חֶלֶק רִאשוֹן    🔗

תֹּכֶן הַפְּרָקִים.

א          סֵפֶר תּוֹלְדוֹת הָאָדָם.

ב.          דּוֹרוֹת רִאשׁוֹנִים.

ג.          הַמַּבּוּל.

ד.          פָּיֵטוֹן.

ה.          יְסֻד תֵּבָה.

ו.          פֶּנֶת.

ז.          פֶּרֶס.

ח.          יָוָן.

ט.          אִיקָר וְדֵדָל.

י.          מֶלֵּאָגֵר גִּבּוֹר הַצַּיִד.

יא.          טַנְטַל.

יב.           פֵּלֹפְּסְ.

יג.          נְיוֹבָה.

א.

 

סֵפֶר תּוֹלְדוֹת הָאָדָם.    🔗

וַיְכֻלּוּ הַשָּׁמַיִם וְהָאָרֶץ וְכָל־צְבָאָם, וַיֵּהֹם הַיָּם בְּמֶרְחֲבֵי אֵין קֵץ וְדָגִים מִדָּגִים שׁוֹנִים הִשְׁתַּעַשְׁעוּ בְּמַעֲמַקֵּי־מֵימָיו. וַתִּשָּׁמַע שִׁירַת־הַצִּפֳּרִים קַלּוֹת הַנּוֹצָה, וְהַבְּהֵמָה וְהַחַיָּה פָּרוּ־וְרָבוּ וַתַּצְהֵלְנָה קוֹלָן מֵרֹב טוּב וְיִתְרַגְּשׁוּ הַחַיִּים בַּכֹּל וַיֶּהֱמוּ וַיָּשֹׁקוּ.

אַךְ בֵּין־כָּל־הַיְּצוּרִים אֲשֶׁר נוֹצְרוּ לָשֶׁבֶת בָּאֲוִּר, בָּאָרֶץ וּבַמַּיִם עוֹד חָסֵר הָאֶחָד: חָסֵר עוֹד הַיְצוּר אֲשֶׁר בְּשָׂרוֹ יִהְיֶה מִשְׁכָּן לָרוּחַ וַאֲשֶׁר רוּחוֹ תִמְשֹׁל עַל־כָּל־בְּנֵי־חֲלוֹף. אָז יֵרֵד אַרְצָה פְּרוֹמִית בֶּן־יֶפֶת בְּכוֹר־אוּרָן¹) , נֶצֶר מִמִּשְׁפַּחַת אֵלִים עַתִּיקָה, אֲשֶׁר זוּז² ) גָזַל מֵאִתָּהּ אֶת־מֶמְשַׁלְתָּהּ. וּפְרוֹמִית מָלֵא רוּחַ־חָכְמָה וּתְבוּנָה וְדָבָר לֹא נִכְחַד מִמֶּנּוּ, וַיֵּדַע פְּרוֹמִית כִּי בְחֵיק־הָאֲדָמָה יָנוּם זֶרַע שָׁמַיִם, וַיִּקַח חֹמֶר וַיָּבָל בְּמֵי־נַחַל וַיָּלָשׁ וַיִּיצֶר אֶת־הָאָדָם. בְּצֶלֶם הָאֵלִים בָּרָא אֶת־הָאָדָם וּבִדְמוּתָם, לֹא חָסֵר דָּבָר כִי אִם נְשָׁמָה – נִשְׁמַת־חַיִּים. וַיִּקַח פְּרוֹמִית מִכָּל־יְצוּר וִיצוּר אֶת־מִדּוֹתֵיהֶם הַטּוֹבוֹת וְאֶת־מִדּוֹתֵיהֶם הָרָעוֹת וַיַּחְתְּמֵן חָתֹם בְּלֵב־הָאָדָם וַיֹּאמֶר לוֹ: חֲיֵה! וַיֶּחִי.

וְאַתּוּנָה, אֱלִילַת־הַחָכְמָה, הִשְׁקִיפָה מָן הַשָּׁמַיִם בְּעַיִן טוֹבָה עַל־פְּרוֹמִית בֶּן הָאֵיתָנִים³) וְעַל־מַעֲשֶׂה־יָדָיו, וַתֵּרֶא אֶת־הַיְצוּר הַיָּפֶה אֲשֶׁר בָּרָא, וְהִנֵּה נַעֲשָׂה בְּצֶלֶם הָאֵלִים וּבִדְמוּתָם וְהַחַיִּים מִתְרַגְּשִׁים בּוֹ לְמֶחֱצָה וַתַּחְמְדֵהוּ בְּלִבָּהּ וַתִּפַּח בּוֹ רוּחַ־חָכְמָה וָדַעַת – נִשְׁמַת־אֵלִים בָּאָדָם.

וַיְהִי הָאָדָם לְנֶפֶשׁ חַיָּה וַיִּפֶר בָּאָרֶץ וַיִּרֶב. אוּלָם בְּעוֹד אֲשֶׁר כָּל־הַיְצוּר הִתְעַנֵּג עַל הַחַיִּים, הִתְהַלְּכוּ בְנֵי־הָאָדָם כִּצְלָלִים, כְּאִלּוּ רוּחַ תַּרְדֵּמָה נְסוּכָה עֲלֵיהֶם, וְלֹא יָדְעוּ וְלֹא הֵבִינוּ כִּי נֵחַנּוּ בְמַתָּן גָּבוֹהַּ מֵעַל גָּבוֹהַּ כִּי נִיצוֹץ אֵלִים שׁוֹכֵן בְּקִרְבָּם. גַּם לְהִשְׁתַּמֵּשׁ בִּיצוּרֵי־גֵוָם לֹא יָדָעוּ, גַּם לִכְבֹּש אֶת הַחַי לַעֲבוֹדָתָם לֹא לָמָדוּ. עֵינַיִם לָהֶם וְלֹא רָאוּ, אָזְנַיִם לָהֶם וְלֹא שָׁמָעוּ.

הֵמָּה לֹא יָדְעוּ לַחְצֹב אֲבָנִים מֵחֵיק־הָאֲדָמָה וּלְסַתְּתָן. לֹא יָדְעוּ לִלְבֹּן לְבֵנִים מֵחֹמֶּר וּלְשָׂרְפָן לִשְׂרֵפָה; לְסָעֵף⁴) עֵצִים כְּרוּתִים, לְהַקְצִיעָם⁵) לְקוֹרוֹת וּלְנַסְּרָם לִנְסָרִים. גַּם מְלֶאכֶת הַבִּנְיָן הָיְתָה זָרָה לָהֶם. וַיֵּשְׁבוּ בְּחוֹרֵי הַסְּלָעִים וּבִמְחִלּוֹת עָפָר וַיִּדְמוּ לִנְמָלִים אֲשֶׁר מְנוּחָה לֹא תֵדַעְנָה. וְלֹא יָדְעוּ לְהַבְחִין בֵּין קָרַת הַחֹרֶף הַזּוֹעֵף וּבֵין נְעִימוֹת הָאָבִיב הַפּוֹרֵחַ וְחֹם הַקַּיִץ הַלּוֹהֵט וְכָל־אֲשֶׁר עָשׂוּ עָשׂוּ בְּלֹא דַעַת וּבְלֹא מַטָּרָה.

וַיַּחֲמֹל פְּרוֹמִית עַל־יְצִירֵי כַּפָּיו וַיְלַמְּדֵם לְהַבְחִין בֵּין מִזְרָח לְמַעֲרָב, וַיּוֹדִיעֵם חֻקּוֹת הַשָּׁמַיִם וְדַרְכֵי הַמַּזָּרוֹת⁶), וַיַּמְצֵא סְפָרוֹת וְאוֹתִיּוֹת, וַיְלַמְּדֵם אֶת מְלֶאכֶת הַכְּתָב וְהַחֶשְׁבּוֹן. וַיְלַמְּדֵם לְהָבִיא אֶת צַוַּאר־הַחַיָּה בְּעֹל וּלְכָבְשָׁהּ לַעֲבוֹדָתָם, וִיְלַמְּדֵם לִבְלוֹם בָּרֶסֶן אֶת־פִּי־הַסּוּסִים קַלֵּי הַמֵּרוּץ וּלְאָסְרָם בַּעֲגָלוֹת, וַיִּתֵּן לִבְנֵי הָאָדָם סְפִינוֹת וַיִּפְרֹשׂ עֲלֵיהֶן מִפְרָשִׂים נִדְחָפִים בָּרוּחַ וַיַּמְשִׁילֵם עַל הַיָּם וּמְלוֹאוֹ.

וְיֵשׁ אֲשֶׁר מַחֲלָה קָשָׁה תָּבוֹא עַל הָאָדָם וְהִפִּילָה אוֹתוֹ לְמִשְׁכָּב וְרָפוּ יָדָיו וְנָפְלָה עָלָיו רוּחוֹ, כִּי טֶרֶם יָדַע הָאָדָם לְהָכִין לוֹ צֳרִי, וְרוֹפְאִים טֶרֶם יִהְיוּ בָאָרֶץ. וַיַּרְא זֹאת פְּרוֹמִית וַיִּכָּמְרוּ רַחֲמָיו וַיְלַמֵּד אֶת־בְּנֵי־הָאָדָם לִרְקֹחַ סַמְמָנֵי רְפוּאָה. וְיֵּדְעוּ אֶת הַכֹּחַ הַנִּפְלָא אֲשֶׁר לַעֲשָׂבִים שׁוֹנִים וַיְגַלּוּ אֶת־סְגֻלּוֹת הַמַּאֲכָלִים וְהַמַּשְׁקִים וַיָּכִינוּ סַמֵי מַרְפֵּא; וְגַם הַשְׁבָּעוֹת לִמַּד אוֹתָם פְּרוֹמִית וַיַּעַצְרוּ כֹח לַעֲמֹד בִּפְנֵי־כָל־הַמַּדְוִים וְהַמַּחֲלוֹת.

וַיְלַמֵּד אוֹתָם לַחֲדוֹר גַּם אֶל־חֵיק־הֶעָתִיד וְלִרְאוֹת אֶת־הַנּוֹלָד וַיִּתֵּן חָכְמָה בְּלִבָּם לִפְתּוֹר חֲלוֹמוֹת וְלָדַעַת אוֹתוֹת הַשָּׁמַיִם וְהָאָרֶץ וַיְבִינֵם לְנַחֵשׁ עַל־פִּי־מְעוּף הָעוֹפוֹת וְעַל־פִּי־גוּפוֹת הַקָּרְבָּנוֹת וַיִּפְקַח עֵינֵיהֶם לִמְצֹא מַטְמֻנֵּי מִסְתָּרִים בְּחֵיק־הָאֲדָמָה וַיִּרְאוּ אֶת־הַכֶּסֶף וְאֶת־הַזָּהָב, אֶת הַבַּרְזֶל וְאֶת־הַנְּחֹשֶׁת וַיּוֹצִיאוּם וַיְעַבְּדוּם לְתַשְׁמִישָׁם. וַיֶּחְכְּמוּ בְנֵי־הָאָדָם וַיִּלְמְדוּ לָדַעַת אֶת־כָּל־הַדְּבָרִים אֲשֶׁר יַעֲשֶׂה אוֹתָם הָאָדָם וָחַי בָּהֶם וַיִּהְיוּ שְׂמֵחִים וְעַלִּיזִים.

וַאֲדֹנֵי־הַשָּׁמַיִם הָיוּ אָז זוּז וּבָנָיו. הוּא זוּז אֲשֶׁר גָּזַל אֶת־הַמְּלוּכָה מִמִּשְׁפַּחַת הָאֵלִים הָעַתִּיקָה, מִשְׁפַּחַת פְּרוֹמִית. וַיְהִי כַּאֲשֶׁר הֵחֵל הָאָדָם לָרֹב עַל־פְּנֵי־הָאֲדָמָה וַיַּבִּיטוּ עֲלֵיהֶם הָאֲדוֹנִים הַחֲדָשִׁים אֲשֶׁר לַשָּׁמַיִם בְּעַיִן בּוֹחֶנֶת וַיִּדְרְשׁוּ מֵאֵת הָאָדָם לָתֵת לָהֶם כָּבוֹד וִיקָר וַיַּבְטִיחוּ לִהְיוֹת לָהֶם לְעֵזֶר וּלְמָגֵן בַּצַּר לָהֶם. וּבְמִקֶן, בְּאֶרֶץ יָוָן, נֶאֱסְפוּ בְּנֵי־אֱלהִים וּבְנֵי־תְמוּתָה לְמוֹעֵצָה לִקְבֹּעַ אֶת־חוֹבוֹת בְּנֵי־הָאָדָם וּזְכֻיּוֹתֵיהֶם. וַיְדַבֵּר פְּרוֹמִית טוֹבוֹת עַל־הָאָדָם וְלֹא נָתַן אֶת־הָאֵלִים לַעֲשׂוֹת עָוֶל לִיצִיר כַּפָּיו וּלְהַעֲמִיס עָלָיו עֹל כָּבֵד מִנְּשׂוֹא, חֵלֶף הָעֵזֶר וְהֶחָסוּת אֲשֶׁר הִבְטִיחוּ לוֹ.

וּפְרוֹמִית הִתְאַוָּה תַּאֲוָה לָלֶכֶת אֶת זוּז בְּעָקְבָה. וַיַּךְ פְּרוֹמִית בִּזְרוֹעַ עֻזּוֹ שׁוֹר מַקְרִין⁷) וַיְּנַתְּחֵהוּ לְאַרְבָּעָה נְתָחִים. וַיִצְבֹּר אֶת הַבָּשָׂר וְאֶת הַקְּרָבִים לְעֵבֶר אֶחָד וַיְכַס אוֹתָם בְּעוֹר־הַשּׁוֹר וְלָעֵבֶר הַשֵּׁנִי עָרַךְ בַּמַּעֲרָכָה אֶת־הָעֲצָמוֹת וַיָּשֶׂם עֲלֵיהֶן אֶת־הַגִּידִים וְאֶת־הַחֵלֶב.

וַיִּגְדַּל גַּל הָעֲצָמוֹת מֵעֲרֵמַת הַבָּשָׂר, וַיִּגַּשׁ פְּרוֹמִית אֶל־זוּז וַיִּשְׁתַּחוּ וַיֹּאמַר:

– אָנָּא זוּז הַגִּבּוֹר וְהַנּוֹרָא, אֵל הָאֵלִים וַאֲדוֹנֵי הָאֲדוֹנִים! הִנֵּה שָׁלְחוּ בְנֵי־הָאָדָם מִנְחָה בְּיָדִי לִמְצֹא חֵן בְּעֵינֶיךָ. וְעַתָּה יִגְדַּל נָא חַסְדְּךָ לִרְצוֹת אֶת מִנְחָתָם וְלָקַחַת אֶת־אֲשֶׁר לָךְ.

אֲבָל זוּז הַיּוֹדֵעַ כֹּל, אֲבִי־כָל־הָאֵלִים, רָאָה לִלְבַב־פְּרוֹמִית וַיֹּאמַר:

– פְּרוֹמִית בֶּן־יֶפֶת הַגִּבּוֹר הַמְּהֻלָּל וְרֵעִי הֶחָבִיב! לֹא חֵלֶק כְּחֵלֶק חִלָקְתָּ!

וַיָּגֶל לֵב פְּרוֹמִית בְּקִרְבּוֹ וַיַּאֲמֵן, כִּי הוֹלִיךְ אֶת־אֲבִי־הָאֵלִים שׁוֹלָל וַיֹּאמַר:

– אָנָּא, אֵל גָּדוֹל! הוֹאִילָה־נָא לִבְחֹר אֶת־הַטּוֹב בְּעֵינֶיךָ.

וַיִּמָּלֵא זוּז חֵמָה וַיִּשְׁלַח יָדוֹ אֶל־גַּל־הָעֲצָמוֹת הַמְּכֻסּוֹת חֵלֶב וְגִידִים וַיְפַזְרֵן. וְכַאֲשֶׁר רָאוּ עֵינָיו אֶת־הָעֲצָמוֹת הַחֲשׂוּפוֹת, הֶעֱמִיד פָּנָיו, כְּאִלּוּ אַךְ עַתָּה הֵבִין לְעָרְמַת פְּרוֹמִית, וַיֹּאמֶר בְּקֶצֶף:

– אָכֵן, רֵעִי הֶחָבִיב, רוֹאֶה אֲנִי, כִּי אֶת־דֶּרֶךְ הַמִּרְמָה טֶרֶם עָזָבְתָּ⁸). וְיִגְמֹר זוּז לָקַחַת נָקָם מֵאֵת פְּרוֹמִית וְלִפְקוֹד אֶת־עֲוֹנוֹ עַל־יְצִיר כַּפָּיו – עַל־הָאָדָם. וַיִּמְנַע מֵאֵת בְּנֵי־הָאָדָם אֶת־הָאֵשׁ, הַמַּתָּנָה הָאַחֲרוֹנָה שֶׁהָיָה בְּכֹחָהּ לְשַׁכְלֵל אֶת־חַיֵּיהֶם.

וַיְחַבֵּל פְּרוֹמִית תַּחְבּוּלוֹת לְהָפֵר אֶת־מַחְשֶׁבֶת זוּז וַיִכְרוֹת צְרוֹר קָנִים אֲרֻכִּים וַחֲזָקִים וַיַּעֲמֹד וַיְחַכֶּה. וַיְהִי כַּעֲבֹר מֶרְכֶּבֶת הַשֶּׁמֶשׁ עַל־פָּנָיו וַיִּשְׁלַח אֶת־הַצְּרוֹר וַיִּטְבּוֹל אֶת־קָצֵהוּ בְּשַׁלְהַבְתָּה. וַיְמַהֵר וַיֵּרֶד אַרְצָה וּבְיָדוֹ הַלַּפִּיד הַבּוֹעֵר, וַיַּעַבְרוּ רְגָעִים אֲחָדִים וְהִנֵּה מֵעַל־הָאָרֶץ הִתְאַבְּכָה⁹) גֵאוּת הֶעָשָׁן.

זֹאת הָיְתָה הַמְּדוּרָה הָרִאשׁוֹנָה, אֲשֶׁר הִבְעִירוּ בְּנֵי־הָאָדָם וַתַּעַל וַתִּתְלַקַּח לְעֻמַּת פְּנֵי־הַשָּׁמַיִם…

וַיַּרְא זוּז מְחוֹלֵל הָרְעָמִים אֶת־מַשְׂאַת־הֶעָשָׁן הָעוֹלֶה מֵעַל־פְּנֵי־הָאֲדָמָה וַתִּבְעַר חֲמָתוֹ בוֹ. וַיְהִי כַּאֲשֶׁר לֹא יָכֹל לָקַחַת מִיַּד־בְּנֵי־הָאָדָם אֶת־הָאֵשׁ הַנּוֹתֶנֶת חֹם וְחַיִּים וַיִּוָּעֶץ לְהָבִיא עֲלֵיהֶם רָעָה, אֲשֶׁר לֹא יוּכְלוּ לְהָמִישׁ מִמֶּנָּה צַוָּארָם. וַיִּקְרָא לְשַׂר־הָאֵשׁ הַצּוֹלֵעַ, לְהֵפֵסְט, לוֹטֵשׁ נְחשֶׁת וּבַרְזֶל. וַיַּעַשׂ הֵפֵסְט בִּפְקוּדַת־זוּז בְּמַפַּחְתּוֹ אֲשֶׁר בְּמַעֲמַקֵּי הָאֲדָמָה תַּבְנִית אִשָּׁה יָפָה; בְּצֶלֶם אֵלוֹת בְּנוֹת אַלְמוּת עָשָׁה אוֹתָהּ וּבִדְמוּתָן.

וּמַעֲשֵׂי יְדֵי־פְּרוֹמִית הֵעִירוּ גַם אֶת־קִנְאַת־אַתּוּנָה. וַתִּקַּח אַתּוּנָה אֶת־תַּבְנִית הָאִשָּׁה, אֲשֶׁר עָשָׂה הֵפֵסְט, וַתַּלְבִּישֶנָּה אַדֶּרֶת יָפָה וּמַזְהִירָה וַתַּחְבשׁ לְרֹאשָׁהּ רְבִיד מְנַפְנֵף; וּפְרָחִים מְפִיצִים־רֵיחַ קָטְפָה וַתְּקַשְטֶנָּה בָּהֶם וּלְמָתְנֶיהָ חָגְרָה חֲגוֹר זָהָב מַעֲשֵׂה יְדֵי־הֵפֵסְט; וְעַל־הַחֲגוֹר תַּבְנִית כָּל חַיָּה וְכָל עוֹף, אֲשֶׁר כְּחַיִּים הָיוּ בְּעֵינֵי־כָל־רוֹאֵיהֶם. וְהֶרְמֵס, מַלְאַךְ הָאֵלִים בְּנֵי אַלְמוּת, דּוֹבֵב אֶת־שִׂפְתֵי הַתַּבְנִית הָאִלֶּמֶת וְאַפְרוֹדִיטָה, אֵלַת הַיֹּפִי, הֶעֱנִיקָה לָהּ מִיָּפְיָהּ וּמֵחִנָּה.

וַיִּקְרְאוּ לַנַּעֲרָה הַזֹּאת פַּנְדּוֹרָה, לֵאמר: הַמְּחוֹנֶנֶת מֵאֵת כֹּל, כִּי כָל־בֶּן־אַלְמוּת נָתַן לָהּ מַתָּנָה, אֲשֶׁר הָיֹה תִהְיֶה לְמַשְׁחִית לְמִשְׁפַּחַת בְּנֵי־הָאָדָם. כֵּן הוֹרִיד זוּז אֶת הָאֵיד¹⁰) עַל הָאָרֶץ בִּדְמוּת הַטוֹב וְהַיֹּפִי מְסַמֵּא הָעֵינַיִם…

וַתֵּרֶד פַּנְדּוֹרָה אַרְצָה וּבְיָדָהּ תֵּבָה מְלֵאָה מַתָּנוֹת, אֲשֶׁר הֶעֱנִיקוּ לָהּ שׁוֹכְנֵי שָׁמָיִם, וַיִּרְאוּ אוֹתָהּ בְּנֵי־תְמוּתָה וַיַּחְמְדוּ אֶת יָפְיָהּ. וְגַם בְּעֵינֵי־בְּנֵי־אֱלֹהִים, אֲשֶׁר הִתְרוֹעֲעוּ אֶל־בְּנֵי־הָאָדָם וַיִּתְהַלְּכוּ בְּקִרְבָּם, מָצְאָה חֵן. וַתְּצוֹדֵד פַּנְדּוֹרָה לְבָבוֹת וַיִּשְׁתּוֹמְמוּ כֻּלָּם לְיָפְיָהּ. וַתָּשֶׂם פַּנְדּוֹרָה פְעָמֶיהָ אֶל־בֵּית אֶפִּימֵת קַל־הַדַּעַת, אֲחִי־פְּרוֹמִית. וַיְקַדֵּם אֶפִּימֵת אֶת־פָּנֶיהָ בְּשִׂמְחָה. וַיָּעֶד בּוֹ אָחִיו לֵאמֹר: אַל־תָּבֵא לְבֵיתְךָ דָּבָר מִכָּל הַדְּבָרִים, אֲשֶׁר הַוֹרִיד זוּז, וְאַל־יְהִי לְמוֹקֵשׁ לִבְנֵי־הָאָדָם, כִּי כָלְתָה אֲלֵיהֶם הָרָעָה מֵאִתּוֹ. וְלֹא שָׁמַע אֶפִּימֵת בְּקוֹלוֹ וַיִּקַּח אֶת־הַנַּעֲרָה הַיָּפָה לְאִשָּׁה. וַתִּתְאַו נֶפֶשׁ פַּנְדּוֹרָה לִרְאוֹת אֶת־הַמַּתָּנוֹת, אֲשֶׁר נָתְנוּ לָהּ הָאֵלִים, וַתִּפְתַּח אֶת־הַתֵּבָה, וַיֵּצְאוּ מִתּוֹכָהּ חוֹצֵץ כָּל־פֶּגַע רַע וְכָל־תַּקָּלָה, כָּל מַצָּה¹¹) וּמְרִיבָה וְקִנְאָה וְשִׂנְאָה וַיִּתְחַבְּרוּ לִבְנֵי־הָאָדָם, אֲשֶׁר לֹא יָדְעוּ עַד־כֹּה דְּאָגָה וְיֵאוּשׁ, כִּי שָׁמְרוּ אֶת־מִצְוַת־פְּרוֹמִית מָגִנָּם. וַיְהִי כִּרְאוֹת פַּנְדּוֹרָה אֶת־הַשּׁוֹאָה, אֲשֶׁר הֵבִיאָה עַל־בְּנֵי הָאָדָם, בְּפָתְחָהּ אֶת־הַתֵּבָה, וַתִּפֹּל עָלֶיהָ אֵימָה חֲשֵׁכָה וַתְּמַהֵר וַתִּסְגֹר אוֹתָהּ. וְלֹא נִשְׁאַר עַל־קַרְקַע הַתֵּבָה מִכָּל הַמַּתָּנוֹת, אֲשֶׁר הֵבִיאָה פַּנְדּוֹרָה, בִּלְתִּי אִם הַתִּקְוָה, כִּי נִסְגְּרָה הַתֵּבָה, בְּטֶרֶם הִסְפִּיקָהּ לָצֵאת מִתּוֹכָהּ, וְלֹא יָכְלָה לָעוּף וְלָשׁוּב אוֹלִימְפָּה וַתֵּאָנֶס לָשֶׁבֶת בְּקֶרֶב בְּנֵי־הָאָדָם עַד־הַיּוֹם הַזֶּה…

וַתֵּצֵא מִשְׁלַחַת מַלְאֲכֵי זוּז הָרָעִים עַל־פְּנֵי־הָאֲדָמָה וַתַּחְדֹּר גַּם אֶל־תּוֹךְ־הָאֲוֵּר וְאֶל־מֵי־הַיָּם וַתָּחֵל הַמַּגֵּפָה: מַחֲלוֹת אִלְּמוֹת הִתְגַּנְּבוּ חֶרֶשׁ חֶרֶשׁ, כִּי מָנַע מֵהֶן זוּז אֶת הַקּוֹל, וַתִּתְגּוֹדֵדְנָה עַל־הָאֲדָמָה וַתְּסֻבֶּנָה דֹם אֶת בָּתֵּי־בְּנֵי־הָאָדָם וַתַּפֵּלְנָה בָּהֶם חֲלָלִים. הָאָדָם וְהַבְּהֵמָה הֻכּוּ בְּקַדָּחוֹת אַרְסִיוֹת וְהַמָּוֶת, אֲשֶׁר עַד־כֹּה אָרַב לְטַרְפּוֹ מֵרָחוֹק, מִהֵר לָבֹא כְּחֶתֶף¹²)…

– וּבְכָל־זֹאת, לֹא שָׁב אַף־זוּז וְעוֹד יָדוֹ נְטוּיָה, כִּי עוֹד לֹא נִקֵּם בִּפְרוֹמִית אוֹיְבוֹ. וַיִּמְסֹר אוֹתוֹ בִּידֵי הֵפֵסְט וַעֲבָדָיו קְרָט וּבִיָּה לֵאמֹר: הַשֹּׁד וְהֶחָמָס; וַיְצַו עֲלֵיהֶם לִסְחֹב אֶת־פְּרוֹמִית אֶל־עַרְבוֹת הַסְקִתִּים וּלְאָסְרֵהוּ אֶל־שֶׁן־סֶלַע בְּהַרְרֵי קַוְקַז, מֵעַל־לִתְהוֹם עֲמֻקָּה, לְאֵין־חֵקֶר וַיֵּצֶר לְהֵפֵסְט מְאֹד עַל־פְּרוֹמִית בֶּן־הָאֵיתָנִים כִּי נַפְשׁוֹ קְשׁוָּרה בְנַפְשׁוֹ וְכִי קָרוֹב הוּא לוֹ מִמִּשְׁפַּחַת אוּרָן אֲבִי־זְקֵנוֹ.

וִינַחֵם הֵפֵסְט אֶת־פְּרוֹמִית וַיְדַבֵּר עַל־לִבּוֹ דְבָרִים טוֹבִים, דְבָרִים נִחוּמִים, וַיִּתְלוֹנְנוּ עַבְדֵי הֵפֵסְט הָאַכְזָרִים עַל־אֲדוֹנֵיהֶם, וַיְמַהֲרוּ לָקַחַת אֶת־פְּרוֹמִית וּלְהוֹצִיא עָלָיו אֶת־מִשְׁפַּט־זוּז. וַיַּאַסְרוּהוּ בַּנְחֻשְׁתַּיִם חֲדָשִׁים אֶל הַחֲלָמִישׁ הַנּוֹרָא וַיְהִי יוֹצֵר הָאָדָם תָּלוּי עַל־פְּנֵי־הַתְּהוֹם הַשְּׁחוֹרָה וְלֹא יָכֹל לְהֵישִׁיר אֶת־בִּרְכּוֹ הָעֲיֵפָה וְאַף לֹא לִסְגֹּר אֶת־שְׁמוּרוֹת עֵינָיו…

וְהֵפֵסְט אָמַר: גָּדוֹל שִׁבְרְךָ כַּיָּם וְלִבִּי לְךָ יִזְעָק!.. צוּרִים יִשְׁמְעוּ אַנְחוֹתֶיךָ וְיִתְפּוֹרְרוּ, אַךְ לֹא זוּז יִנָחֵם וְלִבּוֹ, לֵב הָאֶבֶן, אֲשֶׁר לֹא יָדַע רַחֵם אֶת־אָבִיו, לֹא יִתְעוֹרֵר לְחֻמְלָה עָלֶיךָ.

וְאָמְנָם גָּדְלָה מְאֹד חֲמַת־זוּז עַל־פְּרוֹמִית וַיֹּאמֶר לְעָנְשֵׁהוּ עֹנֶשׁ עוֹלָם אוֹ עַד כְּלוֹת, לַמִּצְעָר, שְׁלֹשִׁים אֶלֶף שָׁנָה. וַיִּגְדְּלוּ יִסּוּרֵי־פְּרוֹמִית וַתִּקְרַעְנָה אַנְחוֹתָיו אֶת־לִבָּתוֹ. וַיָּעֶד עֵדִים בְּיִסּוּרָיו הָאֲיֻמִּים אֶת־הַסּוּפוֹת הַמְּהִירוּת וְאֶת־הַפְּלָגִים הַהוֹמִים, אֶת הָאָרֶץ, אֵם כָּל־חָי, וְאֶת־עֵין הַשֶּׁמֶשׁ הַצּוֹפָה כֹל. אֲבָל לִבּוֹ לֹא חַת בְּקִרְבּוֹ וְרוּחוֹ לֹא נָפְלָה עָלָיו. וַיֹּאמֶר בְּלִבּו: הָאֵל, אֲשֶׁר לִמַּד לָדַעַת אֶת־מֶמְשֶׁלֶת הַהֶכְרָח הַחֲזָקָה מִכָּל, עָלָיו לָשֵׂאת בְּאֹרֶךְ אַפַּיִם אֶת־מַשָּׂא גוֹרָלוֹ¹³).

וַתִּקְטַן עוֹד זֹאת בְּעֵינֵי זוּז וַיְצַו לַנֵּץ הַנּוֹרָא וַיֵּרֶד יוֹם־יוֹם עַל־אֲסִיר הַסֶּלַע וַיִקְרַע אֶת־בְּשָׂרוֹ בְּצִפָּרְנָיו וַיְפַלַּח כְּבֵדוֹ¹⁴) וַיֹאכְלֵהוּ; וְלַיְלָה לַיְלָה צָמַח כְּבֵדוֹ וְשָׁב לִהְיוֹת כְּשֶׁהָיָה. וְיִגְזֹר זוּז, כִּי לֹא יָבוֹא הַקֵּץ לְעִנּוּיֵי פְּרוֹמִית, עַד־אֲשֶׁר יָבֹא אִישׁ וּבִמְחִיר חַיָּיו יִגְאַל אוֹתוֹ מִצָּרוֹתָיו.

וַיְהִי מִקֵּץ שְׁלֹשִׁים שָׁנָה וַיַּעֲבֹר הֵרַקְלֶס עַל־יַד־הַסֶּלַע, אֲשֶׁר פְּרוֹמִית אָסוּר אֵלָיו, כִּי חָפֵץ הֵרַקְלֶס לִקְטֹף תַּפּוּחִים מִגַּן הַהֶסְפְּרִידוֹת¹⁵) וַיָבוֹא לִשְׁאֹל עֵצָה מִפִּי בֶן־הָאֵלִים, וַיִּשָּׂא הֵרַקְלֶס עֵינָיו וַיַּרְא אֶת־הָאֻמְלָל וְהִנֵּה הוּא אָסוּר בִּנְחֻשְׁתַּיִם כְּבֵדִים אֶל־שֶׁן־הַסֶּלַע וְנֵץ נוֹרָא רוֹבֵץ עָלָיו, קוֹרֵעַ אֶת־בְּשָׂרוֹ וְאוֹכֵל אֶת־כְּבֵדוֹ.

וַתִּצְלַח חֲמַת הַגִּבּוֹר עָלָיו וַיַּשְׁלֵךְ לָאָרֶץ אֶת־אַלָּתוֹ¹⁶) וְאֶת־עוֹר הָאֲרִי אֲשֶׁר הִתְעַטֵּף בּוֹ, וַיִּדְרֹךְ קַשְׁתּוֹ אֵיתָן, וַיִּיר חֵץ לֹא־יַחֲטִיא וַיַּפֵּל אֶת־הָעוֹף הָאַכְזָרִי אֶל־מַעֲמַקֵּי תְהוֹם. וַיִּגַּשׁ אֶל־פְּרוֹמִית וַיֹּאחַז בִּנְחֻשְׁתָּיו וַיִמְשְכֵם בְּכֹחַ וַיְשַׁבְּרֵם וַיּוֹצִיאֵהוּ לַחָפְשִׁי.

וּלְמַעַן הָקִים אֶת־גְּזֵרַת זוּז, אָמַר חִירָן הַקֵינְטוֹר¹⁷) לְהֵאָסֵר תַּחַת פְּרוֹמִית וְלָתֵת גַּם אֶת־נַפְשׁוֹ כָּפְרוֹ. וְיַעַן כִּי בֶן־הָאֵיתָנִים נֶעֱנַש לְהֵאָסֵר אֶל־הַסֶּלַע מַאֲסַר עוֹלָם, יָצַק פְּרוֹמִית טַבַּעַת בַּרְזֶל וַיָּשֶׂם בְּתוֹכָה צְרוֹר אֶבֶן וַיִּשָׂאֶהָ תָמִיד עַל־אֶצְבָּעוֹ…

כָּכָה יָצָא פְּרוֹמִית לַחָפְשִׁי וְגַם גְּזֵרַת זוּז לֹא הוּפָרָה וַיִּמְצָא אֶת־לְבָבוֹ לְהִתְפָּאֵר, כִי רִתַּק אֶת אוֹיְבוֹ אֶל־הַסֶּלַע לְנֵצַח נְצָחִים…

ב.

 

דּוֹרוֹת רִאשׁוֹנִים.    🔗

וַיְהִי כַּאֲשֶׁר כָּלְתָה מְלֶאכֶת הַשָּׁמַיִם וְהָאָרֶץ, וַיֹּאמְרוּ שׁוֹכְנֵי־מָרוֹם אִישׁ אֶל־רֵעֵהוּ:

“נַעֲשֶׂה אָדָם וְיִרְדּוּ בִּדְגַת הַיָּם וּבְעוֹף הַשָּׁמַיִם וּבְכָל־הָרֶמֶשׂ הַרוֹמֵשׂ עַל הָאָרֶץ”. וְיַעֲשׂוּ אֶת־הָאָדָם זָהָב טָהוֹר. וּקְרוֹן¹⁸) מוֹשֵׁל אָז בִּשְׁמֵי רוֹם. וַיִּדְמוּ בְּנֵי־הָאָדָם בְּצִבְיוֹנָם וּבְמַרְאֵה־פְנֵיהֶם וּבְדַרְכֵי־חַיֵּיהֶם לִבְנֵי אוֹלִימְפּוֹס. וַיִּהְיוּ חָפְשִׁים מֵעֹל־הָעֲבוֹדָה, כָּל־מַחֲלָה וּמוּם לֹא הָיוּ בָהֶם וְאֶת־צַעַר הַזִּקְנָה הַמְּנַוֶּלֶת לֹא יָדָעוּ. וַיִּהְיוּ תָמִיד צְעִירִים וּמְלֵאִים כֹּח עֲלוּמִים וַיְהִי גֵוָם חָסֹן וּפְנֵיהֶם צוֹהֲלִים מִשִּׂמְחָה. וַיִּתְעַנְּגוּ עַל־חַיֵּיהֶם וַיִּרְבּוּ לִשְׁתּוֹת מִכּוֹס־הָאֹשֶר.

וַיִּמְצְאוּ בְּנֵי־הָאָדָם חֵן בְּעֵינֵי־הָאֵלִים וַיְבָרְכוּם בְּכָל־טוֹב. וַיִּרְבּוּ עֶדְרֵיהֶם וַיִּרְעוּ בְּמֶרְחֲבֵי־כָרִים וְהָאֲדָמָה, אֲשֶׁר לֹא נֶחְרְשָׁה וְלֹא נִזְרְעָה, נָתְנָה יְבוּל רָב. וַתִּרֶב הַדָּגָה בַּיַמִּים וְהַחַיָה וְהָעוֹף רַבּוּ בָּאָרֶץ.

וַיַּאֲרִיכוּ בְּנֵי־הַדּוֹר הַהוּא יָמִים רַבִּים עַל־פְּנֵי־הָאֲדָמָה, וְכַאֲשֶׁר מָלְאוּ יְמֵיהֶם, שָׁקְעוּ בְּשֵׁנָה נְעִימָה וַיֵּהָפְכוּ לְרוּחוֹת־נֵצַח טוֹבוֹת וּמְלֵאוֹת חֶסֶד, וְהָרוּחוֹת הָאֵלֶה תְּרַחֵפְנָה תָמִיד עֲטוּפוֹת־עֲרָפֶל וְהִשְׁפִּיעוּ רַב־טוּב וְדָרְשׁוּ מִשְׁפָּט וְרָבוּ אֶת רִיב־הַחַלָּשׁ מִיַּד הֶחָזָק מִמֶּנּוּ. וְאַחַר קָם דּוֹר חָדָש בָּאָרֶץ, אֲשֶׁר בְּנֵי אַלְמוּת עָשׂוּ אוֹתוֹ כֶּסֶף. וַיִּבָּדְלוּ בְּנֵי־הַדּוֹר הַזֶּה גַּם בְּמִבְנֵה־גֵוָם גַּם בְּיֵצֶר לְבָבָם מִבְּנֵי־הַדּוֹר אֲשֶׁר הָיָה לְפָנָיו. וַיִּוָּלְדוּ לָהֶם יְלָדִים רְפֵי כֹחַ וַיִּהְיוּ רַכִּים וַעֲנֻגִּים וַיֵּשְׁבוּ מְאַת־שָׁנָה בְּבָתֵּי אֲבוֹתֵיהֶם תַּחַת יַד־אִמָּם וְאוֹמְנוֹתֵיהֶם, וְכַאֲשֶׁר גָּדְלוּ וַיִּהְיוּ לַאֲנָשִׁים – וַיָּבֹא הַמָּוֶת וַיִּקְטְפֵם לָנֶצַח.

וּבְנֵי־הַדּוֹר הַזֶּה הִשְׁחִיתוּ אֶת־דַּרְכָּם, וַיֶחֶטְאוּ אִיש לְרֵעֵהוּ וַתִּמָּלֵא הָאָרֶץ חָמָס. וַיְהִי הַמְּעַט מֵהֶם, כִּי הֵרֵעוּ אִיש לְאָחִיו, וַיִּנְאֲצוּ עוֹד אֶת־הָאֵלִים וַיִּמְנְעוּ מֵהֶם מִנְחָה וְעוֹלָה. וַיִּקְצֹף עֲלֵיהֶם אֲדוֹן־הָרָקִיעַ וַיִּמְחֵם מֵעַל־פְּנֵי־הָאֲדָמָה, כִּי קָצְרָה רוּחוֹ לִרְאוֹת אֶת־בְּנֵי הָאָדָם מוֹנְעִים מֵאֵת הָאֵלִים אֶת־הַכָּבוֹד אֲשֶׁר לָהֶם. וַיְהִי כִּי נִמְצְאוּ בִּבְנֵי־הַדּוֹר גַּם דְּבָרִים טוֹבִים וַיִּתְגַּלְגְּלוּ לְדֵימוֹנִים¹⁹ בְּנֵי־תְמוּתָה וַיְרַחֲפוּ עַל־פְּנֵי־הָאֲדָמָה.

וְזוּז אֲדוֹן־הַשָּׁמַיִם הֶחָדָש יָצַר אֶת־דּוֹר הָאָדָם הַשְּׁלִישִׁי וַיַּעֲשֵׂהוּ נְחֹשֶׁת קָלָל²⁰. וַיָּרֵעוּ לַעֲשׂוֹת גַּם מִבְּנֵי־דּוֹר־הַכֶּסֶף וַיִּחְיוּ רַק עַל חַרְבָּם וַיְהִי מְשׂוֹשׂ גִּילָם לַעֲשׂוֹת רָעָה אִישׁ לְרֵעֵהוּ וַיִּשְׁפְּכוּ דָם לָרֹב וְהָאָרֶץ לֹא שָׁקְטָה מִמִּלְחָמָה.

וַיִּמְאֲסוּ הֶעָרִיצִים הָאֵלֶה בִּיבוּל הָאֲדָמָה וַיֹּאכְלוּ אֶת־בְּשַׂר הַחַיָּה. וַיִּהְיוּ גְדוֹלִים וְרָמִים כַּעֲנָקִים וַיִּרֶב כֹּחָם וְלֹא יָדְעוּ רַחֵם. וַיַּעֲשׂוּ לָהֶם אֶת־כְּלֵי־זֵינָם נְחֹשֶת וַיִּבְנוּ אֶת־בָּתֵּיהֶם נְחֹשֶת, וְאֶת־כָּל־כְּלֵיהֶם עָשׂוּ נְחֹשֶת, כִּי הַבַּרְזֶל טֶרֶם יִהְיֶה בָאָרֶץ.

אוּלָם גַּם יוֹמָם בָּא. וּבְכָל עָצְמַת כֹּחָם לּא יָכְלוּ לַעֲמֹד בִּפְנֵי הַמָּוֶת וַיֵאָנְסוּ לְהִפָּרֵד מֵאוֹר הַשֶּׁמֶש וַיֵּרְדוּ אֶל מַחֲשַׁכֵּי־שְׁאוֹל, מְעוֹן הַצְּלָלִים.

וְכַאֲשֶׁר נִכְחֲדוּ גַם אֵלֶּה מִן־הָאָרֶץ, יָצַר זוּז דוֹר רְבִיעִי. וַיִּהְיוּ בְּנֵי־הַדוֹר הַזֶּה יִשְׁרֵי־לֵב וְצֶדֶק יָלִין בָּם וַיּוֹלִידוּ נְפִילִים וְגִבּוֹרִים, וּלְפָנִים קָרְאוּ לָהֶם בְּנֵי־אֵלִים.

אוּלָם גַּם בֵּינֵיהֶם פָּרְצוּ מְדָנִים וּמִלְחָמוֹת, וַיָּמוּתוּ רַבִּים מֵהֶם לִפְנֵי־חוֹמוֹת תֵּבָה ²¹ וְשִׁבְעַת שְׁעָרֶיהָ בְּהִלָּחֲמָם עַל מַמְלֶכֶת אֵדִיפּ, וְרַבִּים נָפְלוּ חֲלָלִים עַל שְׂדוֹת טְרוֹיָה ²² אֲשֶׁר בָּאוּ שָׁמָה בְּצִיִּים מְהִירִים עַל דְבַר הֵלֵנָה הַיָּפָה.

וַיָּסוּפוּ בְּנֵי־הַדּוֹר הַהוּא בַּמִּלְחָמוֹת הַקָּשׁוֹת הָאֵלֶּה, וַיִּתֵּן לָהֶם אֲדוֹן הַשָּׁמַיִם מוֹשָׁבוֹת חֲדָשִׁים בִּקְצוֹת תֵּבֵל אֶת־הָאִיִים הַמְּאֻשָּרִים, אֲשֶׁר בְּלֶב־יָם אֵין־סוֹף. שָׁם יִתְעַנְּגוּ עַל רֹב טוּב מִבְּלִי־דַעַת כָּל־דְּאָגָה; שָׁלֹש פְּעָמִים בְּשָׁנָה תּוֹצִיא שָׁם הָאָרֶץ אֶת־יְבוּלָהּ, וְרַק אוֹרָה וְשִׂמְחָה, שִׁירָה וְרִנָּה מְנָת גּוֹרָלָם.

וַיְהִי כִּי נִפְקְדָה פְקוּדַת כָּל־בָּשָׂר עַל־בְּנֵי־הַדּוֹר הַזֶּה וַיָּבֹא אַחֲרָיו דּוֹר חָדָשׁ, דּוֹר־בַּרְזֶל. וַיְהִי דוֹר־הַבַּרְזֶל דּוֹר עִקֵּש וּפְתַלְתֹּל, דוֹר אָבִיו יְקַלֵּל וְאֶת־אִמּוֹ לֹא יְבָרֵךְ.

