וּפַרְעֹה מֶלֶךְ מִצְרַיִם הוֹסִיף לְהַכְבִּיד אֶת עֻלוֹ עַל בְּנֵי יִשְׂרָאֵל וַיְצַו וַיַעֲבִירוּ קוֹל בְּמִצְרַיִם וּבְגֹשֶן לֵאמֹר: לֹא תוֹסִיפוּ לָתֵת תֶּבֶן לָעִבְרִים לִלְבּוֹן הַלְבֵנִים: הֵם יֵלְכוּ וְקוֹשְשוּ לָהֶם תֶּבֶן מֵאֲשֶר יִמְצָאוּ וּמִמַתְכֹּנֶת הַלְבֵנִים אֲשֶר יִלְבְּנוּ יוֹם־יוֹם לֹא יִגְרְעוּ דָבָר. וַיִשְמְעוּ בְנֵי יִשְׂרָאֵל אֶת הַדָבָר הַזֶה וַיֵאָנְחוּ וַיִצְעֲקוּ אֶל ה‘. וְיִשְמע ה’ אֶת צַעֲקָתָם וַיַרְא אֶת הַלַחַץ אֲשֶר מִצְרַיִם לוֹחֲצִים אוֹתָם, וַיְקַנֵא ה' לְעַמוֹ וַיאֹמֶר לְהוֹצִיאָם מֵעֳנִי מִצְרַיִם אֶל הָאָרֶץ אֿשֶר נִשְבַּע לַאֲבוֹתָם לָתֵת לָהֶם.

וּמֹשֶה הָיָה רוֹעֶה אֶת צאֹן רְעוּאֵל (־יִתְרוֹ) חוֹתְנוֹ אַחַר מִדְבַּר סִין, וְאֶת הַמַטֶה אֲשֶר תָּלַש מִגִנַת רְעוּאֵל לָקַח בְּיָדוֹ. וַיְהִי הַיוֹם וַיִבְרַח לְמֹשֶה גְדִי־עִזִים מִן הַצֹאן, וַיִרְדֹף אַחֲרָיו מֹשֶה וַיָבֹא עַד הַר־הָאֱלֹהִים חוֹרֵבָה. וַיְהִי בְּבוֹאוֹ שָמָה וַיֵרָא אֵלָיו יְיָ בַּסְנֶה: וַיַרְא מֹשֶה וְהִנֵה סְנֶה בוֹעֵר בָּאֵש וְאֵינֶנוּ אֻכָּל. וַיִתְמַה מֹשֶה לַמַרְאֶה וַיִגַש לִרְאוֹת אֶת דְבַר הַפֶּלֶא הַזֶה. וַיִקְרָא אֵלָיו קוֹל ה' מִתּוֹךְ הָאֵש וַיְצַוֵהוּ לָשוּב מִצְרַיְמָה וּלְהַגִיד לְפַרְעֹה מֶלֶךְ מִצְרַיִם בְּשֵם ה' כִּי יְשַלַח אֶת בְּנֵי יִשְׂרָאֵל מֵעַבְדוּתָם. וַיִשְמַע מֹשֶה לְקוֹל ה' וַיָשָב אֶל חוֹתְנוֹ וַיַגֵד לוֹ אֶת מִצְוַת ה‘. וַיֹאמֶר לוֹ יִתְרוֹ (־רְעוּאֵל): לֵךְ לְשָלוֹם. וַיָקָם מֹשֶה וַיִקַח אֶת צִפּוֹרָה אִשְתּוֹ וְאֶת שְנֵי בָנָיו וַיֵלְכוּ לָרֶדֶת מִצְרַיְמָה. וַיְהִי בַדֶרֶךְ, וַיְבַקֵש מַלְאַךְ ה’ לְהָמִית אֶת גֵרְשֹם בֶּן מֹשֶה הַבְּכוֹר, אֲשֶר לֹא מָל אוֹתוֹ כְּחֵפֶץ חוֹתְנוֹ וַיַעֲבוֹר עַל הַבְּרִית אֲשֶר כָּרַת ה' אֶת אַבְרָהָם אָבִינוּ. וַתֵּרֶא צִפּוֹרָה אֶת מַלְאַךְ ה' וַתְּמַהֵר וַתִּקַח אֶחָד מֵחַדוּדֵי־צוּרִים וַתָּמָל אֶת בְּנָה – וַתַּצֵל אֶת מֹשֶה וְאֶת בְּנָה מִמָוֶת.

וְאַהֲרֹן אֲחִי מֹשֶה הָיָה אָז בְּמִצְרַיִם. וַיְהִי הַיוֹם וַיִתְהַלֵךְ אַהֲרֹן עַל שְׂפַת הַיְאוֹר, וַיֵרָא אֵלָיו ה' וַיֹאמֶר אֵלָיו: צֵא לִקְרַאת מֹשֶה אָחִיךָ הַמִדְבָּרָה. וַיֵלֵךְ וַיִפְגְשֵהוּ בְּהַר הָאֱלֹהִים וַיִשַק לוֹ. וַיִשָׂא אַהֲרֹן אֶת עֵינָיו וַיַרְא אֶת צִפּוֹרָה וְאֶת שְנֵי בָנֶיהָ וַיֹאמֶר אֶל מֹשֶה: מִי אֵלֶה לָךְ? וַיַעַן מֹשֶה: אִשְתִּי הִיא וּבָנַי הֵם אֲשֶר חָנַנִי אֱלֹהִים. וַיֵרַע הַדָבָר בְּעֵינֵי אַהֲרֹן עַל אוֹדוֹת אֵשֶת מֹשֶה וִילָדֶיהָ, אֲשֶר יָבוֹאוּ גַם הֵם מִצְרַיְמָה לִרְאוֹת בְּסִבְלוֹת בְּנֵי יִשְׂרָאֵל, וַיאֹמֶר אֶל מֹשֶה: שַלַח אֶת אִשְתְּךָ וְאֶת בָּנֶיךְ וֶיָשוּבוּ מִדְיָנָה עַד עֵת פְּקוֹד ה' אֶת עַמוֹ. וַיִשְמַע מֹשֶה בְקוֹלוֹ וַיָשֶב אֶת צִפּוֹרָה אִשְתּוֹ וְאֶת בָּנָיו אֶל רְעוּאֵל חוֹתְנוֹ – וּמֹשֶה וְאַהֲרֹן בָּאוּ גֹשְנָה אֶל עֲדַת בְּנֵי יִשְׂרָאֵל וַיְדַבְּרוּ אֲלֵיהֶם אֶת כָּל דִבְרֵי ה' וַיִשְׂמְחוּ שִׂמְחָה גְדוֹלָה מְאֹד. וַיַשְכִּימוּ מֹשֶה וְאַהֲרֹן מִמָחֳרָת הַיוֹם וַיֵלְכוּ עַד בֵּית פַּרְעֹה, וּמַטֵה־אֱלֹהִים לָקְחוּ בְיָדָם. וַיְהִי בְּבֹאָם אֶל שַעַר הַמֶלֶךְ, וְהִנֵה שְנֵי כְפִירֵי־אֲרָיוֹת כְּבוּלִים אֶל הַשַעַר בְּכַבְלֵי בַרְזֶל, וְאֵין אִיש בָּא וְיוֹצֵא מִפְּנֵיהֶם לְבַד מֵאֲשֶר יְצַוֶה הַמֶלֶךְ, וּבַאוּ הַמְלַחֲשִים וְיַתִּירוּ אֶת כְּפִירֵי־הָאַרָיוֹת בְּלַחֲשֵיהֶם וְנִפְתַּח הַשַעַר לָאִיש הַהוּא. וַיְמַהֵר מֹשֶה וַיָנָף אֶת מַטֵהוּ עַל הַכְּפִירִים וַיַתִּירֵם וַיָבֹאוּ בֵּיתָה הַמֶלֶךְ וְהַכְּפִירִים הָלְכוּ אַחֲרֵיהֶם שְׂמֵחִים, כַּאֲשֶר יִשְׂמַח הַכֶּלֶב אַחֲרֵי אֲדוֹנָיו. וַיְהִי כִּרְאוֹת פַּרְעֹה אֶת הַדָבָר הַזֶה וַיִתְמַהּ עַל כָּכָה וַיִבָּהֵל לְמַרְאֵה פְנֵי מֹשֶה וְאַהֲרֹן, כִּי תָאֳרָם כְּתֹאַר מַלְאֲכֵי־אֱלֹהִים. וַיאֹמֶר אֶל מֹשֶה וְאַהֲרֹן: מַה חֶפְצְכֶם פֹּה? – וַיַעֲנוּהוּ לֵאמֹר: יְיָ אֱלֹהֵי הָעִבְרִים שְלָחָנוּ אֵלֶיךָ לֵאמֹר: שַלַח אֶת עַמִי וְיַעַבְדוּנִי.

