וַיְהִי בַּעֲלוֹת חֲנוֹךְ הַשָמַיְמָה וַיָבוֹאוּ כָּל מַלְכֵי הָאָרֶץ וַיִמְשְחוּ אֶת מְתוּשֶלַח בְּנוֹ לְמֶלֶךְ עֲלֵיהֶם וַיַעֲש מְתוּשֶלַח הַיָשָר בְּעֵינֵי ה' כְּכָל אֲשֶר הוֹרָהוּ חֲנוֹךְ אָבִיו. וַיְלַמֵד גַם הוּא אֶת בְּנֵי הָאָדָם חָכְמָה וָדַעַת וְיִרְאַת־אֱלֹהִים כָּל יָמָיו וְלֹא סָר מִן הַדֶרֶךְ הַטוֹבָה יָמִין וּשְׂמאֹל. אַךְ בְּאַחֲרִית יְמֵי מְתוּשֶלַח סָרוּ בְּנֵי הָאָדָם מֵאַחֲרֵי ה' וַיַשְחִיתוּ אֶת דַרְכָּם וַיִגְזְלוּ וַיַחְמְסוּ אִיש אֶת רֵעֵהוּ, וַיִמְרְדוּ בֵּאלֹהִים וְלֹא אָבוּ לִשְמֹעַ בְּקוֹל מְתוּשֶלַח. וַיִקְצֹף ה' עֲלֵיהֶן וַיוֹסֶף לְהַשְחִית אֶת הַזֶרַע אֲשֶר זָרְעוּ וְאֶת קְצִיר הָאֲדָמָה. וַיְהִי כַּאֲשֶר זָרְעוּ בְּנֵי הָאָדָם אֶת אַדְמָתָם, וַתַּצְמַח לָהֶם קוֹצִים וְדַרְדָרִים וּבְכָל זֹאת לֹא שָבוּ מִדַרְכָּם הָרָעָה וַיַכְעִיסוּ אֶת ה' בְּמַעֲשֵַיהֶם. וַיִנָחֶם ה' כִּי עָשָׂה אֶת הָאָדָם וַיֹאמֶר לְכַלוֹתָם וּלְהַאֲבִידָם מֵעַל פְּנֵי הָאֲדָמָה.

בַּיָמִים הָהֵם לָקַח לוֹ לֶמֶךְ בֶּן מְתוּשֶלַח אֶת אַשְמִיעָה בַּת אֱלִישוּעַ בֶּן חֲנוֹךְ לְאִשָה, בִּהְיוֹתוֹ בֶּן מֵאָה שְמוֹנִים וְאַחַת שָנָה וּבָעֵת הַהִיא זָרְעוּ בְּנֵי הָאָדָם אֶת אַדְמָתָם וַיִמְצְאוּ מְעַט אֹכֶל לְמִחְיָתָם. וַתֵּלֶד אֵשֶת לֶמֶךְ בֵּן לִתְקוּפַת הַשָנָה וַיִקְרָא מְתוּשֶׁלַח אֶת שְמוֹ נֹחַ, לֵאמֹר: נָחָה הָאַדָמָה וְשָקְטָה בְּיָמָיו, וְאָבִיו לֶמֶךְ קָרָא לוֹ מְנַחֵם לֵאמֹר: זֶה יְנַחְמֵנוּ מִמַעֲשֵׂינוּ וּמֵעִצְבוֹן יָדֵינוּ מִן הָאֲדָמָה אֲשֶר אֵרֲרָהּ ה‘. וַיִגְדַל הַיֶלֶד, וַיֵלֵךְ בְּדַרְכֵי מְתוּשֶלַח הַטוֹבִים וַיַעַשׂ הַטוֹב וְהַיָשָר בְּעֵינֵי ה’. וְכָל בְּנֵי הָאָדָם סָרוּ מֵהַדֶרֶךְ הַטוֹב, כַּאֲשֶר רַבּוּ עַל פְּנֵי הָאֲדָמָה, וַיוֹסִיפוּ לַחֲטֹא וְלִפְשעַ בֵּאלֹהִים וַיַעַשׂ לָהֶם אִיש אִיש אֱלֹהַ וַיִגְזְלוּ וַיַחְמְסוּ וַיַעַשְׁקוּ אִיש אֶת רֵעֵהוּ וַתִּמָלֵא הָאָרֶץ חָמָס מִפְּנֵיהֶם. וַיֵלְכוּ שוֹפְטֵיהֶם וְשוֹטְרֵיהֶם וַיִגְזְלוּ נָשִים מֵאֵת בַּעֲלֵיהֶן. וַיַרְא אֱלֹהִים אֶת כָּל הָאָרֶץ וְהִנֵה נִשְחָתָה, כִּי הִשְחִית כָּל בָּשָׂר אֶת דַרְכּוֹ לְפָנָיו, וַיֹאמַר: אֶמְחֶה אֶת הָאָדָם אֲשֶר בָּרָאתִי מֵעַל פְּנֵי הָאֲדָמָה, מֵאָדָם עַד בְּהֵמָה עַד עוֹף הַשָׁמַיִם וְעַד חַיָה אֲשֶר בַּשָׁדֶה, כִּי נִחַמְתִּי כִּי עֲשִׂיתִים. וְנֹחַ מָצָא חֵן בְּעֵינֵי ה' וַיִבְחַר בּוֹ לְחַיות זֶרַע עַל פְּנֵי הָאֲדָמָה.

וַיְהִי בִּשְנַת אַרְבַּע מֵאוֹת וּשְמֹנִים לְחַיֵי נֹחַ, וַיאֹמַר ה' אֶל נֹחַ וְאֶל מְתוּשֶלַח: "דַבְּרוּ נָא בְּאָזְנֵי בְּנֵי הָאָדָם, כִּי יָשוּבוּ מִדַרְכֵיהֶם הָרָעִים וְנִחַמְתִּי עַל הָרָעָה אֲשֶר דִבַּרְתִּי לַעֲשוֹת לָהֶם. כִּי כֹה אָמַר ה‘: “הִנְנִי נוֹתֵן לָכֶם מוֹעֵד מֵאָה וְעֶשְׂרִים שָנָה לְהֵיטִיב מַעֲשֵיכֶם וְלֹא אַשְחִיתְכֶם.” וַיְדַבְּרוּ נֹחַ וּמְתוּשֶלַח אֶת דִבְרֵי ה’ אֶל בְּנֵי הָאָדָם יוֹם־יוֹם, וְלֹא הִטוּ אָזְנָם לְדִבְרֵיהֶם וַיַקְשוּ עָרְפָּם וַיוֹסִיפוּ לַחֲטֹא.

וְנֹחַ בֶּן לֶמֶךְ מֵאֵן לָקַחַת לוֹ אִשָה, כִּי אָמַר: הִנֵה ה' מַשְחִית אֶת כָּל הַיְקוּם וְלָמָה לִי בָנִים? – וַיֹאמֶר ה' אֶל נֹחַ: קַח לְךָ אִשָה וְהוֹלֵד בָּנִים, כִּי אוֹתְךָ רָאִיתִי צַדִיק לְפָנַי בַּדוֹר הַזֶה, וְאַתָּה וּבָנֶיךָ תִּחְיוּ בָאָרֶץ. וַיֵלֶךְ נֹחַ וַיִקַח לוֹ לְאִשָה אֶת נַעֲמָה בַּת חֲנוֹךְ, וַתֵּלֶד בֵּן וַיִקְרָא אֶת שְׁמוֹ שֵם, לֵאמֹר שָׂמַנִי אֱלֹהִים לִשְאֵרִית בְּקֶרֶב הָאָרֶץ. וַתֵּלֶד בֵּן שֵנִי וַיִקְרְאוּ אֶת שְמוֹ חָם, כִּי הָיָה בְּשָרוֹ חוּם, וַתֵּלֶד לוֹ בֵּן שְלִישִי וַיִקְרָא אֶת שְמוֹ יֶפֶת, לֵאמֹר: יַפְתְּ אֱלֹהִים לִי בָּאָרֶץ.

