וַיְהִי בִּהְיוֹת מֹשֶה בֶּן שְמוֹנֶה עֶשְׂרֵה שָנָה וַיִתְאַו לִרְאוֹת אֶת אָבִיו וְאֶת אִמוֹ וַיֵלֶךְ אֲלֵיהֶם גֹשְנָה. וַיָבֹא אֶל הַמָקוֹם אֲשֶר שָם בְּנֵי יִשְׂרָאֵל עָבְדוּ אֶת עֲבוֹדָתָם הַקָשָה וַיַרְא וְהִנֵה אִיש מִצְרִי מַכֶּה אִיש עִבְרִי. וְכַאֲשֶר רָאָה הָעִבְרִי הַמֻכֶּה אֶת מֹשֶה וַיָנָס אֵלָיו לְעֶזְרָה, וַיאֹמֶר אֶל מֹשֶה: בִּי אֲדוֹנִי, הַמִצְרִי הַזֶה בָּא הַלַיְלָה אֶל בֵּיתִי וַיִגְזֹל אֶת אִשְתִּי וְעַתָּה הוּא אוֹמֵר עוֹד לָקַחַת אֶת נַפְשִי לִסְפּוֹתָהּ. וַיְהִי כִּשְמֹעַ מֹשֶה אֶת הַדָבָר הַזֶה, וַיַךְ אֶת הַמִצְרִי וַיִטְמְנֵהוּ בַּחוֹל. וַיְהִי בַּיוֹם הַשֵנִי וַיָבֹא מֹשֶה גֹשְנָה וַיַרְא וְהִנֵה שְנֵי עִבְרִים: אֲחִי הָאִשָה הַגְזוּלָה וְהָעִבְרִי הַמֻכֶּה – נִצִים בֵּינֵיהֶם. וַיאֹמֶר מֹשֶה לַאֲחִי הָאִשָה: לָמָה תַכֶּה רֵעֶךָ? וַיַעַן אוֹתוֹ הָרָשָע: מִי שָׂמְךָ לָראֹש וְשוֹפֵט עָלֵינוּ – הַלְהָרְגֵנִי אַתָּה אוֹמֵר כַּאֲשֵר הָרַגְתָּ אֶת הַמִצְרִי? – וַיְהִי כַּאֲשֶר נוֹדַע הַדָבָר גַם לְפַרְעֹה וַיְצַו לְהָמִית אֶת מֹשֶה. וַיִשְלַח אֱלֹהִים אֶת מַלְאָכוֹ וַיִדָמֶה לְפַרְעֹה בִּדְמוּת שַׂר הַטַבָּחִים, וַיִקַח מַלְאַךְ ה' אֶת הַחֶרֶב מִיַד שַׂר הַטַבָּחִים וַיִכְרָת בָּה אֶת ראֹשוֹ, כִּי נֶהְפַּךְ שַׂר הַטַבָּחִים בִּדְמוּת מֹשֶה. וַיַחֲזֵק מַלְאַךְ ה' בִּימִין מֹשֶה וַיוֹצִיאֵהוּ מִחוּץ לִגְבוּל מִצְרַיִם מַהֲלַךְ אַרְבָּעִים יוֹם. וַתֵּלֵךְ יַד פַּרְעֹה מִאָז הָלֹךְ וְקָשָה עַל בְּנֵי יִשְׂרָאֵל.

וַיְהִי בַּיָמִים הָהֵם וַתְּהִי מִלְחָמָה גְדוֹלָה בֵּין בְּנֵי קֶדֶם וּבְנֵי אֲרָם וּבֵין מֶלֶךְ כּוּש, כִּי פָשְעוּ בוֹ. וַיֵצֵא קִיקָנוֹס מֶלֶךְ כּוּש עִם כָּל חֵילוֹ, עַם רַב כַּחוֹל אֲשֶר עַל שְׂפַת הַיָם, לְהִלָחֵם אֶת בְּנֵי קֶדֶם וַאֲרָם – וּלְהֲכְנִיעָם. תַּחַת יָדוֹ. וַיְהִי בְּצֵאת קִיקָנוֹס לַמִלְחָמָה וַיַעֲזֹב אֶת בִּלְעָם הַקוֹסֵם וְאֶת שְנֵי בָנָיו לִשְמֹר עַל סִדְרֵי הַמַמְלָכָה וּשְלוֹם הָאָרֶץ. וַיַךְ קִיקָנוֹס אֶת בְּנֵי קֶדֶם וּבְנֵי אֲרָם וַיַכְנִיעֵם שֵנִית תַּחַת יָדוֹ. וּבִלְעָם בֶּן בְּעוֹר כַּאֲשֶר עֲזָבוֹ מֶלֶךְ כּוּש לִפְנֵי צֵאתוֹ לַמִלְחָמָה לִשְמֹר עַל שְלוֹם הָאָרֶץ, וַיָקָם וַיְעוֹרֵר אֶת עַם הָאָרֶץ לִמְרֹד בְּקִיקָנוֹס וּלְבִלְתִּי תֵת לוֹ לָבֹא הָעִירָה בְּשוּבוֹ מֵהַמִלְחָמָה. וַיִשְמְעוּ בְּנֵי כוּש לְבִלְעָם וַיַמְלִיכוּ אוֹתוֹ לְמֶלֶךְ עֲלֵיהֶם וְאֶת שְנֵי בָנָיו הִפְקִידוּ לְשָׂרֵי צִבְאוֹתֵיהֶם. וַיְבַצֵר בִּלְעָם אֶת חוֹמַת הָעִיר מִשְתֵּי פֵאוֹתֶיהָ וּמִצִדָהּ הַשְלִישִי חָפְרוּ תְעָלָה גְדוֹלָה עַד נְהַר גִיחוֹן¹ הַסוֹבֵב אֶת כָּל אֶרֶץ כּוּש; וּלְצִדָהּ הָרְבִיעִי קָבַץ בִּלְעָם נְחָשִים וְעַקְרַבִּים בִּלְחָשָיו וּכְשָפָיו, וַתְּהִי הָעִיר בְצוּרָה מֵאַרְבַּע רוּחוֹתֶיהָ – אֵין יוֹצֵא וְאֵין בָּא. וַיְהִי בְּשוּב קִיקָנוֹס וְשָׂרֵי חֵילוֹתָיו מִמִלְחַמְתּוֹ אֶת בְּנֵי קֶדֶם וַאֲרָם וַיִקְרְבוּ אֶל עִיר מַלְכוּתָם, וַיִשְׂאוּ עֵינֵיהֶם וַיִרְאוּ וְהִנֵה חוֹמָה גְבוֹהָה מְאֹד מִשְנֵי עֶבְרֵי הָעִיר וַיִתְמְהוּ מְאֹד. וַיִגְשוּ הַמֶלֶךְ וְהַשָׂרִים אֶל שַעֲרֵי הָעִיר וַיִרְאוּ וְהִנֵה סְגוּרִים הֵם עַל מַסְגֵר, וַיִקְרְאוּ אֶל הַשוֹעֲרִים לֵאמֹר: פִּתְחוּ לָנוּ אֶת הַשְעָרִים וְנָבֹא הָעִירָה.