וַיְהִי כִּשְמוֹעַ פַּרְעֹה אֶת דִבְרֵיהֶם וַיִירָא מְאֹד מִפְּנֵיהֶם וַיאֹמֶר אֲלֵיהֶם: לְכוּ הַיוֹם וּבָאתֶם אֵלַי מָחָר. וַיַעֲשׂוּ כִדְבַר הַמֶלֶךְ. וַיְהִי בְּלֶכְתָּם וַיִשְלַח פַּרְעֹה וַיִקְרָא לְבִלְעָם הַקוֹסֵם וְאֶל יַנוּס וְאֶל יַמְבְּרוּס¹ בָּנָיו וְאֶל כָּל הַמְכַשְפִים וְהַחַרְטֻמִים וְהַיוֹעֲצִים אֲשֶר לַמֶלֶךְ, וַיָבֹאוּ כֻלָם וַיְסַפֵּר לָהֶם פַּרְעֹה אֶת כָּל הַדְבָרִים אֲשֶר דִבְּרוּ אֵלָיו מֹשֶה וְאַהֲרֹן. וַיאֹמְרוּ הַחַרְטֻמִים לְפַרְעֹה: וְאֵיךְ בָּאוּ הָאֲנָשִים הָאֵלֶה מִפְּנֵי הַכְּפִירִים הַכְּבוּלִים אֶל הַשָעַר? וַיַעֲנוּ עַבְדֵי פַרְעֹה: כִּי הֵנִיפוּ אֶת מַטָם עַל הַכְּפִירִים וַיַתִּירוּם, וְגַם שָׂמְחוּ לִקְרָאתָם הַכְּפִירִים כִּשְׂמֹחַ הַכֶּלֶב לִקְרַאת אֲדוֹנָיו. וַיאֹמֶר בִּלְעָם הַקוֹסֵם לְפַרְעֹה: אֵין אֵלֶה כִּי אִם מְכַשְפִים כָּמוֹנוּ, וְעַתָּה שְלַח נָא וּקְרָא לָהֶם וְנִבְחַן אוֹתָם. וַיְהִי בַּבֹּקֶר וַיִשְלַח פַּרְעֹה וַיִקְרָא לְמֹשֶה וּלְאַהֲרֹן לָבוֹא אֵלָיו. וַיִקְחוּ מֹשֶה וְאַהֲרֹן אֶת מַטֵה־הָאֱלֹהִים וַיֵלְכוּ וַיָבֹאוּ לִפְנֵי פַרְעֹה וַיֹאמְרוּ לוֹ: כֹּה אָמַר יְיָ אֱלֹהֵי הָעִבְרִים: שַלַח אֶת עַמִי וְיַעַבְדוּנִי. וַיֹאמֶר אֲלֵיהֶם מֶלֶךְ מִצְרַיִם: וּמִי יַאֲמִין לָכֶם כִּי שְלוּחֵי אֱלֹהִים אַתֶּם? – תְּנוּ לָנוּ מוֹפֵת וָאוֹת, כִּי עַל פִּיו בָּאתֶם אֵלַי וְיֵאָמְנוּ דִבְרֵיכֶם. וַיְמַהֵר אַהֲרֹן וַיַשְלֵךְ אֶת הַמַטֶה מִיָדוֹ לִפְנֵי פַרְעֹה וְלִפְנֵי עֲבָדָיו וַיְהִי לְתַנִין. וַיַעֲשׂוּ גַם הַחַרְטֻמִים כֵּן, וַיַשְלִיכוּ גַם הֵמָה אֶת מַטוֹתֵיהֶם אַרְצָה וַיִהְיוּ לְתַנִינִים.

