עַל מִפְתַּן תֵּבֵל טֶרֶם צֵאתִי הַשָּעַר

אֲנִי עוֹדֶנִּי רַךְ בַּשָּׁנִים עוֹדֶנִּי נָעַר

שָׂחֲקָה לִי הַשֶּׁמֶשׁ תִּשְׁלַח הוֹד קַרְנֶיהָ

שְׂחוֹק מָלֵא פִיהָ גַּם רָצוֹן עַל פָּנֶיהָ

כָּל צְבָא הַשָּׁמַיִם יִצְהֲלוּ לִקְרָאתִי

וְאָנֹכִי כְּחָתָן מֵחֻפָּתוֹ יָצָאתִי

מִתַּחַת רַגְלַי דּוּדָאִים יִתְּנוּ רֵיחַ

וְעַל רֹאשִׁי צִפּוֹר כָּנָף זְמִירוֹת יְנַצֵּחַ

עַל שׁוֹשַׁנִּים אֶדְרֹךְ, הֵם לְפָנָי יִכְרָעוּן

לַעֲשׂוֹת עֲטָרָה לְרֹאשִׁי, לְקוֹלִי יִשְׁמָעוּן

צִיצִים וּפְרָחִים יְרַקְרַקִּים אֲדַמְדַּמִּים

צְעָדַי יִרְמְסוּם, לְכַפּוֹת רַגְלַי יְרִיעוֹת שָׂמִים

גַּם כָּל עֲצֵי יַעַר אֵלַי זְרוֹעָם יוֹצִיאוּ

יִפְרְשׂוּ עַנְפֵיהֶם לְחַבֵּק עָדַי יַגִּיעוּ

וְנוֹזְלִים יִבְלֵי מַיִם עַל פִּי יִשָּׁקוּנִי

וְרוּחַ צַח וְנָקִי עַל כְּנָפָם יִשָׂאוּנִי

וּבְנֵי אָדָם מַלְאֲכֵי אֱלֹהִים הֵמָּה

בֵּינֵיהֶם אֵין קִנְאָה גַּם כַּעַס וְחֵמָה

הֵם אֲשׁוּרַי יִתְמֹכוּ, בְּיָדָם יִסְעָדוּנִי

יִמְעֲדוּ קַרְסֻלַּי הֵם יַעֲמִידוּנִי –

אָכַלְתִּי וְשָׂבַעְתִּי גַּם יֵינִי שָׁתִיתִי

מֹר וְאֲהָלוֹת קָנֶה וְקִנָּמוֹן אָרִיתִי

יַחַד עִם רֵעַי יַעְרִי וְדִבְשִׁי אָכַלְתִּי

לֹא יָגַעְתִּי לֹא טָרַחְתִּי לֹא עָמַלְתִּי

מַחֲלָצוֹת בִּגְדֵי שֵׁש וְאַרְגָּמָן לָבַשְתִּי

גַּם מִצְנֶפֶת זָהָב מֵרֹאשִׁי לֹא מַשְׁתִּי

בְּהֵיכְלֵי עֹנֶג בְּצֵל גַּנֵּי שָׂשוֹן יָשַׁבְתִּי

רֵיחַ שָׂדוֹת וּכְרָמִים בְּחֶדְוָה שָׁאַפְתִּי

סָבִיב לִי עֲבָדִים וּשְׁפָחוֹת יְשָׁרְתוּנִי

עַל מִשְׁמַרְתָּם עוֹמְדִים אֲצַוֶה וְיִשְׁמָעוּנִי

שְׂמֵחִים הֵם לִקְרָאתִי אִם אֶפְקֹוד עֲלֵיהֶם

לְבַצַּע אֶמְרָתִי אַךְ יָחִישׁוּ מַעֲשֵׂיהֶם

הֲלֹא שָׁלֵו הָיִיתִי אֵין מִי יַחֲרִידֵנִי

סְבִיבַי שֶׁקֶט וְשַׁאֲנָן נֶגַע לֹא יְבוֹאֵנִי

