לנכדתי ליאורה

א. דְּרוֹר לָעֲבָדִים    🔗

וַיְהִי בְּעֵת פְּרוֹץ מִלְחֶמֶת־קְרָבוֹת בֵּין צִבְאוֹת כְּנַעַן וּבֵין בְּנֵי אֶפְרַיִם וַיִּשְׁבּוּ כְּנַעֲנִים שְׁבִי רַב מִבְּנֵי יִשְׂרָאֵל אֲשֶׁר בְּהַר אֶפְרַיִם. וּבֵין הַשְּׁבוּיִים אִישׁ זָקֵן וּבַעַל בְּעַמָּיו, הֲלֹא הוּא עֲצַמְאֵל הַנַּהֲלָלִי, הוּא וְכָל בֵּיתוֹ, בָּנָיו וּבְנֵי בָּנָיו, וַיִּמְכְּרוּם לַעֲבָדִים וְלִשְׁפָחוֹת לַאֲרַמִּים אֲשֶׁר בַּאֲרַם דַּמֶּשֶׂק וּבַאֲרַם צוֹבָא.

וַיִּפֹּל יְרוּמְאֵל הַנַּהֲלָלִי, הוּא הַבֵּן הַצָּעִיר לֲעֲצַמְאֵל הַזָּקֵן, עִם אִשְׁתּוֹ צָלֵחָה, בִּידֵי אִישׁ־רִמּוֹן אֲשֶׁר בַּאֲרַם צוֹבָא וְהוּא אִישׁ עָשִׁיר בְּזָהָב וּבְכֶסֶף וְלוֹ מִקְנֶה רַב, צֹאן וּבָקָר וּגְמַלִּים – וַיִּהְיוּ לוֹ הַנַּהֲלָלִי וְאִשְׁתּוֹ לַעֲבָדִים.

יָמִים רַבִּים עָבְדוּ אֶת אֲדוֹנֵיהֶם בֶּאֱמוּנָה וּבְלֵב תָּמִים בְּכָל עבוֹדָה בַּבַּיִת וּבַשָּׂדֶה וַיֵּדְעוּ כָּל רוֹאֵיהֶם וּמַכִּירֵיהֶם כִּי טוֹבִים הָעִבְרִים הָאֵלֶּה לֵאלֹהִים וְלָאֲנָשִׁים וְדָבָר אֵין לָהֶם עִם אָדָם. בְּמוֹשַׁב רֵעִים לֹא יֵשְׁבוּ וְעִם חֶבֶר עַלִּיזִים לֹא יַעַלְזוּ, לְשׁוֹנָם לֹא תַּרְבֶּה דְבָרִים, וַאֲשֶׁר יָשִׂיחוּ – בִּתְבוּנָה וּבְיֹשֶׁר לֵב יָשִׂיחוּ וְרַק מְלֶאכֶת אֲדוֹנֵיהֶם בִּידֵיהֶם מִן בֹּקֶר עַד עֶרֶב. גַּם אֶת דַּרְכֵיהֶם, דַּרְכֵי הָעִבְרִים, יִשְׁמְרוּ בַּנֵּכָר וְאֶת שֵׁם אֱלֹהֵיהֶם יִשְּׂאוּ בְּאַהֲבָה בְּכָל אֲשֶׁר עִמָּם.

כֵּן אָרְכוּ יְמֵי שִׁבְתָּם בְּנַחֲלַת אֲדוֹנֵיהֶם אִישׁ־רִמּוֹן וַיֶּאֱהָבֵם אֲדוֹנֵיהֶם וַיֵּט לָהֶם חֶסֶד וְשָׁלוֹם. וַיִּהְיוּ שְׁנֵיהֶם בְּעֵינָיו אֲנָשִׁים לְמוֹפֵת בְּנִקְיוֹן־כַּפָּם וּבְטֹהַר לִבָּם וַיּוֹסֶף אֲהֵבָם כָּל הַיָּמִים. וַיִּוָּלְדוּ לָהֶם בְּבֵית אֲדוֹנֵיהֶם בָּנִים וּבָנוֹת וַיִקְרְאוּ לָהֶם שֵׁמוֹת כַּמַּשָּׂאוֹת אֲשֶׁר נָשְׂאוּ אֲלֵיהֶם נַפְשָׁם בַּנֵּכָר. וַיִּקְרְאוּ לַבֵּן הַבְּכוֹר עֲנָאֵל, לֵאמֹר עֲנֵנוּ ה' כִּי קָרָאנוּ לְךָ. וְלַבֵּן הַשֵּׁנִי חוּשָׁיָה – הָחֵש נָא אֶת פְּדוּתֵנוּ. וְלַשְּׁלִישִׁית תִּרְצָה – רְצֵה ה' בָּנוּ. וְלָרְבִיעִית רֻחָמָה – יֵעוֹרוּ רַחֲמֶיךָ עָלֵינוּ.

וֲיְהִי כְּתֹם שֶׁבַע שָׁנִים לְעָבְדָם אֶת אִיש־רִמּוֹן וַיְהִי בְּיוֹם חַג וְשִׂמְחָה לַאֲדוֹנֵיהֶם וַיַּעַשׂ מִשְׁתֶּה גָדוֹל לְכָל רֵעָיו וִידִידָיו, וּכְטוֹב לֵב אִיש־רִמּוֹן בַּיַּיִן וַיַּרְא אֶת יְרוּמְאֵל וְאֶת אִשְׁתּוֹ רָצִים רָצֹה וָשׁוֹב וְזֵעָה רַבָּה תְכַסֶּה אֶת פְּנֵיהֶם וְאֶת גּוּפָם בְּשָׁרְתָם אֶת הַקְּרוּאִים מִלֵּב שָׁלֵם וּמֵחֵפֶץ טוֹב – אֲשֶׁר לֹא כָּעֲבָדִים הָאֲחֵרִים – וַיִּכָּמְרוּ רַחֲמֵי אִיש־רִמּוֹן עֲלֵיהֶם וַיִּקְרָא בְּאָזְנֵי בְּנֵי עַמּוֹ לֵאמֹר:

– הַרְאִיתֶם אֶת עֲבָדַי הָעִבְרִים, אֶת יְרוּמְאֵל וְאֶת צָלֵחָה אֲשֶׁר אֵין כְּמוֹהֶם בָּעֲבָדִים לֶאֱמוּנָה וְלַעֲבוֹדָה וּלְצִדְקַת לֵבָב? וְעַתָּה נִשְׁבַּעְתִּי בֵּאלֹהֵי רִמּוֹן – לֹא לָאֲנָשִׁים הָאֵלֶּה לִהְיוֹת עֲבָדִים.

וַיִקְרְאוּ לִשְׁנֵיהֶם וַיָּשֶׂם יָדוֹ עַל שִׁכְמָם וַיִּקְרָא לָהֶם וְלִבְנֵיהֶם דְּרוֹר לְעוֹלָם. וַיְצַוֶּה לַסּוֹפֵר אֲשֶׁר עַל הַבַּיִת וַיִּכְתֹּב לָהֶם סֵפֶר הַדְּרוֹר וַיִּתֵּן לָהֶם.

וַיִּקְרְאוּ כָּל הַנֶּאֱסָפִים קוֹל גָּדוֹל: דְּרוֹר וְשָׁלוֹם לָכֶם!

וַיּוֹדוּ הָאִישׁ וְהָאִשָּׁה לַנֶּאֱסָפִים וְעֵינֵיהֶם מַזִּילוֹת דִּמְעוֹת גִּיל לָרֹב.

וְאוּלָם חֹק לָאֲרַמִּים מֵאֵת מַלְכָּם כִּי אֵין לַעֲבָדִים אֲשֶׁר יֵצְאוּ לַחָפְשִׁי לָצֵאת אֶת אֶרֶץ אֲרָם כִּי אִם בִּדְבַר הַמֶּלֶךְ. רַק בְּאֶרֶץ אֲרָם יֵשְׁבוּ בַּאֲשֶׁר יַחְפֹּצוּ וּלְאֶרֶץ אַחֶרֶת לֹא יֵצֵאוּ. וַיֹּאמְרוּ יְרוּמְאֵל וְאִשְׁתּוֹ: נוֹדֶה לָאֵל עַל חַסְדּוֹ הַגָּדוֹל עִמָּנוּ וּנְצַפֶּה לַחֲסָדָיו לְיוֹם מָחָר כִּי רַבּוּ חֲסָדָיו.

ב. בֵּין רִישׁ וָעֹשֶׁר    🔗

וַיַּעֲנֵק לָהֶם אֲדוֹנֵיהֶם מִן הַטּוֹב אֲשֶׁר עִמּוֹ וַיִּפָּרְדוּ מֵעִמּוֹ בְּשָׁלוֹם וַיָקוּמוּ וַיִּסְעוּ הָלוֹךְ וְנָסוֹעַ הַנֶּגְבָּה וַיָּבוֹאוּ דַמַּשְׂקָה וַיֵשְׁבוּ שָׁם.

אָז יֵצֵא יְרוּמְאֵל לַעֲמַל יוֹמוֹ וַיְהִי חוֹטֵב עֵצִים וְשׁוֹאֵב מַיִם, כִּי חָסוֹן הָאִישׁ וְיָדָיו רָב לוֹ וַיַּעֲלֶה מַשָּׂאוֹ לַבָּתִּים הַגְּבוֹהִים אֲשֶׁר לָרוֹזְנִים וְלַנִּכְבָּדִים בַּקִּרְיָה וַיָּבֵא בְּזֵעַת אַפָּיו טֶרֶף מְעַט לְאִשְׁתּוֹ וְלִילָדָיו. וַתִּגְדַּל אַהֲבַת אִשְׁתּוֹ אֵלָיו מְאֹד כִּי נָשָׂא לְבַדּוֹ עַל שִׁכְמוֹ כָּל עֲבוֹדָה וַיֹּאמֶר לָהּ: הֵן אִשָּׁה לְגֶבֶר חָפְשִׁי אַתְּ וּגְבִירָה לְבֵיתֵךְ אַתְּ.

וְגַם שְׁכֵנָיו וְיוֹדְעָיו אָמְרוּ לוֹ שָׁלוֹם וַיְבַקְּשׁוּ לוֹ טוֹבָה וּבְרָכָה כִּי טוֹב הָאִישׁ בְּעֵינֵיהֶם וְאָרְחוֹ אֹרַח מֵישָׁרִים.

וּמִשְׁכַּן הַמִּשְׁפָּחָה בֵּית־עֵץ נָמוֹךְ וְדַל בָּרְחוֹב הַגָּדוֹל אֲשֶׁר בְּלֵב הָעִיר. וּמִמּוּל מִשְׁכַּן חוֹטֵב הָעֵצִים – מֵעֵבֶר הַשֵּׁנִי לָרְחוֹב – גַּן הָדוּר וּרְחַב־יָדַיִם וּבַיִת רָם וְנָאֶה יִתְנוֹסֵס בּוֹ לְתִפְאָרָה. שָׁם יָגוּר אַרְגוֹל הָאֲרַמִּי הֶעָשִׁיר, הַכָּבֵד בְּמִקְנֶה וּבְכֶסֶף וּבְזָהָב. וְלוֹ בָּנִים וּבָנוֹת וַעֲבָדִים וּשְׁפָחוֹת וּמֶרְכָּבוֹת וְכִרְכָּרוֹת.

וַיְהִי הַגָּן הַיָּפֶה עִם הַהֵיכָל הַצַּח מוּל הַבַּיִת הַדַּל וְהָאָפֵל כַּמַּרְאֶה אֲשֶׁר לַצָּב לְיַד הַפִּיל אוֹ כְּמַרְאֵה הַשִׂיחַ הַנָּמוּךְ מוּל הָאֶרֶז הָאַדִּיר.

וְיַלְדֵי הַמִּשְׁפָּחָה הָעֲנִיָּה מִדֵּי יִרְאוּ אֶת בְּנֵי הַשְּׁכֵנִים הָעֲשִׁירִים עֵת יֵצְאוּ וְיָבוֹאוּ עַל מֶרְכַּבְתָּם הַהֲדוּרָה וְהַמְצוּחְצָחָה, אוֹ כִּי יֵצְאוּ מִפַּעַם לְפַעַם יַלְדֵי הָעֲשִׁירִים רוֹכְבִים עַל סוּסִים צְעִירִים עֲדוּיֵי רִתְמָה נוֹצְצָה וַעֲטוּיֵי סֶרֶג פַּסִּים וּדְהָרוֹת דְּהָרוֹת אַבִּירוֹת לַסּוּסִים, עֵת רוֹכְבֵיהֶם יָרִיעוּ בִּצְחוֹק־צָהֱלָה וְגִיל־מְשׁוּבָה – וְעָמְדוּ הַיְלָדִים הָעֲנִיִּים לְיַד בֵּיתָם וְהִשְׁקִיפוּ עַל הָעֲשִׁירִים, פִּיהֶם פָּעוּר וְעֵינֵיהֶם גְּדוֹלוֹת, וְנַפְשָׁם יוֹצֵאת לְמַרְאֵה עֵינֵיהֶם.

וְאוּלָם בִּימֵי מְגוּרֵיהֶם הָרַבִּים בַּבַּיִת הַקָּטָן לֹא קָרְבוּ יַלְדֵי הָעֲשִׁירִים הָאֲרַמִּים אֶל יַלְדֵי הַשְּׁכֵנִים הָעִבְרִים וְלֹא דִבְּרוּ עִמָּם מִכֹּל וָכֹל. מֵרוּם לִבָּם וְצָהֳלַת רוּחָם לֹא נָפַל מַבָּטָם אֶל שׁוֹכְנֵי הַמָּעוֹן הַדַּל וְאָמְנָם לֹא רָאוּם וְלֹא הִכִּירוּם. וְאִם יֵשׁ וְנִצְבוּ יַלְדֵי הָעִבְרִים לְיַד גֶּדֶר הַגָּן אֲשֶׁר לַשָּׁכֵן וְהִבִּיטוּ כֹּה וָכֹה אָז יַעַבְרוּ יַלְדֵי הָרוֹזְנִים מֵהֶם וָהָלְאָה כְּמוֹ לֹא יוּכְלוּ שְׁאֵת קִרְבָתָם. וְיֵשׁ וּבָאוּ הָעֲבָדִים הָעוֹמְדִים בַּשַּׁעַר וְהִרְחִיקוּ אֶת הַיְלָדִים הָעֲנִיִּים וְשִׁלְּחוּם הָלְאָה מִזֶּה.

וְאַךְ פַּעַם אַחַת עִם רֶדֶת הַיּוֹם עָמְדָה הַיַּלְדָּה הַקְּטַנָּה רֻחָמָה – וְהִיא אָז בַּת תֵּשַׁע שָׁנִים – לְיַד מַעֲקֵה הַגָּן הַגָּדוֹל וְהִבִּיטָה אֶל חֲמוּדוֹת הַפְּרָחִים הַגְּדוֹלִים וְאֶל הַתַּפּוּחִים וְהָאַגָּסִים הַתְּלוּיִים בָּעֵצִים וְהִשְׁקִיפָה אֶל הַצְּבָאִים אֲשֶׁר דָּלְגוּ בִּשְׁבִילֵי הַגָּן וְאֶל הַטַּוָּסִים וְהַדּוּכִיפוֹת הַמְהַלְּכִים בַּלָּאט כֹּה וָכֹה. וַיְהִי כִּי רָחַק כָּל אִישׁ מִן הַגָּן וַיִּקְרַב יֶלֶד בֶּן עֶשֶׂר וְהוּא שְׁחַרְחַר וְזַךְ עֵינַיִם וְשַׂעֲרוֹתָיו לוֹ תַּלְתַּלִּים וַיַּגִּיעַ עַד מָקוֹם בּוֹ עָמְדָה הַיַּלְדָּה – וַיַגֶּד לָהּ שָׁלוֹם וַתַּעַן לוֹ שָׁלוֹם.

וַיַּעַמְדוּ שְׁנֵיהֶם זֶה בִּפְנִים הַגָּדֵר וְזוֹ מִחוּצָה לָהּ וַיַּבִּיטוּ אִישׁ בִּפְנֵי רֵעֵהוּ וַיַּחֲרִישׁוּ. וְאַחַר אָמַר הַיֶּלֶד:

– הַאַתְּ בַּת הָעֶבֶד הָעִבְרִי?

– לֹא עֶבֶד אָבִי כַּיּוֹם. חָפְשִׁים אֲנַחְנוּ.

– הֲנָכוֹן אֲשֶׁר יִשְׂרְאֵלִים אַתֶּם וְאֶבְיוֹנִים אֵין כֹּל?

– נָכוֹן.

– וְהָאֱמֶת כִּי בָּזִים אַתֶּם לֵאלֹהֵי אֲרָם?

– לֹא אֱמֶת. כִּי אִישׁ לֵאלֹהָיו יַעֲבֹד.

– וְהַאֵין הָעִבְרִים שׂוֹנְאִים לָאֲרַמִּים?

– לֹא אֵדַע. אֲבָל אֲנִי וְאָבִי וְאִמִּי וְאַחַי לֹא נִשְׂנָא אִישׁ.

– וַאֲנִי גַם אֲנִי לֹא אֶשְׂנָא אִישׁ. וְגַם אוֹתָךְ אָהַבְתִּי. כָּל הַיָּמִים אֶרְאֵךְ וְאֹהֲבֵךְ. וְאַתְּ הֲתֶאֱהָבִינִי גַם אַתְּ?