וַיָרֶם תַּנִין אַהֲרֹן אֶת רֹאשוֹ וַיִבְלַע אֶת תַּנִינֵי הַחַרְטֻמִים, וַיֹאמֶר בִּלְעָם: מִימֵי קֶדֶם הָיָה כַדָבָר הַזֶה, כִּי בַעֲלֵי־חַיִים יִבְלְעוּ אִיש אֶת רֵעֵהוּ. וְעַתָּה הִפְכוּ נָא אֶת הַנָחָש לְמַטֶה, וְיִבְלַע הַמַטֶה אֶת מַטוֹתֵינוּ–וְיָדַעְנוּ כִּי רוּחַ אֱלֹהִים בְּקִרְבְּכֶם. וַיְמַהֵר אַהֲרֹן וַיִשְלַח יָדוֹ וַיַחֲזֵק בִּזְנַב הַתַּנִין וַיְהִי לְמַטֶה בְכַפוֹ. וַיַעֲשׂוּ גַם הַחַרְטֻמִים כֵּן וַיַחֲזִיקוּ בְתַנִינֵיהֶם וַיִהְיוּ לְמַטוֹת בְּכַפָּם, וַיִבְלַע מַטֵה אַהֲרֹן אֶת מַטוֹתָם. וַיְהִי כִּרְאוֹת פַּרְעֹה אֶת הַמוֹפֵת הַזֶה, וַיְצַו לְהָבִיא אֶת סֵפֶר הַזִכְרוֹנוֹת אֲשֶר לְמַלְכֵי מִצְרָיִם.

וַיְבִיאוּם וַיְבַקְשוּ שָם בֵּין אֱלֹהֵי מִצְרָיִם גַם אֶת שֵם יְיָ אֱלֹהֵי הָעִבְרִים וְלֹא מְצָאוּהוּ. וַיֹאמֶר פַּרְעֹה אֶל מֹשֶה וְאֶל אַהֲרֹן: לֹא יָדַעְתִּי אֶת יְיָ אֱלֹהֵיכֶם אֲשֶר אֲמַרְתֶּם וְאֶת בְּנֵי יִשְׂרָאֵל לֹא אֲשַלֵחַ. וַיֹאמֶר מֹשֶה אֶל פַּרְעֹה: כֹּה אָמַר יְיָ: שַלַח אֶת עַמִי וְיֵלְכוּ דֶרֶךְ שְלֹשֶת יָמִים וְיִזְבְּחוּ לִי בַמִדְבָּר, וְאִם אֵינְךָ מְשַלֵחַ – חָרֹה יֶחֱרֶה אַפּוֹ בְךָ וְהִכָּה אֶת מִצְרַיִם מַכּוֹת נִמְרָצוֹת. וַיאֹמֶר פַּרְעֹה לְמֹשֶה: וּבַמָה כּחַ יְיָ וּגְבוּרָתוֹ? – וַיאֹמֶרוּ מֹשֶה וְאַהֲרֹן: הוּא בָרָא אֶת הַשָמַיִם וְאֶת הָאָרֶץ וְאֶת הַיָם וְאֶת דְגָתוֹ; הוּא יוֹצֵר אוֹר וּבוֹרֵא חֹשֶךְ, מַמְטִיר מָטָר עַל הָאָרֶץ וּמְרַוֶה וּמַצְמִיחַ דֶשֶא; בּוֹרֵא אֶת כָּל הַחַי וְעַל פִּיו יָמוּתוּ, וְהוּא הוּא אֲשֶר בָּרָא גַם אוֹתְךָ וַיוֹשִיבְךָ עַל כִּסֵא מַלְכוּת מִצְרַיִם וְהוּא יִקַח מִמְךָ אֶת נַפְשְךָ וְאֶת רוּחַ חַיֶיךָ וְיָשִיב אוֹתְךָ אֶל הָאֲדָמָה אֲשֶר מִמֶנָה לֻקָחְתָּ. וַיִחַר אַף פַּרְעֹה בְמֹשֶה וּבְאַהֲרֹן וַיֹאמַר: מִי בְכָל אֱלֹהֵי הָעַמִים אֲשֶר עָשָׂנִי? “לִי יְאוֹרִי וַאֲנִי עֲשִׂיתִינִי”! – וַיְגָרֶש פַּרְעֹה אֶת מֹשֶה וְאַהֲרֹן מִלְפָנָיו, וַיוֹסֶף לְהַכְבִּיד עוֹד אֶת הָעֲבוֹדָה עַל בְּנֵי יִשְׂרָאֵל.