עַל מִפְתַּן תֵּבֵל קוֹצִים לֹא רָאִיתִי

אַךְ תִּקְווֹת לִרְבָבוֹת טִפַּחְתִּי וְרִבִּיתִי

אָמַרְתִּי הָרִים אֶעֶלֶה אֵרְדָה בְקָעוֹת

בְּסֶלַע אָשִׂים קִנִּי בִּמְעָרוֹת נוֹרָאוֹת

עַל שַׁחַל אֶדְרֹךְ יֵחַת בַּהֲרִימִי קוֹלִי

לְפָנַי אַרְיֵה וְלָבִיא עַל בִּרְכָּם יִפּוֹלוּ –

אוּלָם לֹא כַּאֲשֶׁר דִּמִּיתִי הָיָתָה

לֹא לִמְנוּחָה אָדָם מִבֶּטֶן יָצָאתָ

לִלְחֹם נוֹעַדְתָּ בְּתֵבֵל יְמֵי חַיֶּיךָ

קוֹץ וְדַרְדַּר תַּחַת כַּפּוֹת רַגְלֶיךָ

דְּרָכֶיךָ וּנְתִיבוֹתֶיךָ שַׁמָּה וּשְׁאִיָּה

סָבִיב לְךָ בָּתָה, תַּחְתֶּיךָ שַׁחַת צוֹפִיָּה

מִשְׁכַּן נָחָשׁ וְשָׂרָף, וְעַקְרָב עַל שוּלַיִם

מִמַּעַל יֵקַד יְקוֹד, לַבָּה בַּיַּרְכָּתַיִם

בְּכָל עֵבֶר וּפִנָּה שָׂטָן וּמַפְרִיעַ

מִלְחָמָה כְבֵדָה לְמָטָּרָה לֹא תַגִּיעַ

אֵינְךָ מוֹשֵׁל בַּתֵּבֵל כַּאֲשֶׁר הִגַּדְתָּ

מִשָּמַיִם אֶרֶץ אַךְ לַקְּרָב יָרַדְתָּ

רְאֵה אַךְ פָּסַחְתִּי עַל מִפְתַּן הַבַּיִת

לְנֶגְדִּי אַךְ קוֹץ וְדַרְדַּר שָׁמִיר וָשַׁיִת

שָׂךְ בַּסִּירִים דַּרְכִּי וּנְתִיבוֹתַי עִוָּה

לִלְחוֹם כָּל יְמֵי צְבָאִי כֵּן הֲלֹא עָלַי צִוָּה

אֲנִי לְבַדִּי בְּלִי עֵזֶר לַקְּרָב עָמַדְתִּי

בָּדָד בְּאֵין מוֹשִׁיעַ לַמַּעֲרָכָה יָרַדְתִּי

לֹא עַל בְּנֵי אָדָם בָּטַחְתִּי בַּל יַעְזוֹרוּ

הֵם הֲלֹא אַךְ נַפְשָׁם וּמְאֹדָם יִשְׁמוֹרוּ

וְלָמָה עַל בְּנֵי אָדָם אֶשָּׁעֵן אוֹר אֲקַוֶּה

אוֹחִיל לְעֶזְרָתוֹ וְלִישׁוּעָתוֹ אֶתְאַוֶּה

עָלָיו אַשְׁלִיךְ יַהַב עַל לִבּוֹ בָּטוּחַ

הֲלֹא לִבּוֹ רֵיק וְלֹא יוֹלִיד כִּי אִם רוּחַ –

חָלְפוּ עָלַי צָרוֹת רַבּוֹת גַּם נוֹרָאוֹת

כָּל הַיּוֹם לוֹחֵם הָיִיתִי עִם הַתְּלָאוֹת

שָכְכָה חֲמַת אַחַת אַחֶרֶת הִשִּׂיגַתְנִי

אַךְ נַסְתִּי מֵהָאַרְיֵה הַלְבִיָּה פְּגָעַתְנִי

