אֲנִי כָל אוֹהֲבַי אֵהַב בְּכָל לֵב / וְגַם לִמְכַבְּדַי תָּמִיד אֲכַבֵּד

וְלִי לָשׁוֹן כְּעֵט סוֹפֵר יְשַׁנֵּן / שְׁבַח רֵעַי וְכָל קָמַי יְאַבֵּד.

קְבֹר סוֹדָךְ בְּתוֹךְ רִגְבֵי כְבֵדָךְ / וְאַל־תַּאְמֵן לְהָפִיק סוֹד יְדִידָךְ

שְׁמֹר שֶׁמָּא יְהִי נֶהְפָּךְ לְאוֹיֵב / וְיִשְׂמַח בּוֹ לְהַגִּידוֹ בְּאֵידָךְ.

קוּם דּוֹדִי מַה לְּךָ יָשֵׁן וְנִרְדָּם / קוּמָה וּשְׁתֵה מְעַט יַיִן אֲדַמְדָּם.

זְכֹר אָחִי בְּעֵת שִׁבְתִּי בְשִׂמְחָה / וְאֵם פֶּרֶץ עֲלֵי רֹאשִׁי כְשִׁפְחָה

וְסַנְהֶדְרִי גְדוֹלָה מִלְּפָנַי / וְעִיר אֶסְתֵּר לְפָנֵינוּ פְתוּחָה

וְדוֹד שָׁאוּל לְפָנֵינוּ בְיָפְיוֹ / וּמִפִּיו בֶּן־אֲבִינֹעַם זְרוּחָה

וְקָם יִתְרוֹ לְאַב בָּלָק זְבָחוֹ / וְצָעַק בֶּן־אֲמִתַּי מִזְּבִיחָה.

כִּי כָל מְתֵי יָמִים הֲלֹא הֶבֶל וְרִיק / מַסּוֹת יְשִׂימוּן לַחֲטֹף כֹּחֵנוּ

וּזְמָן יְקִימֵנוּ לְפָנָיו רֽוֹזְנִים / יִקַּח כְּלִי רֵיקָם וְיִמְשָׁחֵנוּ

הִתְוָה וְכָתַב תָּו עֲלֵי מִצְחוֹת בְּנֵי / אָדָם כְּסִימָן עַד אֲבֹד נִצְחֵנוּ

הִיא תַו תְּמוּתָה הַחֲקוּקָה עַל יְקוּם / הִנֵּה כְתוּבָה הִיא עֲלֵי מִצְחֵנוּ

לֹא נִבְרְאוּ אִישִׁים אֲבָל אוֹיְבֵי יְצוּר / מֵהֶם עֲצָבֵינוּ וּמַר שִׂיחֵנוּ

נִבְנֶה וְיֶהֶרְסוּ וְנִצְעַק יוֹם לְיוֹם / לָהֶם וְאֵין מַאְמִין לְקוֹל שִׂיחֵנוּ

הַטּוֹב אֲשֶׁר בָּהֶם הֲלֹא אֹרֵב כְּמוֹ / נָחָשׂ עֲדֵי נִישַׁן וְיִרְצָחֵנוּ

אֶל מִי שְׁלָחָנוּ אֱלֹהִים שַׁאֲלוּ / שַׁדַּי לְאוֹיְבֵינוּ הֲתִשְׁלָחֵנוּ

שׁוּר הַזְּמָן כִּי מַחֲמַדֵּינוּ יְשַׁו / שִׁבְיוֹ וְיִקַּח אֶת בְּדֹלָחֵינוּ

לַיִל וְיוֹם יָבוֹא לְגִנַּת הָאֱגוֹז / יִלְקֹט עֲנָבֵינוּ וְתַפּוּחֵינוּ

לָקַח גְּבִיר פל' אֲשֶׁר יָפָה כְּכָל / מַהְלָל וּבוֹ נָגַהּ מְאוֹד זַרְחֵנוּ

הַשַּׂר וְהַזָּקֵן וְהַנִּכְבָּד בְּעַם / הָאֵל [וְהַ]נִּרְקָח בְּטוּב רִקְחֵנוּ

נָדִיב וְשׁוֹעַ אִישׁ צְדָקוֹת מַעֲנִיק / זָרַח כְּשִׁמְשֵׁנוּ וְכִירֵחֵנוּ

תִּשְׁקֹט עֲדֵי תָקִיץ בְּרֹאשׁ עוֹמְדִים לְקֵץ / שִׁמְךָ הֲלֹא כָתוּב בְּתוֹךְ לוּחֵנוּ.

