רקע
שלמה אבן גבירול
[נֶפֶשׁ אֲשֶׁר עָלוּ שְׁאוֹנֶיהָ]
mנחלת הכלל [?]
tשירה

ולה קצידה יד͘םّ פיהא בואיק אלעצר ויצף פצ͘ל אלחכמה [ולו שירה שבה הוא מגנה את פגמי זמנו ומתאר את מעלת החכמה]


נֶפֶשׁ אֲשֶׁר עָלוּ שְׁאוֹנֶיהָ / אָנָה תְשַׁלַּח רַעֲיוֹנֶיהָ

תֶּהְמֶה וְתִדְמֶה לַעֲלוֹת כָּאֵשׁ / שֶׁיַּעֲלוּ תָמִיד עֲשָׁנֶיהָ

הַאַתְּ כְּמוֹ גַלְגַּל אֲשֶׁר יִסֹּב / עַל־הָאֲדָמָה וְהֲמוֹנֶיהָ

אוֹ רַעֲיוֹנֶיךָ כְּמוֹ יַמִּים / שֶׁהָטְבְּעוּ בָהֶם אֲדָנֶיהָ

אֵיךְ תֶּחֱזֶה תִּקְוַת לְבָבְךָ כִּי / תִבְזֶה מְקוֹם עַיִשׁ וּבָנֶיהָ

הַט לִבְּךָ מֵעַל נְתִיב חָכְמָה / תִּפְרָשׂ־לְךָ תֵבֵל סְדִינֶיהָ

אַחַר קְנוֹת בִּינָה הֲלֹא תִרְאֶה / רָאשֵׁי אֲדָמָה אַחֲרֹנֶיהָ

נַפְשִׁי יְדִידַי נַחֲמוּ עַל־זֹאת / אַף נַחֲמוּהָ עַל־יְגוֹנֶיהָ

תִּצְמָא לְאִישׁ־שֶׂכֶל וְלֹא תִמְצָא / אָדָם יְרַוֶּה צִמְּאוֹנֶיהָ

דִּרְשׁוּ בְּאַלְפֵי הַזְּמָן אוּלַי / בָּהֶם אֱנוֹשׁ יָפִיק רְצוֹנֶיהָ

אִם־הָאֲדָמָה חָֽטְאָה עָלַי / יָרֹק לְבָבִי רֹק בְּפָנֶיהָ

אִם־לֹא בְעֵינָהּ רָאֲתָה אוֹרִי / דַּי לָאֲדָמָה עִוְּרוֹנֶיהָ

אִם־כִּפְּרָה מִמָּחֳרָת פָּנַי / אָשׁוּב וְאֶסְלַח לַעֲוֹנֶיהָ

גַּלְגַּל אֲדָמָה שׁוּב וְאַל־תָּרִים / יַד הַזְּמָן עַל־יַד נְבוֹנֶיהָ

רַב־לָךְ עֲשׂוֹת עָוֶל וְדַי לִהְיוֹת / אַרְזֵי אֲדָמָה קִֽיקְיוֹנֶיהָ

הָקֵל נְקַלֵּי־עָם אֲשֶׁר מֵהֶם / קַלּוּ מְאֹד עָלַי אֲבָנֶיהָ

וּכְרֹת זְנַב הָאֹֽמְרִים אֵלַי / אַיֵּה תְבוּנָה וֶאֱמוּנֶיהָ

לוּ שָֽׁפְטָה תֵבֵל בְּצֶדֶק בָּם / לֹא־נָֽתְנָה טֶרֶף לְבָנֶיהָ

נָחוּ וְלֹא־יָגְעוּ וְהִשִּׂיגוּ / רַק מִבְּלִי־דַעַת שְׂשׂוֹנֶיהָ

לָקְחוּ בְנוֹת־שֶׁמֶשׁ וְהוֹלִידוּ / סִכְלוּת וְלֹא־הָיוּ חֲתָנֶיהָ

לָמָּה תְרִיבוּנִי עֲלֵי שִׂכְלִי / חוֹחֵי אֲדָמָה קִמְּשׂנֶיהָ

אִם־נִקְלְתָה חָכְמָה בְּעֵינֵיכֶם / אַתֶּם מְאֹד קַלִּים בְּעֵינֶיהָ

אִם־נִסְגְּרָה כִּי לִבְּכֶם סָגוּר / הִנֵּה אֲנִי אֶפְתַּח אֲרוֹנֶיהָ

אֵיךְ אֶעֱזֹב חָכְמָה וְרוּחַ־אֵל / כָּרַת בְּרִית בֵּינִי וּבֵינֶיהָ

אוֹ תַעֲזֹב אֹתִי וְהִיא כָאֵם / לִי וַאֲנִי יֶלֶד זְקֻנֶיהָ

אוֹ כַחֲלִי אוֹ כַעֲדִי נֶפֶשׁ / אוֹ כַעֲנָק עַל־צַוְּרֹנֶיהָ

אֵיךְ תֹּֽאמְרוּ לִי עֶדְיְךָ הוֹרֵד / וּפְשֹׁט רְבִידָהּ מִגְּרוֹנֶיהָ

בָּהּ יַעֲלֹז לִבִּי וּבָהּ יִיטַב / כִּי טָהֲרוּ נַחְלֵי עֲדָנֶיהָ

לֹא־טוֹב הֱיוֹת נַפְשִׁי כְּמוֹ־שֶׁמֶשׁ / שֶׁהֶחֱשִׁיכוּהָ עֲנָנֶיהָ

מִדֵּי הֱיוֹתִי אַעֲלֶה נַפְשִׁי / וּבְעַד עֲרָפֶל שִׂים מְעוֹנֶיהָ

כִּי נִשְׁבְּעָה עָלַי לְבַל־אֶשְׁקוֹט / עַד־אֶמְצְאָה דַּעַת אֲדֹנֶיהָ.

המלצות קוראים
תגיות