– כִּי תֹאמַר אֲהַבְתַּנִי אֹהֲבְךָ גַּם אָנִי.

– וּמַה שְּׁמֵךְ כִּי אֵדַע?

וַיְהִי טֶרֶם יִשְׁמַע מַעֲנֶה מִפִּיהָ וַיִּשְׁמַע קוֹל אֲנָשִׁים קְרֵבִים מִפְּנִים הַגָּן וַיִּתְחַמֵּק הַיֶּלֶד וַיָּנָס וְגַם הַיַּלְדָּה שָׁבָה לְבֵיתָהּ.

וּמֵאָז שָׁמְרוּ אֱמוּנִים אִישׁ לְרֵעֵהוּ בַּסֵּתֶר. וַיְהִי כִּי קָרָה אֲשֶׁר נִפְגְּשׁוּ מַבָּטֵיהֶם מֵרָחוֹק וְלֹא נִרְאָה אִישׁ בְּכֹה אוֹ בְּכֹה – וַיָּרִימוּ יַד אִישׁ לְרֵעֵהוּ לֵאמֹר שָׁלוֹם – וְלֹא יָסְפוּ.

וּבְּבֵית יְרוּמְאֵל שָׁכְנוּ כָּל הַיָּמִים שָׁלוֹם וְשַׁלְוָה. וְאִם כִּי לֹא הִשִּׂיגָה יָדוֹ לְהָבִיא לִילָדָיו כִּי אִם לֶחֶם צַר וּנְזִיד מָה וְגַם בִּגְדָּם קַל וְדַל הָיָה – לֹא יָדְעוּ הַיְלָדִים עֶצֶב וְרָעָה. כִּי אֶת אֲשֶׁר חָסְרוּ הַיְלָדִים מִן הָרְוָחָה וְהַמַּעֲדַנִּים מָלֵא לִבָּם מֵאַהֲבַת הוֹרֵיהֶם וּמִתּוֹרַת פִּיהֶם. כִּי הָיָה יְרוּמְאֵל מֵיטִיב לְסַפֵּר דְּבָרִים בְּאָזְנֵי הַיְלָדִים אֲשֶׁר נַעֲמוּ לָהֶם מִכָּל חֶמְדָּה וְשִׂמְחוּ אֶת נַפְשָׁם מִכָּל שַׁעֲשׁוּעַ. וְרַבּוֹת רַבּוֹת יָשְׁבוּ הָאֵם וְהַיְלָדִים וְהִקְשִׁיבוּ רַב קֶשֶׁב לַאֲשֶׁר סִפֵּר אֲבִיהֶם מִפָּעֳלֵי אֵל אֲשֶר פָּעַל לְעֵינֵי עַמּוֹ עֵת הוֹצִיאָם מִמִּצְרַיִם וְעַל הַנִּפְלָאוֹת וְהָאוֹתוֹת הַגְּדוֹלִים אֲשֶׁר הֶרְאָם בִּידֵי מֹשֶׁה אִישׁ הָאֱלֹהִים. וְיוֹתֵר מִכָּל אָהֲבוּ הַיְלָדִים לִשְׁמֹוֹעַ אֶת אֲשֶׁר סִפֵּר יְרוּמְאֵל מֵאֲשֶׁר שָׁמְעוּ אָזְנָיו, בְּעוֹדוֹ נַעַר קָטָן. מִפִּי אֲבִי־אֲבִי אָבִיו, הוּא אֱלִישָמָע בֶּן עַמִּיהוּד נָשִׂיא לִבְנֵי אֶפְרַיִם, אֲשֶׁר נִלְחַם יָד לְיָד עִם יְהוֹשֻׁעַ בִּן נוּן בַּמִּלְחָמוֹת הַגְּדוֹלוֹת לְמִן הָעֵת אֲשֶׁר עָבְרוּ אֶת הַיַּרְדֵּן בַּיַּבָּשָׁה וְעַד אֲשֶׁר חִלֵּק יְהוֹשֻׁעַ אֶת אֶרֶץ כְּנַעַן לְשִׁבְטֵי יִשְׂרָאֵל. יָמִים עַל יָמִים הִשְׁמִיעַ יְרוּמְאֵל לְאָזְנֵי הַיְלָדִים דָּבָר מִן הַקּוֹרוֹת וְהַנִּפְלָאוֹת הַגְּדוֹלִים אֲשֶׁר קָרוּ לַאֲבוֹתָיו בַּיָּמִים הָהֵם.

וּכְכָל אֲשֶׁר שָׁמְעוּ הַיְלָדִים אֶת דִּבְרֵי אֲבִיהֶם שָׁאֲלוּ וַיָּשׁוּבוּ וַיִּשְׁאֲלוּ: וְלָמָּה הִרְחִיקָנוּ ה' מֵאַרְצֵנוּ וֲיִּתְּנֵנוּ דַלִּים וְגֵרִים בְּאֶרֶץ נָכְרִיָּה?

וַיַּעַן לָהֶם אֲבִיהֶם בָּאֵר וְאָמוֹר: כִּי דַרְכֵי אֵל רָחֲקוּ מִדַּרְכֵי אָדָם וְאֵין אִתָּנוּ יוֹדֵעַ רָזֵי עֶלְיוֹן. הֵן כִּגְבוֹהַּ הַשָּׁמַיִם מֵעַל הָאָרֶץ כֵּן גָּבְהוּ מַחְשְׁבוֹת אֵל מִמַּחְשְׁבוֹת אָדָם. וְאוּלָם כִּי יַהֲלֹךְ אָדָם בֶּאֱמֶת וּבִצְדָקָה בָּאָרֶץ – לֹא יִירָא רָע. יַד אֱלוֹהַּ תּוֹשִׁיעֵהוּ. וְגַם כִּי יִתְמַהְמַהּ יוֹם הַיְשׁוּעָה לֹא יָסוּר לֵב אִישׁ יִשְׂראֵל מֵאַחֲרֵי אֱלֹהָיו בּוֹרֵא שָׁמַיִם וָאָרֶץ הָעוֹשֶׂה הַכֹּל וְיוֹדֵעַ הַכֹּל.

וַיָּתֵם דְּבָרוֹ בְּכָל עֵת לֵאמֹר: וְגַם אָנוּ לֹא נֶחְדַּל מִקַּוּוֹת כִּי גַם אוֹתָנוּ יַרְאֶה נִפְלְאוֹתָיו לַהֲשִׁיבֵנוּ אֶל נַחֲלַת אֲבוֹתֵינוּ. וְאַךְ תָּבוֹא הַשָּׁעָה הַמְקֻוָּה וְיֻתַּן לָנוּ לָצֵאת אֶת הָאָרֶץ הַזֹּאת אָז נוֹדֶה לָאֵל בִּזְבָחִים וּבְתוֹדָה בְּמִשְׁכַּן ה' אֲשֶׁר בְּשִילֹה.

וּמֵאַרְבַּעַת הַיְלָדִים הַטּוֹבִים וְהַחֲמוּדִים גַּם יַחַד הָיְתָה הַצְּעִירָה – רֻחָמָה – הַיָּפָה וְהַנְּבוֹנָה בֵּין הָאַחִים. וְהִיא אֲשֶׁר הִרְבְּתָה שָׁאוֹל וּדְרוֹשׁ אֶת פִּי אָבִיהָ עַל דַּרְכֵי אֵל וּפָעֳלָיו וְעַל אֱלֹהֵי אֲרָם וְעַל הָעֲשִׁירִים הָרוֹזְנִים אֲשֶׁר בַּקִּרְיָה וְעַל הָאֶבְיוֹנִים וְהָעֲנִיִּים וַתְּבַקֵּשׁ לָדַעַת וּלְהָבִין דָּבָר דָּבָר לַאֲשׁוּרוֹ.

וַתְּהִי הַיַּלְדָה הַקְּטַנָּה שַׁעֲשׁוּעַ וְתִפְאָרָה לְהוֹרֶיהָ, כִּי כָּל אִישׁ אֲשֶׁר שָׂם עֵינוֹ בַּיַּלְדָּה אָמַר שֶׁבַח וּפְאֵר לְיוֹצְרָהּ. וְאָבִיהָ וְאִמָּהּ הוֹדוּ לָאֵל בְּכָל עֵת מְצוֹא כִּי חָנַן אוֹתָם אֱלֹהִים יַלְדָּה יַעֲלַת חֵן וַחֲמוּדַת מַרְאֶה כָּמוֹהָ. וְיוֹתֵר עָצְמָה אַהֲבָתָם אֵלֶיהָ מֵהַכִּירָם אֶת טוּב טַעְמָהּ וּבִינַת לִבָּהּ. וְגַם נִפְלְאוּ בְּעֵינֵי הַהוֹרִים נֹעַם הֲלִיכוֹתֶיהָ עִם אֲחֵיהָ אֲשֶׁר לֹא פָּגְעָה בִּדְבַר שְׂפָתַיִם בָּהֶם וְהֵם שָׁמְרוּ לָהּ אַהֲבָה וֶאֱמוּנִים כָּל הַיָּמִים.

וְרַבּוֹת הָיָה דְבַר הָאִישׁ לְאִשְׁתּוֹ לֵאמֹר: אֵין זֹאת כִּי עֵין אֱלֹהִים טוֹבָה עָלֵינוּ אֲשֶׁר הוֹאִיל לְחָנֵּנוּ יְצוּר חֲמוּדוֹת אֲשֶׁר כָּמוֹהָ לִהְיוֹת לָנוּ לְחֶדְוָה וְלִמְשִׁיבַת נֶפֶשׁ בִּימֵי עָנְיֵנוּ בַּנֵּכָר.

ג. אָסוֹן וָשֶׁבֶר    🔗

וְאוּלָם מִי יֵדַע חֵפֶץ אֵל וְרָזֵי עֶלְיוֹן מִי יָבִין? כִּי הִנֵּה עֵת נָשְׂאוּ עֵינֵיהֶם לֵאלֹהֵי מָרוֹם וְהֶאֱמִינוּ בְּכּל לִבָּם בְּצִדְקַת פָּעֳלֵי אֵל וְצִפּוּ לַחֲסָדָיו – כְּמוֹ סָרָה עֵין אֱלֹהִים מֵעַל הַמִּשְׁפָּחָה הַשּׁוֹכֶנֶת בַּנֵּכָר וְרָעָה אַחַר רָעָה נִחֲתָה עַל הַבַּיִת הַזֶּה לְהַרְבּוֹת יָגוֹן וּלְהַדְאִיב לֵבָב.

וְזֶה דְבַר הַקּוֹרוֹת אוֹתָם:

עֵת הִגִּיעוּ יְמֵי הַחֹרֶף – כָבְדָה יָד הָעֹנִי בַּבַּיִת מְאֹד. יָמִים עַל יָמִים הִמְטִירוּ הַשָּׁמַיִם גֶּשֶׁם חָזָק לָרֹב וּבָרָד נִתַּךְ אַרְצָה. וּמִהְיוֹת בֵּית מִשְׁכַּן הַמִּשְׁפָּחָה פָּרוּץ לִסְדָקִים בַּקִּירוֹת וּבַתִּקְרָה וַיִּדְלוֹף כָּל הַיּוֹם דֶלֶף רַב בָּזֶה וּבָזֶה וַיְהִי שִׁבְתָּם בַּבַּיִת לִדְאָבָה וּלְמַעֲצֵבָה.

וְנוֹסָף עַל אֵלֶּה קָצְרָה יַד הָאָב לְהַשִׂיג דְּבַר מִחְיָה לְבֵיתוֹ כִּי רַבּוּ יְמֵי הַסַּגְרִיר וְאֵין לָבוֹא לַיַּעַר לַחֲטֹב עֵץ וְאֵין דּוֹרֵשׁ עֲבוֹדָה וְאֵין מְבַקֵּשׁ שְׂכִיר־יוֹם.

וַיְהִי כִּי עָבַר יוֹם אַחַר יוֹם – שֶׁלֹשֶׁת יָּמִים – וְאֶל פִּי הַיְּלָדִים לֹא הִגִּיעוּ כִּי אִם מְעַט פֵּרוּרֵי לֶחֶם נִקּוּדִים וְיִּקָּרַע לֵב הָאָב לִגְזָרִים כִּי לֹא יָכוֹל הָיָה עוֹד רְאוֹת אֶת פְּנֵי הַיְלָדִים וְנָשׂוֹא לֹא נָשָׂא אֶת מַבָּטֵי עֵינֵיהֶם הַכָּלוֹת מֵרָעָב.

וַיְהִי בַּיּוֹם הָרְבִיעִי לְעֵת הַשַּׁחַר וַיֵצֵא הָאִישׁ חֶרֶשׁ מִבֵּיתוֹ לְבַקֵּשׁ טֶרֶף לִילָדָיו וִיהִי מָה.

וַאֲרֻבּוֹת הַשָּׁמַיִם טֶרֶם תִּסָּגַרְנָה וּמִפַּעַם לְפַעַם תַּמְטֵרְנָה מִטְרוֹת עֹז עַל רָאשֵׁי הָאֲנָשִׁים הַמְעַטִּים בָּרְחוֹב. וַיְשָׂרֵךְ יְרוּמְאֵל דַּרְכּוֹ בְּחוּצוֹת קִרְיָה כֹּה וָכֹה וְאֵין אִישׁ כִּי יִפְנֶה אֵלָיו בִּדְבַר עֲבוֹדָה אוֹ שֵׁרוּת מָה.

וַיְהִי בְּלֶכְתּוֹ דוֹאֵב וַחֲסַר־יֶשַׁע וַיָּשֶׂם פָּנָיו אֶל אַשְׁדּוֹת הַנָּהָר הָרָחוֹק כִּשְׁעָתַיִם מִן הָעִיר. כִּי אָמַר: יֵשׁ וּבְעֵת סְעָרָה יִשְּׂאוּ זִרְמֵי הַמַּיִם דָּגָה בְּקִרְבַת הָאֲשֵׁדוֹת, וִידֵי דַיָּגִים הָאֲמוּנוֹת לְהַשְׁלִיךְ חַכָּה – תַּעֲלֶינָה דָּגָה לָרֹב. אוּלַי יֹאבֶה אַחַד הַדַּיָּגִים לָתֵת לוֹ סִירָה וּמִכְמֹרֶת לְנַסּוֹת דָּבָר – וְהָיָה אִם יַצְלִיחַ אֱלֹהִים בְּיָדוֹ יִמְצָא שְׂכַר עֲבוֹדָתוֹ דַיּוֹ.

וְכַאֲשֶׁר דִּמָּה כֵּן הָיָה. מִסְפַּר דַּיָּגִים שָׁטוּ כֹּה וָכֹה בַּנָּהָר וַיַּעֲלוּ דָגִים גְּדוֹלִים וְטוֹבִים לָרֹב.

וְאַחַד הַדַּיָּגִים הוֹאִיל לָתֵת לוֹ סִירָה וּמִכְמֹרֶת וַיַּחְתֹּר וַיַּפְלֵג כֹּה וָכֹה וַיְצַפֶּה לַמּוֹעֵד הַנָּכוֹן. וְהָאִישׁ מְפַלֵּל חֶרֶשׁ בִּשְׂפָתָיו כִּי יַצלִיחַ הָאֵל דַּרְכּוֹ לְמַעַן יְלָדָיו הַמְצַפִּים לְלֶחֶם בְּכִלְיוֹן עֵינַיִם.

וַיְהִי כִּי חָדַל הַגֶּשֶׁם בִּמְעַט וַיִּרְחַק לַחֲתוֹר וַיַּשְׁלֵךְ מִכְמַרְתּוֹ וַיְצַפֶּה עֵת קְצָרָה. וּבֵין כֹּה וָכֹה הִתְקַדְּרוּ הַשָּׁמַיִם שֵׁנִית וְקוֹל הָרַעַם נִשְׁמַע בָּאַדִּיר. וַיְמַהֵר וַיִּזְדָּרֵז לִמְשׁוֹךְ הַמִּכְמֹרֶת וַיִּבְרֹק בָּרָק וְקוֹל רַעַם בָּקַע – וַיִּפֹּל הַבָּרָק עַל יְרוּמְאֵל וַיַּפִּילֵהוּ חָלָל בְּסִירָתוֹ.

הֵן תִּקְצַר עֵט סוֹפֵר לְהַעֲלוֹת עַל גִּלָּיוֹן דְּבַר מַרְאֵה הָאִשָּׁה וְהַיְלָדִים עֵת הוּבָא הָאָב אֶל בֵּיתוֹ נָשׂוּא בִּידֵי אֲנָשִׁים. גַּם אוֹתָם כְּמוֹ הָמַם הָרַעַם כִּי רָאוּ לְעֵינֵיהֶם אֶת מַחְמַד נַפְשָׁם וּמִשְׁעַן חַיֵיהֶם שָׁדוּד בְּיַד הַמָּוֶת. וַיַּרְבּוּ בְּכִי וְקִינָה וַיַּגְדִּילוּ אֵבֶל וּמִסְפַּד וַיִּשְׁאֲלוּ אֶת נַפְשָׁם לָמוּת.