וְהֶזְיוֹד הַמְשׁוֹרֵר, בֶּן־הַדּוֹר הַהוּא, קִלֵּל אֶת־יוֹמוֹ וַיִּקְרָא בְּמַר־נַפְשׁוֹ: “אוֹי לִי, כִי בֵן אֲנִי לְדוֹר רַע־מַעֲלָלִים! לָמָּה לֹא מֵרֶחֶם אָמוּת! מַדּוּעַ מִהַרְתִּי לִרְאוֹת אוֹר”.

וַיְהִי הַמְּעַט מֵהֶם, כִּי לֹא כִבְּדוּ אֶת אֲבוֹתֵיהֶם, וַיִּקְרְאוּ מִלְחָמוֹת אִישׁ עַל רֵעֵהוּ וַיִּשְׁפְּכוּ דָם וַיָשִׂימוּ עָרִים לְשַׁמָּה. וַתִּרֶב קִנְאַת אִישׁ בְּרֵעֵהוּ, וַיִּשְׂמַח אִישׁ לְאֵיד אָחִיו וַיִּמָּלְאוּ הַלְּבָבוֹת שִׂנְאָה.

וַתִּרְאֶינָה הַגְּבִירוֹת הַיָּפוֹת, אֵלוֹת הַחֶסֶד וְהַכָּבוֹד, אֶת־מַעֲשֵׂי הָאָדָם הָרָעִים וַתָּשֵׂמְנָה צְעִיפִים לְבָנִים עַל פְּנֵיהֶן וַתַּעֲזֹבְנָה אֶת־בְּנֵי־הָאָדָם וַתָּשֹׁבְנָה עֲצוּבוֹת וּמְלֵאוֹת יָגוֹן אֶל־מְעוֹן אֵלֵי נֵצַח. וַיִּשָּׁאֵר רַק הָאָסוֹן בָּאָרֶץ וְאֵין מִיָּדוֹ מַצִּיל…

ג.

 

הַמַּבּוּל.    🔗

וַיְהִי כַּאֲשֶׁר הִשְׁחִיתוּ בְּנֵי דוֹר־הַנְּחֹשֶת אֶת־דַּרְכָּם עַל־הָאָרֶץ וַתַּעַל צַעֲקָתָם אֶל־זוּז הַשָּׁמָיְמָה. וַיּוּעָמוּ פְנֵי זוּז וַיֹּאמַר: אֵרְדָה־נָא וְאֶרְאֶה, הַכְּצַעֲקָתָהּ הַבָּאָה אֵלַי עָשׂוּ? וַיֵּהָפֵךְ לְבֶן־אָדָם וַיֵּרֶד אָרְצָה. וְהִנֵּה לֹא הֻגַּד לוֹ אַף הַחֵצִי.

וַיְהִי כַּאֲשֶׁר רַד הַיּוֹם וַיַּעֲמֹד עַל־יַד פֶּתַח בֵּית־לִקְיוֹן מֶלֶךְ אַרְקַדְיָּה. וְלִקְיוֹן אִישׁ קָשֶׁה וְרַע־מַעֲלָלִים וְאוֹרֵחַ לֹא יִדְרֹךְ עַל מִפְתַּן בֵּיתוֹ. וַיַכִּירוּ עַבְדֵי הַמֶלֶך אֶת הָאוֹרֵחַ וַיֵּדְעוּ, כִּי אֵל הוּא, כִּי לֹא הִתְנַכֵּר זוּז וְלֹא הֶעֱלִים מֵאִישׁ אֶת־מוֹצָאוֹ. וַיִּפְּלוּ כֻלָּם עַל־פְּנֵיהֶם. וַיִּלְעַג לָהֶם לִקְיוֹן וַיֹּאמַר: הָאֶחָד בָּא לָלוּן וַיְהִי לָכֶם לְאֵל? אִם אֵל הוּא, יַרְאֶה־נָא אֶת־אֵלוּתו.

וַיִּתְנַכֵּל לִקְיוֹן לְהָמִית אֶת־הָאוֹרֵחַ בַּלַּיְלָה, כַּאֲשֶׁר תִּסְגֹּר הַשֵּׁנָה אֶת־שְׁמוּרוֹת עֵינָיו. וַיֵּלֶךְ וַיִּקַּח אֶת־בֶּן־הַתַּעֲרוּבוֹת, ²³ אֲשֶׁר נָתְנוּ לוֹ הַמּוּלוּסִים ²⁴ וַיַּעַקְדֵהוּ. וַיָּרָץ וַיִּקַח אֶת־הַמַּאֲכֶלֶת וַיִּשְׁחָטֵהוּ וַיְנַתְּחֵהוּ לְאַרְבָּעָה נְתָחִים וַיִּצֶל אֶת־הַנְתָחִים הַמְּפַרְפְּרִים עַל־הָאֵשׁ וַיְבַשֵּׁל בַּפָּרוּר וַיָּבֵא וַיָּשֶׂם לִפְנֵי־הָאוֹרֵחַ.

וַיַּרְא זוּז אֶת־הַשַּׁעֲרוּרִיָה הַזֹּאת וַיֶּעֱשַׁן אַפּוֹ. וַיִּקְפֹּץ מִמְּקוֹמוֹ וַיַּרְעֵם בִּרְעָמָיו עַל־עִיר הַמַּמְלֶכֶת הָרְשָׁעָה וַתִּבְעַר בָּאֵשׁ. וּפַחַד גָּדוֹל נָפַל עַל־לִקְיוֹן וַיְמַהֵר וַיֵּחָפֵז וַיָּנָס הַשָּׂדֶה. וַיֵּהָפֵךְ קוֹלוֹ לִילֵיל נוֹרָא וַיִּהְיוּ בְגָדָיו לְשֵׂעָר מְדֻבְלָל²⁵ וּכְתֵפָיו לְכַפּוֹת שְׂעִירוֹת. וַתַּהַפְּכֵנוּ יְמִין הָאֵל הָעוֹנֶשֶׁת לִזְאֵב טוֹרֵף טָרֶף.

וַיַּעַל אֲדוֹן הָעוֹלָם עַל־מְרוֹם אֹולִימְפּוֹס וַיִּקְרָא לְכָל־אֵלֵי־נֶצַח וַיַּמְתִּיקוּ סוֹד. וַיְהִי כַאֲשֶׁר רָאוּ, כִּי רַבָּה רָעַת־בְּנֵי־הָאָדָם מְאֹד, וַיַּחְרְצוּ עֲלֵיהֶם מִשְׁפַּט כִּלְיוֹן. וַיֹּאמֶר זוּז לְהַרְעִים עֲלֵיהֶם בְּרַעֲמוֹ וּלְהַמְטִיר אֵשׁ וְגָפְרִית עַל־הֶעָרִים וְיוֹשְׁבֵיהֶן וְלִמְחוֹת אֶת־הָאָדָם מֵעַל־פְּנֵי־הָאֲדָמָה. וַיִּקַח אֶת־חֵץ הָרַעַם, אֲשֶׁר לָטְשׁוּ הַצִּיקְלֹפִּים, וַיֹּאמֶר לִירוֹתוֹ. אֲבָל אַחֲרֵי רֶגַע הִתְעַשֵׁת זוּז וַיִּנָּחֵם עַל־מַחְשַׁבְתּוֹ זֹאת, כִּי יָרֵא, פֶּן תַּצִית הָאֵשׁ גַּם אֶת־עֶתֶר ²⁶ הַשָּׁמַיִם וְהָפְכָה לְאֵפֶר אֶת־קֹטֶב הָעוֹלָם.

וַיִּפְתַּח זוּז אֶת־אֲרֻבּוֹת הַשָּׁמַיִם וַיָּבֵא מַבּוּל עַל־הָאָרֶץ. וַיְמַהֵר אֵאוֹל – אֵל הָרוּחוֹת – וַיֶאֱסֹר אֶת־הַצְּפוֹנִי ²⁷ וְאֶת־כָּל־רוּחוֹת הַסְּעָרָה הַמְּפַזְּרוֹת בְּנִשְׁמַת אַפָּן אֶת־הָעֲנָנִים וַיִּכְלָאֵם בִּמְעָרָה לֹא עָדָה ²⁸ שָׁם אִישׁ, וְלֹא נִשְׁאַר חָפְשִׁי בִּלְתִּי אִם הַדְּרוֹמִי. וַיִּפְרֹשׂ אֶת־כְּנָפָיו וַיָּעָף וַיֵּרֶד אָרְצָה, וַיְכַס עֲרָפֶל אֶת־פָּנָיו הָאֲיֻמִּים וַיֵּעָרְמוּ עָבִים כְּבֵדִים בִּזְקָנוֹ וְעַל־מִצְחוֹ שָׁכְנוּ עֲנָנִים וְזִרְמֵי מַיִם יָרְדוּ מִשְּׂעָרוֹ הַלָּבָן וְהָאָרֹךְ. וַיְהִי הַמְּעַט מִמֶּנּוּ וַיִּשְׁלַח אֶת־כַּפּוֹת יָדָיו הָעֲנָקִיוֹת אֶל־כִּפַּת הַשָּׁמַיִם וַיִּקַח אֶת־עַנְנֵי הָעֲרָפֶל הַתְּלוּיִם וַיִּמֶץ אוֹתָם בְּכֹחַ. וַיִּשְטְפוּ הַמַּיִם וַיֶּהֱמוּ בְּקוֹל נוֹרָא כְּקוֹל הָרַעַם וַיַּשְׁחִיתוּ אֶת־כָּל יְבוּל הָאֲדָמָה, וְתִקְוַת הָאִכָּר נִכְזָבָה. וַחֲמַת זוּז עוֹד לֹא שָׁכָכָה וַיִּקְרָא לְפּוֹסִידוֹן אָחִיו, שַׂר הַמָּיִם. וַיָּבֹא פּוֹסִידוֹן לְכַלּוֹת אֶת־מַעֲשֵׂה הֶהָרֶס. וַיַּקְהֵל אֶת־כָּל־רוּחוֹת־הַנְּהָרִים וְהַפְּלָגִים וַיֹּאמֶר אֲלֵיהֶם: הוֹצִיאוּ אֶת־כָּל־הַמַּיִם לַחָפְשִׁי וְהָרְסוּ אֶת־כָּל־הַבָּתִּים וְכָל שֶׂכֶר²⁹ יְשַׁבֵּרוּ.

וַיַּעֲשׂוּ הָרוּחוֹת כִּדְבַר־אֲדוֹנֵיהֶם וַיֹּאחַז פּוֹסִידוֹן בִּשְׁלֹש קִלְשׁוֹנוֹ וַיַּךְ עַל־חֵיק־הָאֲדָמָה אַחַת וּשְׁתַּיִם וַיְפַרְפְּרֶנָּה וַיְפַצְפְּצֶנָּה וַיַּתֵּר אֶת־הַמַּיִם מִמוֹסְרוֹתֵיהֶם.

וַיּבָּקְעוּ מַעְיְנוֹת תְּהוֹם רַבָּה וַיֵּצְאוּ הַמַּיִם וַיְּשְׁטְפוּ שָׂדוֹת וּכְרָמִים, וַיְשָׁרְשׁוּ אֶת־הָעֵצִים וַיַּפִּילוּ אֶת־מִקְדְּשֵׁי הָאֵלִים וַיַּהַרְסוּ אֶת־הַבָּתִּים, וַיּוּסְרוּ גְבוּלוֹת יַבָּשָׁה וָיָם וְלֹא יָדְעוּ הַמַּיִם חֹק וַיֵּהָפְכוּ לִתְהוֹמוֹת עֲמֻקּוֹת לְאֵין חֵקֶר.

וַיְבַקְּשׁוּ הָאֲנָשִׁים מָנוֹס לָהֶם בַּאֲשֶׁר יָכֹלוּ. יֵשׁ אֲשֶׁר בָּאוּ בִּנְקִיקֵי הַסְּלָעִים וְיֵשׁ אֲשֶׁר בָּנוּ לָהֶם אֳנִיּוֹת וַיֵּשְׁבוּ בָּהֶַן. וַתִּנָּשֶׂאנָה הָאֳנִיּוֹת עַל־פְּנֵי־הַמַּיִם וַתִּתְנַגֵּפְנָה בְגַגֵּי הַבָּתִּים וַתִּסְתַּבֵּכְנָה בִּגְפַנֵּי הַכְּרָמִים הַנְּטוּעִים עַל־מַדְרֵגוֹת הֶהָרִים, וַיָּמוּתוּ הַדָּגִים בְּרָאשֵׁי הָעֵצִים אֲשֶׁר בַּיָּעַר וְלֹא נִמְלַט הַצְּבִי קַל הָרַגְלַיִם וְגַם הַחַיָּה הַטּוֹרֶפֶת נֶאֱסָפָה.

וַיִּמַח הַמַּבּוּל אֶת־כָּל־הַיְקוּם, וַאֲשֶׁר לֹא מֵת מִמֵּי־הַמַּבּוּל גָּוַע בָּרָעָב עַל־כֵּיפֵי הַסְּלָעִים הַקֵּרְחִים. רַק שְׁנֵי רָאשֵׁי הַר פַּרְנַס עוֹד נִרְאוּ מִמֶּרְחֲבֵי יָם אֵין־סוֹף. אֶל־הָהָר הַזֶּה בָּאָה סִירָה, אֲשֶׁר יָשְׁבוּ בָהּ דֵקַלְיוֹן, בֶּן־פְּרוֹמִית וְאִשְׁתּוֹ פִּירָה, כִּי הִגִּיד לוֹ פְּרוֹמִית בְּעוֹד מוֹעֵד עַל־דְּבַר בּוֹא הַמַּבּוּל וְגַם סִירָה נָתַן לוֹ לְהַצִּיל אֶת־נַפְשׁוֹ. וְדֵקַלְיוֹן תָּם וְיָשָׁר, מְכַבֵּד אֶת־הָאֵלִים וּמַכְנִיס אוֹרְחִים.

וַיַּשְׁקֵף זוּז מִן הַשָּׁמַים עַל־פְּנֵי־הָאֲדָמָה וַיַּרְא אֶת־הַסִּירָה הַקְּטַנָּה הַנִּשֵׂאת עַל־פְּנֵי־גַלֵּי הַמַּיִם הַסּוֹאֲנִים. וַיִּכָּמְרוּ רַחֲמָיו עַל־דֵקַלְיוֹן הַצַּדִיק וְעַל אִשְׁתּוֹ וַיִּתֵּן אוֹת וַתִּקָּרַע יְרִיעַת הָעֲרָפֶל הַשְּׁחוֹרָה. וַיֵּצֵא הַצְּפוֹנִי וַיְפַזֵּר אֶת־הֶעָבִים הַכְּבֵדִים וַיַּשְׁקִיפוּ הַשָּׁמַיִם אֶל־פְּנֵי־הָאָרֶץ, וְהָאָרֶץ אֶל־פְּנֵי־הַשָּׁמָיִם.

וַיַּשְׁלֵךְ גַּם פּוֹסִידוֹן אֶת־קִלְשׁוֹנוֹ מִתּוֹךְ זְרוֹעַ עֻזּוֹ וַיָּשֹׁכּוּ הַמָּיִם, וְיַּעֲמֹד הַיָּם מִזַּעֲפוֹ וּמֵי הַנְּהָרוֹת הָלְכוּ כִּתְמוּל שִׁלְשׁוֹם בְּאֲפִיקֵיהֶם. וַיֵּרָאוּ רָאשֵׁי הֶהָרִים וְכֵיפֵי הַסְּלָעִים וַתִּבְלַטְנָה צַמְרוֹת ³⁰ הַעֵצִים. וַיַּחְסְרוּ הַמַּיִם הָלֹךְ וְחָסֹר וַתִּיבַש הָאֲדָמָה.

וַיַּבֵּט דֵקַלְיוֹן מִסָּבִיב וְהִנֵּה מִדְבַּר שְׁמָמָה וְדִמְמַת קָבֶר. וַיֵּבְךּ דֵקַלְיוֹן וַיֹּאמֶר לְאִשְׁתּוֹ:

חֲבֶרְתִּי הַיְקָרָה וְאֵשֶׁת בְּרִיתִי! הִנֵּה רַק שְׁנֵינוּ נִשְׁאַרְנוּ מִמֵי הַמַּבּוּל וּפְרוֹמִית אָבִי לֹא לִמַּד אוֹתִי בְּדִבְרֵי הָאֵלָה דָבָר, אֲשֶׁר יְחַלֵּל אֶת־כְּבוֹד הַמֵּתִים. הֲלֹא אִמֵּנוּ הִיא הָאֲדָמָה וְהָאֲבָנִים הֵן עַצְמוֹתֶיהָ. וְעַתָּה נִקְּחָה־נָא אֲבָנִים וְנַשְׁלִיכָה לְאֲחוֹרֵינוֹ כִּדְבַר־הָאֵלָה.

וַיֵּלְכוּ אֶל־מוֹרַד הָהָר וַיַּעַטְפוּ אֶת־רָאשֵׁיהֶם בִּצְעִיפִים וַיְפַתְּחוּ אֶת־חֲגוֹרוֹתֵיהֶם וַיַּשְׁלִיכוּ אֲבָנִים לְאֲחוֹרֵיהֶן, כַּאֲשֶׁר צֻוּוּ. וַיָּסַר מֵעֲלֵיהֶן אָטְמָן³¹ וְאַבְנוּתָן לֹא הָיְתָה לָהֶן עוֹד. וַתֵּלַכְנָה הָלֹך וְגָדֹל וַתֵּהָפַכְנָה לִשְׁלָדִים ³² וְהֶעָפָר וְהַטַּחַב³³ אֲשֶׁר דָּבְקוּ בָּאֲבָנִים נֶהֱפְכוּ לְבָשָׁר וָדָם, וַיְהִי בִּזְרֹק דֵּקַלְיוֹן אֶבֶן וַתֵּהָפֵךְ לְאִישׁ, וְהָאֶבֶן אֲשֶׁר זָרְקָה פִּירָה הָיְתָה לְאִשָּׁה. וַיִּהְיוּ הָאֲנָשִׁים, אֲשֶׁר נוֹצְרוּ כָּכָה, אוֹהֲבֵי עֲבוֹדָה, אֲשֶׁר לֹא יִסּוֹגוּ אָחוֹר מִפְּנֵי־כֹל וַיִּהְיוּ קָשִׁים כַּצּוּר מִמֶּנוּ חֻצָּבוּ…

ד.

 

פָיֵטוֹן    🔗

עַל־עֲמוּדֵי פְאֵר הִתְנוֹסֵס אַרְמוֹן נִשְׂגָּב וּמַזְהִיר, אַרְמוֹן הֵלִי³⁴) הָאֵל מוֹשֵׁל הַיּוֹם. קִירוֹתָיו הָרָמִים וְהַנִּשָּׂאִים מְצֻפִּים זָהָב סָגוּר³⁵) וְאַבְנֵי־חֵן אֲדֻמּוֹת כַּדָם; רָאשֵׁי מִגְדָּלָיו חֻטְּבוּ שֵׁן³⁶), וְעַל־דַּלְתוֹתָיו, דַּלְתוֹת כֶּסֶף טָהוֹר, נֶחְרְתוּ בִּכְתַב נִפְלָא שִׂיחוֹת עַתִּיקוֹת וּשְׁמוּעוֹת מִנִּי־קָדַם.

וַיְהִי הַיּוֹם וַיַּעֲמֹד עַל־מִפְתַּן הָאַרְמוֹן פָיֵטון בֶּן־הֵלִי וַיַּחְפֹּץ לִרְאוֹת אֶת־פְּנֵי אָבִיו. וְלֹא מִהֵר פָיֵטוֹן לָגֶשֶׁת אֵלָיו, כִּי קָרַן עוֹר פְּנֵי־הֵלִי וַיִּבָּצֵר מֵעֵינֵי־אִישׁ לְהַבִּיט עֲלֵיהֶם.

וְהֵלִי יוֹשֵׁב עַל־כִּסֵּא מַלְכוּתוֹ עָטוּי אַרְגָּמָן, וְהַכִּסֵא מְשֻׁבָּץ לֶשֶׁם³⁷ , שְׁבוֹ ³⁸ וּבָרֶקֶת³⁹ וְכָל־אֶבֶן יְקָרָה. וּמִימִין הֵלִי וּמִשְּׁמֹאלוֹ כָּל־שָׂרָיו וַעֲבָדָיו הֲלֹא הֵם: יוֹם וָלַיְלָה, שָׁנָה, דּוֹר וְהוֹרוֹת־אֵלוֹת הַזְּמַן. וַיָּבֹאוּ גַּם הָאָבִיב בַּעֲדִי־פְרָחָיו, גַּם הַקַּיִץ בַּעֲטֶרֶת שִׁבֳּלָיו; וַיָּבֹא גַּם הַבָּצִיר וְיָדָיו מְלֵאוֹת מַתָּנוֹת־עִנְבֵי־גֶפֶן בְּשֵׁלִים; וַיָּבֹא גַם הַחֹרֶף הַזּוֹעֵם וּשְׂעָרוֹ לָבָן כַּשָּׁלֶג.

וַיַּרְא הֵלִי, יוֹדֵעַ כֹּל, אֶת־בְּנוֹ עוֹמֵד מֵרָחוֹק בְּיִרְאַת־כָּבוֹד וַיְדַבֵּר אֵלָיו רַכּוֹת וַיִּשְׁאָלֵהוּ:

– מַה־חֶפְצְךָ, בְּנִי, בְּחַצְרוֹת קֹדֶשׁ אֵלֶּה? וּמָה־בַּקָּשָׁתְךָ וְתֵעָשׂ?

– אָנָּא, אָבִי וְאֵלִי, – עָנָה פָיֵטוֹן – הִנֵּה שׁוֹכְנֵי־אֶרֶץ לוֹעֲגִים לִי וּמַשִּׂיאִים חֶרְפָּה עַל־אִמִּי, קְלִימֵנָה, בְּדַבְּרָם בְּאָזְנַי לֵאמֹר: "לֹא מִגֶּזַע אֵלִים אָתָּה, כִּי אִם בֵּן לְעֶבֶד נִקְלֶה; וְעַתָּה, אָבִי, הַגְדִּילָה־נָא חַסְדְךָ עִם עַבְדְּךָ בִּנְךָ וְתֵן אוֹת וְרָאוּ כָל־בָּאֵי־תֵבֵל וְיָדְעוּ כִּי אַתָּה אָבִי מוֹלִידִי.

– אֱמֶת דִבְּרָה אִמְּךָ קְלִימֵנָה! בְּנִי אַתָּה, יוֹצֵא חֲלָצָי! וְעַתָּה, בְנִי, שְׁאַל, מָה הָאוֹת אֲשֶׁר אֶתֵּן־לָךְ, לְמַעַן תָּסִיר שֶׂפֶק מִלִּבֶּךָ, וּבְמֵי סְטִיקְסְ ⁴⁰ נְהַר דּוּמָה, נִשְׁבַּעְתִּי, כִּי אֶת־דְּבָרִי אֲקַיֵּמָה.

עוֹד הוּא מְדַבֵּר וְהָעֶלֶם קְצַר־הָרוּחַ כָּרַע עַל־בִּרְכָּיו וְיִתְחַנֵּן לֵאמֹר:

– אִם יֵשׁ אֶת־נַפְשְׁךָ לַעֲשׂוֹת אֶת־בַּקָּשָׁתִי וְנָתַתָּ עַל־יָדִי אֶת־מֶרְכַּבְתְּךָ בַּעֲלַת־הַכְּנָפַיִם וְנָהַגְתִּי בָהּ הַיּוֹם הַזֶּה.

וַיּוּעֲמוּ פְּנֵי־הָאֵל וַיֵּצֶר לוֹ מְאֹד וּבִדְאָגָה הֵנִיעַ בְּרֹאשׁוֹ הַקּוֹרֵן וַיֹּאמַר:

– אָרוּר הָרֶגַע, אֲשֶׁר נֶחְפַּזְתִּי בּוֹ לְהוֹצִיא מִפִּי אֶת דְּבָרִי! מִי יִתֵּן, בְּנִי וְשַׁבְתָּ מִמַּחְשַׁבְתְּךָ הַנִּמְהָרָה, כִּי לֹא תִּהְיֶה תִפְאַרְתְּךָ עַל הַדֶּרֶךְ הַזֶּה: לֹא לִבְנֵי חֲלוֹף, בְּנִי, לֹא לִבְנֵי חֲלוֹף, לִנְהַג בְּמֶרְכַּבְתִּי. וְגַם הָאֵלִים מִי מֵהֶם יִמְלָאֶנּוּ לִבּוֹ לָקַחַת עַל־שִׁכְמוֹ אֶת הָעֲבוֹדָה הַזֹּאת. כִּי דַע לְךָ, בְּנִי, אֲשֶׁר דַּרְכִּי תְלוּלָה וּמְלֵאָה מִכְשׁוֹלִים. בִּכְבֵדוּת יַעֲלוּ עָלֶיהָ סוּסַי, אֲשֶׁר הֶחֱלִיפוּ כֹח בַּלָּיְלָה; וּבְהַגִּיעִי עַד־טַבּוּר הַשָּׁמַיִם – חֲצִי דַרְכִּי, יֵשׁ אֲשֶׁר אָעִיף עֵינַי אֶל־הַתְּהוֹם הָעֲמֻקָּה אֲשֶׁר מִתַּחַת לְרַגְלִי – וְתָעָה לִבִּי וְחָשְׁכוּ עֵינַי, וְאַךְ בְּרָב־כֹּחַ אַחֲזִיק מַעֲמָד בְּמֶרְכַּבְתִּי. וּבְרִדְתִּי מִן הָהָר אֹחַז בַּמוֹשְׁכוֹת בְּיָד־חֲזָקָה, כִּי הַמּוֹרָד כְּקִיר נָטוּי. וְדַרְכִּי קָשָׁה מְאֹד נֶגֶד זֶרֶם הָרָקִיעַ הַשּׁוֹטֵף ⁴¹ וְנַפְתּוּלִים ⁴² גְּדוֹלִים אֲנִי נִפְתָּל עִם תְּקוּפוֹתָיו הַמִּתְרוֹצְצוֹת כְּבָזָק⁴³ ; וְאֵיךְ תַּעֲצֹר כֹּח, בְּנִי, לִגְבֹּר עַל־כָּל־הַמִּכְשׁוֹלִים, אִם אֶתֵּן עַל־יָדְךָ אֶת־מֶרְכַּבְתִּי? שׁוּבָה־נָא, בְּנִי, מִמַּחְשַׁבְתֶּךָ, כִּי צַר לִי עַל־יְמֵי־נְּעוּרֶיךָ. שְׁאַל לְךָ אֶת־אֲשֶׁר תִּשְׁאַל – שְׁאַל מִטַּל־הַשָּׁמַיִם וּמִּשְׁמַנֵּי־הָאָרֶץ – וְנָתַתִּי לְךָ – בְּגַלֵּי סְטִיקְסְ נִשְׁבָּעְתִּי!

וְלֹא שָׁמַע פָיֵטוֹן לְקוֹל אָבִיו וַיַּכְבֵּד אֶת־לִבּוֹ וַיִּשְׁכַּח בְּגַאֲוָתוֹ, כִּי אָדָם הוּא וְלֹא אֵל. וַיַּרְא הֵלִי, כִּי כָבֵד לֵב־בְּנוֹ וַיֹּאחַז בְּיָדוֹ וַיּוֹלִיכֵהוּ וַיְבִיאֵהוּ אֶל־מֵרְכֶּבֶת הַשֶּׁמֶשׁ הַנִּפְלָאָה. וְהַמֶּרְכָּבָה – מַעֲשֵׂה יְדֵי הֵפֵסְט לְהִתְפָּאֵר: יְדוֹתֶיהָ וּמוֹטָהּ וְחִשּׁוּקֵי־אוֹפַנֶּיהָ זָהָב טָהוֹר, וְהַחִישּׁוּרִים⁴⁴ לָאוֹפַנִים כָּסֶף וְהָעֹל מְשֻׁבָּץ אֲבָנִים יְקָרוֹת, אֲשֶׁר הִתְנוֹצְצוּ בִּשְׁלַל צִבְעֵיהֶן. וַיִּשְׂמַח פָיֵטוֹן לַמַּרְאֶה הַזֶּה וַיִּשְׁתּוֹמֵם מְאֹד וְלֹא שָׂבְעוּ עֵינָיו מֵרְאוֹת אֶת־הַמֶרְכָּבָה הַנִּפְלָאָה.

בֵּין כֹּה וָכֹה וּפְנֵי מִזְרָח הֶאֱדִימוּ. וַיִּיקַץ מִשְּׁנָתוֹ הַשַּׁחַר־חַכְלִיל הָעֵינַיִם, וַיִפְתַּח לִרְוָחָה אֶת־שַׁעַר הָאַרְגָּמָן וְאֶת־הַמִּסְדְּרוֹן הַמָּלֵא שׁוֹשַׁנִים. וַיֶּחְוְרוּ הַכּוֹכָבִים וַיֵעָלְמוּ אֶחָד אֶחָד מֵעַל־פְּנֵי־הַשָּׁמַיִם. וַיִּשָּׁאֶר רַק כּוֹכַב־הַבֹּקֶר, אֲבָל עוֹד מְעַט הִתְחַמֵּק גַּם הוּא, גַּם הַיָּרֵחַ הַמַּקְרִין ⁴⁵ חָמַק, עָבַר וְאֵינֶנּוּ.

וַיְצַו הֵלִי לְהוֹרוֹת בַּעֲלוֹת הַכְּנָפַיִם לֶאֱסֹר בַּמֶּרְכָּבָה אֶת־הַסּוּסִים קַלֵּי־הָרַגְלָיִם. וַתֵּלַכְנָה וַתִּנְהַגְנָה אֶת־הָאַבִּירִים, אֲשֶׁר אַמְבְּרוֹזִיָּה⁴⁶) מַאֲכָל לָהֶם, מֵעַל־יַד־אֲבוּסֵיהֶם. וְהַסּוּסִים נוֹרָאִים לְמַרְאֶה, מִפִּיהֶם לַפִּידִים יְהַלֵּכוּ וּמִנְּחִירֵיהֶם יֵצֵא עָשָׁן. וַתָּשֵׂמְנָה הַהוֹרוֹת אֶת־הָרִתְמָה עֲלֵיהֶם וְהֵלִי סָךְ אֶת־פְּנֵי פֵיטוֹן בְּשֶׁמֶן הַקֹּדֶשׁ, לְמַעַן יוַּכל לַעֲמֹד בִּפְנֵי־חֹם הַשַּׁלְהֶבֶת. וַיֵּאָנַח הֵלִי וַיַּזְהֵר אֶת־בְּנוֹ אֶת־הָאַזְהָרָה הָאַחֲרוֹנָה וַיֹּאמַר:

מִכָּל־מִשְׁמָר שְׁמֹר, בְּנִי, אֶת־הַמְּעַכֶּבֶת⁴⁷) וֶאֱחֹז בְּחֹזֶק־יָד בַּמּוֹשְׁכוֹת, כִּי הָאַבִּירִים כַּסּוּפָה יָרוּצוּ וּבְרֹב עָמָל תַּכְנִיעֵם לְחֶפְצֶךָ. רְאֵה, דַּרְכְּךָ דֶּרֶךְ תָּלוּל וּמַרְאֵהוּ כְּמַרְאֵה קֶשֶׁת מְתוּחָה. וְהִתְרַחַקְתָּ מִצָּפוֹן וּמִדָּרוֹם, וְאֶת־דַּרְכְּךָ תַּכִּיר עַל־פִּי־עִקְבוֹת הָאוֹפַנִים. אַל־נָא תַשְׁפִּיל אֶת־מְעוּפְךָ, לְבַל תַּשְׁחִית הַלֶּהָבָה אֶת־הָאָרֶץ. אֲבָל אַל־נָא תַגְבִּיהַּ גַּם עוּף, פֶּן יִהְיוּ הַשָּׁמַיִם לִשְׂרֵפָה.

וְרוּחַ הָעֶלֶם כְּבָר קָצְרָה בוֹ וַיִקְפֹּץ בְּרַגְלָיו הַקַּלוֹת אֶל־תּוֹךְ הַמֶּרְכָּבָה וַיֹּאחַז בְּיָדָיו הַחֲמוּמוֹת בַּמּוֹשְׁכוֹת, נַפְשׁוֹ גֶּחָלִים תְלַהֵט וְלִבּו מָלֵא שִׂמְחָה וַיּוֹדֶה לְאָבִיו הֶחָרֵד לוֹ וַיִּפָּרֵד מֵאִתּוֹ.

וַיִּצְהֲלוּ סוּסֵי־הַשֶּׁמֶשׁ בַּעֲלֵי־הַכְּנָפַיִם וַיַּכּוּ בְּפַרְסוֹת- רַגְלֵיהֶם עַל־בְּרִיחֵי־הַבַּרְזֶל. וַתִּשְׁמַע טֶטִיס, מַלְכַּת־הַיָּם, אֶת־קוֹל שַׁעֲטַת פַּרְסוֹת הַסּוּסִים וַתָּסַר אֶת־הַבְּרִיחִים, וַיִפְתַּח לִפְנֵיהֶם מֶרְחָק אֵין חֵקֶר וַיְטַפְּסוּ הַסּוּסִים וַיַּעֲלוּ מַעֲלָה מַעְלָה וּבַחֲזוֹתֵיהֶם פִּזְרוּ אֶת־עַרְפְּלֵי־הַבֹּקֶר.

וַיַּרְגִּישׁוּ הַסּוּסִים חִישׁ, כִּי רָפָה הַיּוֹם הַיָּד הָעוֹצֶרֶת בַּמֶּרְכָּבָה וְהָעֹל אֵינֶנּוּ מֵעִיק כִּתְמוֹל שִׁלְשׁוֹם. וַתִּתְנוֹדֵד הַמֶּרְכָּבָה בְּדַרְכָּהּ, כַּאֲשֶׁר תִּתְנוֹדֵד בְּלֶב־יָם הָאֳנִיָּה, אֲשֶׁר הַסַּפָּן קַל־הַדַּעַת שָׁכַח לָשִׂים עָלֶיהָ אֶת־כֹּבֶד הַמַּשָּׂא הָרָאוּי. פַּעַם תִּנָּשֵׂא הַמֶּרְכָּבָה לְמַעֲלָה וְתַגְבִּיהַּ עוּף, וּפַעַם תִּתְגַּלְגֵּל מַטָּה מַטָּה וּתְטֻלְטַל טַלְטֵלָה.

וַיְשַׁלְּחוּ הַסּוּסִים רֶסֶן מִפִּיהֶם וַיָּסוּרוּ מִדַּרְכָּם הַסְּלוּלָה. וַתֵּתַע הַמֶּרְכָּבָה וַתָּעָף כְּנוֹצָה קַלָּה. וַיֶּחֱרַד פָיֵטוֹן חֲרָדָה גְדוֹלָה, וְלֹא יָכֹל לִמְצוֹא אֶת־הַדֶּרֶךְ וְלֹא עָצַר כֹּחַ לִבְלוֹם אֶת־פִּי־הַסּוּסִים הַשׁוֹטְפִים. וַיַּבֵּט פָיֵטוֹן מִמְּרוֹם הַשָּׁמַיִם מַטָּה וַיַּרְא אֶת־הַתְּהוֹם, אֲשֶׁר מִתַּחְתָּיו בְּמַעֲמַקֵּי הָאָרֶץ הַנּוֹרָאִים, וַיִּתָּעֶה לִבּוֹ וַיָּנַע, כְּנוּעַ עֲצֵי־יַעַר מִפְּנֵי־רוּחַ. וְכַאֲשֶׁר נָשָׂא אֶת־עֵינָיו הַשָּׁמַיְמָה וַיַּרְא אֶת־כָּל־צַלְמֵי־הַחַיּוֹת הַנּוֹרָאוֹת, אֲשֶׁר בַּמָּרוֹם)⁴⁸ וַיֵּצֵא לִבּוֹ, וַיְסַמֵּר שְׂעָרוֹ וַתִּרְפֶּינָה יָדָיו מִפַּחַד. וַיְהִי כִי רָפוּ יָדָיו וַתִּפֹּלְנָה הַמּוֹשְׁכוֹת מִתּוֹכָן וַיִּשְׁטְפוּ הַסּוּסִים הָלֹךְ וְשָׁטֹף, וַיִּשְׂאוּ אֶת־הַמֶּרְכָּבָה תֹּהוּ לֹא דֶרֶךְ, פַּעַם תֵּרוֹם עַד מִמַּעַל לְכוֹכְבֵי־אֵלִים, וּפַעַם תִּצָּנֵף⁴⁹) בְכֹחַ אֶל־עֵבֶר־הָאָרֶץ.

וַיֵּרְדוּ הַסּוּסִים וַיַּגִּיעוּ אֶל־הָעֲנָנִים הָרִאשׁוֹנִים וַיַּצִּיתוּ אוֹתָם בָּאֵשׁ. וַתֵּרֵד הַמֶּרְכָּבָה הָלֹךְ וְיָּרֹד וַתִּקְרַב אֶל־הֶהָרִים הַגְּבוֹהִים וַתִּשֹּׁם וַתִּשֹּׁף בָּהֶם; וַיִּבָּקְעוּ הַצּוּרִים וַיֵּרָאוּ בָהֶם נְקִיקִים וּמְעָרוֹת, וַיִּיבַש כָּל־לְשַׁד הַחַיִּים: הָאֵזוֹב נֶהְפַּךְ לְאֵפֶר; צִמְחֵי־הַסְּלָעִים הִתְכַּרְכְּמוּ וְעִשְׂבוֹת־הֶהָרִים הָיוּ לְאָבָק, וַתֹּאחַז הָאֵשׁ גַּם בַּיְעָרוֹת, אֲשֶׁר בְּתַחְתִּית הֶהָרִים, וַתְּהִי לְיַם לֶהָבָה וַתִּשְׁטֹף שָׂדוֹת וְכָרִים, וַתֹּאכַל אֶת־הַתְּבוּאָה אֲשֶׁר בַּשָּׂדוֹת וְאֶת־הֶחָצִיר אֲשֶׁר בָּאָחוּ. וַתֵּלֶךְ הָאֵשׁ הָלֹךְ וְגָדֹל וַתְּלַהֵט הָרִים וּגְבָעוֹת, עֲמָקִים וִיעָרוֹת וַתִּשְׂרֹף אֲרָצוֹת וּמְדִינוֹת, אָדָם וּבְהֵמָה; הַיְאוֹרִים הָיוּ לֶחֳרָבָה וְיָם אֵין סוֹף הִתְכַּוֵּץ בְּחֻפָּיו וַיִּיבְשׁוּ הָאֲגַמִּים וַיֵּהָפְכוּ לְחוֹל.

וַיֵּהָפְכוּ אָז מֵרֹב הַחֹם אֲנָשִׁים לְבָנִים לְכוּשִׁים שְׁחוֹרִים. וְאֶל־כָּל־אֲשֶׁר יַבִּיט פָיֵטוֹן – וְהִנֵּה יַם־אֵשׁ, בְּעֵרָה וְּשְׂרֵפָה, אֲבַדּוֹן וּמָוֶת.

וַיִּגְדַּל הַחֹם הָלֹךְ וְגָדֹל עַד־אֲשֶׁר לֹא עָצַר פָיֵטוֹן כֹּח לָשֵׁאת וְלֹא יָכֹל הָשִׁיב רוּחוֹ אֵלָיו, כְּמוֹ לוּ־הָיָה בְּמַעֲמַקֵּי מַפָּחָה אֲיֻמָּה. וַתִּכְוֶינָה רַגְלָיו מִלַּהַט הַמֶּרְכָּבָה, וְהֶעָשָׁן וְהַפִּיחַ שָׂמוּ מַחֲנָק לְצַוָּארוֹ. עוֹד רֶגַע וְהַלֶּהָבָה אָחֲזָה בִּשְׂעָרוֹ הַכּוֹתֵשׁ⁵⁰) וַיִּפֹּל מֵעַל־הַמֶּרְכָּבָה וַיָּעָף דָּרֶך הָאַוֵּר כְּלַפִּיד בּוֹעֵר, כַּכּוֹכָבִים הַמְּעוֹפְפִים בְּמֶרְחֲבֵי הַתְּכֵלֶת בְּלֵילוֹת הַקַּיִץ הַבְּהִירִים.

וַיִפְתַּח לוֹ אֵרִידָן⁵¹) אֶת־חֵיק מֵימָיו הַקָּרִים וַיִּרְחֲצוּ הַגַּלִּים הַהוֹמִים אֶת־פְּנֵי פָיֵטוֹן הַנִּכְוִים⁵²).

וַיַּרְא הֵלִי, אֲבִי פָיֵטֹון, אֶת־אֲשֶׁר נַעֲשָׂה וַיַּסְתֵּר פָּנָיו כִּי גָדַל כְּאֵבוֹ מְאֹד… וַיֶּחְשַׁךְ הַשֶּׁמֶשׁ בַּיּוֹם הַהוּא וַיֵּרָאוּ רַק עַמּוּדֵי הֶעָשָׁן וְתִמְרוֹת־הָאֵשׁ, אֲשֶׁר עַל־פְּנֵי־הָאֲדָמָה…

ה.

 

יְסֻד תֵּבָה ⁵³    🔗

לְחַגִּינֵר מֶלֶךְ צוֹר הָיְתָה בַת וּשְׁמָהּ אוֹרֹפָּה. וְאוֹרֹפָּה נַעֲרָה יְפַת־תֹּאַר וִיפַת־מַרְאֶה. וַיַּרְא אוֹתָהּ זוּז, אֵל־הָאֵלִים, וַתֶּחֱשַׁק נַפְשׁוֹ בָהּ. וַיִּתְהַפַּךְ לְשׁוֹר מַקְרִין וַיֶּאֱרַב לָהּ וַיַּחְטְפֶנָּה. וַיִּקָּחֶנָּה זוּז לִמְקוֹם סֵתֶר וַיְדַבֵּר עַל־לִבָּהּ וַתְּהִי לוֹ לְאִשָּׁה. וַיִּתְעַצֵּב חַגִּינֵר מְאֹד, כִּי אַהֲבַת־נֶפֶש אָהַב אֶת־בִּתּוֹ, וַיִּקְרָא לְקֶדֶם בְּנוֹ וַיֹּאמֶר אֵלָיו לֵאמֹר: “קוּם, לֵךְ בָּאָרֶץ וּבַקֵּשׁ אֶת־בִּתִּי. וְאַל־תִּרְאֶה פָנַי בִּלְתִּי אִם אֲחוֹתְךָ עִמַּךְ”.

וַיַּעֲבֹר קֶדֶם אֲרָצוֹת וּמְדִינוֹת וְאֶת־עִקְבוֹת־אֲחוֹתוֹ לֹא מָצָא. וַיֵּצֶר לוֹ מְאֹד וְלֹא מָצָא אֶת־לִבּוֹ לָשׁוּב אֶל־בֵּיתוֹ, כִּי יָרֵא אֶת־חֲמַת אָבִיו הַקָּשָׁה. וַיִּוָּעֵץ לָלֶכֶת אֶל דֶּלְפִי⁵⁴) לִדְרשׁ אֱלֹהִים וְלִשְׁאֹל עֵצָה מִפִּי תַּרְפֵי־אַפּוֹלָה, אוּלַי יֹאמְרוּ לוֹ אֶת־הַדֶּרֶךְ, אֲשֶׁר יֵלֵךְ בָּהּ, וְאֶת־הַמַּעֲשֶׂה, אֲשֶׁר יַעֲשֶׂה. וַיַּעֲנוּ אוֹתוֹ הַתְּרָפִים וַיֹּאמֵרוּ: קוּם לֵךְ וּבָאתָ אֶל־אֲפָר⁵⁵) בּוֹדֵד. וְרָאִיתָ שָׁם עֶגְלָה, אֲשֶׁר לֹא עָלָה עָלֶיהָ עֹל. וְהָלַכְתָּ אַחֲרֶיהָ עַד הַמָּקוֹם, אֲשֶׁר תִּרְבַּץ שָׁם בָּעֶשֶׂב, וּבָנִיתָ עִיר בַּמָּקוֹם הַזֶּה וְקָרָאתָ לָהּ תֵּבָה.

וַיָּקָם קֶדֶם וַיֵּלֶךְ. וַיַּעֲבֹר כִּבְרַת־אֶרֶץ קְטַנָּה וַיַּרְא מְקוֹם מִרְעֶה מְכֻסֶּה עֶשֶׂב יָרֹק. וּבַמִּרְעֶה עֶגְלָה צוֹעֶדֶת לְאַט וְעֹל לֹא עָלָה עָלֶיהָ. וַיִּכְרַע קֶדֶם וַיִּשְׁתַּחוּ לְאַפּוֹלָה וַיִּשָּׂא קוֹל רִנָּה וְתוֹדָה עַל־הַחֶסֶד, אֲשֶׁר עָשָׂה עִמּוֹ, וּבְכַלּוֹתוֹ לְהִתְפַּלֵּל, קָם וַיִּתְנַהֵל לְאִטּוֹ אַחֲרֵי הַפָּרָה.