כְּמוֹ עוֹבְרֵי אֳנִיָּה בְּמַיִם זֵידוֹנִים

יֶהֱמוּ גַלָּיו אֳרָחוֹת עֲקַלְקַלוֹת פּוֹנִים

עַל שְׂפַת הַיְאֹר בְּאֵימָה יִשְׂאוּ עֵינֵיהֶם

לָבוֹא שָׁמָּה כָּל חֶפְצָם וּמַאֲוַיֵּיהֶם

כֵּן אָנֹכִי קִוִּיתִי קִצִּי יַגִּיעַ

וְתוֹחַלְתִּי, יְמֵי אֵבֶל יִקְרְבוּ שְׁאוֹל אַצִּיעַ

מִי יִתְּנֵנִי עַל חוֹף יָמַי וְיָבֹא יוֹמִי

וּלְהַאֲזִין תְּרוּעַת קוֹל קוֹרֵא לַעֲזוֹב מְקוֹמִי –

וּכְמוֹ אִם יִקְפְּאוּ תְהוֹמוֹת וְהָיוּ לְקֶרַח וּכְפוֹר

חֲזָקִים הֵמָּה כְּמוֹ מַעְבָּרָה מִדּוֹר דּוֹר

עוֹבֵר עֲלֵיהֶם בּוֹטֵחַ לא יִירָא רָע

מְסִלַּת בַּרְזֶל הוּא לְעוֹבֵר לְיוֹצֵא וָבָא

פִּתְאוֹם יִבָּקַע הַכְּפוֹר פִּתִּים יִנָּשֵׂאוּ

עוֹבְרִים אָחֲזָה פַלָּצוּת בְּאֵימָה יְשַׁוֵּעוּ

אַבְנֵי קֶרַח יְסַלְּפוּ דַרְכָּם בְּלֶכְתָּם יִסַּבּוּ

אֵין לַעֲמוֹד עֲלֵיהֶם תְּנוּעוֹתָם רַבּוּ

הֲלֹא אָז תַעֲמֹד הָכֵן כְּגִבּור תֶּאֱזוֹר חַיִל

מֵאֶבֶן אֶל אֶבֶן תְּרַקֵּד כְּשָׂעִיר וְאַיִל

עַל הַחוֹף תַּבִּיט שָׁם תִּרְאֶה עֶזְרָתֶךָ

שְׂפַת הַיְאֹר תַּגִּיעַ תִּנָּצֵל נַפְשֶךָ

כֵּן מֵי צָרוֹתַי לְאֶבֶן נֶגֶף נִקְפָּאוּ

וּמֵרֹב תְּלָאוֹת צוּרֵי מִכְשׁוֹל נִבְרָאוּ

מִפְלָט מִצָּרָה מָנוֹס מֵרָע חָמַדְתִּי

מֵאֶבֶן נֶגֶף אֶל צוּר מִכְשׁוֹל יָרַדְתִּי

וְאַחֲרֵי אֶפֶס תִּקְוָה עֵזֶר לֹא רָאִיתִי

מָנוֹס בַּצַּר וּמִפְלָט לַשָּוְא קִוִּיתִי

אַךְ עַל שְׂפַת יְאֹר חַיַּי אֶת עֵינַי נָשָׂאתִי

שָׁם רָאִיתִי אוֹר מִשָּׁם תָּבוֹא עֶזְרָתִי –

וְהִנְנִי עוֹמֵד עַל גְּבוּל שְׂדֵה הַמַּעֲרָכָה

שָׁקְטָה הַמִּלְחָמָה וַחֲמָתָהּ שָׁכָכָה

נָגֹלּוּ חוּטֵי חַיַּי מְלַאכְתִּי עָשִׂיתִי

וְאֶנָפֵשׁ מֵעֲבֹדָה חֻקִּי כִלִּיתִי

אוּלָם לָמָה עָמַלְתִּי עַל מָה יָגַעְתִּי

מֶה עָשִׂיתִי מַה פָּעַלְתִּי לֹא יָדַעְתִּי