וּמֵאָז הוּבַל הָאָב לִקְבוּרוֹת וַיֵּאָסֵף קוֹל שִׂמְחָה מִמְּעוֹן הָאֶבְיוֹנִים וְדִמְעָה לֹא נִמְחֲתָה מֵעַל פְּנֵיהֶם וַתְּהִי נַפְשָׁם מָרָה עֲלֵיהֶם וַיִּרֶב יְגוֹנָם מִיגוֹן כָּל אִישׁ אֻמְלָל עַל פְּנֵי הָאֲדָמָה.

וּבְכָל זֹאת לֹא חָטְאוּ הָאֵם וְהַבָּנִים בִּשְׂפָתָם לֵאלֹהִים וְלֹא דִבְּרוּ סָרָה עַל מִשְׁפַּט הָאֱלֹהִים אֲשֶׁר פָּעַל. כִּי אָמְרָה הָאֵם בְּאָזְנֵי הַבָּנִים: הֵן זֶה הָיָה דְבַר אֲבִיכֶם כָּל הַיָּמִים: רָחֲקוּ דַרְכֵי אֵל מִבִּינַת אָדָם וְכִגְבוֹהַּ שָׁמַיִם מֵעַל הָאָרֶץ כֵּן גָּבְהוּ מַחְשְׁבוֹת אֱלֹהִים מִמַּחְשְׁבוֹתֵינוּ. וְכֵן לִמְדוּנוּ הוֹרֵינוּ לֵאמֹר: הַצּוּר תָּמִים פָּעֳלוֹ כִּי כָּל דְּרָכָיו מִשְׁפָּט, אֵל אֱמוּנָה וְאֵין עָוֶל צַדִּיק וְיָשָׁר הוּא.

וּבְהִפּוֹג הַיָּגוֹן מְעַט מֵעַל לֵב הָאֵם וְהַבָּנִים וַתֵּצֵא הָאֵם לְפָעֳלָהּ לְשָׁרֵת בְּבָתֵּי הָרוֹזְנִים לְיַד הַשְׁפָחוֹת בְּכָל מְלָאכָה אֲשֶׁר בַּבַּיִת לְמַעַן תַּעֲנֵקְנָה לָהּ מְעַט לֶחֶם וְנָזִיד. וְהַנַּעַר הַבְּכוֹר נָטָה גַם הוּא שִׁכְמוֹ לְעָמָל לָשֵׂאת מַשָּׂא אוֹ לִמְשׁוֹךְ כִּרְכָּרָה בָּהּ יֵשְׁבוּ נִכְבָּדֵי קִרְיָה. וּבִימֵי קָצִיר נִלְוָה אֶל אִמּוֹ לְלַקֵּט אַחַר הַקּוֹצְרִים.

וּבִרְבוֹת הַיָּמִים וַתִּיעַף הָאִשָּׁה מְאֹד. כֹּחוֹתֶיהָ רָפוּ וּפָנֶיהָ נָפְלוּ וּמְנוּחָה לֹא הָיְתָה לָהּ. וַיְהִי כִּי הוֹסִיפָה וְהִתְאַמְצָה לִשְׁלוֹחַ יָדָהּ בְּכָל עֲבוֹדָה קָשָׁה וַיִּכְשַׁל כֹּחָה וַתִּפֹּל לַמִּשְׁכַָּב כִּי חָלְתָה בְּרַגְלֶיהָ וְלֹא יָכְלָה הֲנִיעָן כֹּה וָכֹה.

אָז מָלְאָה קֻבַּעַת לַעֲנַת־הָעֹנִי אֲשֶׁר לַמִּשְׁפָּחָה כִּי נָפַל מַשָּׂא הַבַּיִת עַל הַנְּעָרִים וַיֵּצְאוּ הֵמָּה לְסִבְלוֹתֵיהֶם. מִן בֹּקֶר עַד עֶרֶב אָזְרוּ חֵילֵיהֶם לַעֲבוֹד וְלַעֲמוֹל בְּכָל אֲשֶׁר תִּמְצָא יָדָם לְמַעַן הָשֵׁב נֶפֶשׁ הָאֵם בְּחָלְיָהּ וְלָתֵת מִחְיָה לְפִיהֶם וּלְפִי הָאֲחָיוֹת.

וַיֶאֶרְכוּ הַיָּמִים וַיַּחְלְפוּ כִּשְׁנָתַיִם יָמִים. וְהַמִּשְׁפָּחָה הָעֲנִיָּה, הָאֵם עַל הַבָּנִים, נָשְׂאָה בְּדוּמִיָּה אֶת הַמְצוּקָה וְאֶת הַמַּחְסוֹר, אֶת הַחֶרְפָּה וְאֶת הָעִצָּבוֹן. כִּי הָיוּ הַיְלָדִים נְבוֹנִים וְטוֹבֵי לֵבָב וַיִּשְׁמְרוּ לְשׁוֹנָם מֵהִלּוֹן וּמֵהִתְרָעֵם בְּאָזְנֵי הָאֵם הַדְּווּיָה בְּחָלְיָהּ. וְהָיָה אִם לֹא טָעֲמוּ טַעַם לֶחֶם יוֹם תָּמִים וְכִחֲדוּ מֵאִמָּם וְאָמְרוּ כִּי סָעֲדוּ לִבָּם בַּחוּץ וְגַם שָׂבְעוּ לֶחֶם וְאֶת הַמְעַט אֲשֶׁר הָיָה עִמָּם בִּשְׁלוּ נָזִיד קַל לָאֵם. וְאַף הָאֵם הִסְתִּירָה אֶת מַכְאוֹבֶיהָ וּמַדְוֵי חָלְיָהּ מִן הַיְלָדִים לִבְלִי הַעֲצִיבָם וְלִבְלִי הַרְפּוֹת רוּחָם – וַתַּגֵּד לָהֶם תָמִיד כִּי טוֹב לָהּ וְכִי רָפָא לָהּ וְאַךְ כִּי רַגְלֶיהָ לֹא תִּסְכֹּנָה לִצְעוֹד צַעַד.

וְאַף אָמְנָם מֵרְאוֹת הָאֵם אֶת דַּאֲגַת הַיְלָדִים אֵלֶיהָ, וְאֶת מִשְׁפַּט הַיְלָדִים בֵּין אִישׁ לְאָחִיו אֲשֶׁר יִתְהַלְּכוּ בְּאַהֲבָה וּבְשָׁלוֹם וַיֵּקַל לְרוּחָהּ מְעַט וַתְּהִי זֹאת נֶחָמָתָהּ בְּחָלְיָהּ וּבְעָנְיָהּ.

וְאוּלָם בַּצַּר לָהֶם בַּיָּמִים הָהֵם – יֵשׁ וּפָקְדָה אוֹתָם לְעִתִּים, אַחַת לְכַמָּה שָׁבוּעוֹת, יָד נַעֲלָמָה וַיִּמְצְאוּ בְּפִנַּת הַבַּיִת סַל גָּדוֹל וּבוֹ לֶחֶם וְחֶמְאָה וְזֵיתִים וּפְרִי עֵץ. וַיְּהִי הַדָּבָר לְפֶלֶא בְּעֵינֵיהֶם. וּכְכָל אֲשֶׁר נָתְנוּ לִבָּם לִרְאוֹת וְלָדַעַת מִי הוּא זֶה וְאֵיזֶה הוּא אֲשֶׁר יַעֲנִיק לָהֶם בְּרָכָה זוֹ וְלֹא עָלְתָה לָהֶם וַיִּלְאוּ לִמְצוֹא שׁרֶשׁ הַדָּבָר וַיַּאֲמִינוּ כִּי מַלְאַךְ אֱלֹהִים יָחֹן אוֹתָם בְּצָרָתָם. וְאוּלָם עַל מָה לֹא יֵיטִיב כָּזֹאת לְמִצְעָר אַחַת לַשָּׁבוּעַ?

וַיְהִי הַפֶּלֶא – פֶּלֶא.

ד. חֲזוֹן יֶשַׁע    🔗

וְיוֹתֵר מִכָּל בְּנֵי הַבַּיִת עָגְמָה נֶפֶשׁ הַיַּלְדָּה רֻחָמָה עַל כָּל הַתְּלָאָה וְהַחֶרְפָּה אֲשֶׁר מָצְאוּ אֶת בֵּיתָהּ. מֵאָז נֶאֱסַף אָבִיהָ אֶל עַמָּיו וְאַחֲרֵי נְפוֹל הָאֵם עַל עֶרֶשׂ דְּוַי כְּמוֹ הֻכְּתָה הַיַּלְדָה בְּתִמְהוֹן לֵבָב. יֵשׁ וְיָשְׁבָה עִתִּים אֲרֻכּוֹת לְיַד הַחַלּוֹן הַקָּטָן וְצָפְתָה הַחוּצָה דוֹמְמָה וְנוּגָה וּבְחֶשְׁכַת הַלַּיְלָה עֵת הַכֹּל יָשְׁנוּ שְׁנָתָם נֵעוֹרָה לְפֶתַע וַתֵּשֵׁב בְּמִטָּתָהּ, רֹאשָׁה שָׁקוּעַ בֵּין יָדֶיהָ וַתַּחֲשֹׁב אֶת מַחְשְׁבוֹת לִבָּהּ.

וְאַחֶיהָ בַּבַּיִת רָאוּ אַךְ אֶת הֲלִיכוֹתֶיהָ בַּיּוֹם וַיֵּדְעוּ כִּי רַב עִצְּבוֹן לֵב הָאָחוֹת הַקְּטַנָּה וַיֹּאמְרוּ בְּלִבָּם עַל כִּי קְטַנָּה הִיא וַאֲהוּבַת נֶפֶשׁ הָיְתָה לָאָב וְלָאֵם – עַל כֵּן גָּדוֹל עִצְּבוֹנָהּ מְאֹד כַּיּוֹם. אַךְ יָדוֹעַ לֹא יָדְעוּ מַה תֶּהֱגֶה וּמַּה תַּחֲשֹׁב כָּל הַיָּמִים כִּי לֹא דִבְּרָה עִמָּם וְלֹא הִשְׁמִיעָה דָבָר לְאָזְנָם מִכֹּל וָכֹל.

וְאוּלָם מִדֵּי הֱיוֹתָהּ בּוֹדְדָה בְּאַחַת פִּנּוֹת הַבַּיִת אוֹ מִדֵּי לֶכְתָּהּ לְבַדָּהּ בְּאַחַד הַשָּׂדוֹת אוֹ בְּחֹרֶשׁ הַתְּמָרִים אֲשֶׁר בִּקְצֵה הָרְחוֹב וְהָגְתָה חֶרֶשׁ בְּנַפְשָׁהּ לְהָבִין דַּרְכֵי אֵל וּפָעֳלָיו. מַדּוּעַ הֵמַר שַׁדַּי כֹּה לָהֶם כִּי לָקַח מֵעִמָּם אֶת אֲבִיהֶם תִּפְאֶרֶת בֵּיתָם וְהִפִּיל עַל עֶרֶשׂ דְּוַי אֶת אִמָּם הַנֶּאֱהָבָה וְלָמָּה יַחֲלֹק לַיְלָדִים עֹנִי וּמַחְסוֹר וּכְאֵב וְיָגוֹן? מָה רָעָה בְּיָדָם כִּי נָכוֹנוּ לָהֶם וּלְהוֹרֵיהֶם כָּל הַיָּמִים מָצוֹק וְחֶרְפָּה, בּוּז וּתְלָאָה? וְהֵן נַהֲפוֹךְ הָיָה לָאֵל לַעֲשׂוֹת עִמָּם כִּי גַם אָבִיהָ בְּחַיָּיו וְגַם אִמָּה לֹא הֵרֵעוּ דָבָר, לֹא פָּעֲלוּ עַוְלָה וְגַם לֹא דִבְּרוּ סָרָה מֵעוֹדָם עַל אִישׁ אוֹ עַל אִשָּׁה. וְלָמָּה חָפֵץ אֱלֹהִים כִּי יְהַלְּכוּ עַל פְּנֵי הָאָרֶץ דַּלִּים וְאֶבְיוֹנִים, מְזֵי־רָעָב וּקְרוּעֵי־מַדִּים לְיַד רוֹזְנִים גְדוֹלֵי־אֶרֶץ אֲשֶׁר יֹאכְלוּ לָשֹׂבַע לַחְמָם וְיִלְבְּשׁוּ חֲמוּדוֹת וְיָשִׂישׂוּ מְשׂוֹשׂ חַיִּים בְּצֵאתָם וּבְבוֹאָם?

אֲהָהּ, אֱלֹהִים אֱלֹהֵי יִשְׂרָאֵל, – הֶעְתִּירָה חֶרֶשׁ בְּשְׂפָתֶיהָ – יָדַעְתִּי כִּי קָטֹנְתִּי מְאֹד מִדַּבֵּר אֵלֶיךָ וְאֵין לְיַלְדָּה קְטַנָּה לְהָבִין בַּגְּדוֹלוֹת וּבַנִּשְׂגָּבוֹת, וְאָמְנָם לֹא חָפַצְתִּי בְּמַחֲשָׁבוֹת וְלֹא אֶקְרָא לָהֶן וְלֹא אֲבַקְשֵׁן – אַךְ הֵן תִּרְדֹּפְנָה אַחֲרַי, הֵן תֹּאחַזְנָה בִּי וְתָצַקְנָה לְרוּחִי עַד דַּכָּא. אָנָּא אֱלֹהִים, עֲנֵנִי, הָאֵר עֵינַי וְהָשֵׁב רוּחִי, הֵן אַתָּה – כַּאֲשֶׁר לִמְּדַנִי אָבִי – אֱלֹהֵי הָאֱלֹהִים, אֲדוֹנֵי הָאֲדוֹנִים, רוֹאֶה הַכֹּל, שׁוֹמֵעַ הַכֹּל וְיוֹדֵעַ הַכֹּל – הַאֵין אַתָּה רוֹאֶה בְּעָנְיֵנוּ? הַטּוֹב טוֹב בְּעֵינֶיךָ כִּי בָּאָה עָלֵינוּ כָּל הָרָעָה הַזֹּאת? הַאַתָּה שָׁלַחְתָּ מִיָּדְךָ עָלֵינוּ כָּל אֵלֶּה? וְהֵן אָמוֹר אָמַר לִי אָבִי כִּי אֵל רַחוּם אַתָּה, אֵל צַדִּיק עוֹשֶׂה חֶסֶד לְאוֹהֲבָיו וּלְשׁוֹמְרֵי מִצְווֹתָיו. הַאִם לֹא אֲהַבְנוּךָ עַד מְאֹד? הֵן יָדוֹעַ יָדַעְתָּ כִּי מְאֹד אֲהַבְתִּיךָ וְנַפְשִׁי דָבְקָה בְּךָ. וְעַל אַף כָּל הָרֹגֶז וְהֶחָרוֹן אֲשֶׁר צִוִּיתָ לָנוּ – יוֹם יוֹם אֶקְרָא לְךָ. לַיְלָה לַיְלָה אֲשַׁוֵּעַ אֵלֶיךָ וַאֲצַפֶּה לִישׁוּעָתֶךָ. וְעַד אָנָה אֲצַפֶּה, אֱלֹהָי? עַד אָנָה תַּחֲרִישׁ? עֲנֵנִי, אֱלֹהִים, עֲנֵנִי. וְהָיָה אִם תִּשְׁמַע לְקוֹלִי וְשָׁלַחְתָּ מַרְפֵּא לְאִמִּי וְנָתַתָּ לָנוּ לֶחֶם לֶאֱכֹל וּבֶגֶד לִלְבּוֹשׁ וַהֲשִׁיבוֹתָ אוֹתָנוּ אֶל נַחֲלָתֵנוּ – וְאֵדַע וְאוֹדִיעַ לַכֹּל כִּי אֵין אֱלֹהִים כָּמוֹךָ וְאֵין טוֹב מִמְּךָ וְאֵין אֱלוֹהַּ מִבַּלְעָדֶיךָ.

כָּזֹאת וְכָזֹאת הֶעְתִּירָה הַקְּטַנָּה שִׂיחַ יָמִים עַל יָמִים – בְּלֵב נִדְכָּא וּבְעַיִן בּוֹכִיָּה.

וְאוּלָם יָמִים עַל יָמִים עָבְרוּ וּמַחֲלַת הָאֵם לֹא רָפְתָה וַעֲמַל הַיְלָדִים כָּבֵד עֲלֵיהֶם כַּאֲשֶׁר כָּבֵד כָּל הַיָּמִים וְנִקְיוֹן שִׁנֵּיהֶם וּמְצוּקַת נַפְשָׁם גָּדְלוּ מִנְּשׂוֹא.