וְלֶמֶךְ אֲבִי נֹחַ מֵת בַּיָמִים הָהֵם בִּשְנַת חָמֵש וְתִשְעִים וַחֲמֵש מֵאוֹת שָנָה לְחַיֵי נֹחַ, וַיִהְיוּ כָּל יְמֵי לֶמֶךְ שְבַע מֵאוֹת שִבְעִים וָשֶבַע שָנָה. וְגַם כָּל בְּנֵי הָאָדָם אֲשֶר יָדְעוּ אֶת ה' מֵתוּ בַּשָנָה הַהִיא טֶרֶם יִמַח ה' אֶת כָּל הַיְקוּם, כִּי חָפֵץ ה' לְהֲמִיתָם לְבִלְתִי רְאוֹתָם אֶת הָרָעָה אֲשֶר תִּמְצָא אֶת קְרוֹבֵיהֶם. בָּעֵת הַהִיא אָמַר ה' אֶל נֹחַ וְאֶל מְתוּשֶלַח שֵׁנִית: עִמְדוּ וְקִרְאוּ בְּאָזְנֵי כָּל בְּנֵי הָאָדָם כִּי יָשוּבוּ מֵחֲטאֹתֵיהֶם וְנִחַמְתִּי עַל הָרָעָה אֲשֶר אָמַרְתִּי לְהָבִיא עֲלֵיהֶם. וַיַעַמְדוּ נֹחַ וּמְתוּשֶלַח וַיַגִידוּ אֶת דִבְרֵי ה' לִבְנֵי הָאָדָם, וְלֹא שָמְעוּ אֲלֵיהֶם גַם הַפָּעַם. וַיאֹמֶר ה' אֶל נֹחַ: קֵץ כָּל בָּשָׁר בָּא לְפָנַי מִפְּנֵי רוֹעַ מַעַלְלֵיהֶם וְהִנְנִי מַשְחִיתָם אֶת הָאָרֶץ. וְאַתָּה קַח לְךָ עֲצֵי גֹפֶר וְהָלַכְתָּ אֶל מְקוֹם פְּלוֹנִי אַלְמוֹנִי וְעָשִׂיתָ לְךָ תֵּבָה גְדוֹלָה וְהֶעֱמַדְתָּ אוֹתָהּ בַּמָקוֹם הַהוּא. וַאֲנִי הִנְנִי מֵבִיא מַבּוּל מַיִם עַל הָאָרֶץ וְשִחַתִּי כָּל בָּשָׂר מִתַּחַת הַשָמָיִם. וּבָאתָ אַתָּה וּבֵיתְךָ אֶל הַתֵּבָה וְאָסַפְתָּ אֵלֶיךָ מִכָּל הַחַי שְׂנַיִם שְנַיִם, זָכָר וּנְקֵבָה, לְחַיוֹת זֶרַע עַל פְּנֵי הָאֲדָמָה. וְגַם מִכָּל מַאֲכָל אֲשֶר יֵאָכֵל לְכָל הַחַי לְמִינֵהוּ, קַח אִתְּךָ אֶל הַתֵּבָה, וְהָיָה לְךָ וְלָהֶם לְאָכְלָה. וּבָחַרְתָּ לְבָנֶיךָ שָלֹש נְעָרוֹת מִבְּנוֹת אֶלְיָקִים בֶּן מְתוּשֶלַח וְהָיוּ לָהֶם לְנָשִים. וַיַעַשׂ נֹחַ כְּכֹל אֲשֶר צִוָהוּ ה'. וַיִבֶן אֶת הַתֵּבָה חָמֵש שָנִים.