אֱמֶת לֹא אָח יְהִי פוֹדֶה לְאָחִיו / וְאִם יַחְמֹד אֱהִי כָפְרוֹ רְמִיָּה

וּבֵן אֵיךְ יִחְֽיֶה תַּחַת אֲבוֹ[תָיו] / וְלֹא יוּכַל לְה..ל..תְּחִיָּה

וְלוּ יִהְיֶה לְאִישׁ כֹּפֶר פְּדִיתִיךְ / אֲדוֹן נַפְשִׁי בְּרוּחִי בַנְּשִׁיָּה

אֲבָל אֶשְׁאַל רְפוּאָה מֵאֱלֹהִים / לְךָ שָׁלוֹם לְמַחְלָתָךְ רְטִיָּה.

וּמַה לָּכֶם נְשֵׁי חֶבְיוֹן / מְתֻלָּעִים כְּקִיקָיוֹן

תְּרִימוּן שָׁוְא עֲלֵי אֶבְיוֹן / וְהוּא כֹהֵן לְאֵל עֶלְיוֹן.

מְדַבֶּר־מוּם בְּאִישׁ חָיִל / הֲמִיּוֹם יַעֲשֶׂה־לָּיִל.

מְקוֹר הַבִּין אֲשֶׁר כָּל הַמְּבִינִים / כְּשׁוּעָלִים וְהוּא בֵינָם כְּלָיִשׁ

אֲשֶׁר הוֹרִיד שְׁאוֹל כָּל הַפְּתָאיִם / וְנִתְעַלָּה עֲלֵי כִימָה וְעָיִשׁ

וְכָל שָׂרִים לְנֶגְדּוֹ כַשְּׁוָרִים / וְהֵם לֹא יְדְֽעוּ חָרִישׁ וְדָיִשׁ

בְּשִׁירוֹתָיו לְדוֹר אַחְרוֹן חֲקוּקִים / בְּעֵט בַּרְזֶל וְנֶחְצָבִים בְּשָׁיִשׁ

וְהַזּוֹמֵם יְלַחְצֵהוּ בְשִׂכְלוֹ / הֲלֹא טָעָה כְּשֶׂה אוֹבֵד וְתָיִשׁ.

אֱמֹר לִכְסִיל וְלֹא כִכְסִיל וְעָיִשׁ / וְגַם חַיָּה וְלֹא כִכְפִיר וְלָיִשׁ

אֲשֶׁר יִדְמֶה בְּעֵת יִדֹּם כְּמוֹ אִישׁ / וְעֵת יִדֹּם יְהִי כַשּׁוֹר וְתָיִשׁ.

קוּמָה עָצֵל וְאַל תִּשְׁכָּב / הֲרֵי פֶרֶד אֲשֶׁר תִּרְכָּב.

נְשִׂיא אֻמּוֹ נְגִיד עַמּוֹ נְסִיכוֹ / וְהַגּוֹאֵל אֲשֶׁר בּוֹ אֵל סְמָכוֹ

וְהַנֵּזֶר וְהָעֵזֶר וְהָעֹז / וְהַמָּעֹז לְמִגְדַּל כֹּל נְסָכוֹ

אֲרִי וּצְרִי חֳרִי וּפְרִי תְעָלָה / כְּזָר דַּרְכּוֹ וְכֹה וָכֹה עֲרָכוֹ

קְרָא מִכְתָּב לְמִתְאַוֶּה וְנֶאְנָח / בְּעֵת כָּתְבוֹ בְּדִמְעָתוֹ מְסָכוֹ

בְּדִמְעַת לֶחֱיוֹ וּדְיוֹ מְסָכוֹ / וְלֹא יָכֹל לְשׁוּר הָיָה בְתוֹכוֹ

וְשָׁלוּחַ בְּיַד אָפֵל וְשָׁפֵל / אֲשֶׁר הַבַּז וְהַבּוּז הֶחֱשִׁיכוֹ

וּבַשַּׁעַר כְּבַיַּעַר מְדֻכֶּה / וּמֵחָמָס וְאִם הָלֹךְ וּבָכֹה

וְאֵלַי נָס וּבִי נֶאְסַר [בְּעָבוֹ]ת / וְאֵל עָלַי בְּמַעְלָלַי הֲפָכוֹ

כְּטֹבֵעַ אֲשֶׁר נֶאְחַז בְּנִטְבָּע / וְכָעִוֵּר אֲשֶׁר עִוֵּר מְשָׁכוֹ

אֲדֹנִי הַט יְמִינָךְ לִי וְלִבּוֹ / אֱזֹר קִנְאָה וְהִתְעוֹרֵר לְתָמְכוֹ

תְּהִי שָׁלוֹם אֲדוֹן נַפְשִׁי לְעוֹלָם / נְשִׂיא אֻמּוֹ נְגִיד עַמּוֹ נְסִיכוֹ.

