רקע
אברהם בן חלפון
בֶּן אָדָם שְׁמַע אֶת אֲשֶׁר אֲנִי מְדַבֵּר אֵלֶיךָ
mנחלת הכלל [?]
tשירה
פרטי מהדורת מקור: אפיקים; תשנ״א

תוכחה


בֶּן אָדָם שְׁמַע אֶת אֲשֶׁר אֲנִי מְדַבֵּר אֵלֶיךָ:


בֶּן אָדָם אַל תְּהִי מֶרִי כְּמוֹ בָנִים סוֹרְרִים

הָבִיאָה לַמּוּסָר לִבָּךְ וְסוּרָה מִנְּתִיב זָרִים

שְׁמַע עֵצָה וַחֲכָם וְלֹא תָסוּר מִכָּל הַדְּבָרִים

אֲשֶׁר אֲנִי דוֹבֵר אֵלֶיךָ:


בֶּן אָדָם בִּינָה בְעֵין לִבָּךְ הֲלִיכוֹת יוֹצְרֶךָ

וְדַע כִּי לְאָהֳבוֹ וְלִירוֹא מִפָּנָיו יְצָרֶךָ

וְעַל זֹאת בְּרָאָךְ בְּצַלְמוֹ, וּבְכָל אֶרֶץ מְגוּרֶיךָ

אֵין עֲרוֹךְ אֵלֶיךָ:


בֶּן אָדָם גּוּר מֵחֲמַת חֵטְא סֵתֶר וּזְדוֹנָיו

וִירָא פֶּן תִּלָּכֵד בְּיַם תְּלָאוֹתָיו וּשְׁאוֹנָיו

וְדַע כִּי בוֹחֵן לִבּוֹת וּכְלָיוֹת תָּמִיד עֵינָיו

יַשְׁגִּיחוּ אֵלֶיךָ:


בֶּן אָדָם דְּרוֹךְ בִּנְתִיב צֶדֶק וּפַלֵּס מַעְגָּלָיו

וְאַל תֵט לִבָּךְ לְדָבָר רָע לְהִתְנַקֵּשׁ בְּמַעֲלָלָיו

וְאַל תִּתְרַע אֶת בַּעַל אַף וֶאֱמוֹר בְּכָל לֵב אֵלָיו

לֹא אֶעֱבוֹר אֵלֶיךָ:


בֶּן אָדָם הָסֵר מִלִּבָּךְ כַּעַס וְדִבְרֵי תוֹעָה

וְדַע כִּי הַיַּלְדוּת נוֹסַעַת וְהַשַּׁחֲרוּת נָעָה

וְגוּר מִזְּמָן אוֹמֶר כִּי אַחֲרֵיהֶם יְמֵי הָרָעָה

מָחָר אֶשְׁלַח אֵלֶיךָ:


בֶּן אָדָם וִיצִיר חֹמֶר עַד אָנָה תְּהִי נִרְדָּם

הָקֵץ רַעְיוֹנֶיךָ בְּטֶרֶם בּוֹא יוֹם אֵידָם

וּבְשׂוֹא גַלֵּי תַאֲוָתָם אִם תִּלָּחֵם נֶגְדָּם

יָשׁוּבוּ הֵמָּה אֵלֶיךָ:


בֶּן אָדָם זְכוֹר עַל מִשְׁכָּבָךְ כּוֹס הַמָּוֶת וְתַמְרוּרָיו

אֲשֶׁר אֵין שׁוֹעַ בְּפִידוֹ וּבִמְגוּרָיו

יוֹם יְהִי נָבוֹךְ לְבָבָךְ לֵאמֹר מַה יִּהְיוּ דְבָרָיו

לָאֵל הַנִּרְאֶה אֵלֶיךָ:


בֶּן אָדָם חוּל מִיּוֹם דִּין וַחֲרַד מִיּוֹם חֲרָדָה

יוֹם תְּהִי יְחִידָתָךְ בְּבִצַּת חֶטְאָךְ לְכוּדָה

יוֹם יִסַּבּוּ עָלֶיךָ מַלְאֲכֵי פַחַד וּרְעָדָה

וְנִלְחֲמוּ אֵלֶיךָ:


בֶּן אָדָם טַהֵר עַצְמָךְ מֵחֵשֶׁק הַגּוּף וְתַאֲוָתוֹ

וְאַל תֹּאמַר כִּי הוּא הִדִּיחַנִי בְחֵלֶק שְׂפָתוֹ

כִּי אַתָּה תִמְשָׁל-בּוֹ וְהָאֵל שָׂם תְּשׁוּקָתוֹ

לִשְׁמוֹעַ אֵלֶיךָ:


בֶּן אָדָם יְמוֹתֶיךָ מְעַטִּים וּכְרֶגַע נֶחְשָׁבוּ

וְאִם יַרְפּוּ נוֹגְשֶׂיךָ בַבֹּקֶר לָעֶרֶב יָשׁוּבוּ

סְבִיבָךְ חוֹנִים וְלֹא תֵדַע אִם יִרְחֲקוּ אוֹ יִקְרָבוּ

וּמֵאַיִן יָבוֹאוּ אֵלֶיךָ:


בֶּן אָדָם כַּמָּה תִישַׁן וְלֹא תֵעוֹר לְאַחֲרִיתָךְ

וְלֹא תִזְכֹּר יוֹם שׁוּב גּוּפָךְ לַעֲפַר אַדְמָתָךְ

וְיוֹם תִּתְיַצֵּב מִנֶּגֶד וְתִלְאֶה נִשְׁמָתָךְ

בַּל קְרוֹב אֵלֶיךָ:


בֶּן אָדָם לָמָּה תִהְיֶה בְאֵין לֵב כְּיוֹנָה פוֹתָה

הֲלֹא לְבַקֵּר בְּהֵיכַל אֲבוֹתֶיךָ הֵנָּה הוּבָאתָ

עַצְמֹתֶיךָ יַגִּידוּ זֹאת וְלִבָּךְ אִם לַתּוֹם תָּשִׁיתָה

כֻּלָּם יַעֲנוּ וְיֹאמְרוּ אֵלֶיךָ:


בֶּן אָדָם מַלֵּט נַפְשָׁךְ מִפַּח יָקוּשׁ וּפוּקָה

וְדַע כִּי הַמְּלָאכָה מְרֻבָּה וְהַדֶּרֶךְ רְחוֹקָה

וְלָכֵן קַח לָךְ מִכָּל מַאֲכָל מִפְעָל טוֹב וּמִדָּה חֲשׁוּקָה

וְאָסַפְתָּ אֵלֶיךָ:


בֶּן אָדָם נְטוֹשׁ נֵבֶל וּמִרְמָה וּשְׁמוֹר אֱמוּנוֹת

וְהַכְנַע גֹּבַהּ לְבָבָךְ וְהוֹאֵל מִפְּנֵי צוּר לֵעָנוֹת

וְאָז תֹּאמַר: שְׁמַע קוֹל תַּחֲנוּנַי מִשְּׁמֵי מְעוֹנוֹת

וְיָבֹאוּ אֵלֶיךָ:


בֶּן אָדָם סְעַד לִבָּךְ פַּת צֶדֶק וְדִבְרֵי תוֹרָה

כִּי בְיוֹם עֲמָדְךָ בְצָרָה תִּהְיֶה לְנַפְשָׁךְ לְעֶזְרָה

וְאִם תִּתְמַהְמַהּ מִמָּךְ רֶגַע, בְּרֹב יֶשַׁע מְהֵרָה

עַתָּה תָבוֹא אֵלֶיךָ:


בֶּן אָדָם עֲזוֹב הַבְלֵי הַזְּמָן וּזְנַח תַּאֲוָתוֹ

וְאַל יַדִּיחוּךָ בָתֵי חֶמְדָּתוֹ וּשְׂכִיָּתוֹ

וְהַאְטֵם אָזְנָךְ מִשְּׁמוֹעַ קוֹל תַּחֲנוּנָיו

אִם יִקְרָא אֵלֶיךָ:


בֶּן אָדָם פְּדֵה נַפְשָׁךְ הַיְקָרָה מִבּוֹא בְשׁוּחָה

הַמְצֵא לָהּ מַרְגֵּעָה וְתוּר לְשִׁכְנָהּ מְקוֹם מְנוּחָה

וְהַרְחֵק לְזוּת שָׂפָה וְעִקְשׁוּת פֶּה, וְיֹשֶׁר וּנְכוֹחָה

הַקְרֵב אֵלֶיךָ:


בֶּן אָדָם צִדְקָךְ לְבַדָּךְ הוּא יוֹעִילֶךָ

וְלָכֵן חַפֵּשׂ תָּמִיד בִּדְרָכֶיךָ וּמַעֲלָלֶיךָ

וֶאֱמוֹר לִפְנֵי אֵל: אִם לִבִּי תוֹעֶה מֵעָלֶיךָ

הֲשִׁיבֵנִי יוי אֵלֶיךָ:


בֶּן אָדָם קַח עִמָּךְ דְּבָרִים וְשׁוּבָה עַד יוי

וֶאֱמוֹר: לְמַעַן שִׁמְךָ יוי וְסָלַחְתָּ לַעֲוֹנַָי

וְאִם נְפוּגוֹתִי וּנְסוּגוֹתִי אָחוֹר אֲנִי וְרַעְיוֹנָי

עַתָּה שַׁבְנוּ אֵלֶיךָ:


בֶּן אָדָם רְאֵה הֵפֶךְ הַזְּמָן אֲשֶׁר בּוֹ נוּלַּדְתָּ

וְלָכֵן עֲשֵׂה תֹם וְהִנָּצֵל מֵאֲשֶׁר נִלְכַּדְתָּ

וּבְיוֹם צַר וּמָצוֹק קְרָא: הוֹשַׁע עַבְדְּךָ, אַתָּה

אֱלֹהַי, הַבּוֹטֵחַ אֵלֶיךָ:


בֶּן אָדָם שְׁפוֹךְ שִׂיחַ לִפְנֵי אֵל נוֹרָא וְאָיוֹם

לְהַצִּילָךְ כִּצְבִי מִפַּח יָקוּשׁ וְאֵין בּוֹ פִדְיוֹם

אוּלַי תְּהִי נַפְשָׁךְ לָךְ לְשָׁלָל וּתְחִי, יוֹם

יָבֹא הַפָּלִיט אֵלֶיךָ:


בֶּן אָדָם תַּבַּעְנָה שְׂפָתֶיךָ לְשׁוֹכֵן מַעַל:

תְּהִי יָדְךָ לְעָזְרֵנִי וְנַקֵּנִי מֵחֵטְא וּמִמַּעַל

וְשֵׁטֶף מַיִם רַבִּים אֵלַי לֹא יַגִּיעוּ, כִּי עַל

זֹאת יִתְפַּלֵּל כָּל חָסִיד אֵלֶיךָ:


אֵל בּוֹרֵא רוּחַ הַצִּילֵנִי מִשּׁוֹסִי

בְּגֹדֶל נָעָמְךָ חַדֵּשׁ לִי פְאֵרִי וְהָרֵם נִסִּי

אַל תְבִישֵׁנִי מִשִּׂבְרִי, כִּי בְךָ שַׂמְתִּי מַחְסִי, וּמְנוּסִי

בְּיוֹם צָרָה אֵלֶיךָ:

המלצות קוראים
תגיות