וַיֵּלֶךְ קֶדֶם וַעֲבָדָיו אַחֲרֵי הַפָּרָה זְמָן רָב, וַיַּעַבְרוּ הָרִים וּגְבָעוֹת, עֲמָקִים וְגֵיאָיוֹת, שָׂדוֹת וּכְרָמִים, נְחָלִים וּנְהָרַיִם, וְהָעֶגְלָה הוֹסִיפָה לָלֶכֶת. פִּתְאֹם עָמְדָה וַתִּשָּׂא אֶת־רֹאשָׁהּ הַשָּׁמַיְמָה וַתִּגְעֶה גְעִיָּה גְדוֹלָה וּמְמֻשָּׁכָה. אַחַר הִפְנְתָה אֶת־רֹאשָׁהּ אֶל־קֶדֶם וַתִּרְבַּץ בָּעֵשֶׂב הַגָּבוֹהַּ.

וַיִּפֹּל קֶדֶם עַל־פָּנָיו וְלִבּוֹ דוֹפֵק מִשִּׂמְחָה. וַיִּשַּׁק בִּשְׂפָתַיִם דּוֹלְקוֹת אֶת־עֲפַר הָאָרֶץ הָעֲתִידָה לִהְיוֹת לְאֶרֶץ אֲחֻזָּתוֹ. וַיְצַו לַעֲבָדָיו לְהָבִיא לוֹ מַיִם חַיִּים מִן הַמַּעְיָן, כִּי אָמַר קָדֶם: “אֶזְבְּחָה זֶבַח תּוֹדָה לְזוּז”. וְלֹא הַרְחֵק מִמְּקוֹם מִרְבַּץ הַפָּרָה הִשְׂתָּרֵעַ יַעַר פֶּרֶא אֲשֶׁר לֹא הֵנִיפוּ עָלָיו גַּרְזֶן. וּבַיַּעַר הַזֶּה, בִּמְקוֹם אֲשֶׁר סִבְכֵי־הָעֵצִים הִסְתַּבְּכוּ עִם סְעִיפֵי־הַסְּלָעִים, מִתַּחַת כִּפַּת אֶבֶן שְׁפָלָה פִּכוּ מֵי מַעְיָן חַיִּים. וַיֵּלֵכוּ עַבְדֵי־קֶדֶם אֶל־הַמְּעָרָה וְלֹא יָדְעוּ כִּי אַיִם⁵⁶) נוֹרָא אִוָּה לוֹ שָׁם מוֹשָׁב. וּפְנֵי־הָאַיִם מְזָרִים אֵימָה: עַל־מִצְחוֹ הָרָחָב רַעֲמַת־לֶהָבָה, מֵעֵינָיו הַמְּלֵאוֹת דָּם הִתְמַלְּטוּ נִיצוֹצוֹת, מִקִּרְבּוֹ הֵרִיק אֶרֶס וּבְלוֹעוֹ הִתְפַּתְּלוּ שָׁלשׁ לְשׁוֹנוֹת עוֹקְצוֹת, וְאֶת־שְׁלֹשֶׁת טוּרֵי מַלְתְּעוֹתָיו הַחַדּוֹת חָרַק לְהַחֲרִישׁ אָזְנָיִם. וַיְהִי אַךְ דָּרְכָה כַף־רַגְלָם בַּעֲבִי־הַיַּעַר וַיּוֹרִידוּ אֶת־כַּדֵיהֶם הַמַּיְמָה, וִיזַנֵּק הָאַיִם מִתּוֹךְ הַמְּעָרָה וַיִּשְׁאַג שְׁאָגָה גְדוֹלָה וְנוֹרָאָה. וַיִּפְּלוּ הַכַּדִים וְהַחֲצָבִים מִידֵי הָאֻמְלָלִים. וַיִּטָּעֵם הַפַּחַד אֶל־מְקוֹמָם כִּבְמַסְמְרִים וַיֵּצֵא לִבָּם וַיְהִי לָאֶבֶן. וְהָאַיִם נִצְנַף⁵⁷) צְנֵפָה אַחַת וַיִּתְמַתַּח וַיִּתְכּוֹנֵן לִקְפִיצַת־פֶּתַע. וַיִּתְרוֹמֵם וַיִּתְבּוֹנֵן בָּאֲנָשִׁים רֶגַע וְאַחַר הִשְׂתָּעֵר עֲלֵיהֶם כַּסּוּפָה: אֶת אֵלֶּה הָרַג בְּצִפָּרְנֵי כַּפּוֹ וְאֶת־אֵלֶּה טָרַף בְּשִׁנָּיו הַחַדּוֹת. לָאֵלֶּה שָׂם מַחֲנָק בְּפִתּוּלֵי גֵווֹ וּבְאֵלֶּה נָשַׁף בְּנִשְׁמַת אַרְסוֹ וַיְמִיתֵם.

זְמָן רָב חִכָּה קֶדֶם לְשׁוּב־עֲבָדָיו, אַךְ לַשָּׁוְא. וַיָּבֶן קֶדֶם כִי אָסוֹן קָרָה אֶת־בְּנֵי לִוְיָתוֹ, וַיֵּלֶךְ לְבַקְּשָׁם. וַיִּתְעַטֵּף בָּעוֹר, אֲשֶׁר בְּעֶצֶם יָדָיו פְּשָׁטוֹ מֵעַל־מֶלֶךְ כָּל־חַיְתוֹ יַעַר, וַיַּחֲגֹר אֶת־חֶרֶב גְּבוּרָתוֹ וַיִּקַּח בְּיָדוֹ הַחֲזָקָה אֶת חֲנִיתוֹ. וְקֶדֶם אִישׁ אַמִּיץ־לֵב, עָשׂוּי לִבְלִי חָת.

וְאַךְ עָמְדָה רַגְלוֹ בִּקְצֵה־הַיָּעַר, וְהִנֵּה הָאַיִם הַנּוֹרָא לְנֶגֶד עֵינָיו מִתְפַּתֵּל עַל־יַד גּוּפוֹת הָעֲבָדִים הַמְרֻטָּשִׁים וּמְלַקֵּק בְּתַאֲוָה אֶת־דָּמָם הֶחָם. וַיֵּצֶר לֶב־קֶדֶם עַל־עֲבָדָיו הַנֶּאֱמָנִים וַיִּבְעַר אַפּוֹ, וַיִּקְרָא:

רֵעַי הַנֶּאֱהָבִים וְהַנְּעִימִים! אֲנִי אֶגְאַל אֶת־דִּמְכֶם אוֹ יַחַד אִתְּכֶם אָמוּת! וַיִּקַּח אֶבֶן גְּדוֹלָה וַיְקַלַּע בָּאַיִם, וַתִּרְעַדְנָה חוֹמוֹת וַיִּתְמוֹטְטוּ מִגְדָּלִים לְקוֹל הַמַּכָּה. אֲבָל הָאַיִם לֹא חָלָה וְלֹא הִרְגִּישׁ, כִּי עוֹרוֹ הֶעָבֶה הָיָה לוֹ כִּתְרִיס⁵⁸) . וַיִּתְנַפֵּל עָלָיו הַגִּבּוֹר בַּחֲנִיתוֹ הַחַדָּה וַתְּפַלַּח⁵⁹) הַחֲנִית אֶת־קַשְׂקַשֵּׂי⁶⁰) עוֹרוֹ וַתִּתָּקַע עָמוֹק עָמוֹק, בְּגֵווֹ; וַיָּבֹא גַּם הַנִּצָּב אַחֲרֵי הַלָּהַב. וַיִּשְׁאַג הָאַיִם שְׁאָגָה גְדוֹלָה וּמָרָה וַיִתְהוֹלֵל מִכְּאֵב וּמִכַּעַס וַיֵּז קֶצֶף⁶¹) וָרַעַל וַיִּקְפֹּץ קְפִיצוֹת אֲיֻמּוֹת וַיַּחֲרֹק שִׁנָּיו, וּבְהִתְפַּתְּלוֹ – וַיִּשָּׁבֵר עֵץ הַחֲנִית לִרְסִיסִים, אַךְ הַבַּרְזֶל הָלַךְ הָלֹךְ וְהִתְעַמֵּק בִּבְשָׂרוֹ. וּבֶן־הַמֶּלֶךְ לֹא יִירָא וְלֹא יֵחַת, כִּי עוֹר הָאֲרִי לוֹ לְמָגֵן וּבַחֲנִיתוֹ שִׁבֵּר אֶת־מַלְתְּעוֹת הָרַהַב; וְלָאַחֲרוֹנָה הִכָּהוּ בְּחַרְבּוֹ מַכָּה גְדוֹלָה, עַד אֲשֶׁר נִתְקְעָה הַחֶרֶב בָּאַלּוֹן וַתַּדְבֵּק אֶת־הָאַיִם בְּחָזְקָה אֶל־הָעֵץ; וַיִּשַּׁח הָעֵץ מִכֹּבֶד הַמַּשָּׂא וַיֵּאָנַח אֲנָחוֹת חֲרִישׁוֹת בְּהֵחָבְטוֹ בְּטַלְטְלוֹת זְנַב־הָאִיֹם. כָּכָה נִקַּם קֶדֶם אֶת־מוֹת־רֵעָיו.

וַיִּשָּׁעֶן קֶדֶם הַמְּנַצֵּחַ עַל־חַרְבּוֹ הַנֶּאֱמָנָה לָנוּחַ מִמִּלְחַמְתּוֹ הַקָּשָׁה. וַיִּשָּׂא אֶת־עֵינָיו וְהִנֵּה פֶּלֶס אַתּוּנָה לְפָנָיו. וַתַּעַן אַתּוּנָה וַתֹּאמֶר לְקֶדֶם: “הִנֵּה מָצָאתָ חֵן בְּעֵינַי וָאֵרֵד אֵלֶיךָ מֵהַר־אוֹלִימְפּוֹס לַעֲזָר־לְךָ בַּעֲצָתִי. וְעַתָּה, קֶדֶם, שְׁמַע בְּקוֹלִי וַעֲקֹר מִלּוֹעַ הָאַיִם אֶת־שִׁנָיו הַחַדּוֹת וּזְרַעְתָּן”.

וְלֹא אֵחַר קֶדֶם לַעֲשׂוֹת אֶת־מִצְוַת־הָאֵלָּה וַיַּעֲקֹר אֶת־שִׁנֵּי הָאַיִם מִתּוֹךְ לוֹעוֹ וַיְפַזְרֵן עַל־פְּנֵי הָאֲדָמָה וַיַּחְרְשֶׁנָּה בַּמַּחְרֵשָׁה.

וַיְהִי כַּאֲשֶׁר הֶעֱבִיר מַעֲנִית אַחַת וּשְׁתַּיִם, וַתַּצְמַח הָאֲדָמָה חֲנִיתוֹת, וְאַחֲרֵי הַחֲנִיתוֹת קוֹבָעוֹת מְקֻשָּׁטִים נוֹצוֹת, וְאַחֲרֵי הַקּוֹבָעוֹת רָאשִׁים וְגוּפוֹת מְזֻיָּנִים; כֵּן צָמְחוּ וְעָלוּ גִבּוֹרִים חֲמֻשִׁים מִכַּף־רַגְלָם וְעַד־קָדְקֳדָם וַיִּהְיוּ לִגְדוּד עָצוּם וְנוֹרָא.

וַיַּרְא קֶדֶם אֶת־גְּדוּד הַמְזֻיָּנִים וַיִּירָא מְאֹד וַיִּתְכּוֹנֵן לְמִלְחָמָה חֲדָשָׁה. וַיִּקְרָא אֵלָיו אֶחָד מֵאַנְשֵׁי הַחַיִל הַצּוֹמְחִים מֵהָאֲדָמָה: “אַל־תִּשְׁלֹף חַרְבְּךָ וְאַל־תִּתְעָרֵב בְּדִבְרֵי רִיבוֹתֵנוּ”. וְיִתְנַפֵּל בְּשֶׁצֶף קֶצֶף עַל־שְׁכֵנוֹ וַיַּהַרְגֵהוּ, אֲבָל גַּם הוּא נָפַל מִתְבּוֹסֵס בְּדָמוֹ. וַתִּתְלַקַּח הַמִּלְחָמָה וַיִּגְזְרוּ עַל־יְמִין וְעַל־שְׂמֹאל וַיִּמָּלֵא הַשָּׂדֶה פִּגְרֵי־חֲלָלִים וְלֹא נִשְׁאַר מִכָּל הַגְּדוּד כִּי אִם חֲמִשָּׁה אֲנָשִׁים. פִּתְאֹם שָׁמְעוּ קוֹל: “הַרְפּוּ מִמִּלְחָמָה!” וַיִּרְאוּ הָאֲנָשִׁים אֶת־אַתּוּנָה עוֹמֶדֶת לִפְנֵיהֶם. וַיַּשְׁלִיכוּ אֶת־אֲזֵנָם⁶²) אַרְצָה וַיִּכְרְתוּ בְּרִית שָׁלוֹם. וַתְּצַו אַתּוּנָה אֶת־חֲמֵשֶׁת־הָאֲנָשִׁים לַעֲבֹד אֶת־קֶדֶם בֶּאֱמֶת וּבְלֵבָב תָּמִים. וַיִּבֶן קֶדֶם וַחֲמֵשֶׁת־הָאֲנָשִׁים עִיר בְּצוּרָה בַּמָּקוֹם הַזֶּה וַיִּקְרְאוּ לָהּ תֵּבָה, כִּדְבַר הַתְּרָפִים.

ו.

 

פֶּנֶת.    🔗

וַיְהִי כִי זָקֵן קֶדֶם, וַתִּכְהֶינָה עֵינָיו מֵרְאוֹת וְלֹא יָכֹל לָבֹא וְלָצֵאת לִפְנֵי הָעָם וַיֵּלֶא לְכַלְכֵּל אֶת־דְּבַר הַמְלוּכָה. וַיִּקְרָא לְפֶנֶת בֶּן־אֲגָבָה בִתּוֹ, אֲשֶׁר הָיְתָה לְאֶחְיוֹן – הוּא אֶחְיוֹן אֲשֶׁר מֵחֵיק־הָאֲדָמָה נוֹלָד. וַיֹּאמֶר קֶדֶם לְנֶכְדּוֹ: הִנֵּה זָקַנְתִּי, בָּאתִי בְּיָמִים וְלֹא אוּכַל לָבֹא וְלָצֵאת לִפְנֵי הָעָם. וְעַתָּה, נֶכְדִּי, שְׁמַע בְּקוֹלִי וּמָלַכְתָּ אַתָּה תַחְתָּי, כִּי אֵין לִי יוֹרֵשׁ עֶצֶר זוּלָתֶךָ. וַיִּשְׁמַע פֶּנֶת לְדִבְרֵי קֶדֶם אֲבִי־אִמּוֹ וַיֵּשֵׁב עַל־כִּסֵּא מַלְכוּתוֹ וְיִמְלֹךְ בְּתֵבָה.

וְלָאֲגָבָה אָחוֹת וּשְׁמָהּ סֶמֶל. וְסֶמֶל יָפָה לְהַלֵּל. וְיִרְאֶהָ זוּז וַתֶּחֱשַׁק נַפְשׁוֹ בָהּ וַיִּקָּחֶהָ. וַתֵּלֶד לוֹ אֶת־דְּיוֹנִיס וְהָרוֹמָאִים יִקְרְאוּ לוֹ בַחוּס. הוּא בַחוּס, אֵל־הַפִּרְיָה וַאֲדוֹן הַגֶּפֶן. וַיְהִי כִי יָרֵא זוּז אֶת־קִנְאַת פֶּנֶת וַיָּבֵא אֶת־בְּנוֹ אַרְצָה הוֹדוּ וַיִּתְּנֵהוּ עַל־יְדֵי־הַנִּמְפוֹת, אֵלוֹת־הַמַּיִם, לְגַדְּלֵהוּ וְלָשִׂים עֵינָן עָלָיו. וַיִּגְדַּל דְּיוֹנִיס וַיִּיף וַיַּעֲזֹב אֶת־אוֹמְנוֹתָיו וַיֵּצֵא לְמַסָּעָיו. וַיִּסַּע בָּאָרֶץ הָלֹךְ וְנָסֹעַ, וּבְכָל מָקוֹם, אֲשֶׁר דַּרְכָה כַף־רַגְלוֹ בוֹ, לִמֵּד אֶת־בְּנֵי־הָאָדָם לָתֵת לוֹ כְבוֹד־אֵלִים. וַיְלַמְּדֵם לָטַעַת כְּרָמִים, לִבְצֹר עֲנָבִים, לְדָרְכָם וּלְהוֹצִיא מֵהֶם אֶת־הַמִּיץ הַמְשַׂמֵּחַ אֱלֹהִים וַאֲנָשִׁים. וַיַּעַשׂ טוֹב וָחֶסֶד לִמְכַבְּדָיו וְאֶת־בּוֹזָיו, אֲשֶׁר מָנְעוּ כְבוֹד־אֵלִים מִמֶּנּוּ, הֵקַל וַיַּעַנְשֵׁם עֹנֶשׁ קָשֶׁה.

וַיֵּצֵא שְׁמוֹ לִתְהִלָּה בְּכָל־עָרֵי־יָוָן. וַתָּבֹא הַשְּׁמוּעָה גַּם עַד־תֵּבָה עִיר־מוֹלַדְתּוֹ וַיִּשְׁמַע גַּם פֶּנֶת. וּפֶנֶת אִישׁ קָשֶׁה וְרַעַ־מַעֲלָלִים, מַלְעִיב⁶³) בָּאֵלִים, שׁוֹפֵךְ לַעַג עֲלֵיהֶם וּמְנָאֲצָם וְאֶת־דְּיוֹנִיס הִרְבָּה לְנָאֵץ מִכֻּלָּם.

וְהָאֵל הֶחָדָשׁ הוֹלֵךְ וְקָרֵב אֶל־שַׁעֲרֵי תֵבָה בְּהָמוֹן חוֹגֵג, בְּתוֹךְ קְהַל צוֹבְאוֹת⁶⁴) וַעֲלָמוֹת תּוֹפֵפוֹת. וְהָעָם תּוֹקְעִים בַּשּׁוֹפָרוֹת וּמְנַגְּנִים בַּכִּנּוֹרוֹת וְהַנָּשִׁים מְחוֹלְלוֹת וּמְרִיעוֹת תְּרוּעָה גְדוֹלָה. וַיֵּצְאוּ כָּל־אַנְשֵׁי־הָעִיר לִקְרָאתוֹ לְקַדֵּם אֶת־פָּנָיו וּפֶנֶת רָאָה וַיֶּעֱשַּן אַפּוֹ וַיְחָרְפֵם לֶאֱמֹר:

– מַה־לָּכֶם כִּי נִזְעַקְתֶּם, אַנְשֵׁי־תֵבָה, יַלְדֵי־רָהַב⁶⁵) ? הֲמָּסְכוּ הָאֵלִים בְּקִרְבְּכֶם רוּחַ עִוְעִים? הֵן לֹא חַתֶּם מִפְּנֵי חֶרֶב נְטוּשָׁה⁶⁶ ) , מִפְּנֵי־תְּרוּעוֹת מִלְחָמָה. וְהִנֵּה רָאוּ עֵינֵיכֶם עֲדַת אֲנָשִׁים פּוֹחֲזִים וְרֵקִים וַעֲלָמוֹת תּוֹפֵפוֹת וַתִּבָּהֲלוּ וְרוּחַ לֹא קָמָה בָכֶם? וְאַתֶּם אַנְשֵׁי־צוֹר, עוֹבְרֵי יַמִּים רְחוֹקִים, אֲשֶׁר בְּנִיתֶם אֶת־הָעִיר הַזֹּאת לְשֵׁם אֵלֵי אַרְצְכֶם! הֲאִם שְׁכַחְתֶּם צוּר מִמֶּנוּ חֻצַּבְתֶּם – אֶת־אֲבוֹתֵיכֶם הַגִּבּוֹרִים, אֲשֶׁר מֵחֶלְצֵיהֶם יְצָאתֶם? הֲאִם יִמְצָאֲכֶם לִבְּכֶם לִמְסֹר אֶת־הָעִיר בִּיְדֵי גָּמוּל מֵחָלָב, אֲשֶׁר יָדוֹ לֹא נִסְּתָה עוֹד לְהַחֲזִיק בֶּחָרֶב? הֲלֹא מִנְהָגוֹ מִנְהַג אִשָּׁה: בְּגָדָיו זָהָב וָאַרְגָמָן, רֹאשׁוֹ מָשׁוּחַ בְּשֶׁמֶן וְעָדוּי עֲלֵי־גְפַנִים; לִקְרַאת נֶשֶׁק לֹא יֵצֵא, עַל־סוּס אַבִּיר לֹא יִרְכַּב, קְרָב שָׂנְאָה נַפְשׁוֹ וְקוֹל־שׁוֹפָר לוֹ לְתוֹעֵבָה. וְלִפְנֵי אִישׁ אֲשֶׁר כָּזֶה תִּכָּנֵעוּ?

וַיְצַו אֶת עֲבָדָיו לִתְפֹּשׂ אֶת־רֹאשׁ הַמִּתְהוֹלְלִים חַי, לְאָסְרוֹ בִּנְחֻשְׁתַּיִם וּלְהֲבִיאוֹ לְפָנָיו. וַיְהִי כִשְׁמֹעַ אוֹהֲבֵי־פֶּנֶת וּקְרוֹבָיו אֶת־פְּקוּדָתוֹ וַיִּירְאוּ מְאֹד וַיִּמַּס לְבָבָם וַיְהִי לְמָיִם. וְקֶדֶם אֲבִי־אִמּוֹ שָׁרַק וַיָּנַע רֹאשׁוֹ הַלָּבָן וַיַּחְפֹּץ לַהֲשִׁיבוֹ מִמַּחְשַׁבְתּוֹ. אַךְ דִּבְרֵי שָׂבוֹ וְיוֹעֲצָיו הִגְדִּילוּ עוֹד אֶת־אֵשׁ־חֲמָתוֹ וַתְּהִי כְּנָהָר שׁוֹטֵף, אֲשֶׁר לֹא יֵדַע מַעֲצוֹר.

וְהִנֵּה שָׁבוּ עֲבָדָיו וְרָאשֵׁיהֶם פְּצוּעִים וּפְנֵיהֶם מְגֹאָלִים בְּדָם.

– הַרְאִיתֶם אֶת־בַּחוּס? קָרָא הַמֶּלֶךְ.

– אוֹתוֹ לֹא רָאִינוּ, – עָנוּ הָעֲבָדִים, אֲבָל נָפַל בְּיָדֵנוּ אִישׁ מִבְּנֵי־לִוְיָתוֹ וְהַכָּרַת־פָּנָיו עָנְתָה בוֹ, כִּי זֶה לֹא כְּבָר נִסְפַּח אֲלֵיהֶם לְחֶבְרָה.

וַיִּנְעַץ פֶּנֶת אֶת־עֵינָיו בַּשָּׁבוּי וַיִּקְרָא בְּזַעַם:

– בֶּן־מָוֶת אַתָּה! מוֹת תָּמוּת וְרָאוּ אֲחֵרִים וְיִירָאוּ. וְעַתָּה הַגִּידָה לִי, מִי אַתָּה וּבֶן־מִי אַתָּה? וּמָה הֱנִיעֲךָ לִזְנוֹת אַחֲרֵי חֶבֶר הַהוֹלְלִים הָאֵלֶּה?

וּפְנֵי הַשָּׁבוּי לֹא שֻׁנּוּ, לִבּוֹ לֹא חַת וְקוֹלוֹ לֹא רָעַד. וַיִּזְקֹף אֶת־קוֹמָתוֹ וַיַּעַן אֶת־הַמֶּלֶךְ וַיֹּאמַר:

– שְׁמִי אֲקֶטֶס וּמֵאוֹנִיָּה אֶרֶץ מוֹלַדְתִּי. מִבְּנֵי־דַלַּת הָעָם אֲנִי וַאֲבוֹתַי לֹא הוֹרִישׁוּנִי שָׂדוֹת וּכְרָמִים אַף לֹא עַשְׁתְּרוֹת⁶⁷) צֹאן וְעֶדְרֵי־בָקָר. דַיָּג הָיָה אָבִי וַיְלַמְּדֵנִי לְהַעֲלוֹת דָּגִים בְּחַכָּה. וַיְהִי כַּאֲשֶׁר גָּדַלְתִּי וָאֶלְמַד אֶת־מְלֶאכֶת הַסַּפָּנוּת וָאָבִין לִנְהֹג בָּאֳנִיָּה וְלִמְצֹא דֶּרֶךְ בְּמֶרְחֲבֵי־יָם אֵין־קֵץ. וַאֶלְמַד לִקְרֹא בְּסֵפֶר הַשָּׁמַיִם וּשְׁבִילֵי־הָרָקִיעַ הָיוּ נְהִירִים לִי וָאֵדַע אֶת־כָּל־מְקוֹמוֹת הַנְּמֵלִים הַשּׁוֹקְטִים. וַיְהִי הַיּוֹם וָאֵלֵךְ בָּאֳנִיָּה אֶל־אִי דֵלוֹס. וַתִּשָּׂא הָרוּחַ אֶת־הָאֳנִיָּה אֶל־חֹף, אֲשֶׁר לֹא דָּרְכָה בוֹ כַּף־רַגְלִי מֵעוֹדִי. וְנַחְתֹּר אֵלָיו וַאֲנִי קָפַצְתִּי מָן־הָאֳנִיָּה עַל־הַחוֹל הַלַּח וָאָלִין שָׁם. וַיְהִי כַעֲלוֹת הַשַּׁחַר וָאֲטַפֵּס וָאֶעֱלֶה עַל־רֹאשׁ הַגִבְעָה לָדַעַת, הֲיָפָה הָרוּחַ לְדַרְכֵּנוּ, אִם לֹא.

בֵּין כֹּה וָכֹה יָצְאוּ גַם בְּנֵי־לִוְיָתִי הַיַּבָּשָׁה. וַיְהִי כַאֲשֶׁר מִהַרְתִּי אֶל־הָאֳנִיָּה וָאֶשָּׂא עֵינַי וָאֵרֶא, וְהִנֵּה הֵם סוֹחֲבִים נַעַר, אֲשֶׁר מָצְאוּ עַל־הַחֹף הַשּׁוֹמֵם, וּפְנֵי עַלְמָה לַנַּעַר יָפִים מְאֹד, וְהוּא שָׁקוּעַ בְּשֵׁנָה וַהֲלוּם יָיִן וּבְלֶכְתּוֹ וַיָּנַע כַּשִּׁכּוֹר וּבִכְבֵדוּת יֵלֵךְ אַחֲרֵי הַסַּפָּנִים.

וַיְהִי בְּגִשְׁתִּי אֲלֵיהֶם וָאָשִׂים עֵינִי אֶל הַנַּעַר וְאֶתְפַּלֵּא לְמַרְאֵהוּ וַיְהִי בְעֵינַי כְּבֶן־אֵלִים. וָאֶפֶן אֶל־רֵעַי וָאֹמַר: לֹא אֵדַע, מִי הוּא הָאֵל, אֲשֶׁר בָּחַר מִשְׁכָּן לוֹ בְגֵו הַנַּעַר, אֲבָל בָּטוּחַ אֲנִי, כִּי בֶן־אַלְמָוֶת הוּא.

וָאֶשְׁתַּחֲוֶה לוֹ וָאֹמַר: תְהִי אֲשֶׁר תִּהְיֶה, בֶּן־אֵלִים! בָּרֵךְ אֶת־מַעֲשֵׂי יָדֵינוּ וּסְלַח לָאֲנָשִׁים אֲשֶׁר הֵקֹלּוּ בִּכְבוֹדְךָ מִבְּלִי הַדָּעַת.

– הֲטַחוּ עֵינֶיךָ מֵרְאוֹת? – קָרָא אֶחָד מִקְּהַל־הַפּוֹחֲזִים, – לֹא אֵל הוּא וּלְקוֹל תְּפִלָּתְךָ לֹא יַאֲזִין. וְיֶתֶר הַסַּפָּנִים לָעֲגוּ לַנַּעַר וַיִּתְעַלְּלוּ בוֹ וַיִּסְחָבוּהוּ הָלֹךְ וְסָחֹב אֶל־הָאֳנִיָּה. וָאֲדַבֵּר עַל־לִבָּם לְהַרְפּוֹת מֵהַנָּעַר, אֲבָל כָּבְדוּ אָזְנֵיהֶם מִשְּׁמֹע. וַיְהִי הַמְּעַט מֵהֶם, כִּי מָנְעוּ כָבוֹד מִבֶּן־אֵלִים, וַיֵצֵא מִתּוֹךְ קְהַל הַמְּרֵעִים אִישׁ טִירֶנִּי⁶⁸), אִישׁ עָוֶל וּמְרַצֵּחַ, אֲשֶׁר נָס מֵעִירוֹ עַל־הָרְגוֹ בְעָרְמָה אֶת־רֵעֵהוּ, וְהוּא הַצָּעִיר וְהֶחָזָק בְּכָל הַמַּלָּחִים – וַיִּתְנַפֵּל עָלַי, וַיֹּאחַז בְּצַוָּארִי וַיָּשֶׂם מַחֲנָק לִי וַיַּשְׁלִיכֵנִי כְּנֵצֶר נִתְעָב מֵעֵבֶר לִשְׂפַת הָאֳנִיָּה. וְעוֹד מְעַט וְיָרַדְתִּי מְצוּלָה, לוּלֵא נֶאֱחַזְתִּי בְּחַבְלֵי הָאֳנִיָּה. וְהַנַּעַר שׁוֹכֵב עַל־קַרְקַע־הַסְּפִינָה, כְּאִלּוּ תַרְדְמַת אֵלִים נָפְלָה עָלָיו. פִּתְאֹם עָמַד הַנַּעַר עַל־רַגְלָיו, כְּמוֹ לוּ הֵקִיץ לְקוֹלֵנוּ, וַיִּגַּשׁ אֶל־הַמַּלָּחִים וַיִּקְרָא:

– מָה קוֹל הַשָּׁאוֹן הַזֶּה? אֵיפֹה אֲנִי? וּמָה חֶפְצְכֶם לַעֲשׂוֹת בִּי?

– אֶל תִּדְאַג, נָעַר! – עָנָה אוֹתוֹ אַחַד הַסַּפָּנִים בְּעָרְמָה: הַגִּידָה לָנוּ, אָנָה עָלֶיךָ לָלֶכֶת, וּמִהַרְנוּ וַהֲבֵאנוּךָ שָׁמָה וְהַעֲלִינוּךָ עַל־הַחֹף, כִּי אֶת־כָּל אֲשֶׁר תְּצַוֵּנוּ נַעֲשֶׂה.

– אִם כֵּן אֵפוֹא, נֵלְכָה נָא אֶל־אִי נַקְסוֹס, אִי מוֹלַדְתִּי, אָמַר הַנָּעַר.

וַיִּשָׁבְעוּ לו הַנּוֹכְלִים הָעֲרוּמִים לְמַלְּאוֹת אֶת־פְּקֻדָּתוֹ וַיְצַוּוּנִי לִפְרֹשׂ אֶת־הַמִּפְרָשִׂים. וְאִי נַקְסוֹס הָיָה לִימִינֵנוּ. וַיְהִי כְהַטּוֹתִי אֶת־הַמִּפְרָשִׂים יָמִינָה וַיִּרְמְזוּ אֵלַי בְּעֵינֵיהֶם וַיְמוֹלְלוּ בִּידֵיהֶם וַיְדַבְּרוּ חֶרֶשׁ בְּאָזְנַי לֵאמֹר:

– מָה־תַּעֲשֶׂה, מְשֻׁגָּע! הַשְׂמְאִילָה, הַשְׂמְאִילָה.

וָאֶתְפַּלֵּא, מִבְּלִי דַעְתִּי אֶת־חֶפְצָם. וָאָסוּר הַצִּדָּה וָאֹמַר:

– אִם לֹא טוֹבָה עֲבוֹדָתִי בְּעֵינֵיכֶם, יִפְרֹשׂ נָא אַחֵר אֶת־הַמִּפְרְשִׂים.

וַיִּגַּשׁ אֵלַי מַלָּח אֶחָד וַיִּדְחָפֵנִי הַצִּדָּה וַיֵּט אֶת־הַסְּפִינָה שְׂמֹאלָה. וְהָאִי נַקְסוֹס נִשְׁאַר מִיָּמִין. וַיִּשָּׂאוּנוּ הַמִּפְרָשִׂים הַפְּרוּשִׂים אֶל־צַד הַנֶּגֶד. וְיִתְבּוֹנֵן הַנַּעַר בִּצְחוֹק לַעַג אֶל־גַלֵּי־הַיָּם, כְּמוֹ לוּ רַק עַתָּה הֵבִין לְעָרְמַת שׁוֹבָיו. וַיַּעֲמֵד אֶת־פָּנָיו כִּפְנֵי בוֹכֶה וַיִּגַּשׁ אֲלֵיהֶם וַיֹּאמַר:

אֲהָהּ, כִּי לֹא תִרְאֶינָה עֵינַי אֶת־חֹף הָאִי, אֲשֶׁר נִכְסְפָה נַפְשִׁי לָבֹא שָׁמָה. הֲטוֹב הוּא לַאֲנָשִׁים גְּדוֹלִים לְהָתֵל בְּנַעַר רָפֶה?

וַיְּמַלְּאוּ הַסַּפָּנִים צְחוֹק פִּיהֶם וַיִּלְעֲגוּ לְדִמְעוֹתָיו וּלְדִמְעוֹתַי, וַיְמַהֲרוּ עוֹד לַחְתֹּר בִּמְשׁוֹטֵיהֶם. פִּתְאֹם פָּגְעָה הָאֳנִיָּה בְּשִׂרְטוֹן⁶⁹) חוֹל וַתַּעֲמֹד בְּלֶב־יָם, וַיַּכּוּ הַסַּפָּנִים גַּלִּים בִּמְשׁוֹטֵיהֶם וַיָסִירוּ אֶת־הַמִּפְרָשִׂים וַיִּתְאַמְּצוּ לְהוֹרִיד אֶת־הָאֳנִיָּה מֵעַל־הַשִּׂרְטוֹן, אֲבָל כָּל־עֲמָלָם נִשְׁאַר מָעַל⁷⁰) .

וַיְהִי כִי עָיְפוּ הָאֲנָשִׁים מֵעֲבוֹדָתָם וַיִּשְׂאוּ אֶת־עֵינֵיהֶם וַיִּרְאוּ וְהִנֵה שֻׁנּוּ פְּנֵי הַנַּעַר וַיִּיפוּ מְאֹד מְאֹד, קוֹמָתוֹ גָדְלָה, רֹאשׁוֹ עָטוּר אַשְׁכְּלוֹת הַגֶּפֶן וּבְיָדוֹ מַטֶּה כָּרוּךְ עֲנָבִים. וַיֵּט הַנַּעַר בְּמַטֵּהוּ – וַיְהִי כִנְטוֹת יָדוֹ וַתִּצְמַח חֶלְבָּנִית⁷¹) רַבַּת עָלִים וַתִּכְרֹךְ אֶת־הַמְשׁוֹטִים וַתְּכַסֵּם וַתְּטַפֵּס הַחֶלְבָּנִית וַתַּעַל עַל־מִכְסֵה הָאֳנִיָּה וַתַּעֲטֹף גַּם אֶת־הַתְּרָנִים⁷²) וְאֶת הַמִּפְרָשִׂים.

וַיֵּדְעוּ הַמַּלָחִים וַיָּבִינוּ, כִי לֹא בֶּן־אָדָם הָיָה הַנַּעַר, אֲשֶׁר הִתְעַלְּלוּ בוֹ, כִּי אִם דְּיוֹנִיס בִּכְבוֹדוֹ וּבְעַצְמוֹ. וַיִּקְפְּצוּ מִמְּקוֹמָם וַיֹּאמְרוּ לְהִתְחַנֵּן אֵלָיו וּלְבַקֵּשׁ מִמֶּנוּ עַל־נַפְשׁוֹתָם. וַיְהִי כִפְתֹחַ הָאֶחָד אֶת־פִּיו לְדַבֵּר וַיֵּצֶר פִּיו וַיֵּלֶךְ הָלֹךְ וְצַר וְאַפּוֹ וּשְׂפָתָיו הִתְכַּוְצוּ וַיֵּהָפְכוּ לְפִַי הַדָּג. וּבְטֶרֶם הִתְעוֹרְרוּ יֶתֶר הַמַּלָחִים מִתִּמְהוֹנָם וַיֵּהָפְכוּ כֻלָּם לְדָגִים. וַיִּכֹף שִׁכְמָם וַיְכֻסֶּה בְשָׂרָם קַשְׂקֶשֶׂת, כִּתְפֵיהֶם הָיוּ לִסְּנַפִּירִים וְרַגְלֵיהֶם נֶאֱדְקוּ⁷³) לְזָנָב אָרֹךְ. וַיִּקְפְּצוּ מִתּוֹךְ הָאֳנִיָּה הַמַּיְמָה וַיִּצְלְלוּ וַיָּשׁוּטוּ. וָאִשָּׁאֵר רַק אֲנִי לְבַדִי מִכָּל־הָאֲנָשִׁים וְלִבִּי חָרֵד וּמְצַפֶּה… וַיִּפֶן אֵלַי הָאֵל וַיְחַנֵּן אֶת־קוֹלוֹ וַיֹּאמַר:

– יָדַעְתִּי אֶת־לִבְּךָ וְאֶת־מַחְשְׁבוֹתֶיךָ הַטּוֹבוֹת כִּי חֶסֶד חָפַצְתָּ לַעֲשׂוֹת עִמָּדִי. וְלָכֵן אַל־תִּירָא וְאַל־תִּרְעַץ וְהַטֵּה אֶת־הַמִּפְרָשִׂים לְעֵבֶר נַקְסוֹס.

וַיְהִי כַּאֲשֶׁר בָּאנוּ אֶל־הַחֹף וַנֵּצֵא אֶל־הַיַּבָּשָׁה בְשָׁלוֹם, וַיְבִיאֵנִי דְיוֹנִיס אֶל־מִקְדָּשׁוֹ וַיְמַלֵּא אֶת־יָדִי לִהְיוֹת לְכֹהֵן, לְשָׁרֵת לְפָנָיו וּלְהַקְרִיב לוֹ עוֹלָה וְקָרְבָּן.

וַיְהִי כִשְׁמֹעַ פֶּנֶת אֶת־דִּבְרֵי הַשָּׁבוּי וַיִּחַר אַפּוֹ מְאֹד וַיִּקְרָא בַחֲמָתוֹ:

– עַד־מָתַי תַּלְאֵנִי בְּדִבְרֵי לַהֲגֶךָ? הוֹי, עֲבָדַי! קַחוּהוּ וַהֲבִיאוּהוּ אֶל־בֵּית־הַכֶּלֶא וְעַנּוּהוּ, עַד־אֲשֶׁר יָמוּת בְּמַכְאוֹבָיו.

וַיִּתְפְּשׂוּהוּ עַבְדֵי־הַמֶּלֶךְ, וַיַּאַסְרוּ אֶת־יָדָיו וְאֶת־רַגְלָיו בִּנְחֻשְׁתַּיִם וַיַּשְׁלִיכוּהוּ אֶל־הַבּוֹר. וַיְהִי כְהַשְׁלִיכָם אוֹתוֹ וַיִּמַּסּוּ אֲסוּרָיו מֵעַל־יָדָיו וּמֵעַל־רַגְלָיו וַיֵּעָלֶם. וַיֶּחֱזַק לֶב־פֶּנֶת וַיָּבֹא אֶל־בֵּיתוֹ וְלֹא־שָׁת לִבּו גַּם לָזֹאת.

וַיָּחֶל פֶּנֶת לִרְדֹּף אֶת־עוֹבְדֵי הָאֵל הֶחָדָשׁ. וַיֻּגַד לוֹ, כִּי גַּם אֲגָבָה אִמּוֹ וְאַחְיוֹתֶיהָ נָטוּ אַחֲרֵי דְּיוֹנִיס וַתִּתֵּנָהּ לוֹ כְבוֹד אֵלִים. וַתִּבְעַר חֲמָתוֹ כָאֵשׁ וַיְצַו לִתְפֹּשׂ אוֹתָן וּלְאָסְרָן בְּבֵית־הַכֶּלֶא. אֲבָל יָד נֶעֱלָמָה שִׁבְּרָה אֶת־נְחֻשְׁתֵּיהֶן מֵעֲלֵיהֶן וַתּוֹצִיאֵן לַחָפְשִׁי וַתֵּצֶאנָה בְּתֻפִּים וּבִמְחוֹלוֹת וַתָּרֹצְנָה בַּשָּׂדוֹת וּבַיְעָרִים וַתָּשֹׁרְנָה שִׁירִים לִכְבוֹד דְיוֹנִיס.

וַיּוֹסֶף פֶּנֶת לִשְׁלֹחַ אֶת־עֲבָדָיו לִתְפֹּשׂ אֶת־דְּיוֹנִיס. וַיֵּלְכוּ וַיֵּצְאוּ מִן־הָעִיר ויִּגְּשׁוּ אֶל־הַמַּחֲנֶה הַחוֹגֵג וְהִנֵּה דְּיוֹנִיס הוֹלֵךְ לִקְרָאתָם; וַיִּקָּחוּהוּ וַיָּשִׂימוּ עֲבוֹתִים עַל־יָדָיו, וְאֶת־רַגְלָיו הִגִּישׁוֹ לִנְחֻשְׁתַּיִם, מִבְּלִי אֲשֶׁר יַעֲמֹד עַל־נַפְשׁוֹ. וַיְהִי הַדָּבָר לְפֶלֶא בְעֵינֵיהֶם וַיִּירְאוּ יִרְאָה גְדוֹלָה. וַיָּבִיאוּ הָעֲבָדִים אֶת־הָאָסִיר לִפְנֵי הַמֶּלֶךְ. וַיַּרְא הַמֶּלֶךְ אֶת־פְּנֵי־הַנַּעַר וְאֶת־הוֹד־הָאֵלִים הַשּׁוֹכֵן עֲלֵיהֶם וְיִתְפַּלֵּא מְאֹד. בְּכָל־זֹאת לֹא שָׁב אַפּוֹ, כִּי הִכּוּהוּ הָאֵלִים בְּסַנְוֵרִים וַיִּתֵּן אֶת־דְּיוֹנִיס כִּמְתַעְתֵּעַ וַיְצַו לְהַשְׁלִיךְ אוֹתוֹ הַבּוֹרָה. וַיִּפָּתְחוּ שַׁעֲרֵי־בֵּית־הַכֶּלֶא וַיִּפְּלוּ הָאֲסוּרִים מֵעָלָיו וַיִּיף שִׁבְעָתַיִם מֵאֲשֶׁר בַּתְּחִלָּה, וַיַּעֲמֹד בְּתוֹךְ קְהַל מְכַבְּדָיו. וַיַּעֲלוּ כָל־הָעָם אַחֲרָיו וְהֵם מְחַלְּלִים בַּחֲלִילִים וּשְׂמֵחִים שִׂמְחָה גְדוֹלָה וַתִּבָּקַע הָאָרֶץ לְקוֹלָם. וַאֲגָבָה וְאַחְיוֹתֶיהָ יָצְאוּ עִם כָּל־הַנָּשִׁים בְּשִׁיר וּבִמְחוֹלוֹת, בְּתֻפִּים וּבִכְלֵי־זָמֶר. וְהָיָה כַּאֲשֶׁר תַּךְ אֲגָבָה בְּמַטָּהּ אֲשֶׁר בְּיָדָהּ בַּצוּר וְיָצְאוּ מִמֶּנּוּ מַיִם־חַיִּים אוֹ גַלֵּי־יַיִן יִתְפָּרְצוּ בְשָׁאוֹן. וּבְהַטּוֹתָהּ אֶת־יָדָהּ עַל־מֵימֵי־הַנְּהָרוֹת וְנֶהֱפְכוּ לֶחָלָב, וְכַאֲשֶׁר תִּגַּע בָּעֵצִים וְהַרְעִיפוּ הֶעָלִים דְּבַשׁ מָתוֹק. וַיָּבֹאוּ עַבְדֵי־הַמֶּלֶךְ וַיְסַפְּרוּ לוֹ אֶת־כָּל־מַעֲשֵׂי הַפְּלָאוֹת, אֲשֶׁר רָאוּ עֵינֵיהֶם, וְיִתְחַנְּנוּ אֵלָיו לְהָרֵךְ אֶת־לִבּוֹ הֶעָרֵל וּלְהִכָּנַע לִפְנֵי הָאֵל הַגָּדוֹל. אֲבָל פֶּנֶת לֹא שָׁמַע גַּם לְדִבְרֵי הָאוֹתוֹת הָאֵלֶּה וַיּוֹסֶף לְהַכְבִּיד אֶת־לִבּוֹ. וַיְצַו לֶאֱסֹף אֶת־כָּל־חֵילוֹ וְלָצֵאת לִקְרַאת צוֹבְאוֹת דְּיוֹנִיס וּלְהַשְׁמִיד אוֹתָן מִבְּלִי הִשְׁאִיר לַהֶן שָׂרִיד וּפָלִיט.