עֲזֹר נַפְשִׁי אִישִׁי וּנְשָׂאֵנִי עַל כָּף / לְפִי כִי אַתְּ לַלֵּב כְּמוֹ הַכַּף לַכָּף

וְאַל תָּדוֹן רוּחִי אֲדוֹנִי תּוֹךְ הַכָּף / וְאַל תַּעְלֵם [אָזְנָךְ] וְאַל תַּעַשׂ כַּף כָּף

הֲלֹא צוּרָךְ בָּחַר כָּל מָךְ דָּלֶת כָּף / אֲנִי עֶבֶד אֶהְיֶה־לְּךָ אֶקֹּד אִכָּף.

בחלא פי עין רמתני באסהאם / מִי יַעֲלֵנִי מִבְּאֵר פִּיהָ וּמִי

למّא אסתבטית כלאמהא פדעותהא / אָנָּא אֲהוּבָתִי חֲלָלֵךְ רַחֲמִי

פבדת תנוב בדרّהא ותבסّמת / וָאֶעֱלֹז כִּי קָרְאָה דוֹדִי שְׁמִי

בַּמֶּה הֲרַגְתִּיךָ עֲנֵה בִי וַעֲנֵה / וַתִּכְחֲדִי דָמִי וְלֹא תִכָּֽלְמִי

לא תנסין מודّה͘ עלקתהא / הָאַהֲבָה זִכְרִי וְנִדְרֵךְ שַׁלְּמִי.

אֱמֹר אֶל־מִי יְאָו לִרְאוֹת תְּמוּנָה / לְיָרֵחַ וְלַשֶּׁמֶשׁ מְעֹנָה

יְמַהֵר לַחֲזוֹת עָפְרֵי אֲהָבִים / מְחֻבָּרִים בְּחֻפָּה רַעֲנָנָה

לְהוֹד זֶה חָֽפְרָה חַמָּה וְנֶגֶד / מְאוֹרָהּ זֶה מְאֹד חָפְרָה לְבָנָה

לְחֶבְרָתָם אֲדָמָה לָֽבְשָׁה גִיל / וְנִשְׁמַע מִלְּשׁוֹן יָמִים רְנָנָה.

יְרַפֵּא הַזְּמַן מַכְאוֹב קְצִינוֹ / אֲשֶׁר הוּא כַעֲנָק עַל צַוְּרוֹנוֹ

אֲשֶׁר שָׁלַח כְּתָבוֹ לִי לְמִנְחָה / בְּעֵת מִנְחָה וּבִתְשׁוּרָה הֱכִינוֹ

וְחֵי הָאֵל אֲשֶׁר יָדַע לְבָבִי / וְהֵבִין כָּל־צְפוּנֵי רַעֲיוֹנוֹ

אֲשֶׁר מִיּוֹם שְׁמַעְתִּיךָ אֲהֵבָךְ / וְנִכְבַּדְתָּ וְיָקַרְתָּ בְּעֵינוֹ

וְיֵשׁ עָלַי פְּנֵי דוֹדִי לְחַלּוֹת / וְלוּ הָיָה בְאַפְסֵי יָם מְעוֹנוֹ

אֲבָל כֹּבֶד חֳלִי קָרָא יְדִידָךְ / וּפָנֶיךָ לְחַלּוֹת לֹא נְתָנוֹ

וְאוּלָם נָא סְלַח פִּשְׁעִי וְהַמְתֵּן / כְּמוֹ דַיָּן אֲשֶׁר יַמְתִּין בְּדִינוֹ.

