ומן מטולאת קצאיד‍ה֒ ומבהג֗את אשעארה קצידה֒ בנאהא (?) עלי ד֗םّ אלזמאן ואהלה ואלפכ֗ר בנפסה [ומשירותיו הארוכות ושיריו המפליאים שירה שבנה בגנות הזמן ועמו בשבח עצמו]

עֲטֵה הוֹד וַעֲדֵה וּלְבַשׁ גְּאוֹנִים / וְהִנָּחֵם וְהֶרֶף מִיְּגוֹנִים

וְדוֹם אִם־בַּבְּכִי תָלִין וְקַוֵּה / הֲלֹא תָקוּם וְלַבֹּקֶר רְנָנִים

וְדַע כִּי־הִנְּךָ יָחִיד בְּדוֹרְךָ / וְשִׁירְךָ כַּחֲרוּזֵי צַוְּרֹנִים

עֲנִיתִיהוּ וְאֵיךְ אֶרֶף וְאֶדֹּם / וְאֵיכָה יִדְּמוּ כַּיָּם שְׁאוֹנִים

אֲפָפוּנִי הֲדָפוּנִי מְצוּקִים / וְחִצֵּי הַזְּמָן נֶגְדִּי נְכֹנִים

וְיֹרוּנִי בְּנוֹת יָמִים כְּאִילּוּ / אֲנִי שַׂעְרָה וְהֵם קַלְעֵי אֲבָנִים

וּבִכְנָפַי זְמַנִּים יֹאחֲזוּנִי / וְעָלַי נֹֽסְעִים תָּמִיד וְחֹנִים

וְאֵדַע הַזְּמַן הֵיטֵב וְהוּא לֹא / יְדָעַנִי אֲבָל כִּי בַֽיְגוֹנִים

וְלֹא־יָדְעוּ יְלָדָיו כִּי לְבָבִי / מְאֹד חָזַק וְהָיָה כָּאֲבָנִים

וְלֹא־יִדְאַג וְלֹא־יִשֹּׁם אֲלֵיהֶם / וְיִשְׂחַק אִם־יְבֹאוּהוּ הֲמוֹנִים

אֲנִי הַבֵּן אֲשֶׁר טֶרֶם יְהֻלַּד / לְבָבוֹ בָן כְּמוֹ בֶן־הַשְּׁמֹנִים

וְגֵוִי יַהֲלֹךְ עַל־הָאֲדָמָה / וְנַפְשִׁי תִהֲלַךְ עַל־הָעֲנָנִים

וְיֶתֶר מַעֲלוֹת חָכְמָה תְּבַקֵּשׁ / וּמֹאֶסֶת בְּרָב־עֹשֶׁר וְהוֹנִים

וְיָגַעְתִּי בְדָרְשָׁהּ מִנְּעוּרַי / לְמַעַן אַחֲרִיתָהּ מַעֲדַנִּים

וְהִיא הָיְתָה אֲחוֹתִי מִנְּעוּרַי / וּמֹדָעָהּ קְרָאַתְנִי בְּבָנִים

וְנַפְשִׁי מִכְּלִי חֶמְדָּה יְקָרָה / וְתַחְשׁב הַפְּנִינִים כָּאֲבָנִים

וּמֵרֹאשׁ מָאֲסָה נֹעַם אֲדָמָה / וְחַיֶּיהָ בְּעֵינֶיהָ אֲסוֹנִים

לְמַעַן כִּי־שְׂשׂוֹנֶיהָ יְגוֹנִים / וּמַדּוּחוֹת וְאוֹנֶיהָ כְּאוֹנִים

וּבָתֵּי מַחֲמַדֶּיהָ הֲרִסוֹת / וּבָתֵּי מַהֲלֻמֶיהָ נְכֹנִים

תְּפַתֶּה כָּל־חֲסַר לֵבָב בְּיָפְיָהּ / כְּבַעְלַת־אוֹב וְאֵשֶׁת יִדְּעֹנִים

בְּשִׁנּוּיָהּ תְּשַׁנֶּה הַֽמְצֻקִים / וְזֹאת לֹא־זֹאת תְּשַׁלַּח הַזְּמַנִים

וְתָשִׁית רֹֽזְנֵי הַיּוֹם כְּמוֹ־כֵן / מְחֻסָּרִים בְּדֵעוֹתָם וְשׁוֹנִים

לְקָחָם עַל־זְרוֹעֹתָיו וְדִכָּם / וְאִם־הָיוּ עֲלֵי חֵיקוֹ אֱמֻנִים