וַיִּשְׁלַח דְּיוֹנִיס מַלְאָכִים אֶל־פֶּנֶת לֵאמֹר:

– לָמָּה יִשָּׁאֲךָ לִבְּךָ לְהִתְגָּרוֹת בִּי מִלְחָמָה וְהִיא לֹא תִצְלָח? וְעַתָּה לוּ תִשְׁמָעֵנִי – וְצִוִּיתִי אֶת־צוֹבְאוֹתַי לְהִתְפָּרֵק כְּלֵי־מִלְחַמְתָּן וַהֲבִיאוֹתִין אֵלֶיךָ. וְאַתָּה פְשֹׁט אֶת־בְּגָדֶיךָ, בִּגְדֵי־הַגֶּבֶר, וְלָבַשְׁתָּ בִגְדֵי־אִשָּׁה, פֶּן תַּהֲרֹגְנָה אוֹתְךָ הַנָּשִׁים בְּרוּחַ קִנְאָתָן.

וְלֹא מָצָא דְּבַר דְּיוֹנִיס חֵן בְּעֵינֵי הַמֶּלֶךְ. בְּכָל־זֹאת לֹא מָרָה אֶת־פִּיו, כִּי נָפַל פָּחֲדוּ עָלָיו, וַיִּלְבַּשׁ בִּגְדֵי־אִשָּׁה וַיֵּצֵא אֵלָיו. וַיְהִי אַךְ יָצֹא יָצָא מִשַּׁעַר הָעִיר וַיַּךְ אוֹתוֹ דְיוֹנִיס בְּתִמָּהוֹן. וַיְדַמֶּה לִרְאוֹת שְׁתֵּי שְׁמָשׁוֹת בִּרְקִיעַ הַשָּׁמַיִם וּשְׁתֵּי עָרִים בִּמְקוֹם עִיר תֵּבָה. וַיִּכָּפֵל כָּל־דָּבָר בְעֵינָיו. וּדְיוֹנִיס הָיָה בְעֵינָיו לְשׁוֹר מַקְרִין וַיִּתְהוֹלֵל הַמֶּלֶךְ וַיִּשְׁתַּגֵּעַ וַיְצַו לָתֵת לוֹ אֶת־מַטֵּהוּ וִיפַזֵּז וַיְכַרְכֵּר.

וּדְיוֹנִיס הִכָּה אֶת־הַמֶּלֶךְ בַּסַּנְוֵרִים וְלֹא רָאָה אֶת־קְהַל־הַנָּשִׁים הַצּוֹבְאוֹת, אֲשֶׁר רוּחַ־הָאֵלִים שָׁכַן עֲלֵיהֶן. וַיֵּלֶךְ הָלֹךְ וְרַקֵּד, עַד־אֲשֶׁר בָּא אֶל־תּוֹךְ יַעַר עָבֶה. וַיֹּאחַז דְּיוֹנִיס בְּצַמֶּרֶת אַשּׁוּחַ גָּבוֹהַּ וַיָּכֹף אוֹתָהּ כְּאַגְמוֹן וַיָּשַּׁח לָאָרֶץ וַיּוֹשֶב עָלֶיהָ אֶת־הַמֶּלֶךְ הַמִּתְהוֹלֵל.

וַתִּרְאֶינָה אוֹתוֹ הַנָּשִׁים הַצּוֹבְאוֹת בָּעֵמֶק, וַיַּרְעֵם דְּיוֹנִיס בְּקוֹלוֹ וַיִּקְרָא אֲלֵיהֶן:

– שְׁמַעְנָה, נְעָרוֹת, קוֹלִי! נָשִׁים, הַאֲזֵנָּה אִמְרָתִי! הִנֵּה זֶה הוּא הָאוֹיֵב, אֲשֶׁר הִרְבָּה לְהִתְעַלֵּל בָּכֶן וְלִנְאֹץ אֶת־חַגֵּי־קָדְשֵׁנוּ. וְעַתָּה עֲשֶׂינָה לוֹ כִּגְמוּל יָדָיו.

וַתְּהִי דְמָמָה בַכֹּל: עָלֶה לֹא הִתְנוֹעֵעַ, חַיָּה לֹא שָׁאָגָה. וּפִתְאֹם קָמוּ כָל־הַנָּשִׁים מִמְּקוֹמָן וַתְּמַהֵרְנָה וַתָּרֹצְנָה וַתַּעֲבֹרְנָה דֶרֶךְ נְהָרוֹת שׁוֹטְפִים וַתִּקְפֹּצְנָה עַל־פְּנֵי תְהוֹמוֹת עֲמֻקּוֹת. וַתָּבֹאנָה כֻלָּן הַיַּעֲרָה וַתְּסֻבֶּינָה אֶת־הָאַשּׁוּחַ. וַתְּלַקֵּטְנָה הַנָּשִׁים אֲבָנִים וַתֶּאֱסֹפְנָה זְרָדִים⁷⁴) וַתִּזְרֹקְנָה בְּפֶנֶת. אֲבָל הָאֲבָנִים וְהַזְּרָדִים לֹא נָגְעוּ בוֹ לְרָעָה, כִּי הִגְבִּיהַּ לָשֶׁבֶת עַל־צַמֶּרֶת הָעֵץ. וָתִּקַּחְנָה הַנָּשִׁים יִתְדוֹת אַלּוֹן חֲזָקוֹת וַתַּחְפֹּרְנָה מִסָּבִיב לָאַשּׁוּחַ וַתַּחְשׂפְנָה אֶת־שָׁרָשָׁיו וַתְּשָׁרֵשְׁנָה אוֹתוֹ. וַיִּפֹּל הָאַשּׁוּחַ לָאָרֶץ. וַיִּפֹּל גַּם הַמֶּלֶךְ אָרְצָה וַיִּצְעַק צְעָקָה גְדוֹלָה וּמָרָה.

וַיַּךְ הָאֵל אֶת־אִמּוֹ בְּסַנְוֵרִים וְלֹא הִכִּירָה אֶת־בְּנָהּ וַתְּצַו לַהֲרֹג אוֹתוֹ. וְרוּחַ־פֶּנֶת שָׁב אֵלָיו וַיִּקְרָא בְקוֹל נוֹאָשׁ לְאִמּוֹ:

– אִמִּי! הַאִם לֹא תַכִּירִינִי? הֲלֹא פֶּנֶת אֲנִי, בְּנֵךְ אֲשֶׁר יְלִדְתִּינִי! וְעַתָּה סִלְחִי נָא לְפִשְׁעִי וְאַל־תְמִיתִינִי!

וְלֹא הִכִּירָה אֲגָבָה אֶת־בְּנָהּ וְלֹא שָׁמְעָה אֶת־קוֹלוֹ וַיְהִי בְעֵינֶיהָ כַּאֲרִי מַשְׁחִית, אֲשֶׁר יָצָא מִסֻּבְכוֹ לִטְרֹף טָרֶף. וַתִּתְנַפֵּלְנָה הַנָּשִׁים עָלָיו וַתִּקְרַעְנָה אוֹתוֹ לִגְזָרִים. וְאֶת־רֹאשׁ פֶּנֶת תָּקְעָה אֲגָבָה עַל יָתֵד, בְּחָשְׁבָהּ, כִּי רֹאשׁ אֲרִי הוּא, וַתִּשָּׂאֵהוּ לִפְנֵי מַחֲנֵה־הַצּוֹבְאוֹת בְּקוֹל עֲנוֹת גְּבוּרָה וּתְרוּעַת־נִצָּחוֹן. כָּכָה עָנַשׁ דְּיוֹנִיס אֶת־אוֹיְבוֹ, אֲשֶׁר לָעַג לְמִנְהֲגֵי הַקֹּדֶשׁ…

ו.

 

פֶּרֶס.    🔗

לְאַקְרִיז מֶלֶךְ אַרְגּוֹלִידָה נוֹלְדָה בַת. וַיִּקְרָא אַקְרִיז אֶת־שֵׁם בִּתּוֹ דַּנָּאָה. וַיְהִי בְּהִוָּלְדָהּ וַיֵּלֶךְ אַקְרִיז לִדְרשׁ בַּתְּרָפִים לָדַעַת, מַה־יִהְיֶה מִשְׁפָּט הַיַּלְדָּה וּמַעֲשֶׂיהָ. וַיַּעֲנוּ אוֹתוֹ הַתְּרָפִים לֵאמֹר:

יָדֹעַ תֵּדַע, כִּי בְיַד־נֶכְדְּךָ, בֶּן־בִּתְּךָ, תָּמוּת וְהוּא יֵשֵׁב עַל־כִּסְּאֲךָ אַחֲרֶיךָ.

וְיֶחֱרַד הַמֶּלֶךְ חֲרָדָה גְדוֹלָה וַיִּתְעַצֵּב אֶל־לִבּוֹ. וַיֹּאמֶר הַמֶּלֶךְ בָּרִאשׁוֹנָה לְהָמִית אֶת־בִּתּוֹ, אֲבָל מַהֵר נִחַם עַל־הָרָעָה, אֲשֶׁר חָשַׁב לַעֲשׂוֹת לָהּ, כִּי נִכְמְרוּ רַחֲמָיו אֵלֶיהָ, וַיְצַו וַיָּשִׂימוּ אוֹתָהּ בְּמִגְדַּל־נְחשֶׁת סָגוּר וּמְסֻגָּר וַיִּתֵּן לָהּ אוֹמְנוֹת, רַקָּחוֹת, טַבָּחוֹת וְאוֹפוֹת לְשָׁרְתָהּ וְלָשִׂים עֵינָן עָלֶיהָ. וְשָׂרוֹת מִנָּה וַיְצַו עֲלֵיהֶן לְכַלְכֵּל אֶת־דַּנָאָה וְאֶת־נַעֲרוֹתֶיהָ וּלְסַפֵּק לָהֶן אֶת־כָּל־צָרְכֵיהֶן, לֹא תֶחֱסַרְנָה דָבָר. וַיִּקְרָא הַמֶּלֶךְ לְשָׁרוֹת דַּנָאָה וּלְנַעֲרוֹתֶיהָ וַיֹּאמֶר אֲלֵיהֶן:

– הִנֵּנִי נוֹתֵן אֶת־בִּתִּי עַל־יֶדְכֶן, וְאַתֶּן שֵׂמְנָה עַיִן עָלֶיהָ וּשְׁמַרְתּוּהָ מִכָּל־מִשְׁמָר וְכָל־חֶפְצָהּ אַל־תִּמְנַעְנָה מִמֶּנָּה; רַק הִשָּׁמֵרְנָה מְאֹד וְאֶל־תִּתֵּנָּה אִישׁ לָבֹא הַמִּגְדָּלָה וְלִדְרֹךְ עַל־מִפְתַּן חֶדְרָהּ, פֶּן תָּמֹתְנָה.

וַתִּירֶאנָה הַנָּשִׁים מְאֹד וַתַּעֲשֶׂינָה כְּכָל־אֲשֶׁר צִוָּה הַמֶּלֶךְ.

וַיְהִי מִקֵּץ יָמִים וַתִּגְדַּל דַּנָאָה וַתֵּלֶךְ הָלֹךְ וְיָפֹה, עַד־אֲשֶׁר יָפְתָה מְאֹד. וַתִּגְבַּהּ קוֹמָתָהּ וַתְּצַמַּח שְׂעָרָהּ וַתִּדְמֶה לְגֶפֶן אַדֶּרֶת⁷⁵). וְכָל־אֲשֶׁר חָפֵץ לִבָּהּ לֹא־מָנְעוּ נַעֲרוֹתֶיהָ מִמֶּנָּה, רַק לָצֵאת מִפֶּתַח הַמִּגְדָּל וָחוּצָה לֹא נְתָנוּהָ, כִּי מִצְוַת הַמֶּלֶךְ עֲלֵיהֶן חֲזָקָה: אַל־תֵּצֵא מִפֶּתַח הַמִּגְדָּל וָחוּצָה. וַתֵּרֶא דַּנָאָה מִסָּבִיב לָהּ רַק נָשִׁים, וְאִישׁ לֹא יֵרָאֶה וְלֹא יִמָּצֵא בַמִגְדָּל וְגַם קָרוֹב לֹא יִקְרַב אֵלָיו, כִּי אָמַר הַמֶּלֶךְ: אַל־תֵּרֶא פְנֵי־אִישׁ, פֶּן תֶּחֱשַׁק נַפְשָׁהּ בּוֹ וְהָיְתָה לוֹ לְאִשָּׁה וְיָלְדָה בֵן.

וַתֵּשֶׁב דַּנָאָה כְּלוּאָה בְּמִגְדָּלָהּ יָמִים הַרְבֵּה. וַתִּתְעַצֵּב דַּנָאָה אֶל־לִבָּהּ, כִּי הִתְאַוְּתָה מְאֹד לִרְאוֹת אֶת־הָעִיר וְאֶת־יוֹשְׁבֶיהָ.

וַיַּרְא זוּז, יוֹצֵר הָעוֹלָם, אֶת־עֱנוּת⁷⁶) נָפְשָׁה וַיַּחֲמֹל עָלֶיהָ וְגַם אֶת־יָפְיָהּ חָמַד בְּלִבּוֹ. וַיֵּהָפֵךְ לִמְטַר־זָהָב וַיַּחְדֹּר וַיֵּרֶד דֶּרֶךְ תִּקְרַת הַמִּגְדָּל אֶל־חָדְרָהּ וַיִּפֹּל אָרְצָה. וַתֵּרֶא דַּנָאָה אֶת־הַזָּהָב הַנּוֹפֵל וַתְּמַהֵר וַתִּצְבְּרֶנּוּ וַתְּשִׂימֶנּוּ בְּחֵיקָהּ. וְהִנֵּה נֶהְפַּך הַזָּהָב, אֲשֶׁר בְּחֵיקָהּ, לְעֶלֶם יְפֵה־עֵינַיִם וְהוֹד־אֵלִים שָׁפוּךְ עַל־פָּנָיו. וַתִּדְבַק נַפְשָהּ בְּנֶפֶשׁ הָעֶלֶם וַתְּהִי לוֹ לְאִשָּׁה. וַתֵּלֶד דַּנָאָה בֵן לְזוּז וַתִּקְרָא אֶת־שְׁמוֹ פֶּרֶס.

וַיְהִי כַּאֲשֶׁר נוֹדַע הַדָּבָר לְאַקְרִיז וַיְצַו וַיָּמִיתוּ אֶת־כָּל־שָׂרוֹת דַּנָאָה וְנַעֲרוֹתֶיהָ וְאֶת־בִּתּוֹ וְאֶת־בְּנָהּ הַנּוֹלָד לָהּ שָׂם בְּתֵבַת־עֵץ וַיַּשְׁלִיכוּ אוֹתָהּ הַמָּיְמָה. וַתֵּלֶךְ הַתֵּבָה עַל־פְּנֵי־הַמָּיִם וְיַד־זוּז נוֹהֶגֶת בַּקְלִפָּה הָרְעוּעָה הַזֹּאת, עַד־אֲשֶׁר בָּאָה בְשָׁלוֹם אֶל־חֻפֵּי אִי סֵרִיף, וְרֵקְט וּפְלֵידִקְט מוֹשְׁלִים אָז בָּאִי.

וַיֵּרֶד דֵּקְט אֶל־חֹף הַיָּם לָדוּג דָּגִים. וַיַּרְא אֶת־הַתֵּבָה וַיִּשְׁלַח אֶת־יָדוֹ וַיֹּאחַז בָּהּ וַיִּמְשְׁכֶנָּה וַיּוֹצִיאֶנָּה אֶל־הַחֹף. וַיִפְתַּח אֶת־הַתֵּבָה וַיַּרְא אֶת־דַּנָאָה וְאֶת־בְּנָהּ וְהִנָּם שְׁלֵמִים וּבְרִיאִים, וַיְקַבְּלוּ אוֹתָהּ מוֹשְׁלֵי־הָאִי בְּסֵבֶר פָּנִים יָפוֹת וַיִּשְׂמְחוּ לִקְרָאתָם. וַתִּמְצָא דַּנָאָה חֵן בְּעֵינֵי דֵקְט, כִּי רָפָה וַעֲנוּגָה הִיא מְאֹד, וַיִּקָּחֶהָ לוֹ לְאִשָּׁה וְאֶת־פֶּרֶס בֶּן־זוּז אִמֵּץ לוֹ לְבֵן.

וַיִּגְדַּל פֶּרֶס וַיְהִי לְעָלֶם. וַיְהִי לִבּוֹ אַמִּיץ וְרוּחוֹ עָשׂוּי לִבְלִי חָת וַיֵּלֶךְ בִּגְּדוֹלוֹת⁷⁷). וְיַחְפֹּץ לִרְאוֹת אֲרָצוֹת וּמְדִינוֹת וְלַעֲשׂוֹת לוֹ שֵׁם תְּהִלָּה. וַיִּוָּעֶץ עִם דֵּקְט, אֲשֶׁר אֲהֵבוֹ, כֶּאֱהֹב בֵּן־אֶת־אָבִיו. וַיֹּאמֶר לוֹ דֵקְט:

– לְכָה, בְּנִי, אֶל־אֶרֶץ מַמְלֶכֶת פּוֹרֵק, אֲבִי כָל־בְּנֵי־שַׁחַץ וּרְהָבִים, וּמָצָאתָ שָׁם אֶת־מֵדוּזָה בִתּוֹ וְּכָרַתָּ אֶת־רֹאשָׁהּ וַהֲבִיאוֹתוֹ אֵלָי.

וַיַּעַשׂ פֶּרֶס כִּדְבַר אָבִיו וַיֵּלֶךְ מִבֵּיתוֹ וַיַּעֲבֹר אֲרָצוֹת וּמְדִינוֹת וַיָּבוֹא אֶל־אֶרֶץ פּוֹרֵק. וַיְהִי אַךְ דַּרְכָּהּ כַּף־רַגְלוֹ בָּאָרֶץ הַזֹּאת וַיִּפְגַּע בַּגְּרָאוֹת שְׁלשׁ בְּנוֹת פּוֹרֵק. וְלַגְּרָאוֹת שֵׂעָר לָבָן מִיּוֹם הִוָּלְדָן וְרַק עַיִן אַחַת וְשֵׁן אַחַת לִשְׁלָשְׁתָּן מוּנָחוֹת בְּתַרְמִיל. וְהָיָה בַחֲפֹץ הָאַחַת לִרְאוֹת דָּבָר וְלָקְחָה אֶת־הָעַיִן מִתּוֹךְ הַתַּרְמִיל וְשָׂמַתָּהּ בַחוֹר, אֲשֶׁר מִתַּחַת לְמִצְחָהּ, וְהִתְבּוֹנְנָה אֶל־הַדָּבָר; וְכַאֲשֶׁר תַּחֲפֹּץ לֶאֱכֹל וְנָתְנָה אֶת־הַשֵּׁן בְּפִיהָ וְטָחֲנָה וְלָעֲסָה אֶת־הַמַּאֲכָל וְהֵשִׂיבָה אוֹתָהּ לִמְקוֹמָהּ. כֵן תַּעֲשֶׂינָה כָּל־הַיָּמִים; וַתְּהִי מְנָת חֶלְקָן – רַק צָרָה וָצָעַר. וַיְהִי כִרְאוֹת אוֹתָן פֶּרֶס וַיִּתְנַפֵּל עֲלֵיהֶן וַיִּגְזֹל מֵאִתָּן אֶת־עֵינָן וְאֵת־שִׁנָּן. וַתִּתְחַנֵּנָּה לוֹ הַגְּרָאוֹת וַתַּשְׁבַּעְנָה אוֹתוֹ בְּשֵׁם הָאֵלִים, לְבַל־יִגְזֹל מֵאִתָּן אֶת־שְׁאֵרִית עֶזְרָן בְּחַיֵי־עָנְיָן וּלְבַל־יַגְדִּיל אֶת־צָרַת נַפְשָׁן. וָיַּעַן אוֹתָן פֶּרֶס וַיֹּאמַר: הָשֵׁב אָשִׁיב לָכֶן גַּם אֶת־שִׁנְּכֶן גַּם אֶת־עֵינְכֶן, אִם תַּרְאֶינָה אוֹתִי אֶת־הַדֶּרֶךְ אֶל־מְקוֹם מוֹשַׁב הַנִּימְפוֹת.

וְלִשְׁלֹשׁ הַגְּרָאוֹת הָאֵלֶּה כּוֹבַע, תַּרְמִיל וְסַנְדָלִּים בַּעֲלֵי־כְנָפַיִם; וְהָיָה כַּחֲבֹש הָאִישׁ אֶת־הַכּוֹבַע לְרֹאשׁוֹ וְהָיָה לְרוֹאֶה וְאֵינוֹ נִרְאֶה, וְכַאֲשֶׁר יִנְעַל אֶת־הַסַּנְדַלִּים עַל־רַגְלָיו וּפָרְשׂוּ אֶת־כַּנִפֵיהֶם וְהֵרִימוּ אֶת־הָאִישׁ מֵעַל־הָאָרֶץ וּנְשָׂאוּהוּ בָאַוֵּר.

וַתִּנְהַגְנָה אוֹתוֹ בְּנוֹת פּוֹרֵק וַתַּרְאֶינָה אוֹתוֹ אֶת־הַדֶּרֶךְ הַהוֹלֵךְ אֶל־אֶרֶץ הַנִּימְפוֹת. וַיָּשֶׁב לַהֵן פֶּרֶס אֶת־עֵינָן וְאֶת־שִׁנָּן. וַתִּשְׂמַחְנָה הַגְּרָאוֹת שִׂמְחָה גְדוֹלָה וַתִּתֵּנָּה לוֹ אֶת־הַכּוֹבַע, אֶת־הַתַּרְמִיל וְאֶת־הַסַּנְדַלִּים. וַיַּחְבּשׁ פֶּרֶס אֶת־הַכּוֹבַע לְרֹאשׁוֹ וַיִּנְעַל אֶת־הַסַּנְדָּלִּים וַיָּשֶׂם אֶת־הַתַּרְמִיל עַל־שִׁכְמוֹ. וַיְהִי לְרוֹאֶה וְאֵינוֹ נִרְאֶה וַיֵּרוֹם מֵעַל־הָאָרֶץ וַיָּעָף. וּבִהְיוֹת פֶּרֶס מְכַבֵּד אֵלִים וּמַקְרִיב קָרְבָּנוֹת לָהֶם, וַיְצַו זוּז לְכָל שׁוֹכְנֵי־אוֹלִימְפוֹס לַעֲזָר־לוֹ בְּדַרְכּוֹ. וַתִּתֵּן אַתּוּנָה לְפֶרֶס מָגֵן מַבְרִיק כִּרְאִי, וְהֶרְמֵס⁷⁸) נָתַן לוֹ מַגָּל עָשׂוּי שֹׁהַם.

וַיִּתְנַשֵּׂא פֶּרֶס וַיָּעָף דֶּרֶךְ הָאַוֵּר אֶל־חֹף יַם־אוֹקְיָנוּס אֶל־מְקוֹם מוֹשַׁב שֶׁלָּשׁ הַגּוֹרְגוֹּנוֹת, אַחְיוֹת הַגְּרָאוֹת וּבְנוֹת פּוֹרֵק. וּמִשְּׁלֹשׁ הַגּוֹרְגּוֹנוֹת, הָיוּ שְׁתַּיִם בְּנוֹת אַלְמָוֶת וְרַק מֵדוּזָה הָיְתָה בַת חֲלוֹף, הִיא מֵדוּזָה, אֲשֶׁר אֶת־רֹאשָׁהּ הָיָה עָלָיו לִכְרֹת. וְהַגּוֹרְגּוֹנוֹת שְׁקוּעוֹת בְּשֵׁנָה עֲמֻקָּה וְשׁוֹכְבוֹת, מִבְּלִי אֲשֶׁר תָּנַעְנָה אֶת־כַּנְפֵיהֶן; עַל־רָאשֵׁיהֶן מִתְפַּתְּלִים נְחָשִׁים שׁוֹרְקִים; עוֹר בְּשָׂרָן מְכֻסֶּה קַשְׂקֶשֶׁת רְהָבִים, מִפִּיהֶן בּוֹלְטוֹת שִׁנַּיִם אֲרֻכּוֹת יְדֵיהֶן עֲשׂוּיוֹת נְחשֶׁת קָלָל וְכַנְפֵיהֶן הַגְּדוֹלוֹת זָהָב סָגוּר⁷⁹).

וְזוּז הֵעִיד בִּבְנוֹ לֵאמֹר: הִשָּׁמֶר־לְךָ מֵהַבִּיט אֶל־הַגּוֹרְגּוֹנוֹת וּמֵהָעִיף עַיִן בִּפְנֵיהֶן, כִּי לֹא יִרְאֵן הָאָדָם וָחָי, כִּי לְאֶבֶן יֵהָפֵךְ. וַיִּתֵּן אֵל־הָאֵלִים אוֹתוֹת לְפֶּרֶס, אֲשֶׁר עַל־פִּיהֶם יֵדַע לְהַבְדִּיל בֵּין מֵדוּזָה לְאַחְיוֹתֶיהָ. וַיְהִי כַאֲשֶׁר קָרַב פֶּרֶס אֶל־מְקוֹם מִשְׁכַּב הַגּוֹרְגּוֹנוֹת וַיָּסֶּב אֶת־פָּנָיו מִנֶּגְדָּן וַיְכוֹנֵן אֶת־מָגִנּוֹ לְמוּל פְּנֵיהֶן. וַתֵּרָאֶה בְּבוּאַת שְׁלֹשׁ הַמִּפְלָצוֹת בַּמָּגֵן. וַיַּרְא פֶּרֶס בַּמָּגֵן אֶת־מַרְאֵה דְמוּת בְּנוֹת הַשַּׁחַץ וַיַּכֵּר עַל־פִּי־הָאוֹתוֹת, אֲשֶׁר נָתַן לוֹ זוּז, אֶת־מֵדוּזָה. וַיָּרֶם פֶּרֶס אֶת־חַרְבּוֹ וַיַּךְ אוֹתָהּ מַכָּה אַחַת וְלֹא שָׁנָה, כִּי פֶּלֶס⁸⁰) פִּלְּסָה אֶת־זְרוֹעוֹ, וַיִּכְרֹת אֶת־רֹאשׁ מֵדוּזָה מֵעָלֶיהָ. וַיְהִי כַאֲשֶׁר נִכְרַת רֹאשָׁהּ – וַיִּפֹּל לָאָרֶץ וַיִּתְגַּלְגֵּל עַל־פְּנֵי־הַחוֹל, אֲשֶׁר עַל־שְׂפַת־הַיָּם. וּמִגְּוִיַּת מֵדוּזָה קָפַץ פֵּגָס – סוּס בַּעַל־כְּנָפַיִם, וַיִּפְרֹשׂ כְּנָפָיו וַיָּעַף הַשָּׁמַיְמָה. וַיֹּאחַז פֶּרֶס בְּפַקַּעַת הַנְּחָשִׁים אֲשֶׁר עַל־רֹאשׁ מֵדוּזָה הַכָּרוּת וַיְשִׂימֶנּוּ בְּתַרְמִילוֹ. וַיַּסְתֵּר אֶת־פָּנָיו בְּמָגִנּוֹ, לְבַל יִרְאֶה אֶת־בְּנוֹת הַמִּפְלֶצֶת וַיִּפֶן וַיֵּלֶךְ מִשָּׁם.

וַיְהִי כִּי הֵקִיצוּ הַגּוֹרְגּוֹנוֹת הַחַיּוֹת מִשְּׁנָּתָן וַתִּרְאֶינָה אֶת־גּוּף אֲחוֹתָן הַמֵּתָה וַתִּפְרֹשְׂנָה אֶת־כַּנְפֵי־זְהָבָן, וַתַּעֲלֶינָה אֵבֶר וַתָּעֹפְנָה וַתִרְדֹּפְנָה אַחֲרֵי הָרוֹצֵחַ לִגְאֹל אֶת־דְּמֵי אֲחוֹתָן מִיָּדוֹ. וַתַּעֲבֹרְנָה הַגּוֹרְגּוֹנוֹת עַל־פְּנֵי־פֶרֶס וְלֹא רָאוּהוּ, כִּי חָבַשׁ אֶת־הַכּוֹבַע הַנִּפְלָא לְרֹאשׁוֹ וַיְהִי לְרוֹאֶה וְאֵינוֹ נִרְאֶה. וַיִּנְעַל פֶּרֶס אֶת־סַנְדַּלָּיו וַיֵּרוֹם מֵעַל־הָאָרֶץ וַיָּעָף לָשׁוּב אֶל־בֵּיתוֹ. וַתִּתְחוֹלֵל פִּתְאֹם רוּחַ־סְעָרָה, אֲשֶׁר כָּמוֹהָ לֹא הָיָתָה, וַתְּטַלְטְלֵהוּ טַלְטֵלָה וַתִּדְּפֵהוּ כְּמוֹץ הָרִים וַתִּקָּחֵהוּ וַתִּשָּׁאֵהוּ אֶל־מִדְבַּר לוּב. וַיִּשְׁתּוֹת דַּם־הָרֹאשׁ הַכָּרוּת אֲשֶׁר בַּשַּׂק הָלֹךְ וְשָׁתֹת עַל־חוֹל לוּב וַיֵּהָפֵךְ הַדָּם לִנְחָשִׁים וְלִפְתָנִים אַרְסִיִּים. וַיִּשְׁרְצוּ הַנְּחָשִׁים בְּמִדְבַּר לוּב וַיִּרְבּוּ וַיַּעַצְמוּ מְאֹד מְאֹד וַיִּרְבְּצוּ שָׁם עַד־הַיּוֹם הַזֶּה. וַתִּשָּׂא הָרוּחַ אֶת־פֶּרֶס יָמָה וַתְּבִיאֵהוּ אֶל־אֶרֶץ מַמְלֶכֶת אַטְלַס. וַיְהִי כַאֲשֶׁר חָדְלָה הָרוּחַ וַיֵּרֶד פֶּרֶס אַרְצָה לָנוּחַ מְעָט. וּלְאַטְלַס יַעַר פֶּלֶא צוֹמֵחַ עֵצִים עוֹשִׂים פְּרִי־זָהָב, וְרַהַב נוֹרָא שׁוֹמֵר אֶת־הַיַּעַר גַּם יוֹמָם גַּם לַיְלָה, כִּי חָרֵד לֵב הַמֶּלֶךְ לִפְרִי זְהָבוֹ וְלֹא הִכְנִיס אוֹרְחִים אֶל־בֵּיתוֹ. וַיִּתְחַנֵּן אֵלָיו הַגִּבּוֹר הַצָּעִיר לְאָסְפוֹ אֶל־בֵּיתוֹ וְלָתֶת־לוֹ לֶחֶם לֶאֱכֹל וּמָקוֹם לָלוּן. וְיֶאֱטֹם הַמֶּלֶךְ אֶת־אָזְנוֹ מִשְּׁמֹע וַיְצַו אֶת־עֲבָדָיו לְהוֹצִיא אֶת־הָאוֹרֵחַ מִבֵּיתוֹ. וַיִּחַר אַף פֶּרֶס וַיִּקְרָא: אִם־מָאֵן אַתָּה לְאָסְפֵנִי אֶל־בֵּיתְךָ וְלָתֶת־לִי מַתְּנַת לָחֶם – וְלָקַחְתָּ אַתָּה מַתָּנָה מִיָּדִי.

וַיּוֹצֵא אֶת־רֹאשׁ מֵדוּזָה מִתּוֹךְ תַּרְמִילוֹ וַיַּסֵּב אֶת־פָּנָיו אֲחוֹרַנִּית וַיַּרְאֵהוּ אֶת־הַמֶּלֶךְ…

וַיֵּהָפֶךְ אַטְלַס לְאֶבֶן וַיֵּעָרֵם לְהַר נִשְׁפֶּה⁸¹).

גַּבּוֹ, רַגְלָיו וּכְתֵפָיו הָיוּ לִטְרָשִׁים⁸²), זְקָנוֹ וּשְׂעָרוֹ נֶהֶפְכוּ לְיַעַר עָבֶה וְרֹאשׁוֹ הִתְנַשֵּׂא מִמַעַל לָעֲנָנִים.

וַיּוֹסֶף פֶּרֶס וַיַּחֲבּשׁ אֶת־כּוֹבַע הַפֶּלֶא לְרֹאשׁוֹ וַיִּנְעַל אֶת־סַנְדַּלָּיו וַיָּשֶׂם אֶת־רֹאשׁ מֵדוּזָה בְּתַרְמִילו וְיִתְנַשֵּׂא מֵעַל־הָאָרֶץ וַיָּעָף הָלֹךְ וָעוּף, עַד־בּוֹאוֹ אֶל־חֻפֵּי אֶרֶץ כּוּשׁ. וְקֶפֶא מוֹלֵךְ אָז בָּאָרֶץ. וַיִּשָּׂא פֶּרֶס עֵינָיו וַיַּרְא וְהִנֵּה אֶל־שֵׁן־סֶלַע זָקוּף, מוּרָט⁸³) וּמְרֻסָּק עַל־יְדֵי־הַגַּלִּים, אֲשֶׁר הִתְנַגְּפוּ אֵלָיו מִבְּלִי חָשָׂךְ, קְשׁוּרָה עַלְמָה יָפָה עַד־מְאֹד. רוּחַ קַל מְנַפְנֵף אֶת־שְׂעָרָהּ הַכּוֹתֵשׁ וּמֵעֵינֶיהָ הַיָּפוֹת יוֹרְדוֹת דְּמָעוֹת. וַיַּחֲשֹׁב פֶּרֶס בָּרִאשׁוֹנָה, כִּי פֶסֶל שַׁיִשׁ לְנֶגֶד עֵינָיו. אוּלָם כַּאֲשֶׁר רָאָה אֶת־תְּנוּעוֹת גֵּוָהּ הַיָּפוֹת וְאֶת־הַדְּמָעוֹת הַיּוֹרְדוֹת מֵעֵינֶיהָ־יוֹנִים, הֵבִין, כִּי לֹא אֶבֶן מֵתָה תִּרְאֶינָה עֵינָיו, כִּי אִם אִשָּׁה חַיָּה וְיָפָה בְּעֶצֶם עֲלוּמֶיהָ. וּמַרְאֵה פְנֵי־הָעַלְמָה וְיָפְיָהּ הִפְלִיאוּ אוֹתוֹ הַפְלֵא וָפֶלֶא, עַד־אֲשֶׁר חִשֵּׁב לִנְפֹּל הַיָּמָה, כִּי שָׁכַח לְהָנִיד אֶת־כְּנָפָיו מֵרֹב הִתְפָּעֲלוּתוֹ.

וַיִּפֶּן פֶּרֶס אֶל־הָעַלְמָה וַיְחַנֵּן אֶת־קוֹלוֹ וַיֹאמַר: הוֹאִילִי־נָא יָפָתִי, וְהַגִּידִי־נָא לִי, אֵיפֹא אֲנִי וּמַה־שְּׁמֵךְ, יָפָתִי, הָרְאוּיָה לְשַׁרְשְרוֹת אֲחֵרוֹת וְשׁוֹנוֹת מֵהַשַּׁרְשְרוֹת אֲשֶׁר שָׂמוּ עָלָיִךְ.

וַתַּחֲרֵשׁ הָעַלְמָה וַתֵּאָלֵם דּוּמִיָּה, כִּי נִכְלְמָה לְדַבֵּר עִם אִישׁ זָר לָהּ. וַתַּחְפֹּץ לְהַסְתִּיר אֶת־פָּנֶיהָ בְיָדֶיהָ, אֲבָל לֹא יָכְלָה, כִּי הַכְּבָלִים לֹא נְתָנוּהָ לְהָרִים יָד אוֹ רָגֶל, וַתֵּבְךְ בְּכִי־תַמְרוּרִים. וַתַּעַל הָעַלְמָה עַל־לִבָּהּ מַחְשֶבֶת פָּחַד, פֶּן יַחְשֹׁב הָאִישׁ הַזָּר, כִּי עַל־חֶטְאָהּ נֶעֶנְשָׁה עֹנֶשׁ קָשֶׁה כָּזֶה, וַתֵּפֶן אֵלָיו וַתַּעַן וַתֹּאמַר:

<

שְׁמִי אַנְדְּרוֹמִידָה, וּבַת קֶפֶא אָנֹכִי, מֶלֶךְ אֶרֶץ כּוּשׁ, אֲשֶׁר אוֹתָהּ תֶּחֱזֶינָה עֵינֶיךָ. וְאִמִּי – אִשָּׁה יָפָה לְהַלֵּל. וַיְהִי הַיּוֹם וַתִּתְפָּאֵר אִמִּי בְּיָפְיָהּ לִפְנֵי־בְנוֹת נִיר, נִימְפוֹת הַיָּם, וַתִּתְנַשֵּׂא בְגַאֲוָתָהּ לֵאמֹר, כִּי יָפָה הִיא מִבְּנוֹת־הַמָּיִם. שָׁמְעוּ הַנִּימְפוֹת אֶת־דִּבְרֵי־אִמִּי וַתִּבְעַר חֲמָתָן כָּאֵשׁ וַתִּתְחַנֵּנָּה אֶל־אֲבִיהֶן לְעָנְשָׁהּ עֹנֶשׁ קָשֶׁה עַל־עַזוּת פָּנֶיהָ. וַיְהִי כִי הֵצִיקוּ לוֹ בְדִבְרֵיהֶן וַיֵּעָתֶּר לַהֶן וָיִּשְׁטֹף אֶת־שְׂדוֹתֵינוּ וַיַּשְׁחֵת אֶת־כָּל־יְבוּל אַדְמָתֵנוּ. וַתִּקְטַן עוֹד זֹאת בְּעֵינָיו וַיִּשְׁלַח מִתּוֹךְ הַיָּם רַהַב נוֹרָא רוֹמֵס וְטוֹרֵף וְאֵין מַצִּיל. וַיַּרְא אָבִי, כִּי כָלְתָה הָרָעָה עַל־אַרְצוֹ, וַיִּתְעַצֵּב אֶל־לִבּוֹ וַיֵּצֶר לוֹ מְאֹד וַיֵּלֶךְ לִדְרשׁ בִּתְרָפִים. וַיַּעֲנוּהוּ הַתְּרָפִים לֵאמֹר: רַק בְּזֹאת יְכֻפַּר עֲוֹן הַמַּלְכָּה וּבְזֹאת תָּסִיר חֲטָאתָהּ, בְּתִתְּךָ אֶת־בְּשַׂר־בִּתְּךָ הַיְחִידָה מַאֲכָל לָאַיִם הַנִּתְעָב. וַיְּמָאֵן הַמֶּלֶךְ לַעֲשׂוֹת אֶת־הַדָּבָר הָרַע הַזֶּה, אַךְ דְּרִישַׁת הָעָם כָּבְדָה עָלָיו. וַיִּכָּנַע וַיְצַו לְאָסְרֵנִי אֶל־הַסֶּלַע וְלְכַפֵּר בְּדָמִי אֶת־פְּנֵי־הָנִּימְפוֹת הַנֶּעֱלָבוֹת.

עוֹד הִיא מְדַבֶּרֶת וְהַיָּם הָיָה לְמֶרְקָחָה, הַגַּלִּים הִתְפַּזְּרוּ וְהֻתָּזוּ⁸⁴) לְכָל־עֵבֶר וּמִתּוֹכָם זִנֵּק⁸⁵) בֶּן־שַׁחַץ נוֹרָא. וַתִּצְעַק בַּת־הַמֶּלֶךְ הַיָּפָה צְעָקָה גְדוֹלָה וְנוֹרָאָה. וַיְהִי בְּהַגִּיעַ קוֹל צַעֲקָתָהּ עַד־אָזְנֵי הַמֶּלֶךְ וְהַמַּלְכָּה וַיְמַהֲרוּ וַיָּרוּצוּ וַיָּבֹאוּ לִרְאוֹת בְּרִגְעֵי חַיֵּי־בִתָּם הָאַחֲרוֹנִים. וְלֹא דִבְּרוּ הַמֶּלֶךְ וְהַמַּלְכָּה דָּבָר, וְלֹא הוֹרִידוּ דְּמָעוֹת וְלֹא הִשְׁמִיעוּ קוֹל אֲנָחָה, כִּי גָדוֹל כְּאֵבָם מְאֹד. וְאוּלָם גָּדוֹל הָיָה צַעַר הָאֵם מִצַעַר הָאָב, בְּדַעְתָּהּ, כִּי הִיא הָיְתָה בְּנֶפֶשׁ בִּתָּה. וַיַּעַמְדוּ הַמֶּלֶךְ וְהַמַּלְכָּה מַחֲרִישִׁים וְנִדְהָמִים לִפְנֵי־בִתָּם הָאֻמְלָלָה וְלִבָּם נִשְׁבָּר מִיּאוּשׁ.

וַיִּכָּמְרוּ רַחֲמֵי פֶּרֶס עַל־הַמֶּלֶךְ קֶפֶא וְעַל־הַמַּלְכָּה וַיִּגַּשׁ אֲלֵיהֶם וַיִּשְׁתַּחוּ וַיֹּאמַר:

שְׁמָעוּנִי, הַמֶּלֶךְ וְהַמַּלְכָּה, וְיִשְׁמְעוּ אֲלֵיכֶם אֵלֵי־נֶצַח. הִנְּנִי פֶּרֶס בֶּן זוּז וְדַנָּאָה בַּת הַמֶּלֶךְ. וְאֵל־הָאֵלִים הָיָה עִמָּדִי וַיַּאַזְרֵנִי כֹחַ וָאַךְ אֶת־הַגּוֹרְגּוֹנוֹת וָאֶגְבַּר עֲלֵיהֶן וְכַנְפֵי פֶלֶא נוֹשְׂאוֹת אוֹתִי בָּאַוֵּר. וְעַתָּה אַל־תִּתְיָאֲשׁוּ וְאַל־יִפֹּל לִבְּכֶם עֲלֵיכֶם, כִּי נָכוֹן אָנֹכִי לְהַצִּיל אֶת־בִּתְּכֶם מִכַּף הָרַהַב וּבְזוּז, מְחוֹלֵל הָרַעַם, אֶבְטַח, כִּי יָדוֹ תַעֲמָד־לִי וְנִלְחַמְתִּי עִם בֶּן הַשַּׁחַץ גַּם אוּכַל לוֹ. אַךְ בְּזֹאת אֵאוֹת לָכֶם, אִם תִּתְּנוּ אֶת־בִּתְּכֶם לִי לְאִשָּׁה. הִנֵּה שְׁמַעְתֶּם אֶת־אִמְרֵי פִי. וְעַתָּה מַהֲרוּ וְהָשִׁיבוּ לִי דָבָר, כִּי הַזְּמַן קָצָר. וַיִּשְׂמְחוּ הַמֶּלֶךְ וְהַמַּלְכָּה שִׂמְחָה גְדוֹלָהּ וַיְחַבְּקוּהוּ וַיְנַשְּׁקוּהוּ וַיִּשָּׁבְעוּ לָתֶת־לוֹ אֶת־בִּתָּם וְגַם שִׁלּוּחִים וּמַתָּנוֹת רַבּוֹת הִבְטִיחוּ לוֹ.

עוֹדָם מְדַבְּרִים וְהָאַיִם הוֹלֵךְ הָלֹךְ וְקָרֹב וַיִּדְמֶה לִסְפִינָה הַנִּשֵּׂאת חִישׁ עַל־פְּנֵי־הַמַּיִם בְּעֶזְרַת מִשּׁוֹטִים מְהִירִים. וַיָּקָם הַגִּבּוֹר וַיִּזְקֹף קוֹמָתוֹ וַיֵּרוֹם מֵעַל־הָאָרֶץ וַיְרַחֵף עַל־פְּנֵי־מֵי הַיָּם וְגַלָּיו. וַיִּפֹּל צֵל הַגִּבּוֹר עַל־פְּנֵי־הַמַּיִם. וַיַּרְא הָאַיִם אֶת־צֵל הַגִּבּוֹר כְּאוֹיֵב הַבָּא לְהוֹצִיא אֶת־טָרְפּוֹ מִפִּיו. וַיַּהֲפֹךְ הָאַיִם אֶת־פָּנָיו אֶל־הַצֵּל. וַיִשְׂתָּעֵר אֵלָיו כַּסּוּפָה, מִנְּחִירָיו יוֹצֵא אֵד וּמִפִּיו עוֹלֶה קָצֶף. וַיַּעַט הָעֶלֶם הַגִּבּוֹר, כְּנֶשֶׁר עוֹטֶה אֶל־טָרְפּוֹ וַיֵּרֶד עַל־גַּב הָרַהַב וַיִּקַּח אֶת־חֶרֶב גְּבוּרָתוֹ, אֲשֶׁר הָרַג בָּהּ אֶת־מֵדוּזָה, וַיִּתְקָעֶהָ בְעָרְפּוֹ עַד־הַנִּצָּב וַיְמַהֵר וַיּוֹצִיאֶנָּה מִגֵּווֹ.