יְדִידִי נַהֲלֵנִי עַל גְּפָנִים / וְהַשְׁקֵנִי וְאֶמָּלֵא שְׂשׂוֹנִים

וְכוֹסוֹת אַהֲבָתָךְ יִדְבְּקוּ בִי / וְאוּלַי הֵם יְנִיסוּן הַֽיְגוֹנִים

וְאִם תִּשְׁתֶּה בְאַהְבָתִי שְׁמֹנֶה / אֲנִי אֶשְׁתֶּה בְאַהְבָתָךְ שְׁמֹנִים

וְאִם אָמוּת לְפָנֶיךָ יְדִידִי / חֲצֹב קִבְרִי בְּשָׁרְשֵׁי הַגְּפָנִים

וְשִׂים רַחְצִי בְּמֵימֵי הָעֲנָבִים / וְחָנְטֵנִי בְּחַרְצַנִּים וְזַנִּים

וְאַל תִּבְכֶּה וְאַל תָּנוּד לְמוֹתִי / עֲשֵׂה כִנּוֹר וְעוּגָבִים וּמִנִּים

וְאַל תָּשִׂים עֲלֵי קִבְרִי עֲפָרִים / אֲבָל כַּדִּים חֲדָשִׁים עִם יְשָׁנִים.

הֲלֹא נִפְלָאת עֲלֵיכֶם הַשְּׁחוֹרָה / אֲשֶׁר הָיוּ שְׁחֹרִים לָהּ לְבָנִים.

הַשָּׂר בְּעֹז הָרֵם יְמִינֶךָ / וּתְפשׂ בְּצִיצִת רֹאשׁ זְמַנֶּךָ

וּכְבשׁ יְלָדָיו לַעֲבָדִים לָךְ / כִּי נִכְנְעוּ לִפְנֵי גְאוֹנֶךָ

יָצָא לְהִלָּחֵם בְּךָ אָכֵן / יָצָא אֱלֹהֶיךָ לְפָנֶיךָ

וַיַּעֲמֹד לָרִיב וְשָׂרִיתָ / עִמּוֹ וְעִם אִישָׁיו בְּאוֹנֶךָ

וַיִּהֲדֹף צִבְאֵי כְזָבָיו כִּי / עָרְכוּ לְעֻמָּתוֹ אֱמוּנֶיךָ

קָשַׁר צְנִיף הָדָר עֲלֵי רֹאשָׁךְ / וּרְבִיד [שְׂרָ]רָה עַל גְּרוֹנֶךָ

כִּי יָקְרָה נַפְשָׁךְ בְּעֵינֵי צוּר / דמו מ….[נֶיךָ]

וַיַּעֲלֶה שַׁוְעָךְ בְּאָזְנָיו כִּי / עָרַב נְעִים קוֹלוֹ בְאָזְנֶיךָ

וַיַּעֲמֹד מֵלִיץ בְּיִשְׁרָתָךְ / וּזְכוּת מְקֻדָּשָׁיו זְקֵנֶיךָ

וַיְצַו רְפוּאָה לַעֲצָמֶיךָ / תִּהְיֶה לְרִקָּבוֹן לְמוֹנֶיךָ

לָבְשׁוּ יְדִידֶיךָ לְבוּשׁ [שָׂשׂוֹן] / וַיִּסְחֲבוּ כַנְפֵי רְנָנֶיךָ

..ה יצלח דרכה וְאַל יִהְיוּ / רוֹעִ[ים] בְּנֵי נֵכָר בְּצֹאנֶךָ

יַנְחֵם בְּתֹם לֵבָב לְהַשְׁקוֹתָם / מִנַּהֲרֵי נַחְלֵי עֲדָנֶיךָ.

לְאִישׁ יָדוֹ לְכָל שׁוֹאֵל פְּרוּשָׂה / לְכֵן הוֹנוֹ לְכָל יוֹדְעָיו מְשִׁסָּה

וְלֹא יִרְצֶה בְמַתָּנָה לְעוֹלָם / וְזֶה וִסְתָּה בְּרָצוֹן לֹא אֲנוּסָה

וְיָם נִדְ[בוּ]ת וְכָל חֶסֶד סְבִיבָיו / וְהַטּוֹבָה בְּמוֹ תוֹכוֹ כְּמוּסָה

וְלוּ שָׁאַל [אֱנוֹשׁ] רוּחוֹ וְעֵינָיו / נְתָנָם לוֹ בְּלִי חֶמְלָה וְחִיסָה.