וְהֵתֵל בַּחֲבֻרָתָם וְשָׂחַק / לְעֻמָּתָם וְהֶרְאָמוֹ שְׂשׂוֹנִים

רְאֵם עַתָּה אֲחִי מוּסָר וּבִינָה / וְהַבֵּט יוֹם כְּלוֹתָם כַּעֲנָנִים

וְיוֹם יֵחָֽשְׂפוּ־בוֹ רֽוֹגְנֵיהֶם / וְיִרְאֶה כָל־אֱנוֹשׁ מֵהֶם קְלוֹנִים

חֲמָתִי נִתְּכָה עָלַי בְּשׁוּרִי / פְּתָאִים חָֽשְׁבוּ כִּי־הֵם מְבִינִים

וְאֶשְׁתֹּק מֵעֲדָתָם הַנְּבָלָה / וְאֶכָּבֵד וְאַשְׁקִיט הַשְּׁאוֹנִים

וְהֵם מִתְפָּאֲרִים עָלַי בְּשִׁירִים / וּמִי־יִתֵּן וְיִהְיוּ מַאֲזִינִים

וְלוּ הִתְפָּאֲרוּ עָלַי מְאוֹרֵי / שְׁחָקִים הֶחֱשַׁכְתִּים כַּעֲנָנִים

פְּתָאִים חָֽשְׁבוּ סִכְלוּת לְהַשְׁוֹת / עֲצֵי־עֵדֶן בְּשׁוּרוֹת הָאֲדָנִים

הֲכָאֵלֶּה לְפָנַי יַעֲרֹכוּן / צְעִירֵי הַנְּמָלִים הַקְּטַנִּים

אֲשֶׁר לֹא־יֵדְֽעוּ בַּשִּׁיר לְדַבֵּר / וְאֵינָם לַהֲגוֹת בּוֹ נֶאֱמָנִים

וְאִלּוּ יַעֲלֶה שִׁירָם בְּמִשְׁקָל / אֲזַי יִהְיֶה כְּאָבָק וַעֲשָׁנִים

וְטֶרֶם יֵֽלְדוּ כָּרוּ קְבָרִים / לְשִׁירֵיהֶם וְעִמָּהֶם טְמֻנִים

עֲדָרִים מָאֲסוּ רֹעֵה אֱמוּנָה / וְלוּלֵי אֵל טְבַחְתִּימוֹ כְצֹאנִים

וְאִלּוּ נָפְֽלוּ יָדַי עֲלֵיהֶם / נְשָׂאתִימוֹ וְנָפְלוּ בַיְּוֵנִים

וְכֻלָּם הָטְבְּעוּ בַבֹּץ צְמִיתֻת / וְלֹא־יָכְלוּ שְׂאֵתָם הָעֲנָנִים

וְאוּלָם מִפְּנֵי שִׁירִי יְשׁוּבוּן / אֲשֶׁר יִכָּֽנְעוּ אֵלָיו גְּאוֹנִים

וְיִתְרַצּוּ לְכַפֵּר הַשְּׁגָגוֹת / וְיִתְוַדּוּ לְהַעְבִיר הָעֲוֹנִים

עֲרָכוּנִי וְהֵם לֹא־יָֽדְעוּ כִּי / אֲנִי שֶׁמֶשׁ אֲכַסֶּה בַּמְּעוֹנִים

אֲנִי אֶחְקֹר צְפוּנֵי הַמְּלִיצָה / וְאֶפְתַּח שַׁעֲרֵי דַעַת וּבִינִים

וְאֶקְבֹּץ מִנְּפוּצֶיהָ חֲרוּזִים / וְאֶלְקֹט מִפְּזוּרֶיהָ פְּנִינִים

וְגַבְנֻנֵּי הֲרָרֶיהָ שְׁרוֹנִים / לְפָנַי וָאֳרָחֶיהָ נְכֹנִים

אֲנִי בָאתִי לְחַדְרֵיהֶם אֲשֶׁר הֵם / לְכָל־מֵבִין וְכָל־חָכָם צְפוּנִים

וְאָשִׁיר שִׁיר יְשַׂמַּח הַנְּפָשׁוֹת / וְהַלִּבּוֹת יְחַלֵּץ מִיְּגוֹנִים

וְכֹל לֹא־יִמְצְאוּ עִמִּי יְדֵיהֶם / וְיוֹדוּ לַעֲצָתִי בַּלְּשֹׁנִים

וְיָשֻׁבוּ מְקַנְאֵי מַעֲלָתִי / מְלֵאִים מֵחֲמַת אֵשׁ הַחֲרוֹנִים

וְאֶת־חַחִי בְּאַפֵּיהֶם אֲשַׁוֶּה / וְאֶתֵּן עַל־לְחָיֵיהֶם רְסָנִים