בָּעֵת הַהִיא מֵת מְתוּשֶלַח בֶּן חֲנוֹךְ בֶּן תֵּשַע וְשִשִים וּתְשַע מֵאוֹת שָנָה. וַיֹאמֶר ה' אֶל נֹחַ: בֹּא אַתָּה וְכָל בֵּיתְךָ אֶל הַתֵּבָה, וַאֲנִי הִנְנִי מְאַסֵף אֵלֶיךָ אֶת כָּל בֶּהֱמַת הָאָרֶץ וְחַיַת הַשָׂדֶה וְעוֹף הַשָמַיִם וּבָאוּ כֻלָם וְסָבְבוּ אֶת הַתֵּיבָה. וְיָצָאתָ אַתָּה וְיָשַבְתָּ לְךָ תַּחַת פֶּתַח הַתֵּבָה, וְכָל הַחַיוֹת וְהַבְּהֵמוֹת וְהָעוֹף וְכָל הָרְמָשִׂים וְהַשְרָצִים יֵאָסְפוּ כֻלָם וְעָמְדוּ סְבִיבוֹתֶיךָ. וְהָיָה כֹּל אֲשֶר יָבֹא וְרָבַץ לְפָנֶיךָ – אוֹתוֹ תִּקַח וְנָתַתָּ בְּיַד בָּנֶיךָ וֶהֶבִיאוּהוּ אֶל הַתֵּבָה, וְכֹל אֲשֶר יַעַמְדוּ נֶגְדְךָ – תַּעַזְבֵם בָּחוּץ. וַיְהִי מִמָחֳרָת וַיָבוֹאוּ בְּהֵמוֹת וְחַיוֹת וְעוֹפוֹת וּרְמָשִׂים וּשְרָצִים הַרְבֵּה מְאֹד וַיָסֹבּוּ כֻּלָם אֶת הַתֵּבָה. וַיֵצֵא נֹחַ וַיֵשֶב תַּחַת פֶּתַח הַתֵּבָה, וַיְהִי כָּל הָרוֹבְצִים לְפָנָיו – הֵבִיא אֶל הַתֵּבָה, וְכֹל אֲשֶר עָמְדוּ כְּנֶגְדוֹ – וַיַעַזְבֵם מִחוּצָה לָהּ. וַתָּבֹא לְבִיאָה אַחַת הִיא וּשְנֵי גוּרֶיהָ עִמָהּ, זָכָר וּנְקֵבָה, וַיִרְבְּצוּ שְנֵי הַגוּרִים לִפְנֵי נֹחַ, וְהַלְבִיאָה עָמָדָה. וַיָקוּמוּ שְנֵי בְּנֵי הַלְבִיאָה וַיַבְרִיחוּ אוֹתָהּ מִמְקוֹמָהּ, וַתֵּלֶךְ לָהּ מִשָׁם וַתַּעֲמֹד בֵּין יֶתֶר הָאֲרָיוֹת; וְהֵם שָבוּ וַירְבְּצוּ לִפְנֵי נֹחַ, וַיְבִיאֵם אֶל הַתֵּבָה. וּמִכָּל הַבְּהֵמוֹת הַחַיוֹת הַטְהוֹרוֹת וְהָעוֹפוֹת הֵבִיא נֹחַ שִבְעָה שִבְעָה, כַּאֲשֶׁר צִוָה אוֹתוֹ אֱלֹהִים.

וְהַגֶשֶם עוֹד לֹא הָיָה בָּעֵת הַהִיא עַד שִבְעַת יָמִים. וה' הִרְעִים בַּיוֹם הַשְבִיעִי מִמְרוֹמֵי הַשָמַיִם, וַתֶּחֱשַךְ הַשֶמֶש וַיִרְגְזוּ מוֹסְדוֹת תֵּבֵל וַתִּגְעַש כָּל הָאֲדָמָה, וַיִרְעֲמוּ רְעָמִים וַיִבְרְקוּ בְּרָקִים, וַתְּהִי כָּל הָאָרֶץ לְחֶרְדַת אֱלֹהִים. – וה' עָשָׂה זֹאת לְמַעַן הַפְחֵד אֶת בְּנֵי הָאָדָם וְיָשוּבוּ אֵלָיו וְלֹא יַשְחִיתֵם. וּבְכָל זֹאת לֹא שָבוּ בְּנֵי הָאָדָם וַיוֹסִיפוּ לְהַכְעִיס אֶת ה' בְּמַעֲשֵַי תַבְלִיתָם. וַיְהִי לְשִבְעַת הַיָמִים, בִּשְנַת שֵש