וְיוֹנָה בַּעֲדִי עֶדְיָהּ שְׁבִיסִים / תְּקַנֵּן בַּאֲמִירֵי הַהֲדַסִּים

שְׁאִלְתִּיהָ לְמִי תִבְכִּי וְלָמָּה / הֱשִׁיבַתְנִי עֲלֵי תוֹרִים וְסִיסִים

עֲנִיתִיהָ כְּמוֹ אֶבְכֶּה יְדִידַי / אֲשֶׁר הָלְכוּ בְּאַהְבָתִי עֲמוּסִים

עֲזָבוּנִי וְעֵינַי יִזְּלוּ דָם / עֲלֵי כַפַּי אֲשֶׁר לָהֶם פְּרוּשִׂים

וְרָאִיתִי לְחָיֵיהֶם בְּבִכְיָם / כְּשׁוֹשַׁנִּים זְרָקוּם הַֽרְסִיסִים.

יְדִידֵי הַזְּמַן לַיְלָה וְיוֹמָם / וְהֵם עוֹשִׂים אֲשֶׁר תֶּאְהַב וְתִתְעָב

אֱכֹל וּשְׁתֵה בְּיוֹם טוֹב וַעֲשֵׂה טוֹב / לְבַל תִּצְמָא בְּיוֹם רָעָה וְתִרְעָב.

לְאִטֵּךְ דַּבְּרִי שִׁירֵךְ דְּבוֹרָה / אֲשֶׁר קִרְיַת שְׁמַע מִפִּיךְ יְקֹרָא

מְיַחֶדֶת וּמַאְרֶכֶת בְּאֶחָד / וּמַתֶּזֶת בְּזֵכֶר רָם וְנוֹרָא

אֲשֶׁר נָתַן דְּבַשׁ תַּחַת לְשׁוֹנֵךְ / וְשָׂם לָךְ לַהֲדֹף אֹיְבֵךְ מְרֹרָה

הֲלֹא אִם אַתְּ בְּעֵינַיִךְ קְטַנָּה / כְּבוּדָּה אַתְּ וְלָךְ מִשְׁפָּט בְּכֹרָה

חֲמֻדוֹת טִהֲרוּ אוֹתָךְ וְאֵינֵךְ / כְּשֶׁרֶץ עוֹף אֲבָל צִפּוֹר טְהוֹרָה.

בְּנִי אַל נָא תְחָרֵף אִישׁ בְּמוּמוֹ / לְבַל יִגְלֶה לְּךָ מוּמִים סְתוּרִים

וְאִם תַּחְפֹּץ הֱיוֹת לוֹ מוּם בְּשֶׁקֶר / הֲלֹא רָעָה גְדוֹלָה הַשְּׁקָרִים

וְאִם מוּם בָּךְ כְּמוּמוֹ אֵיךְ יְחָרֵף / אֱנוֹשׁ עִוֵּר לְעִוֵּר בַּשְּׁעָרִים

וְעֵת תָּשׁוּר לְאִישׁ מוּמִים עֲצוּמִים / יְהוּ עֵת תֶּחֱזֶה מוּמָךְ צְעִירִים

וְאִם תִּדְרשׁ [בְּמִשְׁגֶּה] מוּם תְּשִׂימוֹ / מְאֹד יִדְרָשׁ־לְךָ מוּמִים גְּמוּרִים

וְעַתָּה אֶת שעפי (?)… / בְּטַח בָּאֵל וְאַל תַּרְבֶּה דְבָרִים

לְבַל תֶּאְשַׁם וְסוּר מֵרָע וְהַשְׁלֵךְ / יְהָבָך עַל אֱלֹהֵי הַֽיְצוּרִים

וְאַל תֹּאמַר לְשַׁלֵּם רַע וְתֵלֵךְ / בְּדַרְכֵי [תֹם] אֲשֶׁר סָלְלוּ יְשָׁרִים.