וְאֶשְׁחָקֵם וְאֶדְרֹךְ בָּמֳתֵיהֶם / וְאַשְׂבִּיעַ פְּנֵיהֶם בַּקְּלוֹנִים

וְיִהְיוּ כַנְּעֹרֶת מִפְּנֵי־אֵשׁ / תְּלַהֵט בֶּעֱזוּזָהּ הַחֲסֻנִּים

וּפִי כָל־דּֽוֹבְרֵי־שֶׁקֶר יְסֻכַּר / וְיָמֻתוּ בְּאֵין כֹּח וְאוֹנִים

וְלֹא־יָרוּם לְבָבָם לֶאֱמֹר שִׁיר / וְאַף לֹא־יִזְכְּרוּהוּ בַלְּשֹׁנִים

וְהֵם לֹא־יַעֲלוּ עַל־לֵב לְעוֹלָם / וְכַמֵּתִים בְּחַיֵּיהֶם טְמֻנִים

לְאֵידָם מַה־שְּׂחוֹק עָשׂוּ בְנַפְשָׁם / בְּשׂוּמָם כַּעֲצֵי־קַשׁ קִנְּמוֹנִים

וְאָמְנָם לֹא לְעוֹלָם יִֽהְיֶה אוֹר / כְּמוֹ־חֹשֶׁךְ וְחַיִים כַּאֲסוֹנִים

וְלֹא שַׁחַק יְהִי לָעַד אֲדָמָה / וְכֵן לֹא־יִהְיֶה עֵץ כָּאֲבָנִים

וְשִׁירֵנוּ כְּיִלֹּדֵי אֲמָנָה / וְשִׁירֵהֶם כְּמוֹ יַלְדֵי זְנוּנִים

וְכִי־נַפְשָׁם קְרוּצָה מֵאֲדָמָה / קְרָצוּהוּ בְּדָכְיָם מִדְּמָנִים

וְנַפְשֵׁנוּ פְנִינִיָּה וְעַל־כֵּן / גְּזַרְנוּהוּ אֲנַחְנוּ מִפְּנִינִים

וּבוֹ אָרוּם וְאֶתְנַשֵּׂא עֲלֵי־כָל־ / מְתֵי דוֹרִי וְעַל־כָּל־הַזְּמַנִּים

וְאֶתְגַבֵּר בְּשִׁירָתִי וְאֶחְבֹּשׁ / פְּנֵי שֹׂנְאַי לְעוֹלָם בַּטְּמֻנִים

אֲשֶׁר הֵמָּה עֲרִירֵי לֵב וְרַעְיוֹן / וְאֵינָם שֹֽׁמְעִים כִּי אִם־מְאֵנִים

וְדָת אֵל חָֽשְׁבוּ־בָהּ מַחֲשָׁבוֹת / וְשָׁגוּ־בָהּ וְהִרְבּוּ עוֹד זְדֹנִים

וּמַתְכֹּנֶת לְשׁוֹן עִבְרִית עֲמֻקָּה / וְקָשָׁה לַאֲחֵי מוּסָר וּבִינִים

וּבִינָהּ מִפְּלִיאֵי הַתְּבוּנוֹת / וְאֵינָהּ כִּי לְחַדֵּי רַעֲיוֹנִים

כְּבוּדָּה הִיא לְנִכְבַּדֵּי תְבוּנָה / וְאֵין הִיא לַנְּמָלִים הַקְּטַנִּים

אֲשֶׁר אֵין־דַּי בְּבִינָתָם לְהַפְלוֹת / צְעִירֵי הַזְּבוּבִים מִשְּמֵנִים

אֲהָהּ כִּי הַזְּמַן חָסֵר תְּבוּנוֹת / וְנִמְלָא מֵעֲדַת רוֹגְנִים וְשׁוֹנִים

וְעַל־כֵּן כָּל־יְמֵי חַיַּי אֲקֹנֵן / וְלִבִּי יַעֲשֶׂה מִסְפֵּד כְּתַנִּים

לְמַעַן נֶעְדְּרוּ אַנְשֵׁי אֱמוּנָה / וְסָפוּ כָּל־נְשֻׂאֵי שֵׁם וּפָנִים

וְתַחַת הַהֲדַס סִרְפַּד וְחוֹחַ / וּבִמְקוֹם הָאֲרָזִים קִמְּשֹׂנִים

וְאִם־הִתְמוֹטֲטוּ גִּבְעוֹת תְּבוּנָה / וְאִם־הִתְפּוֹצֲצוּ הָרֵי אֲמָנִים

הֲלֹא טוּב הַשְּׁאָר נִשְׁאַר וְזָרַח / כְּמוֹ־שֶׁמֶשׁ עֲלֵי־יוֹם הָעֲנָנִים