וַיְהִי מִקֵץ שְנָתַיִם יָמִים וְיוֹסֶף ה' שְלֹחַ אֶת מֹשֶה אֶל פַּרְעֹה, כִּי יְשַלַח אֶת בְּנֵי יִשְׂרָאֵל מֵאֶרֶץ מִצְרָיִם. וְלֹא אָבָה פַרְעֹה לִשְמֹעַ בְּקוֹל מֹשֶה, וַיָבֵא עָלָיו ה' עֶשֶׂר מַכּוֹת: א) אֶת מֵימֵי מִצְרַיִם הָפַךְ לְדָם. ב) הוֹצִיא צְפַרְדְעִים מֵהַיְאוֹר, אֲשֶר מָלְאוּ אֶת כָּל אֶרֶץ מִצְרַיִם. ג) הֵבִיא כִנִים אֲשֶר דָבְקוּ בִבְשַׂר הָאָדָם וְהַבְּהֵמָה. ד) שִלַח בָּהֶם אֶת הֶעָרוֹב: נָחָש, שָׂרָף, עַקְרָב, חֹלֶד, צִרְעָה, פַּרְעֹש, פִּשְפֵַש וְיַתּוּש וַיָבוֹאוּ בְאָזְנֵי הַמִצְרִים וּבְעֵינֵיהֶם וּבְבִטְנָם. וַיְהִי בְהִתְחַבֵּא הַמִצְרִים מִפְּנֵי הֶעָרוֹב וַיִנְעֲלוּ אֶת דַלְתוֹת בָּתֵּיהֶם וַיָבֵא עֲלֵיהֶם אֱלֹהִים אֶת הַסִילוֹנִית² אֲשֶר בַּיָם, וְלָהּ יָדַיִם אֲרֻכּוֹת מְאֹד כְּעֶשֶׂר אַמוֹת בְּאַמַת אִיש, וַתַּעַל הַסִילוֹנִית עַל הַגַגוֹת וְעַל הַתִּקְרָה וַתָּסַר אֶת מַנְעוּלֵי הַבָּתִּים אֲשֶר לַמִצְרִים וַיִתְפָּרֵץ הֶעָרוֹב אֶל חַדְרֵי חֲדָרִים וַיָקוּצוּ הַמִצְרִים בְּחַיֵיהֶם מִפָּנָיו. ה) וַיִשְלַח ה' בַּמִצְרִים דַלֶקֶת אֵש וַתְּהִי לִשְחִין רָע, אֲשֶר בָּקַע אֶת בְּשָׂרָם מִכַּף רַגְלָם וְעַד קָדְקָדָם. ו) הוֹרִיד בָּרָד כָּבֵד מְאֹד וַיַךְ אֶת כָּל עֵץ פְּרִי אֲשֶר בְּמִצְרַיִם וְאֶת כָּל תְּבוּאוֹת הַשָׂדוֹת. ז) הֶעֱלָה אַרְבֶּה עֲלֵיהֶם: חָסִיל, סָלְעָם, חַרְגֹל וְחָגָב – וַיאֹכְלוּ אֶת כָּל אֲשֶר הִשְאִיר הַבָּרָד. וַיִשְׂמְחוּ הַמִצְרִים עַל הָאַרְבֶּה, כִּי צָדוּ אוֹתָם וַיִמְלָחוּם לְמַאֲכָל לָהֶם, וַיַהֲפֹךְ ה' רוּחַ־יָם חָזָק וַיִשָׂא אֶת הָאַרְבֶּה וַיִתְקָעֵהוּ יָמָה־סוּף. ט) הֵבִיא ה' חֹשֶךְ עַל כָּל מוֹשְבוֹת הַמִצְרִים וּשְלֹשָה יָמִים לֹא רָאוּ אִיש אֶת אָחִיו. בָּעֵת הַהִיא מֵתוּ גַם רַבִּים מִבְּנֵי יִשְׂרָאֵל אֲשֶר לֹא הֶאֱמִינוּ בְמֹשֶה וְאַהֲרֹן, כִּי אֱלֹהִים שְלָחָם וַיאֹמֵרוּ: לֹא נֵצֵא מִמִצְרָיִם. וַיִגוֹף ה' אוֹתָם בִּשְלֹשֶת יְמֵי הַחֹשֶךְ וַיִקְבְּרוּם בְּנֵי יִשְׂרָאֵל לְבַל יִוָדַע דַבַר מוֹתָם לַמִצְרִים וְיִשְׂמְחוּ לְאֵידָם. וְהַחֹשֶךְ חָזַק מְאֹד בְּמִצְרַיִם שְלֹשֶת יָמִים, וַיְהִי כָל הָעוֹמֵד – נִשְאַר עוֹמֵד בִּמְקוֹמוֹ, וְכָל