וְהוּא פִלֵּס נְתִיב קֹדֶשׁ וּפָתַח / לְמִשְׁקָלָהּ וּמַתְכֻּנְתָּהּ שְׁעָרִים

וְהוּא הֶחְבִּיר בְּעִנְיָנָהּ שְׁעָרִים / וְקִבֵּץ מִגְּדוּדֶיהָ פְּזוּרִים

וְהִקְרִיב מִקְּצָוֶיהָ רְחוֹקִים / וְהִקְרִיב מִגְּבוּלֶיהָ מְצָרִים

וּמֵעוֹדוֹ הֲלֹא הָלַךְ שְׁחוֹחַ / שְׁפַל רוּחַ לְאֵל מַשְׁפִּיל וּמֵרִים

וְנָטָה אַחֲרֵי אֵל מִבְּחוּרוֹת / וְשָׁמַר מִשְׁמְרוֹתָיו מִנְּעוּרִים

גְּבִיר יַשְׁפִּיל מְתֵי אָוֶן וְחָמָס / וְיַגְבִּיהַּ מְתֵי מִשְׁפָּט וְיָרִים

וְשֵׁבֶט פּֽוֹשְׁעִים שַׁבֵּר יְשַׁבֵּר / וְהָרֹס יַהֲרֹס שִׁנֵּי כְפִירִים

וְעַל דַּלָּיו וְגוֹזָלָיו יְרַחֵף / בְּאֶבְרָתוֹ כְּרַחֵף הַנְּשָׁרִים

וְיוֹשִׁיעַ מְיַחֵל בּוֹ תְּשׁוּעָה / וְעָזַר הַֽמְקַוֶּה מֵעֲזוּרִים

כְּאִלּוּ לַהֲבֵי אֵשׁ מַעֲנֵה פִיו / וְלַפִּידֵי תְ[שׁ]וּבוֹתָיו [כְּבוֹ]עְרִים

יְגוּרוּן יֽוֹשְׁבָיו מִמּֽוֹקְדֶיהָ / וְיִרְהוּ פֶּן יְהוּ דוֹמִים לְ..רִים

וְאָמְנָם הוּא וְכָל בַּעְלֵי מְזִמָּה / וְתוּשִׁיָּה כְּרוֹעֵי הָעֲדָרִים.

וּגְבִיר יְמִינוֹ כַעֲנָנִים עֵת / גִּשְׁמֵי בְדֹלָחִים מְפַזֶּרֶת

גֹּזֵר עֲלֵי יָמִים וְאֵין מֵנִיא / וּבְנֵי זְמַן הֵבִיא בְמָסֹרֶת

גֹּדֵר בְּכַף חַסְדּוֹ וְאֵין פֹּרֵץ / גָּדֵר אֲשֶׁר בֹּנָה וְגֹדָרֶת

אָסַף נְפֹצֵי דָת וְלִבּוֹ לָהּ / אָרוֹן וְצַלְעֹתָיו כְּכַפֹּרֶת

יֹעֵץ חֲכַם רוּחַ כְּאִלּוּ הִיא / מִבֵּין כְּרוּבֵי אֵל מְדַבֶּרֶת

הוֹנוֹ וְקִנְיָנוֹ רְצוֹן קֹנוֹ / מֹאֵס בְּגִנְזֵי דַר וְסֹחָרֶת

אַבִּיר עֲנָוָה מַחְגְּרוֹתָיו [שָׂם] / וַיַּעֲטֶה צֶדֶק לְאַדָּרֶת

תִּשְׂמַח אֲדָמָה בוֹ וּמֵרָב־גִּיל / חַסְדּוֹ בְּלִי לָשׁוֹן מְשׁוֹרָרֶת

וּנְשִׂיא נְשִׂיאִים לַצְּמִיתֻת כָּל / מִשְׂרָה מְכוּרָה לוֹ בְּמִמְכָּרֶת

עֹרֵךְ לְכָל עֹבֵר אֲרֻחֹתָיו / אֶל יַד שְׁעָרִים עַל מְרוֹם קָרֶת

הֵקִים אֱמֶת עַל דָּת וּמִשְׁקֹלֶת / אַחַר הֱיוֹת סָרָה וְנֶעְדָּרֶת

רָמָה גְדֻלָּתוֹ עֲלֵי גֹדֶל / כָּל שָׂר כְּרוּם קוֹמָה עֲלֵי זָרֶת

חַסְדּוֹ כְסַהַר עַל פְּנֵי יָמִים / בָּהִיר וְכָל חֶסֶד כְּבֶהָרֶת

שֶׁמֶשׁ צְדָקָה לַעֲדַת רֵעָיו / מַרְפֵּא וְלִמְשַׂנְאָיו מְבַעָרֶת

אָנִי יְדִידוּתִי לְךָ חֹנָה / מִנִּי מְקוֹם כָּבֵד וְיֹתָרֶת

שֹׁתָה רְבִיבֵי חַסְדְּךָ עֹשָׂה / פֶרִי וְלִרְגָעִים מְבַכָּרֶת

אִם מַעֲלָלָךְ רָם עֲלֵי שִׁירִי / אַהְבָה תְהִי עָלָיו מְכַפָּרֶת

תִּשָּׂא בְרָכָה מֵאֱלֹהִים עוֹד / יוֹנָה עֲלֵי עָנָף מְזַמָּרֶת.