וְחָשַׁב הָאֱלֹהִים זֹאת לְטוֹבָה / לְהַשְׁאִיר בֵּין שְׁאָר עַמּוֹ אֱמוּנִים

לְשׁוֹבֵב יַעֲקֹב אֵלָיו וְלֶאְסֹף / פְּזוּרֵי דָת לְאֵל נֹטֶה מְעוֹנִים

וְלִבְנוֹת נִגְדְּעֵי הַנַּהֲלָאָה / וְלִסְאוֹן שֹֽׁפְטֵי הָרַע סְאוֹנִים

לְנַחֵם לֵב שְׁפָלִים וַאֲמֵלִים / וּמַכּוֹתָם לְרַכֵּךְ בַּשְּׁמָנִים

וְלִרְעוֹת צֹאן מְנֻדָּח בַּאֲפָסִים / וְהָרָזִים לְעַדֵּן כַּשְּׁמֵנִים

אֱמֶת כִּי־נִהֲלָם עַל־מֵי מְנֻחוֹת / וְהוֹבִילָם לְחַיֵּי מַעֲדַנִּים

וְהִרְוָם בַּתְּבוּנָה עַד־לְשָׂבְעָה / וְהִשְׁקָם כִּי־הֲרָגוּם צִמְּאוֹנִים

אֲשֶׁר חִזַּק יְדֵי דָת אֵל אֱמוּנִים / וְהֶעְמִידָהּ עֲלֵי־רֹאשׁ הַמְּכוֹנִים

אֲשֶׁר הֵשִׁיב פְּזוּרֵי צֹאן תְּעוּדָה / וְהוֹשִׁיב נֹחֲלֶיהָ מִלְּפָנִים

אֲשֶׁר הוֹדַע בְּעַמּוֹ מִשְׁפְּטֵי־אֵל / וְאֵלָיו יַעֲלוּ עַמּוֹ נְדוֹנִים

וְכַמָּה תֽוֹצְאוֹת מִשְׁפָּט יְגַלֶּה / בְחָכְמָתוֹ וְיַתִּיר הָאֱטוּנִים

וְהוּא בַעַל לְשׁוֹן דָּת הַקְּדוֹשָׁה / וּפִיהוּ הַֽמְמַלֵּל בַּנְּבֹנִים

וְהוּא פִתַּח חֲגוּרֶיהָ וְחָלַץ / חֲלוּצֶיהָ וְחִדֶּשׁ־בָּהּ יְשָׁנִים

וְיִשֵּׁר מִשְּׂגוּבֶיהָ בְּצוּרִים / וְחָשַׂף מִסְּתָרֶיהָ גְּנוּנִים

וְהֶחְיָה מִשְּׁתֹתֶיהָ מְקוֹרִים / וְהֵפִיץ מִנְּפֹצֶיהָ עֲיָנִים

וְהֶעְמִיד מִפְּרוּצֶיהָ שְׁעָרִים / וְחִלֵּק מַחְלְקוֹתֶיהָ לְפָנִים

נְשׂוּי קָדְקֹד וְלוּ שַׁחַק עֲרָכוֹ / גְּעָרוֹ גַּעֲרַת אָבוֹת לְבָנִים

אֲשֶׁר הַתֹּם וְהַיֹּשֶׁר לְבוּשׁוֹ / וְעָטָה הַחֲסָדִים כַּסְּדִינִים

וְיָרָשׁ מַעֲלָתוֹ מֵאֲבֹתָיו / וְיֹרִישָׁהּ בְּאַחְרִיתוֹ לְבָנִים

אֲבִי הַכֹּל נְשָׂאָהוּ עֲלֵי־כֹל / וְהֵרִים מִפְעֲלֹתָיו כַּתְּרָנִים

וְהִשְׁמִיעַ כְּבוֹדוֹ בָּאֲרָצוֹת / עֲדֵי אַפְסֵי שְׁבָאִים אַף־דְּדָנִים

וְהֵשִׂים אֶת־תְּהִלָּתוֹ בְּפִי כָל־ / מְתֵי מוּסָר גְּדֹלִים עִם־קְטַנִּים

וְאָמְנָם הוּא לְכָל־חַכְמֵי אֲדָמָה / כְּמוֹ־שֶׁמֶשׁ וְהֵמָּה כַעֲנָנִים

וְכָמוֹנִי יְאַהֵב כִּי אֲשַׁוֶּה / תְהִלּוֹתָיו בְּפִי כַּפַּעֲמֹנִים

יְשִׁירוּהוּ מְתֵי מוּסָר וְיֶהְגּוּ / בְצִדְקֹתָיו יְמֵי עוֹלָם וְשָׁנִים.