מִי יוֹדֵעַ אִם אַחֲרֵי שׁוֹלְחִי מִלֵּאתִי

אוּלַי סִלַּפְתִּי דַרְכִּי וְיָשָׁר הֶעֱוֵיתִי

וְאַחֲרֵי עָבְרוּ עָלַי צָרוֹת רַבּוֹת וְרָעוֹת

גַּם הִקִּיפוּ עָלַי בַּלָּהוֹת וּתְלָאוֹת

מֶה הָיְתָה הַמַּטָּרָה זָקַנְתִּי וָשַׂבְתִּי

גֶּבֶר אֵין אֱיָל הָיִיתִי בָּדָד יָשָׁבְתִּי

יָדַיִם תִּרְפֶּינָה גַּם בִּרְכַּי כָּשָׁלוּ

כֹּחִי עֲזָבַנִי גַּם פָּנַי נָפָלוּ

יָגוֹן בִּלְבָבִי נַפְשִׁי עָלַי תִּשְׁתּוֹחָח

עַפְעַפַּי יִזְלוּ דִמְעָה אַבִּיטָה לְנֹכַח

לְהִתְאוֹנֵן עַל רוֹעַ גּוֹרָלִי אָמַרְתִּי

לִשְׁפּוֹךְ דְּמָעוֹת עַל כִּי בְּתֵבֵל נוֹצַרְתִּי

שָׁמַיִם אֶשָּׂא עֵינַי, הֲיֵּשׁ רוֹאֵנִי?

שָׁם? הֲיֵשׁ מַאֲזִין קוֹלִי אִם יִשְׁמָעֵנִי?

הֲיֵשׁ שָׁם בַּמָּרוֹם לִפְנֵי מִי לְהִתְאוֹנֵן?

מַאֲזִין וּמַקְשִׁיב קוֹל בּוֹכֶה וּמְקוֹנֵן?

אוּלַי עָלֶה נִדָּף צִיץ נוֹבֵל הִנֵנִי

מֻשְׁלָךְ בָּרוּחַ וּסְעָרָה תִּשָׂאֵנִי

אוֹ צֵל עוֹבֵר הִנֵנִי בֵּין רִבְבוֹת צְלָלִים

תּוֹעֶה בֵּין חֶזְיוֹנוֹת חֲלוֹמוֹת וַהֲבָלִים

עַל מִצְחוֹ גָּאוֹן וְגֹבַהּ אֵין כָּמוֹהוּ

וּסְבִיבָיו יְוֵן מְצוּלָה תֹּהוּ וָבֹהוּ –

אַךְ לָמָּה זֶה הֶבֶל לְיוֹצְרוֹ יִשְׁאַל חֹמֶר?

אִם יִרְאֵהוּ יִשְׁמַע כִּי יַבִּיעַ אֹמֶר

הֲלֹא הוּא עָשָׂהוּ שִׁבְתּוֹ וְקוּמוֹ יוֹדֵעַ

גַּם מַחֲשָׁבוֹת בַּסֵּתֶר רֻקָּמוּ הוּא שׁוֹמֵעַ

גַּם עַל צִיץ נוֹבֵל יַבִּיט יָשִׂים עֵינֵיהוּ

לֹא יְאַבֵּד לָנֶצַח אַךְ מְשַׁנֶה פָנֵיהוּ

לֹא יַהֲפֹךְ לְאַל וּלְאֶפֶס וָאַיִן

בְּחֶפְצוֹ יָשׁוּב יַפְרִיחַ תַּאֲוָה לָעַיִן

גַּם אוֹתִי לֹא לְתֹהוּ אֵל בְּרָאתַנִי

גַּם לֹא לַשָּׁוְא בְּתוֹכַחְתְּךָ יִסַּרְתַּנִי

בְּסוֹד אֵל לֹא אָבוֹא לֹא אֶתְבּוֹנֵן מַעֲשֵׂהוּ

יִקְטְלֵנִי, לְפָעֳלוֹ אֶתֵּן צֶדֶק וַאֲנַשְּׂאֵהוּ