נוֹסָף עַל אֵלֶּה נָגְעָה רָעָה אַחֶרֶת אֶל לֵב הַיַּלְדָּה וַתִּפְצָעֵהוּ פֶּצַע עַל פֶּצַע. כִּי בַּיָּמִים הָהֵם נָפְלָה הַוָּה גְדוֹלָה עַל בֵּית אַרְגוֹל הַשָּׁכֵן הֶעָשִׁיר וַתְּהִי תְּמוּרָה רָעָה בְּכָל אֲשֶׁר עִמּוֹ, כִּי זָעוֹם זָעַם מֶלֶךְ אֲרַם צוֹבָא וַאֲרַם דַּמֶּשֶׂק הַקָּשֶׁה וְרָם הַלֵּבָב, הוּא רַעַמְאֵל הֶעָרִיץ, בִּדְבַר מָה – וַיַּחֲרֹץ עַל אַרְגוֹל מִשְׁפַּט מָוֶת וְאֶת נַחֲלָתוֹ וְהוֹנוֹ וְכָל עֲבָדָיו וְשִׁפְחוֹתָיו הֶחֱרִים לְבֵית הַמַּלְכוּת אֲשֶׁר לוֹ בַּאֲרַם צוֹבָא וְאֶת נְשׁוֹתָיו וּבָנָיו וּבְנוֹתָיו צִוָּה לְגָרֵשׁ מֵאֲרַם דַּמֶּשֶׂק.

וַיְהִי כִּי בָּאוּ עַבְדֵי הַמֶּלֶךְ וַיִּקְחוּ לָהֶם אֶת כָּל אֲשֶׁר בַּבַּיִת וְאֶת הַנָּשִׁים וְאֶת הַבָּנִים נִשְׁלוּ וַיְשַׁלְּחוּם מִמְּעוֹנָם – עָמְדוּ יַלְדֵי יְרוּמְאֵל וַיַּבִּיטוּ בְּתִמְהוֹן לֵבָב אֶל כָּל הַקּוֹרוֹת הָאֵלֶּה.

וְאוּלָם מֵעֵינֵי רֻחָמָה הַקְּטַנָּה נָזְלוּ דְמָעוֹת בְּלִי הֲפוּגוֹת וַתִּתְעַצֵּב אֶל לִבָּהּ מְאֹד.

וַיְהִי עִם עֶרֶב עֵת עָטָה הַחשֶׁךְ רְחוֹבוֹת קִרְיָה וַתֵּשֵׁב רֻחָמָה בְּפִנָּה אֲשֶׁר בַּחֲצַר בֵּיתָהּ דוֹמְמָה וּמַשְׁמִימָה.

אָז תִּרְאֶה כִּי יִקְרַב חֶרֶשׁ לְאִטּוֹ נַעַר קָטָן וַתִּבְחַן רֻחָמָה וַתַּכֵּר כִּי אֵין זֶה כִּי אִם הַנַּעַר הַקָּטָן הַשָּׁכֵן לְבֵית אַרְגוֹל. וַתָּקָם חִיש וַתּוֹשֶׁט לוֹ אֶת יָדָהּ וַתֹּאמַר:

– הֱיֵה בָּרוּךְ בְּבוֹאֶךָ. מַה חֶפְצְךָ הַנָּעַר?

– אֵין כָּל מְאוּמָה. אַךְ בָּאתִי לְהַגִּיד לָךְ שָׁלוֹם כִּי לֹא אוּכַל לֶכֶת מִזֶּה עַד אִם רְאִיתִיךְ. הֵן כֹּה אֲהַבְתִּיךְ כָּל הַיָּמִים, וְעַתָּה כִּי לָנִים אֲנַחְנוּ הַלַּיְלָה הַזֶּה מִחוּץ לָעִיר עַד נַשְׁכִּים בַּבֹּקֶר וְנֵלֵךְ בַּאֲשֶׁר נֵלֵךְ אֶל נְדוּדִים וְאֶל גּוֹלָה וָאֹמַר: אָבוֹא וְאַגִּיד שָׁלוֹם לָךְ.

– וַאֲנִי, חַי אֱלֹהֵי יִשְׂרָאֵל, כִּי נִשְׁבְּרָה נַפְשִׁי בְּקִרְבִּי. וְכָל הָעֵת הַזֹּאת אַעְתִּיר שִׂיחִי לֵאלֹהַי כִּי יִשְׁמָרְךָ בַּדֶּרֶךְ, אוֹתְךָ וְאֶת אַנְשֵׁי בֵּיתְךָ, כִּי לֹא יִקְרֶה אֶתְכֶם פֶּגַע אוֹ אָסוֹן. אֲהָהּ, מַה יִדְאַב לִבִּי עֲלֵיכֶם!

– וַאֲנִי עֲלֵיכֶם, כִּי הַמְעַט אֲשֶׁר יָכֹלְתִּי לַעֲשׂוֹת עִמָּכֶם עָשִׂיתִי. וְעַתָּה אֵיכָה תִּשָּׁאֲרוּ בְּעָנְיְכֶם?

– אֶל מָה יִרְמְזוּן מִלֶּיךָ לֹא אָבִין.

– אָנָּא, סִלְחִי לִי, יַלְדַּת־אֱלֹהִים, כִּי אַגִּיד עַתָּה דְּבָרִי אֲשֶׁר שְׁמַרְתִּיו בְּלִבִּי כָּל־הַיָּמִים: אֲנִי שָׁלַחְתִּי לְעִתִּים אֶת הַסַּל לָכֶם לְמִחְיָה.

– הַאַתָּה?

– סִלְחִי כִּי אָמַרְתִּי לָךְ.

– הֵן טוֹב בָּאָדָם הִנֶּךָ. אֲהָהּ עַל הַשֶּׁבֶר – קָרְאָה הַנַּעֲרָה מוּל שָׁמַיִם – אֵיכָה אֱלֹהֵי יִשְׂרָאֵל, תִּסְפֶּה צַדִּיק בַּעֲבוּר רָשָׁע וְתַכְרִית הֶעָנָף הַטּוֹב בְּגַרְזֶן אִישׁ רָשָׁע?

– עַתָּה – אָמַר הַנַּעַר קוֹל יְקָרוֹת – אִמְרִי לִי שָׁלוֹם וְאִמְרִי לִי כִּי תֶּאֱהָבִינִי וְאֶשָּׂא דְבָרֵךְ לְנֶחָמָה לִי בַּאֲשֶׁר אֶהְיֶה וּבַאֲשֶׁר אֶנְדֹּד.

– כֵּן, אָחִי, אֲהַבְתִּיךָ. הַגִּידָה לִי שְׁמְךָ וְאֶשָּׂאֶנּוּ גַם אֲנִי בִּשְׂפָתַי כָּל הַיָּמִים.

– לַפִּידוֹת שְׁמִי.

– וַאֲנִי רֻחָמָה.

וַיַּחֲזִיקוּ אִישׁ יַד רֵעֵהוּ וַיִּשְׁקוּ אִישׁ לְרֵעֵהוּ וַיִּפָּרֵדוּ.

מֵאָז נוֹסַף עַל כּוֹס הַיְּגוֹנִים אֲשֶׁר לַנַּעֲרָה גַם יְגוֹן דַּאֲגָתָהּ לַנַּעַר אֲשֶׁר אָהֲבָה בְּסֵתֶר נַפְשָׁה. וַתּוֹסֶף דֶּמַע וְתַחֲנוּנִים עַל דִמְעוֹתֶיהָ. יוֹם יוֹם שָׁבָה וַתְּשַׁוֵּעַ לֵאלֹהִים בְּכָל לִבָּהּ כִּי יֵעָתֵר לָהּ וְיָאִיר עֵינֶיהָ לְהָבִין דַּרְכֵי אֵל וּמִשְׁפָּטָיו.

וַיְהִי בְּהַעֲמִיקָהּ חָשׁוֹב וְהָגֹה לָרֹב וַתֹּאמֶר בְּלִבָּהּ הֵן אֱלֹהִים בּוֹרֵא שָׁמַיִם וָאָרֶץ וְכָל הָאָדָם וְכָל הַחַיָּה אֲשֶׁר עַל פְּנֵי הָאֲדָמָה וְכָל הָעוֹף אֲשֶׁר בַּשָּׁמַיִם וְכָל צֶמַח הַשָּׂדֶה הֵן לֹא יִתָּכֵן כִּי יֶאֱטֹם אָזְנָיו מִשְּׁמוֹעַ לְשַׁוְעַת יַלְדָּה בְּמַר רוּחָהּ. אַךְ אֵין זֹאת כִּי טֶרֶם תֵּדַע יַלְדָּה כָּמוֹהָ דַרְכֵי אֵל אֲשֶׁר בָּהֶם יַגִּיעַ הָאָדָם לֵאלֹהָיו.

וֲתִּגְמֹר אֹמֶר לְעַנּוֹת נַפְשָׁהּ בְּצוֹם יוֹם אַחַר יוֹם עַד אִם תִּטְהַר נַפְשָׁהּ כָּלִיל לָדַעַת דְּבַר ה'. וְעוֹד זֹאת אָמְרָה לְנַפְשָׁהּ: אוֹ כִּי אֵינָהּ שׁוֹוָה בְּעֵינֵי אֵל לְהֵעָתֵר לָהּ וְתָמוּת אֵפוֹא בִּרְעָבָהּ אוֹ כִּי יִמְצָאֶהָ אֱלֹהִים טוֹבָה וִישָׁרָה לְהוֹשִׁיעַ לָהּ.

וְאִישׁ לֹא יָדַע וְאִישׁ לֹא רָאָה כִּי מָנְעָה הַנַּעֲרָה אֹכֶל מִפִּיהָ כָּל הַיּוֹם כִּי עָשְׂתָה דְבָרָהּ בְּסֵתֶר וַתִּקַּח אָכְלָהּ בְּיָדָהּ וַתֵּצֵא הַחוּצָה לַשָּׂדֶה וַתִּתְּנֵהוּ לְעוֹף הַשָּׁמַיִם אוֹ לְבֶהֱמַת הָרְחוֹב, וְאַךְ בַּלַּיְלָה טָעֲמָה מְעַט מִזְעָר מִן הַלֶּחֶם. כֵּן עָשְׂתָה שִׁבְעַת הַיָּמִים.

וַיְהִי בַּלַּיְלָה הַשְּׁבִיעִי וַתִּפֹּל עַל מִשְׁכָּבָהּ בְאֵין אוֹנִים וַתִּנְשֹׁם רוּחַ בְּאַחֲרִית כֹּחוֹתֶיהָ וַיִּהְיוּ נְשִׁימוֹת חָזֶהָ רָפוֹת וְקַלּוֹת כִּנְשִׁימוֹת תּוֹלַעַת עַל פְּנֵי הָאֲדָמָה.

וַיְהִי אַךְ הִנִּיחָה רֹאשָׁהּ עַל מִטָּתָהּ וַתִּשְׁמַעְנָה אָזְנֶיהָ קוֹל מַפָּץ גָּדוֹל כִּשְׁאוֹן רַעַם אַדִּיר וְרוּחַ חֲזָקָה דְחָפַתָּה וַתִּשָּׂאֶהָ בִּכְנָפֶיהָ וַתְּבִיאֶהָ אֶל תַּחַת תֹּמֶר גָּדוֹל אֲשֶׁר בְּחֹרֶשׁ הַתְּמָרִים הַקָּרוֹב לְבֵיתָהּ.

אָז יִצְעַד מֵעִם עָבֵי הַחֹרֶשׁ אִישׁ חָסוֹן וְרָם קוֹמָה, שְׂעַר זְקָנוֹ וְתַלְתַּלֵּי רֹאשׁוֹ שְׁחוֹרִים וְנָאוִים וְתָאֳרוֹ הָדוּר וְנִפְלָא מְאֹד. וַיְהִי כִּי קָרֵב הָלוֹךְ וְקָרוֹב אֵלֶיהָ וַתַּבֵּט וַתֵּרֶא וְהִנֵּה אוֹר זָרוּעַ עַל פָּנָיו כָּאוֹר הַצָּחוֹר אֲשֶׁר לְקַרְנֵי הַיָּרֵחַ, וּמַבָּטֵי עֵינָיו טוֹבִים וְרַכִּים וְיָצְקוּ עָלֶיהָ שִׂמְחַת נֶפֶשׁ וּמְנוּחַת לֵב.

וַיִּשְׁלַח הָאִישׁ אֶת יָדוֹ וַיֹּאמַר: שָׁלוֹם לָךְ נַעֲרָה – וַתֹּאחֶז יָדוֹ בְּיָדָהּ וַיֵּקַל לְרוּחָהּ עַד מְאֹד. וַיּוֹסֶף הָאִישׁ לֵאמֹר: שָׁלוּחַ אֲנִי מֵאֵת אֱלֹהֵי יִשְׂרָאֵל אֵלַיִךְ. וְכֹה אָמַר ה' אֵלַי: “חִישׁ רֵד אֶל הַנֲּעַרָה רֻחָמָה בַּת יְרוּמְאֵל עַבְדִּי וְהַעֲנֵק לְרוּחָהּ רוּחַ מִמָּרוֹם וִיהִי לָהּ וּלְכָל אֲשֶׁר לָהּ יֶשַׁע וְחַיִּים”.

וּבְדַבְּרוֹ וַיַּקְרֵב אִישׁ הָאֱלֹהִים פִּיו אֶל מִצְחָהּ וַיִּשַּׁק לָהּ וַיֹּאמַר:

הִנֵּה יְהִי רוּחַ מִמָּרוֹם עָלַיִךְ וְנָשָׂאת דְּבַר אֱלֹהִים בְּלִבֵּךְ, וְעַתָּה לֹא רֻחָמָה יִקָּרֵא שְׁמֵךְ כִּי אִם דְּבוֹרָה, כִּי כִּדְבַשׁ הַדְּבוֹרָה הַמָּתוֹק וְהַמֵּאִיר עֵינַיִם כֵּן יִהְיֶה דְבַר פִּיךְ לְהֵיטִיב וּלְרַפֵּא לֵב כָּל אִישׁ הַיָּרֵא אֱלֹהִים וְדוֹרֵשׁ דְּבָרוֹ. וּכָעֹקֶץ אֲשֶׁר לַדְּבוֹרָה יָבוֹא דְבָרֵךְ אֶל לֵב אִישׁ חוֹטֵא וּבְלִיּעַל. קוּמִי, דְּבוֹרָה, וְהִתְחַזְּקִי וְהָיִית לִבְרָכָה בְּקֶרֶב הָאָרֶץ.

וַיהִי אַךְ כִּלָּה דְבָרוֹ וַיֵּעָלֵם אִישׁ הָאֱלֹהִים מֵעֵינֶיהָ וְכָל הַמַּרְאֶה נָמוֹג וְחָלָף.

וַיְהִי כִּי נִפְקְחוּ עֵינֶיהָ – וַתֵּרֶא וְהִנֵּה שׁוֹכֶבֶת הִיא בְּבֵיתָהּ וְקַרְנֵי הַשֶּׁמֶשׁ הַזּוֹרַחַת נָחוּ עַל פְּנֵי הַחֶדֶר הַקָּטָן. וַתָּחָשׁ בְּנַפְשָׁהּ כִּי מָלְאָה אוֹנִים וְתַעֲצוּמוֹת כְּמוֹ כִּלְּתָה זֶה עַתָּה לִסְעוֹד לִבָּהּ בְּמַאֲכָל וּבְמִשְׁתֶּה.

וְאוּלָם עוֹד חָרְדָה נַפְשָׁהּ בְּקִרְבָּהּ כִּי אָמְרָה אוּלַי אֵין זֶה כִּי אִם חֲלוֹם כַּאֲשֶׁר יַחַלְמוּ לָרֹב בְּנֵי הָאָדָם, וּבָמֶּה תֵדַע אֵפוֹא אִם חֲזוֹן שָׁמַיִם הָיָה עִמָּה אוֹ דָבָר רֵיק?

אָז תָּקוּם חֶרֶשׁ מִמִּטָּתָהּ וַתִּתְחַמֵּק וַתֵּצֵא מִן הַבָּיִת וַתְּמַהֵר אֶל חֹרֶשׁ הַתְּמָרִים לָדַעַת מַה יֵּעָשֶׂה בָּהּ וּמַה יִקְרֶה לָהּ וּמַה תִּפְעַל?

וּבְבוֹאָהּ שָׁמָּה וַתֵּשֶׁב תַּחַת הַתֹּמֶר רְחַב הַכַּפּוֹת כַּאֲשֶׁר יָשְׁבָה תַּחְתָּיו בַּחֲלוֹמָהּ.

וְדוּמִיָה רַבָּה וְשַלְוַת הַשְׁקֵט בַּחֹרֶשׁ. קַרְנֵי הַשֶּׁמֶשׁ הָעוֹלָה מֵאַחֲרֵי רֹאשׁ הַפִּסְגָה רִחֲפוּ בֵּין חָטְרֵי הַתְּמָרִים וַיִּהְיוּ זוֹלְפִים שֶׁפַע אוֹר זָהָב בַּעֲבִי הַחֹרֶשׁ וַיְהִי לָהּ כְּמוֹ יָרְדוּ כְּרוּבֵי שָׁמַיִם וַיָּפוּצוּ בֵּין הָעֵצִים כֹּה וָכֹה.

עוֹדֶנָּה יוֹשֶׁבֶת דוֹמְמָה וְסֹעֲרָה כְּאַחַת וַיַּעֲבֹר עַל יָדָהּ אִישׁ רוֹכֵב עַל סוּס וּמַרְאֵהוּ כְּאִישׁ נְשׂוּא פָּנִים וּבַעַל בְּעַמָּיו. וַיְהִי אַךְ נָחוּ מַבָּטֵיהָ עַל הָרוֹכֵב – וַתִּפָּעֵם רוּחָהּ בְּקִרְבָּהּ. וַיְהִי כִּי עָבַר מִמֶּנָּה וָהָלְאָה וַתָּקָם וַתִּקְרָא בְּקוֹל – וְהַקּוֹל כְּמוֹ לֹא לָהּ – וַיִּפְרֹץ מִקִּרְבָּהּ בְּחָזְקָה לֵאמֹר:

– עֲצֹר, בֶּן אָדָם!