וַיִּקְפֹּץ הָאַיִם מִתּוֹךְ הַמַּיִם קְפִיצָה גְדוֹלָה וַיָּשָׁב וַיִּצְלֹל בְּמַעֲמַקֵּי־תְהוֹם. וַיַּעַל וַיֵּרָאֶה שֵׁנִית מִתּוֹךְ הַמַּיִם וַיִּתְפַּתֵּל וַיִתְעַוֵּת וַיָּשָׁט הֵנָּה וָהֵנָּה כִּזְאֵב עֶרֶב, אֲשֶׁר כְּלָבִים רַבִּים סַבּוּהוּ. וּפֶרֶס הַנִּשָׂא בְכַנְפֵי פְלָאָיו מְעוֹפֵף מִסָּבִיב לָאַיִם וְאֵינֶנּוּ גוֹרֵעַ עֵינוֹ מִמֶּנּוּ. וַיֶּרֶב פֶּרֶס אֶת מַכּוֹתָיו בְּחַרְבּוֹ הַקָּשָׁה, עַד־אֲשֶׁר אָדַם הַיָּם מִדָּמוֹ. וַיִּיעַף הַגִּבּוֹר הַצָּעִיר וְלֹא עָצַר כֹּח עוֹד לָעוֹף עַל־פְּנֵי־הַמַּיִם, וְעוֹד רֶגַע וְנָפַל הַיָּמָה וְהָיָה טֶרֶף לְפִי־הַמִּפְלֶצֶת; וַיִּפְקַח זוּז אֶת עֵינֵי בְנוֹ וַיַּרְא וְהִנֵּה שֵׁן־סֶלַע מְבַצְבֶּצֶת וְעוֹלָה מִתּוֹךְ הַיָּם. וַיֵּרֶד הָעֶלֶם עַל־הַסֶּלַע וְיֹאחַז בָּה בְיָדוֹ הַשְּׂמָאלִית וּבִימִינוֹ הִכָּה אֶת־הָאַיִם עוֹד מַכָּה אַחַת, אֶת הַמַּכָּה הָאַחֲרוֹנָה.

וַיִּתְעַוֵּת גֵּו הָאַיִם וַיַּךְ גַּלִּים וַיִּתְנַשְׂאוּ הַגַּלִּים עַד־שְׁמי־רָקִיעַ. וַיָּמָת הָאַיִם וַיִּשְׂאוּ הַמַּיִם אֶת־נִבְלָתוֹ. וַיְמַהֵר פֶּרֶס וַיִּקְפֹּץ אֶל־הַחֹף וַיְטַפֵּס וַיַּעַל עַל־שֵׁן הַסֶּלַע, אֲשֶׁר בַּת־הַמֶּלֶךְ קְשׁוּרָה אֵלָיו, וַיָּסַר אֶת־כְּבָלֶיהָ מֵעָלֶיהָ. וַתִּשְׂמַח אַנְדְּרוֹמִידָה לִקְרַאת מַצִילָהּ וַחֲתָנָהּ וַתֵּלֶךְ אִתּוֹ הִיא וְהוֹרֶיהָ וַיָּבֹאוּ אֶל־אַרְמוֹנָם לָחֹג אֶת־חַג כְּלוּלוֹת בִּתָּם.

וַיַּעַשׂ הַמֶּלֶךְ מִשְׁתֶּה גָדוֹל לְכָל־שָׂרָיו וַעֲבָדָיו – אֶת מִשְׁתֶּה אַנְדְּרוֹמִיָדָה, וַיֹּאכְלוּ וַיִּשְׁתּוּ וַיִּשְׂמְחוּ. וְעַל־רֹאשׁ שִׂמְחָתָם לֹא שָׁכְחוּ אֶת־יְמֵי־הָרָעָה וִיהַלְּלוּ אֶת־פֶּרֶס מוֹשִׁיעָם וַיָשִּׁירוּ לִכְבוֹדוֹ שִׁירֵי תְהִלָּה.

עוֹד הַקְּעָרוֹת מַהְבִּילוֹת⁸⁶) עַל־הַשֻּׁלְחָנוֹת הָעֲרוּכִים וְהִנֵּה קוֹל שַׁעֲטַת פַּרְסוֹת סוּסִים וְקוֹל רַעַשׁ מִלְחָמָה נִשְׁמַע בַּחֲצַר הָאַרְמוֹן וּבְעוֹד רֶגַע – וְאֶל־הָאַרְמוֹן הִתְפָּרֵץ פִנִי אֲחִי הַמֶּלֶךְ עִם גְּדוּד חֵילוֹ. וּפִנִּי אָהַב אֶת־אַנְדְּרוֹמִידָה בַת אָחִיו אַהֲבָה גְדוֹלָה וַיִּחַזֵּר אַחֲרֶיהָ. וְאוּלָם כַּאֲשֶׁר עָלָה הָאַיִם מִתּוֹךְ גַּלֵּי הַיָּם וַיִּתְנַפֵּל עַל־הָעִיר וַיִּדְרֹס וַיִּטְרֹף אֶת־יוֹשְׁבֶיהָ, נָמַס לִבּוֹ בְקִרְבּוֹ וַיְהִי לְמָיִם. וַיְהִי הַמְּעַט מִמֶּנּוּ, כִּי לֹא בָא לְעֶזְרַת הָעָם הָאֻמְלָל, וַיַּעֲזֹב גַּם אֶת־אֲהוּבָתוֹ לְנַפְשָׁהּ וְלֹא הִתְאַזֵר עֹז לְהַצִּילָה מִכַּף הָרָהַב. וַיְהִי כְשָׁמְעוֹ, כִּי נֶהֱרַג הָאַיִם, וְיֶּאֱסוֹף אֶת־חֵילוֹ וַיָּבֹא עַל־הָעִיר הַשּׁוֹקֶטֶת וְהַבּוֹטַחַת וָיַּחְדֹּר אֶל־הָאַרְמוֹן וַיִּדְרשׁ מֵאֵת־הַמֶּלֶךְ לָתֵת־לוֹ אֶת־אַנְדְּרוֹמִידָה לְאִשָּׁה. וַיְיָרֵא פִנִי עַל־הַמֶּלֶךְ וַיְזָרֵה אֵימִים וַיָּרָץ מֵחֶדֶר לְחֶדֶר לִמְצֹא אֶת־אַנְדְּרוֹמִידָה. וַיְהִי כִרְאוֹתוֹ אֶת־פֶּרֶס יוֹשֵׁב עַל־יַד בַּת־אָחִיו הַיְפֵהפִיָּה וּמְדַבֵּר בְּאָזְנָהּ דִּבְרֵי אַהֲבָה וָחֵן וַיִּחַר אַפּוֹ וַיְכוֹנֵן אֶת־חֲנִיתוֹ אֵלָיו וַיִּקְרָא וַיֹּאמַר:

< הִנְּנִי אֵלֶיךָ, גֵר גָּרוּר, וְנָטִיתִי אֶת־יָדִי עָלֶיךָ וּבְדָמֶיךָ אֶרְחַץ אֶת־חֶרְפָּתִי, אֲשֶׁר הֶעֱטִיתָ עָלָי, בְּקַחְתְּךָ אֶת־כַּלָּתִי מִמֶּנִי. וְעַתָּה צְעַק־נָא אֶל־זוּז אָבִיךְ, אוּלַי יַעֲזָרְךָ מִיָּדִי.

וַיַּחְפֹּץ פִנִּי לְהָטִיל אֶת־חֲנִיתוֹ עַל־פֶּרֶס וּלְהַכּוֹתוֹ. וַיְמַהֵר הַמֶּלֶךְ וַיִּקְפֹץ מִמְּקוֹם מוֹשָׁבוֹ וַיִּשָּׂא אֶת־קוֹלוֹ וַיֹּאמַר:

– אִישׁ רַע וּבֶן־בְּלִיַּעַל! הֲתַחְפֹּץ לְהוֹסִיף חֵטְא עַל־פִּשְׁעֶךָ? הַעֲלֵה נָא עַל־לִבֶּךָ: הַאִם פֶּרֶס גָּזַל מִיָּדְךָ אֶת־אֲהוּבָתֶךָ? הֲלֹא אַתָּה עֲזַבְתָּהּ לְנַפְשָׁהּ, כַּאֲשֶׁר הוֹבִילוּ אוֹתָהּ כְּשֶׂה לַטָּבַח. אֵיפֹה הָיִיתָ, כַּאֲשֶׁר רַגְלֶיהָ הֻגְּשׁוּ לִנְּחֻשְׁתַּיִם, כַּאֲשֶׁר אָסְרוּ אוֹתָהּ אֶל־שֵׁן הַסָּלַע? הֵן גּוֹאֲלָהּ, קְרוֹבָהּ וּבְחִירָהּ הָיִיתָ, וּמַדּוּעַ לֹא לָקַחְתָּ אֶת־חֶרֶב גְּבוּרָתְךָ בְּיָדֶךָ? מַדּוּעַ לֹא מִהַרְתָּ אֶל־הַסֶּלַע לְהִלָּחֶם עִם־הָרַהַב, לְהָגֵן עַל־חַיֵּי כַלָּתְךָ וּלְקַבֵּל אוֹתָהּ שְׂכַר פְּעוּלָתֶךָ? וְעַתָּה מַה־לְּךָ וְלַגִּבּוֹר הַצָּעִיר, אֲשֶׁר הֵשִׁיב לִי אֶת־שְׁאֵרִית נֶחָמָתִי לִימֵי־זִקְנָתִי, כִּי בָאתָ לְהִלָּחֵם אִתּוֹ!

וַיַּחֲרֵשׁ פִנִּי וְלֹא עָנָה דָבָר. וְאוּלָם קִצְפּוֹ הָלַךְ הָלֹךְ וְגָדוֹל וְאֶת־עֵינָיו, אֲשֶׁר בָּעֲרוּ כַלַּפִּידִים, הֶעֱבִיר חֲלִיפוֹת מִפֶּרֶס עַל־אָחִיו, כְּמוֹ לוּ שִׁקֵל בְּדַעְתּוֹ, אֶת־מִי יַכֶּה רִאשׁוֹנָה. וַיָּרֶם פִנִּי אֶת־יָדוֹ וַיָּטֶל אֶת־חֲנִיתוֹ עַל פֶּרֶס, אֲבָל הֶחֱטִיא אֶת־הַמַּטָּרָה וַתִּתָּקַע הַחֲנִית בַּקִּיר.

וַיִּקְצֹף פֶּרֶס וַיָּקָם וַיַּעֲמֹד עַל־רַגְלָיו וַיָּרֶם אֶת־חֲנִיתוֹ. וַיַּחְפֹּץ לְהַכּוֹת אֶת־פִנִּי. וַיַּרְא פִנֵּי וַיָּנָס וַיִּתְחַבֵּא מֵאַחֲרֵי הַמִּזְבֵּחַ. וַתִּפְגַּע הַחֲנִית בְּאִישׁ־צָבָא מֵחֵיל פִנִּי וַתַּפִּילֵהוּ חָלָל. וְחֵיל פִנִּי, אֲשֶׁר הִתְפָּרֵץ הָאַרְמוֹנָה, הוֹלֵךְ הָלֹךְ וָרָב. וַיֹּאחֲזוּ הַקְּרוּאִים בִּכְלִי־נִשְׁקָם וַיִּלָחֲמוּ עִם חֵיל פִנִּי וַתְּהִי הַמִּלְחָמָה חֲזָקָה וּכְבֵדָה. וַיַּרְא פֶּרֶס נִפְלָאוֹת בַּמִּלְחָמָה וַיִּגְזֹר עַל־יָמִין וְעַל־שְׂמֹאל וַיַּפֵּל חֲלָלִים רַבִּים מֵחֵיל הָאוֹיְבִים. אֲבָל חֵיל פִנִּי הָיָה רַב וְעָצוּם; וַיַּרְא פֶּרֶס, כִּי תִקְצַר יָדוֹ לְהַכְרִיעַ בְּחַרְבּוֹ אֶת־כָּל־אוֹיְבָיו וַיִּזְכֹּר אֶת רֹאשׁ מֵדוּזָה אֲשֶׁר בְּתַרְמִילוֹ, וַיִּקְרָא וַיֹּאמַר:

שִׁמְעוּ נָא, אַנְשֵׁי בְלִיָּעַל! סוּרוּ נָא מִזֶּה בְּעוֹד עֵת. דְּעוּ נָא, כִּי אוֹהֵב נֶאֱמָן לִי, אֲשֶׁר יָבֹא לְעֶזְרָתִי וַאֲשֶׁר לֹא יִבְגֹּד בִּי לְעוֹלָם. אוֹי לָכֶם, אִם אֶקְרָא לְעֶזְרָתֹו, כִּי תִנָּחֲמוּ בְאַחֲרִיתְכֶם. וְאַתֶּם, רֵעָי, הָסֵבּוּ אֶת־עֵינֵיכֶם הַצִּדָּה, פֶּן תִּסָּפוּ גַם אַתֶּם בַּעֲוֹן הָרְשָׁעִים הָאֵלֶּה! וּבְדַבְּרוֹ אֶת־הַדְבָרִים הָאֵלֶּה שָׁלַח יָדוֹ אֶל־הַתַּרְמִיל, אֲשֶׁר הָיָה תָמִיד עַל־שִׁכְמוֹ, וַיּוֹצֵא מִתּוֹכוֹ אֶת־רֹאשׁ מֵדוּזָה וַיְכוֹנְנֵהוּ אֶל־מוּל פְּנֵי הָאִישׁ, אֲשֶׁר הִתְכּוֹנֵן לְהִתְנַפֵּל עָלָיו.

לַשָּׁוְא תַּשְׁחִית אֶת־דְּבָרֶיךָ! – קָרָא הָאִישׁ וְקוֹלוֹ מָלֵא לַעַג וָבוּז, – כִּי לֹא תִמְצָא בְקִרְבֵּנוּ אִישׁ מוּג לֵב אֲשֶׁר יֵחַת מִפְּנֵי כְשָׁפֶיךָ! וַיֵּט אֶת־יָדוֹ וַיָּרֶם אֶת־חֲנִיתוֹ וַיֹּאמֶר לְהַכּוֹת בָּהּ אֶת־פֶּרֶס. אֲבָל פִּתְאֹם נֶהְפַּךְ לְאָבֶן. וַיֵּהָפְכוּ לְאֶבֶן גַּם הַשֵּׁנִי, גַּם הַשְּׁלִישִׁי גַּם כָּל־הַבָּאִים אַחֲרֵיהֶם, אִישׁ אִישׁ בְּמַעֲמָדוֹ אֲשֶׁר עָמָד: זֶה בַּהֲרִימוֹ אֶת־חָרְבּוֹ הַחַדָּה וְזֶה בְדַרְכוֹ אֶת־קַשְׁתּוֹ אֵיתָן. וַיִּמְעַט גְּדוּד פִנִּי הָלֹךְ וּמָעֹט וְלֹא נִשְׁאַר מִמֶּנּוּ כִּי אִם כְּעֶשְׂרִים אִישׁ. וַיִּקְרָא אֲלֵיהֶם פֶּרֶס לְשָׁלוֹם. וְיַכְבִּידוּ הָרְשָׁעִים אֶת־לִבָּם וַיּוֹסִיפוּ לָלֶכֶת אִתּוֹ בַּקֶּרֵי. וַיָּרֶם פֶּרֶס אֶת־רֹאשׁ־מֵדוּזָה לְמַעֲלָה וַיַּרְאֵהוּ אֶת־אַנְשֵׁי פִנִּי וַיְאַבְּנֵם. וַיְהִי כִרְאוֹת פִנִּי אֶת־מוֹת־אֲנָשָׁיו הַנּוֹרָא וַיִּירָא יִרְאָה גְדוֹלָה וִיִּנָחֶם עַל־הָרָעָה אֲשֶׁר עָשָׂה. וַיֵּצֵא פִנִּי מִמְּקוֹם מַחֲבוֹאוֹ וַיָּרָץ אֶל־בֵּין אֲנָשָׁיו הַמְּאֻבָּנִים וַיִּגַּשׁ אֲלֵיהֶם וַיִּקְרָא לָהֶם בְּשֵׁם וַיֹּאחַז בִּידֵיהֶם, כִּי לֹא הֶאֱמִין לְמַרְאָה עֵינָיו. אַךְ לְקוֹלוֹ לֹא הֵקִיצוּ וְלֹא הִתְעוֹרְרוּ מִשְּׁנָתָם, כִּי לֹא בְנֵי־אָדָם חַיִּים רָאָה לְנֶגֶד עֵינָיו, כִּי אִם שָׁיִשׁ. וְיִכָּנַע לִבּוֹ הֶעָרֵל וַתִּשְׁפַּל גַּאֲוָתוֹ וַיִּתְחַנֵּן אֶל־פֶּרֶס לֵאמֹר:

– סְלַח נָא לִי, אֲדוֹנָי, כְּגֹדֶל חַסְדֶּךָ וְאַל־תּוֹרִידֵנִי שְׁאוֹלָה וּבְאֵלִי־נֵצַח אֲנִי נִשְׂבַּע, אִם אֶרְאֶה אֶת־הָאָרֶץ הַזֹּאת וְאֵת־פְּנֵי־אַנְדְּרוֹמִידָה.

וַיָּסֶב־אֶת פָּנָיו מִמּוּל רֹאשׁ מֵדוּזָה הַנּוֹרָא. וּפֶרֶס נָשָׂא אֶת־עֵינָיו וַיַּרְא אֶת־פִּגְרֵי אוֹהֲבָיו הַמִּתְבּוֹסְסִים בִּדְמֵיהֶם וַיִּקְרָא בְקֶצֶף:

– הוֹי בּוֹגֵד וְאִישׁ חָמָס! לֹא תִּמָּלֵט מִיָּדִי וְהַעִידוֹתָ אַתָּה בְּמַעֲשֵׂה נַבְלוּתֶךָ.

וַיֹּאחַז פֶּרֶס בְּעֹרֶף פִנִּי וַיָּסֶב אֶת־פְּנֵי־אוֹיְבוֹ אֶל־מוּל הָרֹאשׁ הַנּוֹרָא וַיַּהַפְכֵהוּ לְאָבֶן. וְיַעַן כִּי הִתְרַפֵּס פִנִּי לִפְנֵי־פֶּרֶס וַיִּרְהָבֵהוּ, וַיְהִי לִנְצִיב הָאֶבֶן, אֲשֶׁר נֶהְפַּך פִנִּי, דְּמוּת אִישׁ נִכְנָע וְשָׁפָל, אֲשֶׁר גַּבּוֹ שַׁח וְיָדָיו רָפוּ וְעֵינָיו מְפִיקוֹת יִרְאָה וָפַחַד וַיִּדְמֶה לְעֶבֶד נִקְלֶה.

וַיִּפָּרְדוּ פֶּרֶס וְאִשְׁתּוֹ מֵעִם הַמֶּלֶךְ וְהַמַּלְכָּה וַיֵּלְכוּ אֶל־אִי סֵרִיף וַיָּבֹאוּ שָׁם בְּשָׁלוֹם.

וַיִּשְׂמְחוּ דַנָּאָה וְאִישָׁהּ לִקְרָאתָם וַיֵּשְׁבוּ יַחְדָּו וַיִּרְאוּ חַיִּים וַיִּתְעַנְּגוּ עַל־רֹב טוּב.

וַיְהִי הַיּוֹם וַיֵּלֶךְ פֶּרֶס אֶל־אֶרֶץ הַפֵּלַסְגִּים⁸⁷) לָקַחַת חֵלֶק בַּמִּשְׂחָקִים, אֲשֶׁר נֶעֱרְכוּ שָׁם מִדֵּי שָׁנָה בְשָׁנָה. וַיָּבֹאוּ כָל־מַלְכֵי־יָוָן וְגִבּוֹרֶיהָ לְהִשְׁתַּתֵּף בַּמִּשְׂחָקִים הָאֵלֶּה. וַיָּבֹא גַּם אַקְרִיז בְּתוֹךְ הַבָּאִים. וַיְהִי בִקְלֹעַ פֶּרֶס אֶת מַעֲגַלְתּוֹ⁸⁸) וַיַּחְטֵא אֶת־הַמַּטָּרָה וַיִּפְגַע בְּאַקְרִיז וַיְמִיתֵהוּ. כָּכָה בָאָה נְבוּאַת הַתְּרָפִים, אֲשֶׁר נִבְּאוּ לְאַקְרִיז, כִּי מִיַּד־נֶכְדּוֹ יָמוּת. וַיִּוָּדַע הַדָּבָר לְפֶרֶס, כִּי הֵמִית בִּשְׁגָגָה אֶת־אֲבִי־אִמּוֹ, וַיִּסְפֹּד עָלָיו מִסְפֵּד גָּדוֹל וַיִּקְבְּרֵהוּ בְּכָבוֹד וּבִיקָר וְאֶת־מַמְלַכְתּוֹ, אֲשֶׁר יָרַשׁ, הֶחֱלִיף בַּאֲחָרֶת.

וַיַּעַבְרוּ יְמֵי הָאֵבֶל וַיָּשָׁב אֶל־אִשְׁתּוֹ וַיִּרְאוּ חַיִּים טוֹבִים וְיַאֲרִיכוּ יָמִים. וַיִּוָּלְדוּ לוֹ בָּנִים גִבּוֹרִים, אֲשֶׁר בְּמַעֲשֵׂי גְבוּרָתָם הוֹסִיפוּ כָבוֹד עַל־שֵׁם תְּהִלָּתוֹ.

ח.

 

יָוָן.    🔗

בְּעִיר אַתּוּנָה מָלַךְ מֶלֶךְ וּשְׁמוֹ אֲרָכֶת. וְאִשְׁתּוֹ הַמַּלְכָּה יַלְדָּה לוֹ בַת וַתִּקְרָא אֶת־שְׁמָהּ קְרוּזָה. וַתִּגְדַּל הַיַּלְדָּה וַתִּיף מְאֹד וַתְּהִי לְחֶמְדַּת כָּל־רוֹאֶיהָ. וַיְהִי הַיּוֹם וַתֵּצֵא קְרוּזָה מֵאַרְמוֹן אָבִיהָ לָשׂוּחַ בַּשָּׂדֶה. וַיִּרְאֶהָ אַפּוֹלָה, אֵל הַשִּׁירָה וְהַזִּמְרָה, אֲשֶׁר הִתְחַפֵּשׂ לְעֶלֶם יְפֵה עֵינַיִם, וַיְדַבֵּר עַל־לִבָּהּ. וַיִּמְצָא אַפּוֹלָה חֵן בְּעֵינֵי הַנַּעֲרָה וַתְּהִי לוֹ לְאִשָּׁה וְאֶת־פִּי־אָבִיהָ לֹא שָׁאָלָה. וַיִּחַר הַדָּבָר לְאֲרֶכֶת וַיְשַׁלַּח אֶת־בִּתּוֹ מִבֵּיתוֹ וַיֹּאמֶר לָהּ: צְאִי מִזֶּה וְאַל־תּוֹסִיפִי רְאוֹת אֶת־פָּנַי, כִּי בְיוֹם רְאוֹתֵךְ פָּנַי, מוֹת תָּמוּתִי. וַתַּעֲזֹב קְרוּזָה אֶת־בֵּית־אָבִיהָ וַתֵּשֶׁב מִחוּץ לָעִיר, בְּאֹהֶל רוֹעֶה וַתִּמְצָא נֹחַם בְּאַהֲבַת אִישָּׁהּ.

וַיְהִי כַעֲבֹר שָׁנָה אַחֲרֵי חֲתוּנָתָם וַתֵּלֶד קְרוּזָה לְאַפּוֹלָה בֵן. וַיֻּגָּד לַאֲרֶכֶת לֵאמֹר: הִנֵּה יָלְדָה בִתְּךָ בֵן לְאַפּוֹלָה. וַיִּכְעַס אֲרֶכֶתָּ כַּעַס גָּדוֹל וַיִּשָּׂבַע לֵאמֹר: חֵי זוּז, אִם יִחְיֶה עַד־אוֹר הַבֹּקֶר! וַיִּשְׁלַח אֲרֶכֶת אֲנָשִׁים לָקַחַת אֶת־הַיֶּלֶד וְּלְהָרְגֵהוּ. וַיִּוָּדַעַ הַדָּבָר לִקְרוּזָה וַתִּקַּח סַל חוֹרִי⁸⁹) וַתְּרַפְּדֵהוּ אֵטוּן⁹⁰) מִצְרַיִם וַתָּשֶׂם בּוֹ אֶת־הַיָּלֶד. וַתִּשָּׂא אֶת־הַסַּל וְאֶת־הַיֶּלֶד אֲשֶׁר בּוֹ עַל־רֹאשׁ הַר גָּבֹהַּ וְתָלוּל וַתְּשִׂימֵהוּ בִנְקִיק סָלַע. וַתִּפֹּל קְרוּזָה עַל־בִּרְכֶּיהָ וַתְּפָרֵשׂ כַּפֶּיהָ וַתִּתְפַּלֵּל לֵאמֹר: אָנָּא, אֵלֵי הַחֶסֶד וְהָרַחֲמִים! הֱיוּ־נָא לְמָגֵן עַל־בְּנִי מִכַּעַס אָבִי, כִּי אִם אָנֹכִי חָטָאתִי, בְּנִי מֶה חָטָא?

וַיְהִי כַאֲשֶׁר כִּלְּתָה לְהִתְפַּלֵּל, וַתּוֹצֵא אֶת־בְּנָהּ מִתּוֹךְ סַלּוֹ וַתַּלְבִּישֵׁהוּ אֶת־כֻּתָּנְתָּהּ, כְּתֹנֶת הַזָּהָב, אֲשֶׁר לָבְשָׁה בְּיַלְדּוּתָהּ, לְמַעַן תַּכִּירֶנּוּ, כַּאֲשֶׁר יִגְדַּל.

וְגַם לֵב אַפּוֹלָה חָרֵד לִבְנוֹ וַיִּקְרָא לְאָחִיו הֶרְמֵס בַּעַל־הַכְּנָפַיִם. וְהֶרְמֵס מְשׁוֹטֵט תָמִיד בֵּין הַשָּׁמַיִם וּבֵין הָאָרֶץ בְּמַלְאֲכוּת הָאֵלִים.

וַיֹּאמֶר אַפּוֹלָה לְאָחִיו: אָחִי! הִנֵּה קְרוּזָה בַּת אֲרֶכְתָּ מֶלֶךְ אַתּוּנָה, בַּת הָאָדָם, יָלְדָּה לִי בֵן, וַאֲרֶכֶת אָבִיהָ מִתְנַכֵּל לוֹ לַהֲמִיתוֹ. וְעַתָּה, אָחִי, עֲשֵׂה־נָא עִמִּי חֶסֶד וֶאֱמֶת וְהִצַּלְתָּ אֶת־בְּנִי מִכַּף רוֹדְפֵהוּ. עוּפָה־נָא אֶל־הָהָר, אֲשֶׁר עַל־יַד־אַתּוּנָה וּמָצָאתָ שָם בִּנְקִיק סֶלַע אֶת־בְּנִי יָשֵׁן בַּסַּל, וּלְקַחְתּוֹ וַהֲבִיאוֹתִיו אֶל־עִיר דֶּלְפִי וְשַׂמְתָּהוּ בְּפֶתַח בֵּית־הַתְּרָפִים אֲשֶׁר לִי וְשָׁם אָשִׂים אֶת עֵינִי עָלָיו.

וַיִּפְרֹשׂ הֶרְמֵס אֶת־כְּנָפָיו וַיָּעָף לְדַרְכּוֹ. וַיָּבֹא אַתּוּנָה וַיִּמְצָא אֶת־נְקִיק הַסֶּלַע וַיִּקַּח אֶת־הַסַּל וְאֶת־הַיֶּלֶד אֲשֶׁר בּוֹ וַיִּשָּׂאֵנוּ אֶל־עִיר דֶּלְפִי. וַיָּבֹא שָׁמָה הֶרְמֵס, כַּאֲשֶׁר פָּרַשׂ הַלַּיְלָה אֶת־צֵל כְּנָפָיו עַל־פְּנֵי הָאָרֶץ. וַיָּשֶׂם הֶרְמֵס אֶת־הַסַּל בְּפֶתַח בֵּית־הַתְּרָפִים וְאֶת־מִכְסֵהוּ הַסִיר, לְמַעַן עוֹרֵר אֶת־תְּשׂוּמַת לֵב הָעוֹבְרִים וְהַבָּאִים עַל־הַיֶּלֶד.

הַשֶּׁמֶשׁ יָצָא עַל־הָאָרֶץ וְכֹהֶנֶת בֵּית־הַתְּרָפִים הוֹלֶכֶת אֵל־בֵּית־מִקְדָּשָׁהּ לַעֲבוֹד עֲבוֹדָתָהּ. וַתִּשָּׂא אֶת־עֵינֶיהָ וַתֵּרֶא סַל בְּפֶתַח הַבַּיִת וּבַסַּל יֶלֶד יָשֵׁן. וַתִּשְׁלַח רֶגֶל לְהָסִיר אֶת־הַסַּל מֵעַל־מִפְתַּן הַבַּיִת הַצִּדָּה. וְאוּלָם כַּאֲשֶׁר הִתְבּוֹנְנָה בִּפְנֵי הַיֶּלֶד הַמְּלֵאִים הוד אֵלִים וַתָּבֹא בָהּ רוּחַ חֵן וְתַחֲנוּנִים וַיִּכָּמְרוּ רַחֲמֶיהָ עָלָיו. וַתֶּאֱסֹף אֶת־הַיֶּלֶד אֶל־בֵּיתָהּ וַתְּהִי לוֹ לְאֵם. וַתְּגַדְּלֵהוּ וַתְּחַנְּכֵהוּ וַתְּלַמְּדֵהוּ מוּסָר וַיִּמְצָא חֵן בְּעֵינֵי אֵלִים וְאָדָם. וַיְהִי כַאֲשֶׁר גָּדַל הַיֶּלֶד וַיְהִי לְעֶלֶם יָפֶה וַיְשָׁרֵת אֶת־אַפּוֹלָה, וְיוֹשְׁבֵי דֶלְפִי שָׂמוּהוּ לְגִזְבָּר וּלְשַׂר אוֹצְרוֹת הַבָּיִת.

וַיְהִי כִי רַבּוּ הַיָּמִים וְאַפּוֹלָה לֹא פָּקַד⁹¹) אֶת אִשְׁתּוֹ. וַתֹּאמֶר קְרוּזָה אֶל־לִבָּהּ: אֵין זֹאת, כִּי שְׁכֵחֲנִי אִישִׁי וַיַּעַזְבֵנִי. וַתִּתְעַצֵּב אֶל־לִבָּהּ וַיֵּצֶר לָהּ מְאֹד, כִּי אִישָּׁה עֲזָבָהּ וּבְנָה בְּאֶרֶץ רְחוֹקָה וְהִיא בוֹדֵדָה וְגַלְמוּדָה. וַיְהִי כַאֲשֶׁר נוֹדַע הַדָּבָר לַאֲרֶכֶת וַיֵּהָפֵךְ⁹²) לִבּוֹ אֵלֶיהָ וַיַּאַסְפֶנָּה אֶל־אַרְמוֹנוֹ. וַתֵּשֵׁב קְרוּזָה אַלְמָנָה חַיָּה צְרוּרָה וְשַׁכּוּלָה בְּבֵית־אָבִיהָ.

וּבַיָמִים הָהֵם מִלְחָמָה בֵּין הָאַתּוּנִים וּבֵין יוֹשְׁבֵי אִי אֶבָּאָה. וְהַמִּלְחָמָה אֲרֻכָּה וְקָשָׁה מְאֹד, כִּי הָיוּ יוֹשְׁבֵי הָאִי אַנְשֵׁי חַיִל, מְלֻמְּדֵי מִלְחָמָה וְאַמִּיצֵי לֵב. וַתִּקֶשׁ יָדָם עַל־יוֹשְׁבֵי אַתּוּנָה.

וַיְהִי כִי רָאוּ הָאַתּוּנִים, כִּי יָדָם עַל הַתַּחְתּוֹנָה וַיִּקְרְאוּ עֲצָרָה וַיָּצוּמוּ צוֹם וַיִּתְפַּלְּלוּ אֶל־הָאֵלִים, כִּי יַעַזְרוּ לָהֶם מֵהַר אוֹלִימְפּ. וְכָרוֹז⁹³) יָצָא וַיַּכְרֵז בְּכָל־הָעִיר: כֹּה אָמַר הַמֶּלֶךְ: מִי הָאִישׁ, אֲשֶׁר יָקוּם וְהִכָּה אֶת־הַאֶבָּאִים, יַעַשְׁרֶנּוּ הַמֶּלֶךְ עשֶׁר רַב וְאֶת־בִּתּוֹ קְרוּזָה יִתֵּן לוֹ לְאִשָּׁה. וַיָּבֹא קְשׂוּט בֵּן־אֵאֹל⁹⁴) בֶּן־זוּז, אִישׁ אַחֵאָה, אֲשֶׁר עָזַב זֶה לֹא כְבַר אֶת־עִירוֹ וְאֶת־מוֹלַדְתּוֹ לְהֵאָחֵז בָּאַתּוּנָה. וַיִּגַּשׁ אֶל־הַמֶּלֶךְ וַיִּשָּׁבַע לֵאמֹר: כֹּה יַעֲשֶׂה לִי זוּז וְכֹה יוֹסִיף, אִם לֹא אַכֶּה אֶת־אוֹיְבֶיךָ וְשַׂמְתִּים עָפָר תַּחַת כַּף רַגְלֶךָ.

וַיָּקָם קְשׂוּט וַיַּעֲמֹד בְּרֹאשׁ צְבָא הַמֶּלֶךְ וַיֵּצֵא לִקְרַאת הָאֶבָּאִים וַיַּכֵּם וַיְנִיסֵם בְּשִׁבְעָה דְּרָכִים.

וַיַּעַשׂ הַמֶּלֶךְ, כַּאֲשֶׁר אָמַר, וַיִּתֵּן לִקְשׂוּט כֶּסֶף וְזָהָב וַאֲבָנִים יְקָרוֹת וְגַם אֶת־בִּתּוֹ נָתַן לוֹ לְאִשָּׁה. וְלֹא הִגִּידָה קְרוּזָה לִקְשׂוּט, כִּי הָיְתָה אִשָּׁה לְאַפּוֹלָה וְגַם בֵּן יָלְדָה לוֹ, כִּי מִצְוַת אָבִיהָ עָלֶיהָ חֲזָקָה, אֲשֶׁר לֹא תַגִּיד.

וַיְהִי כִי עָבְרוּ הַיָּמִים וַתִּנָּחֵם קְרוּזָה אַחֲרֵי אַפּוֹלָה וַתֹּאהַב אֶת־קְשׂוּט בַּעֲלָהּ. וַיִּחַר הַדָּבָר לְאַפּוֹלָה וַיִּמְנַע מִמֶּנָּה בָנִים. וַתֹּאמֶר קְרוּזָה: אִם אֵין לִי בָנִים, לָמָּה לִי חַיִּים? וַתֵּלֶךְ לִדְרשׁ אֶת־הָאֵלִים. וַיַּעֲנוּ אוֹתָהּ הָאֵלִים לֵאמֹר: לְכִי אֶל־דֶּלְפִי אֶל־בֵּית־הַתְּרָפִים אֲשֶׁר לְאַפּוֹלָה וְהִקְרַבְתְּ קָרְבָּן עַל־מִזְבְּחוֹ לְכַפֵּר פָּנָיו וְנָתַן לָךְ בֵּן. וַתְּדַבֵּר קְרוּזָה עַל־לֵב אִישָּׁה לָלֶכֶת אֶל־עִיר דֶּלְפִי וּלְהַקְרִיב קָרְבָּנוֹת עַל־מִזְבַּח אַפּוֹלָה, אוּלַי תִּבָּנֶה⁹⁵) מִשָּׁם. וַיִּשְׁמַע קְשׂוּט בְּקוֹל אִשְׁתּוֹ וַיֵּלֶךְ אִתָּהּ עִירָה דֶלְפִי.

וַיְהִי כַאֲשֶׁר הִקְרִיב קְשׂוּט אֶל־שַׁעַר הָעִיר, וַיָּסַר מִן הַמְּסִלָּה לָלֶכֶת אֶל־בֵּית טְרוֹפוֹן⁹⁶) וְלִדְרֹשׁ בִּתְרָפָיו. וַיֵּלֵכוּ גַם הַשָּׂרִים וְהָעֲבָדִים אַחֲרֵי הַמֶּלֶךְ וַתִּשָּׁאֶר קְרוּזָה לְבַדָּהּ. וַתִּשָּׂא אֶת־עֵינֶיהָ וַתֵּרֶא – וְהִנֵּה עֶלֶם כִּפֵּחַ⁹⁷) וִיפֵה־תֹאֵר הוֹלֵךְ לִקְרָאתָהּ, וּבִידֵי הָעֶלֶם צְרוֹר עַנְפֵי דַּפְנָה, אֲשֶׁר קָטַף לְפָאֵר בָּהֶם אֶת־עַמּוּדֵי שַׁעַר־הַמִּקְדָּשׁ, כְּמִשְׁפָּטוֹ יוֹם יוֹם.

וַיַּרְא בֶּן־אַפּוֹלָה אִשָּׁה כְּבוּדָה הוֹלֶכֶת וְקֵרְבָה אֶל־הַמִּקְדָּשׁ וְעֵינֶיהָ זוֹלְגוֹת דְּמָעוֹת וַיִּכָּמְרוּ רַחֲמָיו וַיִּגַּשׁ אֵלֶיהָ וַיֹּאמַר:

– אַל־נָא יִחַר אַף גְּבִרְתִּי בְּעַבְדֵּךְ וְאֶשְׁאָלֵךְ: מַה־לָּךָ כִּי בָכִית?

וַתֵּאָנַח קְרוּזָה וַתֹּאמַר: נוּדָה לִי, עֶלֶם יְפֵה־עֵינָיִם, כִּי גָדוֹל כַּיָּם שִׁבְרִי, וְיַד הָאֵלִים קָשְׁתָה עָלַי מְאֹד.

וַיִּשְׁאַל הַנַּעַר עוֹד וַיֹּאמַר: אָנָּא, גְבִרְתִּי! הַגִּידִי נָא לִי, מִי אַתְּ וּמַה־מִּשְׁפַּחְתֵּךְ?

וַתַּעַן קְרוּזָה וַתֹּאמַר: קְרוּזָה אֲנִי, בַּת אֲרֶכֶת, מֶלֶךְ אַתּוּנָה.

וַיִּקְרָא הָעֶלֶם בְּשִׂמְחָה וַיֹּאמַר: בְּרוּכָה אֶת וּבָרוּךְ בּוֹאֵךְ הֲלוֹם, בַּת אֲרֶכֶת הַמְּהֻלָּלָה! הֲלֹא אַרְצֵךְ הִיא צְבִי כָּל־הָאֲרָצוֹת, כְּבוֹד אָבִיךָ מָלֵא עוֹלָם וּבְמִשְׁפַּחְתְּךָ יִתְבָּרְכוּ כָּל־הַגּוֹיִם.

וְעַתָּה הִנֵּה־נָא הוֹאַלְתִּי לְדַבֵּר אֶל־גְבִרְתִּי: הָאֱמֶת כָּל־הַשְּׁמוּעָה מַעֲבִירִים הָעָם עַל־מִשְׁפַּחְתְּךָ? הֲלֹא שָׁמָעְתִּי אוֹמְרִים, כִי אֲבִי־זְקֵנֵךְ צָמַח מִן־הָאֲדָמָה כַּחֲצִיר שָׂדֶה; וְכִי פֶּלֶס אַתּוּנָה לָקְחָה אֶת־הַיֶּלֶד הַזֶּה וַתְּשִׂימֵהוּ בַּתֵבָה וַתַּפְקֵד עָלָיו שְׁנֵי אֵימִים⁹⁸) לְשָׁמְרוֹ; וַתִּתֵּן אֶת־הַתֵּבָה עַל־יַד־בְּנוֹת קֵקְרָפְּס⁹⁹) וַתְּצַו עֲלֵיהֶן לְשָׁמְרָהּ מִכָּל מִשְׁמָר וּלְבִלְתִּי פְּתֹח אוֹתָהּ. וַיְהִי כִּי כָלְתָה נֶפֶשׁ הַנְּעָרוֹת לִרְאוֹת אֶת־אֲשֶׁר בַּתֵּבָה וַתִּגַּשְׁנָה וַתִּפְתַּחְנָה אוֹתָהּ, וַתִּצְלַח רוּחַ רָעָה עֲלֵיהֶן וַתִּשְתַּעְגַּעְנָה וַתִּתְנַפֵּלְנָה מֵרֹאשׁ הַסֶּלַע, אֲשֶׁר עִיר מוֹלַדְתָּן בְּנוּיָה עָלָיו, אֶל־מַעֲמַקֵּי תְהוֹם. הָאֱמֶת כָּל־הַדָּבָר, אֲשֶׁר שָׁמַעְתִּי?

וַתָּנַע קְרוּזָה רֹאשׁ לְאוֹת חִיּוּב¹⁰⁰) וַתֵּאָלֶם דּוּמִיָּה, כִּי דִבְרֵי הָעֶלֶם עַל־אֲבִי־זְקֵנָהּ הִזְכִּירוּהָ אֶת־בְּנָהּ, אֲשֶׁר לֹא יָדְעָה, אָנָה בָא, וַיִּגְדַּל מַכְאוֹבָהּ מְאֹד. וְלֹא עָלְתָה עַל־לִבָּהּ, כִּי בְנָהּ הוּא הַמְּדַבֵּר אֵלֶיהָ.

וְהָעֶלֶם הוֹסִיף לִשְׁאֹל וַיֹּאמַר:

– אַל־נָא יִחַר אַף גְּבִרְתִּי בִי וַאֲדַבֵּרָה: הַאֱמֶת הַדָּבָר, כִּי אֲרֶכֶת אָבִיךְ נָדַר לִפְנֵי צֵאתוֹ לַמִּלְחָמָה עַל־אוֹיְבָיו לְהַעֲלוֹת אֶת־בְּנוֹתָיו עוֹלָה לָאֵלִים, אִם יִתְּנוּ אֶת־אוֹיְבָיו בְּיָדוֹ? וְאֵיזֶה הַדֶּרֶךְ הִצַּלְתְּ אַתְּ אֶת חַיָּיִךְ?

– קְטַנָּה הָיִיתִי, עָנְתָה קְרוּזָה, וְאִמִּי לֹא נָתְנָה לְהוֹצִיאֵנִי מִזְּרוֹעוֹתֶיהָ.

וַיּוֹסֶף עוֹד הָעֶלֶם וַיֹּאמַר: הִנֵּה־נָא הוֹאַלְתִּי לְדַבֵּר אֶל־גְּבִרְתִּי וְאֶשְׁאָלֵךְ אַךְ הַפָּעַם: הָאֱמֶת הַדָּבָר, כִּי הִכְרִיעַ פוֹסִידוֹן בִּשְׁלֹשׁ קִלְשׁוֹנוֹ אֶת־אָבִיךְ וְהָאֲדָמָה פָּצְתָה אֶת־פִּיהָ וַתִּבְלָעֵהוּ? הַאֱמֶת הַדָּבָר, כִּי עַל־יַד־פֶּרֶץ הָאֲדָמָה הַזֶּה יֵשׁ נְקִיק סֶלַע, אֲשֶׁר חִבָּה יְתֵרָה נוֹדַעַת לוֹ מֵאֵת־אַפּוֹלָה אֲדוֹנִי?

– אָנָא, נָכְרִי, שִׂים יָד לְפֶה, שִׁסְּעָה אוֹתוֹ קְרוּזָה בִּדְבָרִים: אַל־נָא תְּדַבֵּר בְּאָזְנַי עַל־דְּבַר הַנְּקִיק הַזֶּה, כִּי דְבַר פֶּשַׁע נַעֲשָׂה בוֹ בְּשֶׁכְּבָר הַיָּמִים.

וַיַּחֲרִישׁוּ שְׁנֵיהֶם רָגַע. אַחַר כָּבְשָׁה קְרוּזָה אֶת־צַעֲרָהּ וַתַּגֵּד לָעֶלֶם, אֲשֶׁר אָמַר לָהּ, כִּי שׁוֹמֵר הַמִּקְדָּשׁ הוּא, אֶת־כָּל־לִבָּהּ, כִּי אֵשֶׁת קְשׂוּט הִיא וְכִי עָלוּ עִירָה דֶלְפִי לְהִתְפַּלֵּל אֶל־אַפּוֹלָה, כִּי יִתֵּן לָהֶם זָרַע.

– הָעֲקָרָה אֶת, גְּבִרְתִּי? שָׁאַל הָעֶלֶם וְרַחֲמָיו נִכְמְרוּ עָלֶיהָ.

– כֵּן, עָנְתָה קְרוּזָה. מִי יִתֵּן לִי בֵן כָּמוֹךָ, וְהָיִיתִי הַמְּאֻשָּׁרָה בִּנְשֵׁי עַמִּי. וְעַתָּה הַגִּידָה־נָא לִי אֶת־שֵׁם אִמְּךָ וְשָׁלַחְתִּי לָהּ תְשׁוּרָה.

– אֲהָהּ גְּבִרְתִּי! קָרָא הָעֶלֶם בְּעֶצֶב – וַאֲנִי בֶּן־בְּלִי־שֵׁם, כִי אֶת־אָבִי לֹא אַכִּיר וְאֶת־אִמִּי לֹא אֵדַע וְנִפְלְאָה מִמֶּנִי, אֵיזֶה הַדֶּרֶךְ בָּאתִי הֵנָּה. בֵּן אֲסוּפִי אֲנִי, כִּי אֲסָפַתְנִי כֹּהֶנֶת הַמִּקְדָּשׁ אֶל־בֵּיתָהּ בְּחָמְלָהּ עָלַי וַתְּגַדְלֵנִי וַתְּחַנְּכֵנִי, וַיְהִי לִי הַמִּקְדָּשׁ לְבֵיתִי וְהָאֵל אַפּוֹלָה – לְאֵלִי וּלְמָגִנִּי.

