחִים לְשַׁלְוָתֵךְ וְהַכֹּאֲבִים

עַל־שֹּׁמֲמוּתֵךְ וּבֹכִים עַל־שְׁבָרָיִךְ

מִבּוֹר שְׁבִי שֹׁאֲפִים נֶגְדֵּךְ וּמִשְׁתַּחֲוִים²⁶

אִישׁ מִמְּקוֹמוֹ אֱלֵי נֹכַח שְׁעָרָיִךְ

עֶדְרֵי הֲמוֹנֵךְ²⁷ אֲשֶׁר גָּלוּ וְהִתְפַּזְרוּ

מֵהַר לְגִבְעָה וְלֹא שָׁכְחוּ גְדֵרָיִךְ²⁸

הַמַּחֲזִיקִים בְּשׁוּלַיִךְ וּמִתְאַמְּצִים

לַעְלוֹת וְלֶאֱחֹז בְּסַנְסִנֵּי תְמָרָיִךְ²⁹

שִׁנְעָר וּפַתְרוֹס³⁰ הֲיַעַרְכוּךְ בְּגָדְלָם³¹ וְאִם

הֶבְלָם³² יְדַמּוּ לְתֻמַּיִךְ וְאוּרָיִךְ

אֶל־מִי יְדַמּוּ מְשִׁיחַיִךְ וְאֶל־מִי נְבִי־

אַיִךְ וְאֶל־מִי לְוִיַיִךְ וְשָׂרָיִךְ

יִשְׁנֶה³³ וְיַחְלֹף כְּלִיל³⁴ כָּל־מַמְלְכוֹת הָאֱלִיל

חָסְנֵךְ³⁵ לְעוֹלָם לְדוֹר וָדוֹר נְזָרָיִךְ

אִוֵּךְ לְמוֹשָׁב אֱלֹהַיִךְ וְאַשְׁרֵי אֱנוֹשׁ

יִבְחַר יְקָרֵב וְיִשְׁכֹּן בַּחֲצֵרָיִךְ

אַשְׁרֵי מְחַכֶּה וְיַגִּיעַ וְיִרְאֶה עֲלוֹת

אוֹרֵךְ וְיִבָּקְעוּ עָלָיו שְׁחָרָיִךְ³⁶

לִרְאוֹת בְּטוֹבַת בְּחִירָיִךְ וְלַעְלֹז בְּשִׂמְ־

חָתֵךְ בְּשׁוּבֵךְ אֱלֵי קִדְמַת נְעוּרָיִךְ

¹

לִבִּי בְמִזְרָח וְאָנֹכִי בְּסוֹף מַעֲרָב²

אֵיךְ אֶטְעֲמָה³ אֵת אֲשֶׁר אֹכַל וְאֵיךְ יֶעֱרַב

אֵיכָה אֲשַׁלֵּם נְדָרַי וֶאֱסָרַי⁴ בְּעוֹד

צִיּוֹן בְּחֶבֶל אֱדוֹם וַאְנִי בְּכֶבֶל עֲרָב⁵

יֵקַל בְּעֵינַי עֲזֹב כָּל־טוּב סְפָרַד⁶ כְּמוֹ

יֵקַר בְּעֵינַי רְאוֹת עַפְרוֹת דְּבִיר נֶחֱרָב:⁷

¹

יְפֵה נוֹף² מְשׂוֹשׂ תֵּבֵל / קִרְיָה לְמֶלֶךְ רָב³

לָךְ נִכְסְפָה נַפְשִׁי / מִפַּאֲתֵי מַעְרָב

הֲמוֹן רַחֲמַי נִכְמָר⁴ / כִּי אֶזְכְּרָה קֶדֶם

כְּבוֹדֵךְ אֲשֶׁר גָּלָה /וְנָוֵךְ אֲשֶׁר חָרָב

וּמִי יִתְּנֵנִי עַל־ / כַּנְפֵי נְשָׁרִים עַד

