ולה קצידה֒ פי אלעקאר וקצד בהא אלתעריץ֗ בקצידה֒ אבן כ֗לפון אלעיניה֒ אלّד֗י אבתדאוהא “אביון אשר חפרה וגם ירעה / נפשו ליום פירוד ולבו תעה” פאקאמהא בקולה [ולו שירה על היין והשתדל לרמוז בה אל שירתו של אבן כ֗לפון אשר נחרזה בעי"ן ופותחת: אביון אשר וכו', והעמידה באמרו]

יִגְזֹל שְׁנַת עֵינַי וְלֹא אֵדָעָה / לֹא‏־נִרְאֲתָה כָּזֹאת וְלֹא־נִשְׁמָעָה

אֶמְשֹׁךְ לְבָבוֹ אַט לְבַל־יִיגַע וְהוּא / יִמְשֹׁךְ לְבָבִי אַט לְבַל־אֶגְוָעָה

אִם־הַצְּפִירָה נָֽגְעָה אֵלַי לְאַט / לִי וַחֲמֹל אִם־כָּֽלְתָה הָרָעָה

אִם־לֹא זְרַעְתִּיהוּ לְךָ חֵשֶׁק בְּכָל־ / זֹאת – יֹֽאכְלוּ זָרִים אֲשֶׁר אֶזְרָעָה

שָׁאַל לְסַפֵּר תָּאֳרוֹ וָאֹֽמְרָה / גַּלְגַּל אֲדָמָה נַפְשְׁךָ רָקָעָה

הָבָה נְזַמֵּר לַזְּמוֹרָה שִׁיר וְבֹא / נִשְׁתַּחֲוֶה לָאֵל וְלוֹ נִכְרָעָה

וּנְקַדְּמָה כִנּוֹר כְּצִנּוֹר יֶהֱמֶה / נֶגֶד עֲנַן־קַיִץ כְּמוֹ־שׁוֹר גָּעָה

וְּמְנַגְּנִים תַּאְוַת לְבָבִי יִתְּנוּ / כִּי־יִתְּנוּ נָחָה לְעֻמַּת נָעָה

עַל־הָעֲרוּגָה הָאֲרוּגָה בַּחֲלִי / כֶתֶם וּבִתְכֵלֶת וְחוּר יֻצָּעָה

יִפְתַּח אֱלֹהִים לַזְּמוֹרָה אֹֽצְרוֹת / מָטָר בְּכָל־מָקוֹם אֲשֶׁר נִטָּעָה

כִּי־עָֽשְׂתָה חֶסֶד וּבִתָּהּ נָֽתְנָה־ / לָּנוּ בְּמֹהַר קַל וְלֹא מָנָעָה

תִּזְרַח לְרֵעִים יֹֽאמְרוּ לִי קוּם רְאֵה / שֶׁמֶשׁ בְּאִישׁוֹן לַֽיְלָה יָפָעָה

חוֹלָת בְּלִי לֹא־נָֽסְעָה מֵהַכְּלִי / מִיּוֹם אֲשֶׁר מֵהַגְּדִי נָסָעָה

רָעָה שְׁתֵּי שָׁנִים עֲדֵי כִי הָֽיְתָה / דַלָּה וְגַם דַּקָּה כְּמוֹ הָרָעָה

טוֹבַת רֳאִי דַּקַת עֳבִי לוּ הָֽיְתָה / רַק מִבְּנוֹת אָדָם אֲזַי גָּוָעָה

צֶחָה כְּמוֹ־רוּחַ וְאִלּוּ נָֽפְלָה / רוח משודד בַּעֲדָהּ טָבָעָה

תִּכְלֶה מְאֹד עֵין־אִישׁ לְהַבִּיט לָהּ וְאִם־ / לֹא כִלְּתָה לִרְאוֹת עֲדֵי נִשְׁקָעָה