וַיְמָאֲנוּ הַשוֹעֲרִים לִפְתֹּחַ לְקִיקָנוֹס וְחֵילוֹ אֶת שַעֲרֵי הָעִיר, כַּאֲשֶר צִוָה עֲלֵיהֶם בִּלְעָם, וַיַעַרְכוּ אִתָּם מִלְחָמָה נֶגֶד שַעַר הָעִיר וַיִפְּלוּ מֵחֵיל קִיקָנוֹס בַּיוֹם הַהוּא כִּשְלֹשִים אִיש. וַיְהִי בַּיוֹם הַשֵנִי וַיאֹמְרוּ צִבְאוֹת קִיקָנוֹס לָבוֹא הָעִירָה מֵעֵבֶר הַנָהָר וַיִטָבְעוּ רַבִּים מֵהֶם בַּתְּעָלָה אֲשֶר חָפְרוּ אַנְשֵי בִלְעָם. וַיְהִי בַּיוֹם הַשְלִישִי וַיַחְפְּצוּ צִבְאוֹת קִיקָנוֹס לָבוֹא אֶל הָעִיר מֵהָעֵבֶר הָרְבִיעִי, וַיִתְנַפְּלוּ עֲלֵיהֶם הַנְחָשִים וַיָמִיתוּ מֵהֶם מֵאָה וְשִבְעִים אִיש. וַיְהִי כִּרְאוֹת קִיקָנוֹס כִּי לֹא יוּכַל לַקוֹשְרִים וַיֶחְדַל מֵהִלָחֵם בָּם וַיָשֶׂם עֲלֵיהֶם מָצוֹר, שֶאָרַךְ תֵּשַע שָנִים.

וּבָעֵת הַהִיא בָּרַח מֹשֶה מִמִצְרַיִם מִלִפְנֵי פַרְעֹה וַיִמָלֵט אֶל מַחֲנֵה קִיקָנוֹס, וַיְהִי בְמַחֲנֵהוּ כָּל יְמֵי הַמָצוֹר. וַיֶאֱהַב קִיקָנוֹס וְשָׂרָיו וְכָל אַנְשֵי הַמִלְחָמָה אֶת מֹשֶה, כִּי הָיָה חָסֹן כְּאַלוֹן וּפָנָיו הֵאִירוּ כִפְנֵי הַשֶמֶש וּגְבוּרָתוֹ – גְבוּרַת אַרְיֵה, וַיְהִי לְיוֹעֵץ הַמֶלֶךְ. וַיְהִי מִקֵץ תֵּשַע שָנִים וַיָחַל קִיקָנוֹס אֶת חָלְיוֹ אֲשֶר מֵת בּוֹ, וַיַחַנְטוּהוּ וַיִקְבְּרוּהוּ נֹכַח שַעַר הָעִיר צָפוֹנָה לְאֶרֶץ מִצְרַיִם. וַיִבְנוּ עַל קִבְרוֹ מִגְדָל נָאֶה וַיָשִׂימוּ מִלְמַעְלָה אֲבָנִים גְדוֹלוֹת, וְסוֹפְרֵי הַמֶלֶךְ כָּתְבוּ עֲלֵיהֶם אֶת פָּרָשַת כָּל הַגְבוּרוֹת וְהַמִלְחָמוֹת אֲשֶר עָשָׂה קִיקָנוֹס בִּימֵי מַלְכוּתוֹ, וְהִנָם כְּתוּבִים שָם עַד הַיוֹם הַזֶה. וַיְהִי אַחֲרֵי מוֹת קִיקָנוֹס וַיִתְיָעֲצוּ שָׂרָיו וְצִבְאוֹתָיו אֶת מִי יַמְלִיכוּ תַּחְתָּיו לְמֶלֶךְ עֲלֵיהֶם. וַיְבַקְשוּ בֵינֵיהֶם וְלֹא נִמְצָא אִיש גִבּוֹר וְחָכָם כְּמֹשֶה, וַיְמַהֲרוּ וַיַפְשִיטוּ אֶת בִּגְדֵיהֶם וַיַעֲשׂוּ בָמָה גְבוֹהָה וַיוֹשִיבוּ עָלֶיהָ אֶת מֹשֶה, וַיִתְקְעוּ בַשוֹפָרוֹת וַיָרִיעוּ לְפָנָיו: יְחִי הַמֶלֶךְ! – וַיִשָבְעוּ לְמֹשֶה כָּל הַשָׂרִים וְכָל הַצָבָא. וַיִמְלֹךְ מֹשֶה תַּחַת קִיקָנוֹס עַל כָּל בְּנֵי כוּש, בִּשְנַת מֵאָה חֲמִישִים וָשֶבַע לְרֶדֶת בְּנֵי יִשְׂרָאֵל מִצְרָיְמָה. בֶּן כ״ז שָנָה מֹשֶה בְמָלְכוֹ עַל כּוּש וְאַרְבָּעִים שָנָה מָלָךְ. וַיִתֵּן ה' אוֹתוֹ לְחֵן וּלְחֶסֶד בְּעֵינֵי כָל בְּנֵי כוּש וַיֶאֱהָבוּהוּ וַיְכַבְּדוּהוּ מְאֹד. וַיְהִי בַּיוֹם הַשְבִיעִי לְמָלְכוֹ וַיָבוֹאוּ צִבְאוֹת קִיקָנוֹס אֶל מֹשֶה וַיאֹמְרוּ אֵלָיו: אֲדוֹנֵנוּ הַמֶלֶךְ, הָבָה לָנוּ עֵצָה וְתוּשִיָה מַה לַעֲשׂוֹת לְעִיר מַלְכוּתֵנוּ אַשֶר אֲנַחְנוּ צָרִים עָלֶיהָ זֶה תֵּשַע שָנִים, בְּלִי כָל תּוֹצָאוֹת, וְזֶה כְעֶשֶׂר שָנִים שֶלֹא רָאִינוּ אֶת נָשֵינוּ וְאֶת יְלָדֵינוּ. וַיַעַן אוֹתָם מֹשֶה לֵאמֹר: אִם תִּשְמְעוּ בְקוֹלִי לְכָל אֲשֶר אֲנִי מְצַוֶה אֶתְכֶם וְנָתַן ה' בְּיָדֵנוּ אֶת הָעִיר וּלְכַדְנוּהָ. וְעַתָּה זאֹת עֲשׂוּ: עִבְרוּ בְכָל הַמַחֲנֶה וְקִרְאוּ אֶל כָּל הָעָם לֵאמֹר: כֹּה אָמַר הַמֶלֶךְ: לְכוּ הַיַעְרָה וְצַדְתֶּם שָם אִיש־אִיש אֶת אֶחָד מִבְּנֵי הַחֲסִידָה, וְהָיוּ בְיֶדְכֶם לְמִשְמֶרֶת עַד אֲשֶר יִגְדְלוּ וְיְדֵעוּ לָטוּש. – וַיִשְמְעוּ בְנֵי כוּש בְּקוֹל מֹשֶה וַיַעֲשׂוּ כְּכָל אֲשֶר צִוָה אוֹתָם. וַיְהִי כַּאֲשֶר גָדְלוּ בְנֵי הַחֲסִידוֹת, וַיְצַו מֹשֶה לְהַרְעִיבָם שְלֹשָה יָמִים, וַיַעֲשׂוּ כֵן. וַיְהִי בַּיוֹם הַשְלִישִי וַיאֹמֶר לָהֶם מֹשֶה: הִתְחַזְקוּ וִהְיוּ לִבְנֵי חַיִל, כִּי הַיוֹם תִּלָכֵד בְּיָדֵנוּ הָעִיר. קְחוּ לָכֶם אִיש־אִיש אֶת חֲסִידָתוֹ בְיָדוֹ וְנָקוּמָה וְנִלָחֲמָה בָעִיר מֵעֵבֶר הַנְחָשִים. וַיַעֲשׂוּ כֵן. וַיְהִי כְּקָרְבָם אֶל מְקוֹם הַנְחָשִים וַיְצַו אוֹתָם מֹשֶה לֵאמֹר: שַלְחוּ אִיש־אִיש מִיֶדְכֶם אֶת חֲסִידָתוֹ. וַיַעֲשׂוּ כֵן, וַיָעוּפוּ בְּנֵי הַחֲסִידָה וַיִתְנַפְּלוּ בְּגְבֻרָה עַל הַנְחָשִים וַיִבְלְעוּ וַיַשְחִיתוּ אֶת כֻּלָם. וַיִרְאוּ השָׂרִים וְהַחֲיָלוֹת כִּי נְכְחַדוּ כָּל הַנְחָשִים וַיָרִיעוּ תְרוּעָה גְדוֹלָה: יְחִי הַמֶלֶךְ מֹשֶה! –

וַיִגְשוּ אֶל הָעִיר וַיִלְכְּדוּהָ בְרַעַש־מִלְחָמָה. וַיִפְּלוּ בַיוֹם הַהוּא מִיוֹשְבֵי הָעִיר כְּאֶלֶף אִיש, וּמִמַחֲנֵה מֹשֶה לֹא מֵת אַף אֶחָד. וַיָבוֹאוּ כָל הַחֲיָלִים מִמַחֲנֵה מֹשֶה אִיש־אִיש אֶל בֵּיתוֹ וְאֶל נַחֲלָתוֹ. וּבִלְעָם הַקוֹסֵם בִּרְאוֹתוֹ כִּי נִלְכְּדָה הָעִיר וַיִבְרַח עַל נַפְשוֹ הוּא וּשְנֵי בָנָיו וּשְמוֹנַת אֶחָיו וַיֵלְכוּ וַיָשוּבוּ אֶל פַּרְעֹה מֶלֶךְ מִצְרַיִם, הֵם הֵמָה חַרְטֻמֵי מִצְרַיִם וּמְכַשְפֶיהָ, הַכְּתוּבִים בְּסֵפֶר תּוֹרָתֵנוּ. וַיַמְלִיכוּ כָּל בְּנֵי כוּש אֶת מֹשֶה לְמֶלֶךְ עֲלֵיהֶם וַיָשִׂימוּ כֶּתֶר מַלְכוּת בְּראֹשוֹ וַיִתְּנוּ אֶת אַדוֹנִית הַכּוּשִית, אֵשֶת קִיקָנוֹס, לוֹ לְאִשָה. וַיִצְלַח מֹשֶה בְּמַלְכוּתוֹ וַיִמְשֹל בִּבְנֵי כוּש בְּחָכְמָתוֹ ןַיִשְפְּטֵם בְּצֶדֶק וּבְמֵישָרִים. – וַיִשְמְעוּ בְנֵי קֶדֶם וּבְנֵי אֲרָם כִּי מֵת קִיקָנוֹס מֶלֶךְ כּוּש, וַיִפְשְעוּ בָה וַיִמָאַנוּ לְשַלֵם לָהּ מַס. וַיִקְבֹּץ מֹשֶה אֶת חֵילוֹ, כִּשְלֹשִים אֶלֶף אִיש, וַיֵצֵא לְהִלָחֵם אֶת בְּנֵי קֶדֶם. וַתֶּחֱזַק הַמִלְחָמָה עַל בְּנֵי קֶדֶם וַיִנָגְפוּ לִפְנֵי מֹשֶה, וַיִכָּנְעוּ לוֹ. וַיַעַל מִשָם מֹשֶה עִם חֵילוֹ עַל בְּנֵי אֲרָם וַיַכְנַע גַם אוֹתָם וַיָשָב אַרְצָה כּוּש. וְאוֹגִיאַש מֶלֶךְ אֶפֵּרִיָה מֵת בַּיָמִים הָהֵם וַיִמְלֹךְ אַזְדְרֻבַּל² בְּנוֹ תַּחְתָּיו.