וַיַּעֲצֹר הָאִישׁ בְּסוּסוֹ. וַיַּסֵּב אֶת פָּנָיו אֶל הַנַּעֲרָה וַיַּבֵּט אֶל פָּנֶיהָ וְאֶל עֵינֶיהָ הַפְּקוּחוֹת וַיִּשְׁתּוֹמֵם וַיִּקְרָא:

– מָה חֶפְצֵךְ, הַנַּעֲרָה?

וְהִיא הֶחֱרִישָׁה וַתּוֹסֶף הַבֵּט אֵלָיו בְּעֵינַיִם גְּדוֹלוֹת וּבְחֶרְדַּת לֵב.

– מַה כִּי קָרָאת לִי, הַנַּעֲרָה.

– חַכֵּה מְּעַט, חַכֵּה – אָמְרָה כְּמוֹ מִקֹּצֶר רוּחַ וַתּוֹסֶף וַתִּתְקַע אֶת מַבָּטֶיהָ בָּרוֹכֵב.

וַיְחַכֶּה הָאִישׁ רֶגַע וְהוּא מִשְׁתָּאֶה לָהּ. וְאַחַר אָמַר: הֲמַהֲתַלּוֹת עִמָּךְ אוֹ כִּי חוֹלַת רוּחַ אַתְּ?

– לֹא, אֲדוֹנִי, לֹא זֹאת. שְׁמַע לְקוֹלִי. שׁוּב מִדַּרְכֶּךְ. אַל תֵּלֵךְ בְּדֶרֶךְ אָמַרְתָּ לֶכֶת. שָׁם בַּגַּיְא לְיַד הַצּוּרִים הַתְּלוּלִים אַרְבָּעָה שׁוֹדְדִים יֶאֶרְבוּ לְךָ לְהַכּוֹתְךָ נֶפֶשׁ וְלָקַחַת אֶת כַּסְפְּךָ אֲשֶׁר בְּצִקְלוֹנְךָ – שׁוּבָה אֵפוֹא! וְאִם לֹא תַּאֲמִין לִדְבָרַי קַח עִמְּךָ עֲשָׂרָה אַנְשֵׁי חַיִל וְיִלָּווּ אֵלֶיךָ וְיָדַעְתָּ וְנוֹכַחְתָּ כִּי נְכוֹנָה אֲדַבֵּר.

וַיְהִי כִּי שָׁמַע הָאִישׁ אֶת תֹּקֶף דְּבָרָהּ וְרָאָה וְהִבִּיט אֶל פְּנֵי הַנַּעֲרָה הַחֲמוּדִים וְהַזּוֹהֲרִים וַיִתְגַּנֵּב פַּחַד אֶל לִבּוֹ מִדְּבַר פִּיהָ וְגַם נִכְסַף לָדַעַת הַרוּחַ אֱלֹהִים יְדַבֵּר מִפִּי הַנַּעֲרָה אוֹ כִּי הִיא אַחַת הָאֶבְיוֹנוֹת אֲשֶׁר בַּדְּרָכִים – ויַּעַן הָאִישׁ וַיֹּאמַר: טוֹב אֵפוֹא, כִּדְבָרַיִךְ אֶעֱשֶׂה וַאֲנַסֶּה.

וַיָּשָׁב הָעִירָה וַיִּקַּח דְּבָרִים עִם עֲשָׂרָה פָּרָשִׂים אַנְשֵׁי חַיִל כִּי יִתְחַפְּשׂוּ כַּאֲנָשִׁים כְּנַעֲנִים. חֵלֶק מֵהֶם יַעַבְרוּ כְּמוֹ לְתֻמָּם וְיַקְדִּימוּ לָאִישׁ הָרוֹכֵב וְחֵלֶק יֵלְכוּ אַחֲרָיו בַּסֵּתֶר הַרְחֵק מְעַט מִמֶּנּוּ

עַד מְהֵרָה עָרְכוּ מַהֲלָכָם כַּאֲשֶׁר דֻּבַּר בֵּינֵיהֶם.

וַיְהִי אַךְ רָאוּ הָאוֹרְבִים בִּקְרוֹב הָרוֹכֵב לְבַדּוֹ וַיֵּרְדוּ חֶרֶשׁ וַיָּגִיחוּ מִמַּאֲרָבָם וַיִּשְׁלְפוּ חַרְבָּם וַיֵּלְכוּ הָלוֹךְ וְקָרוֹב אֵלָיו. אָז יִתֵּן הָאִישׁ קוֹלוֹ קוֹל חָזָק לְמַעַן יִשְׁמְעוּ מְלַוָּיו – וַיִּדְהֲרוּ מִזֶּה וּמִזֶּה וַיַּחְסְמוּ אֶת הַדֶּרֶךְ לִפְנֵי הַשּׁוֹדְדִים וַיִּתְפְּשׂוּם וְחַרְבָּם שְׁלוּפָה בְּיָדָם וַיְּבִיאוּם אֲסוּרִים בַּחֲבָלִים אֶל בֵּית הַמִּשְׁפָּט.

וְהַנַּעֲרָה יָשְׁבָה בַּחֹרֶשׁ וַתֵּרֶא בַּעֲבוֹר הָאֲנָשִׁים לְיָדָהּ – ןַתִּפֹּל אַפַּיִם אַרְצָה וַתּוֹדֶה לֵאלֹהִים עַל חַסְדּוֹ הַגָּדוֹל עִמָּהּ.

וַיְהִי כִּי אָמְרָה לָקוּם לָשׁוּב אֶל בֵּיתָהּ וַתֵּרֶא לִקְרָאתָהּ וְהִנֵּה אִשָּׁה רוֹכֶבֶת עַל חֲמוֹרָהּ וְהִיא מִתְיַפַּחַת בְּבִכְיָהּ וְהָאִשָּׁה לְבוּשָׁה כְּמִשְׁפַּט נְשֵׁי הָאִכָּרִים הָאֲרַמִּים וַתֵּדַע כִּי אִכָּרָה הִיא.

וַיְהִי כִּי נָתְנָה עֵינֶיהָ בָּאִשָּׁה הַבּוֹכָה וַיֵּצֶר לְלֵב הַנַּעֲרָה וַתֹּאמֶר לָהּ: קִרְבִי אֵלָי אִשָּׁה וְאֶרְאֶה אוּלַי אוּכַל עֲזוֹר לָךְ.

וַתַּעַן הָאִשָּׁה וַתֹּאמֶר לָהּ: אַל תַּעַצְרִינִי, נַעֲרָה, כִּי מָרַת נֶפֶשׁ אָנֹכִי.

– שְׁעִי אֵלַי אַךְ רֶגַע – וְצַפִּי לְרַחֲמֵי אֱלֹהִים.

וַיְהִי כִּי נָחוּ מַבָּטֶיהָ עַל פְּנֵי הָאִשָּׁה וַתֹּאמֶר לָהּ:

– יָדַעְתִּי, אִשָּׁה, יָדַעְתִּי. זֶה עַתָּה, לְעֵת הַבֹּקֶר, הִכִּישׁ נָחָש אֶת אִישֵׁךְ בְּרַגְלוֹ בְּהַחִלּוֹ לַעֲדוֹר בָּאֲדָמָה – הַאֵין זֹאת? אָכֵן עָצְמוּ מַכְאוֹבָיו וְהַמָּוֶת צָפוּי לוֹ. יָדַעְתִּי. וְאַתְּ נֶחְפָּזָה לְהָבִיא לוֹ צֳרִי מֵחֲנוּת הַבֹּשֶׂם. – אֲבָל אַל תִּירְאִי, אִשָּׁה. שׁוּבִי חִישׁ אֶל בֵּיתֵךְ וְקִטְפִי מִן הָעֵשֶׂב הַכֵּהֶה הָעוֹלֶה בַּפִּנָּה אֲשֵׁר בְּיַרְכְּתֵי כַּרְמֵךְ מִיָּמִין. בַּשְׁלִי אוֹתוֹ בְּמַיִם וְהַשְׁקִי בָּהֶם אֶת אִישֵׁךְ וְגַם רַחֲצִי בַּמַּיִם הָאֵלֶּה אֶת הַפֶּצַע – וְיֵרָפֵא וְיֶחִי.

– הַאֻמְנָם? הֲבַת אֱלֹהִים אַתְּ? הֵן רְחוֹקָה אֲחֻזָתִי מִפֹּה כִּבְרַת אֶרֶץ וְאֵיכָה יָדַעַתְּ וְרָאִית כְּכָל אֲשֶׁר קָרָה?

וַתֹּאמֶר הַנַּעֲרָה: חוּשִׁי אִשָּׁה וְהַצִּילִי אֶת נֶפֶשׁ אִישֵׁךְ.

וּדְבוֹרָה צָעֲדָה לְאִטָּהּ הָלוֹךְ וָשׁוֹב, כֹּה וָכֹה בְּחֹרֶשׁ הַתְּמָרִים וְהָיוּ כָּל מַעְיְנוֹת נַפְשָׁהּ רָנִים בְּקִרְבָּהּ וּשְׂפָתֶיהָ דוֹבְבוֹת חֶרֶשׁ שִׁירָה נִשְׂגָּבָה וְתַעֲצוּמוֹת תְּהִלָּה לֵאלֹהֵי יִשְׂרָאֵל כְּמוֹ הָיָה פִּיהָ מַעְיַן־מַיִם עַזִּים הַשּׁוֹלֵחַ מֵימָיו חוּצָה לְלֹא הֲפוּגוֹת.

וַיְהִי לְעֵת הַצָּהֳרַיִם כִּי יָצְאָה דְבוֹרָה אֶת הַחֹרֶשׁ וַתֵּדַע וַתָּחָשׁ כִּי נָתַן ה' לֵב אַחֵר בְּקִרְבָּה.

אָז תָּסוּר לְאִטָּהּ אֶל בֵּיתָהּ וַתִּצְעַד דּוֹמְמָה וּמְצַפָּה לְהָבִיא מַרְפֵּא לְאִמָּהּ מֵחָלְיָהּ. וַיְהִי כִּי קָרְבָה אֶל עֶרֶשׂ אִמָּהּ וַתֹּאמֶר לָהּ:

– הָבִי, אִמִּי, אֶת יָדֵךְ וְהִתְחַזְּקִי וְרָפָא לָךְ וְקַמְתְּ מֵחָלְיֵךְ.

וַתּוֹשֶׁט הָאֵם אֶת יָדָהּ טֶרֶם תֵּדַע מַה פֵּשֶׁר הַדְּבָרִים אֲשֶׁר בְּפִיהָ.

וַיְהִי בְּגַעַת יָדָהּ בְּיַד הַנַּעֲרָה וַתִּתְיַשֵּׁר בְּמִטָּתָהּ וַתּוֹרֶד רַגְלֶיהָ אַרְצָה וַתָּקָם כְּמוֹ לֹא הָיָה לָהּ דָבָר וְאוֹר צָהֳלָה בְּפָנֶיהָ.

וְעוֹד הָאֵם עַל בָּנֶיהָ מִשְׁתָּאִים לְמַרְאֵה עֵינֵיהֶם – וְהִנֵּה אִישׁ אֲרַמִּי נִכְבָּד, גָּבוֹהַּ וּרְחַב כְּתֵפַיִם, נִכְנַס וַיִּשְׁאַל:

– הֲפֹה תָגוּר הַנַּעֲרָה הָעִבְרִיָּה?

וַתֵּתַצַּב דְּבוֹרָה לְפָנָיו.

– הַגִּידִי, בַּת אֱלֹהִים, – אָמַר בְּשִׂמְחָה – מַה מַשְׂכֻּרְתֵּךְ אֲשֶׁר תִּדְרְשִׁי מֵעִמִּי כִּי נָתַתְּ נַפְשִׁי לִי לְשָׁלָל. הַרְבִּי עָלַי אֶת שְׂכָרֵךְ וְאֶתְּנֶנּוּ כִּי הִגְדַּלְתְּ חַסְדֵּךְ עִמָדִי.

וַתַּעַן דְּבוֹרָה לֵאמֹר: לֹא בִּגְלַל שָׂכָר פָּעַלְתִּי אֶת אֲשֶׁר פָּעַלְתִּי וְלֹא אֶדְרֹשׁ שָׂכָר לְפָעֳלִי. אֲשֶׁר תִּתֵּן מֵחֶפְצְךָ כְּכָל אֲשֶׁר תִּתֵּן אֶקַּח – וְהָלַכְתָּ לְשָׁלוֹם לְדַרְכְּךָ.

וַיִּקַּח הָאִישׁ מְלוֹא חָפְנוֹ שִׁקְלֵי זָהָב וַיְשִׂימֵם בֵּין יְדֵי הַנַּעֲרָה וַיִּשַּׁק אֶת יָדָהּ וַיֵּצֵא לְדַרְכּוֹ.

עוֹד זֶה יוֹצֵא וְזֹאת בָּאָה הִיא הָאִשָּׁה הַיּוֹגְבָה וַתִּפֹּל לְרַגְלֵי הַנַּעֲרָה וַתֹּאמַר: יְהִי שְׁמֵךְ מְבֹרָךְ, חֶמְדַּת כָּל הָאֵלִים, הֵן נוֹשַׁע אִישִׁי וַיָּקָם עַל רַגְלָיו, וְעַתָּה הוֹאִילִי וּקְחִי הַמַּשְׂאֵת הַזֹּאת מֵעִמִּי. וַתֵּצֵא וַתּוֹרֶד מֵעַל חֲמוֹרָהּ עֶשְׂרִים לֶחֶם וְצִנְצֶנֶת דְּבַשׁ גְּדוֹלָה וַחֲרִיצֵי גְּבִינָה וּתְאֵנִים וְצִמּוּקִים לָרֹב.

וַתָּקָם וַתֵּצֵא לְדַרְכָּהּ לְשָׁלוֹם.

אָז תַּגִּיד דְּבוֹרָה לְאִמָּהּ וּלְאַחֶיהָ אֶת הַקּוֹרוֹת אֲשֶׁר לָאֲרַמִּי וַאֲשֶׁר לָאִשָּׁה וְאֶת אֲשֶׁר הִגִּידָה לָהֶם. וַתְּסַפֵּר לְאָזְנָם אֶת אֲשֶׁר צָמָה וּבָכְתָה, וַאֲשֶׁר נֶעְתַּר לָהּ אֱלֹהֵי יִשְׂרָאֵל וַאֲשֶׁר צִוָּה עָלֶיהָ הַמַּלְאָךְ בַּחֲלוֹמָהּ כִּי דְּבוֹרָה יִהְיֶה שְׁמָהּ, וְאוּלָם אֶת דִּבְרֵי מַלְאַךְ הָאֱלֹהִים כִּי רוּחַ מִמָּרוֹם יִהְיֶה בְּרוּחָהּ לֹא הִגִּידָה לָהֶם פֶּן יָרוּם לִבָּהּ בְּקִרְבָּהּ בְּהוֹצִיאָהּ מִפִּיהָ דְבַר הֶחָזוֹן אֲשֶׁר הָיָה לָהּ מֵאֵת אֱלֹהֵי יִשְׂרָאֵל.

וַיְהִי בְּהִשָּׁמַע דְּבַר הַנְּבִיאָה הַיִּשְׂרְאֵלִית הַקְּטַנָּה אֲשֶׁר תְּגַלֶּה צְפוּנוֹת, תַּגִּיד עֲתִידוֹת וּתְרַפֵּא מַחֲלוֹת – וַיִּנְהֲרוּ רַבִּים, אִישׁ וְאִשָּׁה, נַעַר וְזָקֵן, וַיָּבוֹאוּ אֶל הַנַּעֲרָה לַחֲזוֹת בְּפָנֶיהָ וְלִדְרוֹשׁ עֲצָתָהּ מִי לְחָלְיוֹ וּמִי לְשִׁבְרוֹ, מִי לְחֶפְצוֹ וּמִי לִתְשׁוּקָתוֹ.

וְאוּלָם לֹא אֶל כָּל אִישׁ נֶעֶתְרָה הַנְּבִיאָה הַקְּטַנָּה לַעֲנוֹת לָהֶם כְּחֶפְצָם. וְגַם אֶל אֵלֶּה אֲשֶׁר חָפְצוּ לָדַעַת קְטַנּוֹת אוֹ נִקְלוֹת – לֹא הִגִּידָה דָבָר וַחֲצִי דָבָר. וְרַק לְאִישׁ־מָצוֹק וּמַר נֶפֶשׁ הֵאִירָה פָּנֶיהָ וַתֹּאמֶר עֵצָה וַתַּגֵּשׁ תְּשׁוּבָה.

וְאַף זֹאת לֹא בְּבֵיתָהּ פָּעֲלָה, וְלֹא בְּכָל עֵת וָעֵת. כִּי לֹא פָּקַד אוֹתָהּ חֲזוֹן וְלֹא הֻשָּׂא לָהּ מַשָּׁא כִּי אִם בְּשִׁבְתָּהּ תַּחַת הַתֹּמֶר בַּמָּקוֹם אֲשֶׁר נִגְלָה אֵלֶיהָ הֶחָזוֹן הָרִאשׁוֹן.