אֲרַוֶּה בְדִמְעָתִי / עֲפָרֵךְ וְיִתְעָרָב⁵

דְּרַשְׁתִּיךְ וְאִם מַלְכֵּךְ / אֵין בָּךְ⁶ וְאִם בִּמְקוֹם

צֳרִי גִלְעֲדֵךְ נָחָשׁ / שָׂרָף וְגַם עַקְרָב

הֲלֹא אֶת־אֲבָנַיִךְ / אֲחוֹנֵן וְאֶשָּׁקֵם

וְטַעַם רְגָבַיִךְ / לְפִי מִדְּבַשׁ יֶעְרָב

¹

הֱצִיקַתְנִי תְשׁוּקָתִי לְאֵל חָי

לְשַׁחֵר² אֶת־מְקוֹם כִּסְאוֹת מְשִׁיחָי

עֲדֵי כִי לֹא נְטָשַׁתְנִי לְנַשֵּׁק³

בְּנֵי בֵיתִי וְאֶת־רֵעַי וְאֶחָי

וְלֹא אֶבְכֶּה עֲלֵי פַרְדֵּס נְטַעְתִּיו

וְהִשְׁקִיתִיו וְהִצְלִיחוּ צְמָחָי

וְלֹא אֶזְכֹּר יְהוּדָה וַעֲזַרְאֵל⁴

שְׁנֵי פִרְחֵי יְקָר מִבְחַר פְּרָחָי

וְאֶת־יִצְחָק אֲשֶׁר כַּבֵּן חֲשַׁבְתִּיו

יְבוּל שִׁמְשִׁי וְטוּב גֶּרֶשׁ יְרָחָי⁵

וְכִמְעַט אֶשְׁכְּחָה בֵּית הַתְּפִלָּה

אֲשֶׁר הָיוּ בְמִדְרָשָׁיו מְנוּחָי

וְאֶשְׁכַּח תַּעֲנוּגֵי שַׁבְּתֹתַי

וְהַדְרַת מוֹעֲדַי וּכְבוֹד פְסָחָי

וְאֶתֵּן אֶת־כְּבוֹדִי לַאֲחֵרִים⁶

וְאֶעְזֹב לַפְּסִילִים אֶת־שְׁבָחָי

הֲמִירוֹתִי בְּצֵל שִׂיחִים חֲדָרַי

וּבִמְשֻׂכַת סְבַךְ חֹסֶן בְּרִיחָי⁷

וְנַפְשִׁי שָׂבְעָה רָאשֵׁי בְשָׂמִים⁸

וְרֵיחַ נַעֲצוּץ שַׂמְתִּי רְקָחָי⁹

וְחָדַלְתִּי הֲלוֹךְ עַל־כַּף וְעַל־אַף¹⁰

וְנָתַתִּי בְּלֵב־יַמִּים אֳרָחָי

עֲדֵי אֶמְצָא הֲדוֹם רַגְלֵי אֱלֹהָי

וְשָׁמָּה אֶשְׁפְּכָה נַפְשִׁי וְשִׂיחָי

וְאֶסְתּוֹפֵף¹¹ בְּהַר קָדְשׁוֹ וְאַקְבִּיל¹²

לְפִתְחֵי שַׁעֲרֵי שַׁחַק פְּתָחָי

וְאַפְרִיחַ בְּמֵי יַרְדֵּן נְרָדַי¹³

וְאַשְׁלִיחַ בְּשִׁלֹחַ שְׁלָחָי¹⁴

אֲדֹנָי לִי וְאֵיךְ אִירָא וְאֶפְחַד

וּמַלְאַךְ רַחֲמָיו נֹשֵׂא שְׁלָחָי¹⁵

אֲהַלֵּל אֶת־שְׁמוֹ מִדֵּי חֲיוֹתִי¹⁶

וְאוֹדֶנּוּ עֲדֵי נֶצַח נְצָחָי:

¹

דְּבָרֶיךָ² בְּמוֹר עֹבֵר רְקוּחִים³

וִמִצּוּר הַרֲרֵי הַמּוֹר לְקֻחִים⁴

וְלָךְ וּלְבֵית אֲבֹתֶיךָ חֲמֻדוֹת⁵

אֲשֶׁר יִלְאוּ לְהַשִּׂיגָם שְׁבָחִים⁶

פְּגַשְׁתַּנִי⁷ בְּמִדְבָּרִים עֲרֵבִים⁸

בְּתוֹכָם אֹרְבִים נֹשְׂאֵי שְׁלָחִים⁹

דְּבָרִים אָרְבוּ תוֹכָם דְּבֹרִים¹⁰

וְתוֹךְ יַעְרַת דְּבַשׁ קוֹצִים כְּסוּחִים¹¹

אִם כִּי לֹא שְׁלוֹם שָׁלֵם יְבֻקַּשׁ

בְּעוֹדָהּ מָלְאָה עִוְרִים וּפִסְחִים¹²

לְמַעַן בֵּית אֱלֹהֵינוּ נְבַקֵּשׁ

שְׁלוֹמָהּ אוֹ בְּעַד רֵעִים וְאַחִים¹³

וְאִם כֶּן־הוּא כְּדִבְרֵיכֶם רְאוּ חֵטְא

עֲלֵי כָל־כֹּרְעִים נֶגְדָּהּ וְשֹׁחִים¹⁴

וְחֵטְא הוֹרִים שְׁכָנוּהָ כְגֵרִים¹⁵

וְקָנוּ שָׁם לְמֵתֵיהֶם צְרִיחִים¹⁶

וְתֹהוּ מַעֲשֵׂה אָבוֹת חֲנֻטִים

וּפִגְרֵיהֶם אֱלֵי אַרְצָהּ שְׁלוּחִים¹⁷

וְהָיוּ בַעֲבוּרָהּ נֶאֱנָחִים

וְהָאָרֶץ מְלֵאָה נֶאֱלָחִים¹⁸

וְלָרִיק מִזְבְּחוֹת אָבוֹת בְּנוּיִים¹⁹

וְלַשָּׁוְא קָרְבוּ שָׁם הַזְּבָחִים

הֲטוֹב שֶׁיִּהְיוּ מֵתִים זְכוּרִים²⁰

וְהָאָרוֹן וְהַלֻּחוֹת שְׁכוּחִים

נְשַׁחֵר אֶת־מְקוֹם שַׁחַת וְרִמָּה

וְנִטּשׁ אֶת־מְקוֹר חַיֵּי נְצָחִים²¹

הֲלָנוּ נַחֲלָה רַק מִקְדְּשֵׁי אֵל²²

וְאֵיךְ נִהְיֶה לְהַר קָדְשׁוֹ שְׁכֵחִים

הֲיֵשׁ לָנוּ בְּמִזְרָח אוֹ בְּמַעְרָב

מְקוֹם תִּקְוָה נְהִי עָלָיו בְּטוּחִים

אֲבָל אֶרֶץ אֲשֶׁר מָלְאָה שְׁעָרִים²³

לְנֶגְדָּם שַׁעֲרֵי שַׁחַק פְּתוּחִים

כְּהַר סִינַי וְהַכַּרְמֶל וּבֵית אֵל

וּבָתֵּי הַנְּבִיאִים הַשְּׁלוּחִים²⁴,

וְכִסְאוֹת כֹּהֲנֵי כִסֵּא אֲדֹנָי,

וְכִסְאוֹת הַמְּלָכִים הַמְּשׁוּחִים.

וְלָנוּ גַּם לְבָנֵינוּ יְעָדָהּ²⁵,

וְאִם צִיִּים שְׁכָנוּהָ וְאֹחִים²⁶.

הֲלֹא כֵן נִתְּנָה קֶדֶם לְאָבוֹת,

וְכֻלָהּ נַחֲלַת קוֹצִים וְחֹחִים.

וְהֵם מִתְהַלְּכִים אָרְכָּהּ וְרָחְבָּהּ,

כְּמִתְהַלֵּךְ בְּפַרְדֵּס בֵּין צְמָחִים.

וְהֵם גֵּרִים וְתוֹשָׁבִים, וְדֹרְשִׁים

מְקוֹם קֶבֶר וּמָלוֹן שָׁם כְּאֹרְחִים²⁷.

וְשָׁם הִתְהַלְּכוּ לִפְנֵי אֲדֹנָי,

וְלָמְדוּ הַשְּׁבִילִים הַנְּכֹחִים²⁸.

וְאָמְרוּ כִּי רְפָאִים שָׁם יְקוּמוּן²⁹,

וְיֵצְאוּ שֹׁכְבִים תַּחַת בְּרִיחִים³⁰.

וְכִי שָׁם תַּעֲלֹזְנָה הַגְּוִיּוֹת³¹,

וְתָשֹׁבְנָה נְפָשׁוֹת לַמְּנוּחִים³².

רְאֵה נָא גַּם רְאֵה דוֹדִי וְהָבֵן,

וְסוּר מִמּוֹקְשִׁים צִנִּים וּפַחִים³³.

וְאַל תַּשִּׁיאֲךְ חָכְמַת יְוָנִית³⁴,

אֲשֶׁר אֵין לָהּ פְּרִי כִּי אִם פְּרָחִים³⁵.

וּפִרְיָהּ כִּי אֲדָמָה לֹא רְקוּעָה³⁶,

וְכִי לֹא אָהֳלֵי שַׁחַק מְתוּחִים.

וְאֵין רֵאשִׁית לְכָל־מַעְשֵׂה בְרֵאשִׁית,

וְאֵין אַחְרִית לְחִדּוּשׁ הַיְרָחִים³⁷.

שְׁמַע דִּבְרֵי נְבוֹנֶיהָ נְבֻכִים³⁸,

בְּנוּיִים עַל־יְסוֹד תֹּהוּ וְטִיחִים.

וְתָשׁוּב לָךְ בְּלֵב רֵיקָם וְנָעוּר³⁹,

וּפֶה מָלֵא בְּרֹב שִׂיגִים וְשִׂיחִים.

וְלָמָּה־זֶה אֲבַקֶּשׁ־לִי אֳרָחוֹת

עֲקַלְקַלּוֹת, וְאֶעְזֹב אֵם אֳרָחִים⁴⁰?