וּבַיָמִים הָהֵם מֵת גַם יַנוּש מֶלֶךְ כִּתִּים וַיִקְבְּרוּהוּ בְּהֵיכָלוֹ אַשֶר בָּנָה לוֹ בְּבִקְעַת כַּנְפַנִיָה לְמוֹשָבוֹ, וַיִמְלךְ לַטִינוֹס בְּנוֹ. בִּשְנַת עֶשְׂרִים וּשְתַּיִם לְמַלְכוּת מֹשֶה בְּכוּש מָלַךְ לַטִינוֹס עַל כָּל בְּנֵי כִתִּים, וְאַרְבָּעִים וְחָמֵש שָנָה מָלָךְ. וּבִשְנַת שָלֹש לְמָלְכוֹ הֶעֱבִיר קוֹל בְּכָל מַלְכוּתוֹ לְהִלָחֵם עִם אַזְדְרֻבַּל. וַיָבֹא עִם חַיִל רַב בִּגְבוּלוֹת אֶפֵּרִיָה וַיֶחֱזַק לַטִינוֹס עַל אַזְדְרֻבַּל, וַיִלְכֹּד אֶת תְּעָלַת הַמַיִם אֲשֶר הֵבִיא אוֹגִיאַש מֵאֶרֶץ בְּנֵי כִתִּים בְּקַחְתּוֹ אֶת יוֹנִיָה בַּת עוֹצוֹ לוֹ לְאִשָה. וַיַהֲרֹס לַטִינוֹס אֶת גֶשֶר הַתְּעָלָה הַהִיא, וַיַךְ אֶת כָּל חֵיל אַזְדְרֻבַּל מַכָּה רַבָּה מְאֹד. וַיִתְחַזְקוּ יֶתֶר גִבּוֹרֵי אַזְדְרֻבַּל וַיַעַרְכוּ עוֹד מִלְחָמָה עִם לַטִינוֹס, וַתֶּחֱזַק הַמִלְחָמָה עַל כָּל בְּנֵי אֶפֵּרִיָה וַיִפְּלוּ כֻלָם חֲלָלִים לִפְנֵי לַטִינוֹס וְגַם אַזְדְרֻבַּל מַלְכָּם נָפַל מֵת בַּמִלְחָמָה הַהִיא. וּלְאַזְדְרֻבַּל בַּת יָפָה מְאֹד וּשְמָה אוּשְפִּיזָנָה³ וַיִרְקְמוּ כָל אַנְשֵי אֱפֵּרִיָה אֶת צַלְמָהּ עַל בִּגְדֵיהֶם מֵרֹב יָפְיָהּ וְטוֹב מַרְאֶהָ. וַיִרְאוּ אַנְשֵי לַטִינוֹס אֶת אוּשְפִּיזָנָה בַּת אַזְדְרֻבַּל וַיְהַלְלוּ אוֹתָה אֶל לַטִינוֹס מַלְכָּם. וַיִקָחֶהָ לַטִינוֹס לוֹ לְאִשָה וַיָשָב כִּתִּימָה⁴. וַיְהִי אַחֲרֵי מוֹת אַזְדְרֻבַּל, וַיָקוּמוּ כָּל יוֹשְבֵי אֱפֵּרִיָה, וַיִקְחוּ אֶת הַנִיבַּל אָחִיו וַיַמְלִיכוּהוּ תַּחְתָּיו. וַיְהִי בְּמָלְכוֹ וַיַעַשׂ אֳנִיוֹת הַרְבֵּה וַיָבֹא בָהֶן כִּיתִּמָה וַיִלָחֶם בָּהּ כִּשְמוֹנֶה עֶשְׂרֵה שָנָה וַיַךְ אֶת יוֹשְבֶיהָ, כִּשְמוֹנִים אֶלֶף אִיש, לְפִי חָרֶב. וַיְהִי מִקֵץ יָמִים וְשָנִים וַיֵפֶן הַנִיבַּל וַיָשָב אֶל אַרְצוֹ וַיִמְלֹךְ בְּאַפְרִיקָה תַּחַת אַזְדְרֻבַּל אָחִיו.