וְזֶה מִשְׁפָּטָהּ כָּל הַיָּמִים: עִם שַׁחַר, בַּעֲלוֹת הַשֶּׁמֶשׁ, לָבְשָׁה מַדֶּיהָ הַלְּבָנִים וַתֵּצֵא אֶל תַּחַת הַתֹּמֶר וַתִּפֹּל עַל בִּרְכֶּיהָ וַתַּעְתֵּר שִׂיחַ לֵאלֹהֵי יִשְׂרָאֵל וְאַחַר עָנְתָה לְאִישׁ וָאִישׁ כִּדְבָרוֹ. יֵשׁ וְהוֹכִיחָה קָשׁוֹת וְנִמְרָצוֹת אֶת פּוֹעֲלֵי הָאָוֶן, הַבָּאִים כְּמִתְחַפְּשִׂים לָדַעַת דָּבָר מִפִּיהָ, וְגִלְּתָה מְזִמָּתָם וְקָרְעָה סִתְרַת־לִבָּם וַתְּשִׂימֵם כַּעֲרֻמִּים בְּחֶרְפָּתָם. וְיֵשׁ וְדִבְּרָה טוֹבוֹת וְהִשְׁמִיעָה נֶחָמוֹת וְעָשְׂתָה פְּלָאוֹת לְאִישׁ אֲשֶׁר לֵב נָכוֹן בְּקִרְבּוֹ.

וַיִּקְרְאוּ לָהּ עַם הָאָרֶץ “הַדְּבוֹרָה” וְכֵן אָמְרוּ: “לְכוּ וְנֵלְכָה אֶל הַדְּבוֹרָה הַנְּבִיאָה”.

וְיוֹם יוֹם רַבּוּ הַמַּשָּׂאוֹת אֲשֶׁר הֵבִיאוּ אֵלֶיהָ בְּתוֹדָה וּבְאַהֲבָה כָּל אִישׁ אֲשֶׁר הֵיטִיבָה עִמּוֹ וְהוֹשִׁיעָה לוֹ.

וַיִּיטַב לְאִמָּהּ וּלְאַחֶיהָ בִּגְלָלָהּ וַיְהִי לָהֶם דֵּי מַחְסוֹרָם וְהוֹתֵר, וַיְהִי לָהֶם גַּם כֶּסֶף וְזָהָב וְגַם מִקְנֶה, וַיָּשִׂימוּ מִשְׁכְּנָם בְּבַיִת בָּנוּי אֶבֶן לִרְוָחָה. וְאֶת פִּי הַנַּעֲרָה שָׁמְרוּ הָאַחִים וְהָאֵם כְּכָל אֲשֶׁר תֹּאמַר וּכְּכָל אֲשֶׁר תְּצַוֶּה וַיֵּדְעוּ לָהּ אַהֲבָה וִיקָר עַל עַנְוַת־רוּחָהּ וְתֹּם־לִבָּהּ, עַל מֹתֶק לְשׁוֹנָהּ וְעֹז רוּחָהּ.

ה. אוֹת וּמוֹפֵת בְּאַרְמוֹן הַמֶּלֶךְ    🔗

וַיְהִי כִּי חָלְפוּ שָׁלֹשׁ וְאַרְבַּע שָׁנִים, וַתִּגְדַּל דְּבוֹרָה וַתְּהִי נַעֲרָה חֲמוּדַת מַרְאֶה, יְפַת עֵינַיִם וּגְדוֹלַת נֶפֶשׁ וַיִּשְׁתָּאוּ לָהּ כָּל רוֹאֶיהָ וַיֵּצֵא שְׁמָהּ בְּכָל הָאָרֶץ.

וְהָאַחִים הַנְּעָרִים הָיוּ לְבַחוּרֵי חֶמֶד וְשֵׁם לָהֶם וּזְרוֹעַ לָהֶם עִם גְּבוּרָה לִשְׁמֹר עַל אֲחוֹתָם וּלְמַלֵּא דְבַר פִּיהָ כְּכָל אֲשֶׁר תְּצַוֵּם.

וְאוּלָם אַחַת נִבְצְרָה מִן הָאַחִים וּמִן הָאֵם לְהָבִין: אֲשֶׁר לֹא נֵאוֹתָה דְבוֹרָה לְחֵפֶץ הָאֵם וְהָאַחִים כִּי תְּבַקֵּשׁ אֶת דְּבַר הַמֶּלֶךְ אֲשֶׁר בַּאֲרַם צוֹבָא כִּי יֻתַּן לָהֶם לָשׁוּב אֶל אֶרֶץ מְגוּרֵי אֲבוֹתֵיהֶם בֵּין שִׁבְטֵי יִשְׂרָאֵל. רַבּוֹת אָמְרוּ לְאָזְנֵי דְבוֹרָה: הִנֵּה בִּרְכַּת אֱלֹהִים עָלֵינוּ וַנַּעַשׂ רְכוּשׁ בְּכֶסֶף וּבְזָהָב וְגַם מִקְנֶה לָנוּ דַיֵּנוּ. וְעַתָּה לָמָּה נִתְמַהְמַהּ עוֹד בַּנֵּכָר וְלָמָּה לֹא יִיטַב לִבְנֵי יִשְׂרָאֵל מִן הָרוּחַ הַטּוֹבָה אֲשֶׁר לָךְ?

וַיְהִי דְבָרָהּ לֵאמֹר: עוֹד חָזוֹן לַמּוֹעֵד. חַכּוּ לִי עַד בּוֹא הַיּוֹם. כִּי גָדוֹל חֶפְצִי מֵחֶפְצְכֶם בַּדָּבָר הַזֶּה – אַךְ עָלַי לְחַכּוֹת עַד בּוֹא הַיּוֹם.

וַיַּקְשִׁיבוּ הָאַחִים לִדְבָרָהּ וַיַּחֲרִישׁוּ כִּי אָמְרוּ: הֵן דְּבַר אֱלֹהִים עִמָּהּ וְיָדוֹעַ תֵּדַע אֶת אֲשֶׁר לְפָנֶיהָ.

בַּיָּמִים הָהֵם – וַתַּעֲבֹר פִּתְאֹם סַעֲרַת מִלְחָמָה בְּאֶרֶץ אֲרָם. בְּנֵי הַצָּפוֹן עֵילַמִּים וְאַרְפַּכְשַׁדִּים גָּבְרוּ חַיִל וַיֵּרְדוּ מִן הֶהָרִים אֲשֶׁר בַּצָּפוֹן כַּחוֹל אֲשֶׁר עַל שְׂפַת הַיָּם וּפְנֵיהֶם אֲרַמָּה. – וַתְּהִי חֲתַת הָעַמִּים הָעַזִּים הָאֵלֶּה עַל אֲרָם. אָז יָקוּם הַמֶּלֶךְ רַעַמְאֵל הַיּוֹשֵׁב בַּאֲרָם צוֹבָא וְיִתֵּן צַו בְּכָל רַחֲבֵי מַמְלַכְתּוֹ לֵאמֹר: כָּל בָּחוּר תּוֹפֵס חֶרֶב בַּאֲרַם – לַמִּלְחָמָה! וְכָל אֲשֶׁר יַעֲבֹר עַל מִצְוַת הַמֶּלֶךְ – מוֹת יוּמַת. וַיָּרֶק הַמֶּלֶךְ אֶת צִבְאוֹתָיו רוֹכְבֵי הַסּוּסִים וְרוֹכְבֵי הַגְּמַלִּים וְחַיִל רַגְלִי הַרְבֵּה מְאֹד.

וַיְהִי בְּבוֹא דְבַר הַמֶּלֶךְ אֶל אֲרַם דַּמֶּשֶׂק וַתֵּצֵא דְבוֹרָה לְעֵת הַשַּׁחַר לִקְרַאת הָאֱלֹהִים אֶל חֹרֶשׁ הַתְּמָרִים וַתֶּעְתַּר לָאֵל לָדַעַת אֶת אֲשֶׁר יִהְיֶה בִּדְבַר הַמִּלְחָמָה וּבִדְבַר אַחֶיהָ הַנִּדְרָשִׁים גַּם הֵמָּה כְּכָל בְּנֵי הָעָם לָצֵאת לַקְּרָב.

וַיְצַפּוּ לָהּ הָאֵם וְהָאַחִים עֵת רַבָּה – עַד שׁוּבָהּ. וַיְהִי בְּבוֹאָהּ – וְעֵינֶיהָ אָדְמוּ מִבֶּכִי וּפָנֶיהָ אֲפֵלִים מֵעֶצֶב. אַךְ אֶת דְּבָרָה אָמְרָה קוֹל גּוֹזֵר בְּלִי תְפוּנָה:

– צְאוּ גַם אתֶּם, אַחַי, לַקְּרָב כִּי מִצְוַת מֶלֶךְ הִיא עַל כָּל בְּנֵי הָאָרֶץ הַזֹּאת, וַאֲנַחְנוּ, אִם כִּי בְּנֵי יִשְׁרָאֵל אָנוּ הֵן הִסְתּוֹפֵף נִסְתּוֹפֵף מֵאָז בָּאָרֶץ הַזֹּאת, וְשׂוּמָה עָלֵינוּ לְמַלֵּא אֶת דְּבַר הַמֶּלֶךְ כַּאֲשֶׁר יְמַלְאוּהוּ כָּל עֲבָדָיו. מֵאֵת הָאֱלֹהִים הָיְתָה זֹאת וְאֵין לְהָשִׁיב. וְאוּלָם לֹא תִּפְאָרָה וְלֹא נִצָּחוֹן יִקְצֹר הַמֶּלֶךְ רַעַמְאֵל בַּמִּלְחָמָה הַזֹּאת כִּי עַוְלָה בְּיָדָיו וְרַבָּה רִשְׁעַת לִבּוֹ. עַל כֵּן בְּדֶרֶך אַחַת יַעֲלֶה לִקְרַאת הָאוֹיֵב וּבְשֶׁבַע דְּרָכִים – יָנוּס.

וְאוּלָם עַל גּוֹרַל אַחֶיהָ לֹא אָמְרָה דָבָר וְהֶחֱרִישָׁה.

וַיֵּצְאוּ הָאַחִים לְדַרְכָּם עִם גְּדוּדֵי בַּחוּרֵי הָעִיר וּפְנֵיהֶם לַקְּרָב.

וְהַמִּלְחָמָה נִטְּשָׁה בְּכָל גְּבוּלוֹת הָאָרֶץ מִצָּפוֹן. וַיָּקָם וַיְהִי כְּכָל אֲשֶׁר חָזְתָה דְבוֹרָה – כִּי תְּבוּסָה אַחַר תְּבוּסָה הָיְתָה מְנַת חֶלְקָם שֶׁל אֲרַמִּים. וַיִּהְיוּ הַנּוֹפְלִים מִן הָאֲרַמִּים בַּמַּעֲרָכָה הָרִאשׁוֹנָה עֲשֶׂרֶת אֲלָפִים בָּחוּר שׁוֹלֵף חֶרֶב וְגַם אֲחִי דְבוֹרָה הַבְּכוֹר נָפַל חָלָל בַּמִּלְחָמָה.

וַיּוֹסֶף רַעַמְאֵל וַיִּשְׁלַח לִקְרַאת הָאוֹיֵב גְּדוּדֵי חַיִל חֲדָשִׁים רַבִּים וְכֵן שְׁלֵמִים. וַיְהִי גוֹרָלָם כְּגוֹרַל הָרִאשׁוֹנִים – וַיֶּחֱרַד הַמֶּלֶךְ מְאֹד.

וַיָּבוֹא אֶחָד מֵעַבְדֵי הַמֶּלֶךְ, אִישׁ כּוֹזֵב וְרַע לֵב, וַיַּגֵּד לַמֶּלֶךְ: אַחֲלֵי פְּנֵי אֲדוֹנִי הַמֶּלֶךְ וַאֲדַבְּרָה דָבָר.

וַיֹּאמֶר: דַּבֵּר.

וַיַּגֵּד הָאִישׁ לֵאמֹר: אַל יִפָּלֵא בְּעֵינֵי הַמֶּלֶךְ כִּי כָּשְׁלוּ צִבְאוֹתָיו גַם פַּעַם וְגַם פַּעֲמַיִם – כִּי זֹאת עָשְׁתָה הַנַּעֲרָה הַנְּבִיאָה הַיִּשְׂרְאֵלִית אֲשֶׁר קִלְלָה אֶת הַמֶּלֶךְ וְאֶת צִבְאוֹתָיו לֵאמֹר: בְּדֶרֶךְ אַחַת יֵצְאוּ לִפְנֵי הָאוֹיֵב וּבְשֶׁבַע יָנוּסוּ מִלְּפָנָיו.

וַיִּרְגַּז הַמֶּלֶךְ רַעַמְאֵל לֵאמֹר:

– מִי זֹאת הַנְּבִיאָה הַיִּשְׂרְאֵלִית וְאַיֵּה מְקוֹמָהּ?

– בַּאֲרַם דַּמֶּשֶׂק תָּגוּר – וְרַבִּים הַיְרֵאִים דְּבָרָה וְהַסָּרִים לְמִשְׁמַעְתָּהּ וְכֵאלֹהִים הִיא בְּעֵינֵי אֲרַמִּים…

וַיֹּאמֶר הַמֶּלֶךְ: צְאוּ חִישׁ מַהֵר דַּמַּשְׂקָה וַהֲבִיאוּהָ רְתוּקָה בְּכַבְלֵי בַּרְזֶל לְפָנָי!

וַיְהִי בַּיּוֹם הַשְּׂלִישִׁי לְעֵת עַרְבַּיִם וַיָּשׁוּבוּ עַבְדֵּי הַמֶּלֶךְ מִדַּרְכָּם וַיָּבִיאוּ אֶת הַנַּעֲרָה רְתוּקָה בְּכַבְלֵי בַּרְזֶל – וְהַמֶּלֶךְ עַל כִּסְאוֹ וְהָאוּלָם מָלֵא שָׂרִים רַבִּים מִן הַקָּצֶה אֶל הַקָּצֶה.

וַיִּתֵּן הַמֶּלֶךְ עֵינָיו בַּנַּעֲרָה וַיַּבֵּט אֶל יָפְיָהּ וְאֶל תַּלְתַּלֵּי שַׂעֲרוֹתֶיהָ הַיּוֹרְדִים מִתַּחַת לְמָתְנֶיהָ. וַתִּפֹּל דְּמָמָה גְדוֹלָה בָּאוּלָם.

וַיַּרְעֵם הַמֶּלֶךְ קוֹלוֹ לֵאמֹר:

– הַאַתְּ אֲשֶׁר קִלַּלְתְּ אֶת צִבְאוֹתֵינוּ כִּי יִנָּגְפוּ לִפְנֵי הָאוֹיֵב?

– לֹא קִלַּלְתִּי, אֲדוֹנִי הַמֶּלֶךְ, כִּי נִבֵּאתִי.

– נִבֵּאת? – אָמַר בְּלַעַג וָבוּז – מַה נִּבֵּאת וּמִי אַתְּ כִּי תִּנָּבְאִי? 

– נִבֵּאתִי אֶת אֲשֶׁר שָׂם אֱלֹהַי בְּפִי לֵאמֹר: לֹא תִפְאָרָה וְלֹא נִצָּחוֹן יִקְצֹר הַמֶּלֶךְ רַעַמְאֵל בְּמִלְחַמְתּוֹ, כִּי עַוְלָה בְּיָדוֹ וְרַבָּה רִשְׁעַת לִבּוֹ.

– הוֹי נַעֲרָה נְמִבְזָה, אֵיכָה תָעֵזִּי לְדַבֵּר כָּזֹאת בְּאָזְנֵי מֶלֶךְ? הֵן בַּת מָוֶת אַתְּ כִּי בּוֹגֶדֶת אַתְּ!

– לֹא בּוֹגֶדֶת אָנִי, כִּי בִּדְבָרִי יָצְאוּ שְׁנֵי אַחַי לַמִּלְחָמָה כְּכָל עֲבָדֶיךָ – וַיִּפֹּל הָאֶחָד חָלָל וְיָדַעְתִּי כִּי יִפֹּל חָלָל –

– אֲבָל מְכַשֵּׁפָה אַתְּ וּבִכְשָׁפַיִךְ תָּמוּתִי!

– בִּידֵי אֵל עֶלְיוֹן אַפְקִיד רוּחִי וְהוּא יִנְקֹם דָּמִי מִיָּדֵיךְ!

אָז יִזְעַם הַמֶּלֶךְ וַיִּקְרָא:

– הַטַּבָּח!

וַיִּקְרַב הַטַּבָּח.

– כְּרֹת רֹאשָׁה פֹּה לְפָנַי – וְתֵאָלֵם!

וַיִּשְׁלֹף הַטַּבָּח אֶת חַרְבּוֹ וַיְנִיפָהּ וַיֹּאמֶר לְהוֹרִידָהּ עַל צַוָּארָהּ – וַתִּיבַשׁ יָדוֹ אֲשֶׁר שָׁלַח עָלֶיהָ וְלֹא יָכֹל לַהֲשִׁיבָהּ אֵלָיו.