וַיִּפָּלֵא הַדָּבָר בְּעֵינָי קְרוזָה וַיִּדְפֹּק לִבָּהּ בְּחָזְקָה. וְאוּלָם כַּעֲבֹר רֶגַע כָּבְשָׁה אֶת־רוּחָהּ וַתֹּאמַר: הֲלֹא אֵדַע אִשָּׁה, אֲשֶׁר גּוֹרָל חַיֶּיהָ יִדְמֶה לְגוֹרָלֶךָ. וַיְהִי בְּלֶכְתִּי מֵעִירִי הֵנָּה, וַתָּבֹא הָאִשָּׁה וַתִּתְחַנֵן אֵלַי, כִּי אֶדְרשׁ לָהּ בַּתְּרָפִים. וְעַתָּה אָמַרְתִּי: אֲגַלֶּה לְךָ אֶת־סוֹדָהּ, כִּי הֲלֹא מְשָׁרֵת הָאֵל אַתָּה; אֲבָל הִשָּׁמֶר־לְךָ פֶּן תַּגִּיד אֶת־הַדָּבָר לְבַעֲלָהּ, אֲשֶׁר הָלַךְ עָתָּה אֶל־בֵּית־הַתְּרָפִים, אֲשֶׁר לִטְרוֹפוֹן, כִּי בְנַפְשָׁהּ הוּא.

וְעַתָּה שְׁמַע אֶת־אֲשֶׁר סִפְּרָה לִי הָאִשָּׁה. הֲלֹא כֹה דִבְּרָה אֵלַי לֵאמֹר: בַּת שְׁמוֹנֶה־עֶשְׂרֵה שָׁנָה הָיִיתִי, כַּאֲשֶׁר נִגְלָה אֵלַי אַפּוֹלָה. וַתֶּחֱשַׁק נַפְשִׁי בוֹ וָאֱהִי לוֹ לְאִשָּׁה וְאֶת־פִּי אָבִי לֹא שָׁאָלְתִּי. וַתַּעֲבֹר שָׁנָה וָאֵלֵד לוֹ בֵן. וַיְהִי בְּיָרְאִי אֶת־חֲמַת אָבִי, וָאַחְבִּיא אֶת־בְּנִי בִּנְקִיק הַסָּלַע. מִן הַיּוֹם הַזֶּה לֹא יָדַעְתִּי דָבָר עַל־אֹדוֹתָיו, הַעוֹדֶנּוּ בַּחַיִּים אִם לֹא. וְעַתָּה אִם יֶשֵׁךְ עוֹשָׂה חֶסֶד וֶאֱמֶת עִם אֲמָתֵךְ וְדָרַשְׁתְּ בְּתַרְפֵי אַפּוֹלָה לִשְׁלוֹם בְּנִי וּלְגוֹרָלוֹ.

– הַאִם זֶה יָמִים רַבִּים הָיָה הַדָּבָר

– שְׁנוֹתָיו כִּשְׁנוֹתֶיךָ, אִם בְּחַיִּים חַיָּתוֹ.

וַיַּלְבִּינוּ פְנֵי הָעֶלֶם וַיֹּאמַר: כֵּן דִּבַּרְתְּ! גּוֹרַל חַיַּי כְּגוֹרַל רְעוּתֵךְ, הִיא מְבַקֶּשֶׁת אֶת בְּנָהּ וַאֲנִי אֶת־אִמִּי הוֹרָתִי. אֲבָל הֲלֹא הַדָּבָר קָרָה בְּאֶרֶץ רְחוֹקָה! זָר אֲנִי לָהּ. וְאוּלָם אַל־נָא תַּחְשְׁבִי, גְּבִרְתִּי, כִּי יַעֲנֶה אוֹתָךְ אַפּוֹלָה עַל־שְׁאֵלָתֵךְ. הֲלֹא תַזְכִּירִיהוּ אֶת־הַבֶּגֶד אֲשֶׁר בָּגַד בְּאִשְׁתּוֹ. הַיַחְפֹּץ לִשְׁפֹּט אֶת־מַעֲשָׂיו הוּא?

וַתִּגְעַר בּוֹ קְרוּזָה וַתֹּאמַר: שִׂים יָד לְפֶה וְאַל־תְּדַבֵּר דֹּפִי בָּאֵלִים.

פִּתְאֹם נִשְׁמַע קוֹל שַׁעֲטַת פַּרְסוֹת סוּסִים. וַתִּשָּׂא קְרוּזָה אֶת־עֵינֶיהָ וְהִנֵּה קְשׂוּט שָׁב מִדַּרְכּוֹ עִם־בְּנֵי־לִוְיָתוֹ. וַתֹּאמֶר קְרוּזָה לָעָלֶם: הִנֵּה בַעַל הָאִשָּׁה הוֹלֵךְ וְּקָרֵב אֵלֵינוּ. וְעַתָּה הִשָּׁמֵר וְהִזָּהֵר, פֶּן תְּגַלֶּה לוֹ אֶת־הַדָּבָר, אֲשֶׁר אָמַרְתִּי לְךָ בְחָפְזִי.

עוֹדָם מְדַבְּרִים וְהַמֶּלֶךְ נִגַּשׁ אֵלֶיהָ וְהוּא שָׂמֵחַ וְטוֹב לֵב וַיִּקְרָא בְּשִׂמְחָה:

שִׂמְחִי וְעִלְזִי רַעֲיָתִי, כִּי בְשׁוֹרָה טוֹבָה בְּפִי. הֲלֹא כֹה דִבְּרָה כֹהֶנֶת הַתְּרָפִים אֵלָי: לֹא תָּשׁוּב עֲרִירִי אֶל־בֵּיתְךָ. וְכִרְאוֹתוֹ אֶת הָעֶלֶם שָׁאָל: וּמִי הוּא הָעֶלֶם הַזֶה, אֲשֶׁר כְּבוֹד אֵלִים חוֹפֵף עָלָיו? אֵין זֹאת, כִּי כֹהֵן לָאֵל הוּא?

וַיִּשְׁתַּחוּ הָעֶלֶם בְּחֵן וַיַּעַן וַיֹּאמַר: לֹא כֹהֵן אֲנִי, כִּי אִם שׁוֹמֵר מִקְדַּשׁ אַפּוֹלָה. וְעַתָּה, אֲדוֹנִי וּמַלְכִּי, מַהֲרָה־נָא אֶל־קֹדֶשׁ הַקָּדָשִׁים, כִּי נֶאֶסְפוּ כְבָר מִסָּבִיב לַחֲצוּבָה¹⁰¹) כָּל־שָׂרֵי דֶלְפִי וְכָל־נִכְבַּדֶּיהָ, וְהַכֹּהֶנֶת נִגֶּשֶׁת לַעֲבֹד אֶת־עֲבוֹדַת קָדְשָׁהּ.

וַיְהִי כִּשְׁמֹעַ קְשׂוּט אֶת־דִּבְרֵי הָעֶלֶם וַיְצַו לְאִשְׁתּוֹ לְהִתְקַשֵּׁט בְּעַנְפֵי עֵץ רַעֲנָנִים, כַּאֲשֶׁר יַעֲשׂוּ הַצַּלְיָנִים¹⁰²), וְלָגֶשֶׁת אֶל־מִזְבַּח אַפּוֹלָה. וּמִזְבַּח אַפּוֹלָה מִחוּץ לְאֹהֶל מוֹעֵד תַּחַת כִּפַּת הַשָּׁמַיִם וְכֻלּוֹ מְכֻסֶּה עֲלֵי דַּפְנָה. שָׁמָה שָׂמָה קְרוּזָה אֶת־פְּעָמֶיהָ לִפְרֹשׂ אֶת־כַּפֶּיהָ אֶל־אַפּוֹלָה וּלְהִתְחַנֵּן אֵלָיו, כִּי יִתֵּן־לָהּ זָרַע. וּקְשׂוּט מִהֵר אֶל־הַמִּקְדָּשׁ. וְהָעֶלֶם עוֹמֵד עַל־מְקוֹמוֹ בְּפֶתַח־הָאֹהֶל.

וַתִּפָּתַח פִּתְאֹם דֶּלֶת הַמִּשְׁכָּן בְּקוֹל רַעַשׁ גָּדוֹל. וַיִּשָּׂא הָעֶלֶם אֶת־עֵינָיו וַיַּרְא וְהִנֵּה קְשׂוּט רָץ אֵלָיו וּזְרוֹעוֹתָיו פְּשׁוּטוֹת. וַיְחַבֵּק קְשׂוּט אֶת־הָעֶלֶם וַיְנַשְּׁקֵהוּ וַיְאַמְּצֵהוּ אֶל –לִבּוֹ וַיִּקְרָא: בְּנִי אַתָּה, בְּנִי הַיָּקָר! וַיַּחֲשֹׁב הָעֶלֶם בְּלִבּוֹ: אֵין זֹאת כִּי רוּחַ רָעָה בִּעֲתַתּוּ מֵאֵת־הָאֵלִים. וַיִּתְאַמֵּץ לְהַרְגִּיעַ אֶת־רוּחַ הַמֶּלֶךְ.

וַיִּקְרָא הַמֶּלֶךְ: הֲלֹא כֹה דִבֶּר אֵלַי פִּי אַפּוֹלָה: מִי הָאִישׁ אֲשֶׁר יָבֹא הָרִאשׁוֹן לִקְרָאתְךָ, בְּצֵאתְךָ מִבֵּית מִקְדָּשִׁי, וְהָיָה לְךָ לְבֵן, וְאוֹתוֹ נָתְנוּ לְךָ הָאֵלִים בְּחַסְדָּם. וְעַתָּה מִי אֲנִי, כִּי אֶחְקֹר בְּמֻפְלָא מֶנִּי. הַלֹא אֵל הוּא וְאֶת־אֲשֶׁר יַחְפֹּץ יַעֲשֶׂה.

וַיִּשְׂמַח גַּם לֵב הָעֶלֶם וַיְחַבֵּק אֶת־אָבִיו וַיֹּאמֶר בְּלִבּוֹ: אַיֵּךְ, אִמִּי יוֹלַדְתִּי! מִי יִתֵּן וְרָאוּ עֵינַי אֶת־פָּנַיִךְ הַנְּעִימִים. וְאוּלָם פִּתְאֹם תָּבֹא דְּאָגָה בְּלִבּוֹ: אֲבָל אֵיךְ תְּקַדֵּם אֵשֶׁת אָבִי אֶת־פָּנָי? הַלֹא עֲקָרָה הִיא? הַתְּאַמֵץ אוֹתִי לְבֵן? אִם יֵאוֹתוּ בְּנֵי אַתּוּנָה, כִּי אֵשֵׁב עַל־כִּסֵּא קְשׂוּט אַחֲרֵי מוֹתוֹ?

וַיַּרְא קְשׂוּט אֶת־פְּנֵי בְנוֹ הָעֲצוּבִים וַיֹּאמֶר אֵלָיו: יָדַעְתִּי אֶת־חֶרְדַּת לִבֶּךָ. אֲבָל הֵרָגַע, בְּנִי, וְאַל־תֵּעָצֵב, כִּי לֹא אַגִּיד לְאִשְׁתִּי וְלַעֲבָדַי דָּבָר, עַד־אֲשֶׁר אֶמְצָא עֵצָה. יַחְשְׁבוּ נָא אוֹתְךָ לְבֶן־נֵכָר וַאֲנַחְנוּ נִרְאֶה, אֵיךְ יִפֹּל דָּבָר.

וַיֹּאמֶר קְשׂוּט לַעֲבָדָיו וּלְאַמְהוֹתָיו הָעוֹמְדִים עָלָיו: הִשָּׁמְרוּ לָכֶם מִדַּבֵּר בְּאָזְנֵי אִשְׁתִּי אֶת־הַדָּבָר, אֲשֶׁר רָאוּ עֵינֵיכֶם, פֶּן תָּמוּתוּ.

וַיֵּרַע הַדָּבָר בְּעֵינֵי עַבְדֵי קְשׂוּט וּבְעֵינֵי אַמְהוֹתָיו עַל־אֹדוֹת אִשְׁתּוֹ, כִּי אַהֲבָה גְדוֹלָה אָהֲבוּ אוֹתָהּ, וַיִּוָּעֲצוּ לְגַלּוֹת אֶת־הַדָּבָר לִקְרוּזָה וְיַעֲבֹר עֲלֵיהֶם מָה.

וּקְרוּזָה כּוֹרַעַת עַל־בִּרְכֶּיהָ לִפְנֵי מִזְבַּח אַפּוֹלָה וַתִּתְפַּלֵּל אֵלָיו וּבָכֹה תִבְכֶּה, וַתִּשְׁמַע פִּתְאֹם קוֹל שָׁאוֹן כְּקוֹל צַעֲדֵי אֲנָשִׁים מְמַהֲרִים. וַתִּשָּׂא עֵינֶיהָ וַתֵּרֶא אֶת־אַמְהוֹתֶיהָ רָצוֹת אֵלֶיהָ, יְדֵיהֶן עַל־רֹאשָׁן וּמְיַלְּלוֹת תַּמְרוּרִים:

אֲהָהּ, גְּבִירָה, הֵן תוֹחַלְתֵּךְ אָבְדָה לְחַבֵּק בֵּן. כִּי הִנֵּה הֵשִׁיב אַפּוֹלָה לְאִישֵׁךְ אֶת־בְּנוֹ, אֲשֶׁר נוֹלַד לוֹ אֶל־נָכוֹן לִפְנֵי יָמִים רַבִּים. וְגַם שָׂמַח הַמֶּלֶךְ שִׂמְחָה גְדוֹלָה וְגַם קָרָא אֶת־שְׁמוֹ יָוָן וְגַם הָלַךְ אִתּוֹ לְהַקְרִיב קָרְבָּנוֹת עַל־מִזְבַּח דְּיוֹנִיס וּלְהוֹדוֹת לוֹ עַל הַחֶסֶד, אֲשֶׁר עָשָׂה עִמּוֹ בְּעָזְרוֹ לוֹ לִמְצֹא אֶת־בְּנוֹ. וְאַתְּ, מַלְכָּה עֲנִיָּה וְסוֹעֲרָה, תֵּשְׁבִי בְּבֵיתֵךְ אַלְמָנָה צְרוּרָה עַד־רִדְתְּךָ שְׁאוֹלָה.

וַתִּכְרַע קְרוּזָה תַּחַת יַד־אֲסוֹנָהּ הֶחָדָשׁ וַתִּשְׁקַע בְּמַחְשְׁבוֹת יָגוֹן וְלֹא יָכְלָה לִפְתֹּר אֶת־הַחִידָה הַנִּפְלָאָה. כְּאִלּוּ הִכָּה אוֹתָהּ אַפּוֹלָה בְּסַנְוֵרִים.

וַתִּשְׁאַל קְרוּזָה אֶת־אַמְהוֹתֶיהָ: מִי הוּא הַבֵּן, אֲשֶׁר הִקְרָה אַפּוֹלָה לִפְנֵי אִישִׁי, וּמָה שֵׁם אִמּוֹ?

– הֲלֹא שׁוֹמֵר הַמִּקְדָּשׁ הוּא, אֲשֶׁר דִּבַּרְתְּ אִתּוֹ לִפְנֵי שָׁעָה קְצָרָה, וְאֶת־שֵׁם אִמּוֹ לֹא נֵדַע.

וּמִתּוֹךְ קְהַל הָעֲבָדִים, אֲשֶׁר נִגְּשׁוּ גַּם הֵם אֶל־קְרוּזָה, יָצָא עֶבֶד זָקֵן, שַׂר הַמַּשְׁקִים אֲשֶׁר לַמֶּלֶךְ וְנֶאֱמָן מְאֹד לְמִשְׁפַּחַת אֲרָכֶת.

וַיַּעַן הָעֶבֶד וַיֹּאמַר: גְּבִרְתִּי! בֶּגֶד נוֹרָא בָּגַד בָּךְ הַמֶּלֶךְ וַיֶּחֱטָא לָךְ חֲטָאָה גְדוֹלָה. וְעַתָּה, אִם כָּשֵׁר הַדָּבָר בְּעֵינֵי גְבִרְתִּי, וְהִשְׁקֵיתִי אֶת־בֶּן־אִישֵׁךְ רַעַל וְלֹא יִהְיֶה לָךְ לִמְחִתָּה.

וְלֹא יָדְעָה קְרוּזָה עֵצוֹת בְּנַפְשָׁהּ וַתִּשְׁמַע לְקוֹל הָעֶבֶד.

בֵּנוֹתַיִם יָצָא קְשׂוּט וְיָוָן מִבֵּית מִקְדַּשׁ אַפּוֹלָה וַיְמַהֲרוּ וַיַּעֲלוּ עַל־פִּסְגַּת פַּרְנַס הַכְּפוּלָה לָקַחַת חֵלֶק בַּמִּשְׂחָקִים, אֲשֶׁר עָרְכוּ שָׁם אַנְשֵׁי דֶלְפִי לִכְבוֹד דְּיוֹנִיס. וַיַּקְרֵב קְשׂוּט לִדְיוֹנִיס מִנְחַת תּוֹדָה וַיִּסֹּךְ עָלֶיהָ נֶסֶךְ יָיִן. וְהָעֲבָדִים נָטוּ אֹהֶל נֶהְדָּר וַיְּפָאֲרוּהוּ בְּמַרְבַדִּים, אֲשֶׁר לָקְחוּ מִבֵּית מִקְדַּשׁ אַפּוֹלָה, וַיַּעַרְכוּ בוֹ שֻׁלְחָנוֹת.

וַיַּעַשׂ הַמֶּלֶךְ מִשְׁתֶּה גָּדוֹל לְכָל אַנְשֵׁי דֶלְפִי וַיֹּאכְלוּ וַיִּשְׁתּוּ וַיֵּיטִיבוּ לִבָּם.

וַיְהִי כַאֲשֶׁר טוֹב לֵב הַקְּרוּאִים בַּיַּיִן וַיְצַו שַׂר־הַמַּשְׁקִים לַמְּחַלְּלִים לְהַכּוֹת בַּחֲלִילִים, וְלַעֲבָדִים צִוָּה לְהָסִיר אֶת־הַכּוֹסוֹת מֵעַל־הַשֻּׁלְחָן וְלָשִׂים תַּחְתֵּיהֶן סִפְלֵי זָהָב וָכָסֶף. וְאֶת־הַיָּקָר בַּסְּפָלִים לָקַח וַיְמַלְּאֵהוּ יַיִן וַיִּזְרֹק לְתוֹכוֹ אִבְקַת רָעַל. וַיִּגַּשׁ הָעֶבֶד אֶל־יָוָן וַיִּשְׁתַּחוּ וַיִּסֹּךְ טִיפּוֹת יַיִן אֲחָדוֹת נֶסֶךְ לָאֵלִים וַיִּתֵּן אֵת־הַסֵּפֶל עַל־יַד־הָעֶלֶם. וְהִנֵּה עֶבֶד דּוֹחֵף מִבְּלִי מֵשִׂים אֶת־רֵעֵהוּ וּמְקַלְּלֵהוּ קְלָלָה נִמְרָצֶת.

וְיָוָן אֲשֶׁר גֻּדַּל בְּבֵית־הַאֵל, רָאָה בַּדָּבָר הַזֶה אֶצְבַּע אֱלֹהִים וַיְמַהֵר וַיִּשְׁפֹּךְ אֶת־הַיַּיִן אָרְצָהּ. וַיִּתֵּן יָוָן אוֹת לְעֶבֶד אַחֵר וַיְצַוֵּהוּ לְהָבִיא לוֹ סֵפֶל יַיִן, בִּמְקוֹם הַיַּיִן אֲשֶׁר שָׁפָךְ. וַיַּעַשׂ הָעֶבֶד כֵּן. וַיִּקַח יָוָן אֶת־הַיַּיִן וַיִסֹּךְ אוֹתוֹ נֶסֶךְ לָאֵלִים. וַיִּרְאוּ הַקְּרוּאִים אֶת־מַעֲשֵׂה־יָוָן וַיַּעֲשׂוּ גַם הֵם כְּמַעֲשֵׂהוּ וַיִּסְּכוּ נְסָכִים וַיְהַלְלוּ אֶת־הָאֵלִים.

וְהִנֵּה עֲדַת יוֹנִים קְדוֹשׁוֹת, אֲשֶׁר מָצְאוּ מַחֲסֶה בְּבֵית־מִקְדַּשׁ אַפּוֹלָה, עָפָה וּבָאָה אֶל־הָאֹהֶל. וַתֵּרַדְנָה הַיּוֹנִים וַתְּלַקֵּקְנָה בְּמַקּוֹרֵיהֶן הַוְּרֻדִּים אֶת־הַיַּיִן הַמָּתוֹק.

וַתִּשְׁתֶּינָה כָל הַיּוֹנִים מִן הַיַּיִן וְלֹא קָרָה אוֹתָן דָּבָר. רַק יוֹנָה אַחַת הֵחֵלָּה לְפַרְפֵּר בִּכְּנָפֶיהָ וּלְפַרְכֵּס בְּכָל גּוּפָהּ, כִּי שָׁתְתָה מִן הַיַּיִן הַמָּרְעָל, אֲשֶׁר הִגִּישׁ שַׂר הַמַּשְׁקִים, וַתָּמָת כַּעֲבֹר רֶגַע, לְתִמְהוֹן לֵב יָוָן וְכָל הַקְּרוּאִים. וַיִּצְעַק יָוָן צְעָקָה גְדוֹלָה וַיִּקְפֹּץ מִמְּקוֹמוֹ וַיְמַהֵר אֶל־שַׂר הַמַּשְׁקִים וַיֹּאחַז בּוֹ בְּחָזְקָה וַיִּקְרָא:

הַגִּידָה־נָא, זָקַן, לָמָּה הִתְנַקַּשְׁתָּ בְנַפְשִׁי? וּמִי פִתָּה אוֹתְךָ לַהֲמִיתֵנִי בְרָעַל?

וַיּוֹדֶה הָעֶבֶד, כִּי עָשָׂה זֹאת בִּפְקוּדַת קְרוּזָה.

וַיְמַהֵר יָוָן וַיֵּצֵא מִן הָאֹהֶל וַיֵּלְכוּ אִתּוֹ כָּל־הַקְּרוּאִים הָלֹךְ וְקַלֵּל אֶת־קְרוּזָה. וַיַּעֲמֹד הָעֶלֶם תַּחַת כִּפַּת הַשָּׁמַיִם וַיָּרֶם אֶת־יָדוֹ לְעֵינֵי כָל־אַנְשֵׁי דֶלְפִי וַיִּשָּׁבַע לֵאמֹר:

הַעִידוֹתִי אֶת־הַשָּׁמַיִם וְאֶת־הָאָרֶץ, כִּי בַת אֲרֶכֶת הִתְנַקְּשָׁה בְנַפְשִׁי וַתְּצַו לָשִׂים רַעַל בְּכוֹסִי.

וַיִּקְרְאוּ כָל־הַקְּרוּאִים קוֹל אֶחָד:

נִרְגְּמָה אֶת־הָאִשָּׁה הַחוֹטֵאת בַּאֲבָנִים וּבִעַרְנוּ הָרָעָה מִקִּרְבֵּנוּ.

וַיְמַהֲרוּ כֻלָּם, יָוָן רִאשׁוֹנָה וְכָל הָעָם אַחֲרָיו, לִגְמֹל לִקְרוּזָה כְּמַעֲלָלֶיהָ. וּקְשׂוּט הָלַךְ גַּם הוּא אַחֲרֵי הָעָם מִבְּלִי דַעַת נַפְשׁוֹ.

וַיִּמְצְאוּ הָאֲנָשִׁים אֶת־קְרוּזָה עוֹמֶדֶת עַל־יַד־מִזְבַּח אַפּוֹלָה וּמְצַפָּה לַבְּשׁוֹרָה, הַהִצְלִיחַ מַעֲשֵׂה־הָרֶצַח אִם לֹא. וַתֵּרֶא קְרוּזָה אֶת־יָוָן וְאֶת־אֲנָשָׁיו רָצִים אֵלֶיהָ בַּחֲמַת עֶבְרָה, וַתָּבֶן, כִּי נִגְלְתָה מַחְשַׁבְתָּהּ וְכִי כָלְתָה אֵלֶיהָ הָרָעָה מֵאִתָּם. וַּתְּמַהֵר קְרוּזָה וַתַּחֲזֵק בְּקַרְנוֹת הַמִּזְבֵּחַ. וְיָוָן בָּא וַיֹּאמֶר לִתְפֹּשׂ אֶת־קְרוּזָה וּלְהַשְׁלִיכֶנָּה מֵרֹאשׁ הַסֶּלַע אֶל־מַעֲמַקֵּי תְהוֹם. וְהִנֵּה דְּבַר אַפּוֹלָה אֶל־כֹּהֶנֶת הַמִּקְדָּשׁ לֵאמֹר: מַהֲרִי אֶל־מִזְבְּחִי וְהִצַּלְתְּ אֶת־קְרוּזָה מִיַּד יָוָן בְּנָהּ, אֲשֶׁר יְלָדַתְהוּ לִי.

וַּתְּמַהֵר הַכֹּהֶנֶת וַתִּקַּח אֶת־הַסַּל, אֲשֶׁר מָצְאָה בוֹ אֶת־הַיֶּלֶד, וַתָּרָץ אֶל־הַמִּזְבֵּחַ.

וַיְהִי כַאֲשֶׁר רָאָה יָוָן אֶת־הַכֹּהֶנֶת וַיִּגַּשׁ אֵלֶיהָ וַיְסַפֵּר לָהּ אֶת־כָּל־אֲשֶׁר קָרָהוּ.

וְכָל־הַקְּרוּאִים קָרְאוּ: מוֹת תָּמוּת הַמִּרְשָׁעַת!

וַתַּעַן הַכֹּהֶנֶת וַתֹּאמַר: אַל־תַּעֲשׂוּ כַּדָּבָר הַזֶה וְאַל־תְּגָאֲלוּ יֶדְכֶם בְּדָם. וְאַתָּה, בְּנִי, רְאֵה אֶת־הַסַּל אֲשֶׁר בְּיָדִי: בַּסַּל הַזֶּה מְצָאתִיךָ לִפְנֵי יָמִים רַבִּים וְהוּא יָשִׁיב לְךָ אֶת־אִמְּךָ יְלָדָתְךָ.

וַיְהִי כִרְאוֹת קְרוּזָה אֶת־הַסַּל וַתְּמַהֵר אֶל־יָוָן וַתְּחַבְּקֵהוּ וַתְּנַשְּׁקֵהוּ וַתִּקְרָא: בְּנִי, בְּנִי הַיָּקָר! וַתֵּבְךְ דִּמְעוֹת שִׂמְחָה. וַיָּפָג לֵב יָוָן, כִּי לֹא הֶאֱמִין לָהּ.

וַתַּעַן קְרוּזָה וַתֹּאמַר: יָעִידוּ בִּי הַחִתוּלִים, אֲשֶׁר בַּסַּל, כִּי אִמְּךָ אָנִי. הֵן בְּיָדַי רְקַמְתִּים וָאֲקַשְּטֵם קִשּׁוּטִים שׁוֹנִים. וְעַתָּה הוֹצִיאָה־נָא אֶת־הַחִתּוּלִים וּפְרַשְׂתָּם וְרָאִיתָ עֲלֵיהֶם אֶת־רֹאשׁ גּוֹרְגּוֹנָה הַמְרֻקָּם בַּעַל פַּקַּעַת הַנְּחָשִׁים.

וַיַּעַשׂ יָוָן כִּדְבַר קְרוּזָה וַיִּפְרֹשׂ אֶת־הַחִתּוּלִים וְהִנֵּה אֱמֶת דִּבְּרָה קְרוּזָה.

וַתּוֹסֶף עוֹד קְרוּזָה וַתֹּאמַר: חַפֶּשׂ־נָא עוֹד בַּסַּל וּמָצָאתָ רַהֲבֵי זָהָב, אֲשֶׁר תָּלִיתִי בְּצַוַּאר הַיֶּלֶד לְשָׁמְרוֹ מִכָּל רָעָה, כִּי כֵן יֵעָשֶׂה בִּמְקוֹמֵנוּ לִתְלוֹת רְהָבִים בְּצַוַּאר הַיְלָדִים לְזֵכֶר הָרְהָבִים, אֲשֶׁר שָׁמְרוּ אֶת־אֲרַכְתּוֹן.

וַיְחַפֵּשׂ יָוָן בְּקֹצֶר רוּחַ וַיִּמְצָא גַּם אֶת־הָרְהָבִים.

וַתַּעַן עוֹד קְרוּזָה וַתֹּאמַר: עוֹד אוֹת אֶחָד אֶתֶּן־לְךָ וְיָדַעְתָּ, כִּי אֱמֶת דִּבַּרְתִּי:עַל־רֹאשׁ הַיֶּלֶד שַׂמְתִּי זֵר עַנְפֵי זַיִת, אֲשֶׁר לֹא יִבְּלוּ לְעוֹלָם, כִּי קְטַפְתִּים מִן הַזַּיִת אֲשֶׁר נָטְעָה אַתּוּנָה בְּיָדֶיהָ.

<

וַיְהִי כַאֲשֶׁר מָצָא יָוָן גַּם אֵת־הַזֵר וַיֶּחְדַּל מִפַּקְפֵּק וַיִּשְׂמַח שִׂמְחָה גְדוֹלָה.

וְשִׂמְחָתוֹ גָבְרָה עוֹד בְּהִוָּדַע לוֹ כִּי בֶן־אַפּוֹלָה הוּא.

וַיְחַבֵּק הַבֵּן אֶת־אִמּוֹ וְהָאֵם אֶת־בְּנָהּ וַיּוֹדוּ לָאֵלִים עַל־חַסְדָּם.

וַתְּבָרֶךְ הַכּהֶנֶת אֶת־יָוָן לֵאמֹר: בְּנִי! אַתָּה הֱיֵה לְאַלְפֵי רְבָבָה וְהָיִיתָ לְאַב שֵׁבֶט הַיְוָנִים.

וְלִקְשׂוּט וּלְאִשְׁתּוֹ אָמְרָה: בְּרוּכִים תִּהְיוּ! עוֹד בֵּן יִוָּלֵד לָכֶם וּקְרָאתֶם אֶת־שְׁמוֹ דוֹר – וְעַם הַדּוֹרִים יֵצֵא מֵחֲלָצָיו.

וַיֵּלֶךְ קְשׂוּט וְאִשְׁתּוֹ וְיָוָן בְּנָהּ אֶל־אַתּוּנָה וְכָל־אַנְשֵׁי דֵּלְפִי שִׁלְּחוּ אוֹתָם בְּכָבוֹד גָּדוֹל.

ט.

 

אִיקָר וְדֵדָל.    🔗

וַיְהִי אִישׁ בְּעִיר אַתּוּנָה מִמִּשְׁפַּחַת אֲרֶכֶת וּשְׁמוֹ דֵדָל. וְהָאִישׁ חָכָם מְאֹד בְּכָל־מְלֶאכֶת מַחֲשֶׁבֶת וְלֹא הָיָה דָבָר נִפְלָא מִמֶּנּוּ. וַיֵּצֵא שֵׁם דֵּדָל לִתְהִלָּה בְּכָל־אַרְצוֹת תֵּבֵל. וּמֵאַרְבַּע כַּנְפוֹת הָאָרֶץ בָּאוּ אֲנָשִׁים לִרְאוֹת אֶת־מַעֲשֵׂי יָדָיו. וְהָיָה אִם רָאָה אִישׁ אֶת־הַפְּסָלִים, אֲשֶׁר חָצַב דֵּדָל מֵאָבֶן, וְקָרָא בְּתִמָּהוֹן: הֲלֹא לֹא אֶבֶן דּוֹמֵם הֵם, כִּי אִם יְצוּרִים חַיִּים. וְאָמְנָם נָפַח דֵּדָל נִשְׁמַת חַיִּים בְּמַעֲשֵׂי יָדָיו, כִּי רָאוּ בְעֵינֵיהֶם הָלְכוּ בְרַגְלֵיהֶם וּבִידֵיהֶם עָשׂוּ כָל־מְלָאכָה. לֹא כֵן מַעֲשֵׂי יְדֵי כָל־יוֹצְרֵי פֶסֶל אֲשֶׁר בְּאַתּוּנָה, כִּי תֹהוּ הֵם: עֵינַיִם לָהֶם וְלֹא יִרְאוּ, רַגְלַיִם וְלֹא יְהַלֵּכוּ, זְרוֹעוֹת תְּלוּיוֹת לָהֶם לְאֹרֶךְ גּוּפָם וְלֹא יְנִיעוּן.

וַיֶחְכַּם דֵּדָל מְאֹד. אֲבָל כִּרְבוֹת חָכְמָתוֹ, רַבָּה גַּם גַּאֲוָתוֹ וַיֹּאמַר: הֲלֹא אֲנִי וְאַפְסִי עוֹד!

וּלְדֵדָל אָחוֹת, וְלָהּ בֵּן וּשְׁמוֹ תָּל. וַתִּתֵּן אֵם תָּל אֶת־בְּנָהּ עַל־יַד־אָחִיהָ לְגַדְּלֵהוּ וּלְחַנְּכֵהוּ וּלְלַמְּדֵהוּ חָכְמָה. וְתָל חָרוּץ מְאֹד וַחֲכַם לֵבָב וַיַּעַל בְּחָכְמָתוֹ גַּם עַל־מוֹרֵהוּ. בְּעוֹדוֹ קָטָן הִמְצִיא אֶת־גַּלְגַּל הַקַּדָּרִים. וַיְהִי הַיּוֹם וַיִּמְצָא לְחִי נָחָשׁ; וַיְנַס תָּל לְנַסֵּר בְּשִּׁנֵּי הַנָּחָשׁ הַחַדּוֹת לוּחַ עֵץ דָּק. וַיְהִי כִי הִצְלִיחַ הַדָּבָר בְּיָדוֹ וַיַּעַשׂ לְחִי בַּרְזֶל כִּדְמוּת לְחִי הַנָּחָשׁ וַיַּחֲרֹץ בָּהּ שִׁנַּיִם חַדּוֹת וַיִּקְרָא לִלְחִי הַבַּרְזֶל, אֲשֶׁר עָשָׂה, מַשּׂוֹר. וַיָּקֶל הַמַּשּׂוֹר עַל־הָאָדָם מֵעֲבוֹדָתוֹ וַיְהִי שֶׁם־תָּל לִבְרָכָה. וַיּוֹסֶף עוֹד תָּל וַיַּמְצֵא אֶת־מַפְסֶלֶת הֶחָרָט¹⁰³) וְאֶת־הַקַּרְדֹּם וְעוֹד כֵּלִים רַבִּים הַדְּרוּשִׁים לְחֵפֶץ הָאָדָם.

וַיַּרְא דֵּדָל כִּי כֵן, וַיֵּצַר לוֹ מְאֹד, כִּי יָרֵא, פֶּן יְמַעֵט בֶּן־אֲחוֹתוֹ אֶת־דְּמוּתוֹ¹⁰⁴), וַיִּתְנַכֵּל לוֹ לַהֲמִיתוֹ. וַיְהִי הַיּוֹם וַיַּעֲבֹר דֵּדָל עִם תָּל עַל־פְּנֵי־תְהוֹם־עֲמֻקָּה. וַיִּדְחַף דֵּדָל אֶת־הַנַּעַר הַהוֹלֵךְ לְתֻמּוֹ וַיַּשְׁלִיכֵהוּ אֶל־מַעֲמַקֵּי תְהוֹם וַתִּפָּזַרְנָה עַצְמוֹתָיו לְפִי שְׁאוֹל. וַיְמַהֵר דֵּדָל וַיֵּרֶד אֶל־מְקוֹם מַפֶּלֶת תָּל לְקַבֵּר אֶת־עַצְמוֹתָיו וּלְהַכְחִיד אֶת־עִקְבוֹת־הָרָצַח.

וַיַּעַבְרוּ אֲנָשִׁים וַיִּרְאוּ אֶת־דֵּדָל חוֹפֵר בּוֹר בָּעֵמֶק. וַיֹּאמְרוּ אִישׁ אֶל־רֵעֵהוּ: הֲלֹא דֵדָל הוּא, הַפַּסָּל הַנּוֹדָע לְשֵׁם, וּמַה הוּא עוֹשֶׂה פֹה?

וַיָּסוּרוּ לִרְאוֹת אֶת־מַעֲשֵׂה דֵדָל. וַיִּרְאוּ וְהִנֵּה הוּא צוֹבֵר עֲצָמוֹת וְקוֹבְרָן בַּבּוֹר, אֲשֶׁר חָפָר. וַיָּבִינוּ הָאֲנָשִׁים, כִּי הָרַג דֵּדָל אֶת־בֶּן־אֲחוֹתוֹ, וַיֹּאמְרוּ לְתָפְשׂוֹ וּלְהַסְגִּירוֹ אֶל־הַשּׁוֹפְטִים. וַיִּבְרַח דֵּדָל וַיָּנָס אֶל־אֶרֶץ עַתִּיקָה¹⁰⁵) וַיְהִי שָׁם נָע וְנָד יָמִים רַבִּים. וַיְהִי אַחֲרֵי יָמִים רַבִּים וַיֵּלֶךְ מִשָּׁם וַיֵּשֶׁב בְּאִי כְרֵתִים. וַיַּסְבֵּר לוֹ מִין מֶלֶךְ כְּרֵתִים פָּנִים, כִּי שָׁמַע אֶת־שִׁמְעוֹ, וַיַּאַסְפֵהוּ אֶל־בֵּיתוֹ. וּבַיָּמִים הָהֵם שָׁכַן עַל־הָאִי רַהַב נוֹרָא –מִינוֹתוֹר¹⁰⁶), אֲשֶׁר מִמַּרְאֵה מָתְנָיו וּלְמַעְלָה דְמוּת שׁוֹר לוֹ וּמִמַּרְאֵה מָתְנָיו וּלְמַטָּה דְּמוּת אָדָם. וַיְהִי מִינוֹתוֹר שׁוֹאֵף לְדָם, טוֹרֵף אָדָם וּבְהֵמָה וּבְכָל אֲשֶׁר יִפְנֶה יַרְשִׁיעַ. וַיִּצְעֲקוּ הַכְּרֵתִים אֶל־מַלְכָּם, כִּי יוֹשִׁיעֵם מִכַּף הָרָהַב. וַיִּקְרָא מִין לְדֵדָל וַיֹּאמַר: הִנֵּה־נָא שָׁמַעְתִּי, כִּי חֲכַם־לֵב אָתָּה. וְעַתָּה עֲשֵׂה בְּחָכְמָתְךָ וּבְנֵה לִי בַיִת לִסְגֹּר בּוֹ אֶת־מִינוֹתוֹר, אֲשֶׁר לֹא יוּכַל לָצֵאת מִמֶּנּוּ, וְהֶעֱשַׁרְתִּיךָ עֹשֶׁר רָב.

וַיִּבֶן דֵּדָל הֵיכָל גָּדוֹל וּבַהֵיכָל חֲדָרִים רַבִּים, יְצִיעוֹת¹⁰⁷) רַבּוֹת וּמִסְדְּרוֹנוֹת עַד־אֵין מִסְפָּר. וְהָיָה כָל־הַבָּא אֶל־הַהֵיכָל וְלֹא מָצָא אֶת־הַדֶּרֶךְ לָצֵאת מִמֶּנּוּ. וַיִּקְרָא דֵדָל אֶת־שֵׁם הַהֵיכָל מָבוֹךְ¹⁰⁸), לֵאמֹר: נְבוּכִים¹⁰⁹) כָּל־הַבָּאִים אֵלָיו וְתוֹעִים הֵמָּה, מִבְּלִי מְצֹא מוֹצָא. וַיָּשֶׂם הַמֶּלֶךְ אֶת־מִינוֹתוֹר בַּחֶדֶר הַתִּיכוֹן, אֲשֶׁר בַּמָּבוֹךְ, וַיֵּתַע בַּמְּבוֹאוֹת, בַּמִסְדְּרוֹנוֹת וּבַחֲדָרִים הָרַבִּים וְאֶת־פֶּתַח הַהֵיכָל לֹא מָצָא. וַיְהִי מִינוֹתוֹר כָּלוּא בַּמָּבוֹךְ. וּמַאֲכָלוֹ שִׁבְעָה עֲלָמִים וְשֶׁבַע עֳלָמוֹת, אֲשֶׁר שָׁלְחוּ הָאַתּוּנִים מִדֵּי שָׁנָה בְּשָׁנָה מַס לְמֶלֶךְ כְּרֵתִים.

וַיְהִי מִקֵּץ יָמִים וַתְּכַל נֶפֶשׁ דֵּדָל לָשׁוּב אֶל־אֶרֶץ מוֹלַדְתּוֹ, וַיָּבֹא אֶל־הַמֶּלֶךְ וַיֹּאמֶר לוֹ: אֵלְכָה־נָא אֶל־אַרְצִי. וְלֹא אָבָה הַמֶּלֶךְ לְשַׁלְּחוֹ וַיֹּאמֶר אֵלָיו: שְׁבָה אִתִּי עוֹד שָׁנָה אוֹ שְׁנָתַיִם וְעָשִׂיתִי עִמְּךָ חָסֶד. וַיְהִי כַאֲשֶׁר הִפְצִיר דֵּדָל בַּמֶּלֶךְ לְשַׁלְּחֵהוּ הַבָּיְתָה, וַיִּקְצֹף עָלָיו הַמֶּלֶךְ וַיְשִׂימֵהוּ בְּבֵיִת־הַכֶּלֶא. וַיַּרְא דֵּדָל כִּי כֵן, וַיַּחְשֹׁב מַחֲשָׁבוֹת, אֵיזֶה הַדֶּרֶךְ יָנוּס מִבֵּית־כִּלְאוֹ. וַתַּעַל עַל־רוּחוֹ לִבְנוֹת מִגְדָּל פּוֹרֵחַ בָאַוֵּר, כִּי אָמַר: מֶלֶךְ אַדִּיר הוּא מִין, מוֹשֵׁל בַּיָּם וּבַיַּבָּשָׁה, וְאוּלָם בָּאַוֵּר אֵין לוֹ שְׁלִיטָה.

וַיָּחֶל דֵּדָל לַעֲבֹד אֶת־עֲבוֹדָתוֹ בַּסֵּתֶר. וַיִּצְבֹּר נוֹצוֹת לָרֹב וַיַּעַרְכֵן לְמַעֲרֶכֶת, מִן הַקְּטַנּוֹת הֵחֵל וּבַגְּדוֹלוֹת כִּלָּה, וַיְחַבֵּר אוֹתָן בְּחוּטִים עָבִים וַיִּדְבְּקֵן בַּדּוֹנַג וַיָּכֹף אוֹתָן וַיְהִי מַרְאֵיהֶן כְּמַרְאֵה כַנְפֵי הָעוֹף.

וּלְדֵדָל בֵּן וּשְׁמוֹ אִיקָר. וַיִּתְבּוֹנֵן אִיקָר לְמַעֲשֶׂה אָבִיו וַיַעֲזֹר לוֹ בִּמְלַאכְתּוֹ. וַיָּלָשׁ אִיקָר דּוֹנַג וַיַּגֵּשׁ לְאָבִיו נוֹצוֹת וַיִּשְׂמַח כִּשְׂמֹחַ יֶלֶד עַל־צַעֲצוּעָיו. וַיִּתְעַנֵּג דֵּדָל לִרְאוֹת אֶת־בְּנוֹ שָׂמֵח וְלֹא עִצֵּב אוֹתוֹ, אַף אִם שִׁחֵת לִפְעָמִים אֶת־מַעֲשֵׂה־יָדָיו. וַיְהִי כְּכַלּוֹת דֵּדָל אֶת־עֲבוֹדָתוֹ הַקָּשָׁה וַיִּקְשֹׁר אֶת־הַכְּנָפַיִם אֶל־כְּתֵפָיו וַיִּתְנַשֵּׂא לְמַעְלָה וַיְנַס לָעוּף. וַיָּעַף כְּצִפּוֹר קַלָּה מִתַּחַת לֶעָבִים.

וַיַּרְא דֵּדָל וְהִנֵּה טוֹבוֹת הַכְּנָפַיִם מְאֹד וַיֵּרֶד אָרְצָה וַיִּקַּח צֶמֶד כְּנָפַיִם שֵׁנִי, אֲשֶׁר עָשָׂה לְאִיקָר וַיְלַמְּדֵהוּ לָעוּף וַיְדַבֵּר אֵלָיו לֵאמֹר: בְּנִי! הַקְשִׁיבָה לִדְבָרַי בְּשׂוּם לֵב וַחֲרֹת אוֹתָם עַל־לוּחַ לִבֶּךָ, לְמַעַן יִיטַב לָךְ.

הִנֵּה אֲנַחְנוּ מִתְנַשְּׂאִים לָעוּף. וְעַתָּה, בְנִי, אֱחֹז תָּמִיד בַּדֶּרֶךְ הַמְּמֻצָּעַת. אַל־תַּשְׁפֵּל לָעוּף, פֶּן תִּפְגַּעְנָה כְּנָפֶיךָ בְּגַלֵּי הַיָּם וְסָפְגוּ מַיִם לְתוֹכָן וְכָבְדוּ מְאֹד וּמְשָׁכוּךָ אֶל־מַעֲמַקֵּי הַמְּצוּלָה. וְאוּלָם אַל גַּם תַּגְבַּהּ לָעוּף, פֶּן תִּשָּׂרַפְנָה הַנּוֹצוֹת וּפֶן יִמַּס הַדּוֹנַג מֵחֹם הַשֶּׁמֶשׁ וְהָיְתָה אַחֲרִיתְךָ מָרָה.