מֵאוֹת לְחַיֵי נֹחַ – וּמֵי הַמַבּוּל הָיוּ עַל הָאָרֶץ: וַיִבָּקְעוּ כָּל מַעְיְנוֹת תְּהוֹם רַבָּה, וַיִפָּתְחוּ אֲרֻבּוֹת הַשָמַיִם וַיְהִי הַגֶשֶם עַל הָאָרֶץ אַרְבָּעִים יוֹם וְאַרְבָּעִים לָיְלָה. וַיָבֹא נֹחַ וְכָל בֵּיתוֹ אֶל הַתֵּבָה מִפְּנֵי מֵי הַמַבּוּל. וְהַבְּהֵמוֹת וְהַחַיוֹת עוֹדָם עוֹמְדִים סְבִיבוֹת הַתֵּבָה וַיִתְקַבְּצוּ בְּנֵי הָאָדָם יַחַד כִּשְבַע מֵאוֹת אֶלֶף אִיש וַיִקְרְאוּ אֶל נֹחַ לֵאמֹר: פְּתַח לָנוּ וּבָאנוּ אֵלֶיךָ אֶל הַתֵּבָה, כִּי לָמָה נָמוּת לְפָנֶיךָ. וְלֹא אָבָה נֹחַ לְהַכְנִיסָם אֵלָיו וַיִגְשוּ כֻּלָם לִשְבֹּר אֶת הַתֵּבָה, כִּי קָצוּ מִפְּנֵי מֵי הַגֶשֶם הַשוֹטְפִים וְזוֹרְמִים עֲלֵיהֶם. וַיִשְלַח ה' בָּהֶם אֶת הַחַיוֹת הַסוֹבְבוֹת אֶת הַתֵּבָה. וַיִתְנַפְּלוּ עֲלֵיהֶם וַיִטְרְפוּ רַבִּים מֵהֶם וְהַנִשְאָרִים בָּרְחוּ לְנַפְשָׁם. וְהַמַיִם גָבְרוּ מְאֹד מְאד וַיִמְחוּ כָּל בָּשָׂר אֲשֶר בָאָרֶץ. וַתֵּלַךְ הַתֵּבָה עַל פְּנֵי הַמַיִם וַתְּטֻלְטַל בֵּין הַגַלִים וְהַמִשְבָּרִים, וַיִתְהַפֵּךְ כָּל הַחַי אֲשֶר בָּהּ כְּהֵהָפֵךְ הַנָזִיד אֲשֶׁר בַּסִיר הָרוֹתֵחַ. וַיִתְבָּהֵל כָּל הַחַי אֲשֶׁר בַּתֵּבָה, וַיִנְהֲמוּ הָאֲרָיוֹת וַיִגְעוּ הַשְׁוָרִים וַיֵילִילוּ הַזְאֵבִים. וְגַם נֹחַ וּבָנָיו צוֹעֲקִים וּבוֹכִים בַּצַר לָהֶם, וַיִתְפַּלְלוּ אֶל ה' וַיֹאמֵרוּ: “אָנָא, אֱלֹהִים, הוֹשִׁיעָה לָנוּ, כִּי אֲפָפוּנוּ מִשְׁבְּרֵי מָוֶת וְהִגַעְנוּ עַד שַׁעֲרֵי מָוֶת! עֲנֵנוּ ה', עֲנֵנוּ, הָאֵר פָּנֶיךָ אֵלֵינוּ וְחָנֵנוּ.” וַיִשְׁמַע ה' לִתְפִלָתָם וַיַעֲבֵר רוּחַ עַל הָאָרֶץ וַיָשֹׁכּוּ הַמַיִם, וַיֵלְכוּ הָלֹךְ וְחָסֹר וַתַּעֲמֹד הַתֵּבָה עַל הָרֵי אֲרָרָט. וַיִקְרָא נֹחַ עוֹד אֶל ה' וַיֹאמַר: אָנָא ה' הוֹצֵא מִמַסְגֵר נַפְשִׁי וּמִמַאֲסָרִי אֲשֶר שַׂמְתַּנִי בוֹ. וַיֹאמַר ה' אֶל נֹחַ: בִּמְלֹאת שָנָה תְּמִימָה לְשִבְתְּךָ בַּתֵּבָה – וְיָצָאתָ מִתּוֹכָהּ. וַיְהִי לִתְקוּפַת הַשָנָה וַיֵצְאוּ נֹחַ וּבָנָיו וְכָל אֲשֶר עִמוֹ מִן הַתֵּבָה וַיִרְאוּ וְהִנֵה חָרְבוּ פְּנֵי הָאֲדָמָה.