וַיִּגְעַר הַמֶּלֶךְ לֵאמֹר: הַכֵּה הֲלֹא צִוִּיתִיךָ!

– לֹא אוּכַל, אֲדוֹנִי הַמֶּלֶךְ… לֹא אוּכַל… וַיִּרְעַד קוֹלוֹ מֵחֲרָדָה.

– מֶה הָיְתָה לְךָ, הַטַּבָּח?

– רְאֵה, אֲדוֹנִי הַמֶּלֶךְ, לְיָדִי, רְאֵה…

וַיַּחְפֹּז הַמֶּלֶךְ וַיִּקְרַב וַיָּשֶׂם יָדוֹ בִּזְרוֹעַ הַטַּבָּח וַיַּרְא וְהִנֵּה קָשָׁה הַזְּרוֹעַ כְּסֶלַע וְקָרָה כְּקֶרַח. וַיֵּרָתַע אָחוֹר וַיִּפְקַח עֵינָיו וַיַּבֵּט כֹּה וָכֹה וַיֶּחֱרַד… וְאוּלָם מְהֵרָה שָׁב שֵׁנִית וַיֶּאֱזֹר חֵילָיו וַיְאַמֵּץ קוֹלוֹ וַיִּקְרָא:

– יָבוֹא מִשְׁנֵה שַׂר הַטַּבָּחִים!

וַיָּבוֹא.

– תְּקַע חַרְבְּךָ בְּבִטְנָהּ וְרַטֵּשׁ מֵעֶיהָ, חִישׁ מַהֵר!

וַיִּשְׁלֹף הַלָּז חַרְבּוֹ בְּחָפְזָה וַיִּכֹּף גַּבּוֹ לְמַעַן כּוֹנֵן חַרְבּוֹ לִקְרַאת הַנַּעֲרָה – וַיִּזְעַק קוֹל גָּדוֹל מִכְּאֵב – וַיִּשָּׁאֵר כָּפוּף כְּאִישׁ נוֹשֵׂא מַשָּׂא כָּבֵד וְלֹא יָכֹל לְהָנִיעַ יָדוֹ כֹּה וָכֹה.

וּדְבוֹרָה נִצְּבָה כָּל הָעֵת דּוֹמְמָה וְשְׁקֵטָה לִפְנֵי הַמֶּלֶךְ, רֹאשָׁהּ נָטוּי אֶל עָל וַתַּבֵּט יְשָׁרוֹת אֶל פְּנֵי הַמֶּלֶךְ.

וְהַמֶּלֶךְ נָסוֹג לְאִטּוֹ אֶל מוֹשָׁבוֹ וְרֹאשׁוֹ מוּרָד מִדְּאָגָה וּמִיָּגוֹן וּפָנָיו אֲחוּזֵי חִוָּרוֹן.

אָז יָקוּם גְּדוֹל־הַכֹּהֲנִים אֲשֶׁר לַמֶּלֶךְ וַיֹּאמַר:

– יַקְשִׁיב נָא הַמֶּלֶךְ לְבַקָּשָׁתִי וַאֲדַבֵּרָה.

וַיִּתֶּן לוֹ הַמֶּלֶךְ אוֹת בְּיָדוֹ כִּי יְדַבֵּר.

– לֹא אָפוּנֶה, אֲדוֹנִי הַמֶּלֶךְ – אָמַר הַכֹּהֵן קוֹל נַחַת – אֵין הַנַּעֲרָה הַזֹּאת מְכַשֵׁפָה: נְבִיאָה הִיא. שָׁמוֹעַ שָׁמַעְנוּ עַל בְּנֵי יִשְׂרָאֵל כִּי נְבִיאִים לָמוֹ וְהֵם יוֹדְעִים דַּעַת אֱלֹהֵיהֶם. זֹאת הַפַּעַם נְבִיאָה הִיא. עֲצָתִי לַמֶּלֶךְ אֲשֶׁר יְצַוֶּה לְהָסִיר כְּבָלֶיהָ מִיָּדֶיהָ וּלְבַקֵּשׁ עֵצָה וְתוּשִׁיָה מִפִּיהָ. וְאֶל נָכוֹן תֹּאבֶה לְמַלֵּא אַחַר דִּבְרֵי הַמֶּלֶךְ כִּי נַעֲלָה וְצַדִּיקָה הִיא הַנְּבִיאָה.

וַיַּעֲשׂוּ כֵּן.

אָז יָקוּם הַמֶּלֶךְ וֲיֹּאמֶר לַנַּעֲרָה לְאָזְנֵי כָּל: צָדַקְתְּ מִמֶּנִי, חָטָאתִי לְפָנַיִךְ. הִנְנִי וַאֲבַקֵּשׁ סְלִיחָה מֵעִמָּךְ. וַיֹּאמֶר הַמֶּלֶךְ לְהִשְׁתַּחֲווֹת לְפָנֶיהָ, וַתִּשְׁלַח יָדֶיהָ הַנַּעֲרָה וַתִּמְנָעֵהוּ מֵעֲשׂוֹת כֵּן וַיּוֹשִׁיבָהּ הַמֶּלֶךְ לִימִינוֹ וַיֹּאמֶר לָהּ: הַגִּידִי נָא, הַנְּבִיאָה, מַה פָּעֳלִי אֲשֶׁר עָלַי לַעֲשׂוֹת וְאַצִּילָה אֶת עַמִּי מֵחֶרְפָּה וַאֲבַדּוֹן? הַשְׁמִיעִינִי דְבָרַיִךְ וַאֲמַלְּאֵם.

וַתֹּאמֶר דְבוֹרָה: שְׁלוֹם הַמֶּלֶךְ יִשְׂגֶה לָעַד. דְּבַר אֱלֹהַי הָיָה לִי לֵאמֹר:

"כֹּה תֹּאמְרִי לְמֶּלֶךְ אֲרָם:

עַל אֲשֶׁר רָם לְבָבְךָ וְגָבְהוּ עֵינֶיךָ לִפְעוֹל וְלַעֲשׂוֹת כְּכָל הָעוֹלֶה עַל רוּחֲךָ שָׁלַחְתִּי עָלֶיךְ אֶת גּוֹיֵי הַצָּפוֹן הָעַזִּים לְהַשְׁפִּילְךָ וְלָשׂוּם כְּבוֹדְךָ לְמִרְמָס.

וְעַתָּה לֹא תִּהְיֶה לְךָ תְּקוּמָה לַפְנֵי אוֹיְבֶיךָ עַד אִם תִּכָּנַע לִפְנֵיהֶם וְשָׁלַחְתָּ אֲלֵיהֶם אֶת כַּסְפְּךָ וּזְהָבְךָ וְכָל אוֹצְרוֹתֶיךָ וְכָל מִקְנֵה הַצֹּאן וְהַבָּקָר וְהַגְּמַלִּים אֲשֶׁר לְךָ, וּמִן הָעָם לֹא תִּקַּח פַּרְסָה כִּי רַק אֶת אֲשֶׁר לְךָ תִּתֵּן.

וְהָיָה אִם תִּשְׁמֹר דְּבָרִי וְעָשִׂיתָ כְּכָל אֲשֶׁר צִוִּיתִיךָ וְשַׁבְתָּ בְּלִבְּךָ מִדַּרְכְּךָ הָרָעָה אָז אַרְחִיק מֵעָלֶיךָ אֶת אוֹיְבֶיךָ, וְהָיְתָה נַפְשְׁךָ וְנֶפֶשׁ עַמְךָ לְךָ לְשָׁלָל."

וְזֶה לְך הָאוֹת כִּי דְבַר אֱלֹהֵי יִשְׁרָאֵל בְּפִי:

הֵן הֶרְאָה ה' אוֹתְךָ בַּחֲלוֹמְךָ אֶמֶשׁ אָסוּר בִּכְבָלִים וְאַתָּה מוּבָל לְמַחֲנֵה הָאוֹיֵב. וְהָיָה לְךָ הַחֲלוֹם הַזֶּה לְאוֹת וּלְמוֹפֵת.

אָז יֹאמַר הַמֶּלֶךְ רְתֵת: אָכֵן צָדְקוּ דְבָרַיִךְ וְנָכוֹנוּ. כָּזֹאת רָאִיתִי בַּחֲלוֹמִי. עַתָּה יָדַעְתִּי כִּי גָדוֹל ה' אֱלֹהֵי יִשְׂרָאֵל מִכָּל הָאֱלֹהִים. הִנְנִי וְאֶעֱשֶׂה כְּכָל אֲשֶׁר צִוָּה עָלַי אֱלֹהַיִךְ.

אָז יִשְׁלַח הַמֶּלֶךְ רַעַמְאֵל בְּיַד מַלְאָכָיו דִבְרֵי שָׁלוֹם וְהַכְנָעָה אֶל מַלְכֵי הַצָּפוֹן, וַיַּגֵּד לָהֶם אֶת דְּבַר הַשָּׁלָל הָרַב הַנָּכוֹן לָהֶם – וַיֵּאוֹתוּ הַמְלָכִים לַדָּבָר.

וַיְהִי מְחִיר הַשִׁלּוּמִים אֲשֶׁר שָׁלַח רַעַמְאֵל לְמַלְכֵי הַצָּפוֹן – גְמַלִּים מְאַת אֶלֶף, וְסוּסִים חֲמִשִּׁים אֶלֶף, מִקְנֶה צֹאן וּבָקָר מִסְפָּר עָצוּם לָרֹב. וְכֶסֶף עֲשֶׂרֶת אֲלָפִים כִּכָּר, וְזָהָב שְׁנֵי אֲלָפִים כִּכָּר וַעֲדִי עֲדָיִים וְאַדָּרוֹת וּמַרְבַדִּים וְכָל שְׂכִיּוֹת חֶמְדָּה, מַשָּׂא כָּבֵד לִמְאֹד.

ו. אֱמוּנִים וְאַהֲבָה    🔗

וּדְבַר הָעַלְמָה הָעִבְרִית הַנְּבִיאָה נִשָּׂא בְּפִי כָּל אִישׁ אֲרָם וַיִּגְדַּל שְׁמָהּ בְּכָל הָאָרֶץ.

וְהַמֶּלֶךְ רַעַמְאֵל שָׁב מִדַּרְכּוֹ הָרָעָה וַיְהִי עוֹשֶׂה מִשְׁפָּט וְאוֹהֵב חֶסֶד. אַךְ כַּאֲשֶׁר אָזַל עָשְׁרוֹ וְדַלּוּ יָדָיו מִכָּל – נִבְצְרָה מִמֶּנוּ לִשְׁמוֹר וּלְהָגֵן עַל עַמּוֹ. וַיְהִי נְכֵה־רוּחַ וַיִּתְהַלֵּךְ עָצֵב וְנוּגֶה כָּל הַיָּמִים. וְאוּלָם לֹא נָשָׂא הַמֶּלֶךְ דְּבַר עַוְלָה בְּפִיו וְלֹא דִבֵּר סָרָה עַל אֱלֹהֵי יִשְׂרָאֵל מִכֹּל וָכֹל.

וַיְהִי כְּתֹם הַשָּׁנָה מֵאָז הֵיטִיב הַמֶּלֶךְ דַּרְכּוֹ, וַיִּשְׁלַח דְּבָרִים אֶל דְבוֹרָה בַּאֲרַם דַּמֶשֶּׂק לֵאמֹר:

“רְאִי נָא, הַנְּבִיאָה הַנַּעֲלָה, כִּי שָׁמוֹר שָׁמַרְתִּי מוֹצָא פִּי ה' וַאֲמַלֵּא דְבָרוֹ כְּכָל אֲשֶׁר צִוִּיתִינִי. וְאוּלָם עוּצִי לִי עֵצָה, הַנְּבִיאָה, אֵיכָה אֶעֱשֶּׂה מְלוּכָה וּבְיָדַי אֵין כֹּל וּמֵאָז הֱיוֹת אָדָם עַל פְּנֵי הָאָרֶץ לֹא הָיָה מֶלֶךְ דַּל וַחֲסַר כֹּל כָּמוֹנִי, וְהָיָה בְּהִוָּדַע זֹאת לָעַמִּים אֲשֶׁר סְבִיבִי וְעָלוּ עָלַי וְהִכּוּנִי וְהִשְׁמִידוּ אוֹתִי וְאֶת עַמִּי מֵעַל פְּנֵי הָאֲדָמָה. וְהֵן אֱלֹהֵי חֶסֶד וֶאֱלֹהֵי אֱמֶת אֱלֹהַיִךְ, הַיֹּאבֶה כִּי יֹאבַד אִישׁ שָׁב מֵחֶטְאוֹ בִּידֵי אַנְשֵׁי רֶשַׁע?”

וַתִּשְׁמַע דְּבוֹרָה הַנְּבִיאָה וַיִּכָּמְרוּ רַחֲמֶיהָ עַל הַמֶּלֶךְ – וַתֵּצֵא אֶל תַּחַת הַתֹּמֶר וַתִּתְחַנֵּן וַתְּשַׁוַּע לֵאלֹהִים יָמִים שְׁלֹשָׁה כִּי יַרְאֶה יָדוֹ וִיגַלֶּה חַסְדּוֹ לַמֶּלֶךְ רַעַמְאֵל לְמַעַן יִגְדַּל שֵׁם אֱלֹהֵי יִשְׁרָאֵל וְיַאֲמִינוּ כִּי ה' הוּא אֱלֹהֵי הָאֱלֹהִים וַאֲדוֹנֵי הָאֲדוֹנִים.

וַיְהִי בַּיּוֹם הָרְבִיעִי וַיֵּעָתֵר לָהּ ה' וַתָּקָם וַתִּסַּע אֲרַמָּה צוֹבָא אֶל אַרְמוֹן הַמֶּלֶךְ.

וַיְהִי כִּי רָאָה אוֹתָה הַמֶּלֶךְ וַיֹּאמַר: בָּרוּךְ בּוֹאֵךְ, נְבִיאַת הָאֱלֹהִים! מַה דְּבַר ה'?

וַתֹּאמַר: שְׁמַע, הַמֶּלֶךְ רַעַמְאֵל, וְהִכּוֹן אַתָּה וְעַמְּךָ לָשֵׁאת אֶת בִּרְכַּת ה' עַל אֲרָם. קוּם וְקַח עִמְּךָ גְדוּד אַנְשֵׁי חַיִל וְיָרַדְתָּ דָּרוֹמָה מִזְרָחָה מִן הֶהָרִים אֶל הַמִּישׁוֹר. וְהָיָה בְּבוֹאֲךָ שָׁמָּה וְהִנֵּה בִּקְעָה לְפָנֶיךָ. וּבַבִּקְעָה סַלְעֵי אֶבֶן גְּדוֹלִים וּקְטַנִּים פְּזוּרִים עַל פָּנֶיהָ. וּמַדּוֹתָ אֶת הַבִּקְעָה עַד מָצְאֲךָ מְקוֹם הַתָּוֶךְ אֲשֶׁר בַּבִּקְעָה וְגַלּוֹתָ מֵעַל פְּנֵי הַאֲדָמָה שִׁבְעָה סְלָעִים וְחָפַרְתָּ שָׁם שֶׁבַע אַמּוֹת בָּאֲדָמָה. אָז יֵרָאֶה לְפָנֶיךָ פִּי בְּאֵר. וְיָרַדְתָּ אַתָּה וַאֲנָשֶׁיךָ עֶשְׂרִים וְאַחַת מַעֲלָה, וְצֹהַר תִּפְתַּח לְךָ מִלְמַעְלָה לְהָאִיר לְךָ הַדֶּרֶךְ וְרָאוּ עֵינֶיךָ תַּחַת הָאַדָמָה מָקוֹם חָלָל רְחַב־יָדַיִם מְאֹד – שָׁם צָפוּנִים אוֹצְרוֹת עשֶׁר רַבִּים וַעֲצוּמִים אֲשֶׁר קָבְרוּ אֲבוֹת אֲבוֹתֶיךָ מַלְכֵי אֲרָם מִימֵי קֶדֶם בְּיוֹם בּוֹא עֲלֵיהֶם אָסוֹן וָשֶׁבֶר. וְנָשָׂאתָ אֶת הָאוֹצָרוֹת הָאֵלֶּה אֶל גְּנָזֶיךָ וְהָיוּ חֶצְיָם לְךָ וְחֶצְיָם תְּחַלֵּק לְעַמְּךָ חֵלֶק כְּחֵלֶק לְמִסְפַּר נַפְשׁוֹת כָּל בֵּית־אָב – מִן הַכֶּסֶף, הַזָּהָב, הַבַּרְזֶל וְהַנְּחֹשֶׁת וְכָל אֶבֶן טוֹבָה וִיקָרָה.

וַיַּעֲשׂוּ כֵּן. וַיִּמָּצֵא מִגִּנְזֵי הָאוֹצָרוֹת הַכֹּל לַכֹּל כַּאֲשֶׁר הִגִּידָה הַנְּבִיאָה.

וַיְהִי בְּהִוָּדַע הַדָּבָר לְאִישׁ אֲרָם וַתֵּעוֹר צָהֳלָה גְדוֹלָה בְּקֶרֶב הָאָרֶץ כִּי פָּתַח אֱלֹהֵי יִשְׂרָאֵל אֶת יָדוֹ הַגְּדוֹלָה אֶל מֶלֶךְ אֲרָם וְאֶל עַמּוֹ.