וַיְהִי כְּכַלּוֹתוֹ לְדַבֵּר אֶל־בְּנוֹ וַיִּקְשֹׁר אֶת־הַכְּנָפַיִם אֶל־כְּתֵפָיו. וַתִּרְעַדְנָה יָדָיו, כְּמוֹ לוּ נִבָּא לוֹ לִבּו דָּבָר רָע. וַיְחַבֵּק דֵּדָל אֶת־אִיקָר וַיִּשַּׁק לוֹ וְדִמְעָה חַמָּה נָפְלָה מֵעֵינוֹ עַל־רֹאשׁ בְּנוֹ.

אָמְנָם זֹאת הָיְתָה נְשִׁיקָתוֹ הָאַחֲרוֹנָה.

וַיִּתְנַשְּׂאוּ שְׁנֵיהֶם לְמַעֲלָה. הָאָב עָף רִאשׁוֹנָה וַיְהִי מוֹרֵה דָרֶךְ. וּמִדֵּי פַעַם בְּפַעַם הֵסַב אֶת־פָּנָיו אֲחוֹרַנִּית בְּחֶרְדַת לֵב וּבִדְאָגָה; וַיִּדְמֶה לְצִפּוֹר הַמּוֹצִיאָה אֶת־אֶפְרוֹחֶיהָ רִאשׁוֹנָה לָעוּף בְּמֶרְחֲבֵי יַם הָאַוֵּר. וְלֹא שָׁכַח דֵּדָל אַף רֶגַע לְהָנִיעַ אֶת־כְּנָפָיו בְּחָכְמָה וּבִתְבוּנָה, לְמַעַן הֱיוֹתוֹ לְמוֹפֵת לִבְנוֹ, אֲשֶׁר יִרְאֶה אֶת־מַעֲשֵׂהוּ וְיַעֲשֶׂה כָמוֹהוּ.

וְאָמְנָם הֵיטִיב אִיקָר לָעוּף מֵאַחֲרֵי אָבִיו וְלֹא סָר מִדַּרְכּוֹ יָמִין אוֹ שְׂמֹאל.

וַיַּעַבְרוּ דֵדָל וְאִיקָר בְּשָׁלוֹם אֶת־אִי סַמוֹס וַיַּעַבְרוּ גַּם אֶת־דֵּלוֹס וּפָרוֹס. וַיָּעוּפוּ הָלֹךְ וָעוּף דֶּרֶךְ אֲרָצוֹת וּמְדִינוֹת וְלֹא עָיֵפוּ. וְאוּלָם נֶפֶשׁ אִיקָר קָצָה לָעוּף אַחֲרֵי אָבִיו, כִּי גָבְהֵי שְׁחָקִים מָשְׁכוּ אֶת־לִבּוֹ וְעֵינוֹ חָשְׁקָה לְהִתְבּוֹנֵן מִקָּרוֹב אֶל־פְּנֵי־הַשֶּׁמֶשׁ הַקוֹרָנֶת. וַיִּשְׁכַּח אֶת־אַזְהָרוֹת אָבִיו וַיִּתְנַשֵּׂא לְמַעֲלָה.

וְכָל אֲשֶׁר יַגְבִּיהַּ אִיקָר לָעוּף, כֵּן יִגְדַּל חֹם הַשֶּׁמֶשׁ וְכֵן יִגְבָּר. וְאוּלָם אִיקָר לֹא הִרְגִּישׁ דָּבָר, כִּי הִתְעַנֵּג עַל־אוֹר הַשֶּׁמֶשׁ וְעֵינוֹ לֹא שָׂבְעָה לִרְאוֹת אֶת־יָפְיוֹ. וַיֵּלֶךְ הַחֹם הָלֹךְ וְגָדֹל וַיִּגְבַּר מְאֹד וַיִּמַס הַדּוֹנַג, אֲשֶׁר בֵּין נוֹצוֹת הַכְּנָפָיִם. וַתִּפֹּלְנָה הַכְּנָפַיִם פִּתְאֹם בְּאֵין כֹּחַ וַתִּהְיֶינָה תְלוּיוֹת לְאֹרֶךְ כְּתֵפָיו. וַיִּתְאַמֵּץ אִיקָר לִפְרֹשׂ אֶת־כְּנָפָיו שֵׁנִית וּלְהַכּוֹת בָּהֶן גַּלִּים בְּיַם הָאַוֵּר. וַיְהִי כִּי לֹא הִצְלִיחַ הַדָּבָר בְּיָדוֹ, וַיֹּאמֶר לִקְרֹא לְעֶזְרַת אָבִיו, אֲבָל אַךְ פָּתַח פִּיו וְהִנֵּהוּ נוֹפֵל מִגָּבְהֵי מְרוֹמִים אֶל־מַעֲמַקֵּי תְהוֹם רַבָּה וּמוֹצֵא קִבְרוֹ בִּמְצוּלַת יָם. וְהַדָּבָר נַעֲשָׂה לְפֶתַע פִּתְאֹם; וַיַּבֵּט דֵּדָל אַחֲרָיו אֶל־עֵבֶר בְּנוֹ, כְּמִשְׁפָּטוֹ תָמִיד, וְהִנֵּה בְּנוֹ אֵינֶנּוּ, וַיָּמָת לִבּו בְּקִרְבּוֹ. וַיִּקְרָא אֶל־תּוֹךְ חֲלַל הָאַוֵּר בְּקוֹל גָּדוֹל:

– אִיקָר, אִיָקר! בְּנִי אִיקָר! אַיֶךָּ?

וַיּוֹרֶד עֵינָיו וַיַּשְׁפֵּל לִרְאוֹת בְּמַעֲמַקֵּי הַתְּהוֹם הַפְּרוּשָׂה לְרַגְלָיו מִתָּחַת – וְהִנֵּה עַל־פְּנֵי הַיָּם נוֹצוֹת צָפוֹת. וַיַהֲפֹךְ אֶת־כְּנָפָיו וַיֵּרֶד אָרְצָה וַיַּתִּירֵן. וַיֵּלֶךְ דֵּדָל בְּרַגְלָיו לְאֹרֶךְ הַחֹף וְלֹא חָדָל מִקְּרֹא: אִיקָר, אִיקָר בְּנִי! אַיֶךָּ?

וַיַּרְא פִּתְאֹם דֵדָל אֶת־גְּוִיַּת בְּנוֹ הַמֵּתָה מִתְגּוֹלֶלֶת עַל־חֹף הַיָּם, כִּי הִשְׁלִיכוּהָ הַמַּיִם מִקִּרְבָּם.

כֵּן נִקְּמוּ הָאֵלִים בְּדֵדָל עַל־הָרֶצַח, אֲשֶׁר רָצַֹח אֶת תָּל.

וַיִּסְפֹּד דֵּדָל עַל־אִיקָר בְּנוֹ מִסְפֵּד גָּדוֹל וַיְמָאֵן לְהִתְנַחֵם, כִּי גָדַל הַכְּאֵב מְאֹד. וְאוּלָם פִּתְאֹם הִגִּיעַ לְאָזְנָיו קוֹל קִרְקוּר. וַיִּשָּׂא דֵדָל אֶת־עֵינָיו וַיַּרְא וְהִנֵּה יָרַד הָעַיִט עַל־פֶּגֶר בְּנוֹ. וַיֹּאמֶר דֵּדָל: לֹא אֶתֵּן אֶת־גְּוִיַּת בְּנִי מַאֲכָל לְעוֹף הַשָּׁמָיִם. וַיַּשֵּׁב אוֹתוֹ דֵּדָל וַיַחְפֹּר קֶבֶר וְיִקְבֹּר בּוֹ אֶת־בְּנוֹ בַּכָּבוֹד הָרָאוּי. וְהָאָרֶץ, אֲשֶׁר קָבַר בָּהּ דֵּדָל אֶת־בְּנוֹ, הִיא אִי קָרוֹב לְאֶרֶץ יָוָן. ויִּקְרָא דֵדָל אֶת־שֵׁם הָאִי עַל־שֶׁם־בְּנוֹ אִיקָרִיָּה, הוּא שְׁמוֹ עַד הַיּוֹם הַזֶּה.

וַיַּעֲזֹב דֵּדָל אֶת־אִי אִיקָרִיָּה וַיָּעָף לְדַרְכּוֹ הָלֹךְ וָעוּף וַיַּעֲבֹר אֲרָצוֹת וּמְדִינוֹת, גְּבָעוֹת וְהָרִים, יַמִּים וּנְהָרִים, עָרִים וּכְפָרִים וַיָּבֹא וַיַּגַּע עַד־אִי סִצִּילִיָּה וַיֵּרֶד שָׁמָּה. וַיֻּגַּד הַדָּבָר לְמֶלֶךְ סִצִּילִיָּה לֵאמֹר: בָּא דֵּדָל הֵנָּה! וַיִּשְׂמַח הַמֶּלֶךְ שִׂמְחָה גְדוֹלָה, כִּי שָׁמַע אֶת־רֹב חָכְמָתוֹ. וַיִּשְׁלַח הַמֶּלֶךְ אֶל־דֵּדָל שָׂרִים רַבִּים וְנִכְבָּדִים לֵאמֹר:

שָׁמַעְתִּי אֶת־הַגְּדוֹלוֹת אֲשֶׁר עָשִׂיתָ. וְעַתָּה סוּרָה־נָא אֶל־בֵּיתִי וְכָל־מַחְסוֹרְךָ עָלָי.

וַיּוֹאֶל דֵּדָל לָשֶּׁבֶת בְבֵיִת־הַמֶּלֶךְ וַיְהִי לוֹ לְיוֹעֵץ וּלְאָב לְאַנְשֵׁי סִצִּילִיָּה.

וַיַּרְא דֵּדָל, כִּי מֵימֵי הֶהָרִים יוֹרְדִים בְּשֶׁטֶף אֶל־הֶעָרִים, אֲשֶׁר בַּעֲמָקִים, וּמְבִיאִים רָעָה גְדוֹלָה לְיוֹשְׁבֵי הָאִי, וַיַּעַשׂ בְּחָכְמָתוֹ וַיַּחְפֹּר אֲגָם וְנָהָר רָחָב מָשַׁךְ מִמֶּנּוּ אֶל־הַיָּם. וַיֵּרְדוּ מֵימֵי הֶהָרִים אֶל־הָאֲגָם וַיִּקָּווּ שָׁם וַיִּשָּׁפְכוּ דֶּרֶךְ הַנָּהָר הַיָּמָה וַיּוֹשַׁע לְאַנְשֵׁי הָאִי תְּשׁוּעָה גְדוֹלָה.

וְעִיר הַמַּמְלָכָה עִיר פְּרוּצָה אֵין חוֹמָה. וְהָיָה בְּיוֹם מִלְחָמָה וְלֹא קָמָה רוּחַ בְּאִישׁ, כִּי אֵין מִפְלָט מִפְּנֵי הָאוֹיֵב.

וַיַּרְא זֹאת דֵּדָל וַיְחַבֵּל תַּחְבּוּלוֹת וַיִּבֶן עַל־שֵׁן־סֶלַע גָּבֹהַּ וְקֵרֵחַ עִיר בְּצוּרָה, אֲשֶׁר רַק מִשְׁעֹל צַר וַעֲקַלְקַל הוֹלֵךְ אֵלֶיהָ, וַאֲנָשִׁים שְׁלֹשָׂה־אַרְבָּעָה יוּכְלוּ לְהָגֵן עַל־מְבוֹא הָעִיר, מִבְּלִי תֵת אֶת־הָאוֹיֵב לָבֹא שְׁעָרֶיהָ.

וְעוֹד פֶּלֶא שְׁלִישִׁי עָשָׂה דֵּדָל, הַלֹא הוּא מְעָרָה עֲמֻקָּה, אֲשֶׁר חִמֵּם אוֹתָהּ בְּחֹם הָאֵשׁ, אֲשֶׁר בְּמַעֲמַקֵּי הָאֲדָמָה. וַתֵּהָפֶךְ הַמְּעָרָה, אֲשֶׁר הָיְתָה לְפָנִים קָרָה וּמְלֵאָה טַחַב¹¹⁰), לְחֶדֶר חַם, וְהָיָה כַאֲשֶׁר יָשַׁב אִישׁ בַּמְּעָרָה וַיִּתְכַּס בְּשָׂרוֹ זֵעָה מַבְרִיאָה, מִבְּלִי אֲשֶׁר סָבַל מִיִּסּוֹרֵי הַחֹם.

וַיּוֹסֶף עוֹד דֵּדָל וַיִּבֶן לְרַגְלֵי אֶטְנָה¹¹¹) מִקְדָּשׁ לָאֵלָה אַפְרוֹדִיטָה וַיַּקְרֵב לָהּ מִנְחָה חַלַּת דְּבַשׁ. וְהַחַלָּה עֲשׂוּיָה זָהָב מַעֲשֶׂה יְדֵי אָמָן, עַד־אֲשֶׁר תִּטְעֶה עֵין הָרוֹאֶה וְחָשַׁב, כִּי חַלַּת דְּבַשׁ הִיא, אֲשֵׁר רַדוּ אוֹתָהּ זֶה מְעַט מִן הַכַּוֶּרֶת.

וַיַּעַבְרוּ הַיָּמִים וַיִּוָּדַע לְמִין מֶלֶךְ כְּרֵתִים, כִּי נָס דֵּדָל אֶל־אִי סִצִּילִיָּה וַיֵּשֶׁב שָׁם. וַיִּקְבֹּץ מִין אֶת־כָּל־חֵילוֹ וְאֶת־אָנִיּוֹת מִלְחַמְתּוֹ וַיֵּלֶךְ לָצוּר עַל־סִצִּילִיָּה וּלְהָשִׁיב אֶת־הַפָּלִיט אֵלָיו. וַיָּבֹא מִין אֶל סִצִּילִיָּה וַיַּעַל עַל־חֻפָּהּ עִם כָּל־חֵילוֹ וַיִּשְׁלַח מַלְאָכִים אֶל־הַמֶּלֶךְ לֵאמֹר: הִנֵּה־נָא שָׁמַעְתִּי, כִּי דֵדָל עַבְדִּי, אֲשֶׁר נָס מִבֵּיתִי, יוֹשֵׁב בְּאַרְמוֹנֶךָ; וְעַתָּה מַהֲרָה וְהַסְגִּירָה אוֹתוֹ אֵלַי בְּשָׁלוֹם, פֶּן אַכְבִּיד אֶת־יָדִי עָלֶיךָ וְהָיְתָה אַחֲרִיתְךָ מָרָה.

וַיִּקְצֹף מֶלֶךְ סִצִּילִיָּה עַל־מִין קֶצֶף גָּדוֹל, כִּי בָא לְהִלָּחֵם אִתּוֹ עַל־לֹא חָמָס בְּכַפּוֹ, וַיִּגְמֹר בְּלִבּוֹ לְהָשִׁיב רָעָתוֹ בְּרֹאשׁוֹ. וַיִּתַּמֵם הַמֶּלֶךְ עִם מִין וַיַּעֲמֵד פָּנִים, כְּמוֹ לוּ נוֹכַח, כִּי צָדַק מִין בִּדְבַר דֵּדָל. וַיִּשְׁלַח מַלְאָכִים אֶל־מִין וַיְבַקְּשֵׁהוּ לָבֹא אֶל־בֵּיתוֹ אֶל־הַמִּשְׁתֶּה אֲשֶׁר עָשָׂה לוֹ.

וַיָּבֹא מִין בֵּיתָה הַמֶּלֶךְ. וַיְקַבְּלֵהוּ הַמֶּלֶךְ בְּכָבוֹד וַיְצַו לְהָכִין לוֹ אַמְבָּט¹¹²), כַּאֲשֶׁר יֵעָשֶׂה לַקְּרוּאִים הַנִּכְבָּדִים. וַיְהִי כַאֲשֶׁר יָרַד מִין אֶל־הָאַמְבָּט, וַיְצַו הַמֶּלֶךְ וַיְמַלְּאוּ אוֹתָהּ מַיִם רוֹתְחִים וַיָּמָת מִין בְּיִסּוּרִים גְּדוֹלִים. וַיִּקְרָא הַמֶּלֶךְ לְעַבְדֵי מִין וַיֹּאמֶר לָהֶם: אֲהָהּ לַשֶּׁבֶר, כִּי אָסוֹן קָרָה אֶת־מַלְכְּכֶם, כִּי בְּרִדְתּוֹ אֶל־הָאַמְבָּט וַיִּכָּשֵׁל וַיִּפֹּל וַיָּמֹת. וַיַּאֲמִינוּ הְכְּרֵתִים לְדִבְרֵי מֶלֶךְ סִצִּילִיָּה וַיִּקְּחוּ אֶת־גּוּפַת מַלְכָּם וַיִּקְבְּרוּהָ עַל־אִי סִצִּילִיָּה וּמִסְפֵּד גָּדוֹל עָשׂוּ לִכְבוֹדוֹ.

וְיֵּשֶׁב דֵדָל עַל־אִי סִצִּילִיָּה יָמִים רַבִּים וְהַמֶּלֶךְ נָטָה אֵלָיו חָסֶד. וְכָל־הַיָּמִים אִזֵּן דֵּדָל וְחִקֵּר הַרְבֵּה וַיְלַמֵּד דַּעַת אֶת־הָעָם וַיָּבֵא טוֹבָה רַבָּה לְמוֹלַדְתּוֹ הַחֲדָשָׁה. וְאוּלָם לִבּוֹ הוּא לֹא יָדַע שִׂמְחָה, כִּי הִתְאַבֵּל עַל־בְּנוֹ עַד־יוֹם מוֹתוֹ. וַיָּמָת דֵּדָל זָקֵן וּשְׂבַע יָמִים וַיִּקָּבֵר בְּאִי סִצִּילִיָּה.

י.

 

מֶלֵּאָגֵר גִבּוֹר הַצָּיִד.    🔗

אֵנִי מֶלֶךְ קַלִּידוֹן הָיָה אִישׁ צַדִּיק וְתָמִים; אֶת־הָאֵלִים הִתְהַלֵךְ אֵנִי. וַיִּמְצָא אֵנִי חֵן בְּעֵינֵי־הָאֵלִים וַיְבָרְכוּ אֶת־פְּרִי־צֹאנוֹ וּפְרִי־אַדְמָתוֹ וַיַּרְבּוּ אֶת־צֵידוֹ. וַיָּבֵא אֵנִי לָאֵלִים זְבָחִים וּמִנְחָה, לְכָל אֵל וָאֵל וּלְכָל אֵלָה וָאֵלָה אֶת־אֲשֶׁר אָהֵבוּ: וַיָּבֵא לְדֵמֶטֶר, אֵלַת הַפִּרְיָה, מִמְּלֵאָתוֹ¹¹³), לִדְיוֹנִיס מִדִּמְעוֹ¹¹⁴), לְאַתּוּנָה מִיִּצְהָרוֹ¹¹⁵). רַק אֶת־אַרְטְמִידָה¹¹⁶) שָׁכַח וּמֵעַל־מִזְבְּחָהּ לֹא עָלָה עֲשַׁן־הַקְּטֹרֶת.

וַיִּחַר אַף אַרְטְמִידָה וַתַּחֲרֹץ לַעֲנשׁ עֹנֶשׁ קָשֶׁה אֶת־אֵנִי אֲשֶׁר זִלְזֵל בִּכְבוֹדָהּ. וַתְּשַׁלַּח בִּשְׂדוֹת קַלִּידוֹן חֲזִיר מִיַּעַר גָּדוֹל וּמְגֻדָּל. וַתִּהְיֶינָה עֵינָיו כְּגֶחָלִים לוֹהֲטוֹת, זִיפוֹ¹¹⁷) סָמַר וַיִּתְקַפֵד עַל־בְּשָׂרוֹ, מִלִּסְתוֹתָיו¹¹⁸) יֵז קֶצֶף וְנִיבָיו¹¹⁹) הַנּוֹרָאִים דָּמוּ לְשֵׁן הַפִּיל.

וַיָּבֹא הָאֵימְתָּנִי¹²⁰) בִּשְׂדוֹת קַלִּידוֹן וַיִּרְמֹס אֶת־הַקָּמָה וַיֹּאכַל אֶת־אַשְׁכְּלוֹת הַגֶּפֶן יַחַד עִם־הַזְּמוֹרוֹת וַיְכַרְסֵם אֶת־פְּרִי הַזַּיִת, אֲשֶׁר בּוֹ יְכַבְּדוּ אֵלִים וַאֲנָשִׁים, וְאֶת־עֲנָפָיו שִׁבֵּר. וַיִּשַּׁמּוּ אוֹצָרוֹת וַתֵּהָרַסְנָה מַמְגוּרוֹת, כִּי הוֹבִישׁ דָּגָן. גַּם עֶדְרֵי הַצֹּאן וְהַבָּקָר נֶאֱשָׁמוּ¹²¹), כִּי הִשְׂתָּעֵר עֲלֵיהֶם הַחֲזִיר וַיַּעַשׂ בָּהֶם הֶרֶג וְאַבְּדָן וְאֵין מִיָּדוֹ מַצִּיל. וַתִּצְלַח רוּחַ אֱלֹהִים עַל־מֶלֵּאָגֵר הַגִּבּוֹר, בֶּן־הַמֶּלֶךְ אֵנִי, וַיִּקְרָא לַגִּבּוֹרִים יוֹדְעֵי הַצַּיִד לָצֵאת לִקְרַאת הַחַיָּה הָרָעָה וּלְהָרְגָהּ. וַיָּבֹאוּ גִבּוֹרִים מִכָּל־קְצוֹת אֶרֶץ יָוָן וּכְלָבִים עַזֵּי־נֶפֶשׁ הֵבִיאוּ אִתָּם; וּבֵין הַבָּאִים הָיְתָה גַם אַטְלַנְטָה בַּת־מֶלֶךְ אַרְקַדִּיָּה. וְאֵלֶּה תוֹלְדוֹת אַטְלַנְטָה: בַּת־שְׁמוֹנָה יָמִים הָיְתָה אַטְלַנְטָה בְּמוֹת עָלֶיהָ אִמָּהּ. וַיִּקַּח לוֹ אָבִיהָ אִשָּׁה אֲחָרֶת. וַתִּשְׂנָא הָאֵם הַחוֹרֶגֶת אֶת־אַטְלַנְטָה וַתִּתְנַכֵּל לָּהּ לַהֲמִיתָהּ. וַיְהִי הַיּוֹם וַתִּקַח הַמִּרְשַׁעַת אֶת־הַיַּלְדָה וַּתְּבִיאֶנָּה הַיַּעֲרָה וַתַּעַזְבֶנָּה לְנַפְשָׁהּ וַתֹּאמַר: תְּהִי־נָא טֶרֶף לְחַיְתוֹ יַעַר וְאַל־תַּזְכִּירֵנִי אֶת־אִמָּהּ שְׂנוּאַת־נַפְשִׁי.

וְתִשְׁמַע דֻּבָּה אֶת־קוֹל־בְּכִי־הַיַּלְדָּה וַתִּגַּשׁ אֵלֶיהָ וַתְּנִיקֶנָּה מֵחֲלֵב שָׁדֶיהָ. וַתְּגַדֵּל הַדֻּבָּה אֶת־הַיַּלְדָּה וַתְּהִי לָהּ לְאֵם.

וַיַּעַבְרוּ גִבּוֹרִים צַיָּדִים בַּיַּעַר וַיִּקָּחוּהָ וַיְגַדְּלוּהָ וַיְלַמְּדוּהָ לָצוּד צַיִד; וַיִּקְרְאוּ לָהּ אַטְלַנְטָה.

וְאַטְלַנְטָה גָדְלָה וַתִּיף מְאֹד וַתְּהִי מוֹרַת קֶשֶׁת וַתְּחִי עַל־צֵידָהּ. וְלֹא חָפְצָה אַטְלַנְטָה לְהִנָּשֵׂא לְאִישׁ, כִּי שָׂנְאָה אֶת־הַגְּבָרִים תַּכְלִית שִׂנְאָה.

וַיִּקֶר מִקְרֶהָ לָלֶכֶת בַּיָּעַר וַיִּפְגְּשׁוּהָ שְׁנֵי קִינְטוֹרִים וַיִּרְדְּפוּ אַחֲרֶיהָ. וַתִּדְרֹךְ קַשְׁתָּה וַתִּיר אֲלֵיהֶם וַתְּמִיתֵם. וְאוּלָם אֶת־הַצַּיִד אָהֲבָה מִכֹּל. וַיְהִי כְּשָׁמְעָהּ אֶת־הַכְּרוּז, אֲשֶׁר הִכְרִיז מֶלֵּאָגֵר, וַתַּבְלֵג עַל־שִׂנְאָתָהּ לַגְּבָרִים וַתָּבֹא לָקַחַת חֵלֶק בַּצָּיִד.

וַתַּעֲמֹד בַּת־הַמֶּלֶךְ הַיָפָה בִּקְהַל הַגִּבּוֹרִים. וַתִּקְלַע אַטְלַנְטָה אֶת־שְׂעָרָהּ לְמִקְלַעַת וַתֹּאחַז בִּימִינָהּ קֶשֶׁת דְּרוּכָה וְעַל־שִׁכְמָהּ אַשְׁפָּה עֲשׂוּיָה שֵׁן, וּפָנֶיהָ נִפְלָאִים מְאֹד, כִּי דָמוּ לִפְנֵי עַלְמָה יָפָה בְעֵינֵי הַגְּבָרִים וּבְעֵינֵי הַנָּשִׁים הָיוּ לִפְנֵי עֶלֶם נֶחְמָד. וַיַּרְא מֶלֵּאָגֵר אֶת־אַטְלַנְטָה, כִּי טוֹבָה¹²²) הִיא, וַיַּחְמֹד אֶת־יָפְיָהּ בְּלִבּוֹ וַיִּקְרָא: אַשְׁרֵי הָאִישׁ, אֲשֶׁר תִּפֹּל הָעַלְמָה לוֹ חֶבֶל בַּנְּעִימִים¹²³). וַיֶּחְדַּל מִדַּבֵּר בַּדָּבָר הַזֶה, כִּי הֵחֵל הַצָּיִד.

וַיָּשֶׂם גְּדוּד הַצַּיָּדִים אֶת־פְּעָמָיו אֶל־יַעַר אַשּׁוּחִים עַתִּיקֵי־יָמִים. וְהַיַּעַר מִשְׂתָּרֵעַ בְּמִישׁוֹר וְהוֹלֵךְ הָלֹךְ וְעָלֹה הָלֹךְ וְטַפֵּס עַל־צַלְעוֹת הָהָר.

וַיַּעַמְדוּ הַצַּיָּדִים וַיִּפְרְשׂוּ מְצוּדוֹת וַיְּשַׁלְּחוּ אֶת־הַכְּלָבִים. וַיָּרוּצוּ הַכְּלָבִים חוֹצֵץ¹²⁴) בַּמִּשְׁעוֹל¹²⁵) וַיָּבֹאוּ עַד מַכְתֵּשׁ¹²⁶) תְּלוּל הַכְּתָלִים, אֲשֶׁר מֵי הַפְּלָגִים הַזֵידוֹנִים¹²⁷) שָׂרְטוּ וְהָרְסוּ אֶת־צַלְעוֹתָיו; וּבְקַרְקַע הַמַּכְתֵּשׁ קָנִים, שִׂיחִים וַעֲצֵי עֲרָבָה מִסְתַּבְּכִים יָחַד.

בַּעֲבִי הַסְּבָכִים הָאֵלֶה אִוָּה הַחֲזִיר מִשְׁכָּן לוֹ. וַיְהִי כַּאֲשֶׁר הִשְׂתָּעֲרוּ עָלָיו הַכְּלָבִים עַזֵי הַנֶּפֶשׁ וַיִּתְמַרְמֵר אֲלֵיהֶם וַיְבַקַּע לוֹ דֶרֶך בֵּינֵיהֶם וַיִּתְנַפֵּל פִּתְאֹם עַל־אוֹיְבָיו.

וַיָּרִיעוּ הַגִּבּוֹרִים תְּרוּעָה גְדוֹלָה וַיְכוֹנְנוּ אֵלָיו אֶת־חֲנִיתוֹתֵיהֶם. וַיִּפְטַר בֶּן־הַשַּׁחַץ מִפְּנֵיהֶם וַיָּנֶס אֶת־עֲדַת־הַכְּלָבִים. וַיַּמְטִירוּ עָלָיו הַגִּבּוֹרִים מְטַר־חִצִּים. וְאוּלָם הַחִצִּים לֹא נָגְעוּ בוֹ לָרָעָה וְרַק הִגְדִּילוּ אֶת־קִצְפּוֹ. וַיִשְׁתּוֹלֵל הַחֲזִיר וַיַּסֵּב פָּנָיו אֶל־הַגִּבּוֹרִים וַיָּרָץ אֲלֵיהֶם בַּחֲמַת כֹּחוֹ. וַיִּשְׂתָּעֵר הָאֵימְתָּנִי עַל־אֲגַף¹²⁸) הַצַּיָּדִים הַיְמָנִי כְּסֶלַע אֵיתָן, אֲשֶׁר קִלְּעוּ אוֹתוֹ יְדֵי עֲנָק, וַיַּשְׁלֵךְ שְׁלֹשָה גִבּוֹרִים אַרְצָה וַיִּרְמְסֵם בְּרַגְלָיו.

וַתִּדְרֹךְ אַטְלַנְטָה חֵץ עַל־יֶתֶר קַשְׁתָּהּ¹²⁹). וַיִּשְׁרֹק הַחֵץ וַיָּעָף וַיִּמְחַץ אֶת־הַחֲזִיר מִתַּחַת לְאָזְנָיו וַיֵּז דָּמוֹ הַשָּׁחוֹר עַל־זִיפוֹ.

וַיַּרְא מֶלֵּאָגֵר אֶת־הַפֶּצַע, אֲשֶׁר נִפְצַע הַחֲזִיר, וַיִשְׂמַח שִׂמְחָה גְדוֹלָה וַיִּקְרָא:

לָךְ, בַּת־מֶלֶךְ, הַגְּבוּרָה וְהַתְּהִלָּה.

וַיִּכָּלְמוּ הַגִּבּוֹרִים, כִּי אִשָּׁה עָלְתָה עֲלֵיהֶם בִּגְבוּרָה וַיּוֹרוּ כֻלָּם בַּחִצִּים וְלֹא קָלְעוּ אֶל־הַמַּטָּרָה.

וַיַּרְחֵב אָנְקֶה אִישׁ אַרְקַדִיָּה פֶּה עֲלֵיהֶם וַיַּחְטֹף בִּשְׁתֵּי יָדָיו גַּרְזֶן כְּפוּל הַקַּתּוֹת¹³⁰) וַיַּעֲמֹד עַל־אֶצְבְּעוֹת רַגְלָיו וַיָּנֶף בְּכֹחַ. וְאוּלָם בְּטֶרֶם יַסְפִּיק לְהוֹרִיד אֶת־גַּרְזִנּוֹ עַל־רֹאשׁ הַחֲזִיר וַיִּפָּצַע פֶצַע קָשֶׁה בְּנִיבֵי הַפֶּרֶא. וַיְשַׁסְּעֵהוּ הַחֲזִיר, כְּשַׁסַּע זְאֵב אֶת־הַגְּדִי.

אָז יִקַּח אֶת־חֲנִיתוֹ יָזוֹן, אֲשֶׁר עָשָׂה לוֹ אַחֲרֵי־כֵן שֵׁם עוֹלָם לֹא יִכָּרֵת בְּמַסָּעוֹ, אֲשֶׁר נָסַע בָּאֳנִיַּת אָרְגָּה. וַיָּטֶל יָזוֹן אֶת־חֲנִיתוֹ עַל־הַחֲזִיר. וַיִּסֹּב הַחֲזִיר מִפָּנָיו וַתִּפְגַּע הַחֲנִית בְּכֶלֶב תָּמִים וַתְּמִיתֵהוּ.

וַיַּרְא זֹאת מֶלֵּאָגֵר וַיָּטֶל שְׁתֵּי חֲנִיתוֹת אִשָּׁה אַחֲרֵי רְעוּתָהּ; וַתִּצְנַח הָאַחַת בָּאָרֶץ וְהַשְּׁנִיָּה נִתְקְעָה בְּגַב־הַחֲזִיר.

וַיִּפֹּל בֶּן־הַשַּׁחַץ אַרְצָה וַיְפַרְפֵּר וַיַּעַל קֶצֶף מִפִּיו וְדָם רַב זָב מִפִּצְעוֹ. וַיְמַהֵר מֶלֵּאָגֵר וַיַּךְ אוֹתוֹ שֵׁנִית עַל־עָרְפּוֹ הַמְסֻמָּר¹³¹) וְכָל הַגִּבּוֹרִים אֲפָפוּהוּ מִכָּל־עֵבֶר וַיִּדְקְרוּהוּ בַּחֲנִיתוֹתֵיהֶם, עַד־אֲשֶׁר דָּמָה גֵווֹ הַמְּגֻדָּל לִכְבָרָה¹³²). וַיִּפַּח הַחֲזִיר נַפְשׁוֹ וַיָּמָת וַיָּשֶׂם מֶלֵּאָגֵר אֶת־כַּף־רַגְלוֹ עַל־רֹאשׁ־בֶּן־הַשַּׁחַץ וַיִּכְרְתֵהוּ בְּחַרְבּוֹ הַקָּשָׁה וְאֶת־עוֹרוֹ הִפְשִׁיט, וַיִּתֵּן אֶת־עוֹר הַחֲזִיר וְאֶת־רֹאשׁוֹ וְאֶת־נִיבָיו לְאַטְלַנְטָה אַמִּיצַת־הַלֵּב וַיֹּאמֶר לָהּ:

קְחִי אֶת־הַשָּׁלָל, אֲשֶׁר קָנִיתִי לִי בִּגְבוּרָתִי, וְהָיָה לְאוֹת, כִּי לָךְ יָאֲתָה תְּהִלָּה.

וַיִּקְצְפוּ הַגִּבּוֹרִים, כִּי נָתַן מֶלֵּאָגֵר יְקָר לְאִשָּׁה, וְיִתְלוֹנְנוּ בַּמַּחֲנֶה. וּבְנֵי טֶסְטִי, אֲחֵי אִמּוֹ, קָפְצוּ אֶת־אֶגְרוֹפֵיהֶם וַיָּרוּצוּ אֶל־אַטְּלַנְטָה וַיֹּאמְרוּ לָהּ:

הוֹי לִבְנַת־רֹאשׁ¹³³)! מַהֲרִי וְאַל־תְּאַחֲרִי וְהָשִׁיבִי אֶת־הַשָּׁלָל, אֲשֶׁר לָנוּ הוּא. אַל־תִּבְטְחִי בְּיָפְיֵךְ, כִּי לֹא יוֹשִׁיעֵךְ, וְגַם בִּטְחוֹנֵךְ בְּמֶּלֵּאָגֵר רַק בִּטְחוֹן שָּׁוְא הוּא.

וּבְדַבְּרָם אֶת־הַדְּבָרִים הָאֵלֶּה הוֹצִיאוּ אֶת־הַשָּׁלָל, מַתְּנַת מֶלֵּאָגֵר, מִיַּד הָעַלְמָה וַיַּכְבִּידוּ אֶת־לִבָּם לֵאמֹר, כִּי אֵין לוֹ הַמִּשְׁפָּט לְחַלֵק שָׁלָל. וַיִּבְעַר אַף־מֶלֵּאָגֵר וַיַחֲרֹק שֵׁן וַיָּרָץ אֲלֵיהֶם בַּחֲמָת רוּחוֹ וַיְמִיתֵם בְּחַרְבּוֹ.

וְאַלְטֵאָה, אֵם מֶלֵּאָגֵר, שָׂמָה פְעָמֶיהָ אֶל־בֵּיִת־הָאֵלִים לְהַגִּישׁ לָהֶם מִנְחַת־תּוֹדָה עַל־נִצְחוֹן בְּנָהּ. וַיְהִי בְּדַרְכָּהּ וַתִּשָּׂא עֵינֶיהָ וַתֵּרֶא וְהִנֵּה עֲבָדִים נוֹשְׂאִים אֶת־גְּוִיּוֹת אַחֶיהָ הַמּוּמָתִים. וַתִּמְרֹט אַלְטֵאָה אֶת־שְׂעָרָה וַתִּקְרַע אֶת־בְּגָדֶיהָ וַתִּשָּׂא אֶת־קוֹלָהּ וַתֵּבְךְּ. וַתְּמַהֵר וַתָּשָׁב הַבָּיְתָה וַתִּלְבַּשׁ בִּגְדֵי אֵבֶל שְׁחוֹרִים וַתִּקְרַע שָׁמַיִם בְּצַעֲקוֹתֶיהָ.

וַיָּבֹא הַמְּבַשֵּׂר וַיַּגֵּד לָהּ, כִּי בְנָהּ הוּא, אֲשֶׁר הָרַג אֶת־דּוֹדָיו. וַיָּפָג לִבָּהּ, כִּי לֹא הֶאֱמִינָה לוֹ. וַיְהִי כִי נוֹכְחָה, כִי אֱמֶת נָכוֹן הַדָּבָר וְכִי יְדֵי בְנָהּ שָׁפְכוּ אֶת־הַדָּם, וַתְּחֻדַּשׁ בְּקִרְבָּהּ רוּחַ אֲחָרֶת. וַתִּשְׁכַּח אַלְטֵאָה אֶת־אֶבְלָהּ וַתִּתְאַו לִגְאֹל אֶת־דְּמֵי אַחֶיהָ. וַיַּעַל פִּתְאֹם עַל־זִכְרוֹנָהּ דָּבָר, אֲשֶׁר נִמְחָה מִלִּבָּהּ זֶה יָמִים רָבִּים. וְזֶה הַדָּבָר, אֲשֶׁר זָכְרָה אַלְטֵאָה: בְּלִדְתָּהּ אֶת־מֶלֵּאָגֵר פָּקְחָה עֵינֶיהָ וַתֵּרֶא אֶת־הַמּוֹרוֹת¹³⁴) עוֹמְדוֹת עַל־יַד־מִטָּתָהּ. וַתַּעַן הָאַחַת וַתֹּאמַר: אַל־תִּירְאִי, כִּי בֵן יָלַדְּתְּ וְקָרָאת אֶת־שְׁמוֹ מֶלֵּאָגֵר. וְהוּא יִהְיֶה אִישׁ מִלְחָמָה וְגִבּוֹר צָיִד. וַתֹּאמֶר הַשְּׁנִיָּה: בְּנֵךְ יִהְיֶה יְקַר־רוּחַ וּגְדָל־לֵב. וַתֹּאמֶר הַשְּׁלִישִׁית: וְהוּא יַאֲרִיךְ יָמִים, עַד־אֲשֶׁר יֵהָפֵך הָאוּד¹³⁵), אֲשֶׁר אָחֲזָה בוֹ זֶה עַתָּהּ הָאֵשׁ עַל־מוֹקְדֵךְ לָאֵפֶר.

וַיְהִי אַךְ נֶעֶלְמוּ הַמּוֹרוֹת וַתְּמַהֵר אַלְטֵאָה אֶל־הַמּוֹקֵד וַתּוֹצֵא מִשָּׁם אֶת־הָאוּד וַתְּכַבֵּנוּ בַּמָּיִם. וַתִּפְתַּח תֵּבָה וַתָּשֶׂם בָּהּ אֶת־הָאוּד וַתִּסְגְּרֶנָה עַל־מַסְגֵּר, כִּי חָרְדָה לְחַיַּי בְנָהּ. וְתִשְׁמֹר אַלְטֵאָה אֶת־הַתֵּבָה וְאֶת־הָאוּד אֲשֶׁר בָּהּ יָמִים רַבִּים.

וַתִּזְכֹּר אַלְטֵאָה, כִּי לָהּ מִשְׁפָּט־גְּאֻלַּת הַדָּם, וַתַּקְשַּׁח רַחֲמֶיהָ מִבְּנָהּ וַתּוֹצֵא אֶת־הָאוּד מִתּוֹךְ הַתֵּבָה.

וְלַעֲבָדֶיהָ צִוְּתָה לְקוֹשֵׁשׁ קַשׁ, תֶּבֶן וְהֶמֶס¹³⁶) וְלַעֲרֹךְ מְדוּרָה. וַיְהִי כַּאֲשֶׁר נֶעֶרְכָה הַמְּדוּרָה וַתִּגַּשׁ אַלְטֵאָה לָשִׂים עָלֶיהָ אֶת־הָאוּד.

וַיְהַסֵּס לִבָּהּ וַתִּרְעַדְנָה יָדֶיהָ. וַתִּשְׁלַח אַרְבַּע פְּעָמִים אֶת־יָדָהּ לְהַשְׁלִיךְ אֶת־הָאוּד אֶל־תּוֹךְ־הַמְּדוּרָה וְאַרְבַּע פְּעָמִים הֵשִׂיבָה אוֹתָהּ אֵלֶיהָ. וַיִּגְבַּר רֶגֶשׁ הַנְּקָמָה לָאַחֲרוֹנָה עַל־אַהֲבָתָהּ לִבְנָהּ וַתַּשְׁלֵךְ אֶת־הָאוּד עַל־הָעֵצִים הַבּוֹעֲרִים וַתִּקְרָא לֵאמֹר: הוֹי אֵלוֹת הַנְּקָמָה! בֹּאנָה וּרְאֶינָה אֶת־הַקָּרְבָּן הַנּוֹרָא, אֲשֶׁר אֲנִי מַקְרֶבֶת לַפּוּרִיוֹת¹³⁷). וְאַתֶּן, רוּחוֹת אַחַי הַמֵּתִים, רְצֶינָה אֶת־מִנְחָתִי, אֲשֶׁר הֵבֵאתִי לָכֵן, – אֵת־חַיֵּי בְנִי הַיָּקָר. וְיָדֹעַ אֵדַע, כִּי לֹא אֶחְיֶה עוֹד אַחֲרֵי מוֹתוֹ וְכִי אֵרֵד אַחֲרֵי בְנִי בְּיָגוֹן שְׁאוֹלָה.

וּבָעֵת הַזֹּאת שָׁב מֶלֵּאָגֵר מִצֵּידוֹ הָעִירָה וְזֵר־נִצָּחוֹן עַל־רֹאשׁוֹ. וְאוּלָם לִבּוֹ הִכָּהוּ עַל־הָרֶצַח, אֲשֶׁר רָצַח אֶת־אֲחֵי אִמּוֹ, וַיְהִי סָר וְזָעֵף. וַיַּרְגֵּשׁ פִּתְאֹם כְּאֵשׁ צָרֶבֶת בְּלִבּוֹ. וַתְּלַהֵט הָאֵשׁ אֶת־קְרָבָיו וַיִּגְדְּלוּ מַכְאוֹבָיו וַיִּפֹּל לְמִשְׁכָּב. וַיִּשָּׂא אֶת־מַכְאוֹבָיו בְּדוּמִיָּה, כְּיָאוּת לְגִבּוֹר חַיִל, וַיֵּצֶר לוֹ מְאֹד, כִּי לֹא בְּמִלְחָמָה נֶאֱסַף וְכִי יָמוּת כְּמוֹת כָּל־הָאָדָם.

וַיְהִי בִגְּבֹר מַכְאוֹבָיו וַיְצַו לִקְרֹא לְאָחִיו, לְאַחְיוֹתָיו וְּלָאָבִיו הַזָּקֵן וּבְרֹאשׁ כֹּל לְאִמּוֹ, שֶׁאָהֲבָה נַפְשׁוֹ.

וְאִמּוֹ עָמְדָה עַל־יַד־הַמְּדוּרָה וַתַּבֵּט בְּעֵינָהּ הַגֹּוַעַת עַל־הָאֵשׁ הָאוֹכֶלֶת אֶת־חַיַּי בְנָהּ. וַיֵּלֵכוּ מַכְאוֹבֵי מֶלֵּאָגֵר הָלֹךְ וְגָבֹר וְיִסּוּרָיו כָּבְדוּ מִנְּשֹא. וַיְהִי כַּאֲשֶׁר נֶהְפַּךְ הָאוּד לְאֵפֶר וְהַנִּיצוֹץ הָאַחֲרוֹן כָּבָה וַתֵּצֵא נִשְׁמָתוֹ וַיָּמֹת.

וַיָּבֹא אֲבִי מֶלֵּאָגֵר וְאָחִיוֹ וְאַחְיוֹתָיו וַיִּסְפְּדוּ עָלָיו מִסְפֵּד גָּדוֹל, וַיִּסְפֹּד עָלָיו כָּל־הָעָם.

וַיַּבִּיטוּ כֻלָּם, וְהִנֵּה נִפְקַד מְקוֹם הָאֵם. וַיְבַקְּשׁוּהָ וַיִּמְצָאוּהָ מֵתָה עַל־יַד־הַמּוֹקֵד הַכָּבֶה, כִּי שָׂמָה בְּיָדֶיהָ מַחֲנָק לְצַוָּארָהּ.

יא.