כִּמְעַט לְמַעַן כִּי־בְשָׂרָהּ דַּל מְאֹד / עַפְעַפְּךָ סָרָה וְגַבָּהּ יָעָה

אוֹ יִתְּנָהּ שַׂרְעַפְּךָ עַל־כַּפְּךָ / וּבְלִבְּךָ מִקִּרְבְּךָ נִבְלָעָה

צָקָהּ בְּמִזְרָק הַצְּבִי וָאֶחֱזֶה / גִּזְרַת פְּנִינִים עַל־שְׁבוֹ הָטְבָּעָה

יַזְהִיר כְּרָקִיעַ וְהִיא תִיקַד כְּמוֹ־ / אֹדֶם וְכִפְנֵי נַעֲרָה יָגָעָה

וּפְנֵי לְבוּשָׁהּ גִּלְּתָה וָאֶחֱשֹׁב / כִּי נִבְקְעָה הַכּוֹס וְלֹא־נִבְקָעָה

רֹאשׁ נָֽשְׂאָה לָרוֹם כְּאִלּוּ נָֽדְרָה / וּבְשֵׁם אֱלֹהֵי יַעֲקֹב נִשְׁבָּעָה

נָמַס לְבַב הַיֹּֽשְׁבִים עֵת קָֽפְאָה / כִּי־חִבְּקָה הַחֹֽשְׁקִים אַרְבָּעָה

עַיִן תְּצִיצֶהָ וְכַנֵּס הָתְפְּשָׂה / יָד תֶּאֱחֹז לֵבָב בְּהוֹדָהּ תָּעָה

תִּשְׁאַל חֲפָצֶיהָ בְּלִי לָשׁוֹן וְגַם / תַּגִּיד לְבָבָהּ לִי וְלֹא אֶשְׁמָעָה

הָבוּ מְעַט מַיִם יְכַבֶּה הַֽיְּקוֹד / פֶּן־הַזְּכוֹכִית בָּחֳרִי אֶקְרָעָה

לֹא־יָֽכְלָה לִשְׁקֹט חֲמַת אִשָּׁהּ וְעֵת / כִּי־חִבְּקָה מַיִם אֲזַי רָגָעָה

אֵיךְ לֹא תְהִי כָאֵשׁ וְאוֹרָהּ חָֽלְקוּ / כַּפַּי וְעַפְעַפַּי וְלֹא־נִגְרָעָה

תָּקִים רְפָאֵינוּ כְּבַעְלַת־אוֹב וְאִם־ / לֹא לָֽמְדָה קֶסֶם וְאוֹב יָדָעָה

תָּמִית יְגוֹנֵינוּ כְּמוֹ־רֶגַע וְלֹא / תָמִית אֲבִידָע עַל־פְּנֵי אֶלְדָּעָה

כַּמָה דְאָגָה הָֽיְתָה מֵאָז עֲלֵי / קִירוֹת לְבָבִי כַּאֲרִי כָרָעָה

וּכְעִיר יְרִיחוֹ נִלְכְּדָה כִּי־נָֽפְלָה / וּכְעִיר אֱלֹהֵינוּ בְּיוֹם הָבְקָעָה

וּשְׁמָהּ אֲקַלֵּל כָּל־שְׁנוֹתַי בַּעֲבוּר / לֹא נֽוֹדְעָה לָהּ עַד אֲשֶׁר נוֹדָעָה

בִּקְשׁוּ לְכַפֵּר מַחְשְׁבוֹתַי בַּעֲדָהּ / לוּלֵי פְשָׁעֶיהָ אֲשֶׁר פָּשָׁעָה

לוּ שָֽׁמְעוּ שִׁמְעָהּ בְּנֵי רֵכָב אֲזַי / מִצְוַת יְהוֹנָדָב בְּנוֹ נִפְרָעָה

חָפֵץ אֱלֹהַי בָּהּ בְּצַוֹּתוֹ נְגִיד / עַמִּי לְהַקְרִיבָהּ וְאֵלָיו שָׁעָה

מִי זֶה אֲשֶׁר פֶּרֶשׁ מְזָרֶה עַל־פְּנֵי / אֶבְיוֹן אֲשֶׁר חָפְרָה וְגַם יָרָעָה

בָּא־עַד תְּכוּנַת מֹֽשְׁלִים וּלְיַרְכְּתֵי / חֶדֶר תְּבוּנַת סֹֽפְרִים נָגָעָה

אַף עָֽלְתָה עַל־בָּמֳתֵי־עָב לֹא אֲבָל / כִּי־בַשְּׁחָקִים אָהֳלָהּ תָּקָעָה

כֻּלָּה כְּפַח זָהָב וְלֹא־נָגַע כְּלִי / בָּהּ כִּי בְלֵב יֵקַד יְקֹד רֻקָּעָה

אִם־סִפְּרָהּ מַשְׂכִּיל לְאִיש נָבוֹן הֲלֹא / יִזְעַק לְאַט עָלַי וְאַל־אֶטְבָּעָה.