וַיִּשְּׂאוּ עַל גְּמַלִּים וְעַל חֲמוֹרִים שְׁלֹשֶׁת יָמִים וּשְׁלֹשֶׁת לֵילוֹת אוֹצָרוֹת רַבִּים וַעֲצוּמִים וַיּוֹבִילוּם אֶל גִּנְזֵי הַמֶּלֶךְ וַתִּגְדַּל שִׂמְחַת הַמֶּלֶךְ וְכָל הָעָם עַד מְאֹד.

אָז יִקְרָא רַעַמְאֵל לַעֲצָרָה גְדוֹלָה לְכָל שָׂרֵי הַמַּלְכוּת לְמִגָּדוֹל וְעַד קָטֹן, וּדְבוֹרָה יוֹשֶׁבֶת לִימִין הַמֶּלֶךְ. וַיִּשָּׂא דְבָרוֹ לֵאמֹר:

קְרָאתִיכֶם הַיּוֹם הַזֶּה לְמַעַן גַלּוֹת לְאָזְנְכֶם אֶת אֲשֶׁר עָלְתָה עַל לִבִּי לִגְמוֹל לִדְבוֹרָה הַנְּבִיאָה כְּכָל הַטּוֹבָה וְהַחֶסֶד הַגְּדוֹלִים מֵעֲרוֹךְ אֲשֶׁר הֶעֱנִיקָה לָנוּ בִּדְבַר אֱלֹהֵי יִשְׁרָאֵל.

וְעַתָּה חָלִילָה לָנוּ מִשְּׁלוֹחַ יָדֵינוּ בְּדָבָר מִן הַדְּבָרִים אֲשֶׁר בָּאוֹצָרוֹת הָאֵלֶּה טֶרֶם נִגְמֹל לַנְּבִיאָה כְּפָעֳלָהּ.

וְזֶה אֲשֶׁר עִם לִבִּי לְהַגִּיד לְאָזְנֵיכֶם:

הִנֵּה אֲנִי זָקַנְתִּי וּבְנִי יוֹרֵשׁ הָעֶצֶר, הֲדַרמֶלֶךְ, בָּחוּר גִּבּוֹר וּנְבוֹן־דַעַת אַדִּיר חֶפְצִי הוּא כִּי תְהִי הָעַלְמָה הַנְּבִיאָה לְאִשָּׁה לִבְנִי וְהָיְתָה מַלְכָּה עַל אֲרָם וְלֹא יָסוּף זֵכֶר הַנְּבִיאָה מִכִּסֵּא אֲרָם עַד עוֹלָם.

וַיְהִי כִּי שָׁמְעוּ הַשָּׂרִים אֶת דִבְרֵי הַמֶּלֶךְ וַיֹּאמְרוּ קוֹל אֶחָד: נָכוֹן וְיָשָׁר דְּבַר הַמֶּלֶךְ כִּנְכוֹן הַיּוֹם וְאֵין טוֹב מִמֶּנוּ.

וַיַּבִּיטוּ הַנֶּאֱסָפִים אֶל הַנְבִיאָה לָדַעַת מָה הַמַּעֲנֶה אֲשֶׁר בְּפִיהָ.

וַתָּקָם דְּבוֹרָה וַתֹּאמֶר לְאָזְנֵי הַמֶּלֶךְ וְהַשָּׂרִים:

אָכֵן דְּבַר הַמֶּלֶךְ יוֹכִיחַ אֶת נִדְבַת רוּחוֹ וְאֶת גֹדֶל נַפְשׁוֹ אֲשֶׁר אָמַר לִגְמוֹל לִי טוֹבָה וּגְדֻלָּה וּלְהוֹרִישׁ לִי כִּסֵּא מַלְכוּתוֹ. הֵן אַסִּירַת תּוֹדָה אָנֹכִי עַל זֹאת. וְאוּלָם אַל יֵרַע בְּעֵינֵי הַמֶּלֶךְ וּבְעֵינֵיכֶם כִּי לֹא אוּכַל לְמַלֵּא אַחַר דְּבַר הַמֶּלֶךְ. וְאֵין זֹאת בַּאֲשֶׁר לֹא אֹבֶה בְּקֶשֶׁר בְּרִית עִם אִישׁ אֲרָם, כִּי אִם בַּאֲשֶׁר נָתוּן לִבִּי לְאַחֵר וְגַם הוּא בֶּן אֲרָם, אִם כִּי אֵינֶנּוּ נִמְצָא כַּיּוֹם עִמָּדִי וְלֹא אֵדַע אָנָה פָּנָה בְּעִתּוֹ וְאֵי זֶה מְקוֹמוֹ כַּיּוֹם.

וַתּוֹסֶף דְּבוֹרָה לֵאמֹר: מֵעֵת יַלְדּוּתִי בִּימֵי עָנְיִי אֲנִי וּבֵיתִי, נִגְלָה אֵלָי נַעַר אֶחָד מִנַּעֲרֵי אֲרָם כְּמַלְאָךְ מוֹשִׁיעַ. וָאֵדַע כִּי נַפְשׁוֹ טְהוֹרָה כַּשָּׁמַיִם לָטֹהַר. אוֹתוֹ בָּחַרְתִּי לִי מֵאָז וְלוֹ אֲצַפֶּה עַד יוֹמִי הָאַחֲרוֹן.

– הֲתוֹאִילִי לִנְקוֹב שֵׁם בְּחִירֵךְ וּמִשְׁפַּחְתּוֹ וְנֵדְעָה – אָמַר הַמֶּלֶךְ כְּנֶחְפָּז.

– לַפִּידוֹת, הַבֵּן הַצָּעִיר אֲשֶׁר לְאַרְגוֹל שַׂר הַמֶּלֶךְ בַּאֲרַם דַּמֶּשֶׂק. אָכֵן יָדַעְתִּי – הוֹסִיפָה דַבֵּר דְּבוֹרָה – כִּי עֵין הַמֶּלֶךְ הָיְתָה לְרָעָה עַל הָאִישׁ וְעַל בֵּיתוֹ. אַךְ זֹאת הֵן הָיְתָה בַּיָמִים עָבָרוּ. וְעַתָּה אֵין אֶת חֶפְצִי לְהַעֲלוֹת נִשְׁכָּחוֹת. אַךְ זֹאת אֲגִידָהּ לְאָזְנֵי הַמֶּלֶךְ: אִם חָפֵץ הַמֶּלֶךְ לְכַפֵּר פְּנֵי בְּנֵי אַרְגוֹל וּלְתַקֵּן הַמְעֻוָּת – יְבֻקַּשׁ הַבָּחוּר לַפִּידוֹת וְיוּבָא אֵלַי. וְגַם כָּל הַנִּשְׁאָרִים מִבֵּית אַרְגוֹל יֵיטִיב הַמֶּלֶךְ עִמָּם.

וַיֹּאמֶר הַמֶּלֶךְ: כִּדְבָרַיִּךְ אֶעֱשֶׂה כִּי חֶפְצֵךְ כְּצַו עֶלְיוֹן לָנוּ. וְאוּלָם אֵיפֹה נִמְצָא אֶת הַבָּחוּר כַּיּוֹם וְהוּא וּבְנֵי בֵּיתוֹ נָדְדוּ מֵאֲרַם דַּמֶּשֶׂק זֶה שָׁנִים שֶׁבַע וָמָעְלָה? מִי יֵדַע אַיֵּה מְקוֹם חֲנוֹתוֹ כַּיּוֹם? אַךְ אַתְּ, הַנְּבִיאָה, הֲנָקֵל לָךְ לְנַחֵשׁ לָדַעַת אֶת מְקוֹמוֹ. הַגִּידִי נָא לָנוּ וְחִישׁ מַהֵר נְבִיאֶנּוּ.

– סְלַח נָא אֲדוֹנִי הַמֶּלֶךְ – עָנְתָה דְבוֹרָה – טֶרֶם תֵּדְעוּ אַתֶּם מָה הַנָּבִיא וּמַה מִשְׁפָּטוֹ. אֲנִי לֹא אֵדַע נַחֵשׁ וְלֹא אֵדַע דְּבַר סֵתֶר. אַךְ רוּחַ אֱלֹהִים תִּפְעַם בְּקִרְבִּי לְעִתִּים לָדַעַת נִסְתָּרוֹת וּלְהַגִּיד צְפוּנוֹת. וְאוּלָם לֹא לְחֶפְצִי אֲנִי וְלֹא לִדְבָרִי וְלֹא לְמִשְׁאַלְתִּי יֵעוֹר בְּלִבִּי רוּחַ מִמָּרוֹם כִּי אַךְ לְמַעַן דָּבָר נִכְבָּד וְנַעֲלֶה לְגַלּוֹת אֱמֶת, לְהַשְׁמִיד כָּזָב וּלְהַצְמִיחַ יֶשַׁע וְאוּלָם דְּבַר־יוֹמִי אֲנִי וְחֵפֶץ־חַיַּי מָה הֵמָּה כִּי יֵעָנֶה לָהֶם רוּחַ אֱלֹהִים?

וַיַּעַן הַמֶּלֶךְ וַיֹּאמַר: עַתָּה יָדַעְנוּ וַנָּבֶן כִּי נַעֲלָה נְבִיאַת הָאֱלֹהִים מֵאֲשֶׁר דִּמִּינוּ. וַיִּפֶן אֶל שָׂרָיו הַחֲכָמִים לֵאמֹר: הָבוּ נָא עֵצָה אַתֶּם אֵיכָה נְמַלֵּא חֵפֶץ הַנְּבִיאָה לִמְצוֹא אֶת הַבָּחוּר.

וַיָּקָם אֶחָד מִיּוֹעֲצֵי הַמֶּלֶךְ וַיֹּאמַר: יֵשׁ עִמִּי עֵצָה. יַשְׁמִיעַ הַמֶּלֶךְ אֶת דְּבָרוֹ בְּפִי מַלְאָכִים קַלִּים בְּכָל אַרְצוֹת אֲרָם וְהָאֲרָצוֹת הַשְּׁכֵנוֹת אֲשֶׁר כָּל אֲרַמִּי בַּאֲשֶׁר הוּא שָׁם אִם גֵר וְאִם גּוֹלֶה אִם נִכְבָּד וְאִם נִקְלֶה יָבוֹא אֶל עִיר בִּירַת הַמֶּלֶךְ לְקַבֵּל תְּשׁוּרָה מִגִּנְזֵי הַמֶּלֶךְ. וְהָיָה כָּל אִיש מִן הַבָּאִים יִכְתֹּב עַל לוּחַ אֶת שְׁמוֹ וְשֵׁם אָבִיו וּמְקוֹם מְגוּרָיו בְּעִיר הַבִּירָה וְיִמְסְרֶנּוּ אֶל אַחַד סוֹפְרֵי הַמֶּלֶךְ הַיּוֹשְׁבִים בְּשַׁעֲרֵי הָעִיר. וּמִדֵּי יוֹם בְּיוֹמוֹ עִם עֶרֶב יִקְרְאוּ סוֹפְרֵי הַמֶּלֶךְ אֶת לוּחוֹת הַפּוֹקְדִים אֶת עִיר הַבִּירָה עֲדֵי יִמְצְאוּ אֶת שֵׁם לַפִּידוֹת בֶּן אַרְגוֹל.

וַיַּעֲשׂוּ כֵּן.

וַתֵּשֶׁב דְּבוֹרָה יָמִים מִסְפָּר בְּאַרְמוֹן הַמֶּלֶךְ. וַיְהִי בַּיּוֹם הַתְּשִׁיעִי וַיּוּבָא לִפְנֵי הַמֶּלֶךְ גִּלָּיוֹן קָט וּבוֹ חָרוּת כַּדְּבָרִים הָאֵלֶּה: "לַפִּידוֹת בֶּן אַרְגוֹל, חֲסַר מִשְׁכָּן. מְקוֹם לִינָתוֹ לְיַד שַׁעַר הַחוֹמָה הַמִּזְרָחִי:

וַיּוּבָא בָּהּ בַּשָּׁעָה הַבָּחוּר לִפְנֵי הַמֶּלֶךְ בָּאַרְמוֹן וְהוּא לָבוּשׁ מַדִּים יְשָׁנִים וְעַל נְעָלָיו אָבָק וְאוּלָם מַרְאֵהוּ כְּלִיל־נֹעַם וַהֲדוּר־תֹּאַר.

וַיְהִי כִּי אָמַר לוֹ הַמֶּלֶךְ שָׁלוֹם וְדִבֵּר לְאָזְנָיו טוֹבוֹת וּבְרָכוֹת וְגַם אָמַר לוֹ כִּי הוּבֵא הוּבָא אֶל בְּחִירַת לִבּוֹ הִיא דְבוֹרָה הַנְּבִיאָה הָעִבְרִיָּה אֲשֶׁר בְּרִית כְּרוּתָה בֵּינוֹ וּבֵינָה – וַיִּתְפַּלֵּא הַבָּחוּר וְלֹא הֵבִין דָּבָר כִּי יָדוֹעַ יָדַע יַלְדָּה עִבְרִיָּה אֲשֶׁר שְׁמָהּ רֻחָמָה. וַיַּגֵּד כָּזֹאת וְכָזֹאת לַמֶּלֶךְ.

אָז יוּבָא הַבָּחוּר לִפְנֵי דְבוֹרָה וַיַּכִּירוּ אִישׁ רֵעֵהוּ וַיִּפְּלוּ אִישׁ עַל צַוָּארֵי רֵעֵהוּ וַיּוֹדוּ לָאֵל עַל רֹב חֲסָדָיו.

וַיָּחֹגוּ אֶת כְּלוּלוֹת דְּבוֹרָה עִם לַפִּידוֹת כְּהִחוֹג כְּלוּלוֹת בְּנֵי מְלָכִים וַתִּגְדַּל הַשִּׂמְחָה וַתִּרְבֶּה הַצָּהֳלָה בְּעִיר בִּירַת אֲרָם שִׁבְעָה יָמִים וְשִׁבְעָה לֵילוֹת.

וְגַם עִם הַנִּשְׁאָרִים מִמִּשְׁפַּחַת לַפִּידוֹת הֵיטִיב הַמֶּלֶךְ.

ז. תֹּמֶר דְּבוֹרָה    🔗

וַיְהִי אַחַר הַדְּבָרִים הָאֵלֶּה וַתּאֹמֶר דְּבוֹרָה לְאִמָּהּ וּלְאַחֶיהָ: הִכּוֹנוּ עַתָּה לַדֶּרֶךְ כִּי הִנֵּה בָּא הַיּוֹם צִפִּינוּ לוֹ שָׁנִים עַל שָׁנִים לָבוֹא לִשְׁכּוֹן בְּאֶרֶץ נַחֲלַת אֲבוֹתֵינוּ.

וַיְהִי בְּהַגִּיד דְּבוֹרָה לַמֶּלֶךְ אֶת חֶפְצָהּ וַיָּבֶן אֶל רוּחָהּ וַיֵּדַע אֶל לִבָּהּ וְלֹא אָמַר לַעֲצוֹר בָּהּ. וַיְשַׁלְחֶנָּה אוֹתָה וְאֶת אַנְשֵׁי בֵּיתָהּ בְּרֹב כָּבוֹד כְּדֶרֶךְ אַנְשֵׁי מַלְכוּת. וַיֵּצֵא גַם הַמֶּלֶךְ וְשָׂרָיו לְלַוּוֹתָהּ בַּדֶרֶךְ וַיִּשְׁלַח עִמָּהּ עַד בּוֹאָהּ אֶל אֶרֶץ יִשְׁרָאֵל פָּרָשִׁים אַנְשֵׁי חַיִל וְגַם גְּמַלִּים נוֹשְׂאֵי מִנְחָה וּבְרָכָה לָרֹב.

וַיְהִי בְּבוֹאָהּ אֶל אֶרֶץ בְּנֵי נַפְתָּלִי וַתֵּהוֹם כָּל הָאָרֶץ לֵאמֹר: בָּאָה דְבוֹרָה נְבִיאַת ה' אֲשֶׁר בַּאֲרָם אֶל אַרְצָהּ וְאֶל מוֹלַדְתָּהּ. וַיֵּצְאוּ אֵלֶיהָ עַם רָב וַיֹּאמְרוּ לָהּ: בּוֹאִי בְּשָׁלוֹם אֶל עַמֵּךְ וְאֶל מוֹלַדְתֵּךְ.

וַיְהִי כְּהִתְנַחֲלָהּ בְּהַר אֶפְרַיִם אֲשֶׁר לַאֲבוֹתֶיהָ וַיֵּדַע כָּל אִישׁ יִשְׁרָאֵל מִדָּן וְעַד בְּאֵר שֶׁבַע אֲשֶׁר – “דְּבוֹרָה אִשָּׁה נְבִיאָה אֵשֶׁת לַפִּידוֹת, הִיא שֹׁפְטָה אֶת יִשְׁרָאֵל בָּעֵת הַהִיא. וְהִיא יוֹשֶׁבֶת תַּחַת תֹּמֶר דְּבוֹרָה בֵּין הָרָמָה וּבֵין בֵּית אֵל בְּהַר אֶפְרַיִם, וַיַּעֲלוּ אֵלֶיהָ בְּנֵי יִשְׁרָאֵל לַמִּשְׁפָּט” (שׁוֹפְטִים ד', ד’–ה').