הַיוֹשֵב– נִשְאַר יוֹשֵב, וְהַשוֹכֵב – נִשְאַר שוֹכֵב, כִּי יָרְאוּ לָמוּש מִמְקוֹמָם. י) בַּחֲצִי הַלַיְלָה, אוֹר לְיוֹם הָאַרְבָּעָה עְשָר לְחֹדֶש הָאָבִיב – וַיַךְ ה' אֶת כָּל בְּכוֹרֵי מִצְרַיִם, וְגַם דְמוּת בְּכוֹרֵי מִצְרַיִם הַחֲקוּקִים בְּקִירוֹת הַבָּתִּים – נִמְחוּ וְנָפְלוּ אָרְצָה, וְגַם עַצְמוֹת בְּכוֹרֵיהֶם אֲשֶר מֵתוּ וְנִקְבָּרוּ, הָשְלְכוּ מִקִבְרֵיהֶם וַיְגָרְרוּ אוֹתָם כְּלָבִים סָחֹב וְהַשְלֵךְ, סָחֹב וְגָרֵם. וַתְּהִי צְעָקָה גְדוֹלָה בַלַיְלָה הַהוּא בְּמִצְרַיִם, כִּי לֹא הָיָה בַיִת אֲשֶר אֵין שָם מֵת. וַיָקָם פַּרְעֹה לַיְלָה, וַתֵּצֵא אִתּוֹ גַם בִּתְיָה בִּתּוֹ לְבַקֵש אֶת מֹשֶה וְאֶת אַהֲרֹן וַיִמְצָאוּם בְּבָתֵּיהֶם מַקְרִיבִים אֶת קָרְבַּן הַפָּסַח. וַתֹּאמֶר בִּתְיָה אֶל מֹשֶה: הֲזֶה יְהִי גְמוּל הַטוֹב וְהַחֶסֶד אֲשֶר עָשִׂיתִי עִמְךָ, אֲשֶר גְדַלְתִּיךָ וְטִפַּחְתִּיךָ לְבֵן לִי וַתָּבֵא עַל בֵּית אָבִי וְעַל עַמִי אֶת הָרָעָה הַגְדוֹלָה הַזֹאת? – וַיַעַן מֹשֶה: וְאַתְּ הַשַמְתְּ לִבֵּךְ לְאַלְפֵי הָאִמוֹת הָעִבְרִיוֹת אֲשֶר עוֹלְלֵיהֶן הָשְלְכוּ הַיְאוֹרָה אוֹ הוּטְחוּ בְקִירוֹת הַבִּנְיָנִים אוֹ כִּי בְדָמָם הִתְרַחֵץ אָבִיךְ בְּצָרַעְתּוֹ? – וּפַרְעֹה מֶלֶךְ מִצְרַיִם נִגַש גַם הוּא אֶל מֹשֶה וְאַהֲרֹן וַיִתְחַנֵן אֲלֵיהֶם: קוּמוּ וּקְחוּ אֶת כָּל אֲחֵיכֶם בְּנֵי עַמְכֶם אִתְּכֶם וְגַם אֶת צֹאנְכֶם וּבְקַרְכֶם וְכָל אֲשֶר לָכֶם וּלְכוּ עִבְדוּ אֶת יְיָ אֱלֹהֵיכֶם כַּאֲשֶר דִבַּרְתֶּם.

וַיְמַהֵר מֹשֶה וַיֵלֶךְ אֶל נַחַל מִצְרַיִם וַיַעַל מִשָם אֶת עַצְמוֹת יוֹסֵף בַּאֲרוֹנוֹ וַיִקָחֵהוּ אִתּוֹ, כַּאֲשֶר נִשְבְּעוּ לוֹ אֲבוֹתֵינוּ. וְגַם כָּל בְּנֵי יִשְׂרָאֵל הֶעֱלוּ אִתָּם מִמִצְרַיִם אִיש־אִיש אֶת עַצְמוֹת רֹאש שִבְטוֹ בַאֲרוֹנוֹ. וַיִסְעוּ בְנֵי יִשְׂרָאֵל בַּחָמִשָה עָשָׂר לְחֹדֶש הָאָבִיב ממִצְרַיִם וּמִגֹשֶן וּמֵרַעְמְסֵס כְּשֵש מֵאוֹת אֶלֶף אִיש, מִלְבַד הַטַף וְהַנָשִים; וְגַם עֵרֶב־רַב עָלָה אִתָּם וְצֹאן וּבָקָר מַחֲנֶה כָבֵד מְאֹד. וּמוֹשַב בְּנֵי יִשְׂרָאֵל בְּמִצְרַיִם שְלֹשִים שָנָה וְאַרְבַּע מֵאוֹת שָנָה, וְשִעְבּוּד מִצְרַיִם אָרַךְ מָאתַיִם וָעֶשֶׂר שָנָה.³