 

טַנְטַל.    🔗

טַנְטַל בֶּן־זוּז הָיָה שַׁלִּיט בְּאַחַת מִמְּדִינוֹת פְרִיגְיָּה וַיַּעַשׂ לוֹ שֵׁם בְּעָשְׁרוֹ. וַיִּבֶן הַמֶּלֶךְ הֵיכָל נִשְׂגָב וַיְצַף אֶת־קִירוֹתָיו זָהָב טָהוֹר, וְכָל־כְּלֵי־הַהֵיכָל וּכְלֵי־מַאֲכָלוֹ וּמַשְׁקֵהוּ זָהָב. אֵין כֶּסֶף נֶחְשַׁב בְּיָמָיו לִמְאוּמָה.

וַיְגַדְּלוּ שׁוֹכְנֵי אוֹלִימְפְּ אֶת־טַנְטַל וַיְנַשְּׂאוּהוּ וַיְהִי לָהֶם לְרֵעַ וּלְחָבֵר. וְזוּז אָבִיו אֲהֵבוֹ מִכָּל־בָּנָיו וְלֹא עִצַּב אוֹתוֹ מָיָמָיו. וַיֹּאכַל טַנְטַל עַל־שֻׁלְחָנוֹ וַיָּבֹא בְסוֹד אֵלֵי־נֶצַח.

וְלֹא הָלַךְ טַנְטַל בַּדֶּרֶךְ הַיָּשָׁר וַיִּלְבַּשׁ גָּאוֹן וַיֶּחֱטָא לָאֵלִים וַיְגַל לִבְנֵי־תְמוּתָה אֶת־אֲשֶׁר רָאוּ עֵינָיו מֵאֲחוֹרֵי הַפַּרְגּוּד¹³⁸). וַתִּמְעַט עוֹד זֹאת בְּעֵינָיו וַיִּגְנֹב מֵעַל־שֻׁלְחָן־זוּז אֵת־הָאַמְבְּרוֹזִיָּה וְאֶת־הַנֶּקְטָר¹³⁹) וְאֶת־שְׁלַל־הַקֹּדֶשׁ חִלֵּק בֵּין רֵעָיו שׁוֹכְנֵי־הָאֲדָמָה.

וַיּוֹסֶף טַנְטַל עוֹד לַחֲטֹא, כִּי הֶחְבִּיא אֶת־כֶּלֶב הַזָּהָב, אֲשֶׁר גָּנַב רֵעֵהוּ מִבֵּית מִקְדַּשׁ־זוּז, אֲשֶׁר בְּאִי־כְרֵתִים. וְהַכֶּלֶב יָקָר מְאֹד וְאֵין עֲרֹךְ לִמְחִירוֹ וְהוּא חֵרֶם¹⁴⁰) לְאֵל הָאֵלִים. וַיְהִי כַאֲשֶׁר דָּרַשׁ זוּז מֵאֵת־טַנְטַל לְהָשִׁיב אֶת־הַכֶּלֶב, וַיִּשָׂבַע עַל־שֶׁקֶר, כִּי אֵין בְּיָדוֹ מִן הַחֵרֶם.

וַיּוֹסֶף עוֹד לַעֲשׂוֹת הָרַע בְּעֵינֵי־הָאֵלִים וַיֹּאמֶר לְנַסּוֹתָם, הַפְּקוּחָה עֵינָם לָדַעַת כָּל אִם לֹא.

וַיְהִי הַיּוֹם וַיַּעַשׂ מִשְׁתֶּה לָאֵלִים. וַיִּקַּח אֶת־בְּנוֹ יְחִידוֹ – אֶת־פֵּלָפְּסְ וַיְבַשְּׁלֵהוּ וַיַּגֵּשׁ לִבְנֵי אַלְמָוֶת. ותִּתְרַמֶּה¹⁴¹) רַק דֵּמֶטֶר וַתֹּאכַל חֵלֶק־הַשּׁוֹק מִבְּשַׂר הַפִּגּוּלִים¹⁴²) וּשְׁאָר הָאֵלִים יָדְעוּ תֵּכֶף אֶת־הַמַּעֲשֶׂה הָרָע, אֲשֶׁר עָשָׂה טַנְטַל, וַיְמַהֲרוּ וַיַּשְׁלִיכוּ אֶת־גְּוִיַּת הַנַּעַר הַמְּרֻטָּשָה אֶל־תּוֹךְ קַלַּחַת וְכַעֲבֹר רֶגַע הוֹצִיאָה הַמּוֹרָה¹⁴³) קְלוֹטָה מִתּוֹכָהּ נַעַר חַי וּבָרִיא וְאֶת־חֵלֶק־הַשּׁוֹק הֶחָסֵר עָשְׂתָה שֵׁן.

וַתִּמָּלֵא סְאַת־טַנְטַל, כִּי חָרָה בוֹ אַף־הָאֵלִים, וַיַּשְׁלִיכוּהוּ לְמַעֲמַקֵּי־תֹּפֶת וַיְעֻנֶּה שָׁם עִנּוּיִם גְּדוֹלִים.

וַיַּעֲמֹד טַנְטַל בְּלֵב בְּרֵכַת־מַיִם חַיִּים, אֲשֶׁר הִגִּיעוּ אֵלָיו עַד־סַנְטְרוֹ; ועַל־חֻפֵּי־הַבְּרֵכָה עֵצִים מְכֻסִים תַּפּוּחִים אֲדֻמִּים, אֲגָסִים מְלֵאִים עָסִיס, רִמּוֹנֵי־אַרְגָּמָן, תְּאֵנִים מְתֻקּוֹת וְזֵיתִים יְרֻקִּים. וְעַנְפֵי־הָעֵצִים פְּרוּשִׂים וּתְלוּיִם מִתַּחַת לְחָטְמוֹ. וְהָיָה, כַּאֲשֶׁר יַחְפֹץ טַנְטַל לִשְׁתּוֹת וְהִטָּה רֹאשׁוֹ לָקַחַת מִמֵּימֵי הַבְּרֵכָה, וְנֶעֶלְמוּ פִּתְאֹם הַמַּיִם וְיָבְשׁוּ, כְּמוֹ לוּ בָּלְעָה אוֹתָם הָאֲדָמָה, וְרָאוּ עֵינָיו רַק אֶת־הַקַרְקַע הַשְּׁחוֹרָה, אֲשֶׁר לַבְּרֵכָה; וכַאֲשֶׁר יָרִים רֹאשׁוֹ וְשָׁבוּ הַמַּיִם לְאֵיתָנָם¹⁴⁴) וְהִגִּיעוּ כִמְעַט עַד־שְׂפָתָיו כְּבָרִאשׁוֹנָה. וְכַאֲשֶׁר יַחְפֹּץ לִטְעֹם מִפְּרִי הָעֵץ הַתָּלוּי מִתַּחַת לְחָטְמוֹ וּבָאָה רוּחַ סְעָרָה וְנָשְׂאָה אֶת־הָעֲנָפִים הַטְּעוּנִים פְּרִי וֶהֱרִימָם מִמַּעַל לֶעָבִים. כָּכָה יִשְׂבַּע טַנְטַל רָעָב וְצִמָּאוֹן כָּל־הַיָּמִים.

בְּכָל־זֹאת לֹא שָׁב אַף הָאֵלִים מִמֶּנּוּ וַיּוֹסִיפוּ עוֹד לְיַסְּרֵהוּ קָשָׁה וַיִּתְלוּ בְּרִפְיוֹן מִמַּעַל לְרֹאשוֹ צוּר מָצוּק נוֹרָא. וְהָיָה כַאֲשֶׁר יִשָּׂא טַנְטַל אֶת־עֵינָיו וְרָאָה אֶת־סֶלַע הַמָּגוֹר, אֲשֶׁר מִמַּעַל לְרֹאשׁוֹ, וְחָרֵד חֲרָדָה גְדוֹלָה וְחָשַב: עוֹד מְעַט וְנָפַל הַצּוּר עָלַי וַהֲדִקַּנִי.

כָּכָה עָנְשָׁה יַד־הָאֵלִים אֶת־טַנְטַל כֶּבֶד־הֶעָוֹן, אֲשֶׁר הֶקַל בִּכְבוֹדָם. וְהָעוֹנֶשׁ הַזֶּה יִמָשֵׁך עַד־סוֹף כָּל־הַיָּמִים.

יב.

 

פּלֹפְּסְ.    🔗

טַנְטַל הָיָה רָשָׁע מְרֻשָּׁע וַיַּכְעֵס בְּמַעֲלָלָיו אֶת־הָאֵלִים. וַיְהִי בְרִדְתּוֹ לְמַעֲמַקֵּי־תֹּפֶת וַיִּמְלֹךְ בְּנוֹ פֵּלֹפְּסְ תַּחְתָּיו. וְלֹא הָלַךְ פֵּלֹפְּסְ בְּדַרְכֵי־אָבִיו וַיַּעַשׂ הַטּוֹב וְהַיָּשָׁר בְּעֵינֵי־הָאֵלִים. וּמֶלֶךְ טְרוֹיָה הַשְּׁכֵנָה לִפְרִיגִיָּה אָהַב מְדָנִים¹⁴⁵). וַיְהִי הַיּוֹם וַיִּפְשְׁטוּ גְדוּדֵי הַטְּרוֹיִם עַל־פְרִיגִיָּה וַיִּשְׁבּוּ אֲנָשִׁים, נָשִׂים וָטַף וְגַם צֹאן וּבָקָר רַב לָקְחוּ וַיִּנְהֲגוּ וַיֵּלֵכוּ לְדַרְכָּם.

וְיִכְעַס פֵּלֹפְּסְ עַל־מֶלֶךְ טְרוֹיָה כַּעַס גָּדוֹל וַיֵצֵא עָלָיו לַמִּלְחָמָה. וַתִּכְבַּד עָלָיו יַד־הַטְּרוֹיִם וַיַּכּוּהוּ מַכָּה גְדוֹלָה וַיִּלְכְּדוּ אֶת־אַרְצוֹ. וַיֵּאָנֶס פֵּלֹפְּסְ לָלֶכֶת מֵאַרְצוֹ וַיָּנָס וַיִּבְרַח אַרְצָה יָוָן וַיֵּשֶׁב שָׁם. וַיִּטּוּ הָאֵלִים אֵלָיו חֶסֶד וַיְהִי אִישׁ מַצְלִיחַ וַיִּמְצָא חֵן בְּעֵינֵי־כֹל. וַיְהִי אַךְ צָמְחָה כִשּׁוּת¹⁴⁶) שְׁחוֹרָה בִשְׂפָמוֹ וַיַּרְא אֶת־הִפּוֹדָמִיָּה בַּת אֱנוֹמִי מֶלֶךְ אֵלִידָה וַיֶּחֱשַׁק בָּהּ וַיַּחְפֹּץ לְקַחְתָּהּ לְאִשָּׁה.

וְהִפּוֹדָמִיָּה הִיא הַיָּפָה בִנְשֵׁי־יָוָן וַיִּרְבּוּ עוֹגְבֶיהָ¹⁴⁷), וְלֹא אֶחָד שָׁלַח מַלְאָכִים אֶל־אֱנוֹמִי לֵאמֹר: הרְבֵּה עָלַי מֹהַר¹⁴⁸) וּמַתָּן, רַק תְּנָּה אֶת־בִּתְּךָ לִי לְאִשָּׁה. וְלֹא אָבָה מֶלֶךְ אֵלִידָה לָתֵת אֶת־בִּתּוֹ לְאִישׁ, כִּי כֵן הָיָה דְבַר־הַתְּרָפִים אֵלָיו, בְּלֶכְתּוֹ לִדְרֹשׁ אֱלֹהִים: יָדֹעַ תֵּדַע, כִּי בְיּוֹם הֱיוֹת בִּתְּךָ לְאִישׁ מוֹת תָּמוּת.

וַיַּכְרֵז אֱנוֹמִי כְּרוֹז בְּכָל־אַרְצוֹת־תֵּבֵל לֵאמֹר: מי הָאִישׁ הֶחָפֵץ לָקַחַת אֶת־בִּתִּי לְאִשָּׁה יָבֹא וְהִתְחָרָה אִתִּי בַמֶּרְכָּב; וְהָיָה אִם יַקְדִּים הוּא לָבֹא אֶל־מְקוֹם הַמוּעָדָה¹⁴⁹) וְלָקַח אֶת־הִפּוֹדָמִיָּה הַיָּפָה לְאִשָּׁה וְגַם נֵדֶה רָב, כְּיַד הַמֶּלֶךְ; וְאִם יָדוֹ תִהְיֶה עַל הַתַּחְתּוֹנָה¹⁵⁰) וְנִכְרַת רֹאשׁוֹ מֵעָלָיו.

וַיּוֹעֶד הַמֶּלֶךְ אֶת־מִזְבַּח־פּוֹסִידוֹן, אֲשֶׁר עַל־רְצוּעַת־יַבֶּשֶׁת קוֹרִינְטְ, לִגְבוּל הַמֵּרוּץ.

וּמִשְׁפַּט־הַמֶּלֶךְ אֶת־הָעוֹגְבִים: כָּל־אִישׁ מִתְחָרֶה יוֹשֵׁב בְּמֶרְכָּבָה רְתוּמָה לְאַרְבָּעָה סוּסִים מְהִירִים וּמִהֵר לִרְכֹּב אֶל מְחוֹז חֶפְצוֹ; וְהַמֶּלֶךְ עוֹמֵד לִפְנֵי־מִזְבַּחַ־זוּז וּמַעֲלֶה עוֹלָה לְפָנָיו. וּבְכַלּוֹתוֹ לְהַעֲלוֹת אֶת־עוֹלָתוֹ וְאָחַז בַּחֲנִיתוֹ הַחַדָּה וְיָשַׁב בְּמֶרְכַּבְתּוֹ הַנְּהוּגָה בִּידֵי רַכָּבוֹ הָאֱמוּנוֹת¹⁵¹) וְרָדַף אַחֲרֵי הָעוֹגֵב. וְהָיָה כַּאֲשֶׁר יַדְבִּיקֶנוּ הַמֶּלֶךְ וּדְקָרוֹ בַּחֲנִיתוֹ וֶהֱמִיתוֹ. כָּכָה יַעֲשֶׂה הַמֶּלֶךְ לְכָל־הַגִּבּוֹרִים הַמְחַזְּרִים אַחֲרֵי הִפּוֹדָמִיָּה.

וַיִפְּלוּ מִיַּד הַמֶּלֶךְ שְׁלֹּשָׂה־עָשָׂר גִבּוֹרִים חָלָל.

וַיְהִי כִשְׁמֹעַ פֵּלֹפְּסְ אֶת־קוֹל־הַקְּרִיאָה, אֲשֶׁר הוֹצִיא אֱנוֹמִי, וַיְמַהֵר לָלֶכֶת אַרְצָה אֵלִידָה לְהִתְחָרוֹת אֶת־הַמֶּלֶךְ וְלִזְכּוֹת בְּהִפּוֹדָמִיָּה הַיָּפָה. וַיְהִי בְּדַרְכּוֹ וַיַּעַל עַל־חֹף־חֲצִי־הָאִי, אֲשֶׁר יִקָרֵא הַיּוֹם עַל־שְׂמוֹ פֶּלֶפּוֹנֵס. וַתַּגַּע לְאָזְנָיו הַשְּׁמוּעָה עַל־דְּבַר הַמַּעֲשֶׂה, אֲשֶׁר עָשָׂה הַמֶּלֶךְ בַּגִּבּוֹרִים הַמְּבַקְּשִׁים אֶת־יַד־בִּתּוֹ. וַיֵּצֶר לְפֵלֹפְּסְ מְאֹד וַיִּתְעַצֵּב אֶל־לִבּוֹ. וַיָּקָם וַיֵּלֶךְ אֶל־חֹף־הַיָּם לְהִתְפַּלֵּל לְמָגִנּוֹ הֶחָזָק, לְפוֹסִידוֹן בַּעַל־הַקִּלְשׁוֹן, כִּי יָבֹא לַעֲזָר־לוֹ בַּצָּרָה. וַיִּבָּקְעוּ מַעְיְנוֹת תְּהוֹם בְּקוֹל רַעַשׁ גָּדוֹל וְשַׂר־הַיָּם נִרְאָה אֶל־הַגִּבּוֹר הַצָּעִיר. וְיִתְחַנֵּן פֵּלֹפְּסְ אֶל־פּוֹסִידוֹן וַיֹּאמַר:

אֲדוֹן הַמַּיִם הַגָּדוֹל וְהַנּוֹרָא! הַטֵּה־נָא אָזְנְךָ אֶל־תַּחֲנוּנֵי עַבְדְּךָ וְאַל תִּתְּנֵנִי בִידֵי אֱנוֹמִי, כִּי הִקְשִׁיחַ לִבּו מִבִּתּוֹ וַיֹּאמֶר לַהֲרֹג כָּל־עֶלֶם, אֲשֶׁר חָשְׁקָה נַפְשׁוֹ בָהּ. הִנֵּה כְבָר נָפְלוּ שְׁלֹשָׂה־עָשָׂר גִבּוֹרִים חָלָל מִיָּדוֹ וְנַפְשׁוֹ עוֹד לֹא שָׂבְעָה דָם. וְאַתָּה, אֵל גִּבּוֹר, אַל־תָּפֵק זְמָמוֹ¹⁵²) וַהֲקִלּוֹתָ אֶת־סוּסַי מִסּוּסָיו וּמֶרְכַּבְתִּי תְּמַהֵר מִמֶּרְכַּבְתּוֹ. וְהָיָה אִם תִּהְיֶה עִמָדִי וּבָאתִי הָרִאשׁוֹן אֶל־הַמַּטָּרָה וְהָיִיתִי אֲסִיר־תּוֹדָה לְךָ כָּל־הַיָּמִים.

וַיִּשְׁמַע פּוֹסִידוֹן לְקוֹלוֹ וַיֵּעָתֶר־לוֹ. וַיִּפָּתְּחוּ שֵׁנִית מַעְיְנוֹת תְּהוֹם וַתֵּצֵא מִתּוֹכָהּ מֶרְכָּבָה מְצֻפָּה זָהָב וּרְתוּמָה לְאַרְבָּעָה סוּסִים מְהִירִים כַּסּוּפָה. וַיִּרְכַּב הָעֶלֶם בַּמֶּרְכָּבָה הַנִּפְלָאָה וַיָטוּשׁוּ הַסּוּסִים וַיָּרוּצוּ כַּסּוֹפָה וַיְבִיאוּהוּ אַרְצָה אֵלִידָה. וַיְּהִי כִרְאוֹת אֱנוֹמִי אֶת־הַמֶּרְכָּבָה וְאֶת־הַסּוּסִים וַיֶּחֱרַד חֲרָדָה גְדוֹלָה, כִּי הִכִּיר אֶת־סוּסֵי פּוֹסִידוֹן, אֲדוֹן־הַיָּם.

וַיִּכְבַּד לֵב אֱנוֹמִי וַיֵּצֵא לְהִתְחָרוֹת עִם פֵּלֹפְּסְ, כִּי בָטַח בְּכֹחַ סוּסָיו הַקַּלִּים מֵרוּחַ הַסְּעָרָה.

וַיִּנָּפֵשׁ פֵּלֹפְּסְ וְסוּסָיו אַחֲרֵי הַדֶּרֶךְ הָרְחוֹקָה, אֲשֶׁר עָשָׂה. וַיְהִי כַּאֲשֶׁר נָח וַיָּבֵא אֶת־סוּסָיו אֶל־מְסִלַּת־הַמֵּרוּץ. וַיֵּשֶׁב פֵּלֹפְּסְ בַּמֶּרְכָּבָה וַיִּמְשֹׁךְ בַּמּוֹשְׁכוֹת. וַיָטוּשׁוּ הַסּוּסִים כְּמַהֵר חֵץ וַיִּשְׁטְפוּ בְּחָזְקָה. וַיְהִי כַּאֲשֶׁר קָרַב אֶל־מְחוֹז חֶפְצוֹ וַיִּשְׁמַע פִּתְאֹם מֵאַחֲרָיו קוֹל שַׁעֲטַת פַּרְסוֹת סוּסִים. אֵלֶּה הָיוּ סוּסֵי־הַמֶּלֶךְ, אֲשֶׁר הִדְבִּיקוּ אֶת־הָעוֹגֵב הָאַמִּיץ. וַיֹּאחַז הַמֶּלֶךְ בַּחֲנִיתוֹ לְהָמִית אֶת־פֵּלֹפְּסְ. וַיַּרְא זֹאת פּוֹסִידוֹן, מָגֵן פֵּלֹפְּסְ, וַיָּבֹא לְעֶזְרָתוֹ וַיְשָׁבֵּר אֶת־אוֹפַנֵּי מֶרְכֶּבֶת הַמֶּלֶךְ. וַתִּפֹּל הַמֶּרְכָּבָה בְּעֶצֶם מְרוּצָתָה וַתִּשָּׁבֵר לִרְסִיסִים. וַיִּפֹּל גַּם הַמֶּלֶךְ וַיּוֹצֵא רוּחוֹ וַיָּמֹת.

וַיְהִי בְּהַגִּיעַ פֵּלֹפְּסְ אֶל־מְקוֹם הַמּוּעָדָה וַיַּסֵּב פָּנָיו וַיַּרְא וְהִנֵּה אַרְמוֹן הַמֶּלֶךְ בּוֹעֵר בָּאֵשׁ, כִּי הִכָּה אוֹתוֹ הַבָּרָק, אֲשֶׁר יָרָה זוּז. וַיְמַהֵר פֵּלֹפְּסְ וַיַּהֲפֹךְ אֶת- מֶרְכַּבְתּוֹ וַיָּרָץ אֶל־מְקוֹם הַשְׂרֵפָה. וַיָּבֹא בְעוֹד מוֹעֵד וַיֵּרֶד מֵעַל־הַמֶּרְכָּבָה וַיִּקְפֹּץ אֶל־תּוֹךְ הַלֶהָבָה וַיּוֹצֵא אֶת־הִפּוֹדָמִיָּה וַיַּצִּילֶהָ מִמָּוֶת. וְאַרְמוֹן הַמֶּלֶךְ נִשְׂרַף מִן הַמַּסָּד עַד־הַטְּפָחוֹת¹⁵³) וְלֹא נוֹדַע מְקוֹמוֹ אָיּוֹ.

יג.

 

נְיוֹבָה.    🔗

נְיוֹבָה, מַלְכַּת־תֵּבָה הַמַּעֲטִירָה¹⁵⁴), בַּת־טַנְטַל רֵעַ הָאֵלִים וּדְיוֹנָה אֲחוֹת־הַפְּלֵיָדוֹת¹⁵⁵) הַמַּזְהִירוֹת, בֹּרְכָה מֵאֵת שׁוֹכְנֵי־אוֹלִימְפְּ בַּכֹּל: ביֹּפִי, בְּעֹשֶׂר וּבְבָנִים. וְלֹא נִמְצְאָה בְּכָל־אֶרֶץ יָוָן אִשָּׁה יָפָה כִנְיוֹבָה. וּבַעֲלָהּ אַמְפְיּוֹן מָצָא חֵן בְּעֵינֵי הַמּוּזוֹת¹⁵⁶) וַתִּתֵּנָּה לוֹ כִּנּוֹר נִפְלָא לְמִנְחָה. וַיְהִי בְנָגְעוֹ בְמֵיתְרֵי־הַכִּנּוֹר וַיְנַגֵּן, וַיִּרְקְדוּ הֶהָרִים כָּאֵילִים וְהָאָרֶץ פָּצְחָה רִנָּה; וַיֵּעָקְרוּ סְלָעִים גְּדוֹלִים מִמְּקוֹמָם וַיְסֻדְרוּ לְנִדְבָּכִים¹⁵⁷) וַתִּבָּנֶה הָעִיר תֵּבָה. וּבָנִים רַבִּים יַלְדָה נִיוֹבָה לְאִישָׁהּ: שִׁבְעָה יְלָדִים וְשֶׁבַע יְלָדוֹת. וַיִּהְיוּ כֻלָּם יָפִים וְנֶחְמָדִים וַיִּדְמוּ לִשְׁתִילֵי¹⁵⁸) זֵיתִים. וַתִּתְבָּרֵכְנָה כָל־נְשֵׁי תֵּבָה בִּנְיוֹבָה וַתִּקְרֶאנָה לָהּ: המְּאֻשָּׁרָה בַּנָּשִׁים.

וַתִּתְגָּאֶה נְיוֹבָה בְּיָפְיָהּ וּבְאָשְׁרָהּ וַתֹּאמַר: הלֹא לֹא נוֹפֶלֶת אָנֹכִי מִן הָאֵלִים.

וַיְהִי הַיּוֹם וַתַּעֲבֹר מַנְתָּה הַנְּבִיאָה, בַּת־טִירָזִי הַקּוֹסֵם, וַתְּדַבֵּר אֶל־נְשֵׁי־תֵבָה לֵאמֹר: הִנֵּה לֵטָה, אֵשֶׁת זוּז הַמְּפוֹאָרָה, וְּתְאוֹמֶיהָ: אפּוֹלָה וְאַרְטְמִידָה, עוֹבְרִים עַל־פְּנֵי־תֵבָה. וְעַתָּה שֵׂמְנָה צְרוֹרוֹת דַּפְנָה¹⁵⁹) עַל־רָאשֵׁיכֶן וְצֶאנָה לְקַדֵּם פָּנֶיהָ בַּכָּבוֹד הָרָאוּי לָהּ וְהִקְטַרְתֶּן עַל־מִזְבְּחָה קְטֹּרֶת לְרֵיחַ נִיחוֹחַ.

וַתִּקָּהַלְנָה כָל־הַנָּשִׁים מִנַּעֲרָה וְעַד־זְקֵנָה וַתֵּלַכְנָה בַּסָּךְ¹⁶⁰) לְכַבֵּד אֶת־הָאֵלֶה בְמִנְחָה וּבִקְטֹרֶת. וַתָּבֹא גַם נְיוֹבָה וְשָׂרוֹתֶיהָ עִמָּהּ. וּנְיוֹבָה יָפָה כַּחַמָּה וְהִיא לְבוּשָׁה בִגְדֵי מַלְכוּת וְשְׂעָרָהּ עָשׂוּי מַעֲשֶׂה מִקְשֶׁה¹⁶¹).

וַתֵּלֶךְ נְיוֹבָה נְטוּיַת גָּרוֹן וַתַּעֲמֹד בִּקְהַל הַנָּשִׁים הַמְּטַפְּלוֹת בְּמַעֲשֶׂה הַקְּטֹרֶת וַּתָּנַע רֹאשָׁן אַחֲרֵיהֶן וַתַּעַן וַתֹּאמַר:

מַה־לָכֶן, כִּי נִזְעַקְתֶּן, בְּנוֹת תֵּבָה? הֶעָבַר עֲלֵיכֶן רוּחַ שִׁגָּעוֹן, כִּי בָאתֶן לְכַבֵּד אֵלָה, אֲשֶׁר לֹא הָיְתָה וְלֹא נִבְרָאָה? כִּי מִי הִיא לֵטָה, כִּי נַעַבְדֶנָּה? הֲלֹא בַת־הָאֵיתָנִים הָעֲלוּבָה הִיא¹⁶²), אֲשֶׁר לִפְנֵי־יָמִים רַבִּים בִּקְּשָׁה מִקְלָט לָהּ לָלֶדֶת שָׂם אֶת־בָּנֶיהָ, וְלֹא מָצָאָה, עַד־אֲשֶׁר חָמַל עָלֶיהָ דֵלוֹס הָאִי הַנָע וְנָד¹⁶³) וַיַּרְכִּיבֶנָּה עַל־גַּבּוֹ וַתֵּלֶד שָׁם – וְאוֹתָהּ שַׂמְתֶּן לְאֵלָה לָכֶן? הָאֵין בְּקִרְבְּכֶן נָשִׁים, אֲשֶׁר בָּחֲרוּ בָּהֶן אֵלֵי נֶצַח? וּמַדּוּעַ לֹא תַּעֲבֹדְנָה אוֹתִי? הֲלֹא אֲנִי נֶכְדַּת־זוּז אָנֹכִי וּבַת־טַנְטַל, רֵעַ־הָאֵלִים, וּדְיוֹנָה, אֲחוֹת הַפְּלֵיָדוֹת הַמַּזְהִירוֹת כַּכּוֹכָבִים עַל־שְׁמֵי־הָרָקִיעַ! מִי יַעֲרֹךְ אֶת־חִין יָפְיִי? וּמִי יִסְפֹּר אֶת־רֹב עָשְׁרִי? וּמַה הֵם שְׁנֵי בְנֵי־לֵטָה לְעֻמַּת אַרְבָּעָה עָשָר בָּנָי? הֲלֹא כְאַיִן וּכְאֶפֶס נֶחְשָׁבוּ!

< וְעַתָּה, בְנוֹת־תֵּבָה, שְׁמַעְנָה לִי: הַסֵרְנָה אֶת־צְרוֹרוֹת הַדַּפְנָה מֵעַל־רָאשֵׁיכֶן וּמַהֵרְנָה וְלֵכְנָה הַבָּיְתָה, כִּי הִכְסַלְתֶּן עֲשׂה.

וְלֹא הֵעֵזוּ בְנוֹת־תֵּבָה לַעֲבֹר עַל־מִצְוַת־הַמַּלְכָּה וַתָּסֵרְנָה אֶת־צְרוֹרוֹת הַדַּפְנָה מֵעַל־רָאשֵׁיהֶן וַתָּשֹׁבְנָה הַבָּיְתָה מַחֲרִישׁוֹת וְנִדְהָמוֹת; וּבְלִבָּן הִתְפַּלְּלוּ לָאֵלָה הַנֶּעֱלָבָה, כִּי תִסְלַח לָהֶן עַל־חֲטָאתָן.

וְלֵטָה הִשְׁקִיפָה מִפִּסְגַּת הָהָר עַל־פְּנֵי־תֵבָה וַתֵּרֶא אֶת־אֲשֶׁר נַעֲשָׂה וַיֶעֱשַׁן אַפָּהּ. וַתֵּפֶן אֶל־בְּנָה אַפּוֹלָה וְאֶל־בִּתָּהּ אַרְטְמִידָה וַתַּעַן וַתֹּאמַר: הרְאִיתֶן אֶת־הַמַּעֲשֶׂה, אֲשֶׁר עָשְׂתָה נְיוֹבָה בַּת־הַבְּלִיַעַל, חִזְקַת הַמֵּצַח! הַמְּעַט מִמֶּנָּהּ, כִּי מָנְעָה מִמֶּנִי מִנְחָה וָזָבַח וְאֶת־מִזְבְּחוֹתַי הָרְסָה, וַתְּדַבֵּר עוֹד בִּי דֹפִי, וַתָּשֶׂם אֶת־שְׁמִי לַחֲרָפוֹת, וְאֶתְכֶם, בָּנַי, מְשׂוֹשׂ גִילִי וְּגָאוֹן תִּפְאַרְתִּי, גִּדְּפָה – וְאַתֶּם לֹא תָרִיבוּ רִיבִי?

וַיְּקַנְּאוּ אַפּוֹלָה וְאַרְטְמִידָה לְאִמָּם וַיִּקְרְאוּ: הרָגְעִי, כִּי לֹא יְכֻפַּר לִנְיוֹבָה הֶעָוֹן הַזֶּה עַד־עוֹלָם.

וַיִּתְעַטְּפוּ בָעֲרָפֶל וַיְצַוּוּ לָרוּחוֹת וַתִּשֶּׂאנָה אוֹתָם אֶל־עֵבֶר תֵּבָה, עִיר־קֶדֶם. וּמִחוּץ לְחוֹמַת תֵּבָה כִּכָּר רַחֲבַת יָדָיִם, אֲשֶׁר לֹא נֶחְרְשָׁה וְלֹא נִזְרְעָה; ומִדֵּי יוֹם בְּיוֹמוֹ יֵאָסְפוּ עָלֶיהָ כָּל־בַּחוּרֵי הָעִיר וִילָדֶיהָ לְאַמֵּן אֶת־יָדָם בַּקְּרָב, לְהִתְחָרוֹת בְּרִיצָה וּבִרְכִיבָה וּלְהִתְגּוֹשֵׁשׁ¹⁶⁴).

וַיְהִי כְבֹא הָאֵלִים אֶל־הַכִּכָּר וַיִּשְּׂאוּ עֵינֵיהֶם וַיִּרְאוּ וְהִנֵּה נֶאֶסְפוּ שָׁמָה כָּל־בַּחוּרֵי תֵבָה כִּתְמוֹל שִׁלְשׁוֹם וְהַמִּשְׂחָקִים הֵם בְּעֶצֶם חֻמָּם. וּבֵין הַמְּשַׂחֲקִים גַּם שִׁבְעַת בְּנֵי נְיוֹבָה: האֶחָד רוֹכֵב עַל־סוּס דּוֹהֵר וְהַשֵּׁנִי קוֹלֵעַ חִצִּים אֶל־הַמַּטָּרָה; הַשְּׁלִישִׁי רָץ בְּרַגְלָיו לְהַקְדִּים אֶת־חֲבֵרוֹ וְהָרְבִיעִי זוֹרֵק מַעֲגֶלֶת¹⁶⁵); הַחֲמִישִׁי מִתְאַבֵּק עִם־רֵעֵהוּ, הַשִּׁשִׁי מִתְחָרֶה בְּמֵרוּץ מֶרְכָּבוֹת וְהַבֵּן הַבְּכוֹר רוֹכֵב בַּמַּעֲגָל¹⁶⁶), בְּיָדָיו הַחֲזָקוֹת יֹאחַז בַּמּוֹשְׁכוֹת, פַּעַם יַרְעִישׁ אֶת־סוּסוֹ וְשָׁטַף וְעָבַר וְהֶעֱלָה קֶצֶף מִפִּיו וּפַעַם יִבְלְמֵהוּ בְּרֶסֶן וִירוֹצְצֵהוּ רִיצָּה רְגִילָה.

וַיָּנַע פִּתְאֹם הָעֶלֶם וַיִּצְעַק צְעָקָה גְדוֹלָה וּמָרָה, כִּי פָּגַע בּוֹ בֶּן־קֶשֶׁת¹⁶⁷), אֲשֶׁר יָרָה אַפּוֹלָה. וַתִּשָּׁמַטְנָה הַמּוֹשְׁכוֹת מִיָּדָיו וַיִּפֹּל עַל־גַּב־הַסּוּס וְאַחַר צָנַח אַרְצָה וַיָּמֹת.

וַיְמַהֲרוּ אֵלָיו אֶחָיו לִרְאוֹת מַה לוֹ. וַיִּפְגְּעוּ גַם בָּהֶם חִצֵּי אַפּוֹלָה וַיָּמוּתוּ. ולֹא נִשְׁאַר מִכָּל־בְּנֵי־נְיוֹבָה, כִּי אִם הַקָּטָן, אֲשֶׁר רָאָה בְּמוֹת־אֶחָיו. וַיִּכְרַע עַל־בִּרְכָּיו וַיְפָרֵשׂ כַּפָּיו הַשָּׁמַיְמָה וַיִּתְפַּלֵּל לֵאמֹר: אנָּא אֵלֵי הָרַחֲמִים! חוּסוּ נָא עָלַי וְאַל־תְּמִיתוּנִי, כִּי מֶה חָטָאתִי?

וַיִּכָּמְרוּ רַחֲמֵי הַקַּשָּׁת הָאַכְזָר עַל־הַיֶּלֶד וַיַּחְפֹּץ לַעֲצֹר בְּעַד הַחֵץ, אֲשֶׁר יָרָה, וְלֹא יָכֹל. וַיָּעָף הַחֵץ וַיָּבֹא בְּלֵב הַיֶּלֶד וַיְמִיתֵהוּ, וְרַק פִּצְעוֹ לּא הָיָה אָנוּשׁ כְּפִצְעֵי־אֶחָיו.

וַתַּעֲבֹר הַשְּׁמוּעָה כְּחֵץ בְּכָל־הָעִיר, וַיִּשְׁמַע אַמְפּיּוֹן, כִּי מֵתוּ בָנָיו, וַיִּקַּח חֶרֶב חַדָּה וַיִּפֹּל עָלֶיהָ וַיָּמֹת. וַיֵּבְךְּ כָּל־הָעָם בְּכִי גָדוֹל וַיִּשָּׁמַע הַקּוֹל גַּם בְּחַדְרֵי נְיוֹבָה. וַתִּשְׁלַח הַמַּלְכָּה נַעֲרָה אַחַת מִנַּעֲרוֹתֶיהָ לָדַעַת, מַה־קּוֹל־הַבְּכִי הַזֶּה. וַתָּשָׁב הַנַּעֲרָה וַתַּגֶד־לָהּ אֶת־אֲשֶׁר קָרָה אֶת־בָּנֶיהָ. וַתִּתְפָּעֶם הַמַּלְכָּה מְאֹד וַתִּבֹּק¹⁶⁸) רוּחָה בְּקִרְבָּהּ. וְלֹא הֶאֱמִינָה נְיוֹבָה לְדִבְרֵי־הַנַּעֲרָה, כִּי אָמָרָה: הלֹא קָצְרָה יַד־הָאֵלִים מֵהֲרֹג אֶת־שִׁבְעַת עוֹלְלֵי- טִיפּוּחַי¹⁶⁹) פַּעַם אַחַת. וְאוּלָם מַהֵר נוֹכְחָה לָדַעַת, כִּי אֱמֶת נָכוֹן הַדָּבָר. וַתִּתְיָאֵשׁ נִיוֹבָה מִן הַפֻּרְעָנוּת¹⁷⁰) וַתִּשְׁפַּל קוֹמָתָהּ וַתָּרָץ אֶל־הַכִּכָּר לִרְאוֹת אֶת־גּוּפוֹת בָּנֶיהָ הַמֵּתִים. וַיְהִי בְּרוּצָהּ וַיִּסְפְּקוּ כָל־עוֹבְרֵי־דֶרֶךְ כַּפֵּיהֶם וַיִּשְׁרְקוּ וַיָּנִיעוּ רֹאשָׁם עָלֶיהָ וַיֹּאמְרוּ: הַזֹאת נְיוֹבָה, כְּלִילַת־הַיֹּפִי, תִפְאֶרֶת־בְּנוֹת־תֵּבָה?

וַתָּבֹא נְיוֹבָה אֶל־כִּכַּר הַמִּשְׂחָק וַתִּתְנַפֵּל עַל־גְוִיּוֹת בָּנֶיהָ הַמֵּתִים וַתְּחַבְּקֵם וַתְּנַשְּׁקֵם.

אַחַר פֵּרְשָׂה כַּפֶּיהָ הַשָּׁמַיְמָה וַתֹּאמַר: שִׂישִׂי וּשִׂמְחִי אוֹיִבְתִּי! כִּי שָׂבַעְתְּ מִבְּשָׂרִי, אֵלָה אַכְזָרִיָּה, וְהִשְׁתַּכַּרְתְּ מִדָּמִי. הָהּ, מִי יִתֵּן וּמַתִּי גַם אָנִי, כִּי טוֹב לִי הַמָּוֶת מֵחַיֵּי־שְׁכֹל¹⁷¹).

בֵּינוֹתַיְם בָּאוּ גַם שֶׁבַע בְּנוֹת־נְיוֹבָה אֶל־כִּכַּר הַמָּוֶת לִסְפֹּד לַאֲחֵיהֶן וְלִבְכּוֹתָם. וְהַיְלָדוֹת לְבוּשׁוֹת בִגְדֵי־אֵבֶל שְׁחוֹרִים וּשְׂעַר־רֹאשָׁן פָּרוּעַ וְהֵן נֶחְמָדוֹת וּמַרְהִיבוֹת¹⁷²) לֵב בִּיגוֹן יָפְיָן. ויְהִי בִרְאוֹת נְיוֹבָה אֶת־בְּנוֹתֶיהָ וַיִּמָּלֵא לִבָּהּ שׁוּב¹⁷³) גֵּאֶה וְגָאוֹן וַתִּשְׁכַּח אֵת־אֲסוֹנָה וַתָּרֶם אֶת־עֵינֶיהָ מָרוֹם וַתַּגְדֵּל¹⁷⁴) עַל־לֵטָה לֵאמֹר:

הַבּוּז לָךְ, לֵטָה הַמְּנַצַּחַת! הַבִּיטִי־נָא וּרְאִי, הֲלֹא גַם בַּאֲסוֹנִי עָלִיתִי עָלָיִךְ, כִּי רַב מִסְפַּר־בְּנוֹתַי מִמִּסְפַּר בָּנָיִךְ.

וַיְהִי אַךְ דִּבְּרָה אֶת־הַדְּבָרִים הָאֵלֶה וַיֵּהוֹם שֵׁנִית יֶתֶר הַקֶּשֶׁת הַדְּרוּכָה. וַיִּירְאוּ כָל־הָעוֹמְדִים מִסָּבִיב יִרְאָה גְדוֹלָה וְלֹא קָמָה רוּחַ בָּאִישׁ. אַךְ נְיוֹבָה לֹא נָעָה וְלֹא זָעָה, כִּי אֲסוֹנָהּ הִדְהִימָהּ. וַתִּשְׁלַח הַיַּלְדָה הָאַחַת אֶת־יָדָהּ לְהוֹצִיא אֶת־הַחֵץ, אֲשֶׁר פִּלַח אֶת־חָזָהּ. וַתִּפֹּל בְּלִי אוֹנִים אַרְצָה וַתִּכְבֶּינָה עֵינֶיהָ וְרֹאשָׁהּ צָנַח עַל־גֵּו אָחִיהָ הַמֵּת. וְהַשְּׁנִיָּה מִהֲרָה אֶל־אִמָּהּ הָאֻמְלָלָה. וַיִּפְגַּע בָּהּ חֵץ, אֲשֶׁר יָרְתָה יָד נַעֲלָמָה, וַתִּפֹּל וַתּוֹצֵא נַפְשָׁהּ וַתָּמֹת.

וַתֹּאמֶר הַשְּׁלִישִׁית לָנוּס עַל־נַפְשָׁהּ וּלְהִמָּלֵט. וַיַּדְבִּיקֶנָּה חֵץ לֹא יֵדַע רַחֵם וַיְמִיתֶנָּה. כָּכָה נָפְלוּ בְנוֹת נְיוֹבָה אִשָּׁה אַחֲרֵי אֲחוֹתָהּ, כֶּעָמִיר אַחֲרֵי הַקּוֹצֵר.

וַתִּשָׁאֶר רַק הָאַחַת וַתָּשֶׂם אֶת־רֹאשָׁהּ בְּחֵיק אִמָּהּ וַתְּבַקֶּשׁ לָהּ מִפְלָט בְּכִפְלֵי¹⁷⁵) שִׂמְלָתָהּ.

וְתִתְחַנֵּן נְיוֹבָה אֶל־לֵטָה וַתֹּאמַר: חוּסִי־נָא עָלַי וְאַל־תָּמִיתִי אֶת־בִּתִּי הָאַחֲרוֹנָה.

עוֹד מִלָּתָהּ עַל־לְשׁוֹנָהּ וְהִנֵּה הַיַּלְדָה מֵתָה וַתִּפֹּל מֵחֵיקָהּ וַתִּצְנַח לָאָרֶץ.

וְלֹא נִשְׁאַר בַּחַיִּים מִכָּל־בֵּית־אַמְפְּיּוֹן, כִּי אִם נְיוֹבָה. וַתַּעֲמֹד בְּתוֹךְ־הֲמוֹן־מֵתֶיהָ בְּלִּי נוֹעַ וּמִצַּעַר הָלְכָה הָלֹךְ וְהֵהָפֵךְ לְאָבֶן.

וְלֹא זָעָה אַף שַׂעֲרָה אַחַת מִמִּקְלְעוֹת שְׂעָרָה הָאָרֹךְ וַיַּחֲוִירוּ פָּנֶיהָ הַגֹּוְעִים וְהוֹלְכִים, עֵינֶיהָ קָמוּ וְכָל אוֹתוֹת חַיִּים לֹא נִרְאוּ בְגוּפָהּ. וַיַּעֲמֹד הַדָּם מִלֶּכֶת בְּעוֹרְקֶיהָ וַיֻּקְשֶׁה עָרְפָהּ וְרַגְלֶיהָ חָדְלוּ מֵהִתְנוֹעֵעַ. ותְּהִי מַלְכַת־תֵּבָה הָאֻמְלָלָה לִנְצִיב אָבֶן. וְאַךְ מְקוֹר־דִּמְעוֹתֶיהָ לֹא יָבֵשׁ וַתַּרַדְנָה בְּלִי חָשָׂךְ מֵעֵינֶיהָ, עֵינֵי הָאָבֶן.

וַתָּבֹא פִּתְאֹם רוּחַ גְּדוֹלָה וַתִּשָּׂא אֶת־הָאֶבֶן הַמְּפֻלֶּמֶת¹⁷⁶) וַתַּעֲבִירֶנָּה עַל־פְּנֵי־יַמִּים וַאֲרָצוֹת וַתְּבִיאֶנָּה אֶל־לִידִיָּה, אֶרֶץ מוֹלֶדֶת נְיוֹבָה. וַיַּעֲמֹד שָׁם עַמּוּד הָאֶבֶן בֵּין הָרֵי שְׁמָמָה וּפְסָגוֹת חַדּוֹת עַד־הַיּוֹם הַזֶּה וּפַלְגֵי־מַיִם יוֹרְדִים מֵחוֹרֵי עֵינָיו הַמְּאֻבָּנוֹת.